Иблисә јер вермәјин

«Иблисә јер вермәјин» (ЕФЕСЛИЛӘРӘ 4:27).

1. Һансы сәбәбдән чохлары Иблисин мөвҹудлуғуну шүбһә алтына алыр?

ӘСРЛӘР боју инсанлар Иблиси гырмызы либас ҝејмиш, пис адамлары јаба илә одлу ҹәһәннәмә атан бујнузлу вә гошадырнаглы мәхлуг кими тәсәввүр етмишләр. Мүгәддәс Китабда белә фикир јохдур. Буна бахмајараг, бу ҹүр сәһв тәсәввүрләрә ҝөрә милјонларла инсанлар Иблисин мөвҹудлуғуну шүбһә алтына алыр вә јахуд да бу адын алтында садәҹә шәри нәзәрдә тутурлар.

2. Мүгәддәс Китаб Иблис һаггында һансы мә’луматы верир?

² Мүгәддәс Китабда Иблисин реал шәхсијјәт олмасы һаггында инандырыҹы вә ајдын сүбутлар вар. Иса Мәсиһ ону ҝөјдә, руһани тәбәгәдә ҝөрмүшдү вә јердә оларкән онунла данышмышды (Әјјуб 1:6; Матта 4:4-11). Мүгәддәс Јазылар бу мәхлугун шәхси адыны ачыгламаса да, Јеһоваја бөһтан атдығына ҝөрә ону Иблис (јә’ни «бөһтанчы») вә мүгавимәт ҝөстәрдијинә ҝөрә Шејтан (јә’ни «дүшмән») адландырыр. Һәвваны алдатмаг үчүн иландан истифадә етдијинә ҝөрә Шејтан Иблисә «гәдим илан» ады да верилиб (Вәһј 12:9; 1 Тимотејә 2:14). О, һәмчинин «шәрир» дә адланыр (Матта 6:13, МК)a.

3. Бу мәгаләдә һансы суалы арашдыраҹағыг?

³ Јеһованын хидмәтчиләри олдуғумуз үчүн, јеҝанә һәгиги Аллаһын баш дүшмәнинә зәррә гәдәр дә олсун бәнзәмәк истәмәздик. Она ҝөрә дә һәвари Павелин мәсләһәтинә гулаг асмалыјыг: «Иблисә јер вермәјин» (Ефеслиләрә 4:27). Ҝәлин Шејтанын хүсусијјәтләриндән бә’зиләрини арашдыраг вә онлары нә үчүн тәглид етмәмәли олдуғумузу нәзәрдән кечирәк?

Баш бөһтанчыја охшамајын

4. «Шәрир» Аллаһа неҹә бөһтан атды?

⁴ ‘Шәрир’ бөһтанчылыг етдијинә ҝөрә Иблис адына лајигдир. Бөһтан, бир инсаны ләкәләмәк үчүн наһагдан онун үнванына сөјләнилән јанлыш сөзләрдир. Аллаһ Адәмә әмр етмишди: «Хејирлә шәри билмә ағаҹынын мејвәсиндән јемә, чүнки ондан јејән ҝүн һөкмән өләҹәксән» (Јарадылыш 2:17). Һәвванын бу әмрдән хәбәри варды, лакин Иблис, иландан истифадә едәрәк, она деди: «Јох, әсла өлмәзсиниз. Әксинә, Аллаһ билир ки, о мејвәләрдән једијиниз ҝүн ҝөзләриниз ачылаҹаг вә хејирлә шәри биләрәк Аллаһ кими олаҹагсыныз» (Јарадылыш 3:4, 5). Шејтан Јеһова Аллаһа кинлә гара јахды.

5. Диотреф нә үчүн Аллаһын хидмәтчиләринә бөһтан атдығына ҝөрә ҹаваб вермәли олду?

