Ҝөзләмәји баҹарырсанмы?

“Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк [“јаддашынызда мөһкәм сахлајараг”, ЈД] мүгәддәс вә Аллаһа ихласкар бир һәјат јашамалысыныз” (2 ПЕТЕР 3:11).

1, 2. Јеһованын ҝүнүнү неҹә ҝөзләмәли олдуғумузу һансы нүмунә илә тәсвир етмәк олар?

НАҺАР үчүн гонаг ҝөзләјән аиләни тәсәввүр ет. Мүәјјән едилмиш вахт тез јахынлашыр. Гадын јемәји бишириб баша чатдырыр. Әри вә ушаглары да һазырлыг ишләриндә она көмәк едирләр. Һамынын әһвал-руһијјәси јахшыдыр. Бәли, бүтүн аилә гонагларын ҝәлишини, о ҹүмләдән ләззәтли јемәкдән јејәрәк онларла хош үнсијјәти сәбирсизликлә ҝөзләјир.

² Биз мәсиһчиләр даһа мүһүм шеји ҝөзләјирик. Нәји? Јеһованын ҝүнүнү! Һәмин ҝүнүн ҝәлишинә кими, биз нөвбәти сөзләри дејән Миканын әһвал-руһијјәсини тәглид етмәлијик: “Мән Рәббә бахаҹағам, гуртулушумун Аллаһыны ҝөзләјәҹәјәм” (Мика 7:7). Бу фәалијјәтсиз галмаг демәкдирми? Хејр. Бизим чох ишимиз вар.

3. 2 Петер 3:11 ајәсинә әсасән мәсиһчиләр һансы әһвал-руһијјәјә малик олмалыдырлар?

³ Неҹә ҝөзләмәли олдуғумузун үсулуну баша дүшмәкдә һәвари Петер бизә көмәк едир. О дејир: “Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүр’әтләндирәрәк [“јаддашынызда мөһкәм сахлајараг”, ЈД] мүгәддәс вә Аллаһа ихласкар бир һәјат јашамалысыныз” (2 Петер 3:11). Петер “сиз неҹә инсанлар олмалысыныз?” дејәркән, әслиндә бу суала ҹаваб ҝөзләмирди. Чүнки Аллаһдан илһам алмыш ики мәктубунда, Петер мәсиһчиләрин неҹә инсанлар олмаларынын ваҹиблијини вурғуламышдыр. Онлара һәм дә “мүгәддәс вә Аллаһа ихласкар бир һәјат” тәрзи сүрмәји тапшырмышдыр. Иса Мәсиһин “дөврүн сону” һаггындакы әламәти тәсвир етдији вахтдан 30 ил кечсә дә, мәсиһчиләр ајыглыгларыны итирмәли дејилдиләр (Матта 24:3). Онлар Аллаһын ҝүнүнүн зүһуруну ҝөзләјиб, ону јаддашларында мөһкәм сахламалы идиләр.

4. Јеһованын ҝүнүнү ‘јадда мөһкәм сахламаг’ нә демәкдир?

⁴ ‘Јадда мөһкәм сахламаг’ кими тәрҹүмә олунан Јунан сөзү, һәрфи мә’нада “сүр’әтләндирмәк” мә’насыны дашыјыр. Сөзсүз ки, биз Јеһованын ҝүнүнү сөзүн әсл мә’насында “сүр’әтләндирә” билмәрик. Әслинә галанда, Иса Мәсиһин Атасынын дүшмәнләри үзәриндәки һөкмү иҹра етмәк үчүн ҝәләҹәји “нә... ҝүнү вә нә дә сааты” билмирик (Матта 24:36; 25:13). Бир мә’лумат китабчасында изаһ олунур ки, “сүр’әтләндирмәк” ифадәси “тәләсмәк” мә’насыны дашыјан фе’лдән әмәлә ҝәлир вә “бир ишлә мәшғул олараг чалышган вә фәал олмаг мә’насыны дашыјыр”. Демәк олар ки, Петер һәмиманлыларыны Јеһованын ҝүнүнү ‘шиддәтлә арзуламаға’ тәшвиг едирди. Онлар буну, һәмин ҝүнү даима јадда сахламагла едә биләрдиләр (2 Петер 3:11, КМ). Јеһованын “бөјүк вә горхунҹ ҝүнү” бу гәдәр јахын олдуғу үчүн, биз дә бу ҹүр дүшүнҹә тәрзинә малик олмалыјыг (Јоел 2:31).

