Руһун дедијини динләјин!
“Гулағы олан Руһун ҹәмијјәтләрә нә дедијини ешитсин” (ВӘҺЈ 3:22).
1, 2. Иса, “Вәһј” китабында хатырланан једди јығынҹаға үнванладығы мәктубларында һансы мәсләһәти тәкрарлајыр?
ЈЕҺОВАНЫН хидмәтчиләри, “Вәһј” китабында Иса Мәсиһин мүгәддәс руһун рәһбәрлији алтында једди јығынҹаға дедији сөзләринә диггәт јетирмәлидирләр. Мәсиһин једди мәктубунун һәр бириндә белә бир мәсләһәт вар: “Гулағы олан, Руһун ҹәмијјәтләрә нә дедијини ешитсин” (Вәһј 2:7, 11, 17, 29; 3:6, 13, 22).
2 Биз артыг Исанын Ефесдәки, Измирдәки вә Пергамадакы мәләкләрә, јә’ни нәзарәтчиләрә олан мәктубларыны нәзәрдән кечирдик. Бәс биз Исанын мүгәддәс руһ васитәсилә галан дөрд јығынҹаға дедикләриндән нә өјрәнә биләрик?
Тиатирадакы мәләјә
3. Тиатира һарада јерләширди вә шәһәр һансы мал илә хүсусилә шөһрәт газанмышды?
3 ‘Аллаһын Оғлу’ Тиатирадакы јығынҹағы һәм тә’рифләјир, һәм дә мәзәммәт едир. (Вәһј 2:18-29 ајәләрини охујун.) Тиатира (индики Акһисар) Кичик Асијанын гәрбиндә Ҝедиз (гәдимдә Һерм) чајынын јахынлығында јерләширди. Шәһәр чохсајлы пешәләрлә шөһрәт газанмышды. Орада бојаготунун көкүндән мәшһур ал-гырмызы боја һазырлајырдылар. Јадымыза салсаг, Филипидә (Јунаныстан) оларкән мәсиһчилији гәбул едән Лидија да “Тиатира шәһәриндән түнд гырмызы палтар сатыҹысы” (И–93) иди (Һәвариләрин ишләри 16:12-15).
4. Тиатирадакы јығынҹаг һансы әмәлләринә ҝөрә тә’рифә лајиг олду?
4 Иса Тиатирадакы јығынҹағы јахшы әмәлләринә, мәһәббәтинә, иманына, тәһәммүлүнә вә хидмәтдәки әмәјинә ҝөрә тә’риф етди. Үстәлик, онларын “сон ишләри” “биринҹиләрдән” чох иди. Лакин биз дә јахшы әмәлләримизлә танынмыш олсаг белә, әхлаг нормаларына ҝәлдикдә һеч вахт диггәти әлдән вермәли дејилик.
5-7. а) “Изебел адлы гадын” ким иди вә онун ҝөстәрдији тә’сирлә бағлы һансы тәдбири ҝөрмәк лазым иди? б) Мәсиһин Тиатира јығынҹағына олан мәктубу Аллаһдан горхан гадынлары нәјә тәшвиг едир?
5 Анҹаг Тиатирадакы јығынҹагда бүтпәрәстлијә, јалан тә’лимләрә вә ҹинси әхлагсызлыға јол верилирди. Онлар араларында “Ијзевел [Изебел] адлы гадына” — еһтимал ки, өзләрини Исраилин он гәбиләли падшаһлығынын залым шаһзадәси Изебел кими апаран бир груп гадына тәһәммүл едирдиләр. Мүгәддәс Китаб үзрә бә’зи алимләр еһтимал едирләр ки, Тиатирадакы ‘пејғәмбәр гадынлар’ мәсиһчиләри илаһи вә илаһәләрә ибадәт етмәјә, һәмчинин бүтләрә ҝәтирилән гурбанларын јејилдији бајрамларда иштирак етмәјә тәһрик едирдиләр. Гој өзүнү пејғәмбәр адландыран һеч бир гадын мүасир мәсиһчи јығынҹағында кими исә әлә алаҹағыны дүшүнмәсин!
