Јер күрәси мәһв олаҹагмы?

«ДҮНЈАНЫН сону — бу мөвзу, хүсусилә дә бу һагда чәкилән филмләр һәмишә инсанлар үчүн мараглы олуб»,— дејә журналист Ҹон Скалзи гејд едир. Нә үчүн дүнјанын сонуну тәсвир едән филмләр инсанларда мараг ојадыр? Скалзи белә гәнаәтә ҝәлир: «Чүнки онларда сөһбәт бизим горхдуғумуз шејләрдән ҝедир». Сиз бу фикирлә разысыныз? Ичиндә олан һәр шеј илә бирликдә дүнјанын, неҹә вә нә вахт мәһв олаҹағындан горхмаға тутарлы сәбәбләримиз вармы?

Демәк олар ки, һәр ҝүн бүтүн дүнјада ҹидди дағынтылара сәбәб олан тәбии фәлакәтләрин баш вердији һагда ешидирик. Бу ҹүр дәһшәтли кадрлар телевизорда вә Интернетдә дөнә-дөнә јајымланыр. Арамсыз олараг реал инсанларын вә јерләрин мәһв едилдијини ҝөрмәк, инсанларын дүнјанын сонуна артыг филмләрин мөвзусу кими јох, реал тәһлүкә кими бахмаларына сәбәб олур.

Бу горхуну алимләрин дүнјанын неҹә мәһв олаҹағы һаггында ирәли сүрдүјү фәрзијјәләр дә артырыр. Һәтта бәзиләри бунун нә вахт олаҹағыны да дејирләр. Крал Астрономија Ҹәмијјәтинин 2008-ҹи ил март ајы үчүн олан ајлыг иҹмалында ики астрономун 7,59 милјард илдән сонра ҝүнәшин бизим планети удаҹағы вә күлә чевирәҹәји һагда мәлуматы ҝәтирилир.

Доғруданмы јер күрәси нә вахтса мәһв олаҹаг?

Планетимизин мүддәти нә вахтса битәҹәкми?

Мүгәддәс Китаб бизи әмин едир: «Бир нәсил ҝедир, о бири нәсил ҝәлир, амма дүнја даим галыр» (Ваиз 1:4). Јеһова Аллаһ ‘јер үзүнүн тәмәлини елә гуруб ки, әсла сарсылмасын’, әбәдијјән мөвҹуд олсун (Мәзмур 104:5). Аллаһдан илһам алмыш бу сөзләрин һәгигәт олдуғу нә дәрәҹәдә јәгиндир? Бәзи алимләр бунун әксини иддиа етсә дә, нә үчүн үмид етмәк олар ки, јер күрәси һеч вахт мәһв олмајаҹаг?

Бир анлыға дүкандакы әрзаглары ҝөзүнүзүн габағына ҝәтирин. Бәзи әрзагларын үстүндә истифадә мүддәти јазылыр. Бу мүддәти ким гојуб? Бу тарихи дүкан саһибими тәхмин едиб? Сөзсүз ки, јох! Мәһсулун истифадә мүддәти истеһсалчы тәрәфиндән гојулур. Биз бу тарихин дәгиг олдуғуна инанырыг, чүнки әрзағын нечә мүддәт истифадәјә јарарлы олдуғуну ону истеһсал едәндән јахшы һеч ким билә билмәз. Белә исә, планетимизи Јарадана гат-гат артыг етибар етмәли дејиликми?! Онун Кәламы ачыг-ајдын билдирир ки, О, ‘јер үзүнү’ әбәди мөвҹуд олмасы үчүн ‘гуруб’. Јер күрәси һеч вахт мәһв олмајаҹаг! (Мәзмур 119:90).

Бәс мәсулијјәтсиз инсанлар планети бәрпа едилмәјәҹәк шәкилдә дағыда биләрми? Гәтијјән јох! Истеһсалчыдан фәргли олараг, Јеһова ‘һәр шејә гадирдир’ (Әјјуб 42:2). Буна ҝөрә дә О, там зәманәт верә биләр: ‘Ағзымдан чыхан кәлмә һәјата кечәр’ (Јешаја 55:11). Әмин ола биләрик ки, ‘Јараданымыз’ јерә даир нијјәтинин јеринә јетмәсинә нәјинсә мане олмасына јол вермәјәҹәк (Мәзмур 95:6). Бу һансы нијјәтдир вә Аллаһ ону неҹә һәјата кечирәҹәк?

Аллаһын Падшаһлығы Јараданын нијјәтини һәјата кечирәҹәк

Јерин һеч вахт мәһв олмајаҹағына зәманәт вермәклә јанашы, Аллаһын Кәламы бизә билдирир ки, Јеһова јери «јашамаг үчүн гурду» (Јешаја 45:18). Бахмајараг ки, планетимиздә артыг мин илләрдир ки, инсан јашајыр бу, өз-өзлүјүндә Аллаһын нијјәтинин һәјата кечдијини билдирмир.