‘Мүгәддәс һәјат јашајараг’ ҝөзләмәк

5. Јеһованын ҝүнүнү ҝөрмәји шиддәтлә арзуладығымызы неҹә ҝөстәрә биләрик?

⁵ Әҝәр биз Јеһованын ҝүнүнү јашамағы ‘шиддәтлә арзулајырыгса’, бу бизим “мүгәддәс вә Аллаһа ихласкар бир һәјат” јашамағымыздан ҝөрүнмәлидир. ‘Мүгәддәс һәјат јашамаг’ ифадәси, еһтимал ки, бизә Петерин белә бир нәсиһәтини хатырладыр: “Сөзә бахан ушаглар кими, ҹаһил икән гапылдығыныз әввәлки еһтираслара ујмајын. Әксинә, сизи чағыран Аллаһ мүгәддәс олдуғу кими, өзүнүз дә һәр һәрәкәтиниздә мүгәддәс олун, чүнки јазылмышдыр: “Мүгәддәс олун, чүнки Мән мүгәддәсәм” (1 Петер 1:14-16).

6. Мүгәддәс олмаг үчүн нә етмәлијик?

⁶ Мүгәддәс олмаг үчүн биз физики, әгли, әхлаги вә руһани тәмизлији горујуб сахламалыјыг. Јеһованын адыны дашыјанлара лајиг тәрздә мүгәддәслијимизи горујараг Јеһованын ҝүнүнә һазырлашырыгмы? Бизим ҝүнләрдә мүгәддәс олмаг асан дејил, чүнки бу дүнјанын әхлаг нормалары дурмадан писләшир (1 Коринфлиләрә 7:31; 2 Тимотејә 3:13). Бизим әхлаг нормаларымызла бу дүнјанын әхлаг нормалары арасындакы фәргин ҝетдикҹә даһа бөјүк олдуғуну ҝөрүрүкмү? Ҝөрмүрүксә, онда нараһат олмағымыз үчүн сәбәб вар. Шәхси нормаларымыз мүгајисә олунаҹаг тәрздә јүксәк ола-ола, ашағы дүшмүр ки? Әҝәр еләдирсә, онда Аллаһа мәгбул олмаг үчүн гәти аддымлар атмалыјыг.

7, 8. а) ‘Мүгәддәс һәјат јашамағын’ әһәмијјәтини нәзәрдән неҹә гачыра биләрдик? б) Һансы ислаһедиҹи тәдбирләр тәләб олуна биләр?

⁷ Порнографијанын Интернетдә пејда олмасы, һәм дә она хәлвәтдә бахмағын мүмкүн олмасы уҹбатындан, бир заманлар әхлагсыз материаллара јол тапмајан инсанлар, бир һәкимин дедији кими, өзләри үчүн “сексуал фантазијаларын тә’мин едилмәсинин түкәнмәз мәнбәјини” тапмышлар. Әҝәр биз Интернетдә ләјагәтсиз сајтлар ахтармаға башласајдыг, бу, сөзсүз ки, Мүгәддәс Китабын “мурдара тохунмајын” тапшырығыны инкар етдијимизи билдирәрди (Ишаја 52:11). Белә олан һалда Јеһованын ҝүнүнүн зүһуруну ‘јаддашымызда мөһкәм сахладығымызы’ гәтијјәтлә тәсдиг едә биләрдикми? Јохса, әглимизи ләјагәтсиз шејләрлә ләкәләсәк дә, тәмизләнмәк үчүн вахтымызын олаҹағыны дүшүнмәклә хәјалымызда һәмин ҝүнү јубадырыг? Әҝәр белә бир проблемимиз варса, чох ваҹибдир ки, јубанмадан Јеһоваја јалвараг: “Бош шејә бахмагдан ҝөзләрими чевир; өз јолунда мәни дирилт” (Мәзмур 119:37).

⁸ Јеһованын Шаһидләринин бөјүк әксәријјәти — ҝәнҹләр, еләҹә дә бөјүкләр — Аллаһын јүксәк әхлаг нормаларына садиг галыр вә бу дүнјанын әхлагсыз тәләләриндән гачынырлар. Һансы дөврдә јашадығымызы биләрәк вә Петерин “Рәббин Ҝүнү... оғру кими ҝәләҹәкдир” хәбәрдарлығына гулаг асараг, онлар ‘мүгәддәс һәјат јашамаға’ давам едирләр (2 Петер 3:10). Онларын әмәлләри сүбут едир ки, Јеһованын ҝүнүнүн зүһуруну ҝөзләјиб, ону јаддашларында мөһкәм сахлајырларa.

