Аллаһын Падшаһлығы нәдир?

1. Һансы мәшһур дуаны мүзакирә едәҹәјик?

«РӘББИН ДУАСЫ» адланан бир дуа, бүтүн дүнјада мил­јонларла инсанлара танышдыр. Иса Мәсиһ ону бир нүмунә кими вермишдир. Бу дуа дәрин мә’налыдыр вә орада дејилән илк үч хаһиш Мүгәддәс Китабын әслиндә нә өјрәтдијини билмәјинизә көмәк едәҹәк.

2. Иса өз нүмунәви дуасына һансы үч хаһиши дахил етмишдир?

² Нүмунәви дуанын әввәлиндә Иса демишдир: «Сиз белә дуа един: “Еј ҝөјләрдә олан Атамыз, адын мүгәддәс тутулсун. Сәлтәнәтин [Падшаһлығын] ҝәлсин. Ҝөјдә олдуғу кими, јердә дә Сәнин ирадән олсун”» (Матта 6:9-13). Бу үч хаһишин маһијјәти нәдән ибарәтдир?

3. Аллаһын Падшаһлығы һаггында нәји билмәлијик?

³ Биз артыг Аллаһын ады һаггында хејли билијә јијәләнмишик. Һәмчинин Онун ирадәсинин нәдән ибарәт олдуғуну, инсанлар үчүн нәләр етдијини вә ҝәләҹәкдә нәләр етмәк нијјәтиндә олдуғуну мүзакирә етмишик. Бәс Иса: «Падшаһлығын ҝәлсин» — дејә дуа етмәји өјрәдәндә нәји нәзәрдә тутурду? Аллаһын Падшаһлығы нәдир? О, Аллаһын адыны неҹә мүгәддәс тутаҹаг? Падшаһлыг Аллаһын ирадәсинин һәјата кечмәси илә неҹә әлагәлидир?

АЛЛАҺЫН ПАДШАҺЛЫҒЫ НӘДИР?

4. Аллаһын Падшаһлығы нәдир вә онун Падшаһы кимдир?

⁴ Аллаһын Падшаһлығы Јеһова тәрәфиндән гурулмуш һөкумәтдир. Бәс Аллаһ бу Падшаһлыға кими Падшаһ тә’јин едиб? Иса Мәсиһи. Иса илә һеч ким мүгајисә олуна билмәз. О, «падшаһларын Падшаһы вә рәббләрин Рәбби»дир (1 Тимотејә 6:15, İ–93). Иса бүтүн инсан рәһбәрләринин, һәтта ән јахшыларынын белә, едә биләҹәјиндән даһа чох хејирхаһ ишләр ҝөрмәјә гадирдир.

5. Аллаһын Падшаһлығы һарада јерләшир вә һараны идарә едәҹәк?

⁵ Аллаһын Падшаһлығы һарада јерләшир? Бәс Иса инди һарададыр? Јәгин ки, сиз онун ишҝәнҹә дирәјиндә өлдүрүлдүкдән сонра дирилдилдијини вә ҝөјә галдырылдығыны хатырлајырсыныз (Һәвариләрин ишләри 2:33). Демәли, Аллаһын Падшаһлығы да ҝөјдә јерләшир. Мәһз буна ҝөрә дә, Мүгәддәс Китаб ону ‘Сәмави Падшаһлыг’ адландырыр (2 Тимотејә 4:18, İ–93). Аллаһын Падшаһлығы ҝөјдә олса да, јери идарә едәҹәк (Вәһј 11:15).

6, 7. Нәјә ҝөрә Иса ән јахшы Падшаһдыр?

⁶ Нәјә ҝөрә Иса ән јахшы Падшаһдыр? Чүнки өлүмүн онун үзәриндә һеч бир һөкмү јохдур. Мүгәддәс Китабда дејилир ки, инсан рәһбәрләриндән фәргли олараг, Иса «өлмәзлијә јеҝанә малик олан, әлчатмаз нурда јашајан» шәхсдир (1 Тимотејә 6:16, İ–93). Бу исә о демәкдир ки, Исанын едәҹәји бүтүн хејирхаһ ишләр әбәди олараг галаҹаг. О, ҝәләҹәкдә даһа бөјүк ишләр ҝөрәҹәк.