6 Мәсиһ ‘[Изебел адлы гадыны] әзаб долу бир јатаға јыхмаға, онунла зина едәнләрә дә, әҝәр өз әмәлләриндән төвбә етмәсәләр, бөјүк әзаб вермәјә’ һазыр иди. Нәзарәтчиләр әдәбсиз тә’лим вә тә’сирләрә гәтијјән ҝүзәштә ҝетмәли дејилләр вә “шејтанын дәринликләринин” тамамилә пис олдуғуна әмин олмаг үчүн, мәсиһчиләрин руһани вә ја физики зина етмәләри, јахуд бүтпәрәстлијә гапылмаларына еһтијаҹ јохдур. Әҝәр Исанын хәбәрдарлығына диггәт јетирсәк, ‘биздә олана мөһкәм бағлы галаҹаг’ вә ҝүнаһ бизә үстүн ҝәлмәјәҹәкдир. Мәсһ едилмишләр пис әмәлләри, һәвәсләри вә мејлләри рәдд етдикләри үчүн сәмави һәјата дирилдилиб “халглар үзәриндә һакимијјәт”алаҹаг вә Мәсиһ халглары парчалајанда она гошулаҹаглар. Мүасир јығынҹагларда символик улдузлар вар, мәсһ едилмишләрә исә дирилдикдән сонра “парлаг дан улдузу” олан адахлы, јә’ни Иса Мәсиһ вериләҹәкдир (Вәһј 22:16).
7 Тиатирадакы јығынҹаға хәбәрдарлыг едилмишдир ки, дөнүк чыхан гадынларын пис тә’сиринә јол вермәсинләр. Мәсиһин јығынҹаға ҝөндәрдији мүгәддәс руһдан илһам алмыш һәмин мәктубу, бу ҝүн Аллаһдан горхан гадынлара Аллаһын онлара вердији мөвгеји горумаға көмәк едир. Онлар кишиләрин үзәриндә һөкмранлыг етмәјә ҹан атмыр вә гардашлары нә руһани, нә дә физики зинаја тәһрик едирләр (1 Тимотејә 2:12). Бунун әвәзинә, онлар јахшы әмәлләри вә Аллаһа иззәт ҝәтирән хидмәтләри илә нүмунә ҝөстәрирләр (Мәзмур 68:11; 1 Петер 3:1-6). Әҝәр јығынҹаг малик олдуғу тәмиз тә’лими вә давраныш тәрзини, һәмчинин Падшаһлыг наминә етдији гијмәтли хидмәти горујурса, онда Мәсиһ өлүм һөкмү илә дејил, хејир-дуалы мүкафатла ҝәләҹәкдир.
Сардисдәки мәләјә
8. а) Сардис һарада јерләширди вә онун һаггында бизә һансы тәфсилатлар мә’лумдур? б) Нәјә ҝөрә Сардисдәки јығынҹағын көмәјә еһтијаҹы варды?
8 Руһани ҹәһәтдән өлү олдуғу үчүн, Сардисдәки јығынҹаға тә’ҹили јардым лазым иди. (Вәһј 3:1-6 ајәләрини охујун.) Тиатирадан тәхминән 50 километр ҹәнубда јерләшән Сардис чичәкләнән шәһәр иди. Шәһәр тиҹарәтин, мәһсулдар торпағын, јун парча вә халчаларын истеһсалы сајәсиндә варланмышды; онун әһалисинин сајы вахтилә 50 минә чатырды. Тарихчи Иосиф Флави јазмышдыр ки, ерамыздан әввәл Ы әсрдә Сардисдә бөјүк јәһуди иҹмасы варды. Шәһәрин харабалыглары ичәрисиндә синагог вә Ефес илаһәси Артемиданын мә’бәди тапылмышды.
9. Әҝәр Аллаһа хидмәти башдансовма јеринә јетиририксә нә етмәлијик?
