Мүгәддәс руһа гаршы ҝүнаһ ишләтмәк нә демәкдир?
«Өлүмлә нәтиҹәләнән... ҝүнаһ вардыр» (1 ЈӘҺЈА 5:16).
1, 2. Аллаһын мүгәддәс руһуна гаршы ҝүнаһ ишләтмәјин мүмкүн олдуғуну һарадан билирик?
«МҮГӘДДӘС РУҺА гаршы ҝүнаһ ишләтдијим фикри мәни раһат бурахмырды». Алманијада јашајан бир гадын Аллаһа хидмәт етдијинә бахмајараг, бу сөзләри јазмышды. Доғруданмы мәсиһчинин Аллаһын мүгәддәс руһуна вә ја фәал гүввәсинә гаршы ҝүнаһ ишләтмәси мүмкүндүр?
2 Бәли, Јеһованын мүгәддәс руһуна гаршы ҝүнаһ ишләтмәк мүмкүндүр. Иса Мәсиһ демишдир: «Инсанларын һәр ҝүнаһ вә күфрү бағышланаҹагдыр; амма Руһа гаршы күфр бағышланмајаҹагдыр» (Матта 12:31). Мүгәддәс Јазылар хәбәрдарлыг едир: «Һәгигәти дәрк едиб мәнимсәдикдән сонра гәсдән ҝүнаһ ишләсәк, ҝүнаһлар үчүн артыг гурбан галмаз, лакин һөкмүн дәһшәтли бир интизары... галыр» (Ибраниләрә 10:26, 27). Һәвари Јәһја исә јазмышдыр: «Өлүмлә нәтиҹәләнән... ҝүнаһ вардыр» (1 Јәһја 5:16). Бәс ишләтдији ҹидди ҝүнаһын «өлүмлә нәтиҹәләнән» олуб-олмадығыны мүәјјән етмәк ҝүнаһкарын өз өһдәсинәми бурахылыр?
Төвбә едәнләр бағышланыр
3. Әҝәр етдијимиз ҝүнаһа ҝөрә дәрин кәдәр һисси кечиририксә, һансы гәнаәтә ҝәлмәк олар?
3 Ҝүнаһкарлара гаршы сон һөкмү Јеһова чыхарыр. Бәли, һамымыз Она һесабат вермәлијик, Онун һөкмләри исә һәмишә адилдир (Јарадылыш 18:25; Ромалылара 14:12). Бағышланмаз ҝүнаһ ишләдиб-ишләтмәдијимизи јалныз Јеһова мүәјјән едир вә мүгәддәс руһуну биздән анҹаг О ала биләр ( Мәзмур 51:11). Амма ҝүнаһымыза ҝөрә дәриндән кәдәрләнириксә, чох ҝүман ки, доғрудан да төвбә едирик. Бәс һәгигәтән дә төвбә етмәк нә демәкдир?
4. а) Төвбә етмәк нә демәкдир? б) Мәзмур 103:10-14 ајәләриндә тәскинлик верән нәдир?
4 Төвбә етмәк кечмишдә ишләдилән вә ја нијјәтдә тутулан ҝүнаһа гаршы мүнасибәти дәјишмәкдир. Бу исә пешман олмаг вә сәһв јолдан дөнмәк демәкдир. Әҝәр ҹидди ҝүнаһ ишләтмиш, амма һәгигәтән дә төвбә етдијимизи ҝөстәрмәк үчүн лазыми аддымлары атмышыгса, мәзмурчунун сөзләриндән тәскинлик тапа биләрик: «[Јеһова] бизимлә ҝүнаһларымыза ҝөрә давранмаз, тәгсирләримизин әвәзини чыхмаз. Чүнки ҝөјләр јердән нә гәдәр уҹадырса, Ондан горханлара олан мәһәббәти о гәдәр бөјүкдүр. Нә гәдәр шәрг гәрбдән узагдырса, асиликләримизи биздән о гәдәр узаглашдырыб. Ата өвладларына рәһм етдији кими, Рәбб дә Ондан горханлара елә рәһм едир. Чүнки неҹә јарандығымызы билир, торпагдан дүзәлмәјимизи унутмур» (Мәзмур 103:10-14).
5, 6. 1 Јәһја 3:19-22 ајәләринин мәғзини сөјләјин вә һәваринин сөзләринин мә’насыны изаһ един.
