Мәсиһин әсил давамчысы ол

«Һәр јахшы ағаҹ хејирли мејвә верәр; пис ағаҹ исә чүрүк мејвә верәр» (МАТ. 7:17).

1, 2. Хүсусилә сон ҝүнләрдә Мәсиһин һәгиги давамчылары јаланчы мәсиһчиләрдән нә илә фәргләнир?

ИСА демишдир ки, она хидмәт етдикләрини јаландан иддиа едәнләр онун һәгиги давамчыларындан ҝәтирдикләри бәһрәләрлә — тәлим вә давранышлары илә фәргләнәҹәкләр (Мат. 7:15—17, 20). Һәгигәтән дә, мүмкүн дејил ки, инсанларын өз ағыл вә үрәкләрини гидаландырдыглары шејләр онлара тәсир етмәсин (Мат. 15:18, 19). Јаланла гидалананлар «чүрүк мејвә», руһани һәгигәти мәнимсәјәнләр исә ‘хејирли мејвә верирләр’.

² Јашадығымыз ахыр заманда ики ҹүр мејвәнин олдуғуну ајдын ҝөрүрүк. (Даниел 12:3, 10 ајәләрини оху.) Јаланчы мәсиһчиләр Аллаһ һаггында јанлыш тәсәввүрә маликдирләр вә чох вахт онлар ријакар диндарлыг ҝөстәрирләр, руһани анлајышлары оланлар исә Аллаһа «руһән вә һәгигәтән» ибадәт едирләр (Јәһ. 4:24; 2 Тим. 3:1—5). Онлар Мәсиһә хас олан хүсусијјәтләри тәзаһүр етдирмәјә чалышырлар. Бәс шәхсән бизим һаггымызда нә демәк олар? Һәгиги мәсиһчилијин беш сәҹијјәви хүсусијјәтини нәзәрдән кечирәркән өзүндән соруш: «Давраныш тәрзимин вә өјрәтдикләримин Аллаһын Кәламы илә ујғунлуг тәшкил етдији ајдын ҝөрүнүрмү? Һәгигәти ону ахтаранларын ҝөзүндә даһа ҹәлбедиҹи етмәјә чалышыраммы?»

Аллаһын Кәламына әсасән јашајырлар

3. Јеһоваја нә мәгбулдур вә бу, һәгиги мәсиһчиләр үчүн һансы мәнаны кәсб едир?

³ Иса демишдир: «Мәнә: “Ја Рәбб, ја Рәбб”,— дејән һәр кәс Сәмави Сәлтәнәтә ҝирмәјәҹәкдир; анҹаг ҝөјләрдә олан Атамын ирадәсини јеринә јетирән ораја ҝирәҹәкдир» (Мат. 7:21). Бәли, өзүнү мәсиһчи адландыранлар јох, мәсиһчиләрдән тәләб олунанлары јеринә јетирәнләр Јеһоваја мәгбулдур. Бу, Мәсиһин әсил давамчыларынын пула, ишә, әјләнҹәләрә, адәт-әнәнәләрә, бајрамлара, никаһа, о ҹүмләдән башга инсанларла мүнасибәтләринә, бир сөзлә, онларын бүтүн һәјатына тәсир едир. Онлардан фәргли олараг, јаланчы мәсиһчиләр бу сон ҝүнләрдә ҝетдикҹә даһа да корланан дүнјанын дүшүнҹә вә давраныш тәрзини мәнимсәјирләр (Мәз. 92:7).

4, 5. Јеһованын Малаки 3:18 ајәсиндәки сөзләрини өз һәјатымызда неҹә тәтбиг едә биләрик?