9 Мәсиһ Сардисдәки јығынҹағын мәләјинә деди: “Сәнин әмәлләриндән хәбәрдарам. Адын вардыр, ҝуја сағсан, амма әслиндә өлүсән”. Әҝәр биз руһани ҹәһәтдән ајыг мәсиһчиләр кими танынырыгса, лакин мәсиһчи мәс’улијјәтләринә е’тинасызлыг ҝөстәрир, хидмәти башдансовма јеринә јетирир вә руһани ҹәһәтдән ‘өлүмә јахыныгса’, онда неҹә? Белә һалда биз Падшаһлыг һаггындакы хәбәрә аид ‘нә алдығымызы вә нә ешитдијимизи јадда сахламалы’ вә јени гүввә илә мүгәддәс хидмәти тәзәдән ҹанландырмалыјыг. Биз, әлбәттә ки, мәсиһчи ҝөрүшләриндә бүтүн үрәкдән иштирак етмәјә башламалыјыг (Ибраниләрә 10:24, 25). Мәсиһ Сардисдәки јығынҹаға хәбәрдарлыг етди: “Јох әҝәр ојаг галмасан, Мән үстүнә бир оғру кими ҝәләҹәјәм вә һансы саатда сәнин үстүнә ҝәләҹәјими билмәјәҹәксән”. Бәс бизим ҝүнләримиз һаггында нә демәк олар? Тезликлә һәр биримиз һесабат вермәли олаҹағыг.
10. Сардисдәки вәзијјәт инди дә баш верәрсә, бә’зи мәсиһчиләр һаггында нә демәк олар?
10 Сардисдәки вәзијјәтә бәнзәр вәзијјәт јаранса белә, јенә дә јығынҹагда ‘өз палтарларыны мурдар етмәјән, лајиг олдуглары үчүн [Мәсиһлә] ағ палтарда јеријә биләҹәк’ кәсләр вар. Онлар өзләрини дүнјадан һәм әхлаги, һәм дә дини ҹәһәтдән тәмиз вә ләкәсиз сахламагла, мәсиһчи олдугларыны әмәлләриндә ҝөстәрирләр (Јагуб 1:27). Буна ҝөрә дә, Иса ‘онларын адыны һәјат китабындан әсла силмәјәҹәк. Онларын адыны... өз Атасынын... вә Онун мәләкләринин өнүндә играр едәҹәкдир’. Ҝәлин синфини тәшкил едиб Мәсиһлә бәрабәр јеримәјә лајиг ҝөрүлән мәсһ едилмишләр, мүгәддәсләрин салеһ давранышларыны тәмсил едән тәмиз, парлаг, зәриф кәтан ҝејәҹәкләр (Вәһј 19:8). Ҝөјләрдә алаҹаглары ҝөзәл мүкафатлары, онлары бу дүнјаја галиб ҝәлмәјә тәшвиг едир. Јер үзүндә әбәди һәјаты ҝөзләјәнләр үчүн дә хејир-дуалар вар. Онларын да адлары һәјат китабына јазылмышдыр.
11. Әҝәр руһән мүрҝүләјириксә, бизә нә етмәк лазымдыр?
11 Һеч биримиз Сардис јығынҹағында олдуғу кими, руһани ҹәһәтдән аҹынаҹаглы вәзијјәтә дүшмәк истәмирик. Бәс әҝәр руһән мүрҝүләдијимизи һисс едириксә, неҹә? Өз јахшылығымыз хатиринә дәрһал бир тәдбир ҝөрмәлијик. Тутаг ки, биз дүнјәви әмәлләрә мејл ҝөстәрир, јығынҹаг ҝөрүшләриндә вә ја хидмәтдә ҝет-ҝедә даһа аз иштирак едирик. Бу заман Јеһоваја сидги-үрәкдән дуа едиб, Ондан көмәк диләмәк лазымдыр (Филипилиләрә 4:6, 7, 13). Мүгәддәс Китабы ҝүндәлик охумаг, һәмчинин ону “садиг... нөкәрбашы”нын тәгдим етдији нәшрләрлә бәрабәр өјрәнмәк бизим руһани ојаглығымыза көмәк едәҹәкдир (Лука 12:42-44). О заман биз Сардис јығынҹағындакы мәсиһчиләр кими Мәсиһин тә’рифинә лајиг ҝөрүләҹәк, һәмиманлыларымыз үчүн исә хејир-дуа олаҹағыг.
