Мәсиһ јығынҹаглара дејир
“Једди улдузу сағ әлиндә тутан... белә дејир” (ВӘҺЈ 2:1).
1, 2. Исанын Кичик Асијадакы једди јығынҹаға дедији сөзләрилә нә үчүн марагланмалыјыг?
ЈЕҺОВАНЫН ваһид Оғлу Иса Мәсиһ мәсиһчи јығынҹағынын Башыдыр. Мәсһ едилмиш давамчыларынын јығынҹағында нөгсансызлығы горумаг үчүн Мәсиһ башчылыг вәзифәсиндән истифадә едәрәк, онлары тә’рифләјир вә ислаһ едир (Ефеслиләрә 5:21-27). Буна нүмунә, “Вәһј” китабынын 2-ҹи вә 3-ҹү фәсилләридир. Орада Исанын Кичик Асијадакы једди јығынҹаға ҝөндәрдији тә’сирли вә мәһәббәт долу мәктубларыны охујуруг.
2 Һәвари Јәһја Исанын једди јығынҹаға дедији сөзләри ешитмәздән әввәл, ‘Рәббин ҝүнүнә’ даир рө’ја ҝөрдү (Вәһј 1:10). Һәмин “ҝүн” 1914-ҹү илдә Хиласкар Падшаһлығын гурулдуғу заман башланды. Демәли, Мәсиһин јығынҹаглара дедији сөзләр бу сон ҝүнләр үчүн бөјүк әһәмијјәт кәсб едир. Онун мәсләһәт вә үрәк-дирәк вермәси јашадығымыз чәтин ҝүнләрдә таб ҝәтирмәјимизә көмәк едир (2 Тимотејә 3:1-5).
3. Һәвари Јәһјанын ҝөрдүјү “улдузлар”, “мәләкләр” вә “гызыл чырагданлар” һансы мәҹази мә’наны дашыјыр?
3 Јәһја рө’јасында “једди улдузу сағ әлиндә тутан, једди гызыл чырагданын”, јә’ни јығынҹагларын “арасында јеријән” иззәтләнмиш Иса Мәсиһи ҝөрдү. “Једди улдуз једди ҹәмијјәтин мәләкләри”дир (Вәһј 1:20; 2:1). Бә’зән улдузлар руһани варлыглар олан мәләкләри тәмсил едир, лакин руһани варлыглара һансыса хәбәри чатдырмаг үчүн, Мәсиһ инсандан истифадә етмәзди. Буна ҝөрә дә белә гәнаәтә ҝәлмәк мәнтигә ујғундур ки, “улдузлар” алтында мәсһ едилмиш нәзарәтчиләрдән ибарәт олан ағсаггаллар шурасы нәзәрдә тутулур. “Мәләкләр” ифадәси исә онларын мүждәчиләр ролуну вурғулајыр. Аллаһын тәшкилатынын бөјүмәси илә әлагәдар, “садиг... нөкәрбашы” Исанын “башга гојунларын”дан да мәгбул кишиләри нәзарәтчиләр кими тә’јин едиб (Лука 12:42-44; Јәһја 10:16).
4. Мәсиһин јығынҹаглара дедикләринә диггәт јетирмәк ағсаггаллара һансы фајданы ҝәтирир?
4 “Улдузлар” Исанын сағ әлиндәдир, јә’ни онун һакимијјәти, нәзарәти, мүдафиәси вә илтифаты алтындадырлар. Буна ҝөрә дә онлар Исаја һесабат вермәлидирләр. Мүасир ағсаггаллар Исанын једди јығынҹагдан һәр биринә дедији сөзләрә диггәт јетирәрәк, охшар вәзијјәтләри һәлл етмәји өјрәнирләр. Әлбәттә ки, һәр бир мәсиһчи Аллаһын Оғлуну динләмәлидир (Марк 9:7). Мәсиһин јығынҹаглара дедикләринә диггәт јетирәрәк биз нә өјрәнә биләрик?
Ефесдәки мәләјә
5. Ефесин неҹә шәһәр олдуғуну тәсвир един.
