1-3. а) Һәјатда дүзҝүн сечим етмәк истәјәнләр үчүн Јешуа нәјә ҝөрә ҝөзәл нүмунәдир? б) Гәрар верәркән нәји јадда сахламалыјыг?

«СЕЧМӘК» — бу, чох ҝүҹлү сөздүр. Чүнки сечим азадлығы олан инсанын гаршысында мүхтәлиф вариантлар олур вә һәјатыны һансы сәмтә јөнәлдәҹәји ән чох онун өзүндән асылы олур. Туталым, бир нәфәр јол ҝедир вә бирдән ҝөрүр ки, јол ики истигамәтә ајрылыр. О, һансы јолла ҝедәҹәк? Әҝәр онун конкрет ҝетмәк истәдији бир јер варса, онда бу јоллардан бири ону мәгсәдинә доғру апараҹаг, диҝәри исә тамамилә узаглашдыраҹаг.

² Мүгәддәс Китабда охшар вәзијјәтләрлә үзләшән бир чох инсанларын нүмунәләри вар. Мисал үчүн, Габил гәзәбә јол вермәк вә ја ону ҹиловламаг арасында сечим етмәли иди (Јар. 4:6, 7). Јешуа да сечим гаршысында дурмушду: һәгиги Аллаһа ибадәт етмәјә давам етсин, јохса јаланчы аллаһлара үз тутсун (Јешуа 24:15). Јешуанын мәгсәди Јеһоваја бағлы галмаг иди; беләликлә, о, елә бир јол сечди ки, бу, она мәгсәдинә наил олмаға көмәк етди. Анҹаг Габилин белә бир мәгсәди олмадығындан ону Јеһовадан узаглашдыран бир јол сечди.

³ Бәзән биз дә дүзҝүн јолда галмаг үчүн ваҹиб гәрарлар гәбул етмәли олуруг. Белә олан һалда, етдијимиз һәр шејдә Јеһоваја иззәт вермәк вә бизи Ондан узаглашдыраҹаг һәр бир шејдән кәнар дурмаг мәгсәдимиз барәдә унутмамалыјыг. (Ибраниләрә 3:12 ајәсини оху.) Бу вә нөвбәти мәгаләдә биз һәјатын једди саһәсинә вә бу саһәләрдә вердијимиз гәрарларын бизи Јеһовадан узаглашдырмасына јол вермәмәли олдуғумуза диггәт јетирәҹәјик.

ИШ ВӘ КАРЈЕРА

4. Ишләмәк нә үчүн ваҹибдир?

⁴ Мәсиһчиләр өзләрини вә аиләләрини доландырмалыдырлар. Мүгәддәс Китаб ҝөстәрир ки, әҝәр кимсә өз аиләсинин гејдинә галмаг истәмирсә, о, имансыздан бетәрдир (2 Салон. 3:10; 1 Тим. 5:8). Ајдын мәсәләдир ки, иш һәјатын ваҹиб бир һиссәсидир, анҹаг әҝәр диггәтли олмасан, иш вә карјера сәни Јеһовадан узаглашдыра биләр. Неҹә?

5. Иш тәклифләрини нәзәрдән кечирәркән һансы амилләрә диггәт јетирмәк лазымдыр?

⁵ Тәсәввүр ет ки, иш ахтарырсан. Әҝәр сән иш тапмағын елә дә асан олмадығы бир јердә јашајырсанса, гаршына чыхан илк иши гәбул етмәк истәјәҹәксән. Бәс әҝәр һәмин иш Мүгәддәс Китаб принсипләринә зидд ҝедирсә, јахуд о гәдәр вахтыны алыр ки, јығынҹаға вә аиләнә кифајәт гәдәр вахт ајыра билмирсән, онда неҹә? Ишсиз галмагданса, әлверишли олмајан ишдә ишләмәјин даһа јахшы олдуғуну дүшүнәрәк гаршына чыхан истәнилән иши гәбул едәҹәксән? Унутма ки, јанлыш јолу сечмәјин сәни Јеһовадан узаглашдыра биләр (Ибр. 2:1). Әҝәр иш ахтарырсанса вә ја ишини дәјишмәк истәјирсәнсә, дүзҝүн гәрар гәбул етмәкдә сәнә нә көмәк едәҹәк?

6, 7. а) Инсан ишлә бағлы гаршысына һансы мәгсәдләри гоја биләр? б) Һансы мәгсәд инсаны Јеһоваја јахынлашдырыр вә нәјә ҝөрә?

⁶ Артыг гејд едилдији кими, илк нөвбәдә, әсас мәгсәди јадда сахламаг лазымдыр. Өзүндән соруш: «Иш сечиминдә нәјә үстүнлүк верирәм?» Әҝәр сән дүнјәви ишә әсас мәгсәдә чатмаг, јәни Јеһоваја хидмәт едәрәк өзүнү вә аиләни доландырмаг үчүн бир васитә кими бахырсанса, Аллаһ сәнин бүтүн ҹәһдләрини хејир-дуаландыраҹаг (Мат. 6:33). Ишини итирәндә вә ја мадди чәтинлик чәкәндә Јеһова сәнин вәзијјәтинә биҝанә галмыр (Јешаја 59:1). О, «садиг инсанлары сынаглардан неҹә гуртармағы... билир» (2 Пет. 2:9).

