Һәгигәт сизин үчүн нә гәдәр дәјәрлидир?
“Сиз һәгигәти дәрк едәҹәксиниз; вә һәгигәт сизи азад едәҹәкдир” (ЈӘҺЈА 8:32).
1. Ҝөрүндүјү кими, Пилатдан фәргли олараг, Иса “һәгигәт” сөзү алтында нәји нәзәрдә тутурду?
“ҺӘГИГӘТ нәдир?” Пилат бу суалы верәркән, еһтимал ки, үмумијјәтлә һәгигәти нәзәрдә тутурду. Амма Иса бундан әввәл демишди: “Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим” (Јәһја 18:37, 38). Пилатдан фәргли олараг, Иса Аллаһын һәгигәти барәдә данышырды.
Дүнја һәгигәтә неҹә јанашыр?
2. Исанын һансы сөзләри һәгигәтин дәјәрли олдуғуну ҝөстәрир?
2 Павел дејирди: “Һамы иман етмир” (2 Салониклиләрә 3:2). Һәмин сөзләри һәгигәт һаггында да демәк олар. Һәтта Мүгәддәс Китаба әсасланан һәгигәтлә таныш олдугдан сонра белә, бир чох инсанлар она биләрәкдән е’тинасызлыг ҝөстәрирләр. Буна бахмајараг, һәгигәт олдугҹа гијмәтлидир! Иса деди: “Сиз һәгигәти дәрк едәҹәксиниз; вә һәгигәт сизи азад едәҹәкдир” (Јәһја 8:32).
3. Јалан тә’лимләрә даир һансы хәбәрдарлыға диггәт јетирмәлијик?
3 Һәвари Павел, һәгигәти инсан фәлсәфәләриндә вә ән’әнәләриндә тапмағын мүмкүн олмадығыны сөјләјирди (Колослулара 2:8). Әслиндә бу ҹүр тә’лимләр алдадыҹыдыр. Павел Ефес мәсиһчиләрини хәбәрдар едирди ки, әҝәр онлар инсан фәлсәфәләринә вә ән’әнәләринә инанарларса, “инсанларын кәләкбазлығы илә... һәр ҹүр тә’лимин күләји илә чалхаланан вә ора-бура сүрүкләнән көрпә ушаглар” кими олаҹаглар (Ефеслиләрә 4:14). Бу ҝүн “инсанларын кәләкбазлығы”, Аллаһын һәгигәтинә гаршы дуран кәсләрин васитәсилә тәблиғат олунур. “Тәблиғат” сөзү, “бир нәзәријјәни, идејаны, билији вә с.-ни күтлә арасында јајма, тәблиғ етмәк” кими изаһ олунур (“Азәрбајҹан дилинин изаһлы лүғәти”, IV ҹилд, 1987). Бу ҹүр тәблиғат һәгигәти мәһарәтлә јалана чевирир вә јаланы һәгигәт кими гәләмә верир. Мәкрли јалана бахмајараг, һәгигәти тапмаг үчүн Мүгәддәс Јазылары сә’јлә арашдырмалыјыг.
Мәсиһчиләр вә дүнја
4. Һәгигәт кимә бәхш едилир вә ону гәбул едәнләр һансы мәс’улијјәти дашыјырлар?
4 Иса Мәсиһ, шаҝирдләри барәдә Јеһоваја дуа едирди: “Онлары һәгигәтинлә мүгәддәс ејлә; Сәнин сөзүн һәгигәтдир” (Јәһја 17:17). Бу инсанлар, Јеһоваја хидмәт етмәк, Онун адына вә Падшаһлығына иззәт ҝәтирмәк үчүн һәср едилмәли, јә’ни ајрылмалыдырлар (Матта 6:9, 10; 24:14). Аллаһын һәгигәти һамыда олмаса да, миллијәтиндән, иргиндән вә ја мәдәнијјәтиндән асылы олмајараг, ону арзу едән һәр бир кәсә сәрбәст олараг бәхш едилир. Һәвари Петер демишдир: “Дәрк едирәм ки, Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур” (Һәвариләрин ишләри 10:34, 35).
