Сән ‘Аллаһын лүтфүнүн тәсәррүфатчысысанмы’?
«Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын» (РОМ. 12:10).
1. Аллаһын Кәламы бизи нәјә әмин едир?
АЛЛАҺЫН КӘЛАМЫ бизи дөнә-дөнә әмин едир ки, биз мәјуслуға гапыланда вә ја гәлбимиз сынанда Јеһова дадымыза чатаҹаг. Мәсәлән, бу тәсәлливериҹи сөзләрә диггәт јетир: «Рәбб јыхыланларын һамысына дајагдыр, гәдди әјиләнләрин һамысыны галдырыр». «О, сыныг гәлбләрә шәфа верәр, јараларыны сарыјар» (Мәз. 145:14; 147:3). Үстәлик, сәмави Атамызын Өзү дејир: «Сәнин сағ әлиндән тутуб “Горхма, сәнә көмәк едәҹәјәм” дејән Аллаһын Рәбб Мәнәм» (Јешаја 41:13).
2. Јеһова хидмәтчиләринә нечә көмәк едир?
2 Бәс ҝөзәҝөрүнмәз аләмдә јашајан Јеһова ‘әлимиздән’ неҹә ‘тутур’? Гәм-гүссә ‘гәддимизи әјәндә’ О бизи неҹә «галдырыр»? Јеһова Аллаһ бизә мүхтәлиф ҹүр көмәк едир. Мәсәлән, О Өз халгына мүгәддәс руһу васитәсилә «ән үстүн гүдрәт»и верир (2 Кор. 4:7; Јәһ. 14:16, 17). Аллаһын илһамланмыш Кәламы олан Мүгәддәс Китаб да Онун хидмәтчиләринә ҝүҹ-гүввә верир (Ибр. 4:12). Јеһова бизи даһа неҹәсә мөһкәмләндирирми? Ҹавабы Петерин јаздығы биринҹи мәктубдан тапмаг олар.
‘Аллаһын чохҹәһәтли лүтфү’
3. а) Һәвари Петер сынаглар һагда нә дејиб? б) Петерин биринҹи мәктубунун сонунда нә мүзакирә едилир?
3 Мәсһ олунмуш мәсиһчиләрә үнванладығы мәктубунда һәвари Петер јазыр ки, онларын севиниб шадланмаға тутарлы сәбәбләри вар, чүнки габагда онлары бөјүк мүкафат ҝөзләјир. Сонра онларын ‘мүхтәлиф имтаһанлардан өтрү бир аз мүддәт кәдәрләнмәли’ олдугларыны әлавә едир (1 Пет. 1:1-6). Бурадакы «мүхтәлиф» сөзүнә диггәт јетирәк. Бу сөз ҝөстәрир ки, сынаглар мүхтәлиф олур. Амма Петер һәмиманлыларыны шиддәтли сынагларын өһдәсиндән ҝәлиб-ҝәлмәјәҹәкләринә даир ниҝаран гојуб мәктубуну бурада битирмир. Әксинә, онлары әмин едир ки, Јеһова истәнилән сынагларын өһдәсиндән ҝәлмәкдә мәсиһчиләрә көмәк едәҹәк. Бу һагда Петерин ‘һәр шејин ахырынын јахын’ олдуғуна даир бәзи фикирләр јүрүтдүјү мәктубунун сонунда охумаг олар (1 Пет. 4:7).
4. Нәјә ҝөрә 1 Петер 4:10 ајәсиндәки сөзләр бизә тәсәлли верир?
4 Петер јазыр: «Һәр кәс, Аллаһын чохҹәһәтли лүтфүнүн јахшы тәсәррүфатчысы кими, алдығы әнам илә бир-биринә хидмәт етсин» (1 Пет. 4:10). Орижинал мәтнә әсасән, Петер бу ајәдә дә 1 Петер 1:6 ајәсиндә ишләтдији «мүхтәлиф» сөзүндән истифадә едир. О, санки дејир: «Сынаглар мүхтәлиф олдуғу кими, Аллаһын лүтфү дә чохҹәһәтлидир». Нәјә ҝөрә бу фикир тәсәлливериҹидир? Чүнки бу о демәкдир ки, һансы сынагларла гаршылашаҹағымыздан асылы олмајараг, Аллаһын лүтфү һәмишә көмәјимизә чатаҹаг. Аллаһын Өз лүтфүнү кимләрин васитәсилә ифадә етдијинә фикир вердинизми? Бәли, һәмиманлыларымыз васитәсилә.
