«Аллаһын сизә әманәт етдији сүрүнү отарын»
«Аллаһын сизә әманәт етдији сүрүнү отарын вә буну зорла јох, көнүл хошлуғу илә... един» (1 ПЕТ. 5:2).
1. Петер илк мәктубуну јазанда мәсиһчиләр һансы чәтинликләрлә гаршылашырдылар?
ИМПЕРАТОР Нерон Ромада мәсиһчиләри тәгиб етмәјә башламаздан бир гәдәр өнҹә һәвари Петер о шәһәрдәки һәмиманлыларына илк мәктубуну јазмышды. О, иман гардашларыны мөһкәмләндирмәк истәјирди, чүнки Иблис мәсиһчиләри удмаг үчүн нәрилдәјән шир кими ҝәзирди. Она гаршы мөһкәм дурмаг үчүн мәсиһчиләр «ајыг-сајыг» олмалы вә «тәвазөкар олуб гүдрәтли Аллаһа» бојун әјмәли идиләр (1 Пет. 5:6, 8). Онлара һәмчинин араларындакы бирлији горумаг лазым иди. Бунун үчүн онлар бир-бирләри илә дидишмәли дејилдиләр, чүнки бу, онлары мәһв едә биләрди (Галат. 5:15).
2, 3. Биз кимә гаршы мүбаризә апармалыјыг? Бу вә нөвбәти мәгаләдә нә мүзакирә олунаҹаг?
2 Демәк олар ки, биз дә ејни вәзијјәтдәјик. Иблис бизи удмаг үчүн фүрсәт ахтарыр (Вәһј 12:12). Гаршыда бизи «елә бир бөјүк мүсибәт» ҝөзләјир ки, «беләси дүнја јаранандан бәри олмамышдыр» (Мат. 24:21). Биринҹи әсрдә јашајан мәсиһчиләр бош-бош шејләрдән өтрү мүбаһисә етмәкдән өзләрини ҝөзләмәли идиләр. Бу, бизә дә аиддир. Буна ҝөрә дә бәзән тәҹрүбәли ағсаггалларын көмәјинә еһтијаҹымыз јараныр.
3 Ҝәлин ағсаггалларын Аллаһын онлара «әманәт етдији сүрүнү» отармаг шәрәфинә ҝөрә миннәтдарлыгларыны неҹә артыра биләҹәкләрини нәзәрдән кечирәк (1 Пет. 5:2). Сонра биз онлара верилән бу тапшырығы дүзҝүн шәкилдә неҹә иҹра етмәли олдугларыны мүзакирә едәҹәјик. Нөвбәти мәгаләдә исә јығынҹагда «зәһмәт чәкән», она «рәһбәрлик едән» гардашлара һөрмәт ҝөстәрмәјин јолларындан данышаҹағыг (1 Салон. 5:12). Бунлары мүзакирә етмәк бизә баш дүшмәнимиз олан Шејтана гаршы мөһкәм дурмаға вә әслиндә онунла мүбаризә апардығымызы јадда сахламаға көмәк едәҹәк (Ефес. 6:12).
Аллаһын сүрүсүнү отарын
4, 5. Ағсаггаллар сүрүјә неҹә јанашмалыдырлар? Нүмунә әсасында изаһ ет.
4 Петер биринҹи әсрдәки ағсаггаллары онлара әманәт олунан сүрүјә Аллаһын ҝөзү илә бахмаға чағырырды. (1 Петер 5:1, 2 ајәләрини оху.) Петер мәсиһчи јығынҹағынын сүтунларындан бири сајылса да, ағсаггалларла данышаркән өзүнү онлардан үстүн тутмурду. Әксинә, Петер онлара бир һәмкар кими нәсиһәт верирди (Галат. 2:9). Онун кими, Рәһбәрлик Шурасы да јығынҹаг ағсаггалларыны тәшвиг едир ки, Аллаһын сүрүсүнү отармаг мәсулијјәтини, чәтин дә олса, иҹра етмәјә чалышсынлар.
