«Јеһованын мөһтәшәм ҝүнү јахындыр»
«Јеһованын мөһтәшәм ҝүнү јахындыр, јахындыр, тез ҝәләҹәк» (СЕФАНЈА 1:14, ЈД).
1, 2. а) Мәсиһчиләр һансы хүсуси ҝүнү ҝөзләјирләр? б) Өзүмүзә һансы суаллары вермәлијик вә нә үчүн?
ҜӘНҸ гыз тој ҝүнүнүн интизарындадыр. Гадын ушағынын дүнјаја ҝәлишини сәбирсизликлә ҝөзләјир. Јорулуб әлдән дүшмүш ишчи мә’зунијјәт ҝүнүнүн тез чатмасыны арзулајыр. Онларын арасындакы охшарлыг нәдәдир? Бу адамларын һәр бири һәјатларында дәјишиклик едәҹәк хүсуси бир ҝүнү ҝөзләјир. Онлар дәрин, ејни заманда мүхтәлиф һиссләр кечирирләр. Ҝөзләдикләри ҝүн әввәл-ахыр ҝәлиб чатаҹаг вә онлар һәмин ҝүнә һазыр олмаг истәјирләр.
2 Һәгиги мәсиһчиләр дә хүсуси бир ҝүнү ҝөзләјирләр. Бу мөһтәшәм ҝүн ‘Рәббин [Јеһованын] ҝүнүдүр’ (Јешаја 13:9; Јоел 2:1; 2 Петер 3:12). Јеһованын јахынлашан ҝүнү нә демәкдир вә онун ҝәлиши бәшәријјәтә неҹә тә’сир едәҹәк? Бу ҝүнә һазыр олдуғумузу неҹә ҝөстәрә биләрик? Чох ваҹибдир ки, бу суаллара инди ҹаваб ахтараг, чүнки ҹәрәјан едән һадисәләр Мүгәддәс Китабын «Јеһованын мөһтәшәм ҝүнү јахындыр, јахындыр, тез ҝәләҹәк» сөзләринин доғрулуғуну сүбут едир (Сефанја 1:14, ЈД).
«Јеһованын мөһтәшәм ҝүнү»
3. «Јеһованын мөһтәшәм ҝүнү» нә демәкдир?
3 «Јеһованын мөһтәшәм ҝүнү» нә демәкдир? Мүгәддәс Китабда Аллаһын дүшмәнләри үзәриндә һөкм иҹра етдији вә уҹа адыны иззәтләндирдији хүсуси дөврләр ‘Јеһованын ҝүнү’ адланыр. Јеһова Јәһуда вә Јерусәлимин хәјанәткар сакинләри, о ҹүмләдән залым бабиллиләр вә мисирлиләр үзәриндә һөкмүнү иҹра едәндә, онлар ‘Јеһованын ҝүнүнә’ туш олдулар (Јешаја 2:1, 10-12; 13:1-6; Јеремја 46:7-10). Анҹаг ‘Јеһованын ҝүнләриндән’ ән мөһтәшәми һәлә габагдадыр. Јеһова һәмин ‘ҝүн’ адыны бәднам едәнләр үзәриндә һөкмүнү иҹра едәҹәк. О ҝүн јалан динләрин дүнја империјасы олан «Бөјүк Бабил»ин мәһви илә башлајаҹаг вә өз зирвәсинә бу пис системин Һар-Меҝидон мүһарибәсиндә мәһв едиләҹәји заман чатаҹаг (Вәһј 16:14, 16; 17:5, 15-17; 19:11-21).
4. Нәјә ҝөрә инсанларын әксәријјәти Јеһованын сүр’әтлә јахынлашан ҝүнү гаршысында титрәмәлидир?
4 Нәјә ҝөрә инсанларын әксәријјәти сүр’әтлә јахынлашан бу ҝүнүн гаршысында титрәмәлидир? Јеһова Сефанја пејғәмбәр васитәсилә бу суала ҹаваб верир: «О ҝүн гәзәб ҝүнүдүр: һәр тәрәфи әзијјәт вә мәшәггәтин, виран вә таланын, гаранлыг вә зүлмәтин, гара булудларын бүрүдүјү ҝүндүр!» Неҹә дә дәһшәтлидир! Үстәлик пејғәмбәр дејир: ‘Адамлара бәла ҝөндәрәҹәјәм, чүнки Мән Рәббә гаршы ҝүнаһ едибләр’ (Сефанја 1:15, 17).
5. Милјонларла инсанлар Јеһованын ҝүнүнү неҹә ҝөзләјирләр вә нә үчүн?
