1914-ҹү ил — Мүгәддәс Китаб пејғәмбәрликләриндә мүһүм тарих

МҮГӘДДӘС КИТАБ тәдгигатчылары 1914-ҹү илдә ваҹиб һадисәләрин олаҹағыны тәхминән 40 ил әввәл хәбәр вермәјә башладылар. Һәмин вахт һансы ваҹиб һадисәләр баш верди вә нәјә ҝөрә 1914-ҹү или тарихдә һәгигәтән дә мүһүм дөвр һесаб етмәк олар?

Лука 21:24 ајәсиндә јазылдығы кими, Иса демишдир: «Диҝәр халгларын [«бүтпәрәстләрин», İ–93] вахты тамам олунҹаја гәдәр, Јерусәлим халглар тәрәфиндән тапдаланаҹагдыр». Јерусәлим Јәһудејанын пајтахты вә Давуд падшаһын нәслиндән олан падшаһларын идарәетмә мәркәзи иди (Мәзмур 48:1, 2). Бу падшаһлар диҝәр халгларын һөкмдарларындан фәргләнирдиләр. Онлар Аллаһын тәмсилчиләри кими, «Рәббин тахтында» отурурдулар (1 Салнамәләр 29:23). Буна ҝөрә дә, Јерусәлим Јеһованын һакимијјәтини тәмсил едирди.

Аллаһын һакимијјәтинин ‘халглар тәрәфиндән тапдаланмасы’ неҹә вә нә вахт башламалы иди? Бу, б. е. ә. 607-ҹи илдә бабиллиләрин Јерусәлими әлә кечирдикләри вахт башлады. Давудун нәсил хәттиндән олан падшаһларын һөкмранлығы дајанды вә артыг «Рәббин тахтында» һеч ким отурмады (2 Падшаһлар 25:1-26). ‘Тапдаланма’ дөврү сонсузадәкми давам етмәли иди? Хејр, чүнки Језекелин пејғәмбәрлијиндә Јерусәлимин ахырынҹы падшаһы Сидгија һаггында дејилмишди: «Чалманы вә таҹы ҝөтүр... Һагг саһиби ҝәләнә гәдәр бәрпа олунмајаҹаг. Мән шәһәри она верәҹәјәм» (Језекел 21:26, 27). Давудун таҹыны тахмаға ‘һаггы’ олан шәхс, Иса Мәсиһдир (Лука 1:32, 33). Буна ҝөрә дә, Иса падшаһ олан заман ‘тапдаланма’ дөврү сона чатмалы иди.

Бу ваҹиб һадисә нә вахт баш вермәли иди? Иса, бүтпәрәстләрин мүәјјән дөвр әрзиндә һөкмранлыг едәҹәјини демишди. Бу дөврүн нә гәдәр сүрдүјүнү исә, «Даниел» китабынын 4-ҹү фәслиндән өјрәнмәк олар. Орада Бабил падшаһы Навуходоносорун пејғәмбәрлик јухусундан бәһс едилир. Падшаһ јухусунда нәһәнҝ бир ағаҹын кәсилдијини ҝөрүр. Ағаҹын көтүјү бөјүмәсин дејә, ону дәмир вә тунҹла чәнбәрләјирләр. Мәләк бәјан едир: «Једди ил [«вахт», КМ] кечәнә гәдәр белә галсын» (Даниел 4:10-16).

Мүгәддәс Китабда ағаҹ бә’зән падшаһлыг һакимијјәтини тәмсил едир (Језекел 17:22-24; 31:2-5). Символик ағаҹын кәсилмәси, Јерусәлимдәки падшаһларын тәмсил етдији Аллаһын һакимијјәтинин дајандырылмасыны билдирирди. Анҹаг, јухудан ҝөрүндүјү кими, Јерусәлимин халглар тәрәфиндән тапдаланмасы даими олмајаҹагды, бу јалныз «једди вахт» давам едәҹәкди. Бәс «једди вахт» нә гәдәр дөврү әһатә етмәли иди?

Вәһј 12:6, 14 ајәләриндән, үч јарым вахтын «мин ики јүз алтмыш» ҝүнә бәрабәр олдуғуну өјрәнирик. Демәли, «једди вахт» (ики дәфә чох давам едән мүддәт) 2 520 ҝүнә бәрабәрдир. Анҹаг Јерусәлимин зәбт едилмәсиндән һәрфи мә’нада 2 520 ҝүн кечдикдән сонра, бүтпәрәстләр Аллаһын һакимијјәтини тапдаламағы дајандырмадылар. Ҝөрүндүјү кими, бу пејғәмбәрлик даһа узун бир вахт мүддәтини әһатә едир. Језекел 4:6 вә Сајлар 14:34 ајәләриндәки «һәр ҝүн үчүн бир ил» принсипинә әсасән, «једди вахт» 2 520 илә бәрабәрдир.

2 520 ил, б. е. ә. 607-ҹи илин октјабр ајында, бабиллиләрин Јерусәлими әлә кечириб, Давудун нәслиндән олан падшаһы тахтдан девирдикләри вахт башлады. Бу дөвр б. е. 1914-ҹү илинин октјабр ајында баша чатды. Мәһз бу заман «диҝәр халгларын вахты» сона чатды вә Иса Мәсиһ ҝөјдә Падшаһ олдуa (Мәзмур 2:1-6; Даниел 7:13, 14).

Исанын әввәлҹәдән хәбәр вердији кими, онун сәмави Падшаһ кими ‘иштиракы’ (ЈД) ҝөрүнмәмиш фәлакәтләрлә мүшајиәт олунаҹаг. Бунлара мүһарибәләр, гытлыглар, зәлзәләләр, гырғынлар дахилдир (Матта 24:3-8; Лука 21:11). Бу һадисәләр инандырыҹы шәкилдә сүбут едир ки, 1914-ҹү илдә Аллаһын сәмави Падшаһлығы гурулмуш вә һәмин вахтдан е’тибарән бу пис системин ‘ахыр ҝүнләри’ башламышдыр (2 Тимотејә 3:1-5).