5 Ефесдәки јығынҹаг Исанын һәм тә’рифинә, һәм дә мәзәммәтинә лајиг иди. (Вәһј 2:1-7 ајәләрини охујун.) Кичик Асијанын гәрб саһилиндә јерләшән тиҹарәт вә дин мәркәзи олан бу варлы шәһәрдә Артемида илаһәсинин шәрәфинә бөјүк мә’бәд уҹалдылмышды. Ефесдә әхлагсызлығын, јаланчы динин вә ҹадуҝәрлијин чичәкләнмәсинә бахмајараг, Аллаһ бу шәһәрдә һәвари Павелин вә башга мәсиһчиләрин хидмәтинә хејир-дуа верирди (Һәвариләрин ишләри, 19-ҹу фәсил).
6. Мүасир мәсиһчиләр һансы саһәдә гәдим Ефесдә јашајан мәсиһчиләр кими давранырлар?
6 Мәсиһ Ефесдәки јығынҹағы тә’риф едәрәк деди: “Сәнин әмәлләриндән, әмәјиндән, тәһәммүлүндән вә пис адамлара таб ҝәтирә билмәдијиндән хәбәрдарам. Һәвари олмадыглары һалда, өзләрини һәвари адландыранлары сынагдан чыхартдын вә онларын јаланчы олдуғуну мүәјјән етдин”. Исанын һәгиги давамчыларынын мүасир јығынҹаглары да хејирхаһ ишләри, сә’јлә чалышмалары вә дөзүмләри илә танынырлар. Онлар өзләрини һәвари кими гәләмә вермәк истәјән јаланчы гардашлара тәһәммүл етмирләр (2 Коринфлиләрә 11:13, 26). Ефеслиләр кими, бизим ҝүнләрдә јашајан садиг мәсиһчиләр дә ‘пис адамлара таб ҝәтирә билмирләр’. Бу сәбәбдән, Јеһоваја ибадәти тәмиз сахламаг вә јығынҹағы горумаг үчүн, онлар төвбә етмәјән дөнүкләрлә үнсијјәтдә олмурлар (Галатијалылара 2:4, 5; 2 Јәһја 8-11).
7, 8. Ефесдәки јығынҹагда һансы ҹидди проблем варды вә буна бәнзәр вәзијјәтләри неҹә һәлл едә биләрик?
7 Лакин Ефесдәки мәсиһчиләрин ҹидди проблеми варды. Иса демишди: “Сәндән бир шикајәтим вардыр: сән илк мәһәббәтиндән әл чәкмисән”. Јығынҹағын үзвләринә Јеһоваја бәсләдикләри илк мәһәббәти аловландырмаг лазым иди (Марк 12:28-30; Ефеслиләрә 2:4; 5:1, 2). Һәгигәтән дә, һәр биримиз Аллаһа олан илк мәһәббәтимизи итирмәмәк үчүн еһтијатлы олмалыјыг (3 Јәһја 3). Бәс әҝәр варланмаг, зөвг далынҹа дүшмәк вә ја бу кими истәкләр һәјатымызда биринҹи јердә дурурса, неҹә? (1 Тимотејә 4:8; 6:9, 10). Онда биз Јеһоваја сидги-үрәкдән дуа етмәлијик ки, бу кими мејлләри арадан галдырмагда вә Она дәрин мәһәббәт, һәмчинин Онун вә Оғлунун етдикләри һәр бир шеј үчүн миннәтдарлыг инкишаф етдирмәјә көмәк етсин (1 Јәһја 4:10, 16).
8 Мәсиһ ефеслиләри тәшвиг едирди: “Һарадан дүшдүјүнү јадда сахла, төвбә ет вә әввәлҹә етдикләринә әмәл ет”. Бәс әҝәр онлар буну етмәзләрсә, неҹә? Иса деди: “Әкс һалда... јанына ҝәлиб, чырагданыны јериндән ҝөтүрүб, апараҹағам”. Әҝәр гојунларын һамысы илк мәһәббәтләрини итирсәјдиләр, онда “чырагдан”, јә’ни јығынҹаг олмазды. Јығынҹағымыз руһани ишыгла шәфәг сачсын дејә, ҝәлин бундан сонра да чалышган мәсиһчиләр кими бүтүн гүввәмизи сәрф едәк (Матта 5:14-16).
