«Ахыр ҝүнләрдә»ми јашајырыг?

1. Ҝәләҹәкдә нәләр баш верәҹәјини һарадан өјрәнә биләрик?

ҺӘР ДӘФӘ телевизорда хәбәрләрә бахдыгдан сонра, јәгин ки, сиз өзүнүздән сорушурсунуз: «Бу дүнјанын ахыры неҹә олаҹаг?» Гәфләтән вә ҝөзләнилмәдән елә бәдбәхт һадисәләр баш верир ки, сабаһ нә олаҹағыны һеч ким билмир (Јагуб 4:14). Лакин ҝәләҹәкдә нәләр баш верәҹәјини Јеһова билир (Јешаја 46:10). О Өз Кәламы олан Мүгәддәс Китабда јалныз бизим ҝүнләрдә баш верән дәһшәт вә изтираблар һаггында јох, һәмчинин јахын ҝәләҹәкдә инсанлары ҝөзләјән хејир-дуалар һаггында да габагҹадан хәбәр вермишдир.

2, 3. Шаҝирдләри Исадан нә сорушдулар вә о, нә ҹаваб верди?

² Иса Мәсиһ пислији јох едәҹәк вә јер үзүнү Ҹәннәтә чевирәҹәк Аллаһын Падшаһлығы һаггында данышырды (Лука 4:43). Инсанлар бу Падшаһлығын нә вахт ҝәләҹәјини билмәк истәјирдиләр. Бир дәфә шаҝирдләри Исадан сорушдулар: «Сәнин ҝәлишинә [«иштиракына», ЈД] вә дөврүн сонуна әламәт нә олаҹаг?» (Матта 24:3). Иса ҹавабында билдирди ки, бу системин сонунун нә вахт олаҹағыны јалныз Јеһова Аллаһ билир (Матта 24:36). Иса шаҝирдләринә сонун нә заман ҝәләҹәјини дәгиг демәсә дә, Падшаһлығын бәшәријјәтә әсл сүлһ вә тәһлүкәсизлик ҝәтирмәсиндән бир аз әввәл јер үзүндә баш верәҹәк һадисәләрдән хәбәр верди. Һәмин пејғәмбәрликләр бизим ҝүнләрдә јеринә јетир.

³ Буна әмин олмаздан әввәл, ҝәлин ҝөјләрдә баш верән бир мүһарибәни нәзәрдән кечирәк. Бу мүһарибәни инсанлардан һеч ким ҝөрмәсә дә, онун нәтиҹәси һамыја тә’сир едир.

ҜӨЈДӘ МҮҺАРИБӘ

4, 5. а) Иса Падшаһ олдугдан тез сонра ҝөјдә нә баш верди? б) Вәһј 12:12 ајәсинә әсасән, ҝөјдәки мүһарибә нәјә ҝәтириб чыхарды?

⁴ Әввәлки фәсилдән өјрәндик ки, Иса Мәсиһ 1914-ҹү илдә ҝөјдә Падшаһ олду (Даниел 7:13, 14). Иса падшаһлыг һакимијјәти алдыгдан сонра фәалијјәтә башлады. Мүгәддәс Китабда дејилир: «Ҝөјдә мүһарибә олду. Микајыл [Иса] вә онун мәләкләри әждаһа [Шејтан Иблис] илә вурушдулар. Әждаһа вә онун мәләкләри онлара гаршы дөјүшдүләр»a. Шејтан вә онун пис мәләкләри мәғлуб олдулар вә јерә атылдылар. Ҝөјләр пис тә’сирдән тәмизләнән заман Аллаһын садиг руһани оғуллары неҹә дә севинирдиләр! Анҹаг бу севинҹ инсанлара нәсиб олмады. Мүгәддәс Китабда дејилир: «Јерә... вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:7, 9, 12).

⁵ Бу мүһарибәнин нәјә ҝәтириб чыхардығына диггәт јетирин: о андан е’тибарән Шејтан јер үзүндә јашајанларын һамысыны гәзәблә фәлакәтә дүчар едир. Бу фәсилдән ҝөрәҹәјимиз кими, бунлар мәһз бизим ҝүнләрдә баш верир. Лакин гуртулуш јахындыр. «Вахтынын аз олдуғуну» Шејтанын өзү дә билир. Мүгәддәс Китабда бу дөвр ‘ахыр ҝүнләр’ адланыр (2 Тимотејә 3:1). Тезликлә Аллаһын јер үзүнү Иблисин тә’сириндән азад едәҹәјини билмәк неҹә дә тәсәлливериҹидир! Ҝәлин бизим ҝүнләрдә Мүгәддәс Китабын һансы пејғәмбәрликләринин јеринә јетдијини нәзәрдән кечирәк. Бу пејғәмбәрликләр ахыр ҝүнләрдә јашадығымызы вә тезликлә Аллаһын Падшаһлығынын Јеһованы севәнләрә сонсуз хејир-дуалар бәхш едәҹәјини сүбут едир. Иса бизим дөврә өз тә’сирини ҝөстәрәҹәк әламәтдән бәһс етмишди. Әввәлҹә ҝәлин бу әламәтин дөрд сәҹијјәви хүсусијјәтини мүзакирә едәк.

