Јеһоваја там ҹиддијјәтлә хидмәт един
«Ҹидди диггәтә лајиг... нә варса, бунлар һаггында даима дүшүнүн» (ФИЛИП. 4:8, һашијә).
1, 2. Нәјә ҝөрә чохлары һәјата гејри-ҹидди јанашыр вә бунунла әлагәдар һансы суаллар ортаја чыхыр?
БИЗ бәшәр тарихинин ән ағыр вә мәшәггәтли дөврүндә јашајырыг. Јеһова илә сых мүнасибәтләри олмајан инсанлар үчүн белә бир ағыр зәманәдән баш чыхартмаг әсил мүбаризә ола биләр (2 Тим. 3:1—5). Јалныз өз ҝүҹләри вә ирадәләри сајәсиндә онлар биртәһәр ҝүнү баша вурмалы олурлар. Чохлары һәјатын өзү илә ҝәтирдији ағры-аҹылары унутмаг үчүн даима јени әјләнҹәләр ахтарырлар.
2 Һәјат гајғылары илә мүбаризәдә инсанлар чох вахт зөвг вә әјләнҹә далынҹа гачырлар. Еһтијаты әлдән версәләр, мәсиһчиләр дә асанлыгла бу тәләјә дүшә биләрләр. Бундан гачынмаг неҹә мүмкүндүр? Мәҝәр инди һәмишә ҹидди олмалы вә һеч вахт әјләнмәмәлијик? Мәсулијјәтләримизлә әјләнҹәләр арасында таразлығы неҹә горумаг олар? Һәјатымызда әсас јери ваҹиб шејләр тутса да, һәддән артыг ҹидди, ағыр инсан олмамаг үчүн һансы Мүгәддәс Китаб принсипләрини әлдә рәһбәр тутмалыјыг?
Әјләнҹә дүшкүнү олан бир дүнјада ҹидди олмаг
3, 4. Мүгәддәс Јазылар бизә ҹиддилијин ваҹиблијини анламаға неҹә көмәк едир?
3 Дүнјанын ‘ејш-ишрәт’ дүшкүнү олдуғу ҝөз габағындадыр (2 Тим. 3:4). Онун «кеф елә» шүары илә јашамасы бизим руһанилијимиз үчүн ҹидди тәһлүкә јарада биләр (Сүл. мәс. 21:17). Буна ҝөрә тәәҹҹүблү дејил ки, һәвари Павел Тимотејә вә Титуса јаздығы мәктублара ҹиддилик мәсәләсинә даир мәсләһәтләр дахил етмишди. Һәмин мәсләһәтләрә әмәл етсәк, дүнјанын һәјата олан гејри-ҹидди вә лагејд мүнасибәтинә јолухмајаҹағыг. (1 Тимотејә 2:1, 2; Титуса 2:2—8 ајәләрини оху.)
4 Павелдән әсрләр өнҹә јашамыш Сүлејман јазмышды ки, һәјатда ҹидди мәсәләләр барәдә дүшүнмәк даима әјләнмәкдән даһа јахшыдыр (Ваиз 3:4; 7:2—4). Бәли, һәјатын гыса олдуғуну нәзәрә алсаг, биз ‘вар ҝүҹүмүзлә’ хиласа наил олмаға чалышмалыјыг (Лука 13:24). Бунун үчүн «ҹидди диггәтә лајиг» олан нә варса, даима ону дүшүнмәлијик (Филип. 4:8, 9). Бу, мәсиһчи һәјатынын һәр бир саһәсинә диггәтлә јанашмаг демәкдир.
5. Һәјатымызын һансы саһәсинә ҹидди јанашмалыјыг?