9. Тәригәтчилијә неҹә јанашылмалыдыр?
9 Ефеслиләрин ‘николачыларын әмәлләринә нифрәт етмәләри’ тә’рифә лајиг иди. “Вәһј” китабында дејиләнләрдән савајы, бу тәригәтин башланғыҹы, тә’лимләри вә адәтләри һаггында һеч нә мә’лум дејил. Лакин Иса инсанларын ардынҹа ҝедән кәсләри мүһакимә етдији үчүн, Ефесдәки мәсиһчиләр кими, биз дә тәригәтчилијә нифрәт етмәлијик (Матта 23:10).
10. Руһун дедикләринә диггәт јетирән кәсләри һансы ҝәләҹәк ҝөзләјир?
10 Мәсиһ деди: “Гулағы олан, Руһун ҹәмијјәтләрә нә дедијини ешитсин”. Иса јер үзүндә оланда Аллаһын руһунун тә’сири алтында данышырды (Ишаја 61:1; Лука 4:16-21). Бунун кими биз дә, Аллаһын мүгәддәс руһдан истифадә едәрәк Исанын васитәсилә дедикләринә диггәт јетирмәлијик. Иса руһун рәһбәрлији алтында вә’д етди: “Галиб ҝәләнә Аллаһын ҹәннәтиндәки һәјат ағаҹындан јемәјә иҹазә верәҹәјәм”. Бу, руһун дедијинә диггәт јетирән мәсһ едилмишләр үчүн “Аллаһын [сәмави] ҹәннәтиндә”, јә’ни Јеһованын һүзурунда өлмәзлик демәкдир. Руһун дедијинә гулаг асан “бөјүк издиһамын” үзвләри дә јер үзүндә олаҹаг Ҹәннәтдә јашајаҹаг, орада “һәјат сују ахан чај”дан ичәҹәк вә ‘ағаҹын јарпагларынын’ көмәји илә шәфа тапаҹаглар (Вәһј 7:9; 22:1, 2; Лука 23:43).
11. Јеһоваја олан мәһәббәт аловуну горумагда һансы көмәји ҝөстәрә биләрик?
11 Ефеслиләр биринҹи мәһәббәтләрини итирмишдиләр, буна бәнзәр вәзијјәт бу ҝүн јығынҹагларда јаранарса, неҹә? Ҝәлин, баҹы-гардашларымызла Јеһованын мәһәббәт долу јоллары һаггында сөһбәт едәрәк, Она олан мәһәббәт аловуну сөнмәјә гојмајаг. Мәсәлән, Аллаһын өз әзиз Оғлуну фидијә кими верәрәк бизә ҝөстәрдији мәһәббәтә ҝөрә миннәтдарлығымызы ифадә едә биләрик (Јәһја 3:16; Ромалылара 5:8). Бундан әлавә, јери ҝәләндә јығынҹаг ҝөрүшләриндәки шәрһләримиздә вә програмын бәндләриндә Аллаһын мәһәббәти һаггында хатырлада биләрик. Биз Јеһоваја олан мәһәббәтимизи, мәсиһчи хидмәтиндә Онун адыны иззәтләндирмәклә дә ҝөстәрә биләрик (Мәзмур 145:10-13). Бәли, јығынҹағын илк мәһәббәтини аловландырмаг вә ја ҝүҹләндирмәк үчүн сөзләримиз вә әмәлләримизлә чох шеј едә биләрик.
Измирдәки мәләјә
12. Тарихдән Измир вә орада мөвҹуд олан дини адәтләр һаггында нә мә’лумдур?