⁴ Малаки пејғәмбәр јазмышдыр: «О заман сиз салеһлә пис адам, Аллаһа гуллуг едәнлә етмәјән арасындакы фәрги јенә ҝөрәҹәксиниз» (Мал. 3:18). Бу сөзләрин үзәриндә дүшүнәрәк өзүндән соруш: «Мән бу дүнјаја гајнајыб-гарышырам, јохса ондан фәргләнирәм? Даим мәктәб вә ја иш јолдашларымла ајаглашмаға чалышырам, јохса ҹәсарәтлә данышмаг лазым ҝәләндә белә Мүгәддәс Китаб принсипләринә садиг галырам?» (1 Петер 3:16 ајәсини оху.) Дүздүр, биз өзүмүздән разы ҝөрүнмәк истәмирик, амма Јеһованы севмәјән вә Она хидмәт етмәјән инсанлардан сечилмәлијик.

⁵ Әҝәр сән һансыса саһәдә дәјишмәли олдуғуну ҝөрүрсәнсә, нәјә ҝөрә бу барәдә дуа етмәјәсән вә мүнтәзәм олараг Мүгәддәс Китабы арашдырмагла, дуа етмәклә вә јығынҹаг ҝөрүшләриндә иштирак етмәклә руһанилијини мөһкәмләндирмәјәсән? Аллаһын Кәламына нә гәдәр чох риајәт етмәјә чалышсан, бир о гәдәр дә, Аллаһын ‘адыны играр едән додагларын бәһрәси’ дә дахил олмагла, «хејирли мејвә» ҝәтирәҹәксән (Ибр. 13:15).

Аллаһын Падшаһлығыны тәблиғ ет

6, 7. Аллаһын Падшаһлығы һаггында хош хәбәрә ҝәлдикдә, һәгиги вә јаланчы мәсиһчиләр арасында һансы фәрг мүшаһидә олунур?

⁶ Иса демишдир: «Аллаһ Сәлтәнәтинин мүждәсини Мән диҝәр шәһәрләрә дә јајмалыјам; чүнки Мән бунун үчүн ҝөндәрилмишәм» (Лука 4:43). Нәјә ҝөрә Аллаһын Падшаһлығы Исанын тәблиғинин әсас мөвзусу иди? Чүнки о билирди ки, һәмин Падшаһлығын Падшаһы кими, руһдан доғулан дирилдилмиш гардашлары илә бирҝә бәшәријјәтин изтирабларынын сәбәбини — ҝүнаһ вә Иблиси арадан галдыраҹаг (Ром. 5:12; Вәһј 20:10). Буна ҝөрә дә о, давамчыларына бу системин сонунадәк Падшаһлығыны бәјан етмәји әмр етди (Мат. 24:14). Өзләрини садәҹә Мәсиһин давамчысы адландыран инсанлар бу ишдә иштирак етмирләр, әслиндә, едә дә билмәзләр. Нәјә ҝөрә? Ән азы үч сәбәбә ҝөрә. Биринҹиси, онлар баша дүшмәдикләри шеји неҹә тәблиғ едә биләрләр? Икинҹиси, онларын әксәријјәтинин лазыми тәвазөкарлығы вә ҹәсарәти јохдур ки, јахынларына Падшаһлыг барәдә данышаркән гаршылашаҹаглары ришхәнд вә тәгибләрин өһдәсиндән ҝәлә билсинләр (Мат. 24:9; 1 Пет. 2:23). Вә үчүнҹүсү, јаланчы мәсиһчиләрдә Аллаһын руһу јохдур (Јәһ. 14:16, 17).