5 Милјонларла диҝәр инсанлар исә Јеһованын ҝүнүнү сәбирсизликлә ҝөзләјирләр. Нә үчүн? Чүнки онлар билирләр ки, бу, салеһләрин хилас вә гуртулуш ҝүнүдүр, һәмин ҝүн Јеһова иззәтләнәҹәк вә уҹа адыны тәмизә чыхараҹаг (Јоел 3:16, 17; Сефанја 3:12-17). О ҝүнүн инсанлар үчүн дәһшәтли вә ја севинҹли ҝүн олмасы, әсас е’тибарилә онларын һал-һазырда сүрдүјү һәјат тәрзиндән асылыдыр. Бәс бу ҝүнүн јахынлашмасы сәндә һансы һиссләри доғурур? Бу ҝүнә һазырсанмы? Јеһованын ҝүнүнүн астанасында олмағымыз сәнин ҝүндәлик һәјатына тә’сир едирми?
«Ришхәндчиләр истеһза едәрәк ҝәләҹәк»
6. Бир чохлары ‘Јеһованын ҝүнүнә’ неҹә јанашырлар вә нәјә ҝөрә һәгиги мәсиһчиләр буна тәәҹҹүб етмирләр?
6 Вахтын аз галдығына бахмајараг, ‘Јеһованын ҝүнүнүн’ јахынлашмасы јер үзүнүн сакинләринин әксәријјәтини һеч марагландырмыр. Онлар дүнјанын башынын үстүнү алан бу ҝүн һаггында хәбәрдарлыг едәнләри әлә салырлар. Анҹаг һәгиги мәсиһчиләр буна тәәҹҹүб етмирләр, чүнки һәвари Петерин бу хәбәрдарлығыны унутмурлар: «Һәр шејдән габаг буну билин ки, ахыр ҝүнләрдә өз еһтирасларына ҝөрә һәрәкәт едән ришхәндчиләр истеһза едәрәк ҝәләҹәк, вә дејәҹәкләр: “Бәс Онун вә’д едилмиш зүһуру һаны? Чүнки әҹдадымыз ҝөзләрини һәјата јумандан бәри һәр шеј илк јаранан заман олдуғу кими галыр”» (2 Петер 3:3, 4).
7. Һансы вахтда јашадығымызы нәзәрдән гачырмамаға бизә нә көмәк едәр?
7 Бу ҹүр мәнфи дүшүнҹә тәрзинә ујмајараг һансы вахтда јашадығымызы нәзәрдән гачырмамаға бизә нә көмәк едәр? Петер мәсиһчиләрә үз тутуб дејир: «Һафизәнизи ҹанландырараг сизи пак дүшүнҹәли олмаға тәшвиг едирәм ки, сиз, мүгәддәс пејғәмбәрләр тәрәфиндән габагҹадан сөјләнән сөзләри вә Рәбб вә Хиласкарын һәвариләриниз васитәсилә е’лан едилән әмрини јада саласыныз» (2 Петер 3:1, 2). Һафизәмизи Мүгәддәс Китаб хәбәрдарлыгларына диггәт јетирмәклә ҹанландыра биләрик. Бу хатырлатмалары дәфәләрлә ешитмиш олсаг да, онлара диггәт јетирмәк инди һәр заманкындан даһа ваҹибдир (Јешаја 34:1-4; Лука 21:34-36).
8. Нә үчүн бир чохлары Мүгәддәс Китабын хатырлатмаларына мәһәл гојмурлар?
8 Нәјә ҝөрә бә’зиләри бу хатырлатмалара мәһәл гојмурлар? Петер давам едир: «Онлар буну гәсдән билмәк истәмирләр ки, ҝөјләр гәдим заманлардан бәри Аллаһын сөзү илә јаранды, јер дә судан вә су васитәсилә тәшкил едилди. О заманкы дүнја да һәмән суларла боғулуб, мәһв олду» (2 Петер 3:5, 6, И–93). Бәли, еләләри вар ки, Јеһованын ҝүнүнүн ҝәлишини истәмир. Онлар истәмирләр ки, «нормал» һәјатларына нә исә мане олсун. Беләләри сүрдүкләри худбин һәјат тәрзинә ҝөрә Јеһованын гаршысында ҹаваб вермәји лазым билмирләр! Петерин дедији кими, онлар «өз еһтирасларына ҝөрә» јашајырлар.
9. Нуһ вә Лутун ҝүнләриндә инсанлар онларын хәбәрдарлығына неҹә мүнасибәт ҝөстәрдиләр?