⁵ Аллаһ исраиллиләрә әмр етмишди: «Халг арасында хәбәрчилик етмә [бөһтан атма]» (Левилиләр 19:16). Һәвари Јәһја мәсиһчи јығынҹагларындан бириндә олан бөһтанчы һаггында јазырды: «Мән ҹәмијјәтә бир шеј јаздым, амма араларында рәислик етмәји севән Диотреф бизи гәбул етмир. Буна ҝөрә, әҝәр ҝәлсәм онун ҝөрдүјү ишләри јада салаҹағам. О, һаггымызда пис сөзләр јајыр» (3 Јәһја 9, 10). Диотреф Јәһја һаггында пис сөзләр јајырды, јә’ни она бөһтан атырды. Бу ишинә ҝөрә о, ҹаваб вермәли олду. Јәгин ки, һеч бир садиг мәсиһчи Диотрефә бәнзәмәклә маһир бөһтанчы олан Иблиси тәглид етмәк истәмәз.

6, 7. Кимәсә бөһтан атмагдан өзүмүзү нә үчүн ҝөзләмәлијик?

⁶ Јеһованын хидмәтчиләрини дә чох заман ҝүнаһкар олмадыглары ишләрдә тәгсирләндирир вә онлара гара јахырлар. «Баш каһинләр вә дин алимләри исә дуруб Ону [Исаны] шиддәтлә иттиһам едирдиләр» (Лука 23:10). Баш каһин Һананја вә башгалары Павелә гаршы јалан иттиһамлар ирәли сүрүрдүләр (Һәвариләрин ишләри 24:1-8). Мүгәддәс Китабда Шејтан һаггында «гардашларымызын иттиһамчысы, онлары Аллаһымызын өнүндә ҝеҹә вә ҝүндүз иттиһам едән» бир шәхс кими данышылыр (Вәһј 12:10). Бу ајәдә һаггында данышылан вә Шејтан тәрәфиндән иттиһам едилән гардашларымыз ахыр ҝүнләрдә јер үзүндә јашајан мәсһ едилмиш мәсиһчиләрдир.

⁷ Сөзсүз, һеч бир мәсиһчи кимәсә бөһтан атмаг вә ја кимисә јаландан иттиһам етмәк истәмәзди. Лакин, әҝәр биз бүтүн фактлары арашдырмадан кимәсә гаршы шаһидлик едириксә, онда бу асанлыгла баш верә биләр! Мусанын Ганунуна ҝөрә, гәсдән јалан шаһидлик етмәк өлүмлә нәтиҹәләнә биләрди (Чыхыш 20:16; Ганунун тәкрары 19:15-19). Бундан әлавә, Јеһованын икраһ етдији шејләрә «нәфәсини јаланла чыхаран јаланчы шаһид» дә дахилдир (Сүлејманын мәсәлләри 6:16-19). Бу сәбәбдән, биз һеч бир вәҹһлә баш бөһтанчы вә иттиһамчыја бәнзәмәјәҹәјик.

Илк гатилин јолларындан узаг дурун

8. Иблис һансы мә’нада «башланғыҹдан инсан гатили иди»?

⁸ Иблис гатилдир. Иса демишди: «О, башланғыҹдан инсан гатили иди» (Јәһја 8:44). Онун илк гурбанлары Адәмлә Һәвва олду. Шејтан онлары Аллаһдан дөндәрди. Илк инсан ҹүтүнүн вә онларын өвладларынын өлүмүнә сәбәб олан да Иблис иди (Ромалылара 5:12). Гејд етмәк лазымдыр ки, бу һәрәкәти садәҹә олараг шәр мәфһумуна аид етмәк олмаз, буну јалныз шәхсијјәт едә биләр.

9. 1 Јәһја 3:15 ајәсиндә ҝөстәрилдији кими, биз һансы һалда гатил ола биләрик?