5. Мәсиһчиләри тез-тез нәјә ҝөрә тә’гиб едирләр?
5 Мәсиһчиләр Мүгәддәс Китаб һәгигәтләрини башгалары илә бөлүшүрләр, лакин онлары һамы севинҹлә гәбул етмир. Иса хәбәрдар едирди: “Сизә әзијјәт вериб өлдүрәҹәкләр; вә Мәним адыма ҝөрә бүтүн халглар сизә нифрәт едәҹәкләр” (Матта 24:9). Ирландијалы илаһијјатчы Ҹон Коттер бу ајәни шәрһ едәрәк, 1817-ҹи илдә јазырды: “Онларын [мәсиһчиләрин] өз тәблиғләри васитәсилә инсанларын һәјатыны дәјишмәк ҹәһдләри һеч дә миннәтдарлыг дејил, инсан гүсурларыны ифша етдикләри үчүн нифрәт вә тә’гиб ојатды”. Мәсиһчиләрин бу ҹүр тә’гибчиләри “һәгигәти севмәјә вә онунла хилас олмаға разы” олмадылар. Буна ҝөрә дә “Аллаһ, јалана инанмалары үчүн онларын үзәринә алдадыҹы бир ҝүҹ ҝөндәрир ки, һәгигәтә иман етмәјәнләрин, һагсызлыг етмәкдән зөвг аланларын һамысы мәһкум олунсун” (2 Салониклиләрә 2:10-12).
6. Мәсиһчиләр һансы арзулары инкишаф етдирмәли дејилләр?
6 Һәвари Јәһја дүшмәнчилик руһу әкс етдирән дүнјада јашајан мәсиһчиләрә мәсләһәт едир: “Дүнјаны вә дүнјада олан шејләри севмәјин... дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр” (1 Јәһја 2:15, 16). “Дүнјада олан һәр шеј” демәклә, Јәһја һеч бир истисна етмир. Буна ҝөрә дә дүнјанын тәклиф етдији һәр нә исә бизи һәгигәтдән ајырырса, ону әлдә етмәјә һәвәс инкишаф етдирәҹәјикми? Јәһјанын мәсләһәтинә диггәт јетирмәјимиз, һәјатымыза ҝүҹлү тә’сир ҝөстәрәҹәк. Неҹә?
7. Һәгигәт сәмими гәлбли инсанлары нәјә тәшвиг едир?
7 Јеһованын Шаһидләри 2001-ҹи ил әрзиндә бүтүн дүнјада инсанлары Аллаһа мәгбул һәјат нормалары илә таныш едәрәк, һәр ај дөрд милјон беш јүз миндән артыг (фәрди вә ја груп һалында) Мүгәддәс Китаб өјрәнмәси кечирмишләр. Нәтиҹәдә 263 431 адам вәфтиз олунмушдур. Һәгигәт ишығы Исанын јени шаҝирдләри үчүн дәјәрли олмушдур; онлар пис достлуглардан, һәмчинин бу дүнјада ҝениш јајылан вә Аллаһы наразы салан әхлагсыз һәјат тәрзиндән имтина етмишләр. Онлар вәфтиз олунараг, Јеһова Аллаһын бүтүн мәсиһчиләр үчүн тә’јин етдији нормалара риајәт етмәјә чалышырлар (Ефеслиләрә 5:5). Һәгигәт сизин үчүн дә бу гәдәр дәјәрлидирми?
Јеһова гајғымыза галыр
8. Јеһова, һәср едилмәјимизә неҹә јанашыр вә “әввәлҹә Онун Падшаһлығыны” ахтармаг нәјә ҝөрә мүдрик давранышдыр?
8 Нөгсанларымыза бахмајараг, Јеһова, өзүмүзү Она һәср етмәјә мәрһәмәтлә изин верир вә санки әјиләрәк бизә даһа јахын олур. Бизи өјрәтмәси сајәсиндә, јүксәк мәгсәдләримиз вә мејлләримиз јараныр (Мәзмур 113:6-8). Јеһова бизә, Онунла гаршылыглы мүнасибәт јаратмаға имкан верир вә әҝәр “әввәлҹә Онун Падшаһлығыны вә Онун салеһлијини” ахтармаға давам едәриксә, гајғымыза галаҹағына вә’д верир. Бунунла јанашы руһанилијимизи горујуругса, Аллаһ әмин едир: “Бүтүн бу шејләр сизә артырылаҹагдыр” (Матта 6:33, И-93).