⁷ Мәсиһин һәгиги давамчылары исә Аллаһын Падшаһлығынын нә олдуғуну вә онун һансы ишләри ҝөрәҹәјини билирләр. Үстәлик, онлар Јеһованын руһунун көмәји сајәсиндә Падшаһлығы бүтүн дүнјада тәблиғ етмәклә ону һәјатларында биринҹи јерә гојурлар (Зәк. 4:6). Сән бу ишдә мүнтәзәм иштирак едирсән? Падшаһлығын бир тәблиғчиси кими, даһа чох хидмәт етмәјә вә ја хидмәтдә даһа мүвәффәгијјәтли олмаға сәј ҝөстәрмәклә пүхтәләшмәјә чалышырсанмы? Бәзиләри Мүгәддәс Китабдан мәһарәтлә истифадә етмәји өјрәнмәклә хидмәтләринин кејфијјәтини јахшылашдырмышлар. Мүгәддәс Јазылар әсасында мүлаһизәләр јүрүтмәји вәрдиш едән һәвари Павел ‘Аллаһын кәламынын ҹанлы вә тәсирли’ олдуғуну гејд етмишдир (Ибр. 4:12; Һәв. иш. 17:2, 3).

8, 9. а) Мүгәддәс Китабдан хидмәтдә истифадә етмәјин ваҹиблијини һансы һадисәләр ҝөстәрир? б) Аллаһын Кәламыны истифадә етмәкдә неҹә пүхтәләшә биләрик?

⁸ Бир гардаш евдән-евә тәблиғ едәркән католик кишијә Даниел 2:44 ајәсини охуду вә Аллаһын Падшаһлығынын әсил сүлһ вә әмин-аманлығы неҹә бәргәрар едәҹәјини изаһ етди. Киши деди: «Чох миннәтдарам ки, сиз мәнә өз сөзләринизлә ҹаваб вермәк әвәзинә, Мүгәддәс Китабы ачыб орада јазыланлары ҝөстәрдиниз». Диҝәр гардаш исә Јунан православ килсәсинә мәнсуб олан гадына ајә ачыб охујанда о, хејли суаллар верди. Бу һалда да гардаш һәјат јолдашы илә бирҝә бирбаша Мүгәддәс Китабдан ҹаваб верирди. Бир гәдәр сонра һәмин гадын демишди: «Билирсиниз, нәјә ҝөрә сизинлә данышмаг мәним үчүн мараглы иди? Сизин әлиниздә Мүгәддәс Китаб варды вә сиз орадан охујурдунуз».

⁹ Дүздүр, бизим нәшрләримиз чох дәјәрлидир вә хидмәтдә онлардан истифадә етмәк ваҹибдир. Лакин әсас вәсаитимиз Мүгәддәс Китабдыр. Әҝәр хидмәтдә ондан мүнтәзәм истифадә етмәк вәрдишин јохдурса, нәјә ҝөрә гаршына бу мәгсәди гојмајасан? Аллаһын Падшаһлығынын нә олдуғуну изаһ едән вә онун саһәндәки инсанлары нараһат едән конкрет проблемләри неҹә һәлл едәҹәјини ҝөстәрән бир нечә ајә сечмәк вә евдән-евә тәблиғ едәркән охумаг олар.

Аллаһын адыны дашымағымызла фәхр едирик

10, 11. Аллаһын адындан истифадәјә ҝәлдикдә, Иса вә онун давамчысы олдугларыны иддиа едән бир чохлары арасында һансы фәрг вар?

¹⁰ «Сизсиниз шаһидләрим... Аллаһ Мәнәм»,— дејә Јеһова бәјан едир (Јешаја 43:12). Јеһованын ән ҝөркәмли Шаһиди Иса Мәсиһ Аллаһын адыны дашымағы вә ону инсанлара бәјан етмәји өзүнә шәрәф билирди. (Чыхыш 3:15; Јәһја 17:6; Ибраниләрә 2:12 ајәләрини оху.) Иса Атасынын адыны тәблиғ етдији үчүн «садиг Шаһид» адландырылмышдыр (Вәһј 1:5; Мат. 6:9).