5 Петер гејд етмишди ки, ағсаггаллар «Аллаһын» онлара әманәт етдији сүрүнү отармалыдырлар. Бу сүрүнүн Јеһоваја вә Иса Мәсиһә мәхсус олдуғуну һәмишә јадда сахламаг олдугҹа ваҹиб иди. Ахы онлар Аллаһын сүрүсүнә неҹә нәзарәт етдикләри барәдә Она һесабат верәҹәкдиләр. Туталым, бир јахын достун һараса ҝедир вә ушагларыны сәнә тапшырыр. Һәр һалда, сән онлара јахшы бахаҹагсан вә јемәкләрини вахтлы-вахтында верәҹәксән. Бири хәстәләнәрсә, јәгин, она лазыми тибби јардым ҝөстәрилмәсинин гајғысына галаҹагсан. Ағсаггаллар «Аллаһын Өз Оғлунун ганы баһасына алдығы јығынҹағыны» мәһз белә отармалыдырлар (Һәв. иш. 20:28). Онлар јадда сахлајырлар ки, һәр гојун Мәсиһин гијмәтли ганы баһасына алыныб. Ағсаггаллар Аллаһ гаршысында мәсулијјәт дашыдыглары үчүн сүрүнү гидаландырмалы, мүдафиә етмәли вә гајғысына галмалыдырлар.
6. Гәдимдә јашајан чобанларын вәзифәсинә нә дахил иди?
6 Мүгәддәс Китабын јазылдығы дөврдә чобанларын вәзифәсинин нәдән ибарәт олдуғуна нәзәр салаг. Чобанлар гојун отараркән ҝүндүзүн истисинә вә ҝеҹәнин сојуғуна гатлашмалы олурдулар (Јар. 31:40). Онлар һәтта гојунларындан өтрү һәјатларыны тәһлүкәјә атырдылар. Ҝәнҹ јашларында чобанлыг едән Давуд гојунларыны шир вә ајы кими вәһши һејванларын пәнҹәсиндән гуртарырды. Давуд бу һагда демишди: «[Вәһши һејванын] боғазынын түкләриндән тутараг чырпыб өлдүрәрдим» (1 Шам. 17:34, 35). О, олдугҹа ҹәсарәтли иди, аз гала һејванын ағзынын ичинә ҝирирди! Лакин о, һеч вахт ҝери чәкилмирди вә гојунларыны вәһши һејванларын дишиндән гуртарырды.
7. Ағсаггаллар гојунлары Шејтанын ағзындан неҹә чәкиб чыхара биләрләр?
7 Бу ҝүн дә Иблис Аллаһын халгына шир кими һүҹум едәндә ағсаггаллар онун һүҹумларыны дәф етмәлидирләр. Неҹә? Мәҹази диллә десәк, ағсаггаллар гојуну ҹәсарәтлә онун ағзындан чәкиб чыхартмалыдырлар. Онлар, белә десәк, вәһши һејванын боғазынын түкләриндән тутараг гојуну хилас едә биләрләр. Ағсаггаллар Шејтанын тәләсинин бир аддымлығында олан еһтијатсыз гардашларла әтрафлы сөһбәт етмәли, онлары баша салмалыдырлар. (Јәһуда 22, 23 ајәләрини оху.) Әлбәттә ки, ағсаггаллар Јеһованын көмәји олмадан буну едә билмәзләр. Онлар јараланмыш гојунларла зәриф давранырлар, јараларыны сарыјырлар вә онлара көмәк етмәк үчүн сакитләшдириҹи мәлһәм олан Аллаһын Кәламындан истифадә едирләр.
8. Ағсаггаллар сүрүнү һара јөнәлдирләр вә буну неҹә едирләр?
8 Чобанлар һәм дә өз сүрүләрини јашыл чәмәнликләрә вә бол су олан јерләрә апарырлар. Ағсаггаллар да баҹы-гардашлары ҝөрүшләрдә мүнтәзәм иштирак етмәјә тәшвиг етмәклә онлары руһани гида илә зәнҝин олан јығынҹаға јөнәлдирләр. Бурада онлар «вахтлы-вахтында јемәк пајларыны» ала биләрләр (Мат. 24:45). Бәзән ағсаггаллар чохлу вахт сәрф едәрәк руһани ҹәһәтдән хәстә оланлара Аллаһын Кәламындан гидаланмаға көмәк едирләр. Јолуну азмыш гојун сүрүјә гајытмаг истәјә биләр. Бу заман ағсаггаллар өз һәмиманлысыны горхутмаг әвәзинә, она Мүгәддәс Китаб принсипләрини вә бу принсипләри һәјатында неҹә тәтбиг едә биләҹәјини мүлајимликлә изаһ едирләр.
9, 10. Ағсаггаллар руһани ҹәһәтдән хәстә оланлара неҹә көмәк едә биләрләр?
