Бу ахыр ҝүнләрдә никаһ вә валидејнлик вәзифәси
«Вахт азалмышдыр». 1 КОР. 7:29
1. а) Јашадығымыз индики ‘чәтин анларда’ һансы дәјишикликләр баш верир? б) Аилә дәјәрләринин дәјишилмәси бизи нә үчүн нараһат едир?
АЛЛАҺЫН Кәламында габагҹадан дејилмишдир ки, ‘ахыр заманда’ мүһарибәләр, зәлзәләләр, гытлыглар вә хәстәликләр олаҹаг (Дан. 8:17, 19; Лука 21:10, 11). Һәмчинин Мүгәддәс Китабда бәшәр тарихинин бу һәлледиҹи дөврүндә бөјүк сосиал дәјишикликләрин олаҹағы хәбәрдарлыг едилмишдир. ‘Ахыр ҝүнләрин’ чәтинликләриндән бири дә аиләләрин бөһран вәзијјәти јашамасыдыр (2 Тим. 3:1-4). Бу дәјишикликләр бизи нә үчүн нараһат етмәлидир? Чүнки ҝенишмигјаслы вә ҝүҹлү тәсирә малик олан бу дәјишикликләр мәсиһчиләрин никаһа вә валидејнлик вәзифәсинә даир бахышына тәсир едә биләр. Неҹә?
2. Дүнјада никаһа вә бошанмаја мүнасибәт неҹәдир?
2 Бизим ҝүнләрдә бошанмаг әввәлкиндән асанлашыб вә ҝениш јајылыб. Бир чох өлкәләрдә бошанманын сајы сүрәтлә артмагдадыр. Анҹаг биз јадда сахламалыјыг ки, Јеһова Аллаһын никаһа вә бошанмаја олан бахышы бу дүнјанын бахышындан көклү сурәтдә фәргләнир. Јеһова буна неҹә бахыр?
3. Јеһова вә Иса Мәсиһ никаһа неҹә бахырлар?
3 Јеһова Аллаһ евли адамлардан евлилик андына садиг галмаларыны ҝөзләјир. Јеһова илк киши вә гадыны никаһда бирләшдирәндә демишди ки, «киши... гадынына говушаҹаг вә онлар бир бәдән олаҹаг». Сонралар Иса Мәсиһ Аллаһын сөзләрини тәкрар едиб әлавә етмишди: «Беләликлә, Аллаһын бирләшдирдијини инсан ајырмамалыдыр». О, даһа сонра демишди: «Ким ҹинси әхлагсызлыгдан башга сәбәблә арвадыны бошајыб башгасы илә евләнәрсә, зина едәр» (Јар. 2:24; Мат. 19:3-6, 9). Ҝөрдүјүмүз кими, Јеһова вә Иса никаһа өмүрлүк иттифаг кими бахырлар, бу иттифага јалныз һәјат јолдашларындан биринин өлүмү сон гоја биләр (1 Кор. 7:39). Никаһ мүгәддәс гурулуш олдуғу үчүн бошанмаја бармагарасы бахмаг олмаз. Аллаһын Кәламында ајдын ҝөстәрилир ки, Јеһова Мүгәддәс Китаб әсасы олмадан јол верилән бошанмаја нифрәт едирa. (Малаки 2:13-16; 3:6 ајәләрини оху.)
Никаһа мәсулијјәтли мүнасибәт
4. Нә үчүн евләнмәјә тәләсән бәзи ҝәнҹ мәсиһчиләр сонрадан пешман олурлар?
4 Јашадығымыз аллаһсыз дүнја сексә алудә олуб. Биз һәр ҝүн еһтираслы тәсвирләр ахынына мәруз галырыг. Онларын бизә, хүсусилә дә јығынҹагдакы ҝәнҹ баҹы-гардашларымыза ҝөстәрдији тәсирә мәһәл гојмаја билмәрик. Ҝәнҹ мәсиһчиләр, инсанын өз истәјинә зидд олараг онда сексуал арзулар ојадан дүнјанын зәрәрли тәсиринә неҹә гаршы дура биләрләр? Бәзиләри чыхыш јолуну чох ҝәнҹ јашларында евләнмәкдә ҝөрүрләр. Онлар бу јолла ҹинси әхлагсызлыгдан гачмаға үмид едирләр. Анҹаг белә гәрар гәбул едәнләрдән чохлары тезликлә бу гәрарларына ҝөрә пешман олурлар. Чүнки јенилијин дады дамагларындан ҝедәндән сонра баша дүшүрләр ки, үмуми шејләри чох аздыр вә һәтта ҝүндәлик мәсәләләрә бахышлары белә мүхтәлифдир. Она ҝөрә дә белә ҹүтләрин сонрадан ҹидди проблемләрлә гаршылашмасы тәәҹҹүблү дејил.