“Аллаһа ихласкар” олмагла ҝөзләмәк

9. Аллаһа ихласкарлыг бизи нәјә тәшвиг етмәлидир?

⁹ Аллаһа ихласкар олмаг, Онун ҝүнүнү јадда сахламаг үчүн дә ваҹибдир. Бу ҹүр ихласкарлыг бизи Аллаһын ҝөзүндә доғру оланы етмәјә тәшвиг едән Она еһтирам һиссини нәзәрдә тутур. Јеһоваја ихласкарлыг, Она олан фәдакар мәһәббәтдән доғур. Аллаһ истәјир ки, “бүтүн инсанлар хилас олуб, һәгигәти дәрк етсинләр” (1 Тимотејә 2:4). О “истәјир ки, һамы төвбәјә ҝәлсин вә кимсә һәлак олмасын” (2 Петер 3:9). Белә исә, Аллаһа ихласкарлыг бизи, инсанлара Јеһова һаггында өјрәнмәјә көмәк едәрәк вә Ону тәглид етмәјә чалышараг даһа чох сә’ј ҝөстәрмәјә тәшвиг етмәли дејилми? (Ефеслиләрә 5:1).

10. ‘Зәнҝинлијин алдадыҹылығындан’ нәјә ҝөрә горунмалыјыг?

¹⁰ Әҝәр әввәлҹә Аллаһын Падшаһлығыны ахтарарыгса, Она ихласкар олдуғумузу ҝөстәрәрик (Матта 6:33). Бунун үчүн мадди шејләрә таразлашмыш јанашмаг лазымдыр. Иса хәбәрдар етмишдир: “Диггәтли олун, һәр нөв тамаһкарлыгдан өзүнүзү сахлајын, чүнки инсан һәјаты онун вар дөвләтинин чохлуғундан асылы дејилдир” (Лука 12:15). Пула олан мәһәббәтин нә заманса бизи кор едә биләҹәјини тәсәввүр етмәк чәтин олса да, диггәт јетирмәјә дәјәр ки, ‘дүнјанын гајғысы вә зәнҝинлијин алдадыҹылығы [Аллаһын] кәламыны боғмаға’ гадирдир (Матта 13:22). Чөрәк пулу газанмаг һәмишә асан олмур. Бу сәбәбдән бә’зи өлкәләрдәки инсанлар фикирләширләр ки, бәлкә дә аиләләрини бир нечә иллик тәрк едәрәк газанҹ далынҹа даһа варлы өлкәләрә ҝетмәсәләр һәјатларыны јахшылашдырмаг онлара мүјәссәр олмајаҹаг. Аллаһын хидмәтчиләринин бә’зиләри дә бу ҹүр дүшүнмәјә башламышлар. Башга өлкәдә ишләјәрәк, онлар аиләләрини мүасир имканларла тә’мин едә биләрләр. Бәс вәтәнләриндә галан аилә үзвләринин руһани вәзијјәтләри илә нә баш верә биләр? Онлар аиләдә мүвафиг башчылыг олмадан Јеһованын ҝүнүнү јашамаг үчүн зәрури олан руһани вәзијјәти горујуб сахлаја биләҹәкләрми?

11. Бир нәфәр Аллаһа ихласкар олмағын онун үчүн вар дөвләтдән ваҹиб олдуғуну неҹә ҝөстәрди?

¹¹ Пул газанмаг үчүн Јапонијаја ҝәлән Филиппинли бир нәфәр Јеһованын Шаһидләринин көмәјилә Мүгәддәс Китаб һәгигәти илә таныш олду. Мүгәддәс Јазыларын аилә башчыларынын үзәринә гојдуғу мәс’улијјәт барәдә билдикдә дәрк етди ки, Јеһованын хидмәтчиләри олмагда аиләсинә көмәк етмәлидир (1 Коринфлиләрә 11:3). Онун Филиппиндә галан һәјат јолдашы әринин јени иманына ҝүҹлү мүгавимәт ҝөстәрир вә истәјирди ки, әри она пул ҝөндәрмәјә давам етсин, евә гајыдыб аиләсинә Мүгәддәс Китаб һәгигәтләрини өјрәтмәсин. Лакин һәмин адам вахтын ҝөзләмәдијини дәрк едиб вә јахынлары үчүн нараһат олуб евә гајытды. Онун сәбри вә аиләсинин үзвләри илә давранышындакы мәһәббәти мүкафатландырылды. Вахт өтдүкҹә, Јеһоваја аиләси илә бирликдә хидмәт етмәјә башлады, арвады исә һәтта таммүддәтли хидмәтә башлады.

