Ҝөзүн мүкафатда олсун
«Мүкафат үчүн һәдәфә доғру гачырам» (ФИЛИП. 3:14).
1. Һәвари Павелә һансы мүкафат тәклиф олунмушду?
ТАРСУСЛУ Шаул кими танынан һәвари Павел адлы-санлы аиләдә дүнјаја ҝөз ачмышды. О, мәшһур Ганун мүәллими Гамлијел тәрәфиндән ата-бабаларынын дининә өјрәдилмишди (Һәв. иш. 22:3). Чохларынын фикринҹә, Павели гаршыда ҝөзәл ҝәләҹәк ҝөзләјирди, лакин о өз динини тәрк едиб мәсиһчи олду. Павел она тәклиф олунан әбәди һәјат мүкафатыны — Аллаһын сәмави Падшаһлығында өлмәз падшаһ вә каһин олаҹағы вахты сәбирсизликлә ҝөзләјирди. Һәмин Падшаһлыг јерүзү Ҹәннәти идарә едәҹәк (Мат. 6:10; Вәһј 7:4; 20:6).
2, 3. Павел ҝөјләрдә әбәди јашамаг мүкафатыны нә дәрәҹәдә гијмәтләндирирди?
2 Бу мүкафаты нә гәдәр гијмәтләндирдијини ҝөстәрәрәк Павел деди: «Мәнә үстүнлүк тәмин едән һәр шеји Мәсиһ наминә зәрәр сајдым. Вә һәтта уғрунда һәр шејин зәрәрини чәкдијим Рәббим Мәсиһ Исаны танымағын үстүн дәјәри јанында һәр шеји зијан һесаб едир вә зибил сајырам» (Филип. 3:7, 8). Павел Јеһованын бәшәријјәтә даир нијјәтини өјрәндикдән сонра әксәр инсанларын ваҹиб сајдығы мөвге, вар-дөвләт, карјера вә нүфуз кими шејләри зибил сајды.
3 Һәмин андан етибарән Павел үчүн ән ваҹиби Јеһова вә Мәсиһ һаггында гијмәтли билик иди. Бу билик һаггында Иса Аллаһа дуасында демишди: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһ. 17:3). Павелин әбәди һәјата наил олмаг арзусу Филипилиләрә 3:14 ајәсиндәки сөзләриндән ҝөрүнүр: «Аллаһын Мәсиһ Иса васитәсилә етдији јүксәк дәвәтә дахил олан мүкафат үчүн һәдәфә доғру гачырам». Бәли, онун ҝөзү Аллаһын Падшаһлығында Иса Мәсиһин һакимијјәт шәрикләриндән бири кими ҝөјдә әбәди јашамаг мүкафатында иди.
Јер үзүндә әбәди һәјат
4, 5. Бу ҝүн Аллаһын ирадәсини јеринә јетирән милјонларла инсанлара һансы мүкафат тәклиф олунур?
4 Аллаһын ирадәсини јеринә јетирмәк гәрарына ҝәлән әксәр инсанларын ҹан атмалы олдуглары мүкафат Аллаһын јени дүнјасында әбәди һәјатдыр (Мәз. 37:11, 29). Иса нөвбәти сөзләрлә бу үмидин әсаслы олдуғуну тәсдиг етди: «Һәлимләр нә бәхтијардырлар! Чүнки јери мирас алаҹаглар» (Мат. 5:5). Мәзмур 2:8 ајәсинин ҝөстәрдији кими, Исанын өзү Јер күрәсинин әсас Варисидир вә онун ҝөјләрдә 144 000 һакимијјәт шәрики олаҹагдыр (Дан. 7:13, 14, 22, 27). Јер үзүндә јашајаҹаг башга гојунлар ‘дүнја јаранандан бәри онлар үчүн һазырланмыш’ Падшаһлығын јерүзү һиссәсини «мирас алаҹаглар» (Мат. 25:34, 46). Бизә зәманәт верилир ки, бу сөзләр ҝерчәклијә чевриләҹәк, чүнки онлары вәд едән Аллаһ ‘јалан данышмыр’ (Тит. 1:2). Аллаһын вәдләринин јеринә јетмәсинә даир исраиллиләрә: «Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди»,— дејән Јешуадакы әминлијә биз дә малик ола биләрик (Јешуа 23:14).