Филаделфијадакы мәләјә
12. Гәдим Филаделфијадакы дини вәзијјәти неҹә тәсвир едәрдиниз?
12 Иса Филаделфијадакы јығынҹағы тә’рифләди. (Вәһј 3:7-13 ајәләрини охујун.) Филаделфија (индики Алашеһир) чичәкләнән шәһәр вә Кичик Асијанын гәрбиндә јерләшән шәрабчылыг рајонунун мәркәзи иди. Шәһәрин баш илаһиси шәраб аллаһы Дионис иди. Ҝөрүнүр Филаделфијада јашајан јәһудиләр мүвәффәгијјәтсиз дә олса чалышырдылар ки, јәһудиләрдән олан мәсиһчиләри Мусанын тәләбләриндән бә’зиләринә риајәт етмәјә вә ја онлара јенидән гајытмаға әмин етсинләр.
13. Мәсиһ “Давудун ачары”ндан неҹә истифадә етмишдир?
13 Мәсиһ “Давудун ачарларына малик”дир, јә’ни Падшаһлығын мараглары илә бағлы олан һәр шеј она е’тибар едилиб вә о, өзүнүн бүтүн бу јер маликанәсинә рәһбәрлик едир (Ишаја 22:22; Лука 1:32). Иса бу ачардан истифадә едәрәк, гәдим Филаделфијада вә башга јерләрдә јашајан мәсиһчиләр үчүн Падшаһлыгла бағлы имканлар ачырды. О, 1919-ҹу илдә “садиг... нөкәрбашы” үчүн “ҝениш гапы”, онунла бәрабәр исә Падшаһлыг һаггындакы тәблиғә имкан ачды вә бу гапыны дүшмәнләрдән һеч ким бағлаја билмир (1 Коринфлиләрә 16:9; Колослулара 4:2-4). Әлбәттә ки, ‘шејтан јығнағынын’ үзвләри үчүн “гапы”, онунла бәрабәр исә Падшаһлыг һаггындакы имканлара јол бағлыдыр, чүнки онлар руһани исраиллиләрин сајына дахил дејилләр.
14. а) Иса Филаделфијадакы јығынҹаға һансы вә’ди верди? б) “Имтаһан саатында” олаҹаг һүҹумдан неҹә гачына биләрик?
14 Иса гәдим Филаделфијадакы мәсиһчиләрә белә бир вә’д верди: “Мадам ки, тәһәммүл етмәк һаггындакы әмримә риајәт етдин, Мән дә сәни... бүтүн дүнја үстүнә ҝәләҹәк имтаһан саатындан горујаҹағам”. Тәблиғ етмәк үчүн Исанын тәһәммүлү кими тәһәммүл тәләб олунур. Иса һеч заман дүшмәнләринә тәслим олмурду вә һәмишә Атасынын ирадәсини јеринә јетирирди. Бунун үчүн, Мәсиһ ҝөјләрдә өлмәз һәјата дирилдилди. Әҝәр биз Јеһоваја хидмәт етмәк гәрарында мөһкәм дурур вә хош хәбәри тәблиғ едәрәк Онун Падшаһлығынын тәрәфини тутуругса, биз индики сынаг дөврүндән, јә’ни “имтаһан саатындан” мүдафиә олунаҹағыг. Сәмави Падшаһлығын мараглары үчүн чалышараг, Мәсиһдән алдығымыз шејләрә ‘мөһкәм сарылаҹағыг’. Ҝөстәрдикләри сә’јләрә ҝөрә мәсһ едилмишләрә чох гијмәтли сәмави таҹ, онларын сәдагәтли һәмкарларына исә јер үзүндә әбәди һәјат вериләҹәкдир.
15. ‘Аллаһын мә’бәдиндә дирәк’ олаҹаг кәсләрдән нә тәләб олунур?