5 Мисал үчүн, Јеһованы вә Исаны тәглид едән мәсиһчиләр сәјлә ишләмәк мәсулијјәтләринә ҹидди јанашырлар (Јәһ. 5:17). Ишләринә виҹданла јанашдыглары вә етибарлы инсанлар олдуглары үчүн онлары чох вахт тәрифләјирләр. Хүсусилә дә аилә башчылары аиләләрини доландырмаг үчүн сәјлә ишләмәлидирләр. Чүнки аилә үзвләрини мадди ҹәһәтдән тәмин етмәмәк Јеһованы инкар етмәјә бәрабәрдир! (1 Тим. 5:8).
Хидмәтә ҹидди мүнасибәт севинҹ ҝәтирир
6. Ибадәтимизә ҹидди јанашмалы олдуғумузу һарадан билирик?
6 Јеһова һәгиги ибадәтә һеч вахт башдансовду јанашмајыб. Гәдимдә Мусанын Гануну алтында олан исраиллиләр Јеһоваја ибадәтдән јајынанда бунун аҹы нәтиҹәләри илә үзләширдиләр (Јешуа 23:12, 13). Ерамызын биринҹи әсриндә Мәсиһин давамчылары ибадәтләрини јаланчы тәлимләрлә вә пис хүсусијјәтләрлә ләкәләмәмәк үчүн вар ҝүҹләри илә мүбаризә апармалы идиләр (2 Јәһ. 7—11; Вәһј 2:14—16). Бу ҝүн дә һәгиги мәсиһчиләр ибадәтләринә ҹидди јанашырлар (1 Тим. 6:20).
7. Павел хидмәтә неҹә һазырлашырды?
7 Тәблиғ хидмәти бизим үчүн әсил севинҹ мәнбәјидир. Анҹаг севинҹимизи горумаг үчүн биз она ҹидди јанашмалы вә әввәлҹәдән һазырлашмалыјыг. Павел тәлим вердији инсанларын тәләбатларыны неҹә нәзәрә алдығыны изаһ етмишди. О дејир: «Һәр ҹүр адам үчүн һәр шеј олдум вә һәр фүрсәтдән истифадә етдим ки, һеч олмаса кимисә хилас едә билим. Бүтүн бунлары хош хәбәр уғрунда едирәм ки, ону башгаларына чатдыра билим» (1 Кор. 9:22, 23). Павел инсанлара руһани көмәклик ҝөстәрмәкдән зөвг алырды вә о, һәмишә динләјиҹиләринин конкрет тәләбатларыны неҹә өдәмәк барәдә ҹидди дүшүнүрдү. Буна ҝөрә дә онлары руһландырмаг вә Јеһоваја ибадәт етмәјә тәшвиг етмәк онун үчүн чәтин дејилди.
8. а) Хидмәтдә өјрәтдијимиз инсанлара мүнасибәтимиз неҹә олмалыдыр? б) Башгаларына Мүгәддәс Китабы өјрәтмәк хидмәтдә севинҹимизи неҹә артыра биләр?
8 Павел хидмәтә нә дәрәҹәдә ҹидди јанашырды? О һәм Јеһоваја, һәм дә һәгигәт хәбәринә гулаг асан инсанлара «гул» кими хидмәт етмәјә һазыр иди (Ром. 12:11; 1 Кор. 9:19). Евдә, мәсиһчи ҝөрүшләриндә вә ја аиләви ибадәт заманы кимәсә Мүгәддәс Китабы өјрәдәркән онларын гаршысында дашыдығымыз мәсулијјәти дәрк едирикми? Ола билсин, биз дүшүнүрүк ки, киминләсә мүнтәзәм олараг Мүгәддәс Китаб өјрәнмәси кечирмәк ағыр јүкдүр. Дүздүр, башгаларына руһән көмәк етмәк үчүн, адәтән, өз шәхси ишләримизә сәрф етдијимиз вахты азалтмаг лазым ҝәлир. Мәҝәр бу, Исанын: «Вермәк алмагдан даһа чох хошбәхтлик ҝәтирир», — сөзләринә мүвафиг дејил? (Һәв. иш. 20:35). Инсанлара хилас јолуну өјрәтмәк бизә башга мәшғулијјәтләрдән даһа чох севинҹ ҝәтирәҹәк.
