Сонунҹу гәләбәјә доғру ирәлиләјирик!
“Бахыб ҝөрдүм ки, бир ағ ат дуруб, белиндәки атлынын да әлиндә јај вар. Она бир таҹ верилди вә о, фатеһ кими јола чыхды ки, фәтһ етсин” (ВӘҺЈ 6:2).
1. Јәһја, ҝәләҹәкдә баш верәҹәк һансы һадисәләри рө’јада ҝөрдү?
АЛЛАҺЫН мүгәддәс руһунун көмәји илә һәвари Јәһја 1 800 ил габаға нәзәр салды вә Мәсиһин Падшаһ кими тахта отурмасыны тәсвир етди. Јәһјаја, рө’јада ҝөрдүјү һадисәләрин һәгигәтән дә һәјата кечәҹәјинә инанмаг лазым иди. Бу ҝүн исә бизим ашкар сүбутларымыз вар ки, Мәсиһин тахта отурмасы һаггында габагҹадан сөјләнилән пејғәмбәрлик 1914-ҹү илдә баш вермишдир. Биз иманын ҝөзләри илә Иса Мәсиһин фәтһ етмәк үчүн “фатеһ кими јола чыхды”ғыны ҝөрүрүк.
2. Иблис Падшаһлығын јаранмасына неҹә мүнасибәт ҝөстәрди вә бу нәји сүбут едир?
2 Падшаһлыг јарандыгдан сонра ҝөјдән говулдуғуна Шејтан даһа да һиддәтләнди, анҹаг онун галиб ҝәлмәк шансы гәтијјән артмады (Вәһј 12:7—12). Онун гәзәби нәтиҹәсиндә дүнјадакы шәраит ҝет-ҝедә писләшир. Инсан ҹәмијјәти дағылмаг үзрәдир. Бүтүн бунлар Јегованын Шаһидләри үчүн ашкар сүбутдур ки, онларын Падшаһы “фәтһ етмәк” үчүн ирәлиләјир.
Јени дүнја ҹәмијјәтинин тәмәли гојулур
3, 4. а) Падшаһлығын јарандығы вахтдан е’тибарән мәсиһчи јығынҹағында һансы тәшкилати дәјишикликләр едилди вә бунлар нәјә ҝөрә ваҹиб иди? б) Ишајанын габагҹадан хәбәр вердији кими, бу дәјишикликләр һансы фајданы ҝәтирди?
3 Падшаһлыг јарандыгдан сонра, бәрпа едилән вә Падшаһлыгла әлагәдар инди даһа чох вәзифәләр иҹра етмәли олан мәсиһчи јығынҹағыны, биринҹи әсрин мәсиһчи јығынҹағы илә мүвафигләшдирмәк вахты ҝәлиб чатмышды. Мәсәлән, “Ҝөзәтчи Гүлләси”нин 1938-ҹи ил 1 вә 15 ијун (инҝ.) нөмрәсиндә мәсиһчи тәшкилатынын неҹә фәалијјәт ҝөстәрмәли олдуғу барәдә суал арашдырылырды. Даһа сонра, 1971-ҹи илин 15 декабр нөмрәсиндә, “Рәһбәрлик шурасы һүгуги шәхсдирми?” адлы мәгаләдә, Рәһбәрлик шурасынын дашыдығы вәзифә ајдын шәкилдә мүәјјән едилирди. 1972-ҹи илдә јерли јығынҹаглара көмәк вә рәһбәрлик етмәк үчүн ағсаггаллар шурасы тә’јин едилди.
4 Рәһбәрлијин јенидән дүзҝүн тәрздә һәјата кечирилмәси мәсиһчи јығынҹағыны олдугҹа мөһкәмләндирди. Буна, Рәһбәрлик шурасы тәрәфиндән гәбул едилмиш, һүгуги мәсәләләри дә дахил етмәклә вәзифәләрини јеринә јетирмәк үчүн ағсаггалларын өјрәдилмәсинә јөнәлдилән тәдбирләр дә көмәк етди. Аллаһын јер үзүндәки тәшкилатында тәдриҹән баш верән дәјишикликләр вә онларын мүсбәт нәтиҹәләри һаггында Ишаја 60:17 ајәсиндә габагҹадан хәбәр верилмишди: “Тунҹ јеринә гызыл ҝәтирәҹәјәм вә дәмир јеринә ҝүмүш вә ағаҹ јеринә тунҹ вә даш јеринә дәмир ҝәтирәҹәјәм. Вә мә’мурларыны сүлһ едәҹәјәм, нәзарәтчиләрини дә әдаләт”. Јахшылыға доғру едилән бу дәјишикликләр Аллаһын хејир-дуасыны әкс етдирир вә Аллаһын, Онун Падшаһлығына сә’јлә тәрәфдар оланлары бәјәндијини сүбут едирди.