12. Руһани мараглары нәјә ҝөрә биринҹи јерә гојмалыјыг?

¹² Бизим вәзијјәтимизи јанан евдәки адамларын вәзијјәтинә бәнзәтмәк олар. Дағылмаг үзрә олан евдә ора-бура гачараг әшјалары хилас етмәк ҹәһди мүдрикликми оларды? Мәҝәр инсанлары — өзүмүзү, аиләмизи вә башга сакинләри хилас етмәк даһа ваҹиб дејилми? Индики пис систем өз сонуна чох сүр’әтлә јахынлашыр — о, чох тезликлә “дағылаҹаг” вә инсанларын һәјаты тәһлүкә алтындадыр. Буну баша дүшәрәк, биз руһани мараглары биринҹи јерә гојмалы вә диггәтимизи бүтүнлүклә Падшаһлыг һаггындакы хиласедиҹи тәблиғ ишинә јөнәлтмәлијик (1 Тимотејә 4:16).

Бизә “ләкәсиз” олмаг ҝәрәкдир

13. Јеһованын ҝүнү ҝәләндә биз неҹә инсанлар олмаг истәјирик?

¹³ Петер диггәтимизи ҝөзләмәјин ваҹиблијинә јөнәлдәрәк дејир: “Еј севимлиләр, бу ишләри ҝөзләјәрәк, чалышын ки, Онун һүзурунда нөгсансыз, ләкәсиз вә сүлһ ичиндә тапыласыныз” (2 Петер 3:14). Петер јалныз мүгәддәс вә Аллаһа ихласкар олмағы вәсијјәт етмир, һәм дә Јеһованын инсаны Мәсиһин ганы илә тәмизләнмиш һесаб етмәсинин ваҹиблијини вурғулајыр (Вәһј 7:9, 14). Бунун үчүн инсан Исанын гурбанлығына иман ҝәтирмәли вә Јеһованын һәср олунмуш вә вәфтиз едилмиш хидмәтчиси олмалыдыр.

14. “Ләкәсиз” олмаг нә демәкдир?

¹⁴ Петер Јеһованын бизи “ләкәсиз” тапмасы үчүн әлимиздән ҝәләни етмәјә тәшвиг едир. Дүнјанын давранышымызы вә дүшүнҹәмизи мурдарламасына јол вермәјәрәк, символик мәсиһчи либасымызы ләкәсиз сахлајырыгмы? Әҝәр палтарымызда ләкә ҝөрсәк ондан дәрһал азад олмаға чалышарыг. Сөһбәт ән севдијимиз палтардан ҝедирсә, ону тәмизләмәјинҹә сакитләшмәрик. Хасијјәтимиздәки вә ја давранышымыздакы һансыса гүсурлар, тәшбеһләрлә десәк, символик мәсиһчи ҝејимимизи ләкәләјирсә буна бәнзәр һиссләр кечиририкми?

15. а) Исраиллиләр нәјә ҝөрә ҝејимләринин әтәкләриндә сачаглар дүзәлтмәли идиләр? б) Јеһованын мүасир хидмәтчиләри бу дүнјадан нә илә фәргләнирләр?

¹⁵ Исраиллиләрә “ҝејимләринин әтәкләриндә сачаг” дүзәлтмәк вә “әтәјин сачағы үзәринә түнд ҝөј гајтан” гојмаг тапшырылмышды. Нәјә ҝөрә? Јеһованын әмрләрини јадда сахласынлар, онлары јеринә јетирсинләр вә Аллаһлары гаршысында ‘мүгәддәс олсунлар’ дејә (Сајлар 15:38-40). Биз, Јеһованын мүасир хидмәтчиләри, бу дүнјадан фәргләнирик, чүнки Аллаһын ганунларына вә принсипләринә риајәт едирик. Мәсәлән, биз әхлаги тәмизлији горујуб сахлајыр, ганын мүгәддәслијини е’тираф едир вә бүтпәрәстлијин һәр бир нөвүндән гачынырыг (Һәвариләрин ишләри 15:28, 29). Өзүмүзү ләкәсиз сахламаг гәтијјәтимизә ҝөрә чохлары бизә һөрмәт едир (Јагуб 1:27).