15 Мәсиһ давам едир: “Галиб ҝәләни Аллаһымын мә’бәдиндә дирәк едәҹәјәм... Онун үзәриндә Аллаһымын адыны, Аллаһымын шәһәринин, ҝөјдән, Аллаһымын јанындан енән јени Јерусәлимин адыны вә Мәним јени адымы јазаҹағам”. Мәсһ едилмиш нәзарәтчиләр һәгиги ибадәтә там бағлы галмалыдырлар. Онлар Аллаһын Падшаһлығы һаггындакы тәблиғдә иштирак едәрәк вә руһани тәмизликләрини горујараг, “јени Јерусәлимин” үзвләри олмаға лајиг олдуглары мөвгеји горумалыдырлар. Әҝәр онлар Аллаһын шәрәфли сәмави мә’бәдинин дирәкләри олмаг, һәмчинин Аллаһын шәһәринин сәмави вәтәндашлары олараг о шәһәрин адыны вә Мәсиһин ҝәлини олараг онун адыны дашымаг истәјирләрсә, бу зәруридир. Вә әлбәттә ки, онларын ‘руһун ҹәмијјәтләрә нә дедијини ешитмәк’ үчүн гулаглары олмалыдыр.
Лаодикијадакы мәләјә
16. Лаодикија һаггында нә мә’лумдур?
16 Мәсиһ Лаодикијадакы өзүндән разы јығынҹағы мәзәммәт етди. (Вәһј 3:14-22 ајәләрини охујун.) Лаодикија чох варлы истеһсалат шәһәри вә малијјә мәркәзи иди. Шәһәр Лик чајынын мәһсулдар вадисиндә Ефесдән тәхминән 150 км шәргдә, әсас тиҹарәт јолларынын кәсишдији јердә јерләширди. Шәһәр палтар һазырланан гара јунла шөһрәт газанмышды. Лаодикијада танынмыш тибб мәктәби јерләширди вә еһтимал ки, бурада ҝөз хәстәликләринин мүалиҹәси үчүн “фриҝија тозу” кими танынан дәрман һазырланырды. Шәфа танрысы Асклепија шәһәрин әсас илаһиләриндән бири иди. Ҝөрүнүр, Лаодикијада чохлу јәһудиләр јашајырды вә онларын бә’зиләри олдугҹа зәнҝин идиләр.
17. Лаодикијалылар нәјә ҝөрә мәзәммәт алдылар?
17 Иса Лаодикијадакы јығынҹаға “мәләк” васитәсилә мүраҹиәт едәрәк, “садиг вә һәгиги Шаһид, Аллаһын хилгәтинин Баниси” кими һөкмлә данышырды (Колослулара 1:13-16). Лаодикијалылар руһани ҹәһәтдән “нә сојуг, нә дә исти” идиләр, елә буна ҝөрә дә мәзәммәт алмышдылар. Илыг олдуглары үчүн, Мәсиһ онлары ағзындан гусмаға һазыр иди. Бурада Исанын нә демәк истәдијини анламаг онлар үчүн чәтинлик јаратмалы дејилди. Јахын Ијераполисдә гајнар исти су гајнаглары, Колосда исә сојуг су гајнаглары варды. Лакин Лаодикијаја ҝәлән су, бору илә бөјүк мәсафәни гәт етдији үчүн, еһтимал ки, илыг олурду. Сулар јолун бир һиссәсини су кәмәриндән, Лаодикијаја аз галмыш исә ојулмуш бөјүк дашларын ичиндән кечирди.
18, 19. Лаодикијалылара бәнзәјән мүасир мәсиһчиләрә неҹә көмәк етмәк олар?