⁷ Бәс әҝәр мәгсәдин садәҹә варланмагдырса, онда неҹә? Ола билсин, сән мәгсәдинә чатаҹагсан. Анҹаг унутма ки, буна наил олсан белә, бу ҹүр «мүвәффәгијјәт» сәнә баһа баша ҝәләҹәк — сәнин она ҝүҹүн чатмаз. (1 Тимотејә 6:9, 10 ајәләрини оху.) Әҝәр вар-дөвләт вә карјера һәјатында ваҹиб јер тутурса, онлар сәни Јеһовадан узаглашдыраҹаг.

8, 9. Валидејнләр ишә олан мүнасибәтләри илә бағлы нәји нәзәрә алмалыдырлар? Изаһ един.

⁸ Әҝәр сән валидејнсәнсә, сәнин нүмунәнин ушагларына неҹә тәсир етдији барәдә дүшүн. Онлар һәјатда сәнин үчүн нәјин даһа ваҹиб олдуғуну ҝөрүрләр — карјеранын, јохса Јеһова илә мүнасибәтләрин? Әҝәр онлар јүксәк мөвгејин, престиж вә вар-дөвләтин сәнин үчүн һәјатда биринҹи јердә дурдуғуну ҝөрүрләрсә, мәҝәр онлар бу ҹүр мәһвә апаран јолда сизин нүмунәнизи изләмәјәҹәкләр? Онларын сизә олан һөрмәти итмәјәҹәк? Бир ҝәнҹ мәсиһчи гејд едир: «Ҝөзүмү ачандан бәри атамын башы һәмишә ишә гарышыг олуб. Әввәлләр ҝөрүнүрдү ки, атам аиләни доландырмаг үчүн бу гәдәр ҝәрҝин ишләјир. Чүнки о истәјирди ки, биз һеч нәјин гајғысыны чәкмәјәк. Лакин сон бир нечә ил әрзиндә бәзи шејләр дәјишди. О, дурмадан ишләјир вә баһалы-баһалы шејләр алыр, һалбуки аиләмизин буна еһтијаҹы јохдур. Нәтиҹәдә, биз башгаларыны руһани шејләрә тәшвиг едән јох, даһа чох имканлы бир аилә кими ад газандыг. Үмид едирәм ки, атам нә вахтса аиләмизә мадди ҹәһәтдән чох, руһани ҹәһәтдән дәстәк олаҹаг».

⁹ Валидејнләр, һәјатынызда карјераја һәддән чох өнәм вермәклә онун сизи Јеһовадан узаглашдырмасына јол вермәјин. Өз нүмунәнизлә ушагларыныза ҝөстәрин ки, әлдә едә биләҹәјиниз ән бөјүк вар-дөвләтин мадди јох, руһани сәрвәт олдуғуна, һәгигәтән дә, инанырсыныз (Мат. 5:3).

10. Карјера сечәркән ҝәнҹләр нәји ҝөтүр-гој етмәлидирләр?

¹⁰ Бир ҝәнҹ кими, карјера гурмағы планлашдырырсанса, дүзҝүн јолу неҹә сечә биләрсән? Артыг өјрәндијимиз кими, сәнин сечимин һәјатыны һансы истигамәтә јөнәлтмәк истәјиндән асылы олаҹаг. Сечдијин саһә үзрә тәлим алмағын вә ишләмәјин Падшаһлығын мараглары үчүн даһа чох хидмәт етмәјинә көмәк едәҹәк, јохса, әксинә, Јеһовадан узаглашдыраҹаг? (2 Тим. 4:10). Сән дә хошбәхтлији артан вә азалан банк һесабларындан вә ја гијмәтли кағызлардан асылы олан инсанлара бәнзәмәк, јохса Давуд кими, Јеһоваја ҝүвәнмәк истәјирсән? О јазмышды: «Ҝәнҹлијимдән гоҹалығымадәк салеһин тәрк едилдијини, нәслинин чөрәк үчүн диләндијини ҝөрмәмишәм» (Мәз. 37:25). Јадда сахла ки, бир јол сәни Јеһовадан узаглашдырдығы һалда, диҝәри ән јахшы һәјата доғру апараҹаг. (Сүлејманын мәсәлләри 10:22; Малаки 3:10 ајәләрини оху.) Бәс сән һансы јолу сечәҹәксән?a

ИСТИРАҺӘТ ВӘ ӘЈЛӘНҸӘ

11. Мүгәддәс Китабда истираһәт вә әјләнҹә барәдә нә дејилир вә биз нәји јадда сахламалыјыг?

¹¹ Мүгәддәс Китаб нә дејиб-ҝүлмәји гадаған едир, нә дә истираһәт вә әјләнҹәнин вахт иткиси олдуғуну дејир. Һәвари Павел Тимотејә физики мәшгин фајдасы олдуғуну јазмышды (1 Тим. 4:8). Һәтта Мүгәддәс Китабда дејилир ки, «ҝүлмәјин өз вахты» вар, «рәгс етмәјин өз вахты», јәни бу, бизи истираһәтә кифајәт гәдәр вахт ајырмаға тәшвиг едир (Ваиз 3:4; 4:6). Анҹаг диггәтли олмасаг, истираһәт вә әјләнҹә бизи Јеһовадан узаглашдыра биләр. Неҹә? Дүзҝүн олмајан әјләнҹә вә истираһәт нөвү сечмәклә вә онлара һәддән артыг вахт сәрф етмәклә.

12. Истираһәт вә әјләнҹә нөвү сечәркән һансы амилләри нәзәрә алмалысан?