5. а) Јегованын өз халгына хејир-дуа вермәсинә Шејтан неҹә мүнасибәт ҝөстәрди? б) Филипилиләрә 1:7 ајәсинә әсасән Јегованын Шаһидләри Шејтанын гәзәбинә неҹә мүнасибәт ҝөстәрирләр?
5 Падшаһлығын јарандығы вахтдан башлајараг Аллаһын өз халгына ҝөстәрдији гајғы вә рәһбәрлик, Шејтанын нәзәриндән гачмады. Мәсәлән, сајҹа аз олан бу мәсиһчиләр 1931-ҹи илдә ачыг сурәтдә бәјан етдиләр ки, онлар јалныз Мүгәддәс Китабын Тәдгигатчылары јох, Ишаја 43:10 ајәсинә әсасән Јегованын Шаһидләридирләр. Бунун тәсадүф олуб олмадығы мә’лум дејил, анҹаг бунларын ардынҹа Иблис бүтүн дүнјада ҝөрүлмәмиш дәрәҹәдә тә’гибләр јаратды. Һәтта дин азадлығына јол верән Бирләшмиш Штатлар, Канада вә Алманија кими өлкәләрдә белә Шаһидләр дәфәләрлә мәһкәмәләрә ҹәлб едилмиш вә өз динләрини мүдафиә етмәли олмушдулар. АБШ-нын Али Мәһкәмәсиндә 1988-ҹи илә гәдәр Јегованын Шаһидләри илә әлагәдар 71 ишә бахылмыш вә бу ишләрин үчдән ики һиссәси онларын хејринә һәлл олунмушдур. Бүтүн дүнјада һүгуги мүбаризәләр буҝүнә гәдәр дә давам едир вә биринҹи әсрдә олдуғу кими онлар “Мүждәни мүдафиә вә тәсдиг” етмәк мәгсәдилә апарылыр (Филипилиләрә 1:7).
6. Гадаға вә мәһдудијјәтләр Аллаһын халгыны дајандырдымы? Нүмунәләр чәкин.
6 Икинҹи дүнја мүһарибәси әрәфәсиндә, 1930-ҹу илләрин диктатура режими заманы Алманијада, Испанијада, Јапонијада вә бир чох башга өлкәләрдә Јегованын Шаһидләринин фәалијјәтинә мәһдудијјәт вә ја гадаға гојулмушду. Лакин 2000-ҹи илдә јалныз бу үч өлкәдә Аллаһын Падшаһлығынын 500 000-ә јахын фәал тәблиғчиси варды. Бу, демәк олар ки, 1936-ҹы илдә бүтүн дүнјада олан тәблиғчиләрин сајындан он дәфә артыгдыр. Бүтүн бунлардан ҝөрүнүр ки, галибијјәтли Рәһбәрләри олан Иса Мәсиһлә бирликдә ирәлиләјән Аллаһын халгыны һеч бир гадаға вә ја мәһдудијјәт дајандыра билмәз.
7. Бир мүддәт әввәл, 1958-ҹи илдә һансы мүһүм һадисә баш верди вә о вахтдан е’тибарән һансы дәјишикликләр едилди?
7 Ирәлијә доғру атылан бу аддымлар, 1958-ҹи илдә Нју-Јоркда кечирилән, Јегованын Шаһидләринин тарихиндә ән бөјүк — “Аллаһын ирадәси” адлы бејнәлхалг конгресдә хүсусилә ајдын ҝөрүнүрдү. Һәмин конгресдә иштирак едәнләрин сајы 253 922 нәфәр иди. 1970-ҹи илә јахын, Шәрги Алманијаны чыхмаг шәртилә, јухарыда хатырладылан үч өлкәдә Јегованын Шаһидләринин фәалијјәтинә јенидән изин верилди. Лакин һәмин илләрдә онларын фәалијјәтинә бөјүк Совет Иттифагында вә Варшава мүгавиләсинә дахил олан өлкәләрдә гадаға гојулмушду. Бу ҝүн исә һәмин кечмиш коммунист өлкәләриндә фәал Шаһидләрин сајы јарым милјондан артыгдыр.