5 Һәвари Јәһјанын сөзләри дә тәсәлли верир: «Биз һәгигәтә аид олдуғумузу бундан билирик вә үрәјимиз нә хүсусда бизи мәһкум едирсә, үрәјимизи Аллаһын гаршысында сакитләшдиририк. Чүнки Аллаһ үрәјимиздән үстүндүр вә һәр шеји билир. Севимлиләрим, әҝәр үрәјимиз бизи мәһкум етмирсә, бизим Аллаһ гаршысында ҹәсарәтимиз вардыр. Вә нә риҹа етсәк, Ондан алырыг, чүнки Онун әмрләринә риајәт едирик вә Онун гаршысында мәгбул олан ишләри ҝөрүрүк» (1 Јәһја 3:19-22).
6 «Һәгигәтә аид олдуғумузу» гардашлары севмәјимиздән вә ҝүнаһдан узаг дурмағымыздан билирик (Мәзмур 119:11). Әҝәр мүәјјән сәбәбләрә ҝөрә өзүмүзү мүһакимә едириксә, јахшы оларды ки, ‘Аллаһын үрәјимиздән үстүн олдуғуну вә һәр шеји билдијини’ јада салаг. Јеһова ‘гардашлар үчүн ријасыз мәһәббәтимизи’, ҝүнаһла апардығымыз мүбаризәни вә Онун ирадәсини јеринә јетирмәк үчүн гүввә сәрф етдијимизи ҝөрүр, елә буна ҝөрә дә бизә мәрһәмәтлә јанашыр (1 Петер 1:22). Әҝәр Јеһоваја е’тибар едир вә гардашлары севириксә, һәмчинин биләрәкдән ҝүнаһ ишләтмәк вәрдишимиз јохдурса, үрәјимиз бизи ‘мәһкум етмәјәҹәк’. Аллаһа ‘ҹәсарәтлә’ дуа едәҹәјик, О исә әмрләринә риајәт етдијимиз үчүн дуаларымызы ҹавабсыз гојмајаҹаг.
Онлар мүгәддәс руһа гаршы ҝүнаһ ишләтдиләр
7. Ҝүнаһын бағышланмаз олуб-олмадығыны нә мүәјјән едир?
7 Һансы ҝүнаһлар бағышланмыр? Суала ҹаваб вермәк үчүн ҝәлин бә’зи Мүгәддәс Китаб нүмунәләрини нәзәрдән кечирәк. Төвбә етмәјимизә бахмајараг, ҹидди ҝүнаһларымыза ҝөрә һәлә дә кәдәр ичиндәјиксә, бу нүмунәләр бизә тәсәлли верәҹәк. Биз ҝөрәҹәјик ки, ҝүнаһын бағышланмаз олуб-олмамасы тәкҹә едилән ҝүнаһдан јох, һәм дә инсанын нијјәтиндән, үрәјинин вәзијјәтиндән вә ҝүнаһын нә дәрәҹәдә биләрәкдән едилмәсиндән асылыдыр.
8. Биринҹи әсрдәки бә’зи јәһуди дин рәһбәрләри мүгәддәс руһа гаршы неҹә ҝүнаһ ишләтмишдиләр?
8 Биринҹи әсрдә Иса Мәсиһә кинлә мүгавимәт ҝөстәрән дин рәһбәрләри мүгәддәс руһа гаршы ҝүнаһ едирдиләр. Мәсиһ Јеһоваја иззәт ҝәтирән мө’ҹүзәләр ҝөстәрәндә онун дүшмәнләри Аллаһын руһунун фәалијјәтини ҝөрүр, анҹаг јенә дә бу гүввәни Шејтан Иблисә аид едирдиләр. Исанын сөзләринә ҝөрә, Аллаһын мүгәддәс руһуна гаршы бу ҹүр күфр едәнләрин ҝүнаһы ‘нә бу дөврдә вә нә дә ҝәләҹәкдә’ бағышланаҹагды (Матта 12:22-32).
9. Күфр нәдир вә Иса бу һагда нә демишди?