¹¹ Аллаһы вә Онун Оғлуну тәмсил етдикләрини иддиа едәнләрин чохлары исә Онун мүгәддәс адына гаршы һөрмәтсизлик ҝөстәрмиш, һәтта өз Мүгәддәс Китаб тәрҹүмәләриндән Онун адыны чыхармышлар. Бу јахынларда католик јепископларына ҝөндәрилән ҝөстәриш мәктубунда исә дејилирди ки, ибадәт заманы «Аллаһын адынын тетраграмматон формасы — ЈҺВҺ нә истифадә олунмалы, нә дә ки дилә ҝәтирилмәлидир»a. Бу неҹә дә јанлыш дүшүнҹә тәрзидир!

12. Јеһованын хидмәтчиләринин Онун тәмсилчиси олдуглары 1931-ҹи илдән етибарән неҹә ајдын ҝөрүнмәјә башлады?

¹² Мәсиһ вә ондан өнҹәки ‘бөјүк шаһидләр булуду’ кими, һәгиги мәсиһчиләр Аллаһын адыны истифадә етдикләри үчүн гүрур дујурлар (Ибр. 12:1). Аллаһын хидмәтчиләри 1931-ҹи илдә Јеһованын Шаһидләри адыны гәбул етдикдән сонра онларын Јеһованын тәмсилчиси олдуглары даһа ајдын ҝөрүнмәјә башланды. (Јешаја 43:10—12 ајәләрини оху.) Беләликлә, Мәсиһин һәгиги давамчылары сөзүн әсил мәнасында Аллаһын ‘исмини дашыјан’ бир халг олду (Һәв. иш. 15:14, 17, И—93).

13. Аллаһын бизә вердији ада ујғун неҹә јашаја биләрик?

¹³ Бәс шәхсән биз дашыдығымыз бу ҝөзәл ада ујғун неҹә јашаја биләрик? Илк өнҹә, садигликлә Аллаһ һаггында шаһидлик етмәклә. Павел јазмышдыр: «“Һәр ким Рәббин адыны зикр етсә, хилас олаҹагдыр”. Бәс иман етмәдикләри о Кимсәни неҹә чағыраҹаглар? Ешитмәдикләри Кимсәјә неҹә иман едәҹәкләр? Вәз едән јохдурса, неҹә ешидәҹәкләр? Вә әҝәр ҝөндәрилмәзләрсә, неҹә вәз едәҹәкләр?» (Ром. 10:13—15). Бундан әлавә, биз Јараданымызын адына ләкә ҝәтирән вә мәһәббәт Аллаһы олан Јеһоваја Иблисин гәддар хүсусијјәтләрини аид едән одлу ҹәһәннәм кими јалан дини тәлимләри нәзакәтлә ифша етмәлијик. (Јер. 7:31; 1 Јәһ. 4:8; мүгајисә ет: Марк 9:17—27.)

14. Бәзиләри Аллаһын адыны өјрәнәндә һансы һиссләри кечирмишләр?

¹⁴ Сәмави Атамызын адыны дашыдығына ҝөрә гүрур дујурсанмы? Бу мүгәддәс ад барәдә башгаларына өјрәнмәјә көмәк едирсәнми? Франсанын пајтахты Парисдә јашајан бир гадын ешитмишди ки, Јеһованын Шаһидләри Аллаһын адыны билирләр. Буна ҝөрә дә о, бир баҹымызла гаршылашанда ондан хаһиш етди ки, бу ады онун өз Мүгәддәс Китабында ҝөстәрсин. Баҹымыз Мәзмур 83:18 (ЈД) ајәсини охујанда бу, гадына бөјүк тәсир бағышлады вә о, Мүгәддәс Китабы өјрәнмәјә башлады. Һал-һазырда һәмин гадын садиг баҹымыздыр вә хариҹи өлкәдә хидмәт едир. Австралијада јашајан бир католик гадын Аллаһын адыны илк дәфә Мүгәддәс Китабда ҝөрәндә севинҹ ҝөз јашларыны сахлаја билмәди. Артыг узун илләрдир ки, о, даими пионердир. Бу јахынларда исә Јамајкада һәмиманлымыз бир гадына онун өз Мүгәддәс Китабында Аллаһын адыны ҝөстәрәндә о да севинҹиндән ағлады. Буна ҝөрә дә Аллаһын адыны дашыдығын вә Иса кими, бу уҹа ады бәјан етдијин үчүн гүрур дујмалысан.