5. Евли ҹүтләрин евлилик андына садиг галмаларына нә көмәк едәҹәк? (Һәмчинин һашијәјә бахын.)
5 Һәтта мәсиһчи олса белә, үмидләри доғрултмајан инсанла јашамаг, әлбәттә, чәтин олаҹаг (1 Кор. 7:28). Лакин вәзијјәт нә гәдәр чәтин олурса олсун, мәсиһчи уғурсуз никаһдакы проблемләри һәлл етмәк үчүн Мүгәддәс Китаб әсасы олмадан бошана билмәз. Буна ҝөрә дә евлилик андына садиг галмаг истәдикләри үчүн никаһларыны горумаға чалышанлар мәсиһчи јығынҹағынын һөрмәтинә, мәһәббәтинә вә гајғысына лајигдирләрb.
6. Ҝәнҹ мәсиһчиләр евләнмәјә неҹә јанашмалыдырлар?
6 Әҝәр сән ҝәнҹ вә субајсанса, евләнмәјә неҹә јанашмалысан? Евләнмәјә физики, әгли вә руһани ҹәһәтдән һазыр олана гәдәр һеч бир романтик мүнасибәтләрә башламасан бир чох мәјуслугдан өзүнү горујаҹагсан. Әлбәттә, Мүгәддәс Јазылар евләнмәк үчүн јаш һәдди гојмурc. Амма орада дејилир ки, сексуал һиссләрин ҝүҹлү олдуғу вахт өтүб-кечәнә гәдәр ҝөзләмәк мүдриклик оларды. Нәјә ҝөрә? Чүнки ҝүҹлү еһтирас ағлы думанландыра биләр вә үрәк ағрысы ҝәтирән дүшүнүлмәмиш гәрарлар гәбул етмәјә тәһрик едә биләр. Јадда сахла ки, Јеһованын Мүгәддәс Китабда никаһа даир вердији мәсләһәтләр сәнин хејрин вә хошбәхтлијин үчүндүр. (Јешаја 48:17, 18 ајәләрини оху.)
Валидејнлик мәсулијјәти
7. Бәзи ҝәнҹ ҹүтлүкләр нә илә үзләширләр вә бу онларын мүнасибәтини нә үчүн ҝәрҝинләшдирә биләр?
7 Бәзи ҹүтләр һәлә өзләри ҝәнҹ икән артыг ушаг ҝөзләјирләр. Бир-бирләрини јахшы танымаға маҹал тапмамыш онларын ушаглары олур, о исә ҝүнүн 24 саатыны диггәт тәләб едир. Ана тәбии олараг бүтүн диггәтини јени доғулан көрпәсинә јөнәлдәндә ҝәнҹ әрдә гысганҹлыг јарана биләр. Бундан башга, јухусуз ҝеҹәләрин нәтиҹәси олан јорғунлуг вә стресс әрлә арвадын мүнасибәтләриндә ҝәрҝинлик јарадыр. Онлар бирдән анлајырлар ки, артыг һәмишәки азадлыгларыны итирибләр. Инди онлар әввәлки кими истәдикләри јерә ҝедиб, истәдикләри шеји едә билмирләр. Онлар баш верән дәјишикликләрә неҹә бахмалыдырлар?
8. Валидејнлик мәсулијјәтинә неҹә јанашылмалыдыр вә нә үчүн?