9. “Садиг вә ағыллы гул” кимдир вә онун васитәсилә Јеһова бизә неҹә гајғы ҝөстәрир?
9 Иса Мәсиһ 12 һәварисини сечәрәк, “Аллаһын Исраили” адланан мәсһ едилмиш мәсиһчиләр јығынҹағынын тәмәлини гојду (Галатијалылара 6:16; Вәһј 21:9, 14). Бир гәдәр сонра, мәсһ едилмиш мәсиһчиләр “һәгигәтин дирәји вә әсасы... јашајан Аллаһын ҹәмијјәти” адландылар (1 Тимотејә 3:15). Иса јығынҹағын бу үзвләрини “садиг вә ағыллы гул”, һәмчинин “садиг вә ағыллы нөкәрбашы” адландырды. Исанын сөзләринә ҝөрә, бу садиг гул “вахтлы-вахтында... јемәк” вермәли иди (Матта 24:3, 45-47; Лука 12:42). Јемәксиз аҹындан өләрик. Буна бәнзәр тәрздә, руһани гида олмазса руһән зәифләр вә өләрик. Беләликлә, “садиг вә ағыллы гулун” мөвҹуд олмасы, Јеһованын бизә гајғы ҝөстәрдијинә даһа бир сүбутдур. Ҝәлин, садиг гулун тәгдим етдији дәјәрли руһани гиданы һәмишә гијмәтләндирәк! (Матта 5:3).
10. Јығынҹаг ҝөрүшләринә мүнтәзәм ҝәлмәк бизим үчүн нәјә ҝөрә һәјати ваҹибдир?
10 Руһани гида өзүнә, шәхси өјрәнмәни, һәмчинин һәмиманлыларла үнсијјәти вә јығынҹаға ҝетмәји дахил едир. Алты ај, јахуд да алты һәфтә өнҹә нә једијинизи хатырлајырсынызмы? Еһтимал ки, јох. Һәр һалда нә илә гидаландығыныза бахмајараг, һәмин гида мөһкәмләнмәјиниз үчүн ваҹиб олмушдур. Вә еһтимал ки, о ҝүндән е’тибарән сиз һәмин гиданы бир нечә дәфә јемисиниз. Ејни сөзү, мәсиһчи јығынҹагларында тәгдим едилән руһани гида һаггында да демәк олар. Јәгин ки, ҝөрүшләрдә ешитдикләримизи тәфәррүаты илә хатырламырыг. Ҝөрүшләрдә мүзакирә едилән материал да, еһтимал ки, дәфәләрлә тәкрарланыб. Буна бахмајараг, бу, бизим үчүн һәјати ваҹиб олан руһани гидадыр. Ҝөрүшләримиздә јахшы руһани гиданы вахтлы-вахтында алырыг.
11. Мәсиһчи ҝөрүшләринә ҝәлмәк үзәримизә һансы мәс’улијјәти гојур?
11 Јығынҹаг ҝөрүшләринә ҝәлмәк, һәмчинин үзәримизә мүәјјән мәс’улијјәт гојур. Мәсиһчиләр һәмиманлыларыны “мәһәббәтә вә хејирли ишләрә” тәшвиг едәрәк, бир-бирләрини руһландырмаға дә’вәт олунурлар. Ҝөрүшләрә һазырлашараг вә онларда фәал иштирак едәрәк иманымызы мөһкәмләдир вә башгаларыны руһландырырыг (Ибраниләрә 10:23-25). Бә’зиләрини, јемәјә шылтаглыгла јанашан ушаглар кими, руһани гиданы мәнимсәмәјә даима тәшвиг етмәк лазымдыр (Ефеслиләрә 4:13). Әҝәр зәруридирсә, бу ҹүр көмәклик мәһәббәтин тәзаһүрү кими хидмәт едир вә руһән јеткин мәсиһчиләр олмаға көмәк едир. Һәвари Павел јазырды: “Гүввәтли јемәк исә камилләр үчүндүр. Чүнки онларын һиссләри алышдырылараг, хејирлә шәри ајырд етмәк үчүн тәрбијә едилмишдир” (Ибраниләрә 5:14).
