Дирилмәјә олан үмид сәнин үчүн һансы мә’наны дашыјыр?
«Әлини ачырсан, бүтүн ҹанлылары дојунҹа једирирсән» (МӘЗМУР 145:16).
1-3. Бә’зиләринин ҝәләҹәјә һансы үмиди вар? Нүмунә ҝәтирин.
ДОГГУЗ јашлы Кристофер вә онун гардашы, халасы, халасынын әри вә онларын ики оғлу Манчестер шәһәринин (Инҝилтәрә) јахынлығында сәһәр вахты бирликдә евдән-евә тәблиғ едирдиләр. «Ојанын!» журналында дејилдији кими, онлар наһардан сонра јахынлыгдакы дәниз саһили курорт шәһәри олан Блекпулун диггәтәлајиг јерләрини ҝөрмәјә ҝетдиләр. Јолда, һәтта полисләри белә дәһшәтә ҝәтирән горхунҹ автомобил гәзасы баш верди. Онларын алтысы да өлән 12 нәфәрин арасында иди.
2 Бу фаҹиәдән бир ҝүн әввәл Кристоферин аиләси јығынҹағын китабөјрәнмәсиндә иштирак етмишдир. Бу ҝөрүшдә өлүмә даир суал мүзакирә едилирди. Ушағын атасы дејир: «Кристофер дәриндән дүшүнмәји севирди. Һәмин ахшам о, јени дүнја вә ҝәләҹәјә олан үмиди барәдә әминликлә данышырды. Сөһбәт әснасында о ҝөзләнилмәдән белә деди: “Јеһованын Шаһиди олмаг јахшыдыр, чүнки өлүм кәдәр ҝәтирсә дә, бир ҝүн јер үзүндә бир-биримизи јенидән ҝөрәҹәјимизи билирик”. Бу сөзләрин нә гәдәр јадда галаҹағы һәмин ҝөрүшдә иштирак едән бизләрдән һеч кәсин ағлына белә ҝәлмәзди»a.
3 Бундан чох-чох әввәл, 1940-ҹы илдә, Франс адлы австријалы Шаһид Јеһоваја олан иманындан дөнмәк истәмәдији үчүн ҝилјотиндә е’дам олунаҹағы вахты ҝөзләјирди. Берлиндәки һәбсханадан Франс анасына белә бир мәктуб јазмышды: «Әҝәр билдикләрими нәзәрә алараг [һәрби] анд ичсәјдим, өлүмә лајиг ҝүнаһ ишләтмиш олардым. Бу исә мәним үчүн јолверилмәз бир шејдир. Онда дирилмәјә үмидим олмазды. [...] Вә бу ҝүн, әзиз анам вә бүтүн баҹы-гардашларым, мәнә һөкм кәсилди. Дәһшәтә ҝәлмәјин, амма бу өлүм һөкмүдүр. Мәни сабаһ сәһәр е’дам едәҹәкләр. Исанын кечмишдәки һәгиги давамчылары кими, мән дә Аллаһдан гүввә алырам. [...] Әҝәр өләнә гәдәр садиг галсаныз, онда биз дирилмә заманы јенидән ҝөрүшәҹәјик. [...] Јенидән ҝөрүшәнәдәк»b.
4. Јухарыда данышылан һадисәләр сиздә һансы һиссләри ојадыр вә бу мәгаләдә нәји нәзәрдән кечирәҹәјик?
4 Кристофер вә Франс үчүн дирилмәјә олан үмид бөјүк әһәмијјәт кәсб едирди. Бу үмид онлар үчүн ҝерчәк иди. Бу нүмунәләр шүбһәсиз ки, бизә дәрин тә’сир бағышлајыр. Јеһоваја миннәтдарлығымызы артырмаг вә дирилмәјә олан үмидимизи мөһкәмләндирмәк үчүн, ҝәлин дирилмәнин нә үчүн баш верәҹәјини вә бунун һәр биримизә неҹә тә’сир етмәли олдуғуну нәзәрдән кечирәк.
Јер үзүндәки дирилмә илә бағлы ҝөрүнтү
5, 6. Һәвари Јәһја тәрәфиндән Вәһј 20:12, 13 ајәләриндә јазылмыш ҝөрүнтүдән нә өјрәнирик?