8 Евлилик кими, валидејнлијә дә Аллаһ тәрәфиндән верилмиш мәсулијјәт вә шәрәфли тапшырыг кими јанашмаг лазымдыр. Көрпәнин дүнјаја ҝәлиши илә валидејнләр һансы дәјишикликләри етмәли олсалар да, онлар буна мәсулијјәтлә јанашмалы вә јени шәраитә ујғунлашмаг үчүн әлләриндән ҝәләнин етмәлидирләр. Ушаға малик олмаг имканыны инсанлара Јеһова вердији үчүн, валидејнләр дүнјаја јени ҝәлмиш көрпәјә ‘Рәббин вердији пај’ кими бахмалыдырлар (Мәз. 127:3). Мәсиһчиләр «Рәбб јолунда» олан валидејн кими өз вәзифәләрини јеринә јетирмәјә сәј ҝөстәрмәлидирләр (Ефес. 6:1).
9. а) Ушаг бөјүтмәк өзүнә нәји дахил едир? б) Әр арвадынын руһани ҹәһәтдән мөһкәм галмасына неҹә көмәк едә биләр?
9 Ушаг бөјүтмәк чох илләр әрзиндә фәдакарлыг тәләб едир. Бунун үчүн чохлу ҝүҹ вә вахт сәрф етмәк лазым ҝәлир. Мәсиһчи әр анламалыдыр ки, ушаг дүнјаја ҝәләндән сонра, ола биләр, бир нечә ил әрзиндә арвады јығынҹагларда диггәтлә гулаг аса билмәјәҹәк вә Мүгәддәс Китабы өјрәнмәк, үзәриндә дүшүнмәк үчүн имканы аз олаҹагдыр. Бу онун руһанилијини зәифләдә биләр. Мәсулијјәтли ата ушаға бахмагда һәјат јолдашына көмәк етмәк үчүн әлиндән ҝәлән һәр шеји едәҹәк. Әр һәјат јолдашынын јығынҹагда гулаг аса билмәдији бәзи мәгамлары евдә мүзакирә етмәјә чалышаҹагдыр. Һәмчинин о, ушаға бахмаг ишиндә бәзи шејләри өз үзәринә ҝөтүрмәклә арвадына Падшаһлығын тәблиғ ишиндә там иштирак етмәк үчүн имкан јарадаҹаг. (Филипилиләрә 2:3, 4 ајәләрини оху.)
10, 11. а) Ушаглары Јеһованын ‘нәсиһәти’ илә бөјүтмәк нә демәкдир? б) Нә үчүн бир чох мәсиһчи валидејнләр тәрифә лајигдирләр?
10 Валидејнлијә мәсулијјәтлә јанашмаг ушағы јемәклә, палтарла, евлә тәмин етмәкдән вә сағламлығынын гајғысына галмагдан савајы өзүнә даһа чох шеји дахил едир. Хүсусилә дә дүнјанын бу тәһлүкәли сон ҝүнләриндә ушаглара кичик јашларындан әхлаги принсипләри ашыламаг ваҹибдир. Ушаглары «Рәббин тәрбијә вә нәсиһәти илә» бөјүтмәк лазымдыр (Ефес. 6:4). Бу о демәкдир ки, валидејнләр Јеһованын дүшүнҹәләрини ушаға көрпәлијиндән башлајараг чәтин ҝәнҹлик дөврү бојунҹа ашыламалыдырлар (2 Тим. 3:14, 15).
11 Давамчыларына ‘бүтүн халглары шаҝирди етмәји’ тапшыранда Иса, сөзсүз ки, валидејнләрин дә өз ушагларына шаҝирд олмаға көмәк едәҹәкләрини нәзәрдә тутмушду (Мат. 28:19, 20). Дүнјанын ҝәнҹләрә ҝөстәрдији тәзјиги нәзәрә алсаг, бу елә дә асан иш дејил. Буна ҝөрә ушагларыны садиг мәсиһчи кими бөјүтмәјә наил олмуш валидејнләр бүтүн јығынҹағын сәмими тәрифинә лајигдирләр. Онлар мәсулијјәтли валидејн кими, бу дүнјанын тәсиринә өз иманлары вә сәдагәтли олмалары сајәсиндә ‘галиб ҝәлмишләр’ (1 Јәһ. 5:4).
Алиҹәнаб мәгсәд
12. Нә үчүн бәзи мәсиһчиләр бир мүддәт субај галмаг гәрарына ҝәлирләр?