9 Күфр кинлә вә бөһтанла долу тәһгирамиз сөзләрдир. Мүгәддәс руһун мәнбәји Аллаһ олдуғу үчүн һәмин руһа гаршы данышмаг Јеһоваја гаршы данышмагла ејнидир. Бу ҹүр данышығындан төвбә етмәјән кәс бағышланмыр. Исанын белә ҝүнаһ һаггында дедији сөзләри ҝөстәрир ки, о, Аллаһын мүгәддәс руһунун фәалијјәтинә гәсдән мүгавимәт ҝөстәрән инсанлары нәзәрдә тутурду. Јеһованын руһу Исада фәалијјәт ҝөстәрсә дә, дүшмәнләри бу гүввәни Иблисә аид едир, бунунла да утанмадан руһа гаршы күфр едирдиләр. Буна ҝөрә дә Иса деди: «Ким Мүгәддәс Руһа күфр едәрсә, әбәди олараг бағышланмајаҹаг, анҹаг әбәди мәһкумијјәтә мә’руз галаҹагдыр» (Марк 3:20-29).
10. Нәјә ҝөрә Иса Јәһуданы ‘һәлак оғлу’ адландырды?
10 Јәһуда Искарјотун һадисәсинә дә нәзәр салаг. Јәһуда она е’тибар едилән гутудан пул оғурлајараг әјри јол тутмушду (Јәһја 12:5, 6). Бир гәдәр сонра о, јәһуди дин рәһбәрләринин јанына ҝедиб, Исаны 30 ҝүмүш пула сатды. Јәһуда сонра виҹдан әзабы чәксә дә, гәсдән ишләтдији ҝүнаһа ҝөрә һеч вахт төвбә етмәди. Демәли, Јәһуда дирилмәјә лајиг дејил. Буна ҝөрә дә Иса ону ‘һәлак оғлу’ адландырды (Јәһја 17:12; Матта 26:14-16).
Онларын ҝүнаһы мүгәддәс руһа гаршы дејилди
11-13. Давуд Бат-Шева илә һансы ҝүнаһы ишләтди вә Аллаһын онларла рәфтары бизә неҹә тәсәлли верир?
11 Ҹидди ҝүнаһларыны е’тираф едән вә јығынҹағын ағсаггалларындан руһани көмәк истәјән мәсиһчиләр, ола билсин, кечмиш ҝүнаһларына ҝөрә һәлә дә әзаб чәкирләр (Јагуб 5:14). Әҝәр бу ҹүр һиссләр бизи дә боғурса, ҝүнаһлары бағышланан инсанларын нүмунәләри бизә көмәк едә биләр.
12 Давуд Уријанын арвады Бат-Шева илә бөјүк ҝүнаһ ишләтди. Давуд гоншу дамдан бу ҝөзәл гадыны чимән ҝөрүб, ону сарајына ҝәтирмәји әмр етди вә онунла ҹинси әлагәдә олду. Бир гәдәр сонра гадынын һамилә олдуғундан хәбәр тутанда Давуд елә план гурду ки, Урија арвадынын јанына гајыдыб онунла јатсын, бунунла да өз әхлагсызлығыны өрт-басдыр етсин. Нијјәти баш тутмајанда падшаһ Уријаны дөјүшдә өлдүртдүрүр. Сонра Бат-Шева Давуда әрә ҝедир, онларын ушағы олур вә чох кечмәмиш көрпә өлүр (2 Шамуел 11:1-27).
13 Давудла Бат-Шеванын мәсәләсинә Јеһова Өзү бахды. Чох ҝүман ки, төвбә етмәси вә онунла бағланан Падшаһлыг әһди кими сәбәбләрдән ирәли ҝәләрәк Аллаһ Давуду бағышлады (2 Шамуел 7:11-16; 12:7-14). Ҝөрүнүр, Бат-Шева да төвбә етмишди, чүнки о, Сүлејман падшаһын анасы олду вә ады Иса Мәсиһин нәсил шәҹәрәсинә дүшдү (Матта 1:1, 6, 16). Әҝәр биз ҝүнаһ ишләтмишиксә, јахшы оларды ки, Јеһованын сәмими гәлбдән төвбә етдијимизи нәзәрә алдығыны унутмајаг.
14. Јеһованын әфвинин нә гәдәр бол олдуғу Менашшенин һәјатындан неҹә ҝөрүнүр?
