Јеһованын Кәламы ҹанлыдыр
«Вәһј» китабындан диггәтәлајиг фикирләр — I һиссә
ЈАША ДОЛМШ һәвари Јәһја Патмос адасында сүрҝүндә оларкән 16 ҝөрүнтү алыр. Һәмин ҝөрүнтүләрдә о, Јеһова Аллаһын вә Иса Мәсиһин Рәббин ҝүнүндә, јәни 1914-ҹү илдә Аллаһын Падшаһлығынын тәсис едилмәсиндән Мәсиһин Миниллик Һөкмранлығынын сонунадәк нә едәҹәкләрини ҝөрүр. Ерамызын тәхминән 96-ҹы илиндә Јәһјанын јаздығы «Вәһј» китабы һәмин ҝөрүнтүләрин парлаг тәсвиридир.
Ҝәлин инди Јәһјанын Вәһј 1:1–12:17 ајәләриндә јазылан илк једди ҝөрүнтүсүндәки диггәтәлајиг фикирләри нәзәрдән кечирәк. Бу ҝөрүнтүләр бизим үчүн мүһүм әһәмијјәт кәсб едир, она ҝөрә ки, онлар дүнја сәһнәсиндә һал-һазырда баш верән һадисәләрә аиддир вә Јеһованын јахын ҝәләҹәкдә нәләр едәҹәјини ҝөстәрир. Бу ҝөрүнтүләри иманла охујанлар тәсәлли алыр вә руһланырлар (Ибр. 4:12).
«ГУЗУ» ЈЕДДИ МӨҺҮРДӘН АЛТЫСЫНЫ АЧЫР
Илк нөвбәдә, Јәһја иззәтләнмиш Иса Мәсиһи ҝөрүр вә ‘китаба јазыб једди ҹәмијјәтә ҝөндәрмәли’ олдуғу бир сыра мәлуматлар алыр (Вәһј 1:10, 11). Сонра о, ҝөјдә гурулмуш бир тахт ҝөрүр. Тахтда отуранын сағ әлиндә једди мөһүрлә мөһүрләнмиш бир тумар вар. ‘Тумары ачмаға лајиг’ ҝөрүлән мәһз «Јәһуда гәбиләсиндән олан Аслан» вә ја ‘једди бујнузу вә једди ҝөзү олан Гузудур’ (Вәһј 4:2; 5:1, 2, 5, 6).
Үчүнҹү ҝөрүнтүдә «Гузу» илк алты мөһүрү бир-биринин ардынҹа ачанда баш верән һадисәләр тәсвир олунур. Алтынҹы мөһүр ачыланда бөјүк бир зәлзәлә баш верир вә бөјүк гәзәб ҝүнү ҝәлир (Вәһј 6:1, 12, 17). Нөвбәти ҝөрүнтүдә о, 144 000-нин мөһүрләнмәсинин баша чатынҹаја гәдәр ‘дүнјанын дөрд күләјини тутан дөрд мәләји ҝөрүр’. Јәһја мөһүрләнмәмиш ‘бөјүк бир издиһамын’ ‘тахтын вә Гузунун гаршысында дурдуғуну’ ҝөрүр (Вәһј 7:1, 9).
Мүгәддәс Китаб суалларына ҹаваблар:
1:4; 3:1; 4:5; 5:6 — ‘Једди руһ’ ифадәси нәјә ишарә едир? Једди рәгәми Аллаһын нөгтеји-нәзәринҹә тамлығы билдирир. Буна ҝөрә дә, «једди ҹәмијјәтә» үнванланан мәктуб нәтиҹә етибарилә бүтүн дүнјада 100 000-дән артыг јығынҹагдан ибарәт олан Аллаһын халгына аиддир (Вәһј 1:11, 20). Јеһова Өз мүгәддәс руһуну һәјата кечирмәк истәдији нијјәтинә ујғун вердији үчүн ‘једди руһ’ ифадәси бу пејғәмбәрлијә диггәт јетирәнләрә дәрин анлајыш вә хејир-дуалар вермәкдә Аллаһын гүввәсинин там фәалијјәт ҝөстәрдијинә ишарә едир. «Вәһј» китабы бојунҹа једди рәгәминә тез-тез раст ҝәлинир. Бурада једди рәгәми тамлыг рәмзидир вә китаб Аллаһын мүгәддәс ‘сирринин тамамланмасындан’ бәһс едир (Вәһј 10:7).
