Јеһованын Кәламы ҹанлыдыр

«Вәһј» китабындан диггәтәлајиг фикирләр — II һиссә

ЈЕҺОВА АЛЛАҺА ибадәт едәнләри вә етмәјәнләри ҝәләҹәкдә нә ҝөзләјир? Шејтанын вә онун ҹинләринин агибәти неҹә олаҹаг? Итаәткар бәшәријјәт Мәсиһин Миниллик Һөкмранлығы заманы һансы хејир-дуалары алаҹаг? Бу вә диҝәр ваҹиб суалларын ҹавабларыны «Вәһј» китабынын 13–дән 22-дәк фәсилләриндән тапмаг оларa. Бу парчада һәвари Јәһјанын ерамызын биринҹи әсринин сонуна јахын алдығы 16 ҝөрүнтүдән ахырынҹы 9-у јазылыб.

Јәһја јазыр: «Бу пејғәмбәрлик сөзләрини охујан вә динләјәнләр вә онда јазыланлара әмәл едәнләр бәхтијардырлар» (Вәһј 1:3; 22:7). «Вәһј» китабыны охумаг вә өјрәндикләримизи тәтбиг етмәк үрәјимизә тәсир едә, Аллаһа вә Онун Оғлу Иса Мәсиһә иманымызы мөһкәмләндирә вә ҝәләҹәјә ҝөзәл үмид верә биләрb (Ибр. 4:12).

АЛЛАҺЫН ГӘЗӘБИНИН ЈЕДДИ ҸАМЫ БОШАЛДЫЛЫР

(Вәһј 13:1–16:21)

Вәһј 11:18 ајәсиндә дејилир: «Халглар гәзәбләндиләр вә Сәнин [Аллаһын] гәзәбин ҝәлди... вә јери тәләф едәнләри тәләф етмәк вахты ҝәлди». Аллаһын гәзәб вахтынын нәјә ҝөрә ҝәлдијини ҝөстәрмәк үчүн сәккизинҹи ҝөрүнтүдә ‘једди башлы, он бујнузлу ҹанаварын’ фәалијјәти тәсвир едилир (Вәһј 13:1).

Јәһја доггузунҹу ҝөрүнтүдә ‘Сион дағында дуран Гузуну’ вә онун јанында дуран ‘јүз гырх дөрд мин адамы’ ҝөрүр. Онлар «инсанлар арасындан сатын алындылар» (Вәһј 14:1, 4). Сонра мәләкләрин бәјан етдији хәбәрләр сәсләнир. Нөвбәти ҝөрүнтүдә Јәһја ‘једди бәланы ҝәтирән једди мәләји’ ҝөрүр. Ҝөрүнүр, бу мәләкләрә «Аллаһын гәзәбинин једди ҹамыны» Шејтан дүнјасынын мүхтәлиф саһәләринә бошалтмағы әмр едән Јеһованын Өзүдүр. Бу ҹамларда Аллаһын иҹра едәҹәји һөкмләри барәдә бәјанатлар вә хәбәрдарлыглар вар (Вәһј 15:1; 16:1). Бу ики ҝөрүнтүдә үчүнҹү мүсибәтлә вә једдинҹи шејпурун чалынмасы илә бағлы Падшаһлығын иҹра едәҹәји һөкмләрин диҝәр тәфәррүатлары верилир (Вәһј 11:14, 15).

Мүгәддәс Китаб суалларына ҹаваблар:

13:8 — ‘Гузунун һәјат китабы’ нәдир? Бу, мәҹази китабдыр вә орада анҹаг Иса Мәсиһлә сәмави Падшаһлыгда идарә едәнләрин адлары јазылыб. Бу китаба сәмави аләмдә јашамаға үмид едән вә һәлә јер үзүндә олан мәсһ едилмиш мәсиһчиләрин дә адлары дахилдир.