9 Бу ришхәндчиләр үчүн Јеһованын кечмишдә бәшәријјәтин ишинә мүдахилә етдијинә мәһәл гојмамаг даһа сәрфәлидир. Һәм Иса Мәсиһ, һәм дә һәвари Петер Нуһун вә Лутун ҝүнләринә истинад етмишләр (Лука 17:26-30; 2 Петер 2:5-9). Дашгындан габаг инсанлар Нуһун хәбәрдарлығына әһәмијјәт вермәдиләр. Ејнилә Содом вә Һоморранын мәһвиндән әввәл дә күрәкәнләринә елә ҝәлмишди ки, Лут онларла «зарафат едир» (Јарадылыш 19:14).
10. Хәбәрдарлыглара е’тинасызлыг ҝөстәрәнләр һаггында Јеһова нә дејир?
10 Бу ҝүн дә һеч нә дәјишмәјиб. Анҹаг ҝөрүн Јеһова белә инсанларын агибәти һаггында нә дејир: «Фираван јашајан гајғысызлары, үрәкләриндә “Рәбб нә јахшылыг, нә дә пислик — һеч нә етмәз” дејәнләри ҹәзаландыраҹағам. Вар-дөвләтләри талан олаҹаг, евләри хараба галаҹаг, тикдикләри евләрдә јашамајаҹаглар, онлар салдыглары үзүмлүкләрин шәрабларыны ичмәјәҹәкләр» (Сефанја 1:12, 13). Инсанлар ҝүндәлик ишләрилә мәшғул олмаға давам едә биләрләр, лакин чәкдикләри ағыр зәһмәт онлара узунмүддәтли фајда ҝәтирмәјәҹәк. Нә үчүн? Чүнки Јеһованын ҝүнү гәфләтән онлары јахалајаҹаг, топладыглары вар-дөвләт онлары хилас етмәјәҹәк (Сефанја 1:18).
«Ҝөзләјин»
11. Һансы хәбәрдарлығы унутмамалыјыг?
11 Биз бу пис дүнјадан фәргли олараг, Һабаггуг пејғәмбәрин јаздығы хәбәрдарлығы унутмамалыјыг: «Бу ҝөрүнтү мүәјјән вахт үчүндүр, баша чатмаға тәләсир вә јалан дејил. Санки ҝеҹикир, амма ҝөзләјин, чүнки һөкмән ҝәләҹәк, ҝеҹикмәјәҹәк» (Һабаггуг 2:3). Һәмин ҝүн биз гејри-камил инсанларын нөгтеји-нәзәринҹә ҝеҹиксә дә, јадда сахламалыјыг ки, Јеһова һеч вахт јубанмыр. Онун ҝүнү дүз вахтында, инсанларын ҝөзләмәдији бир саатда ҝәләҹәк (Марк 13:33; 2 Петер 3:9, 10).
12. Иса габагҹадан нә һагда демишди, анҹаг Исанын садиг давамчылары һаггында нә демәк олар?
12 Јеһованын ҝүнүнү ҝөзләмәјин ваҹиблијини вурғуладыгдан сонра, Иса, һәтта бә’зи давамчыларынын да һансы вахтда јашадыгларыны нәзәрдән гачыраҹагларыны габагҹадан демишди: «Һәмин гул пис олар вә үрәјиндә дејәрсә ки: “Ағам ҝеҹ ҝәләҹәк” вә өз јолдашларыны дөјмәјә вә әјјашларла јејиб ичмәјә башларса, о гулун ағасы, онун ҝөзләмәдији бир ҝүндә вә билмәдији бир саатда ҝәләҹәк, ону шиддәтлә ҹәзаландыраҹаг» (Матта 24:48-51). Онлардан фәргли олараг, садиг вә ағыллы гул һансы вахтда јашадығыны унутмур. Гул синфи ојаг дуруб һазыр олдуғу үчүн, Иса јердәки ‘бүтүн маликанәсинин идарәсини она тапшырды’ (Матта 24:42-47).
Јубанмаг гәтијјән олмазды
13. Иса јубанмадан һәрәкәт етмәјин ваҹиблијини неҹә вурғулады?