1:8, 17 — «Алфа вә Омега», һәмчинин «Биринҹи, Ахырынҹы» титуллары кимә аиддир? «Алфа вә Омега» титулу Јеһоваја аид олуб, Ондан әввәл вә сонра Күлли-Ихтијар Аллаһын олмајаҹағыны ҝөстәрир. О, ‘Башланғыҹ вә Сондур’ (Вәһј 21:6; 22:13). Јеһова Вәһј 22:13 ајәсиндә Өзүндән әввәл вә сонра Аллаһ олмадығыны билдирән ‘Биринҹи вә Ахырынҹы’ титулу илә тәсвир олунса да, «Вәһј» китабынын биринҹи фәслинин контексти ҝөстәрир ки, бурадакы ‘Биринҹи вә Ахырынҹы’ титулу Иса Мәсиһә аиддир. О, өлмәз руһани варлыг кими Јеһова тәрәфиндән дирилдилән илк вә сон инсандыр (Колос. 1:18).
2:7 — ‘Аллаһын ҹәннәти’ нәдир? Бу сөзләр мәсһ олунмушлара үнванландығы үчүн бу ајәдәки ҹәннәт сөзү ҹәннәтәбәнзәр сәмави аләмә — Јеһованын олдуғу јерә аиддир. Садиг мәсһ олунмушлара «һәјат ағаҹындан» јемәк мүкафаты вериләҹәк. Онлар өлмәзлији алаҹаглар (1 Кор. 15:53).
3:7 — Иса ‘Давудун ачарыны’ (КМ) нә заман алды вә ондан неҹә истифадә едир? Иса ерамызын 29-ҹу илиндә вәфтиз олунанда Давудун сүлаләсиндән ҝәлән вә Аллаһ тәрәфиндән тәјин олунмуш Падшаһ олду. Лакин о, Давудун ачарыны ерамызын 33-ҹү илиндә ҝөјә уҹалдылыб Аллаһын сағында отуранда алды. Орада о, Давудун Падшаһлығынын бүтүн һүгугларыны мирас алды. Иса о вахтдан етибарән Падшаһлыгла бағлы имканлары ачараг бу ачардан истифадә едир. Иса 1919-ҹу илдә гул синфини ‘бүтүн маликанәси’ үзәринә тәјин етмәклә «Давуд нәслинин ачарыны» ‘садиг вә ағыллы гула’ һәвалә етди (Јешаја 22:22; Мат. 24:45, 47).
3:12 — Исанын ‘јени ады’ нәдир? Бу ад Исанын јени вәзифәси вә сәлаһијјәтләри илә бағлыдыр (Филип. 2:9-11). Бу ад Исадан башга һеч кимә мәлум олмаса да, Иса ону ҝөјдә садиг гардашларынын үзәринә јазыр вә бунун сајәсиндә Иса илә онларын арасында јахын мүнасибәтләр јараныр (Вәһј 19:12). О, һәтта Јеһованын она вердији надир сәлаһијјәтләри онларла бөлүшүр!
Бизим үчүн ибрәт дәрсләри:
1:3. Шејтанын дүнјасы үзәриндә Аллаһын Өз һөкмләрини иҹра етмәк үчүн тәјин олунан ‘вахт јахынлашдығы’ үчүн «Вәһј» китабындакы хәбәри баша дүшмәк вә она әсасән давранмаг олдугҹа ваҹибдир.
3:17, 18. Руһән зәнҝин олмағымыз үчүн Исадан «одла тәмизләнмиш гызыл» алмалыјыг, јәни ‘јахшы ишләрлә варлы олмалыјыг’ (1 Тим. 6:17-19). Биз һәмчинин Мәсиһин давамчылары олдуғумузу ајдын ҝөстәрән ‘ағ палтар’ ҝејинмәлијик вә руһани анлајышымыз олсун дејә «ҝөз дәрманы» сүртмәлијик, јәни «Ҝөзәтчи Гүлләси» журналындакы мәсләһәтләрә әмәл етмәлијик (Вәһј 19:8).