12 ‘Вахт азалдығындан’ вә ‘дүнјанын индики сурәти кечиб ҝетдијиндән’ Аллаһын Кәламы тәшвиг едир ки, субајлығын үстүн ҹәһәтләри һаггында фикирләшәк (1 Кор. 7:29-31). Буна ҝөрә дә бәзи мәсиһчиләр өмүрлүк вә ја мүәјјән мүддәт әрзиндә субај галмаг гәрарына ҝәлирләр. Тәрифәлајигдир ки, онлар субајлығын ҝәтирдији сәрбәстликдән өз худбин мәгсәдләри үчүн истифадә етмирләр. Чохлары ‘фикрини дағытмадан’ Јеһоваја хидмәт етмәк үчүн субај галырлар. (1 Коринфлиләрә 7:32-35 ајәләрини оху.) Бәзи субај мәсиһчиләр ја пионер, ја да Бет-Ел аиләсинин үзвү кими хидмәт едирләр. Бир чохлары Јеһованын тәшкилатына даһа чох фајда ҝәтирмәк үчүн Хидмәти Тәкмилләшдирмә Мәктәбиндә охумаға ҹан атырлар. Мүәјјән мүддәт субај галараг таммүддәтли хидмәт едән вә сонра аилә гурмаг гәрарына ҝәлән мәсиһчиләр һәмин илләр әрзиндә әлдә етдикләри дәјәрли тәҹрүбәнин никаһларына һәлә дә фајда ҝәтирдијини һисс едирләр.
13. Нә үчүн бәзи мәсиһчиләр ушаг истәмирләр?
13 Дүнјанын бәзи јерләриндә исә бир чохлары ушагларынын олмасыны истәмирләр: бәзиләри мадди чәтинликләр уҹбатындан, диҝәрләри исә, ишләриндә манеә олмадан ирәлиләјишләрә наил олмаг мәгсәдилә. Мәсиһчиләр арасында да ушаг истәмәјәнләр вар. Анҹаг чох вахт бунун сәбәби онларын Јеһоваја сәрбәст хидмәт етмәк арзусу олур. Бу о демәк дејил ки, онлар нормал аилә һәјаты јашамырлар. Хејр, садәҹә олараг онлар евлилијин ҝәтирдији бәзи хејир-дуалары Падшаһлығын марагларына гурбан верирләр (1 Кор. 7:3-5). Онлардан бәзиләри рајон вә ја вилајәт нәзарәтчиси, Бет-Ел аиләсинин үзвү, башгалары исә пионер вә ја миссионер кими хидмәт едирләр. Јеһова онларын ишини вә Онун ады наминә ҝөстәрдикләри мәһәббәти унутмајаҹаг (Ибр. 6:10).
‘Һәјатда әзијјәт’
14, 15. Мәсиһчи валидејнләр ‘һәјатда’ һансы ‘әзијјәтлә’ үзләшә биләрләр?
14 Һәвари Павел демишди ки, евли мәсиһчиләрин «һәјатда әзијјәти» олаҹаг (1 Кор. 7:28). Бу онлардан биринин, өвладларынын вә ја гоҹа валидејнләринин сағламлығы илә бағлы проблемләр, јахуд ушагларын тәрбијәси илә бағлы чәтинликләрин ҝәтирдији үрәк ағрылары ола биләр. Мәгаләнин әввәлиндә гејд едилдији кими, Мүгәддәс Китабда габагҹадан дејилмишди ки, «ахыр ҝүнләрдә чәтин анлар ҝәләҹәкдир». Чәтинлијин сәбәбләриндән бири дә ушагларын ‘валидејнләринә итаәт етмәмәси’ олаҹагды (2 Тим. 3:1-3).