⁹ Исраилә верилән Он әмрдән бириндә белә дејилир: «Гәтл етмә» (Ганунун тәкрары 5:17). Мәсиһчиләрә мүраҹиәт едәрәк һәвари Павел јазырды: «Гој сизләрдән һеч ким гатил... кими әзаб чәкмәсин» (1 Петер 4:15). Демәли, Јеһованын хидмәтчиси һеч кәси өлдүрмәјәҹәк. Лакин әҝәр о, мәсиһчи баҹы вә ја гардашына нифрәт едиб онун өлүмүнү арзуларса, онда Јеһованын гаршысында ҝүнаһа батмыш олар. Һәвари Јәһја јазырды: «Гардашына нифрәт едән һәр кәс гатилдир вә сиз билирсиниз ки, һеч бир гатил өзүндә галан әбәди һәјата малик дејилдир» (1 Јәһја 3:15). Исраиллиләрә белә әмр верилмишди: «Сојдашына гаршы үрәјиндә нифрәт бәсләмә» (Левилиләр 19:17). Ҝәлин һәмиманлымызла бизим арамызда һәр һансы бир проблем јарананда ону тә’хирә салмадан һәлл едәк ки, гатил олан Шејтан мәсиһчи бирлијимизи поза билмәсин (Лука 17:3, 4).

Баш јаланчыја гаршы мөһкәм дурун

10, 11. Баш јаланчы олан Шејтана гаршы мөһкәм дурмаг үчүн биздән нә тәләб олунур?

¹⁰ Иблис јаланчыдыр. Иса демишдир: «Јалан сөјләдији заман, өзүндән сөјләр; чүнки о, јаланчыдыр вә јаланын атасыдыр» (Јәһја 8:44). Шејтан Һәвваја јалан сөјләди. Лакин Иса һәгигәтә шәһадәт етмәк үчүн дүнјаја ҝәлди (Јәһја 18:37). Әҝәр биз Мәсиһин давамчылары кими, Иблисә гаршы мөһкәм дурмаг истәјириксә, онда јалан данышмамалы вә һеч кими алдатмамалыјыг. Биз ‘һәгигәти сөјләмәлијик’ (Зәкәријјә 8:16; Ефеслиләрә 4:25). «Һәгигәт Аллаһы» Јеһова јалныз доғрулуғу севән Шаһидләринә хејир-дуа верир. Писләрин Ону тәмсил етмәјә һаггы јохдур (Мәзмур 31:5, КМ; 50:16; Јешаја 43:10).

¹¹ Әҝәр биз Шејтанын јаланларындан узаглашараг әлдә етдијимиз руһани азадлығы гијмәтләндиририксә, Мәсиһин јолундан, јә’ни ‘һәгигәт јолундан’ дөнмәјәҹәјик (2 Петер 2:2; Јәһја 8:32). Мәсиһчи тә’лимләри бүтөвлүкдә ‘Мүждәнин һәгигәтини’ тәшкил едир (Галатијалылара 2:5, 14). Һәтта бизим хиласымыз да ‘һәгигәтә ҝөрә һәрәкәт етмәјимиздән’ — һәгигәтә садиг галмағымыздан вә ‘јаланын атасына’ гаршы мөһкәм дурмағымыздан асылыдыр (3 Јәһја 3, 4, 8).

Илк дөнүјә мүгавимәт ҝөстәрин

12, 13. Биз дөнүкләрлә неҹә рәфтар етмәлијик?

¹² Сонрадан Иблис олан руһани мәхлуг вахтилә һәгигәтдә олмушду. Лакин Исанын сөзләринә ҝөрә, о, «һәгигәтә бағлы галмады; чүнки онда һәгигәт јохдур» (Јәһја 8:44). Бу илкин дөнүк минилликләрдир ки, ‘һәгигәт Аллаһына’ гаршы инадлы мүгавимәт ҝөстәрир. Биринҹи әсрдә јашајан мәсиһчиләрдән бә’зиләри ‘Иблисин торуна’ дүшмүшдүләр, белә ки, Иблисин онлары һәгигәтдән јајындырмасына вә алдатмасына јол верәрәк онун гурбаны олдулар. Бу мәсиһчиләр руһани ҹәһәтдән сағалсынлар вә Шејтанын тәләсиндән азад олсунлар дејә, Павел әмәкдашы Тимотеји онлара һәлимликлә өјүд-нәсиһәт вермәјә тәшвиг едирди (2 Тимотејә 2:23-26). Әлбәттә, һәгигәтә бағлы галыб, дөнүкләрин фикирләрини рәдд едириксә, онда биз онларын тәләсинә дүшмәјәҹәјик.