7:13, 14. Јалныз падшаһ кими јох, һәм дә каһин кими дә хидмәт едән, сәмави иззәтә говушмуш 24 ағсаггал 144 000-ни тәмсил едир. Онлар гәдим Исраилдә Давудун 24 група ајырдығы каһинләрлә тәмсил олунурдулар. Ағсаггаллардан бири Јәһјаја бөјүк издиһамын ким олдуғуну ачыглајыр. Буна ҝөрә дә тәхмин етмәк олар ки, мәсһ олунмуш мәсиһчиләрин дирилмәси 1935-ҹи илә гәдәр башламалы иди. Нәјә ҝөрә? Чүнки һәмин ил Аллаһын јер үзүндәки мәсһ олунмушларына бөјүк издиһамын дәгиг ким олдуғу ачыгланды (Лука 22:28-30; Вәһј 4:4; 7:9).
ЈЕДДИНҸИ МӨҺҮРҮН АЧЫЛМАСЫ ЈЕДДИ ШЕЈПУРУН ЧАЛЫНМАСЫНА СӘБӘБ ОЛУР
Гузу једдинҹи мөһүрү ачыр. Једди мәләјә једди шејпур верилир. Мәләкләрин алтысы бәшәријјәтин ‘үчдә биринә — Христиан дүнјасына һөкм хәбәрләрини бәјан едәрәк шејпурларыны чалыр (Вәһј 8:1, 2, 7-12; 9:15, 18). Јәһја буну бешинҹи ҝөрүнтүдә ҝөрүр. Нөвбәти ҝөрүнтүдә иштирак едәрәк Јәһја кичик тумары јејир вә мәбәди өлчүр. Једдинҹи шејпур чалынандан сонра јүксәк сәсләр бәјан едир: «Дүнја сәлтәнәти Рәббимизин вә Онун Мәсиһинин сәлтәнәти олду» (Вәһј 10:10; 11:1, 15).
Једдинҹи ҝөрүнтү Вәһј 11:15, 17 ајәләриндә јазыланлара ајдынлыг ҝәтирир. Ҝөјдә бөјүк бир әламәт ҝөрүнүр. Сәмави гадын бир оғлан ушағы доғур. Иблис ҝөјдән говулур. О, сәмави гадына гәзәбләнәрәк онун ‘нәслиндән оланларла вурушмаға’ ҝедир (Вәһј 12:1, 5, 9, 17).
Мүгәддәс Китаб суалларына ҹаваблар:
8:1-5 — Нәјә ҝөрә асимана сүкут чөкдү вә сонра јерә нә атылды? Јер үзүндәки ‘мүгәддәсләрин дуалары’ ешидилсин дејә асимана символик сүкут чөкмүшдү. Бу, Биринҹи Дүнја мүһарибәсинин сонунда баш вермишди. Мәсһ олунмуш мәсиһчиләр, онлардан бир чохларынын үмид етдикләри кими, диҝәр халгларын вахты битәндә ҝөјә галхмамышдылар. Мүһарибә заманы онларын чох чәтинликләри олмушду. Буна ҝөрә дә онлар рәһбәрлик үчүн сәјлә дуа едирдиләр. Онларын дуаларына ҹаваб олараг, мәләк јер үзүнә мәсһ олунмуш мәсиһчиләри руһән аловландыран символик од атыр. Онлар сајҹа аз олсалар да, Аллаһын Падшаһлығыны гызғын мәсәләјә чевирән, бунунла да Христиан дүнјасына од вуран үмумдүнја тәблиғ ишинә башладылар. Мүгәддәс Китабдан ҝөј ҝурултулары тәк хәбәрдарлыглар сәсләнмәјә башланды, Јеһованын Кәламындан чыхан һәгигәт ишыглары шимшәк кими парылдады вә ҝүҹлү зәлзәләдән сарсылан биналар кими, јалан дин тәмәлиндән сарсылды.