Бизә “нөгсансыз” олмаг ҝәрәкдир

16. “Нөгсансыз” олмаг үчүн нә етмәк лазымдыр?

¹⁶ Петер һәм дә дејир ки, бизә “нөгсансыз” олмаг ҝәрәкдир. Буна неҹә наил олмаг олар? Ләкәни адәтән јумаг вә ја тәмизләмәк олур. Лакин палтар корланарса, даһа доғрусу өзүндә гүсуру оларса, ону бәрпа етмәк о гәдәр дә асан дејил. Һәвари Павел Филипи шәһәриндә олан һәмиманлыларына өјүд верирди: “Һәр шеји шикајәтсиз вә е’тиразсыз иҹра един ки, сиз, әјри вә позғун нәсил арасында нөгсансыз вә саф, Аллаһын гүсурсуз өвладлары оласыныз. Сиз о нәсил ичиндә һәјат кәламыны мөһкәм тутараг, каинатда улдузлар кими парлајырсыныз” (Филипилиләрә 2:14, 15). Әҝәр биз бу өјүдә риајәт едириксә, онда шикајәт вә е’тираз етмәкдән гачынаҹаг, һәм дә Аллаһа тәмиз нијјәтләрлә хидмәт едәҹәјик. ‘Падшаһлыг һаггында олан Мүждәни’ (И–93) тәблиғ етмәјә бизи Јеһоваја вә јахынларымыза олан мәһәббәт тәшвиг едәҹәкдир (Матта 22:35-40; 24:14). Бундан әлавә, башгаларына Аллаһ вә Онун кәламы олан Мүгәддәс Китаб һаггында өјрәнмәјә көмәк едәрәк, көнүллү сурәтдә вахтымызы вә гүввәмизи һәср етмәјимизин сәбәбини инсанларын чоху, еһтимал ки, дәрк етмәсәләр дә, биз хош хәбәри бәјан етмәјә давам едәҹәјик.

17. Мәсиһчи јығынҹағында мәс’ул вәзифәјә ҹан атырыгса һансы нијјәтләрә малик олмалыјыг?

¹⁷ “Нөгсансыз” олмаг истәдијимиз үчүн, биз һәјатымызын һәр бир саһәсиндә нијјәтләримизи јохламалыјыг. Артыг биз бу дүнјанын, чох вахт нәји исә шәхси мәнафеләри үчүн, мәсәлән, вар-дөвләт вә ја һакимијјәт үчүн едән инсанлары кими давранмырыг. Әҝәр биз мәсиһчи јығынҹағында мәс’ул вәзифәјә ҹан атырыгса, гој бизим нијјәтләримиз тәмиз галсын вә бизи һәмишә Јеһоваја вә инсанлара мәһәббәт һәрәкәтә ҝәтирсин. Руһани әһвал-руһијјәли кишиләрин Јеһоваја, һәмчинин һәмиманлыларына севинҹлә вә һәлимликлә хидмәт етмәк арзусу тәзаһүр етдирәрәк, ‘нәзарәтчи олмаға һәвәс ҝөстәрмәси’ неҹә дә тәравәтләндирир (1 Тимотејә 3:1; 2 Коринфлиләрә 1:24). Бәли, ағсаггал кими хидмәт етмәјә јарарлы оланлар ‘Аллаһын сүрүсүнә мәҹбури дејил, көнүллү шәкилдә, биабырчы газанҹ үчүн дејил, шөвглә нәзарәт едирләр. Онлара тапшырыланлара гаршы зүлмкар јох, сүрүјә нүмунә олурлар’ (1 Петер 5:1-4).

Бизә “сүлһ ичиндә” јашамаг ҝәрәкдир

18. Јеһованын Шаһидләри һансы кејфијјәтләри илә танынырлар?