⁷ Мүгәддәс Китабда Иса һаггында јазылан пејғәмбәрлик сөзләринә диггәт јетирин: «Рәббин Руһу, һикмәт вә анлајыш руһу, өјүд-нәсиһәт вә гүдрәт руһу, билик вә Рәбб горхусу руһу онун үзәриндә олаҹаг. О, Рәбб горхусунда севинҹ тапаҹаг. Ҝөзләринин ҝөрдүјү илә һөкм етмәјәҹәк, гулағы илә ешитдијинә ҝөрә гәрар чыхармајаҹаг. Лакин о, јохсуллара һагг илә һөкм едәҹәк, јер үзүндәки фәгирләрин ишинә әдаләтлә гәрар чыхараҹаг» (Јешаја 11:2-4). Бу сөзләр ҝөстәрир ки, Иса әдаләтли вә шәфгәтли Падшаһ олаҹаг. Сиз онун рәһбәрлији алтында јашамаг истәмәздинизми?

8. Иса илә бирликдә кимләр идарә едәҹәк?

⁸ Анҹаг Иса тәк идарә етмәјәҹәк. Онун һакимијјәт шәрикләри вар. Һәвари Павел Тимотејә белә јазмышдыр: «Әҝәр тәһәммүл едириксә, Онунла да сәлтәнәт [падшаһлыг] едәҹәјик» (2 Тимотејә 2:12). Павел, Тимотеј вә Аллаһын сечдији башга садиг инсанлар сәмави Падшаһлыгда Иса илә бирликдә идарә едәҹәкләр. Бу шәрәфә нә гәдәр инсан лајиг ҝөрүләҹәк?

9. Иса Мәсиһин һакимијјәт шәрикләринин сајы нә гәдәрдир вә Аллаһ онлары нә вахтдан сечмәјә башламышдыр?

⁹ Бу китабын 7-ҹи фәслиндә хатырландығы кими, һәвари Јәһја пејғәмбәрлик ҝөрүнтүсүнү тәсвир етмишдир: «Бахыб ҝөрдүм ки, Гузу [Иса Мәсиһ], Сион дағында [онун ҝөјдәки падшаһ мөвгеји] дуруб, јанында да алынларында Онун вә Атасынын ады јазылмыш јүз гырх дөрд мин адам дурубдур». Бу 144 000-ә кимләр дахилдир? Јәһја изаһ едир: «Бунлар Гузу һара ҝедәрсә, ардынҹа ҝедәнләрдир. Бунлар Аллаһа вә Гузуја аид олаҹагларын илки олмаг үчүн инсанлар арасындан сатын алындылар» (Вәһј 14:1, 4). Ҝөрүндүјү кими, онлар Иса Мәсиһин, онунла бирликдә ҝөјдә идарә етмәк үчүн сечилмиш садиг давамчыларыдыр. Ҝөјләр һәјатына дирилдиләрәк, онлар Иса илә бирликдә «дүнја үзәриндә» падшаһлыг едәҹәкләр (Вәһј 5:10). Аллаһ 144 000-нин тамамланмасы үчүн, садиг мәсиһчиләри һәвариләрин дөврүндән сечмәјә башламышдыр.

10. Инсанлары Исанын вә 144 000 һакимијјәт шәрикинин идарә едәҹәкләри Аллаһын мәһәббәтини неҹә ҝөстәрир?

¹⁰ Ҝәләҹәкдә инсанлары Иса Мәсиһин вә онун 144 000 һакимијјәт шәрикинин идарә едәҹәји Аллаһын мәһәббәтини ҝөстәрир. Чүнки Иса инсан олмағын вә ағры-аҹынын нә демәк олдуғуну јахшы билир. Павел демишдир ки, Иса елә бир рәһбәр дејил ки, «зәифликләримиздә бизә аҹыја билмәсин; әксинә, бизим кими имтаһан едилмиш, ҝүнаһдан хариҹ, һәр шејдә бизә бәнзәјән» бир рәһбәрдир (Ибраниләрә 4:15; 5:8). Онун һәмкарлары да јер үзүндә јашајаркән изтираб чәкмиш вә чохлу сынаглара таб ҝәтирмишләр. Онлар гејри-камилликлә вә мүхтәлиф хәстәликләрлә мүбаризә апармалы олмушлар. Буна ҝөрә дә, биз әмин ола биләрик ки, онлар инсанларын гаршылашдыглары чәтинликләрә анлајышла јанашаҹаглар.

АЛЛАҺЫН ПАДШАҺЛЫҒЫ НӘЛӘРИ ҺӘЈАТА КЕЧИРӘҸӘК?

11. Нәјә ҝөрә Иса шаҝирдләрини Аллаһын ирадәсинин ҝөјдә јеринә јетмәси үчүн дуа етмәјә тәшвиг етди?