¹² Илк нөвбәдә, сечмәли олдуғун истираһәтин вә әјләнҹәнин нөвүнү мүәјјән ет. Бунун сәнә дүзҝүн сечим етмәкдә мүтләг көмәји дәјәҹәк. Гејд етмәк лазымдыр ки, чохлары тәрәфиндән гәбул олунан әјләнҹә нөвләринә Аллаһын нифрәт етдији гәддарлыг, спиритизм вә әхлагсызлыг дахилдир. Бундан әлавә, сечдијин истираһәт вә әјләнҹә нөвүнү һәртәрәфли ҝөтүр-гој ет. О, сәнә неҹә тәсир едир? Сәндә гәддарлыг, ҝүҹлү рәгабәт вә милләтчилик руһу јарадырмы? (Сүл. мәс. 3:31). Сәнә баһа баша ҝәлир? Башгаларыны бүдрәтмир ки? (Ром. 14:21). Әһатәндә кимләр олаҹаг? (Сүл. мәс. 13:20). Сәндә пис ишләрлә мәшғул олмаг арзусу ојатмыр ки? (Јаг. 1:14, 15).

13, 14. Истираһәтә нә гәдәр вахт ајыраҹағыны ҝөтүр-гој едәркән нәјә диггәт јетирмәлисән?

¹³ Ејни заманда, истираһәтә вә әјләнҹәјә нә гәдәр вахт сәрф етдијини дә ҝөтүр-гој ет. Өзүндән соруш: «Истираһәтә чох вахт сәрф етдијим үчүн руһани ишләрә лап аз вахтым галыр?» Әҝәр истираһәт вә әјләнҹәјә һәддән чох вахт ајырсан, ҝөрәҹәксән ки, асудә вахтын бир о гәдәр дә тәравәтли кечмир. Әслиндә, инсан әјләнҹәјә лазыми гәдәр вахт ајыранда бу, она даһа чох зөвг верир. Нәјә ҝөрә? Чүнки онлар, илк нөвбәдә, «даһа ваҹиб шејләри» јеринә јетирдикләринә ҝөрә һәр һансы әјләнҹәјә вахт ајыранда виҹданлары онлары нараһат етмир. (Филипилиләрә 1:10, 11 ајәләрини оху.)

¹⁴ Истираһәтә даһа чох вахт сәрф етмәк ҹәлбедиҹи ҝөрүнсә дә, бу сәни Јеһовадан узаглашдыра биләр. 20 јашы олан Ким адлы баҹы өз тәҹрүбәсиндән өјрәндикләри барәдә белә дејир: «Мән һәр һәфтәсону — ҹүмә, шәнбә вә базар ҝүнләри кечирилән бөјүк шәнликләрин һәр бириндә иштирак едирдим. Инди исә баша дүшүрәм ки, етмәли олдуғум даһа ваҹиб ишләр вар. Мисал үчүн, пионер кими хидмәт етдијим үчүн сәһәр саат 6-да јухудан дурмалыјам, буна ҝөрә дә ҝеҹә саат бирә-икијә кими шәнликләрдә иштирак етмирәм. Билирәм ки, шәнликләрин һамысы һеч дә пис дејил, амма онлар диггәти јајындыра биләр. Диҝәр мәшғулијјәтләр кими, онун да јерини билмәк лазымдыр».

15. Әјләнҹәнин ушаглара тәравәт ҝәтирмәси үчүн валидејнләр нә едә биләрләр?

¹⁵ Валидејнләр өзләринин вә ушагларынын мадди, руһани вә емосионал тәләбатларынын гајғысына галмаг мәсулијјәти дашыјырлар. Бир валидејн кими, бүтүн әјләнҹәләрин пис олдуғуну дүшүнмә. Ејни заманда да өвладларыны пис тәсирләрдән гору (1 Кор. 5:6). Аилән үчүн әсил тәравәт ҝәтирән истираһәт вә әјләнҹә нөвү сечмәздән әввәл јахшыҹа ҝөтүр-гој етb. Белә етмәклә, аиләликҹә сизи Јеһоваја јахынлашдыран бир јолу сечәҹәксиниз.

АИЛӘ МҮНАСИБӘТЛӘРИ

16, 17. Һансы вәзијјәт бир чох валидејнләри мәјус едир вә һарадан билирик ки, Јеһова онларын кечирдији ағры һиссини баша дүшүр?

¹⁶ Валидејнләрлә ушагларын бир-бирләринә дәрин мәһәббәт бәсләмәләри тәбиидир. Һәтта Јеһова халгына олан мәһәббәтини ананын өвладына олан мәһәббәти илә мүгајисә едир (Јешаја 49:15). Бу сәбәбдән аилә үзвләримиздән кимсә Јеһованы тәрк едәндә бизим дәрин кәдәр һисси кечирмәјимиз тәбиидир. Гызы јығынҹагдан кәнар едилән бир баҹы дејир: «Дахилимдә дәрин бошлуг һисс едирдим. Мән онун Јеһованы нә үчүн тәрк етдијини һеч ҹүрә баша дүшә билмирдим. Һәмишә өзүмү ҝүнаһландырыр вә ләнәтләјирдим».

¹⁷ Јеһова сәнин кечирдијин ағры һиссини баша дүшүр. О, Өзү дә илк јаратдығы аиләнин, еләҹә дә Дашгындан әввәл јашамыш инсанларын әксәријјәтинин галдырдығы гијама ҝөрә үрәјиндә кәдәрләнмишди (Јар. 6:5, 6). Һеч вахт белә иткијлә үзләшмәјәнләр үчүн бунун инсана нә дәрәҹәдә ағры вердијини баша дүшмәк чәтин ола биләр. Буна бахмајараг, аилә үзвләриндән киминсә јығынҹагдан кәнар едилмәсинин сәни Јеһовадан узаглашдырмасына јол вермә. Бәс белә олан һалда јашадығын ағры-аҹынын өһдәсиндән неҹә ҝәлә биләрсән?