12 “Өлүб, тәкрар Дирилән, Биринҹи вә Ахырынҹы олан” Мәсиһ Измирдәки јығынҹағы тә’рифләди. (Вәһј 2:8-11 ајәләрини охујун.) Измир (көһнә ады Смирна) Кичик Асијанын гәрб саһилиндә јерләширди, әһалисини исә јунанлар тәшкил едирди. Б. е. ә. 580-ҹи илдә шәһәр лидијалылар тәрәфиндән мәһв едилди. Македонијалы Исҝәндәрин хәләфләри шәһәри јени бир саһәдә бәрпа етдиләр. Шәһәр Рома вилајәтинин тәркибинә дахил едилди вә ҝөзәл иҹтимаи биналары илә танынан, чичәкләнән тиҹарәт мәркәзинә чеврилди. Гејсәр Тиберијаја һәср олунмуш мә’бәдин сајәсиндә, шәһәр императора ибадәтин мәркәзи олду. Императора ибадәт едәнләр бир чимдик бухур јандырыб, “Гејсәр Рәббдир” демәли идиләр. Мәсиһчиләр буну едә билмәздиләр, чүнки онлар үчүн “Иса Рәббдир”. Бу сәбәбдән онлар бөјүк сыхынтыларла гаршылашырдылар (Ромалылара 10:9).
13. Измирдәки мәсиһчиләр мадди јохсуллуға бахмајараг, һансы мә’нада зәнҝин идиләр?
13 Измирдәки мәсиһчиләр сыхынтылардан савајы, јохсуллуға да таб ҝәтирирдиләр. Ола билсин, императора ибадәт етмәкдән имтина етдикләринә ҝөрә, игтисади мәһдудијјәтләрлә гаршылашырдылар. Јеһованын мүасир хидмәтчиләри дә бу ҹүр сынаглардан узаг дејилләр (Вәһј 13:16, 17). Измирдәки мәсиһчиләрә бәнзәјәнләр мадди ҹәһәтдән касыб олсалар да, руһани ҹәһәтдән зәнҝиндирләр. Елә ваҹиб олан да будур! (Сүлејманын мәсәлләри 10:22; 3 Јәһја 2).
14, 15. Мәсһ едилмишләр Вәһј 2:10 ајәсиндән һансы тәсәллини ала биләрләр?
14 Измирдә јашајан јәһудиләрин әксәријјәти “шејтан јығнағы” иди, чүнки онлар Мүгәддәс Јазылара зидд ҝедән адәтләрә табе олур, Аллаһын Оғлуну рәдд едир вә онун руһла доғулмуш давамчыларыны сөјүрдүләр (Ромалылара 2:28, 29). Лакин мәсһ едилмишләр Мәсиһин нөвбәти сөзләриндән бөјүк тәсәлли әлдә едә биләрләр! О дејир: “Чәкәҹәјин әләмләрдән горхма. Будур, иблис сизләрдән бә’зиләрини зиндана атаҹаг ки, имтаһан олунасыныз. Вә сиз он ҝүн әзаб ичиндә олаҹагсыныз. Өлүм баһасына да олса садиг гал, Мән сәнә һәјат таҹыны верәҹәјәм” (Вәһј 2:10).
15 Иса Јеһованын һөкмранлығы наминә өлмәкдән горхмады (Филипилиләрә 2:5-8). Бизим ҝүнләрдә Шејтан мәсһ едилмиш галыға гаршы мүһарибә апарса да, онлар бир груп кими сыхынтылардан, һәбсә атылмагдан вә вәһшиҹәсинә гәтлә јетирилмәкдән горхмурлар (Вәһј 12:17). Онлар дүнјаја галиб ҝәләҹәкләр. Бүтпәрәст ојунларда галиб ҝәләнләрә верилән чичәкләрдән һөрүлмүш солан таҹ әвәзинә, Мәсиһ дирилән мәсһ едилмишләрә “һәјат таҹы”, јә’ни ҝөјләрдә өлмәзлик верәҹәјини вә’д едир. Неҹә дә гијмәтли бәхшишдир!
16. Әҝәр бизим дә јығынҹаг гәдим Измирдәки јығынҹағын гаршылашдығы чәтинликләрлә гаршылашырса, диггәтимизи һансы мәсәләјә јөнәлтмәлијик?