5 Аллаһын јени дүнјасындакы һәјат буҝүнкү кими гејри-гәнаәтбәхш олмајаҹаг. Һәјат тамамилә фәргли олаҹаг: орада мүһарибә, ҹинајәткарлыг, јохсуллуг, әдаләтсизлик, хәстәлик вә өлүм олмајаҹаг. Инсанларын мүкәммәл сағламлығы олаҹаг вә онлар ҹәннәтә чеврилмиш јер үзүндә јашајаҹаглар. Һәјат мәмнунедиҹи вә ҝөзләдијимиздән дә ҝөзәл олаҹаг. Бәли, һәр ҝүндән зөвг алаҹағыг. Неҹә дә һејрәтамиз мүкафатдыр!
6, 7. а) Иса Аллаһын јени дүнјасында нәләр баш верәҹәјини неҹә нүмајиш етдирди? б) Өлән инсанлара јени башланғыҹ неҹә вериләҹәк?
6 Иса јер үзүндә оланда Аллаһ Өз мүгәддәс руһундан она верди ки, јени дүнјада бүтүн јер үзүндә баш верәҹәк ҝөзәл шејләри нүмајиш етдирсин. Мәсәлән, Иса ајаглары 38 ил әрзиндә ифлиҹ олан адама дуруб јеримәји әмр етди. Мүгәддәс Китабда охудуғумуз кими, кишинин ајаглары ачылыр вә о, јеримәјә башлајыр. (Јәһја 5:5-9 ајәләрини оху.) Башга бир вахт исә Иса раст ҝәлдији ‘анаданҝәлмә кор бир адамы’ сағалтды. Бир гәдәр сонра һәмин адамдан ону кимин сағалтдығыны сорушанда о ҹаваб вериб деди: «Әсла ешидилмәмишдир ки, кимсә анаданҝәлмә кор бир адамын ҝөзләрини ачсын. Әҝәр бу Адам Аллаһдан олмасајды, һеч бир шеј едә билмәзди» (Јәһ. 9:1, 6, 7, 32, 33). Иса бүтүн бунлары Аллаһдан алдығы гүввәнин сајәсиндә едә билирди. О, ҝетдији һәр јердә ‘шәфаја мөһтаҹ оланлары сағалдырды’ (Лука 9:11).
7 Иса нәинки хәстәләри вә шикәстләри сағалда, һәтта өлүләри дә дирилдә билирди. Мәсәлән, 12 јашлы гызын нүмунәсинә бахаг. Онун өлүмү валидејнләрини бөјүк кәдәрә гәрг етмишди. Лакин Иса деди: «Гызҹығаз, сәнә галх дејирәм!» Вә о галхды! Онун валидејнләринин вә орада олан инсанларын севинҹини тәсәввүр едә биләрсәнми? (Марк 5:38-42 ајәләрини оху.) Аллаһын јени дүнјасында «һәм салеһ, һәм дә салеһ олмајан» милјардларла «өлүләрин дирилмәси» оланда инсанларын севинҹинин һәдди-һүдуду олмајаҹаг (Һәв. иш. 24:15; Јәһ. 5:28, 29). Бу онлар үчүн әбәди һәјата јени башланғыҹ олаҹаг вә онлар бир даһа өлмәјәҹәкләр.
8, 9. а) Мәсиһин Миниллик Һөкмранлығы заманы Адәмдән мирас алынан ҝүнаһла нә баш верәҹәк? б) Өлүләрә нәјин әсасында һөкм едиләҹәк?