¹³ Илк инсан ҹүтү Иблисә гулаг асдығы вә онун јаланларыны рәдд етмәдији үчүн һәгигәтдән дөндү. Биз неҹә, дөнүкләрә гулаг асмалыјыгмы? Онларын әдәбијјатларына вә јахуд Интернет сәһифәләринә мараг ҝөстәрмәлијикми? Әҝәр биз Аллаһы вә һәгигәти севириксә, бунлары етмәјәҹәјик. Биз дөнүкләри евимизә бурахмајаҹаг, онлары һеч саламламајаҹағыг да, чүнки белә етсәк, онларын ‘пис әмәлләриндә иштирак етмиш оларыг’ (2 Јәһја 9-11). Ҝәлин һеч вахт Иблисин кәләкләринә ујмајаг, ортаја «јыхыҹы бид’әтләр» салан вә бизи «ујдурма сөзләрлә истисмар» едән јаланчы мүәллимләрә гулаг асмајаг. Әкс һалда Мәсиһин давамчысы олдуғумузу унудар вә ‘һәгигәт јолундан’ дөнәрик (2 Петер 2:1-3).

14, 15. Павел ефесли ағсаггаллары вә әмәкдашы Тимотеји нәдән хәбәрдар едирди?

¹⁴ Павел Ефесдә хидмәт едән мәсиһчи ағсаггалларына демишди: «Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир ки, Рәббин вә Аллаһын ҹәмијјәтини, Өз ганы баһасына әлдә етдији ҹәмијјәти ҝүдәсиниз. Билирәм ки, мән ҝетдикдән сонра, сүрүјә рәһми ҝәлмәјән азғын гурдлар араныза ҝирәҹәкдир. Вә шаҝирдләри ардларынҹа чәкмәк үчүн јанлыш сөзләр данышан адамлар өз араныздан чыхаҹаглар» (Һәвариләрин ишләри 20:28-30). Доғрудан да, вахт кечди вә јығынҹагларда дөнүкләр пејда олараг ‘јанлыш сөзләр данышмаға’ башладылар.

¹⁵ Ерамызын 65-ҹи илиндә һәвари Павел Тимотеји ‘һәгигәт сөзүнү доғрулугла өјрәтмәјә’ тәшвиг едирди. Һәвари дејирди: «Мурдар бошбоғазлыглардан узаг ол, чүнки онлар, Аллаһа даһа чох һөрмәтсизлијә сәбәб олаҹагдыр. Бошбоғазларын сөзү дә хәрчәнҝ хәстәлији кими јајылаҹагдыр; онларын арасында Именеј вә Филит вардыр. Бу адамлар һәгигәтдән үз дөндәриб дејирләр ки, өлүләрин дирилмәси артыг баш вермишдир вә бә’зиләринин иманыны бу јолла алт-үст едирләр». Бәли, дөнүклүк башламышды! Павел әлавә едирди: «Лакин Аллаһын мөһкәм тәмәли... дурур» (2 Тимотејә 2:15-19).

16. Илк дөнүјүн кәләкләринә бахмајараг, биз Аллаһа вә Кәламына неҹә садиг галырыг?

¹⁶ Шејтан тәмиз ибадәти ләкәләмәк үчүн дөнүкләрдән чох истифадә етсә дә, һеч вахт истәдији сәмәрәни әлдә едә билмәмишдир. 1868-ҹи илдә Чарлз Тејз Рассел христиан килсәләринин әсрләр боју гәбул едилмиш еһкамларыны диггәтлә тәдгиг етмәјә башлады вә нәтиҹәдә килсәләрдә Мүгәддәс Китаб тә’лимләринин тәһриф едилмиш шәкилдә өјрәдилдијини ашкар етди. Рассел вә бир нечә башга һәгигәт ахтарышында оланлар АБШ-ын Пенсилванија штатынын Питсбург шәһәриндә Мүгәддәс Китабы өјрәнмәк үзрә синиф тәшкил етдиләр. О вахтдан тәхминән 140 ил кечиб. Јеһованын хидмәтчиләри һәм биликдә, һәм дә Аллаһа вә Кәламына олан мәһәббәтдә тәрәгги етмишләр. Илк дөнүјүн кәләкләринә бахмајараг, «садиг вә ағыллы гул» синфинин руһани ајыглығы сајәсиндә бу мәсиһчиләр Јеһоваја вә Кәламына садиг галмагда давам едирләр (Матта 24:45).