14 Јеһованын әфвинин нә гәдәр бол олдуғуну Јәһуда падшаһы Менашшенин һәјатындан да ҝөрмәк олар. О, Јеһованын ҝөзүндә пис олан шејләри едирди. Менашше Баал бүтләри үчүн гурбанҝаһлар гуруб, «бүтүн сәма ҹисимләринә» сәҹдә едирди вә һәтта мә’бәдин һәр ики һәјәтиндә јаланчы аллаһлар үчүн гурбанҝаһлар тикди. Менашше оғулларыны ода гурбан верди, ҹиндарлығы јајды, Јәһуда вә Јерусәлим сакинләрини «Рәббин мәһв етдији милләтләрдән дә чох пис ишләр етмәк үчүн јолдан чыхарды». Аллаһын пејғәмбәрләринин хәбәрдарлыгларына гулаг асмады. Ахырда Ашшур падшаһы Менашшени сүрҝүн етди. Әсирликдә оларкән о төвбә едиб, тәвазөкарлыгла Аллаһа дуа етди. Јеһова падшаһы бағышлајыб, Јерусәлимә ҝәтирди вә тахт-таҹыны она гајтарды. Менашше бурада һәгиги ибадәти дирчәлтди (2 Салнамәләр 33:2-17).
15. Һәвари Петерин һәјатындан һансы һадисә ҝөстәрир ки, Јеһованын «әфви болдур»?
15 Әсрләр сонра һәвари Петер Исаны инкар етмәклә ҹидди ҝүнаһа јол верди (Марк 14:30, 66-72). Анҹаг ‘әфви бол’ олан Јеһова ону бағышлады (Јешаја 55:7). Нә үчүн? Чүнки Петер үрәкдән төвбә етмишди (Лука 22:62). Аллаһын Петери бағышладығы ондан ҝөрүнүр ки, 50 ҝүн сонра Пентикост ҝүнүндә она Иса һаггында шаһидлик етмәк имканы верилди (Һәвариләрин ишләри 2:14-36). Мәҝәр бу ҝүн Аллаһын һәгигәтән төвбә едән мәсиһчини бағышламадығыны дүшүнмәјә һансыса әсас вармы? Мәзмурчу охујурду: «Ја Рәбб, бизим тәгсирләримизи сијаһыја алсајдын, еј Худавәнд, ким бунун гаршысында дајана биләр? Амма Сән бағышлајансан» (Мәзмур 130:3, 4).
Нараһатчылыгдан неҹә азад олмаг олар?
16. Аллаһ ҝүнаһкары нә заман бағышлајыр?
16 Јухарыдакы нүмунәләр мүгәддәс руһа гаршы ҝүнаһ ишләтдијини дүшүнәнләрә нараһатчылығы арадан галдырмаға көмәк едәр. Онлар ҝөстәрир ки, Јеһова төвбә едән ҝүнаһкары бағышлајыр. Ән ваҹиби Аллаһа сәмими гәлбдән дуа етмәкдир. Әҝәр ҝүнаһ ишләтмишиксә, Исанын фидијә гурбанлығына, Јеһованын лүтфүнә, садиг хидмәтимизә архаланыб, һәмчинин мирас алдығымыз гејри-камиллији әсас тутуб Јеһовадан әфв диләјә биләрик. Јеһованын лүтфкар олдуғуну биләрәк биз там әминликлә Ондан бағышланмағы хаһиш едә биләрик (Ефеслиләрә 1:7, 8).
17. Ҝүнаһ ишләтдијимизә ҝөрә руһани көмәјә еһтијаҹ дујуругса, нә етмәлијик?
17 Бәс етдијимиз ҝүнаһа ҝөрә руһани ҹәһәтдән зәифләјиб, Јеһоваја дуа етмәјә ҝүҹүмүз чатмајанда неҹә? Бу һагда шаҝирд Јагуб јазмышды: «Гој [белә адам] иманлылар ҹәмијјәтинин ағсаггалларыны чағыртсын. Онлар да Рәббин ады илә үзәринә јағ сүртәрәк, онун үчүн дуа етсинләр. Вә иманлы дуа хәстәни хилас едәр. Рәбб ону ајаға галдырар вә әҝәр о адам ҝүнаһ ишләтмишсә, әфв олунар» (Јагуб 5:14, 15).
18. Нә үчүн киминсә јығынҹагдан хариҹ едилмәси ҝүнаһынын бағышланмаз олдуғу демәк дејил?