5 Һәвари Јәһјаја Иса Мәсиһин Миниллик һөкмранлығынын ҝөрүнтүсү верилмишди. Диҝәр һадисәләрлә јанашы Јәһја јер үзүндәки дирилмәни дә ҝөрмүшдү. О хәбәр верир: «Мән, өлүләри, кичикләри вә бөјүкләри тахтын гаршысында дуран ҝөрдүм. Дәниз, өзүндә олан өлүләри тәслим етди; өлүм вә өлүләр аләми [јун. һадес] дә өзләриндә олан өлүләри тәслим етдиләр» (Вәһј 20:12, 13). Јәһја өлүләри, «кичикләри вә бөјүкләри» хатырладыр. Бу о демәкдир ки, ҹәмијјәтдәки әввәлки мөвгеләриндән асылы олмајараг, һадесин (шеолун), бәшәријјәтин үмуми мәзарынын бүтүн әсирләри азад едиләҹәк. О заман дәниздә өләнләр дә һәјата гајыдаҹаглар. Бу мө’ҹүзәли һадисәләр Јеһованын нијјәтинин бир һиссәсидир.
6 Мәсиһин Миниллик һөкмранлығы Шејтанын зәнҹирләниб дибсиз дәринликләрә атылмасындан, јә’ни зәрәрсизләшдирилмәсиндән башланаҹаг. Шејтан, Мәсиһин һөкмранлығы заманы дириләнләрдән вә ја бөјүк мәшәггәтдән сағ чыханлардан һеч кәси аздыра билмәјәҹәк (Вәһј 20:1-3). Мин ил сәнә чох ҝөрүнә биләр, лакин Јеһова үчүн мин ил «бир ҝүн кимидир» (2 Петер 3:8).
7. Мәсиһин Миниллик һөкмранлығы заманы мәһкәмә нәјин әсасында һәјата кечириләҹәк?
7 Һәмин ҝөрүнтүјә әсасән Мәсиһин Миниллик һөкмранлығы һөкм дөврү олаҹаг. Һәвари Јәһја јазыр: «Мән, өлүләри, кичикләри вә бөјүкләри тахтын гаршысында дуран ҝөрдүм. Тумарлар ачылды вә һәјат китабы олан башга бир тумар да ачылды. Өлүләр, китабларда јазыланлара әсасән, өз әмәлләринә ҝөрә мүһакимә олунду. ...Вә һәр биринә өз әмәлләринә ҝөрә һөкм олунду» (Вәһј 20:12, 13). Диггәт јетирәк ки, мәһкәмә инсанын өләнә гәдәр етдији вә ја етмәдији ишләрин әсасында һәјата кечирилмәјәҹәк (Ромалылара 6:7). Мәһкәмә, чох еһтимал ки, ҝәләҹәкдә ачылаҹаг «тумарлар»ла бағлыдыр. Инсанын адынын «һәјат китабы»на јазылыб-јазылмајаҹағы бу тумарларла таныш олдугдан сонра едәҹәји һәрәкәтләрдән асылы олаҹаг.
‘Һәјата говушмаг’ вә ја ‘һөкмә дүчар олмаг’ үчүн дирилмә
8. Дириләнләр үчүн һансы ики имкан јаранаҹаг?
8 Бир гәдәр әввәл Јәһјанын ҝөрүнтүсүндә Иса «өлүмүн вә өлүләр аләминин (һадесин) ачарлары»на малик олан шәхс кими тәсвир едилмишдир (Вәһј 1:18). Јеһова ону «Һәјат Рәиси» тә’јин едәрәк «дириләрә вә өлүләрә һөкм» кәсмәк сәлаһијјәти вермишди (Һәвариләрин ишләри 3:15; 2 Тимотејә 4:1). Иса бу һөкмү неҹә һәјата кечирәҹәк? О, ҝөзләрини һәјата јуманлары дирилдәҹәк. Ону динләјән инсанлара Иса демишди: «Буна тәәҹҹүбләнмәјин, чүнки елә бир саат ҝәлир ки, гәбирләрдә оланларын һамысы Онун сәсини ешидәҹәкләр вә гәбирләриндән чыхаҹаглар». Сонра әлавә етмишди: «Јахшылыг едәнләр дирилиб һәјата говушаҹаглар, пислик едәнләр исә дирилиб һөкмә дүчар олаҹаглар» (Јәһја 5:28-30). Беләликлә, гәдим дөврдә јашамыш садиг киши вә гадынлары һансы ҝәләҹәк ҝөзләјир?