8. Јегованын хејир-дуасы Онун халгына нә ҝәтирди вә бунунла әлагәдар 1950-ҹи илин “Ҝөзәтчи Гүлләси”ндә нә дејилирди?
8 Јегованын Шаһидләри “әввәлҹә Онун [Аллаһын] Падшаһлығыны вә Онун салеһлијини ахтармаға” давам етдикләри үчүн артымла хејир-дуаланырлар (Матта 6:33, И—93). Ишајанын пејғәмбәрлији һәгиги мә’нада јеринә јетмишдир: “Кичији мин киши вә зәифи гүввәтли бир милләт олаҹаг; мән, Рәбб, вахт ҝәлинҹә буну тезләндирәҹәјәм” (Ишаја 60:22). Бу артым һәлә дә давам едир. Јалныз өтән ониллик әрзиндә Падшаһлығын рәһбәрлијинә фәал тәрздә тәрәфдар оланларын сајы 1 750 000-ә гәдәр артмышдыр. Онлар көнүллү олараг, 1950-ҹи илдә “Ҝөзәтчи Гүлләси”ндә һагларында нөвбәти сөзләр јазылан инсанларын сырасына гошулублар: “Һал-һазырда Аллаһ јени дүнја ҹәмијјәти һазырлајыр. [...] Бу груп Һар-Меҝидондан сағ чыхаҹаг... Теократик јолла тәшкил едилән вә тәшкилатда гәбул олунан низам-интизамла јахындан таныш олан бу инсанлар, ”јени јерин”... тәмсилчиләри кими биринҹи олараг фәалијјәт ҝөстәрәҹәкләр”. Мәгаләнин сонунда дејилирди: “Ҝәлин һамымыз бирликдә јени дүнја ҹәмијјәти кими гәти сурәтдә ирәлијә доғру аддымлајаг!”
9. Илләр әрзиндә әлдә етдикләри тәҹрүбә Јегованын Шаһидләринә һансы фајданы ҝәтирир?
9 Бу арада даима бөјүмәкдә олан бу јени дүнја ҹәмијјәти, һал-һазырда чох дәјәрли вә ҝүман ки, Һар-Меҝидондан сонракы бәрпа ишиндә дә ҝәрәкли олаҹаг билик вә тәҹрүбә әлдә етмишдир. Мәсәлән, Шаһидләр күтләви конгресләр тәшкил етмәји, тәбии фәлакәтләрдән зәрәр чәкәнләрә дәрһал јардым ҝөстәрмәји вә гыса мүддәт әрзиндә биналар тикмәји өјрәнибләр. Јегованын Шаһидләринин бу фәалијјәти чох инсанларда һејранлыг вә һөрмәт һисси доғурур.
Јанлыш тәсәввүрләрә дүзәлиш верилир
10, 11. Јегованын Шаһидләри һаггында јанлыш фикирләрә неҹә дүзәлиш верилдијини нүмунә әсасында ҝөстәрин.
10 Бунунла белә Јегованын Шаһидләрини, мүасир ҹәмијјәтлә ајаглашмамагда ҝүнаһландыран инсанлар да вар. Әслиндә буна сәбәб — Шаһидләрин ган көчүрмә, сијаси битәрәфлик, сигарет чәкмәк вә әхлаг нормалары кими мәсәләләрдә Мүгәддәс Китаба әсасланан мөвгеләридир. Лакин иҹтимаијјәт Шаһидләрин нөгтеји-нәзәрләринә үстүнлүк вермәјә даһа чох мејллидир. Мисал үчүн, Полшада бир һәким гадын Јегованын Шаһидләринин мәркәзи идарәсинә зәнҝ едәрәк, хәстәханада әмәкдашлары илә бирликдә бир нечә саат әрзиндә ган көчүрмә барәсиндәки мәсәләни мүзакирә етдикләрини билдирди. Бу мүзакирәјә, һәмин ҝүн Полшанын “Дзенник заходни” адлы гәзетиндә нәшр едилән мәгалә сәбәб олмушду (“Dziennik Zachodni”). Һәким гејд етди: “Шәхсән мән, тибб саһәсиндә гандан суи-истифадә едилдијинә ҝөрә чох тәәссүф едирәм. Бунун гаршысы алынмалыдыр вә киминсә бу мәсәләјә тохунмуш олмасына севинирәм. Бу барәдә даһа чох мә’лумат алмаг истәјирәм”.