18. Ушаглары Јеһованы тәрк едән валидејнләр нә үчүн өзләрини ҝүнаһландырмамалыдырлар?

¹⁸ Баш верән һадисәләрә ҝөрә өзүнү ҝүнаһландырма. Јеһова һәр кәсә сечим етмәк имканы верир вә аиләнин һәср олунмуш һәр бир үзвү «өз мәсулијјәт јүкүнү» дашыјыр (Галат. 6:5). Әввәл-ахыр, Јеһова сәни јох, ҝүнаһ ишләдән инсаны мәсулијјәтә ҹәлб едәҹәк (Јез. 18:20). Башгаларыны да ҝүнаһландырмаг лазым дејил. Низам-интизамы горумаг үчүн Јеһованын гәрарына һөрмәт ет. Јығынҹағы мүдафиә едән ағсаггаллара гаршы јох, Иблисә гаршы дур (1 Пет. 5:8, 9).

19, 20. а) Ушаглары јығынҹагдан кәнар едилән валидејнләр кәдәр һиссинин өһдәсиндән неҹә ҝәлә биләрләр? б) Һәмин валидејнләр нәјә үмид едә биләрләр?

¹⁹ Диҝәр тәрәфдән, әҝәр Јеһованы кәдәрләндирән јолу сечсән, Ондан узаглашаҹагсан. Аилә үзвләрин Јеһованы һәр шејдән, һәтта аилә телләриндән белә үстүн тутмаға гәти гәрарлы олдуғуну ҝөрмәлидирләр. Белә бир вәзијјәтлә үзләшәндә әминликлә өз руһанилијини гору. Өзүнү садиг мәсиһчи баҹы-гардашларындан тәҹрид етмә (Сүл. мәс. 18:1). Дуада Јеһоваја «гәлбини ачыб бошалт» (Мәз. 62:7, 8). Јығынҹагдан кәнар едилмиш аилә үзвү илә, һәтта e-mail васитәсилә олса белә, үнсијјәт етмәк үчүн бәһанә ахтарма (1 Кор. 5:11). Руһани ишләрлә мәшғул ол (1 Кор. 15:58). Јухарыда сөзләри ситат ҝәтирилән баҹы дејир: «Билирәм, Јеһоваја хидмәтими давам етдирмәли вә руһән мөһкәм галмалыјам ки, гызым Јеһоваја гајыданда она көмәк едә билим».

²⁰ Мүгәддәс Китабда дејилир ки, мәһәббәт «һәр шејә үмид едир» (1 Кор. 13:4, 7). Севдијимиз инсанын јенидән гајыдаҹағына үмид етмәкдә сәһв һеч нә јохдур. Јығынҹагдан кәнар едилән хејли инсан һәр ил төвбә едиб јенидән Јеһованын тәшкилатына гајыдыр. Төвбә едән инсана Јеһованын гәзәби сонсуз дејил. Чүнки О, бағышлајан Аллаһдыр (Мәз. 86:5).

МҮДРИК СЕЧИМ ЕДИН

21, 22. Ирадә азадлығындан неҹә истифадә етмәјә гәти гәрарлысан?

²¹ Јеһова јаратдығы инсанлара ирадә азадлығы вериб. (Ганунун тәкрары 30:19, 20 ајәләрини оху.) Амма биз бу азадлыгдан дүзҝүн истифадә етмәк мәсулијјәти дашыјырыг. Һәр бир мәсиһчи өзүндән сорушмалыдыр: «Мән һансы јолу сечмишәм? Иш вә карјеранын, истираһәт вә әјләнҹәнин, јахуд аилә мүнасибәтләринин мәни Јеһовадан узаглашдырмасына јол верирәмми?»

²² Јеһованын халгына ҝөстәрдији мәһәббәт һеч вахт түкәнмир. Амма әҝәр јанлыш јол сечсәк, өзүмүзү Јеһовадан узаглашдыра биләрик (Ром. 8:38, 39). Анҹаг бунун бизимлә баш вермәмәси үчүн һеч нәјин бизи Јеһовадан узаглашдырмасына јол вермәмәлијик. Нөвбәти мәгаләдә сечим едәркән диггәтли олмалы олдуғумуз диҝәр дөрд саһә мүзакирә олунаҹаг.

1, 2. а) Шејтан һансы фәндләрә әл атыр? б) Аллаһа јахынлашмагда бизә нә көмәк едәҹәк?

ЈЕҺОВА АЛЛАҺ инсанлары Онунла јахын мүнасибәтләр гурмаг истәјилә јарадыб. Лакин Шејтан истәјир ки, онун кими, биз дә Јеһоваја еһтијаҹымыз олмадығыны дүшүнәк. О, Еден бағында Һәвваны алдатдығы ҝүндән бәри бу јаландан истифадә етмәјә давам едир (Јар. 3:4—6). Тарих бојунҹа инсанларын әксәријјәти бу сәһви тәкрарлајыр.

² Хошбәхтликдән биз онун тәләсинә дүшмәјә биләрик. Чүнки «онун фәндләриндән бихәбәр дејилик» (2 Кор. 2:11). Шејтанын мәгсәди бизи јанлыш сечимләр етмәјә тәһрик едәрәк Јеһовадан узаглашдырмагдыр. Анҹаг әввәлки мәгаләдән ҝөрдүјүмүз кими, бизим карјера, әјләнҹә вә аилә мүнасибәтләриндә дүзҝүн сечим етмәк имканымыз вар. Бу мәгаләдә исә Шејтанын бизи јолдан чыхармаг үчүн истифадә етдији технолоҝија, сағламлыг, пул вә гүрур кими диҝәр дөрд саһә мүзакирә олунаҹаг. Бу саһәләрдә дүзҝүн сечим етмәјимиз Аллаһа јахынлашмағымыза көмәк едә биләр (Јаг. 4:8).

