Аллаһын вә’д етдији јени дүнја
БИЗ Аллаһын јазылы Кәламы олан Мүгәддәс Китабда нөвбәти сөзләри охујанда үрәјимиз үмидлә долур: “Биз Онун вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр” (2 Петер 3:13).
“Јени ҝөјләр” нәдир? Мүгәддәс Китабда ҝөјләр чох вахт мә’наҹа һакимијјәтлә бағлыдыр (Һәвариләрин ишләри 7:49). “Јени ҝөјләр” јер үзәриндә һөкмранлыг едәҹәк јени һөкумәтдир. Бу “ҝөјләр” о мә’нада јенидир ки, буҝүнкү һакимијјәт системини әвәз едәҹәк; бу, һәмчинин Аллаһын нијјәтинин һәјата кечмәсиндә јени мәрһәләдир. Бу “ҝөјләр”, Исанын бизә һаггында дуа етмәји өјрәтдији һәмин Падшаһлыгдыр (Матта 6:10). Бу Падшаһлығы Јарадан Аллаһын мәскәни ҝөјләрдә олдуғундан, о, “Ҝөјләрин Падшаһлығы” адланыр (Матта 7:21, И–93).
“Јени јер” нәдир? Бу, јени Јер күрәси демәк дејил, чүнки Мүгәддәс Китабда ајдын шәкилдә дејилир ки, јер үзүндә һәмишә инсанлар јашајаҹагдыр. “Јени јер” ифадәси алтында јени инсан ҹәмијјәти нәзәрдә тутулур. О она ҝөрә јенидир ки, орада јашајан пис адамлар јох едиләҹәкләр (Сүлејманын мәсәлләри 2:21, 22). О заман һамы Јараданын тәләбләринә мүвафиг јашајараг Она һәмд едәҹәк вә Она табе олаҹаглар (Мәзмур 22:27). Бүтүн халглардан олан инсанлар бу тәләбләри өјрәнмәјә вә артыг индидән онлара мүвафиг јашамаға дә’вәт олунурлар. Сән дә белә давранырсанмы?
Аллаһын јени дүнјасында һәр кәс Онун һакимијјәтинә һөрмәтлә јанашаҹаг. Аллаһа олан мәһәббәт сәни Она итаәт етмәјә тәшвиг едирми? (1 Јәһја 5:3). Бу, сәнин евдә, ишдә вә ја мәктәбдә давраныш тәрзиндән вә һансы мәгсәдләрә ҹан атмағындан ҝөрүнүрмү?
Һәмин јени дүнјада инсан ҹәмијјәти һәгиги Аллаһа бирликдә ибадәт едәҹәк. Сән Јери вә ҝөјү Јарадана ибадәт едирсәнми? Аллаһа етдијин ибадәт сәни башга халглардан, иргләрдән вә дилләрдән олан һәмиманлыларынла һәгигәтәнми бирләшдирир? (Мәзмур 86:9, 10; Ишаја 2:2-4; Тсефанја 3:9).
[17-ҹи сәһифәдә олан чәрчивә]
Бүтүн бунлары вә’д едән Аллаһ
О, ҹисмани ҝөјләрин вә Јер күрәсинин Јараданыдыр. О, Иса Мәсиһин танытдығы ‘ваһид һәгиги Аллаһдыр’ (Јәһја 17:3).
Инсанларын әксәријјәти өзләринин иҹад етдикләри аллаһлара ибадәт едирләр. Милјонларла адамлар ҹансыз сурәтләрә пәрәстиш едирләр. Диҝәрләри иҹтимаи тәшкилатлары, материализм фәлсәфәсини вә ја өз истәкләрини тә’рифләјирләр. Һәтта өз ибадәтләрини Мүгәддәс Китаба әсасландырдыгларыны иддиа едәнләрин һамысы, һәмин китабда һаггында бәһс олунан ваһид вә һәгиги Аллаһын адына еһтирам ҝөстәрмирләр (Тәснијә 4:35).
Өзү һаггында Јарадан белә дејир: “Мән Јеһовајам, исмим одур” (Ишаја 42:5, 8). Мүгәддәс Китабын јазылдығы орижинал дилләрдә бу ада 7 000 дәфәдән артыг раст ҝәлинир. Иса Мәсиһ өз давамчыларына дуа етмәји өјрәдирди: “Еј ҝөјләрдә олан Атамыз, адын мүгәддәс тутулсун” (Матта 6:9).
Һәгиги Аллаһ һансы хүсусијјәтләрә маликдир? О Өзү һаггында “чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан” вә биләрәкдән Онун ганунларыны позанлары ҹәзасыз гојмајан бир Аллаһ кими данышыр (Чыхыш 34:6, 7). Бу тәсвирин доғрулуғу әсрләр әрзиндә Јеһованын инсанларла неҹә давранмасы илә тәсдиг олунур.
Һәм Аллаһын ады, һәм дә бу ады дашыјан шәхсијјәт мүгәддәс тутулмалыдыр. Јарадана вә Каинатын Али Һөкмдарына итаәт етмәјә вә јалныз Она ибадәт етмәјә там әсасымыз вар. Сән дә белә едирсәнми?
[18-ҹи сәһифәдә олан чәрчивә вә шәкил]
Јени ҝөјләр” вә “јени јер” бәшәријјәтә нә ҝәтирәҹәк?
Ҹәннәтә чеврилмиш Јер күрәси
Мәһәббәтдә бирләшмиш бүтүн халглардан, иргләрдән вә дилләрдән олан инсанларын үмумдүнја ҹәмијјәти
Бүтүн јер үзүндә һәгиги сүлһ вә тәһлүкәсизлик
Мәмнунлуг ҝәтирән иш, гида боллуғу
Хәстәликләрин, кәдәр вә өлүмүн арадан галдырылмасы
Һәгиги Аллаһа ибадәтдә бирләшмиш дүнја
[19-ҹу сәһифәдә олан чәрчивә вә шәкил]
Сән “јени јерин” бир һиссәси олаҹагсанмы?
Аллаһ јалан данышмаз! (Титуса 1:2).
Јеһова бизи әмин едир: “Сөзүм мәнә бош дөнмәјәҹәкдир, фәгәт мурад етдијим шеји едәҹәк вә етсин дејә ону ҝөндәрдијим иши баҹараҹаг” (Ишаја 55:11).
Артыг индидән Јеһова “јени ҝөјләр вә јени јер” јарадыр. Ҝөјләр һөкумәти артыг фәалијјәт ҝөстәрир. “Јени јерин” тәмәли артыг гојулмушдур.
“Вәһј” китабында ‘јени ҝөјләрин вә јени јерин’ бәшәријјәт үчүн ҝәтирәҹәји ҝөзәл хејир-дуалар һаггында бәһс едилдикдән сонра, Каинатын Али Һөкмдары олан Аллаһын сөзләри ҝәтирилир: “Будур, Мән һәр шеји јениләшдирирәм”. О һәмчинин дејир: “Јаз, чүнки бу сөзләр һәгиги вә е’тимада лајигдир” (Вәһј 21:1, 5).
Ваҹиб мәсәлә ондан ибарәтдир ки, биз “јени јерин” бир һиссәси олмаг вә “јени ҝөјләрин” һөкмранлығы алтында јашамаға лајиг олмаг үчүн һәјатымызда лазыми дәјишикликләр едирикми?