«Дүнјаны... севмәјин»

15, 16. Һәгиги мәсиһчиләр дүнјаја неҹә бахырлар вә өзүмүзә һансы суаллары вермәлијик?

¹⁵ «Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур» (1 Јәһ. 2:15). Дүнја вә онун ҹисмани әһвал-руһијјәси Јеһоваја вә Онун мүгәддәс руһуна гаршы чыхыр. Мәсиһин һәгиги давамчылары садәҹә дүнјадан кәнар ҝәзмәјә чалышмырлар. Онлар шаҝирд Јагубун: «Дүнја илә достлуг Аллаһа гаршы дүшмәнчиликдир» сөзләрини јадда сахлајараг дүнјаны севмәкдән имтина едирләр (Јаг. 4:4).

¹⁶ Чохсајлы ширникдириҹи тәклифләр верән бу дүнјада Јагубун сөзләринә әмәл етмәк бәзән чох чәтин ола биләр (2 Тим. 4:10). Буна ҝөрә дә Иса давамчылары үчүн дуа едәрәк демишди: «Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр» (Јәһ. 17:15, 16). Өзүндән соруш: «Мән бу дүнјадан олмамаға чалышыраммы? Башгалары Мүгәддәс Китаба зидд олан, еләҹә дә, ола билсин, көкү бүтпәрәстлијә ҝедиб чыхмајан, амма дүнјанын руһуну әкс етдирән бајрам вә адәт-әнәнәләрә гаршы мүнасибәтими билирләрми?» (2 Кор. 6:17; 1 Пет. 4:3, 4).

17. Сәмими инсанлары Јеһованын тәрәфини тутмаға нә тәшвиг едә биләр?

¹⁷ Мүгәддәс Китаба әсасланан етигадларымызла дүнјанын рәғбәтини газанмасаг да, бу, сәмими инсанларда мараг ојада биләр. Һәгигәтән дә, иманымызын Мүгәддәс Китаба әсасландығыны вә бунун һәјатымызын бүтүн саһәләрини әһатә етдијини ҝөрән белә инсанлар мәсһ олунмуш мәсиһчиләрә дејә биләрләр: «Гој сизинлә ҝедәк, чүнки Аллаһын сизинлә олдуғуну ешитмишик» (Зәк. 8:23).

Һәгиги мәсиһчи мәһәббәти тәзаһүр етдир

18. Јеһоваја вә гоншуларымыза мәһәббәт ҝөстәрмәк өзүнә нәји дахил едир?

¹⁸ Иса демишдир: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев» вә «Гоншуну өзүн кими сев» (Мат. 22:37, 39). Бу мәһәббәт (јунанҹа агáпи) дүзҝүн олан шејләрә әсасланыр, өһдәчиликләри вә принсипләри нәзәрә алыр вә мүнасиб нормалары вә тәләбләри әлдә рәһбәр тутур. Амма чох вахт о, ҝүҹлү һиссләрлә бағлы олур. Бу һисс сәмими вә ҝүҹлү ола биләр (1 Пет. 1:22). Бу, худбинлијин тамамилә әксидир, чүнки о, сәмими сөзләрдә вә тәмәннасыз әмәлләрдә өзүнү бүрузә верир. (1 Коринфлиләрә 13:4—7 ајәләрини оху.)

19, 20. Мәсиһчи мәһәббәтинин бөјүк гүввәјә малик олдуғуну ҝөстәрән бир нечә нүмунә данышын.