¹⁸ Нәһајәт, Петер бизи “сүлһ ичиндә” јашамаға тәшвиг едир. Бу тәләбә ҹаваб вермәк үчүн Јеһова илә вә јахынларымызла сүлһдә олмағымыз зәруридир. Петер ‘бир-биримизә ҹошғун мәһәббәтимизин олмасынын’ вә һәмиманлыларымызла сүлһдә олмағын нә гәдәр ваҹиб олдуғуну вурғулајыр (1 Петер 2:17; 3:10, 11; 4:8; 2 Петер 1:5-7). Сүлһүмүзү горујуб сахламаг үчүн арамызда мәһәббәт олмалыдыр (Јәһја 13:34, 35; Ефеслиләрә 4:1, 2). Бизим мәһәббәтимиз вә сүлһүмүз бејнәлхалг конгресләр кечириләндә хүсусилә нәзәрә чарпыр. 1999-ҹу илдә Коста-Рикада кечирилән конгрес заманы, һава лиманында гонаглары гаршылајан јерли Шаһидләр билмәдән бир тиҹарәтчинин пиштахтасынын гаршысыны бағламыш, о да бундан гәзәбләнмишди. Лакин икинҹи ҝүн о диггәт јетирди ки, јерли Шаһидләр гонагларыны шәхсән танымасалар да, онлары мәһәббәт вә сүлһ шәраитиндә гаршылајырлар. Конгресин сонунҹу ҝүнү тиҹарәтчи дә гонаглары саламламаға башлады вә хаһиш етди ки, онунла Мүгәддәс Китабы өјрәнмәјә башласынлар.

19. Һәмиманлыларымызла сүлһә ҹан атмаг нәјә ҝөрә олдугҹа ваҹибдир?

¹⁹ Руһани баҹы-гардашларымызла сүлһдә олмаға нә гәдәр ҹан атмағымыз, Јеһованын ҝүнүнүн вә Онун вә’д етдији јени дүнјанын ҝәлмәсини нә гәдәр үрәкдән арзуладығымызы ҝөстәрир (Мәзмур 37:11; 2 Петер 3:13). Фәрз едәк ки, һансыса һәмиманлымызла сүлһү горујуб сахламаг бизим үчүн чәтиндир. Ҹәннәтдә өзүмүзү онунла сүлһ ичиндә јашајан тәсәввүр едирикми? Әҝәр гардашымызын бизә гаршы шикајәти варса, биз јубанмадан онунла барышмалыјыг (Матта 5:23, 24). Јеһова илә сүлһдә олмаг истәјириксә, бу, олдугҹа ваҹибдир (Мәзмур 35:27; 1 Јәһја 4:20).

20. Ҝөзләмәји баҹардығымызы неҹә ҝөстәририк?

²⁰ Бизим һаггымызда демәк олармы ки, биз ‘Аллаһын Ҝүнүнүн зүһуруну ҝөзләјиб, ону јаддашымызда мөһкәм сахлајырыг’? Пислијин сонуну ҝөрмәк кими ҹошғун арзумуз, бу әхлагсыз дүнјада мүгәддәс олараг галмағымыздан ҝөрүнүр. Бундан әлавә, Јеһованын ҝүнүнүн ҝәлишини чох истәдијимиз вә Падшаһлығын рәһбәрлији алтында јашамаға чалышдығымыз үчүн Аллаһа ихласкарлығымызы горујуб сахлајырыг. Вә бизим сүлһ ичиндәки јени дүнјада јашамаг арзумуз, артыг индидән һәмиманлыларымызла сүлһә ҹан атмағымыздан ҝөрүнүр. Беләликлә ҝөстәририк ки, ҝөзләмәји баҹарырыг вә ‘Аллаһын Ҝүнүнүн зүһуруну јаддашымызда мөһкәм сахлајырыг’.

[Һашијә]

Хатырлајырсынызмы?

• ‘Аллаһын Ҝүнүнүн зүһуруну јадда мөһкәм сахламаг’ нә демәкдир?

• Ҝөзләмәк баҹарығы давранышымызда неҹә әкс олунур?

• Аллаһа ихласкарлыг нәјә ҝөрә олдугҹа ваҹибдир?

• Јеһованын бизи “нөгсансыз, ләкәсиз вә сүлһ ичиндә” тапмасы үчүн нә етмәк лазымдыр?

[9-ҹу сәһифәдәки шәкил]

Ҝөзләмәк баҹарығы, мүгәддәс һәјат јашамағымыздан ҝөрүнүр.

[10-ҹу сәһифәдәки шәкилләр]

Падшаһлыг һаггындакы тәблиғ иши инсанларын һәјатыны хилас едир.

[12-ҹи сәһифәдәки шәкил]

Ҝәлин Јеһованын ҝүнүнү ҝөзләјәрәк сүлһә ҹан атаг.