9, 10. а) Ҹидди олмаг о демәкдирми ки, биз динҹәлә вә ја инсанларла хош вахт кечирә билмәрик? Изаһ един. б) Ағсаггаллар нә етмәлидирләр ки, башгалары онлара сәрбәст јахынлаша билсин вә өзләрини онларын јанында раһат һисс етсинләр?
9 Ҹидди олмаг о демәк дејил ки, биз динҹәлә вә ја инсанларла хош вахт кечирә билмәрик. Бу саһәдә бизим үчүн ҝөзәл нүмунә гојан Иса инсанлара тәлим вермәклә јанашы, истираһәтә вә хош үнсијјәтә дә вахт ајырырды (Лука 5:27—29; Јәһ. 12:1, 2). Үстәлик, ҹидди олмаг о демәк дејил ки, биз һәмишә заһирән ҹидди ҝөрүнмәлијик. Иса хасијјәтҹә ағыр инсан олсајды, башгалары она јахын дурмазды. Һәтта балаҹа ушаглар белә өзләрини онун јанында чох раһат вә сәрбәст һисс едирдиләр (Марк 10:13—16). Биз Иса кими таразлығы неҹә горуја биләрик?
10 Бир гардаш јығынҹаг ағсаггалы барәдә демишди: «О, өзүнә гаршы чох тәләбкар олса да, башгаларындан һеч вахт камиллик ҝөзләмир». Сәнин барәндә дә буну демәк олармы? Һәддән артыг тәләбкар олмамаг шәртилә башгаларындан нә исә ҝөзләмәк нормалдыр. Мәсәлән, валидејнләр ушагларынын гаршысына әлчатан мәгсәдләр гојанда вә бу мәгсәдләрә наил олмагда онлара көмәк едәндә ушагларын, адәтән, буна мүнасибәти јахшы олур. Ејнилә, ағсаггаллар да јығынҹаға ҝәләнләри руһән бөјүмәјә тәшвиг едә вә бунунла әлагәдар конкрет көмәклик ҝөстәрә биләрләр. Өзүнә гаршы таразлы бахыша малик олан ағсаггал мүлајим олаҹаг вә онда башгалары үчүн она јахынлашмаг чәтин олмајаҹаг (Ром. 12:3). Бир баҹы гејд етмишди: «Мән истәмәздим ки, ағсаггал һәр шеји зарафата салсын. Амма о, һәр заман ҹидди олса, она јахын дурмаг мүмкүн олмајаҹаг». Башга баҹы исә дејир: «Бәзи ағсаггаллар хасијјәтҹә һәддән артыг ҹидди олдугларындан адам онлардан горхур». Ағсаггаллар һәмиманлыларында елә тәәссүрат јаратмамалыдырлар ки, Јеһоваја хидмәт етмәк әслиндә севиндириҹи дејил. Ахы Јеһова «хошбәхт Аллаһ»дыр вә бүтүн баҹы-гардашлар Она хидмәтдән севинҹ дујмалыдырлар (1 Тим. 1:11).
Мәсулијјәтләрә ҹан атмаг
11. Јығынҹагда мәсулијјәтләрә ҹан атмаг нә демәкдир?
11 Павел јығынҹагдакы кишиләрә даһа чох мәсулијјәтләрә ҹан атмағы мәсләһәт ҝөрүрдү. Анҹаг онун мәгсәди онлары шөһрәтпәрәстлијә тәшвиг етмәк дејилди. О јазырды: «Нәзарәтчи вәзифәсинә ҹан атан адам јахшы иш ҝөрүр» (1 Тим. 3:1, 4). Јығынҹагда мәсулијјәтләрә «ҹан атан» гардашлардан тәләб олунур ки, өзләриндә һәмиманлыларына хидмәт етмәк үчүн лазым олаҹаг руһани хүсусијјәтләрә јијәләнмәк арзусуну инкишаф етдирсинләр. Әҝәр гардаш ән азы бир илдир ки, вәфтиз олубса вә 1 Тимотејә 3:8—13 ајәләриндә нәзарәтчиләр үчүн гојулан тәләбләрә кифајәт гәдәр ҹаваб верирсә, онда һәмин гардашы хидмәти көмәкчи кими төвсијә етмәк олар. Сәккизинҹи ајәдә ајдын дејилир ки, хидмәти көмәкчиләр «ҹидди олмалыдырлар».