Јеһова ‘хошбәхт Аллаһдыр’ вә «әдаләти севир» (1 Тимотејә 1:11, ЈД; Мәзмур 37:28). Аллаһ бүтүн инсанларын хошбәхт вә әдаләтсизликдән узаг бир дүнјада јашамасыны истәјир. Нијјәтини јеринә јетирмәк үчүн Аллаһ бүтүн јер үзүнү идарә едәҹәк сәмави Падшаһлыг гураҹағыны әввәлҹәдән билдирмишди (Даниел 2:44). Јер үзүндә оларкән Иса һәмишә хүсуси һөкумәт олан Аллаһын Падшаһлығы һаггында данышырды. Иса билирди ки, ҝәләҹәкдә һәмин Падшаһлығын һакимијјәти алтында бүтүн јер үзүндә хејир-дуалар олаҹаг, елә буна ҝөрә дә шаҝирдләринә бу һагда дуа етмәји өјрәдирди (Матта 6:9, 10; 24:14). Бу хејир-дуалардан бәзиләри һансылардыр?

▪ Аллаһ бүтүн мүһарибәләрә сон гојаҹағыны вәд етдији үчүн дүнјада сүлһ вә тәһлүкәсизлик һөкм сүрәҹәк (Мәзмур 46:9).

▪ Һамынын јемәји бол олаҹаг (Мәзмур 72:16).

▪ Һеч кимин сәһһәти илә бағлы проблеми олмајаҹаг, чүнки ‘һеч бир сакин «хәстәјәм» демәјәҹәк’ (Јешаја 33:24).

▪ Гәм-гүссә унудулаҹаг, чүнки «өлүм мөвҹуд олмајаҹаг» (Вәһј 21:4).

▪ Аллаһ вәд едир ки, халгы евләр тикиб онда тәһлүкәсизликдә јашајаҹаг вә ‘әбәдилик севинәҹәк’ (Јешаја 65:17—24).

Шүбһәсиз, јухарыда тәсвир олунан ҝөзәл шәраитдә сиз дә јашамаг истәјәрдиниз. Јеһова нијјәтини јеринә јетирмәји һәм чох истәјир, һәм дә бунун үчүн лазыми тәдбир ҝөрүр (Јешаја 9:6, 7). Лакин сиздә суал јарана биләр: «Аллаһын Мүгәддәс Китабда јазылмыш вәдинин үстүндән мин илләр кечиб. Бәс нә үчүн о, индијәнәдәк јеринә јетмәјиб?»

Аллаһын сәбри хиласымыза јол ачыр

Әмин ола биләрсиниз ки, Јеһова «Өз вәдини јеринә јетирмәкдә ҝеҹикмир». Мүгәддәс Китаб изаһ едир ки, Аллаһ бизә мәһәббәтлә сәбир едир. Буна ҝөрә дә биз ‘Рәббимизин сәбрини дә гуртулуш һесаб етмәјә’ тәшвиг олунуруг (2 Петер 3:9, 15). Бәс хилас үчүн Аллаһын сәбри нәјә ҝөрә бу гәдәр ваҹибдир?

Илк нөвбәдә, Аллаһ билир ки, итаәткар инсанлары тәһлүкәсиз вә фираван евлә тәмин етмәздән әввәл, ‘јери тәләф едәнләри тәләф етмәк’ лазымдыр (Вәһј 11:18). Анҹаг О, инсанлары севдији үчүн ‘кимсәнин һәлак олмасыны’ истәмир. Буна ҝөрә дә сәмави Атамыз усанмадан чалышыр ки, ‘пис адамы өз шәр әмәлиндән дөндәрсин’. Елә бу сәбәбдән, Јеһова Падшаһлығы һаггында хәбәрин бүтүн дүнјада тәблиғ олунмасыны истәјирa (Језекел 3:17, 18). Аллаһын хәбәрдарлығына һај верән вә һәјатыны Онун салеһ нормаларына ујғунлашдыран һәр кәсин гаршысында хилас олмаг вә јерүзү Ҹәннәтдә әбәди јашамаг имканы ачылыр.

Аллаһа тәрәф дөнүн вә хилас олун

Әминик ки, Мүгәддәс Китабын бизә чатдырдығы хәбәр хош хәбәрдир (Матта 24:14). Бу хәбәрдә јерин һеч вахт мәһв олмајаҹағына даир Аллаһын дәјишмәз сөзү чатдырылыр. Үстәлик Мүгәддәс Китаб пејғәмбәрликләринә әсасән биз иман едә биләрик ки, ‘бир аз ҝөзләсәк, пис јох олаҹаг’. Јалныз Аллаһын ҝөзүндә салеһ оланлар тезликлә јери «мүлк олараг алаҹаг, әмин-аманлығын боллуғундан зөвг тапаҹаг» (Мәзмур 37:9—11, 29; Матта 5:5; Вәһј 21:3, 4). Һәләлик исә, Аллаһ исрарла чағырмаға давам едир: «Еј дүнјанын бүтүн уҹгар јерләриндә јашајанлар, Мәнә тәрәф дөнүн вә хилас олун» (Јешаја 45:22). Бәс сиз бу чағырыша һај верәҹәксинизми?

Аллаһа тәрәф дөнмәјә нә үчүн гәти гәрарлы олмајасыныз? Мәзмур 37:34 ајәси бизи тәшвиг едир: «Рәбби ҝөзлә, Онун јолуну тут, О сәнә өлкәни мүлк олараг верәҹәк». Јеһованын Шаһидләри Аллаһын јерә даир дәјишмәз нијјәти вә бунун һәјата кечәҹәји вахты ҝөрмәк үчүн индидән нә едә биләҹәјиниз һагда даһа чох өјрәнмәкдә сизә мәмнунијјәтлә көмәк едә биләрләр.

[Һашијә]

[Иҹазә илә]

NASA photo