АХЫР ҜҮНЛӘРИН СӘҸИЈЈӘВИ ХҮСУСИЈЈӘТЛӘРИ

6, 7. Исанын мүһарибәләр вә гытлыглар һаггындакы сөзләри бу ҝүн неҹә јеринә јетир?

⁶ «Халг халга, дөвләт дөвләтә гаршы галхаҹаг» (Матта 24:7). Сон јүз ил әрзиндә мүһарибәләрдә милјонларла инсан һәлак олмушдур. Британијалы бир тарихчи гејд етмишдир: «ХХ әср бәшәр тарихиндә ән ганлы әср олмушдур. [...] Арабир гысамүддәтли сакитлик дөврләрини нәзәрә алмасаг, бу әср сонсуз мүһарибәләр әсри олмушдур». Дүнја һадисәләрини арашдыран бир институтун һесабатында дејилир: «Тәкҹә ХХ әсрдә баш верән мүһарибәләрин гурбанлары, ерамызын әввәлки јүзилликләриндә өләнләрин сајындан үч дәфә чохдур» («Worldwatch Institute»). 1914-ҹү илдән е’тибарән һәрби тоггушмаларда 100 милјондан чох инсан һәјатыны итирмишдир. Мүһарибәдә әзизини итирмәјин нә гәдәр ағыр олдуғуну баша дүшсәк дә, әзизләри мүһарибәдә һәлак олан милјонларла инсанын кечирдији ағры-аҹыны тәсәввүр едә билмәрик.

⁷ «Гытлыглар... олаҹагдыр» (Матта 24:7). Тәдгигатларын ҝөстәрдији кими, сон 30 ил әрзиндә гида мәһсулларынын истеһсалы олдугҹа артмышдыр. Бунунла белә, инсанлар аҹлыг чәкир, чүнки әрзаг алмаға пуллары, јахуд да мәһсул јетишдирмәк үчүн торпаг саһәләри јохдур. Инкишаф етмәкдә олан өлкәләрдә милјарддан чох инсан ҝүн әрзиндә бир доллара вә ја даһа аз мәбләғә јашамаг мәҹбуријјәтиндәдир. Бу инсанларын әксәријјәти аҹлыг ичиндә јашајыр. Үмумдүнја Сәһијјә Тәшкилатынын һесабатына әсасән, һәр ил беш милјондан чох ушаг әсас е’тибарилә аҹлыгдан өлүр.

8, 9. Исанын зәлзәләләр вә гырғынлар һаггында дедији сөзләрин јеринә јетдији нәдән ҝөрүнүр?

⁸ «Ҝүҹлү зәлзәләләр... олаҹагдыр» (Лука 21:11). АБШ-ын Ҝеоложи хидмәт органынын һесабатына әсасән, 1990-ҹы илдән е’тибарән һәр ил орта һесабла, биналарын зәдәләнмәсинә вә торпагда чатларын әмәлә ҝәлмәсинә сәбәб олан 17 ҝүҹлү зәлзәлә баш верир. Бундан әлавә, демәк олар ки, һәр ил биналарын тамамилә дағылмасына јол ачан зәлзәләләр олур. Башга бир мәнбәдә дејилир: «Сон 100 ил әрзиндә зәлзәләләр јүз минләрлә инсанын һәјатына сон гојмушдур. Мүасир технолоҝија исә өләнләрин сајыны азалда билмәмишдир».

⁹ «Гырғынлар... олаҹагдыр» (Лука 21:11). Тибби наилијјәтләрә бахмајараг, дүнјада јени хәстәликләр јараныр, көһнәләр исә ҝет-ҝедә шиддәтләнир. Бир һесабатда дејилдији кими, сон он ил әрзиндә вәрәм, малјарија, вәба кими јахшы таныш олан 20 хәстәлик нөвү ҝениш јајылмышдыр вә онлардан бә’зиләри илә дәрманларын көмәјилә мүбаризә апармаг ҝет-ҝедә чәтинләшир. Ән азы 30-а јахын јени хәстәлик ортаја чыхмышдыр. Онларын бир чоху мүалиҹәолунмаз вә һәтта өлүмҹүл хәстәликләрдир.