8 Дириләнләрин әбәди һәјаты алмаг имканы олаҹаг. Бу инсанлар өлмәздән габаг етдикләри ҝүнаһлара ҝөрә мүһакимә едилмәјәҹәкләр (Ром. 6:7). Мәсиһин Миниллик Һөкмранлығы заман фидијә гурбанлығынын дәјәри тәтбиг олунанда Падшаһлығын итаәткар тәбәәләри тәдриҹән камилләшәҹәк вә ахырда Адәмин ҝүнаһынын бүтүн нәтиҹәсиндән тамамилә азад олаҹаглар (Ром. 8:21). Јеһова «өлүмү әбәди олараг јох едәҹәк, Худавәнд Рәбб бүтүн адамларын үзүндән ҝөз јашларыны силәҹәк» (Јешаја 25:8). Аллаһын Кәламында һәмчинин дејилир ки, ‘тумарлар ачылаҹаг’, бу да һәмин дөврдә јашајан инсанлара јени мәлуматын вериләҹәјинә ишарә едир (Вәһј 20:12). Јер күрәси ҹәннәтә чеврилдикҹә ‘дүнјанын сакинләри доғрулуғу өјрәнәҹәкләр’ (Јешаја 26:9).
9 Дириләҹәк инсанлара Адәмдән алдыглары ҝүнаһа әсасән јох, өзләринин вердикләри гәрарлара әсасән һөкм едиләҹәк. Вәһј 20:12 ајәсиндә дејилир: «Өлүләр, китабларда јазыланлара әсасән, өз әмәлләринә ҝөрә», јәни дириләндән сонракы әмәлләринә әсасән мүһакимә олунаҹаглар. Бу, Јеһованын әдаләтинә, мәрһәмәтинә вә мәһәббәтинә даир неҹә дә ҝөзәл нүмунәдир! Үстәлик, көһнә системин аҹы хатирәләри «бир даһа хатырланмајаҹаг, һеч јада дүшмәјәҹәк» (Јешаја 65:17). Руһландырыҹы јени мәлуматларын вә хош шејләрлә долу олан һәјатын сајәсиндә кечмишдә баш вермиш пис шејләр артыг онлары нараһат етмәјәҹәк. Бүтүн бунлар онларын јаддашындан силинәҹәк (Вәһј 21:4). Һар-Меҝидондан сағ чыхаҹаг ‘бөјүк издиһам’ һаггында да ејни шеји демәк олар (Вәһј 7:9, 10, 14).
10. а) Аллаһын јени дүнјасында һәјат неҹә олаҹаг? б) Ҝөзүнү мүкафатда сахламаг үчүн нә едә биләрсән?
10 Аллаһын јени дүнјасында артыг инсанлар бир даһа хәстәләнмәјәҹәк вә өлмәјәҹәкләр. Һеч ким «“хәстәјәм” демәјәҹәк» (Јешаја 33:24). Нәһајәт, јени јерин сакинләри һәр сәһәр ојананда өзләрини там сағлам һисс едәҹәк вә нөвбәти ҝөзәл ҝүнүн ачылмасыны сәбирсизликлә ҝөзләјәҹәкләр. Онлар мәмнунедиҹи ишлә мәшғул олаҹаг вә тәмиз нијјәтли инсанларла үнсијјәтдән һәзз алаҹаглар. Белә һәјат һәгигәтән дә һејрәтамиз мүкафатдыр! Нәјә ҝөрә Мүгәддәс Китабдан Јешаја 33:24 вә 35:5-7 ајәләриндәки пејғәмбәрликләри охујуб үзәриндә дүшүнмәјәсән? Өзүнү һәмин мүһитдә тәсәввүр етмәјә чалыш. Бу сәнә ҝөзүнү мүкафатда сахламаға көмәк едәҹәк.
Ҝөзләрини мүкафатдан чәкәнләр
11. Сүлејманын һөкмранлығынын ҝөзәл башланғыҹыны тәсвир един.
11 Мүкафат һаггында өјрәндикдән сонра сәјлә чалышмалыјыг ки, ҝөзүмүзү ондан чәкмәјәк, әкс һалда биз бу мүкафаты нәзәрдән гачыра биләрик. Мәсәлән, гәдим Исраил падшаһы Сүлејман тахта отуранда тәвазөкарлыгла дуасында Аллаһдан анлајыш вә дәрракә истәди ки, Онун халгына дүзҝүн һөкм едә билсин. (1 Падшаһлар 3:6-12 ајәләрини оху.) Мүгәддәс Китабда дејилдији кими, дуасына ҹаваб олараг ‘Аллаһ Сүлејмана бол һикмәт вә дәрракә верди’. «Сүлејманын һикмәти бүтүн шәрг халгларынын вә Мисирлиләрин һикмәтиндән үстүн иди» (1 Пад. 4:29-32).