18 Бизим ҝүнләрдә инсанлар лаодикијалылар кими сојугда иситмәјән, истидә исә сәринләтмәјән ичкини хатырладырлар. Онлар илыг су кими гусулаҹаглар! Иса онлары “Мәсиһин [мәсһ едилмиш] сәфирләри”, јә’ни өз нүмајәндәси кими истифадә етмәк истәмир (2 Коринфлиләрә 5:20). Әҝәр онлар төвбә етмәсәләр, Падшаһлығын тәблиғчиләри олмаг шәрәфиндән мәһрум олунаҹаглар. Лаодикијалылар бу дүнјанын вар-дөвләтини топламаға чалышырдылар вә “заваллы, јазыг, јохсул, кор вә чылпаг” олдугларындан хәбәрсиз идиләр. Бу ҝүн лаодикијалылары хатырладан кәсләрә руһани јохсуллуг, корлуг вә чылпаглыгдан азад олмаг үчүн, Мәсиһдән “тәмизләнмиш гызыл” кими сынагдан чыхмыш иманы, “ағ палтар” кими олан салеһлији вә руһани ҝөзләри јахшылашдыран “ҝөз дәрманы” алмаг лазымдыр. Мәсиһчи нәзарәтчиләри онларын “иманда зәнҝин” олмалары үчүн, руһани тәләбатларыны анламагда көмәк етмәјә шаддырлар (Јагуб 2:5; Матта 5:3). Бундан башга, нәзарәтчиләр онлара руһани “ҝөз дәрманы”ны истифадә етмәјә, јә’ни Исанын тә’лим вә нәсиһәтини гәбул етмәјә, онун нүмунәсини вә дүшүнҹә тәрзини мәнимсәмәјә, һәмчинин она мүвафиг давранмаға көмәк етмәлидирләр. Бу дәрман онлара “ҹисмани еһтирас, ҝөзләрин еһтирасы вә һәјатын тәкәббүрү”нә гаршы мүбаризә апармаға көмәк едәҹәк (1 Јәһја 2:15-17).
19 Иса әзиз сандығы һәр кәси мәзәммәт вә тәрбијә едир. Она табе олан нәзарәтчиләр дә шәфгәт ҝөстәрәрәк ејнилә давранмалыдырлар (Һәвариләрин ишләри 20:28, 29). Лаодикијалылар өз дүшүнҹә вә давраныш тәрзләрини дүзәлдиб, ‘сә’јли олмалы вә төвбә етмәли’ идиләр. Әҝәр бизләрдән кимсә Аллаһа мүгәддәс хидмәти икинҹи јерә гојан һәјат тәрзинә вәрдиш едирсә, онда неҹә? Онда ҝәлин Исадан “ҝөз дәрманы” алаг ки, әввәлҹә Падшаһлығы ахтармағын нә гәдәр ваҹиб олдуғуну ҝөрә биләк (Матта 6:33).
20, 21. Бу ҝүн Исанын ‘гапыны дөјмәсинә’ кимләр лазыми дәрәҹәдә һај верир вә ҝәләҹәкдә онлары нәләр ҝөзләјир?
20 Мәсиһ дејир: “Будур, Мән гапы гаршысында дуруб, ону дөјүрәм: ким сәсими ешидиб, гапыны ачарса, Мән онун јанына ҝирәҹәјәм вә Мән онунла, о да Мәнимлә ахшам јемәјини јејәҹәјик”. Иса јемәк вахты чох вахт руһани тә’лимләрлә бөлүшәрди (Лука 5:29-39; 7:36-50; 14:1-24). Вә будур, Иса, лаодикијалыларын јығынҹағына бәнзәјән јығынҹагларын гапысыны дөјүр. Јығынҹагларын үзвләри гапыны ачараг, она олан севҝиләрини јенидән ҹанландырыб, ону гәбул едиб, онлара тә’лим вермәсинә изн верәҹәкләрми? Әҝәр белә едәрләрсә, Мәсиһ онларла ахшам јемәји јејәҹәк, онлар исә руһән зәнҝинләшәҹәкләр.