13 Биринҹи әсрдәки мәсиһчиләрә јубанмаг олмазды. ‘Гошунларын Јерусәлими мүһасирә етдијини ҝөрдүкләри заман’, онлар шәһәри дәрһал тәрк етмәли идиләр (Лука 21:20, 21). Бу, ерамызын 66-ҹы илиндә баш верди. Ҝөрүн Иса о дөврдә јубанмадан һәрәкәт етмәјин ваҹиблијини неҹә вурғулады: «Дамда олан евиндән әшја ҝөтүрмәк үчүн ашағы енмәсин; тарлада олан да әбасыны ҝөтүрмәк үчүн ҝери дөнмәсин» (Матта 24:17, 18). Тарих ҝөстәрир ки, ромалылар ҝери чәкилиб дөрд илдән сонра гајытдылар. Бәс онда нәјә ҝөрә мәсиһчиләр б. е. 66-ҹы илиндә Исанын сөзләринә јубанмадан әмәл етмәли идиләр?
14, 15. Нәјә ҝөрә мәсиһчиләр гошунларын Јерусәлими мүһасирә етдијини ҝөрәндә, јубанмадан һәрәкәт етмәли идиләр?
14 Јерусәлим Рома гошунлары тәрәфиндән ерамызын 70-ҹи илиндә дағыдылса да, өтән дөрд ил сакитлик ичиндә кечмәмишди. Әксинә, бу дөврдә зоракылыг вә гырғынлар баш алыб ҝедирди. Бир тарихчинин сөзләринә ҝөрә һәмин вахт Јерусәлимдә «дәһшәтли азғынлыглар төрәдилән ганлы вәтәндаш мүһарибәси» ҝедирди. Ҹаван кишиләри истеһкамлары мөһкәмләндирмәјә, силаһланмаға мәҹбур едир вә ордуја јығырдылар. Һәр ҝүн һәрби мәшгләр кечирилирди. Бу ишләрә гошулмајанлар хаин сајылырдылар. Әҝәр мәсиһчиләр шәһәрдән вахтында чыхмасајдылар, онларын вәзијјәти сон дәрәҹә тәһлүкәли оларды (Матта 26:52; Марк 12:17).
15 Гејд етмәк лазымдыр ки, Иса тәкҹә Јерусәлимдәкиләрин дејил, бүтүн ‘Јәһудејада оланларын’ гачмаларыны тапшырмышды. Бу чох ваҹиб иди, чүнки ромалылар гошунларыны Јерусәлимдән чәкәндән бир нечә ај сонра һәрби әмәлијјатларына јенидән башладылар. Онлар ерамызын 67-ҹи илиндә Галилејаны истила етдикдән сонра, нөвбәти ил, Јерусәлим истисна олмагла, бүтүн Јәһудејаны зәбт етдиләр. Әһали ромалыларын әлиндән чох әзијјәт чәкирди. Һәмчинин Јерусәлимдән гачмаг јәһудиләр үчүн ҝет-ҝедә чәтинләширди. Шәһәр дарвазалары мүһафизә едилирди, шәһәрдән гачмаға чалышанлар ромалыларын тәрәфинә кечмәкдә иттиһам олунурду.
16. Биринҹи әсрдә јашајан мәсиһчиләр хилас олмаг үчүн нәјә һазыр олмалы идиләр?
16 Бүтүн бу амилләри нәзәрә алараг Исанын еркән мәсиһчиләри нәјә ҝөрә дәрһал һәрәкәт етмәјә чағырдығыны баша дүшүрүк. Онларын диггәти мадди шејләрә јајынмамалы иди. Мәсиһчиләр Исанын хәбәрдарлығына әмәл етмәк үчүн ‘бүтүн вар-јохларындан әл чәкмәјә’ һазыр олмалы идиләр (Лука 14:33). Хәбәрдарлыға гулаг асыб дәрһал Иорданын о бири тајына гачанлар хилас олдулар.
Сајыглығы горујаг
17. Нәјә ҝөрә инди әввәлкиндән даһа чох сајыг олмалыјыг?
17 Мүгәддәс Китаб пејғәмбәрликләри ајдын ҝөстәрир ки, биз бу системин лап сонунда јашајырыг. Инди һәмишәкиндән даһа чох сајыг олмалыјыг. Әмин-аманлыг дөврүндә әсҝәр дөјүш заманы кечирдији ҝәрҝинлик вә горху һиссиндән узаг олур. Анҹаг сајыглығы горумаса, ҝөзләнилмәдән мүһарибә башлајанда о буна һазыр олмаз вә нәтиҹәси фаҹиәви олар. Бу, руһани ҹәһәтдән дә беләдир. Тәдриҹән сајыглығы итирсәк, бизә едилән һүҹумлары дәф етмәјә һазыр олмарыг вә Јеһованын ҝүнү бизи гәфләтән јахалајар (Лука 21:36; 1 Салониклиләрә 5:4). Әҝәр кимсә Јеһованын ‘јолундан дөнүбсә’, инди Ону ахтармағын әсл вахтыдыр (Сефанја 1:3-6; 2 Салониклиләрә 1:8, 9).