11 Өтән ил тәшкил олунмуш конфрансда, Авропанын, Исраилин, Канаданын вә Америка Бирләшмиш Штатларынын нүфузлу тибб ишчиләри, ган тәтбиг етмәдән хәстәләрин мүалиҹәсиндә һәкимләрә көмәк едә билән материалы мүзакирә етдиләр. Исвечрәдә кечирилән бу ҝөрүшдә гејд едилди ки, ҝениш јајылмыш фикирләрин әксинә олараг, ган көчүрмәдән өлән хәстәләрин сајы, ган көчүрүлмәјән хәстәләрдән даһа чохдур. Шаһидләрин сырасындан олан хәстәләр, бир гајда олараг, ган гәбул едән хәстәләрә нисбәтән хәстәханадан даһа тез чыхырлар, бу да адәтән өз нөвбәсиндә мүалиҹәнин мәсрәфләрини азалдыр.
12. Јегованын Шаһидләринин сијаси битәрәфлик мөвгеләри һаггында ҝөркәмли инсанларын һансы мүсбәт рә’јләр сөјләдикләрини нүмунәдә ҝөстәрин.
12 Бундан әлавә, Икинҹи дүнја мүһарибәси башламаздан әввәл вә мүһарибә заманы Јегованын Шаһидләринин насистләрин азғын һүҹумларына мә’руз галаркән тутдуглары битәрәфлик мөвгеји һаггында чохлары мүсбәт фикирләр сөјләјирләр. Јегованын Шаһидләри тәрәфиндән лентә алынмыш вә тамамилә дүзҝүн олараг илк дәфә 1996-ҹы ил нојабрын 6-да Равенсбрүк алман дүшәрҝәсиндә нүмајиш етдирилмиш “Јегованын Шаһидләринин насизм гаршысында ҝөстәрдикләри мәтанәт” адлы филм чох сајда мүсбәт рә’јләрә јол ачды. Дәһшәтли һадисәләрлә танынмыш Берген-Белзен дүшәрҝәсиндә 1998-ҹи ил апрелин 18-дә кечирилән бәнзәр бир програмын ачылышында Ашағы Саксонија сијаси тәһсил Мәркәзинин директору Волфганг Шел гејд етди: “Белә бир тарихи факты гәбул етмәк чәтин олса да, христиан килсәсинә нисбәтән Јегованын Шаһидләри насионал-сосиализми даһа ҝүҹлү гәтијјәтлә рәдд етдиләр. [...] Јегованын Шаһидләринин тә’лимләри вә диндарлыглары барәдә нә дүшүнмәмизә бахмајараг, онларын фашист режими дөврүндә ҝөстәрдикләри сарсылмаз мөвге һөрмәт һисси доғурур”.
13, 14. а) Ҝөзләнилмәјән бир мәнбәдән илк мәсиһчиләрин леһинә һансы мәнтигәујғун фикир гејд едилди? б) Аллаһын халгынын леһинә бу ҝүн һансы фикирләр гејд едилмишдир?