13:11-13 — Ики бујнузу олан ҹанавар әждаһа кими неҹә давраныр вә ҝөјдән јерә неҹә од јағдырыр? Икибујнузлу ҹанаварын — Инҝилис-Американ дүнја империјасынын әждаһа кими данышмасы ҝөстәрир ки, о өз идарә формасыны башгаларына ҝүҹлә гәбул етдирмәк үчүн һәдә-горхулара, тәзјигләрә вә зоракылыға әл атыр. Онун јерә од јағдырмасы о демәкдир ки, о, ХХ әсрин ики дүнја мүһарибәсиндә шәр гүввәләр вә коммунизм үзәриндә гәләбә чалдығыны иддиа етмәклә өзүнү пејғәмбәр кими апарыр.

16:17 — Үзәринә једдинҹи ҹамын бошалдылдығы «һава» нәдир? «Һава» шејтани дүшүнҹә тәрзинин — «инди итаәтсиз инсанларда фәал олан руһун [әһвал-руһијјәнин]» символудур. Шејтанын бүтүн пис системи бу зәһәрли һава илә нәфәс алыр (Ефес. 2:2).

Бизим үчүн ибрәт дәрсләри:

13:1-4, 18. Инсан һөкумәтләрини тәмсил едән «ҹанавар» «дәниздән» — нараһат бәшәр күтләсиндән чыхыр (Јешаја 17:12, 13; Дан. 7:2-8, 17). Шејтанын мејдана ҝәтирдији вә һакимијјәт вердији бу ҹанаварын ады онун нә гәдәр гејри-камил олдуғуну ҝөстәрән 666 рәгәмидир. Бу ҹанаварын ким олдуғуну билмәјимиз бүтүн бәшәријјәт кими һејрәтлә онун ардынҹа ҝетмәмәјә вә она ибадәт етмәмәјә бизә көмәк едәҹәк (Јәһ. 12:31; 15:19).

13:16, 17. Алыш-вериш кими ҝүндәлик ишләрлә мәшғул оларкән чәтинликләрлә гаршылашсаг да, ҹанаварын һәјатымызы идарә етмәсинә јол вермәмәлијик. ‘Әлимизә, јахуд алнымыза дамғанын вурулмасына’ разы олмаг онун бизи идарә етмәсинә вә ја дүшүнҹә тәрзимизә тәсир ҝөстәрмәсинә јол вермәјә бәрабәр оларды.

14:6, 7. Мәләјин мүждәни бәјан етмәсиндән Аллаһын Падшаһлығынын ҝөјләрдә гурулдуғу һагда хош хәбәри тәхирә салмадан тәблиғ етмәли олдуғумузу өјрәнирик. Мүгәддәс Китабы өјрәнән инсанлара Аллаһдан горхмағы вә иззәти Јеһоваја вермәји өјрәтмәлијик.

14:14-20. «Јер үзүнүн бичини», јәни хилас олунаҹаг инсанларын јығымы сона чатанда мәләк ‘јерин мејнәсиндән үзүм топлајыб Аллаһын гәзәбинин бөјүк үзүмсыханына атаҹаг’. Шејтанын бәшәријјәти өз әлиндә сахламаг үчүн јаратдығы сатгын идарә системини тәмсил едән мејнә вә онун чүрүк бәһрәси олан ‘салхымлар’ әбәдијјән мәһв едиләҹәк. Биз јерин мејнәсинин бизә тәсир ҝөстәрмәсинә јол вермәмәјә гәти гәрарлы олмалыјыг.

16:13-16. Шејтани пропаганданы тәмсил едән «мурдар руһ» Аллаһын гәзәбинин једди ҹамынын төкүлмәсинин јерин һөкмдарларына тәсиринин гаршысыны алмаға вә онлары Аллаһа гаршы чыхмаға тәһрик етмәјә јөнәлдилмишдир (Мат. 24:42, 44).