9 Хәстәләнәндә һансы һәкимин сәни мүајинә етмәсини истәјәрдин? Нөвбәти хәстәни гәбул етмәк үчүн сәни динләмәдән тез-тәләсик дәрман јазан, јохса әксинә, сәнә диггәтлә гулаг асан, хәстәлијини изаһ едән вә бир нечә мүалиҹә үсулуну тәклиф едән һәкимин?
10 Ејнилә, ағсаггаллар руһани ҹәһәтдән хәстә олан баҹы вә ја гардаша диггәтлә гулаг асмалы вә алдыглары јарадан сағалмаға көмәк етмәлидирләр. Бунунла онлар, санки, «Јеһованын ады илә онун башына јағ» сүртүрләр. (Јагуб 5:14, 15 ајәләрини оху.) Ҝилеад мәлһәми кими, Аллаһын Кәламы хәстәјә сакитләшдириҹи тәсир ҝөстәрә биләр (Јер. 8:22; Јез. 34:16). Гәтијјәтсиз инсан Мүгәддәс Китаб принсипләрини тәтбиг едәндә јенидән руһани таразлығы бәрпа едә биләр. Бәли, хәстә нараһатчылыгларыны бөлүшәндә ағсаггаллар она гулаг асмагла вә онунла бирликдә дуа етмәклә она чох көмәк етмиш олурлар.
«Зорла јох, көнүл хошлуғу илә»
11. Ағсаггаллары Аллаһын сүрүсүнү көнүл хошлуғу илә отармаға нә тәшвиг едир?
11 Сонра Петер ағсаггаллара вәзифәләрини неҹә иҹра едиб-етмәмәли олдугларыны хатырлатды. Ағсаггаллар Аллаһын сүрүсүнү «зорла јох, көнүл хошлуғу илә» отармалыдырлар. Ағсаггаллары баҹы-гардашлара «көнүл хошлуғу илә» хидмәт етмәјә нә тәшвиг едир? Ҝәлин јадымыза салаг, Петери Исанын гузуларыны отармаға, онлары бәсләмәјә нә тәшвиг едирди? Ағасына олан мәһәббәт (Јәһ. 21:15—17). Мәһз мәһәббәт ағсаггаллары «артыг өзләри үчүн дејил, онларын уғрунда өлүб дирилмиш шәхс үчүн» јашамаға тәшвиг едир (2 Кор. 5:14, 15). Исаја, еләҹә дә Аллаһа вә гардашларына олан мәһәббәт ағсаггаллары өз ҝүҹләрини, вәсаитләрини вә вахтларыны сәрф едәрәк сүрүјә хидмәт етмәјә тәшвиг едир (Мат. 22:37—39). Онлар бу фәдакарлығы ҹандәрди јох, көнүл хошлуғу илә ҝөстәрирләр.
12. Павел нә дәрәҹәдә фәдакар иди?
12 Ағсаггаллар сүрүнүн гајғысына галаркән нә дәрәҹәдә фәдакар олмалыдырлар? Павел Исаны тәглид етдији кими, онлар да ону тәглид етмәлидирләр (1 Кор. 11:1). Салоникидәки гардашлары үрәкдән севән Павел вә онун әмәкдашлары онлара нәинки Аллаһын хош хәбәрини чатдырмаға шад идиләр, һәтта өз ҹанларыны белә вермәјә һазыр идиләр. Онлар, «көрпәсини әмиздириб әзизләјән бир ана кими», буну нәвазишлә едирдиләр (1 Салон. 2:7, 8). Павел көрпәсини әмиздирән ананын ушағына олан һиссләрини чох ҝөзәл баша дүшүрдү. О билирди ки, ана көрпәси үчүн һәр шеј етмәјә, һәтта ҝеҹә дуруб она јемәк вермәјә һазырдыр.
13. Ағсаггаллар һансы саһәдә таразлығы горумалыдырлар?
13 Ағсаггаллар јығынҹагдакы мәсулијјәтләри илә аиләдәки вәзифәләри арасында таразлығы горујуб сахламалыдырлар (1 Тим. 5:8). Ағсаггалларын јығынҹаға сәрф етдикләри вахт чох дәјәрлидир, чүнки онлар бу вахты аиләләринә сәрф едә биләрдиләр. Бу ики мәсулијјәтин арасында таразлығы горумағын үсулларындан бири вахташыры олараг башгаларыны аиләви ибадәт ахшамына дәвәт етмәкдир. Јапонијада ағсаггал кими хидмәт едән Масанао гардаш нечә илләр иди ки, субајлары вә аталары һәгигәтдә олмајан ушаглары аналары илә бирҝә аиләви ибадәтә дәвәт едирди. Масанаонун көмәк етдији инсанларын бәзиләри бир мүддәтдән сонра ағсаггал олдулар вә инди онун ҝөзәл нүмунәсини изләјирләр.