¹⁹ Мәһәббәт Аллаһын мүгәддәс руһунун сәмәрәсинин бир һиссәси олдуғу үчүн бу, һәгиги мәсиһчиләрә башгаларынын өһдәсиндән ҝәлә билмәдији ирги, мәдәни вә сијаси ајры-сечкилији арадан галдырмаға көмәк едир. (Јәһја 13:34, 35 ајәләрини оху; Галат. 5:22.) Һәлим инсанлар белә мәһәббәтин гаршысында лагејд гала билмирләр. Мәсәлән, Исраилдә бир ҝәнҹ јәһуди биринҹи дәфә мәсиһчи ҝөрүшүнә ҝәләндә јәһуди вә әрәб мәсиһчиләринин јан-јана Јеһоваја ибадәт етмәси ону һејран етмишди. Нәтиҹәдә, о, мүнтәзәм олараг јығынҹаг ҝөрүшләринә ҝәлмәјә вә Мүгәддәс Китабы өјрәнмәјә башлады. Сән дә гардашларына белә сәмими мәһәббәт ҝөстәрирсәнми? Вә милләтинә, дәрисинин рәнҝинә вә сосиал вәзијјәтинә бахмајараг, Падшаһлыг Залына јени ҝәләнләри үрәкдән саламламаға чалышырсанмы?

²⁰ Һәгиги мәсиһчиләр кими, биз һамыја мәһәббәт ҝөстәрмәјә чалышырыг. Салвадорда ҝәнҹ баҹымыз өз килсәсинә садиг олан 87 јашлы католик гадынла Мүгәддәс Китабы өјрәнирди. Бир ҝүн гадын бәрк хәстәләниб хәстәханаја дүшдү. Гадын хәстәханадан евә гајыданда баҹылар она баш чәкиб јемәк ҝәтирдиләр. Бу, тәхминән бир ај чәкди. Һәмин мүддәт әрзиндә онун килсәсиндән јанына ҝәлән олмады. Бүтүн бунлар гадына неҹә тәсир етди? О, јалан динлә бағлы бүтүн шәкилләри вә әшјаларыны туллады, килсәни тәрк етди вә Мүгәддәс Китабы өјрәнмәјә давам етди. Һәгигәтән дә, мәсиһчи мәһәббәти бөјүк гүввәдир! О, үрәјә сөзләрдән дә ҝүҹлү тәсир едир.

21. Ҝәләҹәјимизи неҹә тәмин едә биләрик?

²¹ Тезликлә Иса она хидмәт етдикләрини иддиа едән кәсләрә дејәҹәк: «Мән сизи һеч вахт танымамышам, јанымдан чәкилин, һагсызлыг едәнләр!» (Мат. 7:23). Буна ҝөрә дә ҝәлин һәм Атаны, һәм дә Оғулу шәрәфләндирән бәһрәләр ҝәтирәк. Иса демишдир: «Мәним сөзләрими ешидиб онлара әмәл едән евини даш үзәриндә тикмиш ағыллы адама бәнзәјир» (Мат. 7:24). Бәли, әҝәр Мәсиһин әсил давамчыларыјыгса, онда Аллаһын рәғбәтини газанаҹағыг вә бизим мөһкәм тәмәли олан сабит ҝәләҹәјимиз олаҹаг!

[Һашијә]

Јадыныздадырмы?

• Һәгиги мәсиһчиләр јаланчы мәсиһчиләрдән нә илә фәргләнирләр?

• Һәгиги мәсиһчиләри мүәјјән етмәјә көмәк едән «мејвә»ләрдән бәзиләри һансылардыр?

• Бир мәсиһчи кими бәһрә ҝәтирмәк үчүн гаршына һансы мәгсәдләри гоја биләрсән?

[13-ҹү сәһифәдәки шәкил]

Мүгәддәс Китабы мүнтәзәм олараг хидмәтдә истифадә едирсәнми?

[15-ҹи сәһифәдәки шәкил]

Сәнин Мүгәддәс Китаба зидд адәт-әнәнәләрә даир мөвгејиндән башгаларынын хәбәри вармы?