ТЕХНОЛОҜИЈА

3. Технолоҝијадан һансы јахшы вә пис мәгсәдләр үчүн истифадә етмәк олар? Изаһ един.

³ Мүасир електрон ҹиһазлар бүтүн дүнјада ҝениш јајылыб. Онлардан дүзҝүн истифадә етсәк, бизә чохлу фајдасы дәјә биләр. Јанлыш истифадә етдикдә исә онлар бизи сәмави Атамыздан узаглашдыран аләтә чеврилә биләр. Ҝөтүрәк компүтери. Һал-һазырда охудуғунуз журнал онун васитәсилә јазылыб вә чап едилиб. Компүтер бизә ахтарыш апармаға, үнсијјәт гурмаға көмәк едә биләр, ејни заманда биз онун сајәсиндә хош вахт кечирә биләрик. Анҹаг әҝәр јол версәк, биздә компүтердән асылылыг јарана биләр. Сатыҹылар инсанлары инандырмаға чалышырлар ки, онлар мүтләг ән сон технолоҝијалары әлдә етмәлидирләр. Мисал үчүн, бир оғлан арзусунда олдуғу компүтери алмаг үчүн ҝизлинҹә бир бөјрәјини сатмышды. Неҹә дә дүшүнҹәсиз һәрәкәтдир!

4. Бир мәсиһчи компүтердән чох истифадә етмәк вәрдишинин өһдәсиндән неҹә ҝәлди?

⁴ Ән аҹынаҹаглысы исә технолоҝијанын Јеһова илә мүнасибәтләримизә зәрәр вурмасына јол вермәкдир. 28 јашы олан Ҹонa адлы ҝәнҹ мәсиһчи дејир: «Мүгәддәс Китабда руһани шејләр үчүн “әлверишли вахты сатын алын” мәсләһәти верилдијини билирәм. Анҹаг компүтер мәсәләсинә ҝәлдикдә ән бөјүк дүшмәним өзүмәм». Чох вахт Ҹон вахтыны ҝеҹәјарысына кими компүтерин габағында кечирирди. О дејир: «Нә гәдәр чох јорулурдумса, бир о гәдәр дә јазышмагдан вә видеороликләрә бахмагдан әл чәкмәк чәтин олурду, һәтта бәзән зәрәрли олса белә». Бу вәрдишин өһдәсиндән ҝәлмәк үчүн Ҹон компүтерини елә програмлашдырмышды ки, јатмаг вахты ҝәләндә автоматик олараг сөнсүн. (Ефеслиләрә 5:15, 16 ајәләрини оху.)

5, 6. а) Валидејнләр ушагларына гаршы һансы мәсулијјәти дашыјырлар? б) Валидејнләр ушагларынын фајдалы үнсијјәт гурдугларына неҹә әмин ола биләрләр?

⁵ Валидејнләр, сиз ушагларынызын һәр бир аддымына јох, садәҹә компүтердән неҹә истифадә етдикләринә нәзарәт етмәлисиниз. Онларын әхлагсыз вә спиритизмлә бағлы сајтлара ҝирмәләринә, зоракы ојунлар ојнамаларына вә Интернетдә пис инсанларла үнсијјәт етмәләринә јол вермәјин. Белә бир шејә иҹазә версәниз, онлар фикирләшәҹәкләр ки, әҝәр валидејнләримизин веҹинә дејилсә, демәли, бунда пис һеч нә јохдур. Бир валидејн кими, сизин вәзифәниз өвладларынызы, хүсусилә дә јенијетмәләри Јеһовадан узаглашдыраҹаг һәр бир шејдән горумагдыр. Диггәт јетирмисинизсә, һәтта һејванлар белә балаларыны тәһлүкәдән горујурлар. Балалары үчүн бир балаҹа тәһлүкә јаранан заман ана ајынын нә едәҹәјини һеч тәсәввүрүнүзә ҝәтирирсиниз?! (Һушә 13:8 ајәси илә мүгајисә един.)

⁶ Ушагларынызын ҝәнҹ вә јашлы нүмунәви мәсиһчиләрлә фајдалы үнсијјәт гурмаларына көмәк един. Вә јадда сахлајын ки, өвладларынызын сизин онларла бирҝә вахт кечирмәјинизә еһтијаҹлары вар! Буна ҝөрә дә бирликдә ҝүлмәк, ојнамаг вә Аллаһа јахынлашмаға көмәк едән ишләрлә мәшғул олмаг үчүн вахт ајырын!b

САҒЛАМЛЫГ

7. Нәјә ҝөрә сағлам олмаг һамынын арзусудур?

⁷ «Өзүнү неҹә һисс едирсән?» Тез-тез истифадә олунан бу суал аҹы һәгигәти әкс етдирир. Улу валидејнләримиз Шејтанын онлары Аллаһдан узаглашдырмасына јол вердикләри үчүн биз һамымыз хәстәликләрә мүбтәлајыг. Хәстәликләр Шејтанын мәгсәдинә хидмәт едир, чүнки инсан хәстәләнәндә Јеһоваја хидмәт етмәк онун үчүн чәтинләшир. Өләндә исә Она үмумијјәтлә хидмәт едә билмир (Мәз. 115:17). Буна ҝөрә дә биз сағламлығымызы горумаг үчүн әлимиздән ҝәләни етмәк истәјирикc. Биз һәмчинин баҹы-гардашларымызын да сағламлығынын вә рифаһынын гајғысына галмалыјыг.