¹¹ Иса нүмунәви дуада Падшаһлығын ҝәлмәси һаггында дедикдән сонра шаҝирдләрини тәшвиг етди ки, Аллаһын ирадәсинин «ҝөјдә олдуғу кими, јердә дә» олмасы үчүн дуа етсинләр. Аллаһын мәскәни олан ҝөјләрдә садиг мәләкләр һәр заман Онун ирадәсини јеринә јетирмишләр. Лакин 3-ҹү фәсилдән өјрәндијимиз кими, бир пис мәләк Аллаһа итаәтсизлик ҝөстәрди вә Адәмлә Һәвваны ҝүнаһа тәһрик етди. Мүгәддәс Китабда бу пис мәләк олан Шејтан Иблис һаггында нә дејилдијини 10-ҹу фәсилдә әтрафлы мүзакирә едәҹәјик. Аллаһ Шејтанын вә онун ардынҹа ҝедән руһани варлыглар олан ҹинләрин мүәјјән вахта гәдәр ҝөјдә галмаларына изин верди. Буна ҝөрә дә, һәмин вахт әрзиндә ҝөјдәки руһани варлыгларын һамысы Аллаһын ирадәсини јеринә јетирмирдиләр. Анҹаг Падшаһлыг идарә етмәјә башлајанда һәр шеј дәјишмәли иди. Тахта јени отуран Падшаһ Иса Мәсиһ Шејтан илә вурушмалы иди (Вәһј 12:7-9).

12. Вәһј 12:10 ајәсиндә һансы ики ваҹиб һадисәдән данышылыр?

¹² Мүгәддәс Китабда бу һагда белә пејғәмбәрлик едилир: «Мән ҝөјдә бу сөзләри дејән јүксәк сәс ешитдим: “Инди Аллаһымызын хиласы, гүдрәти, сәлтәнәти [падшаһлығы] вә Онун Мәсиһинин һакимијјәти ҝәлди. Чүнки гардашларымызын иттиһамчысы [Шејтан], онлары Аллаһымызын өнүндә ҝеҹә вә ҝүндүз иттиһам едән деврилди”» (Вәһј 12:10). Бу ајәдә ики ваҹиб һадисәдән данышылдығына диггәт јетирдинизми? Биринҹиси, Иса Мәсиһин башчылығы алтында Аллаһын Падшаһлығы идарә етмәјә башлајыр. Икинҹиси, Шејтан ҝөјдән јерә атылыр.

13. Шејтанын ҝөјдән атылмасынын нәтиҹәси нә олду?

¹³ Бу ики һадисә нә илә нәтиҹәләнди? Мүгәддәс Китабда дејилир: «Буна ҝөрә, еј ҝөјләр вә ораларда јашајанлар, севинин!» (Вәһј 12:12). Бәли, салеһ мәләкләр севинирләр, чүнки Шејтан вә онун ҹинләри атылдыгдан сонра, ҝөјдә јалныз Јеһова Аллаһын садиг хидмәтчиләри галды. Орада сүлһ вә бирлик һөкм сүрүр. Инди ҝөјдә Аллаһын ирадәси һәгигәтән дә јеринә јетир.

14. Шејтан ҝөјдән атылдыгдан сонра јер үзүндә нә баш верди?

¹⁴ Бәс јер үзүндә нә баш верди? Мүгәддәс Китабда дејилир: «Јерә вә дәнизә вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:12). Шејтан ҝөјдән јерә атылдығы вә вахтынын аз галдығы үчүн гәзәб ичиндәдир. Онун гәзәби инсанлара фәлакәт ҝәтирир. Нөвбәти фәсилдән бу һагда даһа чох өјрәнәҹәјик. Анҹаг суал јараныр: Падшаһлыг Аллаһын ирадәсини јер үзүндә неҹә јеринә јетирәҹәк?

15. Аллаһын јер үчүн ирадәси нәдән ибарәтдир?

¹⁵ Аллаһын јер үчүн ирадәсинин нәдән ибарәт олдуғуну хатырлајаг. Бу һагда 3-ҹү фәсилдән өјрәнмишдик. Аллаһ Еден бағында ајдын шәкилдә ҝөстәрди ки, О, јер үзүнүн Ҹәннәт олмасыны вә орада салеһ инсанларын әбәди јашамасыны истәјир. Шејтан Адәмлә Һәвваны ҝүнаһа тәһрик етди вә бу, Аллаһын јер үзү илә әлагәдар ирадәсинин һәјата кечмәсини бир гәдәр ҝеҹикдирди. Лакин Аллаһын нијјәти дәјишмәди. Јеһованын «салеһләр өлкәни мүлк олараг алаҹаг, онлар орада әбәди мәскән салаҹаг» — дејә вердији вә’д һәлә дә гүввәдәдир (Мәзмур 37:29). Бу нијјәти Аллаһын Падшаһлығы һәјата кечирәҹәк. Неҹә?