18 Һәтта ҝүнаһкар һәмин анда төвбә етмәсә дә вә јығынҹагдан кәнар едилсә дә, бу о демәк дејил ки, онун ҝүнаһы бағышланмаздыр. Павел Коринф јығынҹағындан кәнар едилән бир мәсһ олунмуш барәдә јазмышды: «Әксәријјәт тәрәфиндән верилән бу ҹәза белә бир адама кафидир. Бунун мүгабилиндә ону бағышлајыб, тәсәлли вермәлисиниз ки, белә бир адам һәддиндән артыг кәдәрә гәрг олмасын» (2 Коринфлиләрә 2:6-8; 1 Коринфлиләрә 5:1-5). Ҝүнаһ едәнләр Јеһова илә јенидән јахшы мүнасибәтдә олмаг үчүн мәсиһчи ағсаггалларынын Мүгәддәс Китабдан вердији мәсләһәтләрини гәбул етмәли вә һәгигәтән төвбә етдијини әмәлләриндә ҝөстәрмәлидирләр. Онлар «төвбәјә лајиг сәмәрә» вермәлидирләр (Лука 3:8).
19. ‘Иманда сағлам’ галмағымыза нә көмәк едәр?
19 Мәсиһчидә мүгәддәс руһа гаршы ҝүнаһ ишләтдији фикри нәјә ҝөрә јараныр? Сәбәб онун һәддиндән артыг виҹданлы вә ја сәһһәтинин зәиф олмасында ола биләр. Бу һалда дуанын вә әлавә истираһәтин көмәји дәјә биләр. Хүсусилә дә, јол вермәли дејилик ки, Шејтан бизи руһ дүшкүнлүјүнә салсын вә Аллаһа хидмәти дајандыраг. Әҝәр Јеһова писләрин өлүмүнү истәмирсә, демәли хидмәтчиләриндән кимисә итирмәји һеч истәмир. Буна ҝөрә дә, әҝәр мүгәддәс руһа гаршы ҝүнаһ ишләтдијимизи дүшүнүрүксә, мәзмурлар кими тәсәлливериҹи парчалар да дахил олмагла, фикримизи Аллаһын Кәламы илә долдурмалыјыг. Бизә мүнтәзәм олараг јығынҹаг ҝөрүшләринә ҝәлмәк вә Падшаһлыг һаггында хош хәбәри тәблиғ етмәк лазымдыр. Белә етмәклә ‘иманда сағлам’ галаҹаг вә нә вахтса бағышланмаз ҝүнаһ ишләтдијимиз горхусундан азад олаҹағыг (Титуса 2:2).
20. Инсанын мүгәддәс руһа гаршы ҝүнаһ етмәдијини баша дүшмәјә һансы суаллар көмәк едә биләр?
20 Мүгәддәс руһа гаршы ҝүнаһ ишләтдијиндән горхан һәр адам өзүндән соруша биләр: «Мән мүгәддәс руһа күфр етмишәмми? Мән һәгигәтәнми төвбә етмишәм? Аллаһын бағышлајан олдуғуна инаныраммы? Мән руһани ишығы рәдд едән төвбә етмәјән дөнүкләрдәнәмми?» Чох еһтимал ки, бу суаллара ҹаваб верәндән сонра белә инсанлар Аллаһын мүгәддәс руһуна гаршы күфр етмәдикләрини вә дөнүк олмадыгларыны баша дүшәҹәкләр. Онлар төвбә етмишләр вә Јеһованын бағышлајан олдуғуна инанырлар. Әҝәр беләдирсә, демәли онлар Јеһованын мүгәддәс руһуна гаршы ҝүнаһ етмәјибләр.
21. Нөвбәти мәгаләдә һансы суаллар арашдырылаҹаг?
21 Мүгәддәс руһа гаршы ҝүнаһ ишләтмәдијимизи билмәк үрәјимизә неҹә дә раһатлыг ҝәтирир! Нөвбәти мәгаләдә мүгәддәс руһла бағлы диҝәр суаллары мүзакирә едәҹәјик. Мәсәлән, өзүмүздән соруша биләрик: «Доғруданмы мән Аллаһын мүгәддәс руһуна ҝөрә һәрәкәт едирәм? Онун сәмәрәси һәјатымда өзүнү бүрузә верирми?»
Неҹә ҹаваб верәрдиниз?
• Аллаһын мүгәддәс руһуна гаршы ҝүнаһ ишләтмәјин мүмкүн олдуғуну нә үчүн дејә биләрик?
• Төвбә етмәк нә демәкдир?
• Иса јер үзүндә оланда ким мүгәддәс руһа гаршы ҝүнаһ ишләтмишди?
• Бағышланмаз ҝүнаһ етдијимиз горхусундан неҹә азад олмаг олар?
[8-ҹи сәһифәдәки шәкил]
Петер Исаны инкар етсә дә, ҝүнаһы бағышланмаз дејилди.