9. а) Һәјата гајыданларын әксәријјәти, шүбһәсиз ки, нә һагда өјрәнәҹәкләр? б) О заман һансы бөјүк маарифләндирмә иши һәјата кечириләҹәк?
9 Дирилдикдән тезликлә сонра гәдим дөврүн садиг хидмәтчиләри инандыглары вә’дләрин һәјата кечдијини ҝөрәҹәкләр. Мүгәддәс Китабын илк пејғәмбәрлијиндә, Јарадылыш 3:15 ајәсиндә хатырланан Аллаһын «гадынынын» зүрријјәтинин ким олдуғуну билмәк онлар үчүн неҹә дә мараглы олаҹаг! Вә’д едилмиш Мәсиһин, Исанын, өләнә гәдәр садиг галдығыны вә һәјатыны фидијә гурбаны кими вердијини ешитмәјә неҹә дә шад олаҹаглар! (Матта 20:28). Онлары гаршылајанлар фидијәнин Јеһованын мәрһәмәтинин вә лүтфүнүн тәзаһүрү олдуғуну баша дүшмәкдә онлара бөјүк севинҹлә көмәк едәҹәкләр. Дириләнләр Јеһованын Јер күрәсинә даир нијјәтини јеринә јетирмәк үчүн Аллаһын Падшаһлығынын нә етдијини биләндә, онларын үрәкләри, шүбһәсиз ки, Аллаһа миннәтдарлыг һисси илә долаҹаг. Онларын севән сәмави Аталарына вә Онун Оғлуна мәһәббәт вә сәдагәт ҝөстәрмәк үчүн чохлу имканлары олаҹаг. Јашајанларын һамысы, гәбирләрдән чыхан милјардларла инсанларын Аллаһын тәгдим етдији фидијәјә иман ҝәтирмәји өјрәнмәләри үчүн зәрури олан бөјүк маарифләндирмә ишиндә мәмнунијјәтлә иштирак едәҹәкләр.
10, 11. а) Мәсиһин Миниллик падшаһлығы Јер күрәсинин бүтүн сакинләри гаршысында һансы имканлары ачаҹаг? б) Бу бизә неҹә тә’сир ҝөстәрмәлидир?
10 Ибраһим дириләндә, һәсрәтлә ҝөзләдији «шәһәрин» һөкмранлығы дөврүндә һәјатын неҹә олдуғуну ҝөрмәјә чох шад олаҹаг (Ибраниләрә 11:10). Һәјат тарихчәсинин сынаглар заманы Аллаһын диҝәр хидмәтчиләрини неҹә мөһкәмләндирдијини билмәк садиг Әјјуб үчүн неҹә дә севиндириҹи олаҹаг! Бәс Даниелә илһам алараг јаздығы пејғәмбәрликләрин иҹрасы барәдә билмәк неҹә дә мараглы олаҹаг!
11 Һәгигәтән дә, салеһлијин һөкм сүрәҹәји јени дүнјада һәм дириләнләрә, һәм дә бөјүк мәшәггәтдән сағ чыханлара Јеһованын јер үзүнә вә онун сакинләринә даир нијјәтләри барәдә чох шеји өјрәнмәк лазым ҝәләҹәк. Һеч заман өлмәмәк вә әбәдијјәт боју Јеһованы иззәтләндирмәк имканы сајәсиндә, бу маарифләндирмә ишиндә иштирак етмәк әсл мәмнунлуг ҝәтирәҹәк. Лакин тумарларын мәзмуну илә таныш олдугҹа һәр биримизин неҹә давранаҹағы даһа ваҹиб олаҹаг. Өјрәндикләримизә әсасән давранаҹағыгмы? Шејтанын бизи сонунҹу дәфә һәгигәтдән узаглашдырмаг ҹәһдинә гаршы дурмаг үчүн бизә гүввә верән бу ваҹиб мә’лумата там диггәт вә ҹиддиликлә јанашаҹағыгмы?