‘Бир-биринизә хидмәт един’
5. а) Һәр мәсиһчи нә етмәлидир? б) Һансы суаллар јараныр?
5 Петер мәсиһчи јығынҹағынын бүтүн үзвләринә мүраҹиәт едәрәк дејир: «Һәр шејдән әввәл бир-биринизә ҹошғун мәһәббәтиниз олсун». Сонра әлавә едир: «Һәр кәс... алдығы әнам илә бир-биринә хидмәт етсин» (1 Пет. 4:8, 10). Беләликлә, јығынҹағын һәр үзвү өз һәмиманлыларыны мөһкәмләндирмәлидир. Јеһова Өзүнә мәхсус олан чох гијмәтли бир шеји бизә һәвалә едиб вә биз ону башгалары илә бөлүшмәк мәсулијјәти дашыјырыг. Бу дәјәрли шеј нәдир? Петер ону «әнам» адландырыр. Бу әнам нәдир? ‘Бир-биримизә хидмәт едәркән’ ондан неҹә истифадә едирик?
6. Аллаһын мәсиһчиләрә бәхш етдији әнамлардан бәзиләри һансылардыр?
6 Аллаһын Кәламында ‘һәр бир јахшы бәхшишин вә һәр камил һәдијјәнин јухарыдан’ олдуғу дејилир (Јаг. 1:17). Һәгигәтән дә, Јеһованын Өз халгына вердији һәр бир бәхшиш вә ја әнам Онун лүтфүнүн тәзаһүрүдүр. Аллаһын ҝөзәл әнамларындан бири мүгәддәс руһдур. Мүгәддәс руһ бизә Аллаһын ҝөзүндә гијмәтли олан мәһәббәт, јахшылыг вә һәлимлик кими хүсусијјәтләри инкишаф етдирмәјә көмәк едир. Бу хүсусијјәтләр исә, өз нөвбәсиндә, бизи һәмиманлыларымыза мәһәббәт ҝөстәрмәјә вә онлара јардым әлимизи узатмаға тәшвиг едир. Әсил һикмәт вә билик мүгәддәс руһун көмәји илә алдығымыз јахшы әнамлардан бәзиләридир (1 Кор. 2:10-16; Галат. 5:22, 23). Ҝүҹ, баҹарыг вә истедадларымыз да әнамдыр вә онларын көмәјилә дә биз сәмави Атамыза шәрәф вә иззәт ҝәтирә биләрик. Биз баҹарыг вә хүсусијјәтләримиздән елә истифадә етмәлијик ки, Аллаһ бизим васитәмизлә Өз лүтфүнү баҹы-гардашларымыза тәзаһүр етдирә билсин.
‘Әнам илә бир-биримизә’ неҹә ‘хидмәт етмәлијик’?
7. а) 1 Петер 4:10 ајәси алдығымыз «әнам» һаггында нәји ҝөстәрир? б) Өзүмүзә һансы суаллары вермәлијик вә нәјә ҝөрә?
7 Петер алдығымыз әнамлар һагда һәмчинин дејир: «Һәр кәс... алдығы әнам илә бир-биринә хидмәт етсин». 1 Петер 4:10 ајәсиндән ҝөрдүјүмүз кими, һәр биримиз «әнам», јәни кејфијјәтләр вә баҹарыглар алмышыг. Онлар нәинки бири-бириндән фәргләнир, һәтта өлчүләри дә мүхтәлиф ола биләр. Бунунла белә, Аллаһын Кәламы һәр биримизи ‘алдығымыз әнам илә бир-биримизә хидмәт етмәјә’ тәшвиг едир. ‘Әнам илә јахшы тәсәррүфатчы кими хидмәт един’ әмрдир. Буна ҝөрә дә өзүмүздән сорушмалыјыг: «Мәнә һәвалә олунан әнамлардан баҹы-гардашлары мөһкәмләндирмәк үчүн истифадә едирәмми?» (1 Тимотејә 5:9, 10 ајәләри илә мүгајисә ет.) «Ола биләрми ки, мән Јеһованын вердији габилијјәт вә баҹарығымдан әсас етибарилә өз хејрим үчүн, мәсәлән, варланмаг вә ја ҹәмијјәтдә јүксәк мөвге тутмаг үчүн истифадә едирәм?» (1 Кор. 4:7). Әҝәр әнамларымыздан башгаларына ‘хидмәт етмәк’ үчүн истифадә едириксә, Јеһова биздән разы галыр. (Сүл. мәс. 19:17; Ибраниләрә 13:16 ајәсини оху.)