16, 17. Даниел 2:44 ајәсиндән Аллаһын Падшаһлығы һаггында нә өјрәнирик?

¹⁶ Ҝәлин Даниел 2:44 ајәсиндәки пејғәмбәрлији нәзәрдән кечирәк. Орада дејилир: «О падшаһларын дөврүндә ҝөјләрин Аллаһы һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки падшаһлыглары әзиб-дағыдаҹаг, өзү исә әбәди галаҹаг». Биз бу ајәдән Аллаһын Падшаһлығы һаггында нә өјрәнирик?

¹⁷ Биринҹиси, орада дејилир ки, Падшаһлыг «о падшаһларын дөврүндә», јә’ни башга падшаһлыгларын һәлә мөвҹуд олдуғу бир вахтда гурулаҹаг. Икинҹиси, Падшаһлығын әбәди дураҹағыны өјрәнирик. Һеч бир һөкумәт ону мәғлуб едиб, јеринә кечә билмәјәҹәк. Үчүнҹүсү, пејғәмбәрликдә дејилир ки, Аллаһын Падшаһлығы илә бу дүнјанын падшаһлыглары арасында мүһарибә олаҹаг. Анҹаг Аллаһын Падшаһлығы галиб ҝәләҹәк. О заман бүтүн јер үзүнү ән јахшы вә ән әдаләтли бир һөкумәт идарә едәҹәк.

18. Аллаһын Падшаһлығы илә бу дүнјанын һөкумәтләри арасындакы һәлледиҹи мүһарибә неҹә адланыр?

¹⁸ Мүгәддәс Китабда Аллаһын Падшаһлығы илә бу дүнјанын һөкумәтләри арасында баш верәҹәк һәлледиҹи мүһарибә әтрафлы шәкилдә тәсвир едилир. Мәсәлән, орада дејилир ки, сон јахынлашдыгҹа пис руһи варлыглар ‘дүнјанын бүтүн һөкмдарларыны’ алдатмаг үчүн јаланлар јајмаға башлајаҹаглар. Онлар буну һансы мәгсәдлә едәҹәкләр? ‘Онлары [падшаһлары] Күлл-Ихтијар Аллаһын бөјүк ҝүнүндә баш верәҹәк мүһарибәјә топламаг’ үчүн. Дүнјанын падшаһлары «ибраниҹә Һар-Меҝидон адланан јерә» топлашаҹаглар (Вәһј 16:14, 16). Бу ики ајәдән ҝөрүндүјү кими, инсан һөкумәтләри илә Аллаһын Падшаһлығы арасындакы һәлледиҹи мүһарибә Һар-Меҝидон адланыр.

19, 20. Нәјә ҝөрә инди Аллаһын ирадәси јер үзүндә јеринә јетмир?

¹⁹ Аллаһын Падшаһлығынын Һар-Меҝидондакы гәләбәси нә ҝәтирәҹәк? Ҝәлин Аллаһын јер үчүн ирадәсинин нәдән ибарәт олдуғуну бир даһа јадымыза салаг. Јеһова Аллаһ истәјир ки, јерүзү Ҹәннәтдә Она хидмәт етмәкдән хошбәхтлик дујан салеһ вә камил инсанлар сакин олсун. Бу, нәјә ҝөрә инди мүмкүн дејил? Сәбәбләрдән бири одур ки, инсанлар ҝүнаһлыдырлар, онлар хәстәләнир вә өлүрләр. Анҹаг 5-ҹи фәсилдән өјрәндијимиз кими, Исанын бизим уғрумузда өлмәси сајәсиндә әбәди јашамаг имканымыз јаранды. Јәгин ки, «Јәһјанын Мүждәси»ндәки сөзләр јадыныздадыр: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһја 3:16).

²⁰ Диҝәр сәбәб, инсанларын чохунун пислик төрәтмәсидир. Онлар јалан, фырылдагчылыг вә әхлагсызлыг ичиндә батыблар, Аллаһын ирадәсини јеринә јетирмәк истәмирләр. Лакин Аллаһын Һар-Меҝидон мүһарибәсиндә пис инсанлар мәһв едиләҹәк (Мәзмур 37:10). Башга бир сәбәб исә ондан ибарәтдир ки, бу дүнјанын һөкумәтләри өз вәтәндашларыны Аллаһын ирадәсини јеринә јетирмәјә тәшвиг етмирләр. Һөкумәтләрин бир чоху тутарсыздыр, онларда зүлмкарлыг вә ганунсузлуг баш алыб ҝедир. Мүгәддәс Китабда чох дәгиг дејилмишдир: «Бир нәфәрин башга адама ағалыг етмәси башына бәла олур» (Ваиз 8:9).