13 Јүксәк вәзифәли шәхсләрин вә һакимләрин мүбаһисәли суаллары Јегованын Шаһидләринин леһинә һәлл етмәләри, габагҹадан јаранан јанлыш фикирләрин арадан галдырмасына вә иҹтимаијјәтин Јегованын Шаһидләринә даһа јахшы мүнасибәт ҝөстәрмәсинә сәбәб ола биләр. Бу, әксәр һалларда имкан јарадыр ки, әввәлләр онлары динләмәк истәмәјән кәсләрлә сөһбәт едә билсинләр. Буна ҝөрә дә бу ҹүр мәһкәмә гәрарлары, сөзсүз ки, Јегованын Шаһидләри тәрәфиндән алгышланыр вә јүксәк гијмәтләндирилир. Бу бизә биринҹи әсрдә Јерусәлимдә баш верән һадисәни хатырладыр. Јәһудиләрин али мәһкәмәси олан Синедрион, сә’јлә тәблиғ етдикләринә ҝөрә мәсиһчиләри ҹәзаландырмаг истәјән заман “гануншүнас вә бүтүн халгын мө’тәбәр сајдығы Гамалијел” (И—93) онлары хәбәрдар етди: “Еј Исраил әрләри! Бу адамларла нә етмәк истәдијиниз һагда дәриндән дүшүнүн. [...] ...Бу адамлардан әл чәкин вә онлары бурахын. Чүнки бу тәшәббүс вә бу һәрәкәт инсанлардан исә, јох олаҹагдыр; лакин Аллаһдан исә, ону јох етмәјә сизин ҝүҹүнүз чатмаз. Һәтта Аллаһла савашанларын һалына дүшә биләрсиниз” (Һәвариләрин ишләри 5:33—39).
14 Бу јахынларда, Гамалијел кими бир чох ҝөркәмли инсанлар Јегованын Шаһидләринин дини азадлыгларынын леһинә чыхыш едирдиләр. Мәсәлән, “Виҹдан вә е’тигад азадлығы Бејнәлхалг Академијасы”нын кечмиш сәдри белә сөзләр деди: “Е’тигадлары ҹәмијјәт тәрәфиндән садәҹә олараг јол верилмәз вә ја гејри-ән’әнәви һесаб едилдији үчүн, мө’мин инсанларын өз динләринә е’тигад етмәк һүгугларыны рәдд етмәк олмаз”. Тәригәт адландырылан динләри тәдгиг етмәк үчүн јарадылан алман дөвләт комиссијасына даир Лејпсиг университетинин дин профессору тамамилә мүнасиб бир суал верди: “Нәјә ҝөрә јалныз азлыг тәшкил едән динләр диггәтлә тәдгиг едилмәлидир? Нәјә ҝөрә һәмчинин ики бөјүк [Рома-католик вә Лүтеран] килсәләрини дә тәдгиг етмәјәк?” Алманијанын кечмиш дөвләт хадими бу суала ҹаваб олараг јазды: “Шүбһә јохдур ки, дөвләт комиссијасынын сијаси истигамәтдә башладығы бу иш, хәлвәти олараг фанатик килсә нүмајәндәләри тәрәфиндән диктә едилмишдир”.
Көмәји кимдән ҝөзләјирик?
15, 16. а) Нәјә ҝөрә Гамалијелин көмәји мәһдуд иди? б) Нәјә ҝөрә Исаја көмәк етмәјә чалышан диҝәр үч ҝөркәмли инсан, онун үчүн һеч нә едә билмәдиләр?
15 Гамалијелин дедији сөзләр бир даһа сүбут едир ки, Аллаһ тәрәфиндән һимајә едилән иш мүвәффәгијјәтсизлијә уғраја билмәз. Синедриона дејилән бу сөзләр, шүбһәсиз ки, илк мәсиһчиләрә фајда ҝәтирди. Лакин онлар, шаҝирдләринин тә’гиб едиләҹәкләри һаггында Исанын дедији сөзләри унутмамышдылар. Гамалијелин дедији сөзләр, дин рәһбәрләрини мәсиһчиләри өлдүрмәк фикриндән имтина етмәјә вадар етди, анҹаг тә’гибләрә сон гојмады, чүнки бу һагда охујуруг: “Гамалијел илә разылашдылар вә һәвариләри чағырдылар. Онлары дөјдүрдүкдән сонра, Исанын ады илә данышмасынлар дејә, тәнбеһ етдиләр вә сәрбәст бурахдылар” (Һәвариләрин ишләри 5:40).