12. Маарифләндирмә вә јери Ҹәннәтә чевирмәк ишиндә там дәрәҹәдә иштирак етмәкдә һамыја нә көмәк едәҹәк?
12 Мәсиһин фидијә гурбанлығынын ҝәтирәҹәји мө’ҹүзәли хејир-дуалары да унутмаг олмаз. Һәјата гајтарылан инсанларда буҝүнкү хәстәлик вә насазлыглардан әсәр-әламәт галмајаҹаг (Јешаја 33:24). Сағлам бәдән вә камил сағламлыг әлдә етмәк перспективи јени дүнјанын бүтүн сакинләринә дирилән милјардларла инсанлары маарифләндирмәк ишиндә иштирак етмәјә вә онлары һәјат јолуна јөнәлтмәјә имкан верәҹәк. Онлар һәм дә индијә гәдәр јер үзүндә ҝөрүлмүш ән бөјүк ишдә — бүтүн планети Ҹәннәтә чевирмәк ишиндә иштирак едәҹәкләр. Бу, Јеһоваја иззәт ҝәтирәҹәк.
13, 14. Шејтанын сонунҹу дәфә азад едилмәсинин мәгсәди нә олаҹаг вә бизләрдән һәр биримиз үчүн һансы имкан јаранаҹаг?
13 Шејтан бәшәријјәти сонунҹу дәфә сынаға чәкмәк үчүн дибсиз дәринликдән азад олунанда, инсанлары јенидән алдатмаға ҹәһд ҝөстәрәҹәк. Шејтанын пис тә’сири алтына дүшәрәк алдадылмыш «халглар»ын вә ја инсан групларынын һамысы өлүмә мәһкум едиләҹәкләр. Вәһј 20:7-9 ајәләриндә охујуруг: «Ҝөјдән... од төкүлүб, онлары мәһв етди». Мәсиһин Миниллик падшаһлығы заманы һәјата гајтарыланлар үчүн бу дирилмә һөкм үчүн дирилмә олаҹагдыр. Онлардан фәргли олараг Аллаһа садиг олаҹаг инсанлар әбәди һәјат ән’амыны алаҹаглар. Онларын дирилмәси ‘һәјата говушмаг’ үчүн дирилмә олаҹаг (Јәһја 5:29).
14 Дирилмәјә олан үмид бизә артыг индидән неҹә тәсәлли верә биләр? Ән ваҹиби исә, ҝәләҹәкдә бу дирилмә илә бағлы хејир-дуалары алмаг үчүн нә етмәлијик?
Бу ҝүн мәнимсәмәли олдуғумуз ваҹиб дәрсләр
15. Дирилмәјә олан иман сәнә артыг инди неҹә көмәк едә биләр?
15 Ола билсин, бу јахынларда гоһумларындан кими исә итирмисән вә бу ҹүр ағыр иткинин ҝәтирдији дәјишикликләрә өјрәшмәјә чалышырсан. Дирилмәјә олан үмид, һәгигәти билмәјән инсанларын малик олмадыглары гәлб раһатлығыны вә дахили гүввәни әлдә етмәјә көмәк едир. Павел Салониклиләрә тәсәлли верирди: «Ҝөзләрини һәјата јуммуш оланлар һаггында мә’луматсыз галманызы истәмирик ки, үмидсиз олан башгалары кими кәдәрләнәсиниз» (1 Салониклиләрә 4:13). Јени дүнјада дириләнләри неҹә гаршылајаҹағыны тәсәввүрүнә ҝәтирирсәнми? Әҝәр беләдирсә, доғмаларынла јенидән ҝөрүшәҹәјин һаггында дәриндән дүшүнәрәк тәсәлли тапа биләрсән.
16. Дирилмә баш верән заман, ҝүман ки, сән һансы һиссләри кечирәҹәксән?
16 Ола билсин, сән Адәмин үсјанынын диҝәр нәтиҹәләриндән, мәсәлән, һансыса хәстәликдән әзијјәт чәкирсән. Јол вермә ки, нараһатчылыглар дирилмәјә олан севинҹли үмиди — јени дүнјада сағлам вә гүввәтли ола биләҹәјинә даир үмиди үрәјиндән сыхышдырыб чыхарсын. Ҝөзләрини ачыб сәнин дирилмәнә шад олан инсанларын севинҹли үзләрини ҝөрәндә, Аллаһа Онун севҝи долу хејирхаһлығына ҝөрә мүтләг миннәтдар олаҹагсан.