Руһанилијимиз үчүн гајғы
12. Һәгигәтдә мөһкәм дајанмағымыз илк нөвбәдә кимдән асылыдыр? Изаһ един.
12 Һәјат јолдашымыз вә ја валидејнләримиз һәгигәтдә мөһкәмләнмәкдә бизә көмәк едә биләрләр. Һәмчинин, јығынҹағын ағсаггаллары да, онлара һәвалә олунмуш сүрүјә чобанлар кими гајғы ҝөстәрирләр (Һәвариләрин ишләри 20:28). Бәс һәгигәтдә мөһкәм дурмағымыз илк нөвбәдә кимдән асылыдыр? Әлбәттә ки, дүшдүјүмүз шәраитә бахмајараг, бизим өзүмүздән асылыдыр. Бир дәфә Шотландијада баш верән һадисәни нәзәрдән кечирәк.
13, 14. Гузу илә әлагәли әјани нүмунәјә әсасән, лазыми руһани көмәји неҹә алмаг олар?
13 Гузулар чәмәнликдә отлајырдылар. Бирдән онлардан бири сүрүдән ајрылараг узаглашды вә тәпәдән ашағы дығырланды. Гузу зәдәләнмәди, амма горхмушду вә һеч ҹүр јухары чыха билмирди. Бу заман шикајәтли сәслә мәләмәјә башлады. Анасы бу сәси ешидиб, чобан гузуну азад едәнә кими, мәләмәјә башлады.
14 Һадисәнин ҝедишатына диггәт јетирин. Гузу көмәјә чағырды, анасы баш верән һадисәни чобана билдирмәк үчүн она гошулду, чобан исә дара дүшән һејваны хилас етмәјә тәләсди. Гузу вә анасы тәһлүкәни һисс едиб, јубанмадан көмәјә чағырдылар. Руһән бүдрәјәндә, јахуд Шејтанын дүнјасында гәфил тәһлүкә илә гаршылашанда, биз дә ејни тәрздә давранмалы дејиликми? (Јагуб 5:14, 15; 1 Петер 5:8). Әлбәт ки, хүсусән дә ҝәнҹ олдуғумуз вә ја һәгигәтә тәзә ҝәлдијимиз үчүн тәҹрүбәмиз аздырса, белә давранмалыјыг.
Аллаһын рәһбәрлији хошбәхтлик ҝәтирир
15. Мәсиһчи јығынҹағына ҝәлмәјә башлајан бир гадын һансы һиссләри јашады?
15 Мүгәддәс Китабы анламағын вә бу анлајышын һәгигәт Аллаһына хидмәт едәнләрә ҝәтирдији раһатлығын нә дәрәҹәдә ваҹиб олдуғуну нәзәрдән кечирәк. Һәјаты боју англикан килсәсинә ҝедән 70 јашлы бир гадын, Јеһованын Шаһиди илә Мүгәддәс Китабы өјрәнмәјә разы олду. Тезликлә өјрәнди ки, Аллаһын ады Јеһовадыр вә Падшаһлыг Залына ҝәләрәк, үмуми сөјләнән сәмими дуадан сонра һамы илә бирликдә “амин” демәјә башлады. Гадын фәрәһлә деди: “Сизин үчүн Аллаһ, садә адамлар үзәриндә јүксәлән, узагда олан бир шәхсијјәт дејил, әзиз бир дост кими јахындыр. Билмәздим ки, Аллаһла бу ҹүр мүнасибәтләр мүмкүндүр”. Сәмими гәлбли бу гадын, һәгигәтин онда јаратдығы илк тәәссүраты, еһтимал ки, һеч заман унутмајаҹагдыр. Һәгигәти гәбул едән заман онун бизим үчүн нә гәдәр гијмәтли олдуғуну ҝәлин биз дә һеч заман унутмајаг.
