Әлавәләр
Мәсиһин ҝәлишинә даир Даниелин пејғәмбәрлији
ДАНИЕЛ пејғәмбәр Исанын доғулмасындан 500 илдән бир гәдәр әввәл јашамышдыр. Јеһова бу пејғәмбәрә Исанын мәсһ едиләҹәји, јә’ни Мәсиһ тә’јин едиләҹәји вахты дәгиг мүәјјән етмәк үчүн мә’лумат вермишди. Даниелә дејилмишди: «Буну бил вә анла: Јерусәлими бәрпа едиб тикмәк үчүн верилән фәрманын чыхмасындан мәсһ олунмуш һөкмдара гәдәр једди једдииллик дөвр» вә «алтмыш ики једдииллик дөвр» кечәҹәк (Даниел 9:25).
Мәсиһин ҝәләҹәји вахты һесабламаг үчүн ајәдә хатырланан дөврүн нә вахт башладығыны мүәјјән етмәк лазымдыр. Пејғәмбәрликдә дејилир ки, һесабламаны «Јерусәлими бәрпа едиб тикмәк үчүн верилән фәрманын» чыхдығы вахтдан апармаг лазымдыр. Бу фәрман нә вахт чыхды? «Неһемја» китабында дејилдији кими, Јерусәлимин диварларынын бәрпа олунмасы һаггында фәрман «Падшаһ Артахшастанын һакимијјәтинин ијирминҹи или»ндә чыхды (Неһемја 2:1, 5-8). Тарихи мә’луматлара әсасән, Артахшаста падшаһын һакимијјәтинин биринҹи или б. е. ә. 474-ҹү илә дүшүр. Нәтиҹә е’тибарилә, онун һакимијјәтинин ијирминҹи или б. е. ә. 455-ҹи илә дүшүр. Бу, Даниелин пејғәмбәрлијиндә хатырланан вә Мәсиһин ҝәләҹәји вахты һесабламаға көмәк едән башланғыҹ тарихдир.
Даниел «мәсһ олунмуш һөкмдара» кими нә гәдәр вахт кечмәли олдуғуну ҝөстәрди. Пејғәмбәрликдә «једди једдииллик» вә «алтмыш ики једдииллик дөвр»дән, јә’ни ҹәми 69 једдииллик дөврдән, јә’ни һәфтәдән данышылыр. Бу дөвр, јә’ни һәфтә нә гәдәр давам етмәли иди? Мүгәддәс Китабын бә’зи тәрҹүмәләриндән ҝөрүнүр ки, сөһбәт ади һәфтәдән јох, иллик һәфтәдән ҝедир. Иллик һәфтә једди илә бәрабәрдир. Заман ваһиди кими иллик һәфтә анлајышы гәдим јәһудиләрә јахшы таныш иди. Мәсәлән, һәр једдинҹи ил Исраилдә шәнбә или һесаб едилирди (Чыхыш 23:10, 11). Беләликлә, пејғәмбәрликдә гејд олунан 69 «једдииллик» — һәр бири једди илә бәрабәр олан 69 дөврдүр. Демәли, 69 «једдииллик дөвр» 483 илә бәрабәрдир.
Инди ҝәлин вахты һесаблајаг. Әҝәр б. е. ә. 455-ҹи илдән 483 или һесабласаг, б. е. 29-ҹу илинә ҝәлиб чыхарыг. Мәһз һәмин ил Иса вәфтиз олунду вә Мәсиһ олду!a (Лука 3:1, 2, 21, 22). Даниелин пејғәмбәрлији неҹә дә гејри-ади шәкилдә јеринә јетди!
a Б. е. ә. 455-ҹи илдән б. е. ә. 1-ҹи илә гәдәр 454 ил кечмишдир. Б. е. ә. 1-ҹи илдән б. е. 1-ҹи илинә гәдәр олан вахт бир илдир (сыфырынҹы ил олмајыб). Б. е. 1-ҹи илиндән б. е. 29-ҹу илинә гәдәр 28 ил кечмишдир. Бу үч вахт кәсијинин ҹәми (454+1+28) 483 илә бәрабәрдир. Иса 70-ҹи иллик һәфтәнин әрзиндә, б. е. 33-ҹү илиндә ‘һәлак олду’ (Даниел 9:24, 26). «Даниелин пејғәмбәрлијинә диггәт јетирин!» (рус.) китабынын 11-ҹи фәслинә вә «Мүгәддәс Јазыларын дәрк едилмәси» енсиклопедијасынын 2-ҹи ҹилдинин 899-901-ҹи сәһифәләринә (инҝ.) бахын. Бу нәшрләр Јеһованын Шаһидләри тәрәфиндән дәрҹ едилмишдир.