Һагсыз газанҹы рәдд един, сүрүнү ҹанла-башла отарын
14, 15. Нәјә ҝөрә ағсаггаллар «һагсыз газанҹа севҝидән» өзләрини ҝөзләмәлидирләр вә онлар бу саһәдә һәвари Павелдән һансы нүмунәни ҝөтүрә биләрләр?
14 Петер һәмчинин ағсаггаллары тәшвиг едирди ки, сүрүнү «һагсыз газанҹа севҝидән јох, ҹанла-башла» отарсынлар. Јығынҹаг ишләри ағсаггаллардан чохлу вахт тәләб етсә дә, онлар бунун мүгабилиндә һеч нә уммурлар. Петер һәмкарлары олан ағсаггаллары сүрүнү «һагсыз газанҹа севҝидән» ирәли ҝәләрәк отармаг тәһлүкәси барәдә хәбәрдар етмәји лазым билмишди. Белә бир тәһлүкәнин мөвҹуд олдуғуну «Бөјүк Бабил»ин дин рәһбәрләринин сүрдүјү һәјат тәрзиндән ҝөрмәк олар: бу ҝүн бир чох инсанлар ҝүҹ-бәла илә доландығы һалда, онлар ҹаһ-ҹәлал ичиндә јашајырлар (Вәһј 18:2, 3). Буна ҝөрә дә мәсиһчи ағсаггаллар еһтијатлы олмалыдырлар ки, үрәкләриндә белә бир мејил јаранмасын.
15 Павел мәсиһчи ағсаггаллара ҝөзәл нүмунә гојуб. О, һәвари иди вә Салоникидәки мәсиһчиләрә «ағыр јүк» ола биләрди, амма о, «һавајы јерә һеч кәсин чөрәјини» јемәмишди. «Әксинә, ҝеҹә-ҝүндүз тәр төкүб» зәһмәт чәкирди (2 Салон. 3:8). Бу ҝүн дә бир чох ағсаггаллар, еләҹә дә сәјјар хидмәтдә олан нәзарәтчиләр бу саһәдә ҝөзәл нүмунә гојурлар. Бу гардашлар һәмиманлыларынын онлара ҝөстәрдији гонагпәрвәрлији гәбул етсәләр дә, һеч кими хәрҹә салмырлар (1 Салон. 2:9).
16. Сүрүнү «ҹанла-башла» отармаг нә демәкдир?
16 Ағсаггаллар сүрүнү «ҹанла-башла» отарырлар. Буну сүрүјә көмәк едәркән ҝөстәрдикләри фәдакарлыг руһундан ҝөрмәк олар. Амма бу о демәк дејил ки, гајғыкеш ағсаггаллар баҹы-гардашлары Јеһоваја хидмәт етмәјә мәҹбур едирләр, јахуд да араларында рәгабәт салырлар (Галат. 5:26). Ағсаггаллар дәрк едирләр ки, Аллаһын һәр бир хидмәтчиси тәкраролунмаздыр. Онлар гардашлара Јеһоваја севинҹлә хидмәт етмәјә көмәк етмәк истәјирләр.
«Үзәриндә ағалыг етмәјин, әксинә, сүрүјә нүмунә олун»
17, 18. а) Нәјә ҝөрә бәзән һәвариләрә Исанын тәвазөкарлыг һаггында дедикләрини баша дүшмәк чәтин иди? б) Бу, бизә неҹә аид ола биләр?
17 Артыг јухарыда гејд олундуғу кими, ағсаггаллар сүрүнүн онлара јох, Аллаһа мәхсус олдуғуну јадда сахламалыдырлар. Буна ҝөрә дә онлар еһтијатлы олмалыдырлар ки, Аллаһын әманәти үзәриндә ағалыг етмәсинләр. (1 Петер 5:3 ајәсини оху.) Һәрдән Исанын һәвариләри шөһрәтә ҹан атырдылар. Милләтләр үзәриндә һөкмранлыг едән инсанлар кими, онлар да бөјүк вәзифә саһиби олмаг истәјирдиләр. (Марк 10:42—45 ајәләрини оху.)