16. а) Һәјатымызда пул әсас јери тутарса, нә баш верә биләр? б) Һәгиги хошбәхтлији неҹә тапмаг олар?
16 Чохлары дүшүнүрләр ки, пуллары чох олсајды даһа хошбәхт олардылар. Лакин пул һәјатымызда башлыҹа јери тутарса, өзүмүзә “бир чох әзаблар” чәкдирә биләрик (1 Тимотејә 6:10). Латореја билетләри алараг, казиноларда пул хәрҹләјәрәк вә ја дүшүнҹәсиз тәрздә фонд биржасында алверлә мәшғул олараг чох адам өзүнә ад газанмаға чалышыр! Амма чох аз адам буна наил олур. Ҝөзләнилмәдән варлананлар исә, чох вахт бундан хошбәхтлик әлдә етмирләр. Һәгиги хошбәхтлик исә, инсан Јеһованын ирадәсини јеринә јетирәндә, һәмчинин Јеһованын руһунун рәһбәрлији вә мәләкләрин јардымы сајәсиндә фәалијјәт ҝөстәрән мәсиһчи јығынҹағы илә әмәкдашлыг едәндә јараныр (Мәзмур 1:1-3; 84:4, 5; 89:15). Бу ҹүр јолда ҝөзләнилмәз хејир-дуалар алаҹағыг. Бу хејир-дуалары ҝәтирән һәгигәт сизин үчүн нә гәдәр дәјәрлидир?
17. Даббағ Шимонун евиндә галмасы, һәвари Петерин бахышлары һагда нә дејир?
17 Һәвари Петерин нүмунәсинә бахаг. О, ерамызын 36-ҹы илиндә, Шарон дүзәнлијинә, миссионер хидмәтинә јолланды. Орада Лод шәһәриндә галды вә Енеја адлы бир ифлиҹи сағалтды, сонра исә лиман шәһәри Јаффаја јолланды. Јаффада Табитаны дирилтди. Һәвариләрин ишләри 9:43 ајәсиндә дејилир: “Петер хејли вахт Јаффада Шимон адлы бир даббағын евиндә галды”. Бу өтәри хатырлатма она ишарә едир ки, Петер шәһәрдә тәблиғ едәркән, орада јашајан инсанлара мәнфи рә’ј бәсләмирди. Бу нә илә тәсдиг олунур? Мүгәддәс Китаб алими Фредерик Фаррар јазыр: “[Мусанын] шифаһи ганунунун һеч бир тәләбкар вә сарсылмаз тәрәфдары даббағын евиндә јашамаға разылашмазды. Бу пешәдә лазым олан мүхтәлиф һејванларын дәриләринә вә ҹәсәдләринә даима тохунмаг вә бу иш үчүн ваҹиб олан аләтләр, һәмин адамы сәрт дин алимләринин ҝөзүндә натәмиз вә мурдар едирди”. Һәтта Шимонун “дәниз кәнарында” дуран еви дәри е’малатханасындан аралыда олса да, Фаррарын сөзләринә ҝөрә, Шимонун өзү “нифрәтлә бахылан вә һәмин ишлә мәшғул олан адамын шәхсијјәтини алчалдан” пешә илә мәшғул олурду (Һәвариләрин ишләри 10:6).
18, 19. а) Ҝөрдүјү рө’јанын нә демәк олдуғуна Петер нә үчүн тәәҹҹүбләнди? б) Петер ҝөзләнилмәдән һансы хејир-дуаны алды?
18 Петер, Шимонун гонагпәрвәрлијини јанлыш рә’јләрә әсасланмадан гәбул етди вә онун евиндә јашајаркән, ҝөзләнилмәдән Аллаһдан рәһбәрлик алды. О, бир рө’ја ҝөрдү вә бу рө’јада Аллаһ она, јәһуди ганунуна әсасән натәмиз сајылан һејванлары јемәји бујурурду. Петер, “әсла мурдар вә ја натәмиз шеј јемәмишәм” дејә, е’тираз етди. Лакин она үч дәфә дејилди: “Аллаһын тәмиз дедији шејләри сән мурдар сајма”. Буна ҝөрә дә Петерин “ҝөрдүјү рө’јанын нә демәк олдуғуна” тәәҹҹүбләнмәси ајдындыр (Һәвариләрин ишләри 10:5-17; 11:7-10).