Дүнјанын рәисинин сизә тә’сир етмәсинә јол вермәјин

17-19. Дүнјанын Иблисин һакимијјәти алтында олмасы нә демәкдир вә нәјә ҝөрә биз ону севмәмәлијик?

¹⁷ Шејтанын бизи өз тәләсинә салмаг үчүн истифадә етдији үсуллардан бири бизә бу дүнјаны — Аллаһдан узаглашмыш салеһ олмајан инсан ҹәмијјәтини севдирмәсидир. Иса Иблиси «бу дүнјанын рәиси» адландырараг белә демишди: «Онун Мәнә һеч бир тә’сири јохдур» (Јәһја 14:30). Шејтанын бизә тә’сир етмәсинә әсла јол вермәјәк! Әлбәттә, дәрк едирик ки, ‘бүтүн дүнја шәририн һакимијјәти алтындадыр’ (1 Јәһја 5:19). Иблис «дүнјанын бүтүн өлкәләрини» Исаја тәклиф етди вә әвәзиндә, Исадан садәҹә олараг она баш әјмәсини истәди. Лакин Аллаһын Оғлу бу ҹүр тәклифи ајдын вә гәтијјәтлә рәдд етди (Матта 4:8-10). Шејтанын идарә етдији дүнја Мәсиһин давамчыларына нифрәт едир (Јәһја 15:18-21). Буна ҝөрә, һәвари Јәһјанын бизи дүнјаны севмәкдән чәкиндирмәси тәәҹҹүблү дејил.

¹⁸ Јәһја јазырды: «Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр. Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:15-17). Биз дүнјаны севмәмәлијик, чүнки онун тәгдим етдији һәјат тәрзи бизим ҝүнаһлы бәдәнимизин арзуларына ҝөз јуммагла јанашы, Јеһова Аллаһын нормаларына тамамилә зидд ҝедир.

¹⁹ Бәс әҝәр үрәјимиздә һәлә дә бу дүнјаја гаршы мәһәббәт мөвҹуддурса, онда нә едәк? Онда ҝәлин бу севҝини вә онун доғурдуғу ҹисмани еһтираслары дәф етмәк үчүн дуада Аллаһдан көмәк диләјәк (Галатијалылара 5:16-21). Әлбәттә, биз вар ҝүҹүмүзлә чалышаҹағыг ки, ‘өзүмүзү дүнјадан ләкәсиз сахлајаг’. Әҝәр салеһ олмајан инсан ҹәмијјәтини ‘пис руһи гүввәләрин’, јә’ни ҝөзәҝөрүнмәз ‘һөкмранларын’ идарә етдијини унутмуругса, буну етмәк бизә асан олаҹаг (Јагуб 1:27; Ефеслиләрә 6:11, 12; 2 Коринфлиләрә 4:4).

20. Нәдән ирәли ҝәләрәк демәк олар ки, биз ‘дүнјадан дејилик’?

²⁰ Иса өз шаҝирдләри барәсиндә демишди: «Мән дүнјадан олмадығым кими, онлар да дүнјадан дејилләр» (Јәһја 17:16). Мәсһ едилмиш вә диҝәр мәсиһчиләр өзләрини руһани вә әхлаги ҹәһәтдән тәмиз вә дүнјадан ајры сахламагдан өтрү әлләриндән ҝәләни едирләр (Јәһја 15:19; 17:14; Јагуб 4:4). Биз бу дүнјадан өзүмүзү ајры сахладығымыз вә ‘салеһлији тәблиғ етдијимиз’ үчүн салеһ олмајан дүнја бизә нифрәт едир (2 Петер 2:5). Дүздүр, бизи әхлагсызлар, зинакалар, гәсбкарлар, бүтпәрәстләр, оғрулар, јаланчылар вә сәрхошларла долу инсан ҹәмијјәти әһатә едир (1 Коринфлиләрә 5:9-11; 6:9-11; Вәһј 21:8). Буна бахмајараг, биз «дүнјанын руһу» илә нәфәс алмырыг, онун ҝүнаһ долу гүввәсинин бизи һәрәкәтә тәшвиг етмәсинә јол вермирик (1 Коринфлиләрә 2:12).