8, 9. а) Сағламлығымызла бағлы һәддән артыг нараһат олмамаг үчүн нә едә биләрик? б) Севинҹимизи горујуб сахламағын һансы фајдасы вар?

⁸ Лакин бу мәсәләдә ифрата вармамаг олдугҹа ваҹибдир. Бәзиләри пәһризләр, мүалиҹә үсуллары, сағлам вә фајдалы гида мәһсуллары барәдә сөһбәтләрә даһа чох вахт сәрф едирләр, нәинки Аллаһын Падшаһлығы һаггында хош хәбәрин тәблиғинә. Ола билсин, онлар бунунла башгаларына көмәк етдикләрини дүшүнүрләр. Анҹаг Падшаһлыг залларымызда вә ја конгресләримиздә дәрман мәһсуллары сатмаг вә мүалиҹә үсуллары реклам еләмәк дүзҝүн дејил. Нәјә ҝөрә?

⁹ Бизим бир јерә топлашмағымызын мәгсәди руһани мөвзулар барәдә данышмаг вә Аллаһын мүгәддәс руһунун бәһрәси олан севинҹ хүсусијјәтини инкишаф етдирмәкдир (Галат. 5:22). Биздән хаһиш едиб-етмәмәләриндән асылы олмајараг, дәрман препаратлары тәклиф етмәк вә ја сағламлыгла бағлы мәсләһәтләр вермәк диггәти руһани шејләрдән јајындыра вә башгаларыны севинҹдән мәһрум едә биләр (Ром. 14:17). Һәр бир кәс сағламлығынын гајғысына неҹә галаҹағына өзү гәрар вермәлидир. Үстәлик, һеч ким хәстәликләрдән тамамилә азад ола билмәз. Һәтта ән јахшы һәкимләр белә хәстәләнир, гоҹалыр вә өлүр. Һәмчинин сағламлығымыза ҝөрә нараһат олмагла өмрүмүзү узада билмәрик (Лука 12:25). Әксинә, Мүгәддәс Китабда дејилир ки, «үрәк севинҹи ҹан үчүн ән јахшы мәлһәмдир» (Сүл. мәс. 17:22).

10. а) Јеһованын фикринҹә, инсаны ҝөзәл едән һансы кејфијјәтләрдир? б) Биз нә заман тамамилә сағлам олаҹағыг?

¹⁰ Ејнилә, хариҹи ҝөрүнүшүн гајғысына галмаг да мүнасибдир. Анҹаг биз јашлылығын бүтүн әламәтләрини арадан галдырмаг үчүн дәридән-габыгдан чыхмамалыјыг. Онлар јеткинлијин, ләјагәтин вә дахили ҝөзәллијин әламәтләридир. Мисал үчүн, Мүгәддәс Китабда дејилир ки, «ағаран сачлар шәрәф таҹыдыр, салеһлик јолунун газанҹыдыр» (Сүл. мәс. 16:31). Јеһова бизим хариҹи ҝөрүнүшүмүздән чох, дахили варлығымызын ваҹиб олдуғуну дүшүнүр. Биз дә өзүмүзә бу ҹүр бахмағы өјрәнмәлијик. (1 Петер 3:3, 4 ајәләрини оху.) Буна ҝөрә дә, садәҹә даһа ҹәлбедиҹи ҝөрүнмәк үчүн ҹәрраһи әмәлијјатлара вә тибби проседурлара мәруз галараг өзүмүзү лазымсыз тәһлүкәләрә атмаг нә дәрәҹәдә мүдрик һәрәкәтдир? Јашындан асылы олмајараг, әсил ҝөзәллијин мәнбәји «Рәббин вердији севинҹ»дир (Неһ. 8:10). Биз јалныз јени дүнјада мүкәммәл сағламлыға говушаҹаг вә ҝөзәлләшәҹәјик (Әјј. 33:25; Јешаја 33:24). О вахтаҹан биз мүдрик сечимләр етмәли вә Јеһованын вәдләринә иман тәзаһүр етдирмәлијик. Бу, һал-һазырда һәјатдан һәзз алмагда вә сағламлығымыза ҝөрә һәддән артыг нараһат олмамагда бизә көмәк едәҹәк (1 Тим. 4:8).

ПУЛ

11. Пул неҹә тәлә ола биләр?

¹¹ Пулда вә дүрүстлүклә пул газанмагда пис һеч нә јохдур (Ваиз 7:12; Лука 19:12, 13). Лакин пулпәрәстлик севдасына дүшсәк, бу, бизи Јеһовадан мүтләг узаглашдыраҹаг (1 Тим. 6:9, 10). «Бу дөврүн гајғылары» — ҝүндәлик тәләбатларымыза ҝөрә һәддән артыг нараһат олмаг руһани шејләрә олан марағымызы өлдүрә биләр. Буна ҝөрә дә «вар-дөвләтин алдадыҹы гүввәси»нә, јәни узунөмүрлү хошбәхтлик вә тәһлүкәсизлик ҝәтирәҹәјинә инанмаг ағылсызлыгдыр (Мат. 13:22). Иса ајдын шәкилдә демишди ки, «һеч ким» һәм Аллаһа, һәм вар-дөвләтә гуллуг едә билмәз (Мат. 6:24).

12. Бу ҝүн чохлары неҹә тез бир заманда чохлу пул газанмаға чалышырлар вә биз бу тәләдән неҹә гача биләрик?