21 Бу ҝүн “башга гојунлар”, мәҹази мә’нада десәк, Исаны јанларына бурахырлар вә бу давранышлары онлара әбәди һәјат ҝәтирәҹәкдир (Јәһја 10:16; Матта 25:34-40, 46). Мәсиһ галиб ҝәлән һәр мәсһ едилмишә дејир: “Мән галиб ҝәлиб, Атамла бәрабәр Онун тахтында неҹә отурдумса, галиб ҝәләнә дә иҹазә верәҹәјәм ки, Өз тахтымда Мәнимлә еләҹә отурсун”. Бәли, Иса галиб ҝәлән мәсһ едилмишләрә ҝөјдә Атасынын сағында онунла бирликдә тахтда отурмағы вә’д едир. Галиб ҝәлән башга гојунлар исә сәмави Падшаһлығын рәһбәрлији алтында олаҹаг ҝөзәл һәјаты ҝөзләјирләр.
Һәр биримиз үчүн ибрәт дәрси
22, 23. а) Исанын једди јығынҹаға дедији сөзләрдән бүтүн мәсиһчиләр неҹә јарарлана
22 Сөзсүз ки, Исанын Кичик Асијадакы једди јығынҹаға дедикләри бүтүн мәсиһчиләрә бөјүк фајда ҝәтирә биләр. Мәсәлән, јери ҝәләндә Мәсиһин јығынҹағы тә’риф етдијини ҝөрән гајғыкеш мәсиһчи нәзарәтчиләри, руһани ҹәһәтдән мүвәффәгијјәтләр әлдә едән һәм јығынҹағы, һәм дә ајры-ајры гардаш-баҹылары тә’рифләмәјә тәшвиг дујурлар. Әҝәр зәифликләр ортаја чыхырса, онда ағсаггаллар гардашлара Мүгәддәс Китаб “дәрманларыны” гәбул етмәјә көмәк едирләр. Һәр биримиз Исанын једди јығынҹаға вердији нәсиһәтләриндән һәмишә фајда әлдә едә биләрик, анҹаг бу шәртлә ки, ҝәрәк биз онлары дуа илә вә вахт итирмәдән гәбул едәкa.
23 Јашадығымыз бу сон ҝүнләрдә Аллаһа хидмәти сәтһи едә биләҹәк архајынчылығын, вар-дөвләт јығмағын вә јахуд башга бир иши ҝөрмәјин вахты дејил. Гој бүтүн јығынҹаглар, Исанын нәзарәти алтында олан чырагданлар кими парласынлар. Биз исә садиг мәсиһчиләр кими, Мәсиһ данышанда диггәтли олмаға вә руһун нә дедијинә гулаг асмаға там гәрарлы олаг. О заман Јеһованын шәрәфинә руһани ишыгла шәфәг сачараг әбәди хошбәхтлик газанаҹағыг.
[Һашијә]
a Вәһј 2:1–3:22 ајәләри, Јеһованын Шаһидләри тәрәфиндән нәшр едилмиш “Вәһј. Мөһтәшәм зирвәси јахындыр!” (түрк.) китабынын 7-13 фәсилләриндә дә мүзакирә олунур.
Сиз неҹә ҹаваб верәрдиниз?
• “Изебел адлы гадын” ким иди вә нәјә ҝөрә Аллаһдан горхан гадынлар онун нүмунәсини изләмирләр?
• Сардисдәки јығынҹаг һансы вәзијјәтдә иди вә биз нә етмәлијик ки, орада јашамыш бир чох мәсиһчиләрә бәнзәмәјәк?
• Иса Филаделфијадакы јығынҹаға һансы вә’ди верди вә онлар бу ҝүн неҹә тәтбиг едилә биләндир?
• Лаодикијалылар нәјә ҝөрә мәзәммәт олундулар вә сә’ј ҝөстәрән мәсиһчиләри нә ҝөзләјир?
биләрләр? б) Биз нәдә гәтијјәтли олмалыјыг?
[14-ҹү сәһифәдәки шәкил]
“Изебел адлы гадынын” пис јолларындан гачынмаг ҝәрәкдир.
[16-ҹы сәһифәдәки шәкилләр]
Иса давамчыларынын гаршысында сәмави Падшаһлыгла бағлы имканлара јол верән “ҝениш гапы” ачды.
[18-ҹи сәһифәдәки шәкил]
Исаны гәбул едиб, ону динләјәҹәксәнми?