16 Истәр сәмави, истәрсә дә јер үзүндә јашамаг үмидинә саһиб олаг, гәдим Измирдәки јығынҹағын үзвләринин гаршылашдығы кими, бизим јығынҹағымыз да бу кими чәтинликләрлә гаршылаша биләр. Әҝәр белә чәтинликләр јаранарса, ҝәлин гардашларымыза көмәк едәк ки, диггәтләрини Аллаһын тә’гибләрә нәјә ҝөрә јол вермәсинин әсас сәбәбинә, јә’ни һөкмранлыг мәсәләсинә јөнәлтсинләр. Нөгсансызлығыны горујан һәр бир Јеһованын Шаһиди Шејтанын јаланчы олдуғуну вә һәр кәсин, һәтта тә’гибләр заманы белә Каинатын Һөкмраны кими Аллаһын идарә етмәк һүгугунун сарсылмаз тәрәфдары ола биләҹәјини сүбут едир (Сүлејманын мәсәлләри 27:11). Ҝәлин башга мәсиһчиләри тә’гибләр заманы ҹәсарәтли олмаға тәшвиг едәк ки, бундан сонра да “горхмадан гүдсијјәт вә салеһликлә бүтүн өмрүмүз боју”, һәтта әбәдијјәт боју “[Јеһованын] һүзурунда ибадәт едәк” (Лука 1:68, 69, 74, 75).
Пергамадакы мәләјә
17, 18. Пергама һансы ибадәтин мәркәзи иди вә бу ҹүр бүтпәрәстликдән имтина етмәјин сону нә ола биләрди?
17 Пергамадакы јығынҹаг һәм тә’риф, һәм дә мәзәммәт алды. (Вәһј 2:12-17 ајәләрини охујун.) Пергама Измирдән тәхминән 80 км шималда јерләширди вә шәһәр бүтпәрәст динләрлә долу иди. Ҝөрүнүр, ҝилданлы ҹадуҝәрләр (астрологлар) Бабилдән бураја гачмышдылар. Хәстә инсанлар шәфа вә тәбабәт танрысы сајылан Асклепијанын Пергамадакы мәшһур мә’бәдинә ахышырдылар. Пергамада һәмчинин гејсәр Августа ибадәт етмәк үчүн мә’бәд вар иди вә шәһәр “империјанын илк илләриндә императора ибадәтин баш мәркәзи” һесаб олунурду (“Енҹјҹлопæдиа Британниҹа”, 1959-ҹу ил, 17-ҹи ҹилд, сәһ. 507).
18 Пергамада Зевсә һәср олунмуш гурбанҝаһ јерләширди. Бундан башга, шәһәр инсанлары илаһиләшдирән иблисанә мәркәзә чеврилмишди. Иса әбәс јерә демәмишди ки, Пергама мәсиһчиләри “шејтанын тахты олан јердә” јашајырлар! Јеһованын һөкмранлығынын тәрәфдарлары үчүн, императора ибадәтдән имтина етмәк һәјатлары баһасына баша ҝәлә биләрди. Дүнја әввәлки кими Иблисин һакимијјәти алтындадыр вә инсанлар милли рәмзләри бүтләрә чевирирләр (1 Јәһја 5:19). Мәсиһин дедији кими, биринҹи әсрдән бизим ҝүнләрә гәдәр, бир чох садиг мәсиһчиләр әзаблы өлүмлә өлмүшләр. О демишдир: “Антипа исә, Мәним садиг шаһидим иди. О... сизин аранызда өлдүрүлдү”. Јеһова Аллаһ вә Иса Мәсиһ, сөзсүз ки, бу ҹүр садиг хидмәтчиләри унутмурлар (1 Јәһја 5:21).
19. Балам нә етди вә бүтүн мәсиһчиләр нәдән горунмалыдырлар?