12, 13. Ҝәнҹ гардашлар јығынҹагда мәсулијјәтләрә неҹә ҹан ата биләрләр?
12 Әҝәр сән јенијетмәлик дөврүндән чыхмаг үзрәсәнсә, һәгиги ибадәтә ҹидди јанашырсанса вә артыг вәфтиз олунмусанса, јығынҹагда мәсулијјәтләрә неҹә ҹан ата биләрсән? Үсуллардан бири тәблиғ хидмәтиндә даһа фәал олмагдыр. Мүхтәлиф јашлы гардашларла хидмәтә чыхырсанмы? Мүгәддәс Китабы өјрәнмәк истәјән инсанлары тапмаға чалышырсанмы? Әҝәр сән башгаларына јығынҹаг ҝөрүшләриндә сәсләнән мәсләһәтләрә ујғун тәлим верирсәнсә, мүәллимлик габилијјәтин ҝет-ҝедә јахшылашаҹаг. Үстәлик, Јеһованын јолларыны өјрәнән инсана шәфгәт ҝөстәрмәјин нә демәк олдуғуну баша дүшәҹәксән. О, һәјатында дәјишиклик етмәли олдуғуну дәрк едәндә сән сәбирлә вә нәзакәтлә она Мүгәддәс Китаб принсипләрини тәтбиг етмәјә көмәклик ҝөстәрмәји өјрәнәҹәксән.
13 Ҝәнҹ гардашлар јығынҹагдакы јашлы һәмиманлыларына мүхтәлиф ҹүр јардым ҝөстәрә биләрләр. Һәмчинин Падшаһлыг Залынын тәмизлик ишиндә иштирак етмәјиниз онун ҝөзәл вә сәлигәли ҝөрүнмәсини истәдијиниздән хәбәр верәҹәк. Әҝәр көмәк етмәјә һәмишә һазырсынызса, демәли, хидмәтә ҹидди јанашырсыныз. Тимотеј кими, сиз дә сәмими-гәлбдән јығынҹағын тәләбатларынын гајғысына галмағы өјрәнәҹәксиниз. (Филипилиләрә 2:19—22 ајәләрини оху.)
14. Ҝәнҹ гардашларын јығынҹагдакы мәсулијјәтләр үчүн јарарлы олуб-олмадыглары неҹә мүәјјән едилир?
14 Еј ағсаггаллар, ҝәнҹлијә хас олан истәкләрдән гачан, үстәлик, салеһлик, иман, мәһәббәт, сүлһ вә бу кими диҝәр ҝөзәл хүсусијјәтләрә ҹан атан ҝәнҹ гардашлара мүхтәлиф ишләр тапшырын (2 Тим. 2:22). Јығынҹагда онлара тапшырыг вериләндә бу мәсулијјәтләри дашымаға јарарлы олуб-олмадыглары сынаныр. Бунунла да онларын инкишафы һамыја бәлли олур (1 Тим. 3:10; 4:15).
Јығынҹагда вә аиләдә ҹидди олмаг
15. Павелин 1 Тимотејә 5:1, 2 ајәләриндәки сөзләринә әсасән, башгаларына ҹидди јанашдығымыз нәдән ҝөрүнәҹәк?