18 Бу ҝүн «нәзарәтчи вәзифәсинә ҹан атан» гардашлар буну һансы нијјәтдән ирәли ҝәләрәк етдикләрини јохламалыдырлар (1 Тим. 3:1). Артыг ағсаггал оланлар исә виҹданла өзләриндән сорушмалыдырлар: «Бәзи һәвариләр кими, мәндә дә һакимијјәт саһиби олмаг вә ја јүксәк мөвге тутмаг истәји јохдур ки?» Бу саһәдә һәвариләрин проблеми олдуғуну нәзәрә алсаг, ола билсин, ағсаггал да өзүндә белә бир мејили ашкар етди вә онда о, дүнјаја хас олан бу мејили үрәјиндән силиб атмалыдыр.
19. Ағсаггаллар сүрүнү горумаг үчүн мүәјјән тәдбирләр ҝөрмәли оланда нәји јадда сахламалыдырлар?
19 Амма бәзән, мәсәлән, сүрүнү «амансыз ҹанаварлар»дан горумаг лазым ҝәләндә ағсаггаллар өз сәлаһијјәтләриндән истифадә едәрәк кимәсә ҹидди мәсләһәт вермәли олурлар (Һәв. иш. 20:28—30). Павел Титуса јазмышды: «Әлиндә олан там ихтијарла даныш... вә тәнбеһ ет» (Тит. 2:15). Һәтта кимәсә гаршы белә ҹидди тәдбир ҝөрмәк лазым ҝәләндә дә ағсаггаллар онун ләјагәтинә һөрмәтлә јанашмаға чалышырлар. Онлар баша дүшүрләр ки, инсаны мүлајимликлә баша салмаг ону кобудҹасына тәнгид етмәкдән даһа тәсирлидир. Бунунла онун үрәјинә јол тапмаг вә дүзҝүн јолу тутмасына көмәк етмәк олар.
20. Сүрүјә јахшы нүмунә олмагда ағсаггаллар Исаны неҹә тәглид едә биләрләр?
20 Мәсиһин гојдуғу ҝөзәл нүмунә ағсаггаллары сүрүнү севмәјә тәшвиг едир (Јәһ. 13:12—15). Мәҝәр Исанын өз шаҝирдләринә тәблиғ етмәји вә шаҝирд һазырламағы неҹә өјрәтдији барәдә охујанда үрәјимиз риггәтә ҝәлмир? Онун тәвазөкарлыг нүмунәси шаҝирдләринә бөјүк тәсир ҝөстәрмиш вә онлары «тәвазөкар олуб» башгаларыны өзләриндән үстүн тутмаға тәшвиг етмишди (Филип. 2:3). Исанын нүмунәсини ҝөрән ағсаггаллар ону изләмәк вә сүрүјә нүмунә олмаг истәјирләр.
21. Ағсаггаллар һансы мүкафаты алаҹаглар?
21 Петер ағсаггаллара вердији нәсиһәтинә ҝәләҹәклә бағлы вәд һаггында данышараг јекун вурур. (1 Петер 5:4 ајәсини оху.) Мәсһ олунмуш ағсаггаллара Мәсиһлә бирликдә ҝөјдә «солмаз шөһрәт чәләнҝи вериләҹәк». Башга гојунлардан олан ағсаггаллар исә «Баш чобан»ын рәһбәрлији алтында јер үзүндә Аллаһын сүрүсүнү отармаг шәрәфинә лајиг ҝөрүләҹәкләр (Јәһ. 10:16). Нөвбәти мәгаләдә јығынҹағын диҝәр үзвләринин тәјин олунмуш нәзарәтчиләрлә неҹә әмәкдашлыг едә биләҹәкләри барәдә данышаҹағыг.
Тәкрар үчүн суаллар
• Нәјә ҝөрә Петер ағсаггаллара сүрүнү отармаг барәдә нәсиһәт верди?
• Ағсаггаллар руһани ҹәһәтдән хәстә оланларын гајғысына неҹә галмалыдырлар?
• Ағсаггаллары Аллаһын онлара әманәт етдији сүрүнү отармаға нә тәшвиг едир?
[21 сәһифәдәки шәкил]
Гәдимдәки чобанлар кими, бу ҝүн ағсаггаллар онлара әманәт едилән сүрүнү мүдафиә етмәлидирләр