19 Мәсиһ һәмчинин “Биламын [Балам] тә’лимини” дә хатырлатды. Мадди мәнфәәти үчүн аҹҝөзлүклә чалышан јаланчы пејғәмбәр Балам Исраили лә’нәтләмәјә чалышды. Јеһова онун лә’нәтини хејир-дуаја чевирәндә, Балам Моаб падшаһы Балакла әлбир олуб исраиллиләрдән бир чохуну бүтпәрәстлијә вә ҹинси әхлагсызлыға тәһрик етди. Баламын һәрәкәтләринә гаршы дуран Финеһас кими, мәсиһчи ағсаггаллары да дүзҝүнлүк уғрунда мөһкәм дурмалыдырлар (Сајлар 22:1–25:15; 2 Петер 2:15, 16; Јәһуда 11). Үмумијјәтлә, бүтүн мәсиһчиләр бүтпәрәстликдән горунмалы вә јығынҹаға ҹинси әхлагсызлығын дахил олмасына јол вермәмәлидирләр (Јәһуда 3, 4).
20. Әҝәр мәсиһчи дөнүк нөгтеји-нәзәрләри гәбул етмәјә башлајырса, о, нә етмәлидир?
20 Пергамадакы јығынҹаг бөјүк тәһлүкә алтында иди, чүнки бу јығынҹагда “николачыларын тә’лиминә риајәт едәнләр варды”. Мәсиһ јығынҹаға деди: “Төвбә ејлә. Әкс тәгдирдә, тезликлә сәнин јанына ҝәлиб, онларла Өз ағзымын гылынҹы илә дөјүшәҹәјәм”. Тәригәтчиләр мәсиһчиләрә руһани ҹәһәтдән хәтәр јетирмәк арзусундадырлар, ајрылыг салмаға вә тәригәтчилији јајмаға чалышан кәсләр исә Аллаһын Падшаһлығыны мирас алмајаҹаглар (Ромалылара 16:17, 18; 1 Коринфлиләрә 1:10; Галатијалылара 5:19-21). Әҝәр һансыса мәсиһчи дөнүк нөгтеји-нәзәрләри гәбул едир вә онлары јајмаг истәјирсә, она Мәсиһин хәбәрдарлығына диггәт јетирмәк лазымдыр! О, бәладан азад олмаг үчүн төвбә етмәли вә јығынҹағын ағсаггалларындан руһани көмәк истәмәлидир (Јагуб 5:13-18). Иса һөкм кәсмәк үчүн тезликлә ҝәләҹәкдир, бу сәбәбдән ләнҝимәдән һәрәкәт етмәк лазымдыр.
21, 22. “Ҝизли сахланан маннаны” кимләр дадаҹаг вә бу нәји тәмсил едир?
21 Мәсһ едилмиш садиг мәсиһчиләрә вә онларын вәфалы һәмкарларына ҝәләҹәк һөкмдән горхмаг лазым дејил. Аллаһын мүгәддәс руһунун рәһбәрлији алтында Исанын вердији өјүдә диггәт јетирән кәсләрин һамысыны хејир-дуалар ҝөзләјир. Мәсәлән, дүнјаја галиб ҝәлән мәсһ едилмишләр “ҝизли сахланан манна јемәјә” дә’вәт едиләҹәк вә онлара “үзәриндә јени бир ад јазылмыш” “ағ даш” вериләҹәк.
22 Аллаһ исраиллиләри сәһрадакы 40 иллик сәјаһәт әрзиндә манна илә бәсләмишди. Бу “чөрәјин” бир гисми сәјјар мә’бәддә, әһд сандығынын ичиндә гызыл габда сахланылырды вә беләликлә дә Мүгәддәсләр мүгәддәси адланан јердә — Јеһованын иштиракыны тәмсил едән вә мө’ҹүзәли шәкилдә ишыг сачан јердә ҝизләдилирди (Чыхыш 16:14, 15, 23, 26, 33; 26:34; Ибраниләрә 9:3, 4). Ҝизләдилмиш маннаны јемәјә һеч кимә иҹазә верилмирди. Лакин Исанын мәсһ едилмиш давамчылары дирилдикдән сонра өлмәзлији алаҹаглары үчүн, мәҹази мә’нада десәк, “ҝизли сахланан маннаны” јејәҹәкләр (1 Коринфлиләрә 15:53-57).
23. “Ағ даш” вә “јени ад” һансы мә’наны дашыјыр?