¹² Пула сәһв јанашма тәрзи јанлыш һәрәкәтләрә ҝәтириб чыхара биләр (Сүл. мәс. 28:20). Тез вә асан пул газанмаг имканына алданараг бәзиләри лотереја билетләри алыр вә чохсәвијјәли шәбәкә маркетингинә гошулурлар, һәтта јығынҹағын үзвләрини дә бу ишләрә ҹәлб едирләр. Башгалары исә гојдуглары пуллардан ағласығмаз дәрәҹәдә пул газанаҹаглары вәдинә алданырлар. Сәни алдатмаларына јол вермә. Узагҝөрән ол. Чүнки бир ҝөз гырпымында чохлу пул газанмаг хәјалдан башга бир шеј дејил.

13. Јеһованын пула олан нөгтеји-нәзәри дүнјанынкындан неҹә фәргләнир?

¹³ Биз «падшаһлығы вә Аллаһын салеһлијини» биринҹи јерә гојанда Јеһова әсас еһтијаҹларымызы өдәмәк ҹәһдләримизи хејир-дуаландырыр (Мат. 6:33; Ефес. 4:28). О истәмир ки, биз бүтүн ҝүнү ишләдикдән сонра ҝәлиб јығынҹагда ја јухулајаг, ја да отуруб пул барәдә фикирләшәк. Лакин бир чохлары дүшүнүр ки, бүтүн вахтларыны пул газанмаға һәср етсәләр, өзләрини тәһлүкәсиз ҝәләҹәклә тәмин едәҹәк вә һәјатларыны асанлашдыраҹаглар. Онлар чох вахт ушагларына да ејни мәгсәдләрә ҹан атмағы ашылајырлар. Анҹаг Иса бу ҹүр дүшүнҹә тәрзинин ағылсызлыг олдуғуну ҝөстәрди. (Лука 12:15—21 ајәләрини оху.) Бу дүшүнҹә тәрзи бизә Ҝеһазини хатырладыр. О һәм аҹҝөзлүјүнү тәмин едәҹәјини, һәм дә Јеһова илә јахшы мүнасибәтләрини горујуб сахлајаҹағыны дүшүнүрдү (2 Пад. 5:20—27).

14, 15. Нәјә ҝөрә пулун бизи мүдафиә едәҹәјини дүшүнмәк мүдриклик дејил? Нүмунә чәкин.

¹⁴ Дејиләнә ҝөрә, гарталын ҹајнағына ҝөтүрдүјү балыг һәддән артыг ағыр оларса вә ону бурахмазса, гартал боғула биләр. Буна бәнзәр бир шеј мәсиһчиләрин дә башына ҝәлә биләр. Һал-һазырда ағсаггал олан Алекс адлы бир гардаш дејир: «Адәтән, мән чох гәнаәтҹил инсанам. Чимәндә әлимә шампун бир аз чох төкүләрсә, онун јарысыны ҝери габа бошалдырам». Анҹаг бир ҝүн Алекс бир аз артыг пул газандыгдан сонра ишдән чыхыб пионер хидмәтинә башлаја биләҹәјини дүшүнәрәк фонд биржасында алғы-сатгы илә мәшғул олмаға башлады. О һәтта мүхтәлиф тәклифләри вә базар гијмәтләрини арашдырмаға башлады. Јығдығы вә брокерләрдән борҹ алдығы пуллара сәһмләр алды, чүнки мүтәхәссисләр һәмин сәһмләрин гијмәтинин галхаҹағыны прогноз вермишдиләр. Әфсуслар олсун ки, бу прогнозлар дүз чыхмады, сәһмләрин гијмәти бирдән-бирә дүшдү. Алекс дејир: «Мән пулларымы ҝери гајтармаға гәти гәрарлы идим. Дүшүнүрдүм ки, сәһмләри сахласам, гијмәтләри јенидән галхаҹаг».

¹⁵ Бир нечә ај әрзиндә Алекс башга һеч нә барәдә дүшүнә билмирди. О нә фикирләрини руһани шејләрә ҹәмләјә билирди, нә дә ки онун ҝөзүнә јуху ҝедирди. Сәһмләрин гијмәти исә галхмырды ки галхмырды. Алекс јығдығы бүтүн пулларыны итирди, һәтта евини сатмаг мәҹбуријјәтиндә галды. «Аиләмә чохлу әзаб-әзијјәт чәкдирдим», — дејә о әлавә едир. Анҹаг бу, онун үчүн ваҹиб бир дәрс олду: «Инди баша дүшүрәм ки, үмидләрини Шејтан системинә бағлајан һәр кәс ҝүҹлү мәјуслуға дүчар олаҹаг» (Сүл. мәс. 11:28). Һәгигәтән дә, үмидимизи бу системдә јығдығымыз пуллара, сәһмләрә вә пул газанмаг баҹарығымыза бағламаг «бу дөврүн аллаһы» Шејтана үмид бағламаг демәкдир (2 Кор. 4:4; 1 Тим. 6:17). О вахтдан бәри Алекс «хош хәбәр уғрунда» һәјатыны садәләшдириб. О дејир ки, бу, она вә аиләсинә хошбәхтлик ҝәтирди вә Јеһова илә мүнасибәтләрини мөһкәмләндирди. (Марк 10:29, 30 ајәләрини оху.)

ГҮРУР

16. Јахшы вә пис шејләрлә гүрур дујмаг арасында һансы фәрг вар?