18, 19. «Аллаһын Ҝүнүнүн зүһуруну» неҹә ‘сүр’әтләндирә’ биләрик?
18 Тәәҹҹүблү дејил ки, һәвари Петер «Аллаһын Ҝүнүнүн зүһуруну» ‘сүр’әтләндирмәји’ нәсиһәт едирди! Биз буну неҹә едә биләрик? Үсуллардан бири ‘мүгәддәс вә Аллаһа ихласкар бир һәјат јашамагдыр’ (2 Петер 3:11, 12). Белә јашамагла диггәтимиз ‘Јеһованын ҝүнүндән’ јајынмајаҹаг. Јеһованын «Ҝүнүнүн зүһуруну» һәрфи мә’нада сүр’әтләндирә билмәрик. Анҹаг даим Аллаһа хидмәт етмәклә мәшғул олсаг, вахт санки бир ҝөз гырпымында кечәҹәк (1 Коринфлиләрә 15:58).
19 Аллаһын Кәламынын вә орадакы хатырлатмаларын үзәриндә дүшүнмәклә дә биз о ҝүнүн ҝәлишини сүр’әтләндирәр вә ја башга тәрҹүмәләрә әсасән ону «јаддашымызда мөһкәм сахлајар», јахуд «шиддәтлә арзулаја» биләрик (2 Петер 3:11). Бу хатырлатмалара дахил олан пејғәмбәрликләрдә тәкҹә Јеһованын ҝүнүнүн зүһуру һагда дејил, һәмчинин Ону ‘ҝөзләјәнләрин’ алаҹағы чохсајлы хејир-дуалардан данышылыр (Сефанја 3:8).
20. Һансы чағырыша хүсуси диггәт јетирмәлијик?
20 Инди Сефанја пејғәмбәрин бу сөзләринә хүсуси диггәт јетирмәјин әсл вахтыдыр: «Рәббин гызғын гејзи башыныза ҝәлмәдән, Рәббин гәзәб ҝүнү сизә јетишмәдән өнҹә топлашын! Еј Рәббин һөкмүнә әмәл едән сизләр, өлкәдәки һәлим үрәклиләр, Рәббә мејл салын! Салеһлијә мејл салын! Тәвазөкарлыға мејл салын! Бәлкә сиз Рәббин гәзәб ҝүнүндә гуртула билдиниз» (Сефанја 2:2, 3).
21. Аллаһын халгы 2007-ҹи ил әрзиндә нәјә гәти гәрарлыдыр?
21 Неҹә дә мүнасибдир ки, «Јеһованын мөһтәшәм ҝүнү јахындыр» сөзләри 2007-ҹи ил үчүн иллик ајә сечилиб. Аллаһын халгы о ҝүнүн јахын олдуғуна вә тез ҝәләҹәјинә әминдир (Сефанја 1:14, ЈД). Јеһованын ҝүнү «ҝеҹикмәјәҹәк» (Һабаггуг 2:3). Ҝәлин о ҝүнү ҝөзләдијимиз мүддәтдә бу пејғәмбәрликләрин там јеринә јетәҹәји вахтын јахын олдуғуну јадда сахлајараг сајыглығы горујаг!
Ҹаваб верә биләрсинизми?
• «Јеһованын мөһтәшәм ҝүнү» нә демәкдир?
• Нәјә ҝөрә бир чохлары һансы вахтда јашадығымыза мәһәл гојмур?
• Нә үчүн биринҹи әсрдә јашајан мәсиһчиләр јубанмадан һәрәкәт етмәли идиләр?
• Сајыглығы неҹә горуја биләрик?
[11-ҹи сәһифәдәки јазы]
2007-ҹи ил үчүн иллик ајә: «Јеһованын мөһтәшәм ҝүнү јахындыр» (Сефанја 1:14, ЈД).
[8 вә 9-ҹу сәһифәләрдәки шәкилләр]
Јеһованын ҝүнү, Нуһун ҝүнләриндә олдуғу кими, буҝүнкү ришхәндчиләри дә гәфләтән јахалајаҹаг.
[10-ҹу сәһифәдәки шәкил]
Мәсиһчиләр ‘гошунларын Јерусәлими мүһасирә етдијини ҝөрдүкләри’ заман јубанмадан һәрәкәт етмәли идиләр.