23 Рома мәһкәмәсиндә гара даш иттиһам, ағ даш исә бәраәт һөкмүнү ҝөстәрирди. Галиб ҝәлән мәсһ едилмиш мәсиһчиләрә Исанын вердији “ағ даш” ону ҝөстәрир ки, Иса онлары ҝүнаһсыз, тәмиз вә ләкәсиз олараг гәбул едир. Ромалылар балаҹа дашлары мүхтәлиф ваҹиб тәдбирләрә ҝириш үчүн истифадә етдикләриндән, “ағ даш” мәсһ едилмишләрин Гузунун никаһы заманы ҝөјдә јер алмаг имканларыны тәмсил едә биләр (Вәһј 19:7-9). “Јени ад” исә, еһтимал ки, сәмави Падшаһлығын һәмварисләри олараг ҝөјдә Иса илә бирләшмәк кими надир имканла бағлыдыр. Бүтүн бунлар мәсһ едилмишләри, һәмчинин онларла бирликдә Јеһоваја хидмәт едән вә јер үзүндә Ҹәннәтдә јашамаг үмидинә саһиб олан һәмкарларыны неҹә дә руһландырыр!
24. Дөнүклүјә даир биз һансы мөвгеји тутмалыјыг?
24 Пергамадакы јығынҹағын дөнүкләр уҹбатындан тәһлүкәјә уғрадығыны јадда сахламаг мүдрик давранышдыр. Әҝәр бу ҹүр вәзијјәт јығынҹағымызын рифаһы үчүн тәһлүкә јарадырса, ҝәлин дөнүклүјү тамамилә рәдд едиб, һәгигәтдә јеримәјә давам едәк (Јәһја 8:32, 44; 3 Јәһја 4). Јаланчы мүәллимләр вә дөнүклүјә мејлли кәсләр бүтүн јығынҹағы јолдан чыхара биләрләр. Буна ҝөрә дә јол вермәли дејилик ки, јалан әгидәләр һәгигәтә табе олмағымыза мане олсун вә биз гәтијјәтлә дөнүкләрә гаршы дурмалыјыг (2 Јәһја 8-11; Галатијалылара 5:7-12).
25. Нөвбәти мәгаләдә Мәсиһин һансы јығынҹаглара үнванладығы мәктублары мүзакирә едәҹәјик?
25 Иззәтләнмиш Иса Мәсиһин Кичик Асијада јерләшән једди јығынҹагдан үчүнә дедији тә’риф вә нәсиһәт сөзләри доғрудан да дүшүнмәјә вадар едир! Лакин мүгәддәс руһун рәһбәрлији алтында Иса галан дөрд јығынҹаға даһа чох шеј демәјә һазырдыр. Тиатира, Сардис, Филаделфија вә Лаодикија јығынҹагларына үнванланмыш бу мәктублары нөвбәти мәгаләдә мүзакирә едәҹәјик.
Сиз неҹә ҹаваб верәрдиниз?
• Мәсиһин јығынҹаглара дедији сөзләрә биз нә үчүн диггәт јетирмәлијик?
• Јығынҹағын илк мәһәббәтини аловландырмаг үчүн биз нә едә биләрик?
• Нәјә ҝөрә дејә биләрик ки, гәдим Измирдә мадди јохсуллуг ичиндә олан мәсиһчиләр әслиндә зәнҝин идиләр?
• Пергама јығынҹағындакы вәзијјәти нәзәрә алсаг, дөнүк нөгтеји-нәзәрләрә неҹә јанашмалыјыг?
[8-ҹи сәһифәдәки хәритә]
(Хәритәјә нәшрин өзүндә бахын)
ЈУНАНЫСТАН
КИЧИК АСИЈА
Ефес
Измир
Пергама
Тиатира
Сардис
Филаделфија
Лаодикија
[10-ҹу сәһифәдәки шәкил]
“Бөјүк издиһам” јер үзүндә гурулаҹаг Ҹәннәти мирас алаҹаг.
[11-ҹи сәһифәдәки шәкилләр]
Тә’гиб олунан мәсиһчиләр дүнјаја галиб ҝәлирләр.