16:21. Бу дүнјанын сону јахынлашдыгҹа Шејтанын пис системинә гаршы сәсләнән Јеһованын һөкм хәбәрләринә долу дәнәләринә бәнзәдилән олдугҹа ағыр һөкмләр дахил ола биләр. Буна бахмајараг, инсанларын әксәријјәти Аллаһа күфр етмәјә давам едәҹәк.

ЗӘФӘР ЧАЛМЫШ ПАДШАҺ ҺӨКМРАНЛЫГ ЕДИР

(Вәһј 17:1–22:21)

Јалан динин дүнја империјасы олан «Бөјүк Бабил» Шејтанын пис дүнјасынын мәнфур бир һиссәсидир. 11-ҹи ҝөрүнтүдә о, «бөјүк фаһишә», јәни ‘гырмызы ҹанаварын белиндә отуран’ әхлагсыз гадын кими тәсвир олунур. Мәһз белиндә отурдуғу ҹанаварын ‘он бујнузу’ ону тамамилә мәһв едәҹәк (Вәһј 17:1, 3, 5, 16). Фаһишәнин «бөјүк шәһәр»ә бәнзәдилдији нөвбәти ҝөрүнтүдә онун сону һагда елан едилир вә Аллаһын халгы ләнҝимәдән бу шәһәрдән ‘чыхмаға’ чағырылыр. Бу бөјүк шәһәрин дағылмасына ҝөрә чохлары јас тутур. Ҝөјләрдә исә севинҹ јашаныр, чүнки ‘Гузунун тојудур’ (Вәһј 18:4, 9, 10, 15-19; 19:7). 13-ҹү ҝөрүнтүдә ‘ағ атын’ белиндә отуран кәс халглара гаршы мүһарибәјә чыхыр. О, Шејтанын пис системини тамамилә мәһв едир (Вәһј 19:11-16).

Бәс ‘иблис вә шејтан олан көһнә илан’ һаггында нә демәк олар? О нә заман ‘одлу ҝөлә атылаҹаг’? Бу, 14-ҹү ҝөрүнтүнүн мөвзуларындан биридир (Вәһј 20:2, 10). Сон ики ҝөрүнтү Исанын Миниллик Һөкмранлығы заманы олаҹаг һәјат һагда мүәјјән тәсәввүр јарадыр. ‘Вәһј’ сона чатанда Јәһја шәһәрин баш күчәсинин ортасында һәјат сују ахан чајы ҝөрүр вә ‘сусајанлар’ үчүн ҝөзәл дәвәт сәсләнир (Вәһј 1:1; 22:1, 2, 17).

Мүгәддәс Китаб суалларына ҹаваблар:

17:16; 18:9, 10 — Нәјә ҝөрә јерин һөкмдарлары өзләринин дармадағын етдикләри ‘фаһишәјә’ ҝөрә ҝөз јашлары ахыдаҹаг? Буна јеҝанә сәбәб онларын худбинлијидир. Бөјүк Бабилин мәһвиндән сонра јерин һөкмдарлары она олан еһтијаҹларыны дәрк едәҹәкләр. Бөјүк Бабил онларын чиркин әмәлләринә дини дон ҝејиндирирди. Һәмчинин ҝәнҹләри ҹәбһәјә ҹәлб етмәкдә онлара көмәклик ҝөстәрирди. Бундан әлавә, о, әһалини һөкмдарларын табечилијиндә сахламагда ваҹиб рол ојнајырды.

19:12 — Һансы мәнада Исанын ачыгланмајан адыны ондан башга һеч кәс билмир? Ҝөрүнүр, бу ад Исанын Рәббин ҝүнүндә малик олдуғу вәзифә вә сәлаһијјәтләрә ишарә едир вә онлардан бәзиләри Јешаја 9:6 ајәсиндә садаланыр. Исанын ојнадығы рол хүсуси олдуғундан бу ад ондан башга һеч кимә мәлум дејил вә белә јүксәк вәзифә саһиби олмағын нә демәк олдуғуну јалныз о билир. Бунунла белә, Иса өз ‘адыны [ҝәлин синфинә мәнсуб оланларын] үзәриндә јазыр’, башга сөзләрлә десәк, надир сәлаһијјәтләринин бәзиләрини онларла бөлүшүр (Вәһј 3:12).