8, 9. а) Бүтүн дүнјадакы һәмиманлыларымыз бир-биринә неҹә хидмәт едир? б) Јығынҹағыныздакы баҹы-гардашлар бир-биринә неҹә көмәк едир?
8 Аллаһын Кәламында биринҹи әсрин мәсиһчиләринин бир-биринә мүхтәлиф үсулларла хидмәт етдикләри һагда јазылыб. (Ромалылара 15:25, 26; 2 Тимотејә 1:16-18 ајәләрини оху.) Әнамларыны һәмиманлыларынын мәнафеји үчүн истифадә етмәк әмринә мүасир һәгиги мәсиһчиләр дә сидг-үрәкдән әмәл едирләр. Ҝәлин онларын буну неҹә етдикләринә нәзәр салаг.
9 Бир чох гардашлар јығынҹаг ҝөрүшләринин бәндләринә һазырлашмаг үчүн һәр ај чохлу вахт сәрф едирләр. Арашдырма заманы тапдыглары руһани мирвариләри ҝөрүшләрдә бөлүшәндә онларын анлајышлы сөзләри јығынҹағын бүтүн үзвләрини мәтин олмаға тәшвиг едир (1 Тим. 5:17). Бир чох баҹы-гардашлар һәмиманлыларына гаршы меһрибан вә шәфгәтли олмалары илә танынырлар (Ром. 12:15). Бәзиләри кәдәрли оланлара мүнтәзәм баш чәкир вә онларла бирҝә дуа едирләр (1 Салон. 5:14). Башгалары сынагларла үзләшән баҹы вә гардашлара үрәкачан, руһландырыҹы мәктублар јазырлар. Диҝәрләри физики имканлары мәһдуд оланлара јығынҹаг ҝөрүшләринә ҝәлмәјә көмәк едирләр. Минләрлә Шаһид фәлакәт нәтиҹәсиндә зәрәр чәкән һәмиманлыларына евләрини јенидән бәрпа етмәјә көмәк едирләр. Бу гардаш-баҹыларымызын ҝөстәрдији зәриф мәһәббәт вә практики көмәк «Аллаһын чохҹәһәтли лүтфүнүн» тәзаһүрүдүр. (1 Петер 4:11 ајәсини оху.)
Һансы даһа ваҹибдир?
10. а) Павел диггәтини Аллаһа хидмәтин һансы ики саһәсинә ҹәмләмишди? б) Бу ҝүн биз Павели неҹә тәглид едирик?
10 Аллаһын хидмәтчиләринә бир-биринин хејринә истифадә етмәк үчүн әнам верилмәклә јанашы, башгалары илә бөлүшмәк үчүн бир хәбәр дә һәвалә олунуб. Һәвари Павел Јеһоваја хидмәтинин бу ики саһәсини дәрк едирди. О, Ефесдәки јығынҹаға үнванладығы мәктубунда онларын хејри үчүн она верилмиш «Аллаһын лүтфүнүн идарә олунмасы һаггында» јазмышды (Ефес. 3:2, И–93). О, һәмчинин демишди: ‘Аллаһ бизи Мүждәни јајмаг тапшырығына лајиг ҝөрүб’ (1 Салон. 2:4). Павел кими, биз дә баша дүшүрүк ки, бизә Аллаһын Падшаһлығы һаггында тәблиғ етмәк тапшырығы һәвалә олунуб. Бу ишдә сәјлә иштирак етмәклә Павелин јорулмаз тәблиғчи кими гојдуғу нүмунәни тәглид етмиш олуруг (Һәв. иш. 20:20, 21; 1 Кор. 11:1). Биз билирик ки, Падшаһлыг һаггында хәбәрин тәблиғи инсанларын һәјатыны хилас едә биләр. Ејни заманда, Павелин нүмунәсини тәглид едәрәк һәмиманлыларымыза «руһани бир әнам бәхш етмәк» үчүн әлимизә дүшән һәр фүрсәтдән истифадә етмәјә чалышырыг. (Ромалылара 1:11, 12; 10:13-15 ајәләрини оху.)