21. Падшаһлыг Аллаһын ирадәсини јер үзүндә неҹә һәјата кечирәҹәк?

²¹ Һар-Меҝидондан сонра бүтүн јер үзүндә јалныз бир һөкумәт — Аллаһын Падшаһлығы олаҹаг. Бу Падшаһлыг Аллаһын ирадәсини һәјата кечирәҹәк вә инсанлара чохлу хејир-дуалар ҝәтирәҹәк. Шејтанын вә ҹинләрин тә’сири бир даһа олмајаҹаг (Вәһј 20:1-3). Исанын фидијә гурбанлығынын тә’сири сајәсиндә инсанлар артыг хәстәләнмәјәҹәк вә өлмәјәҹәкләр. Онлар Падшаһлығын рәһбәрлији алтында әбәди јашаја биләҹәкләр (Вәһј 22:1-3). Бүтүн јер үзү Ҹәннәт олаҹаг. Падшаһлыг Аллаһын ирадәсини јер үзүндә һәјата кечирәҹәк. О, һәмчинин Аллаһын адыны мүгәддәс тутаҹаг. Бу о демәкдир ки, бүтүн инсанлар Јеһованын адыны иззәтләндирәҹәк.

ПАДШАҺЛЫГ АЛЛАҺЫН ИРАДӘСИНИ ЈЕР ҮЗҮНДӘ НӘ ВАХТ ЈЕРИНӘ ЈЕТИРӘҸӘК?

22. Һарадан билирик ки, Аллаһын Падшаһлығы, Иса јер үзүндә олан заман вә ја дирилдикдән дәрһал сонра идарә етмәјә башламады?

²² Иса јер үзүндә оланда Падшаһлыг идарә етмәјә башламамышды. Чүнки Иса өз давамчыларына: «Падшаһлығын ҝәлсин» — дејә дуа етмәји өјрәдирди. Бәс Иса ҝөјә галханда Падшаһлыг идарә етмәјә башладымы? Хејр, чүнки һәм Петер, һәм дә Павел дејирди ки, Исанын дирилмәсиндән сонра Мәзмур 110:1 ајәсиндәки пејғәмбәрлик онун үзәриндә јеринә јетди. Бу пејғәмбәрликдә дејилир: «Рәбб мәним Ағама деди: “Дүшмәнләрини ајагларынын алтына саланадәк сағымда отур”» (Һәвариләрин ишләри 2:32-35; Ибраниләрә 10:12, 13). Ҝөрдүјүмүз кими, мүәјјән вахт кечмәли иди.

23. а) Аллаһын Падшаһлығы нә заман идарә етмәјә башлады? б) Нөвбәти фәсилдә сөһбәт нәдән ҝедәҹәк?

²³ Нә гәдәр ҝөзләмәк лазым иди? ХЫХ әсрин сонларында Мүгәддәс Китабын диггәтли тәдгигатчылары ҝөзләмә вахтынын 1914-ҹү илдә баша чатаҹағыны һесабладылар. (Бу тарихлә әлагәдар әтрафлы мә’луматы «Әлавәләр» бөлмәсиндә, 215-218-ҹи сәһифәләрдә тапмаг олар.) 1914-ҹү илдән е’тибарән баш верән һадисәләр бу һесабламаларын дәгиглијини сүбут едир. Мүгәддәс Китаб пејғәмбәрликләринин јеринә јетмәси Мәсиһин 1914-ҹү илдә Падшаһ олдуғуну вә Аллаһын Падшаһлығынын мәһз бу илдә идарә етмәјә башладығыны ҝөстәрир. Демәли, биз Шејтанын ‘вахтынын аз олдуғу’ бир дөврдә јашајырыг (Вәһј 12:12; Мәзмур 110:2). Әминликлә дејә биләрик ки, Падшаһлығын јер үзүндә Аллаһын ирадәсини һәјата кечирәҹәји вахт чох јахындыр. Бу ҝөзәл хәбәр сизи севиндирирми? Сиз буна инанырсынызмы? Нөвбәти фәсил, тезликлә ҝөзәл дәјишикликләр олаҹағына әмин олманыза көмәк едәҹәк.