16 Иса мүһакимә олунаркән, онда һеч бир ҝүнаһ ҝөрмәјән Понти Пилат, Исаны азад етмәјә чалышды. Лакин онун ҹәһдләри боша чыхды (Јәһја 18:38, 39; 19:4, 6, 12—16). Бундан әлавә, Исаја јахшы мүнасибәт бәсләјән Синедрионун ики үзвү — Накдимон вә Ариматејалы Јусиф, мәһкәмәнин Исаја гаршы ҝөрдүјү ишләрдән дөндәрмәк үчүн һеч нә едә билмәдиләр (Лука 23:50—52; Јәһја 7:45—52; 19:38—40). Јегованын халгыны мүдафиә етмәјә һазыр олан инсанларын, буну һансы мәгсәдлә етмәләринә бахмајараг, имканлары мәһдуддур. Бу дүнја Мәсиһә нифрәт етдији кими, онун һәгиги давамчыларына да нифрәт етмәјә давам едәҹәкдир. Там азадлығы јалныз Јеговадан ҝөзләмәк олар (Һәвариләрин ишләри 2:24).
17. Јегованын Шаһидләри нәји анлајырлар, лакин мүждәни бундан сонра да тәблиғ етмәк гәтијјәтләри нәјә ҝөрә зәифләмир?
17 Јегованын Шаһидләри баша дүшүрләр ки, тә’гибләр давам едәҹәкдир. Мүгавимәтә јалныз Шејтанын системи тамамилә мәһв едилдикдән сонра сон гојулаҹаг. Тә’гибләр хошаҝәлмәз олса да, Шаһидләри, Падшаһлыг һаггында тәблиғ етмәк вәзифәләрини јеринә јетирмәкдән имтина етмәјә мәҹбур едә билмәјәҹәк. Ахы онлары Аллаһын өзү һимајә едир. Онлар ҹәсарәтли Рәһбәрләри олан Иса Мәсиһи тәглид едирләр (Һәвариләрин ишләри 5:17—21, 27—32).
18. Јегованын халгыны һансы чәтинликләр ҝөзләјир, амма һадисәләрин нәтиҹәләри илә әлагәдар Аллаһын хидмәтчиләри нәјә әминдирләр?
18 Һәгиги дин лап башланғыҹдан ҝүҹлү мүгавимәтләрлә гаршылашмышдыр. Тезликлә һәгиги дин Гогун — ҝөјдән говулдугдан сонра алчалдылмыш вәзијјәтдә олан Шејтанын — ҝүҹлү һүҹумларына мә’руз галаҹагдыр. Лакин һәгиги дин мәһв едилмәјәҹәкдир (Һезекиел 38:14—16). “Дүнјанын бүтүн һөкмдарлары” Шејтанын рәһбәрлији алтында “Гузу илә ҹәнҝ едәҹәкләр, амма Гузу онлара галиб ҝәләҹәкдир. Чүнки О, һөкмдарларын Һөкмдары вә падшаһларын Падшаһыдыр” (Вәһј 16:14; 17:14, И—93). Бәли, Падшаһымыз сонунҹу гәләбәјә доғру ирәлиләјир вә тезликлә галиб ҝәләҹәкдир. “Аллаһ бизимләдир” дедикләри заман Јегованын ибадәтчиләринә һеч вахт һеч кимин е’тираз етмәјәҹәјини биләрәк, бу ҹүр Падшаһла бирликдә јеримәк неҹә дә бөјүк шәрәфдир! (Ромалылара 8:31; Филипилиләрә 1:27, 28).
Изаһ едә биләрсинизми?
• Падшаһлығын јарандығы ҝүндән бәри Јегова мәсиһчи јығынҹағыны неҹә мөһкәмләндирир?
• Шејтан Мәсиһин там гәләбә чалмасына неҹә мане олмаг истәјир вә бу нә илә нәтиҹәләнир?
• Шаһидләрин сырасындан олмајан инсанларын хејирхаһ ишләринә гаршы биздә һансы таразлашмыш нөгтеји-нәзәр олмалыдыр?
• Шејтан тезликлә һансы аддымы атаҹаг вә нәтиҹәси неҹә олаҹаг?
[28-ҹи сәһифәдәки шәкил]
Конгресләр, Јегованын халгынын ирәлијә доғру аддымладығыны ҝөстәрир.
[30-ҹу сәһифәдәки шәкилләр]
Икинҹи дүнја мүһарибәси заманы Шаһидләрин горудуглары сијаси битәрәфлик, Јеговаја индијәдәк иззәт ҝәтирир.