11. Хош хәбәри тәблиғ етмәк вә гардашларымызы мөһкәмләндирмәк тапшырығына неҹә бахмалыјыг?
11 Хидмәтин бу ики саһәсиндән һансы даһа ваҹибдир? Бу суалы вермәк гушун ики ганадындан һансынын даһа ваҹиб олдуғуну сорушмаға бәнзәјир. Ҹаваб ајдындыр. Учмаг үчүн гуша ики ганад ҝәрәкдир. Буна бәнзәр тәрздә, мәсиһчиләрдән тәләб олунан һәр шејә там әмәл етмәк үчүн биз Аллаһа хидмәтимизин һәр ики саһәсиндә дә иштирак етмәлијик. Буна ҝөрә дә биз, хош хәбәри тәблиғ етмәк вә һәмиманлыларымызы мөһкәмләндирмәк тапшырығыны ики тапшырыг кими гәбул етмәк әвәзинә, онлара һәвари Петер вә Павел кими јанашырыг, јәни бир-бирини тамамлајан бир мәсулијјәт кими бахырыг. Неҹә?
12. Биз Јеһованын әлиндә бир аләт кими неҹә хидмәт едирик?
12 Аллаһын Падшаһлығы һагда руһландырыҹы мүждәнин инсанларын үрәјинә јол тапмасы үчүн хош хәбәрин тәблиғчиләри кими малик олдуғумуз мүәллимлик мәһарәтимиздән истифадә едирик. Беләликлә биз үмид едирик ки, инсанлара Мәсиһин шаҝирди олмаға көмәк едәҹәјик. Амма ејни заманда, Аллаһын лүтфүнүн тәзаһүрү олан руһландырыҹы сөзләрлә вә фајдалы ишләрлә һәмиманлыларымызы мөһкәмләндирмәк үчүн баҹарыг вә башга әнамларымыздан истифадә едирик (Сүл. мәс. 3:27; 12:25). Белә етмәклә биз үмид едирик ки, онлара Мәсиһин шаҝирди олараг галмаға көмәк едәҹәјик. Һәр ики һалда — һәм тәблиғ едәрәк, һәм дә ‘бир-биримизә хидмәт едәрәк’ Јеһованын әлиндә бир аләт олмаг шәрәфинә лајиг ҝөрүлүрүк (Галат. 6:10).
«Бир-биринизи шәфгәтлә севин»
13. ‘Бир-биримизә хидмәт етмәсәк’, нә баш верәҹәк?
13 Павел һәмиманлыларыны тәшвиг едирди: «Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын» (Ром. 12:10). Бәли, гардашлары севмәк бүтүн үрәкдән Аллаһын лүтфүнүн тәсәррүфатчысы кими хидмәт етмәк демәкдир. Биз анлајырыг ки, Шејтан бизи ‘бир-биримизә хидмәт етмәкдән’ јајындырмаға мүвәффәг олса, бирлијимизи позмуш олаҹаг (Колос. 3:14). Арамызда бирлик олмадыгда исә тәблиғ хидмәтиндә сәјимиз зәифләјәҹәк. Шејтан јахшы билир ки, бизи «јерә ендирмәк» үчүн «ганадымызын» бирини сындырмаг кифајәтдир.
14. ‘Бир-биримизә хидмәт етмәјимиз’ кимләрә фајда ҝәтирир? Нүмунә чәкин.