15 Ҹидди олмаг һәмчинин баҹы-гардашларымызын ләјагәтинә һөрмәт етмәк демәкдир. Павел Тимотејә мәсләһәт верәркән башгаларына һөрмәтлә јанашмағын ваҹиблијини вурғуламышды. (1 Тимотејә 5:1, 2 ајәләрини оху.) Бу хүсусилә дә әкс ҹинслә мүнасибәтдә ваҹибдир. Әјјубун гадынлара, хүсусилә дә һәјат јолдашына һөрмәт ҝөстәрмәси тәгдирәлајигдир. О чалышырды ки, башга гадынлара шәһвәтлә бахмасын (Әјј. 31:1). Әҝәр биз баҹы-гардашларымыза, һәгигәтән дә, ҹидди јанашырыгса, онларла ешгбазлыг етмәјәҹәјик вә бизим јанымызда өзләрини нараһат һисс етмәсинләр дејә артыг-әскик һәрәкәтләрә јол вермәјәҹәјик. Ики нәфәр евләнмәк мәгсәдилә бир-бирилә ҝөрүшәндә башгаларынын ләјагәтинә һөрмәт ҝөстәрмәләри хүсусилә ваҹибдир. Бундан әлавә, ҹидди мәсиһчи һеч вахт әкс ҹинсдән олан инсанын һиссләри илә ојнамајаҹаг (Сүл. мәс. 12:22).
16. Бу дүнја кишинин аиләдәки әр вә ата вәзифәсинә неҹә јанашыр? Бәс Мүгәддәс Китабда бу барәдә нә дејилир?
16 Үстәлик, биз диггәтли олмалыјыг ки, Аллаһын бизә аиләдә вердији вәзифәјә башдансовду јанашмајаг. Шејтан дүнјасы кишиләрин аиләдә әр вә ата вәзифәсини лаға гојур. Әјләнҹә сәнајеси аилә башчыларыны ҝүлүнҹ објектинә чевирәрәк онлары һөрмәтдән салыр. Анҹаг Мүгәддәс Јазылара әсасән, «әр... арвадынын башыдыр». Бу да әрин үзәринә бөјүк мәсулијјәт гојур (Ефес. 5:23; 1 Кор. 11:3).
17. Аиләви ибадәтдә иштирак етмәјимиз аиләдәки вәзифәмизә ҹидди јанашдығымызы неҹә ҝөстәрир? Изаһ един.
17 Әр аиләсини мадди ҹәһәтдән тәмин етмәлидир. Амма әҝәр о, аиләсинин руһани тәләбатларынын гајғысына галмырса, бу, онда мүдриклијин чатышмадығындан хәбәр верир (Ганун. т. 6:6, 7). Буна ҝөрә дә 1 Тимотејә 3:4 («Инҹил», 1993) ајәсиндә дејилир ки, јығынҹагда мәсулијјәтләрә ҹан атан аилә башчысы «өз аиләсини јахшы идарә етмәли, там ҹиддилик ҝөстәрәрәк, ушагларыны өз табелијиндә сахламалыдыр». Өзүндән соруш: «Аиләви ибадәт кечирмәк үчүн мүнтәзәм олараг вахт ајырыраммы?» Бәзи баҹылар, аз гала, әрләринә јалварырлар ки, руһани мәсәләләрдә башчылығы өз үзәрләринә ҝөтүрсүнләр. Һәр бир аилә башчысы вәзифәсинә неҹә јанашдығыны ҹидди ҝөтүр-гој етмәлидир. Мәсиһчи гадын исә аиләви ибадәти дәстәкләмәли вә онун уғурлу кечмәси үчүн әри илә әмәкдашлыг етмәлидир.
18. Ушаглар ҹидди олмағы неҹә өјрәнә биләрләр?