19 Петерин һеч ағлына да ҝәлмәзди ки, бир ҝүн әввәл, Шимонун евиндән 50 км аралыда, Гејсәријә шәһәриндә башга халглардан олан Корнелиуса да рө’ја ҝөрүнмүшдүр. Јеһованын мәләји Корнелиуса бујурмушду ки, гуллугчуларыны даббағ Шимонун евинә ҝөндәрсин вә орада Петери тапсын. Корнелиус гуллугчуларыны Шимонун евинә ҝөндәрди вә онлар Петерлә бирликдә Гејсәријәјә гајытдылар. Петер орада Корнелиуса, онун гоһумларына вә достларына тәблиғ етди. Нәтиҹәдә онлар, сүннәт едилмәмиш башга халглар арасындан Мәсиһә иман ҝәтирән вә Падшаһлығын варисләри кими мүгәддәс руһ алан адамларын илки олдулар. Петерин тәблиғ етдији адамлар сүннәтсиз олсалар да, һамысы вәфтиз олундулар. Бунунла да, јәһудиләрин натәмиз сајдыглары башга халглар үчүн дә мәсиһчи јығынҹағына дахил олмаг имканы јаранды (Һәвариләрин ишләри 10:1-48; 11:18). Петер неҹә дә бөјүк шәрәфә лајиг ҝөрүлмүшдүр! Бүтүн бунлар она ҝөрә олду ки, Петер ону Јеһованын рәһбәрлијинә диггәт јетирмәјә вә иманла һәрәкәт етмәјә тәшвиг едән һәгигәти гијмәтләндирирди.
20. Һәгигәти һәр шејдән артыг гијмәтләндиририксә, Аллаһ бизә һансы көмәклији тәгдим едир?
20 Павел тәшвиг едирди: “Һәгигәти мәһәббәтлә дејәрәк, Башчы олан Мәсиһә доғру һәр ҹәһәтдән бој атаг” (Ефеслиләрә 4:15, И-93). Әҝәр биз һәгигәти һәр шејдән артыг гијмәтләндиририксә вә Јеһованын мүгәддәс руһунун аддымларымызы истигамәтләндирмәсинә изин веририксә, һәгигәт мүгајисәолунмаз хошбәхтлик ҝәтирир. Бундан әлавә, унутмајын ки, тәблиғ хидмәтиндә бизә мүгәддәс мәләкләр көмәк едир (Вәһј 14:6, 7; 22:6). Јеһованын бизә һәвалә етдији ишдә бу ҹүр көмәјә малик олмаг неҹә дә бөјүк шәрәфдир! Әҝәр биз һәгигәт Аллаһы Јеһоваја садиг галырыгса, Ону әбәдијјән иззәтләндирә биләрик. Бундан даһа гијмәтли нә исә вармы? (Јәһја 17:3).
Тәкрар үчүн суаллар
• Нәјә ҝөрә чохлары һәгигәти гәбул етмир?
• Шејтанын дүнјасына мәхсус олан шејләрә мәсиһчиләр неҹә јанашмалыдырлар?
• Јығынҹаг ҝөрүшләринә неҹә јанашмаг лазымдыр вә нәјә ҝөрә?
• Руһанилијимизин гајғысына галмаг үчүн нә етмәлијик?
[32-ҹи сәһифәдәки хәритә/шәкил]
(Хәритәјә нәшрин өзүндә бахын)
УЛУ ДӘНИЗ
Гејсәријә
ШАРОН ДҮЗӘНЛИЈИ
Јаффа
Лод
Јерусәлим
[Шәкил]
Петер Аллаһын рәһбәрлијинә риајәт етди вә ҝөзләнилмәз хејир-дуалар алды.
[Иҹазә илә]
Хәритә: Mountain High Maps® Copyright © 1997 Digital Wisdom, Inc.