8:6-12; 9:1, 13; 11:15 — Једди мәләк шејпурларыны чалмаға нә заман һазырлашды вә шејпур сәсләри нә заман вә неҹә сәсләнди? Једди шејпурун чалынмасы үчүн ҝөрүлән һазырлыг јени гүввә верилмиш Јәһја синфинин јер үзүндәки үзвләринә 1919-ҹу илдән 1922-ҹи иләдәк рәһбәрлик верилмәсини өзүнә дахил едирди. Бунун нәтиҹәсиндә һәмин мәсиһчиләр тәблиғ хидмәтини јенидән тәшкил етмәк вә типографијалар тикмәклә мәшғул олдулар (Вәһј 12:13, 14). Шејпурларын чалынмасы Аллаһын халгынын мәләкләрлә әмәкдашлыг едәрәк Шејтан дүнјасына гаршы Јеһованын һөкмләрини мәрдҹәсинә бәјан етмәсини тәмсил едир. Гејд етмәк лазымдыр ки, бу, 1922-ҹи илдә Сидар-Поинтдә (Оһајо штаты) кечирилән конгреслә башлады вә бөјүк мәшәггәтә гәдәр давам едәҹәк.
8:13; 9:12; 11:14 — Сон үч шејпурун сәсинин ҝәтирдији «вај» вә ја «мүсибәт» нәдир? Илк дөрд шејпур сәси Христиан дүнјасынын руһән өлү вәзијјәтини бәјан етдији һалда, сон үч шејпурун сәси «вај» ҝәтирир, чүнки конкрет һадисәләрә ишарә едир. Бешинҹи шејпурун сәси Аллаһын халгынын 1919-ҹу илдә ‘дибсиз дәринликләрдән’, јәни фәалијјәтсизликдән азад олмасы вә онларын Христиан дүнјасы үчүн әзабвериҹи бәлаја чеврилән сүрәкли шаһидлик ишләри илә бағлыдыр (Вәһј 9:1). Алтынҹысы тарихдә ән бөјүк сүвари һүҹуму вә 1922-ҹи илдә башланан үмумдүнја тәблиғ кампанијасы һаггындадыр. Сонунҹу шејпур сәси Падшаһлығын доғулмасы илә әлагәлидир.
Бизим үчүн ибрәт дәрсләри:
9:10, 19. ‘Садиг вә ағыллы гулун’ Мүгәддәс Китаба әсасланан етибарлы нәшрләриндә инсанлары «санҹан» хәбәр вар (Мат. 24:45). Бу хәбәр ‘әгрәб нештәринә’ бәнзәјән чәјирткә гујругларына вә «илана бәнзәр гујруглары» олан дөјүш атларына мүвафигдир. Нәјә ҝөрә? Она ҝөрә ки, бу нәшрләр ‘Аллаһын гисас ҝүнү’ һаггында хәбәрдарлыг едир (Јешаја 61:2). Ҝәлин онлары пајламагда ҹәсарәтли вә сәјли олаг.
9:20, 21. Гејри-христиан халглар арасында јашајан бир чох һәлим инсанлар бәјан етдијимиз хәбәрә јахшы һај верирләр. Лакин биз ҝөзләмирик ки, «диҝәр инсанлар» кими истинад едилән вә Христиан дүнјасына мәнсуб олмајанлар ҝәтирдијимиз хәбәри күтләви шәкилдә гәбул едәҹәк. Буна бахмајараг, биз сәјлә хидмәт етмәјә давам едирик.
12:15, 16. «Јер» — Шејтанын системинә дахил олан ајры-ајры елементләр, јәни мүхтәлиф өлкәләрин һакимијјәт даирәләри дини етигад азадлығыны дәстәкләдиләр. 1940-ҹы илләрдән етибарән, бу һаким даирәләр «ағзыны ачыб, әждаһанын ағзындан пүскүрдүјү чајы [тәгибләри] удду». Һәгигәтән дә, Јеһова буну етмәк гәрарына ҝәләндә һөкумәт даирәләринин Онун ирадәсини јеринә јетирмәләринә тәсир едә биләр. Буна ҝөрә дә Сүлејманын мәсәлләри 21:1 ајәсиндәки сөзләр чох јериндәдир: «Падшаһын үрәји Рәббин әлиндәдир, ону су архы кими истәдији сәмтә дөндәрәр». Бу, Аллаһа олан иманымызы мөһкәмләндирмәлидир.