Иблисә јер вермәјин

21, 22. Павелин Ефеслиләрә 4:26, 27 ајәләриндәки мәсләһәтини һәјатында неҹә тәтбиг едә биләрсән?

²¹ «Дүнјанын руһу» илә һәрәкәт етмәк әвәзинә, Аллаһын руһунун биздә мәһәббәт вә өзүнә һаким олмаг кими кејфијјәтләр јетишдирмәсинә јол веририк (Галатијалылара 5:22, 23). Бу кејфијјәтләрин көмәји илә биз Иблисин иманымыза вурдуғу зәрбәләрин өнүндә мөһкәм дура билирик. Иблис истәјир ки, биз өзүмүздән чыхараг шәр ишләр ҝөрәк. Аллаһын руһу исә, ‘гәзәби атмағымыза вә һиддәтдән чәкинмәјимизә’ көмәк едир (Мәзмур 37:8). Дүздүр, елә вахтлар олур ки, гәзәбимизә һагг газандырмаг олар, лакин ҝөрүн Павел бизә һансы мәсләһәти верир: «Гәзәбләнәндә ҝүнаһ ишләмәјин; гој сиз гәзәбләниркән ҝүнәш батмасын... иблисә јер вермәјин» (Ефеслиләрә 4:26, 27).

²² Әҝәр әсәби һалдајыгса, гәзәбимиз һәтта ҝүнаһа ҝәтириб чыхара биләр. Белә вәзијјәтдә галмаға давам етмәклә, Иблисин бизи шәр әмәлләрә тәһрик етмәсинә вә јығынҹағымыза фикир ајрылығы салмасына шәраит јарадырыг. Она ҝөрә, башгасы илә арамызда анлашылмазлыг јарананда проблеми ҹәлд вә Аллаһа мәгбул шәкилдә һәлл етмәк лазымдыр (Левилиләр 19:17, 18; Матта 5:23, 24; 18:15, 16). Бу сәбәбдән, ҝәлин Аллаһын руһу илә һәрәкәт едәрәк өзүмүзә һаким олаг вә һеч вахт һаглы гәзәбин белә, аҹыға, кинә вә јахуд да нифрәтә ҝәтириб чыхармасына јол вермәјәк.

23. Нөвбәти мәгаләдә һансы суаллары арашдыраҹағыг?

²³ Биз сизинлә Иблисин бә’зи хүсусијјәтләрини арашдырдыг. Ҝәлин вар гүввәмизлә чалышаг ки, онлары әкс етдирмәјәк. Лакин охуҹуларымыздан бә’зиләри соруша биләр: бәс Шејтандан горхмаг лазымдырмы? О, инсанлары нә үчүн мәсиһчиләри тә’гиб етмәјә тәһрик едир? Өзүмүзү Шејтанын кәләкләриндән неҹә горуја биләрик?

[Һашијә]

Неҹә ҹаваб верәрдиниз?

• Биз нә үчүн гәтијјән бөһтан атмамалыјыг?

• 1 Јәһја 3:15 ајәсинә әсасән, биз һансы мә’нада гатил ола биләрик вә бу баш вермәсин дејә, неҹә һәрәкәт етмәлијик?

• Биз дөнүкләрә неҹә мүнасибәт бәсләмәлијик вә нәјә ҝөрә?

• Биз дүнјаны нә үчүн севмәмәлијик?

[9-ҹу сәһифәдәки шәкил]

Иблисин мәсиһчи бирлијимизи позмасына һеч вахт јол вермәјәҹәјик.