12. Јеһова Исраил падшаһларына һансы хәбәрдарлыглары вермишди?
12 Јеһова хәбәрдарлыг вермишди ки, падшаһ олан һәр кәс ‘өзү үчүн ат чохалтмамалы’ вә үрәји һагг јолдан дөнмәсин дејә ‘чох арвад алмамалыдыр’ (Ганун. т. 17:14-17). Атлары чохалтмаг падшаһын халгын Мүдафиәчиси олан Јеһоваја јох, ордунун ҝүҹүнә архаландығыны ҝөстәрәрди. Чох арвад алмаг исә она ҝөрә тәһлүкәли иди ки, онларын бәзиләри Исраилин әтрафында јашајан бүтпәрәст халглардан ола биләр вә падшаһы Јеһоваја һәгиги ибадәтдән дөндәрә биләрди.
13. Неҹә олду ки, Сүлејман она верилмиш шејләри нәзәрдән гачырды?
13 Сүлејман бу хәбәрдарлыглара мәһәл гојмады. О, Јеһованын дедикләринин там әксинә давранды. Онун минләрлә аты вә атлылары олду (1 Пад. 4:26). Һәмчинин о, чоху гоншу бүтпәрәст халглардан олан 700 арвад вә 300 кәниз алды. «Онлар... онун үрәјини башга аллаһлара тәрәф аздырдылар вә онун үрәји... Аллаһы Рәббә садиг дејилди». Сүлејман јаделли арвадларынын тәсири алтына дүшәрәк бүтпәрәст халгларын аллаһларына ијрәнҹ ибадәтдә иштирак етмәјә башлады. Буна ҝөрә Јеһова ‘падшаһлығы [онун] әлиндән чәкиб алаҹағыны’ деди (1 Пад. 11:1-6, 11).
14. Сүлејманын вә Исраил халгынын итаәтсизлији нәјә ҝәтириб чыхарды?
14 Сүлејман һәгиги Аллаһын тәмсилчиси олмағын бөјүк шәрәф олдуғуну унутду. Падшаһ тамамилә јалан ибадәтә гапылды. Сонра бүтүн Исраил халгы Аллаһдан үз дөндәрди, нәтиҹәдә б. е. ә. 607-ҹи илдә онун бир халг кими мөвҹудлуғуна сон гојулду. Мүәјјән вахтдан сонра јәһудиләр һәгиги ибадәти бәрпа етсәләр дә, әсрләр сонра Иса ‘Аллаһын Сәлтәнәтинин онлардан алыныб, онун мејвәләрини јетишдирәҹәк бир халга вериләҹәјини’ бәјан етди. Мәһз белә дә олду. «Будур, евиниз бош галыр»,— дејә Иса билдирди (Мат. 21:43; 23:37, 38). Сәдагәтсизлији уҹбатындан халг һәгиги Аллаһын тәмсилчиси олмаг кими бөјүк бир шәрәфи итирди. Ерамызын 70-ҹи илиндә Рома ордусу Јерусәлими вә мәбәди виран етди вә сағ галан јәһудиләрин чохуну көләлијә апарды.
15. Әсил дәјәрли олан шејдән ҝөзләрини чәкән инсанлардан нүмунә ҝәтирин.