18 Ушаглар да һәјатда даһа ваҹиб шејләрә ҹидди јанашмалыдырлар (Ваиз 12:1). Балаҹалыгдан сәјлә ишләмәји өјрәнмәјин ушаглара зәрәри олмајаҹаг. Онлара јашларына вә габилијјәтләринә ујғун ев ишләри тапшырмаг олар (Мәрс. 3:27). Падшаһ Давуд ушаглыгдан чобанлыг едирди. Һәмчинин о, мусиги аләтләриндә чалмағы вә маһны бәстәләмәји өјрәнмишди. Белә ҝөзәл баҹарыгларына ҝөрә о, Исраил һөкмдары гаршысында хидмәт етмәк дәвәтини алмышды (1 Шам. 16:11, 12, 18—21). Шүбһәсиз, Давуд ушаг икән ојнајырды, ојана-бујана гачырды, бунунла белә, о, лазыми баҹарыглара да јијәләнмишди вә бөјүјәндә бу баҹарыгларындан Јеһованы иззәтләндирмәк үчүн истифадә едирди. О, ушаглыгда чобанлыг етдији үчүн падшаһ оланда Исраил халгына сәбирлә рәһбәрлик едирди. Бәс сиз, ҝәнҹләр, һансы баҹарыглара јијәләнирсиниз? Унутмајын ки, бу баҹарыглар сизә Јарадана хидмәт етмәјә вә ҝәләҹәкдә алаҹағыныз мәсулијјәтләрә һазырлашмаға көмәк едәҹәк.
Таразлы бахыш
19, 20. Сән өзүнә вә ибадәтинә неҹә јанашмаг нијјәтиндәсән?
19 Биз өзүмүзә таразлы јанашмағы, јәни һәддән артыг ҹидди, ағыр инсан олмамағы өјрәнә биләрик. Һеч кәс «һәддән артыг салеһ» олмаг истәмәзди (Ваиз 7:16). Бәзән евдә, ишдә, јахуд һәмиманлыларымызла үнсијјәт едәркән ҝәрҝин вәзијјәтләр јараныр. Јахшы оларды ки, онлары зарафата салыб садәҹә үстүндән кечәк. Евә ҝәлдикдә исә, бурада хош аб-һава һөкм сүрмәлидир. Бу аб-һава позулмасын дејә аилә үзвләри тәнгиди олмамалыдырлар. Јығынҹагда һәр биримиз дејиб-ҝүлмәји, бир-биримизлә үнсијјәтдән зөвг алмағы өјрәнә биләрик. Бунун үчүн сөһбәтләримиз вә тәлим вермәк үсулларымыз мүсбәт вә руһландырыҹы олмалыдыр (2 Кор. 13:10; Ефес. 4:29).
20 Биз Јеһованы вә Онун ганунларыны ҹидди гәбул етмәјән инсанларын арасында јашајырыг. Амма онлардан фәргли олараг, Јеһованын халгы Она итаәт етмәк вә садиг галмаг мәсәләсинә чох ҹидди јанашыр. Јеһоваја ‘там ҹиддијјәтлә’ хидмәт едән бөјүк бир халгын үзвү олмаг неҹә дә хошдур! Буна ҝөрә дә ҝәлин бундан сонра да һәјатымыза вә ибадәтимизә ҹидди јанашаг.
Неҹә ҹаваб верәрдиниз?
• Һәјата гејри-ҹидди јанашан дүнјанын руһуна јолухмамаг үчүн биздән нә тәләб олунур?
• Хидмәтә ҹидди јанашмаг, ејни заманда ондан севинҹ дујмаг неҹә мүмкүндүр?
• Јығынҹагдакы мәсулијјәтләрә һансы нијјәтдән ирәли ҝәләрәк ҹан атмалыјыг вә бизим ҹидди олуб-олмамағымыз бундан неҹә ҝөрүнүр?
• Нәјә ҝөрә баҹы-гардашларымызын вә аилә үзвләримизин ләјагәтинә һөрмәт етмәк ҹидди мәсәләдир?
[12-ҹи сәһифәдәки шәкилләр]
Әр аиләсинин һәм мадди, һәм дә руһани тәләбатларыны өдәмәлидир