19:14 — Һар-Меҝидонда Исанын ардынҹа ҝедән атлылар кимләрдир? Иса илә бирҝә Аллаһын мүһарибәсиндә иштирак едәҹәк ‘ҝөјдә олан ордулара’ мәләкләр вә артыг сәмави мүкафатларыны алмыш мәсһ олунмуш галибләр дахилдир (Мат. 25:31, 32; Вәһј 2:26, 27).

20:11-15 — ‘Һәјат китабында [вә ја тумарында]’ кимләрин адлары јазылыб? Бу тумарда әбәди һәјаты алаҹаг бүтүн инсанларын — мәсһ олунмушларын, бөјүк издиһамын үзвләринин вә ‘салеһләрин дирилмәси’ заманы һәјата гајтарылаҹаг инсанларын адлары гејдә алыныб (Һәв. иш. 24:15; Вәһј 2:10; 7:9). ‘Салеһ олмајанларын дирилмәси’ заманы дириләнләрин адлары Миниллик дөврүндә ачылаҹаг ‘китабларда јазылан’ ҝөстәришләрә ујғун јашајаҹаглары тәгдирдә бу сијаһыја салынаҹаг. Анҹаг бу адлар силинмәјән мүрәккәб илә јазылмајыб. Мәсһ олунмушлар өләнәдәк садиг галдыглары тәгдирдә адлары әбәдијјән бу сијаһыја дүшүр (Вәһј 3:5). Јер үзүндә әбәди һәјаты алаҹаг инсанларын адлары миниллијин сонунда ахырынҹы имтаһандан кечәндә сијаһыда һәмишәлик галаҹаг (Вәһј 20:7, 8).

Бизим үчүн ибрәт дәрсләри:

17:3, 5, 7, 16. «Јухарыдан назил олан һикмәт» «гадынын вә ону дашыјан једди башлы вә он бујнузлу [гырмызы] ҹанаварын сиррини» баша дүшмәјә көмәк едир (Јаг. 3:17). Бу символик ҹанавар өз мөвҹудлуғуна Милләтләр Ҹәмијјәти кими башлады, сонралар исә Бирләшмиш Милләтләр Тәшкилаты кими јенидән дирчәлди. Бу сиррин ачыгланмасы бизи Аллаһын Падшаһлығы һаггында хош хәбәри сәјлә тәблиғ етмәјә вә Јеһованын һөкм ҝүнүнү бәјан етмәјә тәшвиг етмәли дејилми?

21:1-6. Биз там әмин ола биләрик ки, Падшаһлығын һакимијјәти заманы олаҹаг хејир-дуалар ҝерчәкләшәҹәк. Нәјә ҝөрә? Чүнки онлар һагда: «Тамам олду!» — дејә јазылмышдыр.

22:1, 17. ‘Һәјат сују ахан чај’ Јеһованын итаәткар инсанлары ҝүнаһ вә өлүмдән азад етмәк үчүн ҝөрдүјү тәдбирләри тәмсил едир. Бу сујун мүәјјән гисми бизим ҝүнләрдә дә әлчатандыр. Ҝәлин: ‘Һәјат сујуну мүфтә ҝөтүрүн’ чағырышына һәм өзүмүз миннәтдарлыгла һај верәк, һәм дә бу һагда башгаларына сәјлә чатдыраг.

[Һашијәләр]

[5-ҹи сәһифәдәки шәкил]

Итаәткар инсанлар Падшаһлығын һөкмранлығы заманы неҹә дә ҝөзәл хејир-дуалар алаҹаг!