¹⁶ Јахшы шејләрлә гүрур дујмаг гәбаһәт дејил. Мәсәлән, биз Јеһованын Шаһиди олдуғумуз үчүн һәр заман гүрур дујмалыјыг (Јер. 9:24). Бу сәбәбдән биз һәмишә јахшы гәрарлар вермәјә вә Аллаһын јүксәк нормаларына әмәл етмәјә чалышырыг. Анҹаг өзүмүз һагда һәддән артыг јүксәк фикирдә олсаг, Јеһовадан узаглаша биләрик (Мәз. 138:6; Ром. 12:3).

17, 18. а) Мүгәддәс Китабдан тәвазөкар вә тәкәббүрлү инсанларын нүмунәләрини чәк. б) Бир гардаш гүрурун ону Јеһовадан узаглашдырмамасы үчүн нә етди?

¹⁷ Мүгәддәс Китабда һәм гүрурлу, һәм дә тәвазөкар инсанларын нүмунәләри вар. Давуд падшаһ һәлимликлә Јеһованын рәһбәрлијини ахтарырды, Јеһова да ону хејир-дуаландырырды (Мәз. 131:1—3). Анҹаг Бабил падшаһлары Навуходоносорун вә Белшассарын исә гүруруну сындырды (Дан. 4:30—37; 5:22—30). Бу ҝүн дә бизим тәвазөкарлығымызы сынаға чәкән вәзијјәтләр јараныр. Јени јығынҹаға тәјин едилән вә хидмәти көмәкчи олан 32 јашлы Рајан гардаш дејир: «Мән тез бир заманда ағсаггал тәјин едиләҹәјими ҝөзләјирдим; бир ил кечди, анҹаг мән һәлә дә ағсаггал дејилдим». Рајан ағсаггалларын она лазыми һөрмәт ҝөстәрмәдикләрини дүшүнәрәк аҹыгландымы? О, јығынҹаглара ҝетмәјә сон гојараг гүрурун ону Јеһовадан вә Онун халгындан узаглашдырмасына јол вердими? Онун јериндә олсајдын, сән нә едәрдин?

¹⁸ Рајан хатырлајыр: «Мән нәшрләримиздән ҝеҹикән үмид барәдә олан мәлуматын һамысыны тапыб охудум» (Сүл. мәс. 13:12). «Баша дүшдүм ки, сәбир етмәји вә тәвазөкарлыг ҝөстәрмәји өјрәнмәлијәм, еләҹә дә Јеһованын мәнә тәлим вермәсинә јол вермәлијәм». Рајан өзү барәдә һәддән артыг дүшүнмәкдән әл чәкиб бүтүн диггәтини јығынҹагда вә тәблиғдә башгаларына көмәк етмәјә јөнәлтди. Чох кечмәмиш о, бир нечә нәфәрлә Мүгәддәс Китаб өјрәнмәси башлады вә һәмин инсанлар руһани ҹәһәтдән јахшы инкишаф едирдиләр. О дејир: «Бир ил јарымдан сонра ағсаггал тәјин олунанда бу, мәним үчүн ҝөзләнилмәз олду. Чүнки хидмәтимдән бөјүк севинҹ дујдуғум үчүн артыг нараһатчылыг кечирмирдим». (Мәзмур 37:3, 4 ајәләрини оху.)

ЈЕҺОВА ИЛӘ МҮНАСИБӘТЛӘРИНИ ГОРУ!

19, 20. а) Ҝүндәлик мәшғулијјәтләримизин бизи Јеһовадан узаглашдырмајаҹағына неҹә әмин ола биләрик? б) Јеһова илә јахын мүнасибәтләри олан һансы инсанларын нүмунәсини тәглид едә биләрик?

¹⁹ Бу ики мәгаләдә мүзакирә етдијимиз једди саһәнин һәр биринин һәјатымызда өз јери вар. Биз Јеһоваја хидмәт етмәјимизлә фәхр едирик. Хошбәхт аилә вә сағламлыг Јеһованын бизә бәхш етдији ән бөјүк әнамлардандыр. Баша дүшүрүк ки, иш вә пул ваҹиб еһтијаҹларымызы өдәмәјә көмәк едә биләр. Истираһәт бизи тәравәтләндирә, техноложи васитәләр исә чох фајдалы ола биләр. Анҹаг әҝәр бүтүн бунлара һәјатымызда дүзҝүн вахт вә дүзҝүн јер ајырмасаг, ибадәтимизә тәсир едәҹәк вә бизи Јеһовадан узаглашдыраҹаг.

²⁰ Әлбәттә, Шејтанын истәдији дә елә будур. Анҹаг әлиндән ҝәләни едә биләрсән ки, сәнинлә вә аилә үзвләринлә бу ҹүр фәлакәт баш вермәсин! (Сүл. мәс. 22:3). Јеһова Аллаһа јахынлаш вә Онунла мүнасибәтләрини гору. Мүгәддәс Китабда буна даир чохлу сајда ҝөзәл нүмунәләр вар. Мәсәлән, Ханок вә Нуһ «Аллаһла бир јол ҝедирди» (Јар. 5:22; 6:9). Муса «Ҝөзәҝөрүнмәз Аллаһы ҝөрүрмүш кими мәтин иди» (Ибр. 11:27). Иса Мәсиһ һәмишә Аллаһын бәјәндији ишләри ҝөрдүјү үчүн сәмави Атасы даим она дајаг олурду (Јәһ. 8:29). Бу инсанлардан өзүнә нүмунә ҝөтүр вә даим онлары изләмәјә чалыш. Һәмишә севин. Даима дуа ет. Һәр шејә ҝөрә миннәтдар ол (1 Салон. 5:16—18). Вә һеч нәјин сәни Јеһовадан узаглашдырмасына јол вермә!