17, 18. Биз һансы ики дәрси мәнимсәмәлијик?
17 Бу арада ики дәрси мәнимсәмәлијик. Биринҹиси, артыг индидән Јеһоваја сәмими гәлбдән хидмәт етмәјин ваҹиблијидир. Иса Мәсиһи тәглид едәрәк сүрдүјүмүз фәдакар һәјат тәрзи Јеһоваја вә јахынларымыза олан мәһәббәтимизин сүбутудур. Гаршыдурмаларын вә ја тә’гибләрин доланмаг үчүн бизи вәсаитдән вә азадлыгдан мәһрум едәҹәјиндән горхмуруг: гаршылашдығымыз сынаглардан асылы олмајараг, иманда мөһкәм галмаға гәти гәрарлыјыг. Дүшмәнләр бизи өлүмлә һәдәләјәндә белә, дирилмәјә олан үмид бизә тәсәлли верир, Јеһоваја вә Онун Падшаһлығына олан сәдагәтимизи горујуб сахламаг үчүн ҝүҹләндирир. Бәли, әҝәр Падшаһлығы тәблиғ етмәк вә шаҝирдләр һазырламаг ишиндә сә’јлә иштирак едириксә, бизи, Јеһованын салеһләр үчүн һазырладығы әбәди хејир-дуалар ҝөзләјир.
18 Икинҹи дәрс исә, ҝүнаһлы бәдәнимизин арзуларына неҹә мүнасибәт ҝөстәрмәјимизлә бағлыдыр. Дирилмә үмиди илә бағлы билијимиз вә Јеһованын лүтфүнә ҝөрә олан миннәтдарлығымыз иманда мөһкәм галмаг әзмимизи мөһкәмләндирир. Һәвари Јәһја хәбәрдарлыг едирди: «Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр. Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:15-17). Мадди шејләрә мејлин ҹазибәдарлығы «һәгиги һәјат»ла мүгајисәдә бизим үчүн бир о гәдәр дә ҹәлбедиҹи олмајаҹаг (1 Тимотејә 6:17-19, И–93). Һәмчинин әхлагсыз давранмаг сынағы илә гаршылашанда гәти сурәтдә мүгавимәт ҝөстәририк. Баша дүшүрүк ки, Һар-Меҝидондан габаг өлсәк, Јеһованы наразы салмаға давам едән давраныш тәрзимиз бизи дирилмәјә үмидләри олмајан кәсләрлә бир ҹәрҝәјә гоја биләр.
19. Һансы бөјүк шәрәф һаггында унутмамалыјыг?
19 Ән ваҹиби исә, Јеһованын үрәјини инди вә әбәдијјәт боју севиндирмәјин бөјүк шәрәф олдуғуну һеч заман унутмајаҹағыг (Сүлејманын мәсәлләри 27:11). Өләнә гәдәр садиг галмағымыз, јахуд бу аллаһсыз системин сонунадәк нөгсансызлығымызы горујуб сахламағымыз Јеһоваја, һөкмранлыг мәсәләсиндә кимин тәрәфини тутдуғумузу ҝөстәрәҹәк. Бөјүк мәшәггәтдән сағ чыхдыгдан вә ја мө’ҹүзәли шәкилдә дирилдилдикдән сонра јер үзүндәки Ҹәннәтдә јашамаг неҹә дә севиндириҹи олаҹагдыр!
Арзуларымыз һәјата кечәҹәк
20, 21. Дирилмә һаггындакы бә’зи суалларымыз ҹавабсыз галса да, Јеһоваја садиг галмағымыза нә көмәк едәҹәк? Изаһ един.
20 Дирилмә һаггындакы мөвзуну нәзәрдән кечирдикдән сонра јенә дә бә’зи суаллар ҹавабсыз галыр. Никаһда олараг өләнләр үчүн Јеһова нә едәҹәкдир? (Лука 20:34, 35). Инсанлар өлдүкләри јердәми дирилдиләҹәкләр? Дириләнләр әзизләринин јашадыглары јердәми һәјата гајтарылаҹаглар? Дирилмә илә бағлы ҹавабсыз галан бир чох башга суаллар да вар. Бунунла белә, Јеремјанын сөзләрини јадда сахламаг лазымдыр: «Рәбб Она ҝүвәнәнләрә, Ону ахтаран көнүлләрә хејирхаһдыр. Рәббә үмид бәсләмәк, сакитҹә бизә гуртулуш вермәсини ҝөзләмәк нә јахшыдыр» (Мәрсијәләр 3:25, 26). Вахты ҝәләндә Јеһова бүтүн суалларымыза ҹаваб верәҹәк. Биз буна нәјә ҝөрә әмин ола биләрик?