15 Ушаг тәрбијә етмәк мәсиһчи валидејнләр үчүн әсл сынагдыр. Биз индики ‘чәтин анларын’ пис тәсириндән мүдафиә олунмамышыг. Буна ҝөрә дә мәсиһчи валидејнләрә «бу дүнјанын» ушаглара ҝөстәрә биләҹәји тәһлүкәли тәсирләрлә даима мүбаризә апармаг лазым ҝәлир (Ефес. 2:2, 3). Лакин тәәссүф ки, онлар бу мүбаризәдән һәмишә галиб чыхмырлар! Мәсиһчи аиләсиндә бөјүјән ушағын Јеһоваја хидмәт етмәјә сон гојмасы ону һәгигәтдә бөјүтмәјә чалышан валидејнләрә, сөзүн әсл мәнасында, ‘әзијјәт’ верир (Сүл. мәс. 17:25).
‘Бөјүк мәшәггәт олаҹаг’
16. Иса һансы «мәшәггәт» һаггында пејғәмбәрлик етмишди?
16 Никаһла вә ја ушағын тәрбијәси илә бағлы истәнилән ‘әзијјәт’ гаршыда бизи ҝөзләјән мәшәггәтлә мүгајисәдә чох кичикдир. Иштиракы вә дөврүн сону һаггындакы пејғәмбәрликдә Иса демишди: «О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр» (Мат. 24:3, 21). Сонра о изаһ етмишди ки, бөјүк издиһам һәмин «бөјүк мәшәггәт»дән сағ чыхаҹаг. Анҹаг Шејтанын дүнјасы һәмин вахт бүтүн ҝүҹүнү топлајараг Јеһованын сүлһпәрвәр Шаһидләринә гаршы сон дәфә һүҹума кечәҹәк. Шүбһәсиз, бу һәр биримиз үчүн, һәм бөјүкләр, һәм дә ушаглар үчүн чәтин вахт олаҹаг.
17. а) Ҝәләҹәјә нә үчүн инамла баха биләрик? б) Никаһа вә валидејнлик вәзифәсинә олан бахышымыза нә тәсир етмәлидир?
17 Амма биз ҝәләҹәјә ҝөрә һәддиндән артыг тәлаш кечирмәли дејилик. Јеһоваја садиг олан валидејнләр кичик ушаглары илә бирликдә хилас олмаға үмид едә биләрләр. (Јешаја 26:20, 21 ајәләрини оху; Сеф. 2:2, 3; 1 Кор. 7:14.) Инди исә гој чәтин ҝүнләрдә јашадығымызы билмәјимиз евлилијә вә валидејнлик вәзифәсинә неҹә мүнасибәт ҝөстәрдијимизә тәсир етсин (2 Пет. 3:10-13). Белә етсәк, һәјатымыз, субај вә ја евли олмағымыздан, өвладымызын олуб олмамасындан асылы олмајараг, Јеһоваја вә мәсиһчи јығынҹағына иззәт ҝәтирәҹәк.
[Һашијәләр]
a «Јеһованын ҝүнүнү унутма» китабынын 125-ҹи сәһифәсиндә (рус.) «Мән никаһын позулмасына нифрәт едирәм» јарымсәрлөвһәсинә бахын.
b Никаһда проблемләрлә гаршылашанлара «Ҝөзәтчи Гүлләси»нин 2003-ҹү ил 1 декабр вә «Ојанын!» журналынын 2001-ҹи ил 8 јанвар (рус.) сајларындакы мәгаләләри арашдырмаг фајдалы ола биләр.
c «Аилә хошбәхтлијинин сирри» китабынын «Хошбәхт никаһа һазырлыг» адлы 2-ҹи фәслинә бахын.
Тәкрар үчүн суаллар
• Нә үчүн ҝәнҹ мәсиһчиләр евләнмәјә тәләсмәмәлидирләр?
• Ушаг бөјүтмәк нә демәкдир?
• Нә үчүн бәзи мәсиһчиләр субај галыр вә ја евлидирләрсә, ушаг истәмирләр?
• Мәсиһчи валидејнләр һансы ‘әзијјәтлә’ үзләшә биләрләр?
[17-ҹи сәһифәдәки шәкил]
Нә үчүн јахшы оларды ки, ҝәнҹ мәсиһчиләр евләнмәјә тәләсмәсинләр?
[18-ҹи сәһифәдәки шәкил]
Әр арвадынын руһани ишләрдә там иштирак етмәси үчүн чох шеј едә биләр
[19-ҹу сәһифәдәки шәкил]
Нә үчүн бәзи мәсиһчиләр ушаг истәмирләр?