14 ‘Бир-биримизә хидмәт етмәк’ јалныз Аллаһын лүтфүнү аланлара дејил, бу лүтфү чатдыранлара да фајда ҝәтирир (Сүл. мәс. 11:25). Мисал үчүн, Иллинојсда (АБШ) хидмәт едән Рајен вә Рони ҹүтлүјүнүн нүмунәсинә нәзәр салаг. Онлар «Катрина» гасырғасынын јүзләрлә һәмиманлыларынын евини дағытдығыны ешидәндә гардашларына мәһәббәт онлары ишдән чыхмаға вә мәнзилләрини сатмаға, ишләнмиш бир трејлер алыб, јашамаг үчүн јарарлы вәзијјәтә салараг Луизиана штатына гәдәр 1 400 километр ҝетмәјә тәшвиг етди. Бурада јашадыглары тәхминән бир ил әрзиндә онлар вахтларыны, ҝүҹләрини вә вәсаитләрини гардашларына көмәк етмәјә сәрф етдиләр. 29 јашлы Рајен гардаш дејир: «Бу ишдә иштирак етмәк мәни Аллаһа даһа да јахынлашдырды. Јеһованын Өз халгынын гајғысына неҹә галдығынын шаһиди олдум». О әлавә едир: «Јашҹа мәндән бөјүк олан гардашларла бирҝә чалышараг баҹы-гардашларын гајғысына галмаг барәдә чох шеј өјрәндим. Мән ҝөрдүм ки, Јеһованын тәшкилатында биз ҝәнҹләр үчүн иш чохдур». Онун һәјат јолдашы 25 јашлы Рони исә дејир: «Чох шадам ки, башгаларына көмәк етмәк имканым олду. Һеч вахт өзүмү белә хошбәхт һисс етмәмишдим. Мән билирәм ки, бу тәҹрүбәнин сонралар да мәнә бөјүк фајдасы олаҹаг».
15. Даима Аллаһын лүтфүнүн тәсәррүфатчылары кими бир-биримизә хидмәт етмәк үчүн һансы тутарлы сәбәбләримиз вар?
15 Бәли, Аллаһын хош хәбәри тәблиғ етмәк вә һәмиманлыларымызы мөһкәмләндирмәк әмринә табе олмаг һамыја хејир-дуалар ҝәтирир. Көмәк етдијимиз инсанлар руһән мөһкәмләнир, биз исә јалныз вермәјин ҝәтирдији севинҹи дадмыш олуруг (Һәв. иш. 20:35). Јығынҹағын үзвләри бир-биринә сәмими мараг ҝөстәрәндә бир-бирләринә бәсләдикләри мәһәббәт даһа мөһкәмләнир. Үстәлик, бир-биримизә ҝөстәрдијимиз мәһәббәт вә гајғы бизим һәгиги мәсиһчиләр олдуғумузу ҝөстәрир. Иса демишди: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһ. 13:35). Ән ваҹиби исә, Аллаһын дарда олан хидмәтчиләрини мөһкәмләндирмәк арзусу јерүзү хидмәтчиләриндә әкс олундуғу үчүн бүтүн иззәт вә һөрмәт гајғыкеш Атамыз Јеһоваја чатыр. Буна ҝөрә, ‘Аллаһын лүтфүнүн тәсәррүфатчылары кими, алдығымыз әнам илә бир-биримизә хидмәт етмәк’ үчүн тутарлы сәбәбләримиз вар. Сән буну даима едәҹәксәнми? (Ибраниләрә 6:10 ајәсини оху.)
Јадыныздадырмы?
• Јеһова Өз хидмәтчиләрини неҹә мөһкәмләндирир?
• Бизә нә һәвалә олунуб?
• Биз һәмиманлыларымыза неҹә хидмәт едә биләрик?
• ‘Алдығымыз әнам илә бир-биримизә хидмәт етмәјә’ бизи нә тәшвиг едир?
[13-ҹү сәһифәдәки шәкилләр]
Сән өз ‘әнамындан’ башгаларына хидмәт етмәк, јохса өз хејрин үчүн истифадә едирсән?
[15-ҹи сәһифәдәки шәкилләр]
Биз хош хәбәри тәблиғ едир вә һәмиманлыларымыза дәстәк олуруг
[16-ҹы сәһифәдәки шәкил]
Бәрпа ишләриндә иштирак едән көнүллүләр тәрифә лајигдирләр