15 Јәһуда Искарјот Исанын 12 һәварисиндән бири иди. О, Исанын ҝөзәл нитгләрини ешитмиш вә онун Аллаһын мүгәддәс руһунун көмәји илә ҝөстәрдији мөҹүзәләрини ҝөрмүшдү. Амма Јәһуда өз үрәјини горумады. Она Исаја вә 12 һәваријә мәнсуб олан пул гутусу етибар олунмушду. Анҹаг Јәһуда оғру олдуғундан гутудан пул ҝөтүрүрдү (Јәһ. 12:6). О, икиүзлү баш каһинләрлә әлбир олуб Исаны 30 ҝүмүш пула сатанда онун тамаһкарлығы һәддини ашды (Мат. 26:14-16). Ҝөзүнү мүкафатдан чәкән башга бир нәфәр исә Павелин әмәкдашы олан Димасдыр. Димас үрәјини горумады. Павел онун һаггында деди: «Димас индики дөврү севиб, мәни тәрк етди». (2 Тим. 4:10; Сүлејманын мәсәлләри 4:23 ајәсини оху.)
Һәр биримиз үчүн ибрәт дәрси
16, 17. а) Бизә ҝөстәрилән мүгавимәт нә дәрәҹәдә шиддәтлидир? б) Шејтанын нә етмәсиндән асылы олмајараг, биз она нәјин сајәсиндә гаршы дура биләрик?
16 Аллаһын бүтүн хидмәтчиләри Мүгәддәс Китабдакы нүмунәләр үзәриндә ҹидди дүшүнмәлидирләр, чүнки бизә дејилмишдир: «Бүтүн бунлар ибрәт олараг онларын башына ҝәлирди; сон әсрләрә чатан бизләр үчүн дә мәсләһәт олараг гејд едилди» (1 Кор. 10:11). Биз һал-һазырда бу пис системин ахыр ҝүнләриндә јашајырыг (2 Тим. 3:1, 13).
17 «Бу әсрин танрысы» олан Шејтан Иблис «вахтынын аз олдуғуну» билир (2 Кор. 4:4; Вәһј 12:12). Јеһованын хидмәтчиләрини нөгсансызлыгларындан дөндәрмәк үчүн һәр шејә әл атыр. Шејтан, күтләви информасија васитәләри дә дахил олмагла, бу дүнјаны идарә едир. Амма Јеһованын халгы даһа бөјүк гүввәјә — ‘ән үстүн гүдрәтә маликдир’ (2 Кор. 4:7). Там әмин ола биләрик ки, Шејтан бизә гаршы нә едирсә-етсин, Јеһованын вердији гүдрәт сајәсиндә она гаршы дура биләрик. Буна ҝөрә Аллаһын Кәламы бизи тәшвиг едир ки, Ондан «диләјәнләрә Мүгәддәс Руһу верәҹәји»нә там әминликлә вә дурмадан Јеһоваја дуа едәк (Лука 11:13).
18. Бу системә мүнасибәтимиз неҹә олмалыдыр?
18 Шејтанын пис системинин тезликлә мәһв едиләҹәјини, һәгиги мәсиһчиләрин исә сағ галаҹағыны билмәк бизи мөһкәмләндирир. «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһ. 2:17). Буна ҝөрә Аллаһын хидмәтчиләриндән киминсә дүнјанын бизә Јеһова илә мүнасибәтләрдән даһа гијмәтли бир шеј тәклиф едә биләҹәјини дүшүнмәси неҹә дә ағылсызлыг оларды! Шејтанын идарә етдији бу дүнја батмаг үзрә олан бир ҝәмијә бәнзәјир. Јеһова мәсиһчи јығынҹағыны садиг хидмәтчиләринә «хиласедиҹи гајыг» кими вериб. Јени дүнјаја истигамәт аланлар әмин ола биләрләр ки, «шәр адамлар кәсилиб атылаҹаг, Рәббә үмид бағлајанлар өлкәни [«дүнјаны», КМ] мүлк олараг алаҹаг» (Мәз. 37:9). Буна ҝөрә дә ҝөзүнү бу ҝөзәл мүкафатдан чәкмә!
Јадыныздадырмы?
• Павел она тәклиф олунан мүкафата неҹә јанашырды?
• Јер үзүндә әбәди јашајаҹаг инсанлара нәјин әсасында һөкм едиләҹәк?
• Неҹә давранмағымыз мүдриклик оларды?
[12 вә 13-ҹү сәһифәләрдәки шәкил]
Мүгәддәс Китабы охујанда мүкафаты неҹә алдығыны тәсәввүр едирсәнми?