21 Мәзмурчунун Јеһова һаггында дедији илһамланмыш сөзләрин үзәриндә дүшүнәк: «Әлини ачырсан, бүтүн ҹанлылары дојунҹа [«диләјинә ҝөрә» КМ] једирирсән» (Мәзмур 145:16). Јаша долдугҹа арзуларымыз да дәјишир. Ушаг оларкән истәдијимиз шејләри бу ҝүн истәмирик. Нөгтеји-нәзәрләримизә бизимлә баш верәнләр вә үмид бағладығымыз шејләр тә’сир ҝөстәрир. Бунунла белә, арзуларымызын неҹә олаҹағындан асылы олмајараг, Јеһова Онун ирадәсинә мүвафиг олан истәкләримизи јени дүнјада мүтләг тә’мин едәҹәк.
22. Јеһованы иззәтләндирмәк үчүн һансы әсаслы сәбәбимиз вар?
22 Инди һәр биримиз үчүн ваҹиб олан шеј Аллаһа садиг галмагдыр. «Тәсәррүфатчылардан исә тәләб олунур ки, һәр бири садиг олсун» (1 Коринфлиләрә 4:2). Биз Аллаһын Падшаһлығы һаггындакы шәрәфли хош хәбәрин ‘тәсәррүфатчыларыјыг’. Бу хәбәрин бүтүн инсанлара тәблиғ олунмасында сә’ј ҝөстәрмәјимиз һәјат јолунда галмағымыза көмәк едир. Һеч вахт унутма ки, һамы үчүн «заман вә фүрсәт» вардыр (Ваиз 9:11). Бу һәјатын гејри-мүәјјәнликләри илә бағлы лазымсыз нараһатчылыглара гапылмамаг үчүн, дирилмәјә олан иззәтли үмиддән мөһкәм јапыш. Әҝәр јаранмыш сәбәбләр уҹбатындан Мәсиһин Миниллик һөкмранлығы башламаздан әввәл өлмәк еһтималы варса, ҝәләҹәкдә раһатлыг тапаҹағына әмин олараг тәсәлли әлдә едә биләрсән. Јеһованын мүәјјән етдији бир вахтда Әјјубун Јарадана үнванландырдығы сөзләри тәкрар едә биләҹәксән: «Сән чағыранда ҹаваб верәҹәјәм» (Әјјуб 14:15). Биз, јаддашында оланларын һамысыны һәјата гајтармағын һәсрәтиндә олан Јеһоваја иззәт веририк!
[Һашијәләр]
a Јеһованын Шаһидләри тәрәфиндән дәрҹ едилән «Ојанын!» журналынын 1990-ҹы ил 8 август сајынын 20-ҹи сәһифәсинә бахын (рус.).
b «Јеһованын Шаһидләри — Аллаһын Падшаһлығынын мүждәчиләри» китабы, сәһифә 662 (рус.). Јеһованын Шаһидләри тәрәфиндән чап олунуб.
Хатырлајырсынызмы?
• Мәсиһин Миниллик падшаһлығы заманы һөкм нәјин әсасында һәјата кечириләҹәк?
• Нәјә ҝөрә бә’зиләринин дирилмәси ‘һәјата говушмаг’, диҝәрләрининки исә ‘һөкмә дүчар олмаг’ үчүн дирилмә олаҹаг?
• Дирилмәјә олан иман бизә индидән неҹә тәсәлли верир?
• Мәзмур 145:16 ајәсиндәки сөзләр дирилмәјә даир һәлә ки ҹавабсыз галан суаллара дүзҝүн јанашмағымыза неҹә көмәк едир?
[32-ҹи сәһифәдәки шәкилләр]
Дирилмәјә олан иман бизә инди неҹә көмәк едир?