АХЫР ҜҮНЛӘРДӘ ИНСАНЛАР НЕҸӘ ОЛАҸАГЛАР?

10. 2 Тимотејә 3:1-5 ајәләриндә габагҹадан хәбәр верилдији кими, бу ҝүн инсанлара һансы хүсусијјәтләр хасдыр?

¹⁰ Мүгәддәс Китабда јалныз ахыр ҝүнләрдә баш верәҹәк һадисәләр дејил, һәмчинин бу заман инсан ҹәмијјәтинин неҹә дәјишәҹәји дә тәсвир олунур. Һәвари Павел инсанларын һансы әһвал-руһијјәдә олаҹагларыны тәсвир етмишдир. 2 Тимотејә 3:1-5 ајәләриндә дејилир: «Ахыр ҝүнләрдә чәтин анлар ҝәләҹәкдир». Павел ахыр ҝүнләрдә инсанлара бу хүсусијјәтләрин хас олаҹағыны демишдир:

• худбин

• пулпәрәст

• валидејнләринә итаәт етмәјән

• гүдсијјәтдән мәһрум

• шәфгәтсиз

• нәфсини сахламајан

• азғын

• зөвгү Аллаһдан чох севән

• Аллаһ јолунда имиш кими ҝөрүнән, амма о јолун гүдрәтини инкар едән.

11. Мәзмур 92:7 ајәси пис инсанларла нә баш верәҹәјини неҹә ҝөстәрир?

¹¹ Гоншулуғунузда јашајан инсанларда бу кими хүсусијјәтләри ҝөрүрсүнүзмү? Чох ҝүман ки, бу беләдир. Ахы бу ҝүн дүнја белә инсанларла долудур. Бу ҝөстәрир ки, Аллаһ тезликлә һәрәкәтә кечәҹәк, чүнки Мүгәддәс Китабда дејилир: «Писләр от кими битсә дә, бүтүн шәр иш ҝөрәнләр чичәкләнсә дә, әбәдилик јох олаҹаглар» (Мәзмур 92:7).

СЕВИНМӘК ҮЧҮН СӘБӘБЛӘР

12, 13. Сон ҝүнләр әрзиндә «билик» неҹә артды?

¹² Мүгәддәс Китабда габагҹадан хәбәр верилдији кими, ахыр ҝүнләр чохлу фәлакәтләр ҝәтирир. Һәтта бу нараһат дүнјада белә, Јеһованы севәнләрин севинмәјә әсаслары вар.

¹³ «Билик артаҹаг» — бу һагда Мүгәддәс Јазыларын «Даниел» китабында габагҹадан дејилмишдир. Бу сөзләр нә вахт јеринә јетмәли иди? ‘Ахыр заманда’, јә’ни сон ҝүнләр әрзиндә (Даниел 12:4). 1914-ҹү илдән башлајараг, Јеһова сәмими инсанларын Мүгәддәс Китабы даһа јахшы баша дүшмәләринә хүсуси тәрздә көмәк етмәјә башлады. Онлара Аллаһын ады вә Иса Мәсиһин фидијә гурбанлығы илә әлагәдар нијјәтләри, өләнләрин вәзијјәти вә дирилмә һаггында дәјәрли һәгигәтләр ачыгланды. Бундан әлавә, Јеһованын хидмәтчиләри һәјатын әсл хошбәхтлик ҝәтирмәси вә Аллаһы иззәтләндирмәси үчүн нә етмәли олдугларыны да өјрәндиләр. Онлар Падшаһлығын һансы ролу ојнадығыны вә Аллаһын ирадәсини јер үзүндә неҹә һәјата кечирәҹәјини даһа јахшы баша дүшдүләр. Әлдә етдикләри биликләр онлары нәјә тәшвиг етди? Бу суал ахыр ҝүнләрдә јеринә јетән башга бир пејғәмбәрликлә сых бағлыдыр.

14. Падшаһлыг һаггындакы хош хәбәр нә дәрәҹәдә ҝениш бәјан едилир вә бу хәбәри кимләр тәблиғ едир?

¹⁴ «Сәмави Сәлтәнәт [Падшаһлыг] һаггында олан бу Мүждә... бүтүн дүнјада тәблиғ олунаҹагдыр». Бунун баш верәҹәјини, Иса Мәсиһ «дөврүн сонуна» даир пејғәмбәрлијиндә хәбәр вермишди (Матта 24:3, 14). Падшаһлыг һаггындакы хош хәбәр, јә’ни Падшаһлығын нә олдуғу, нәләр едәҹәји вә һансы хејир-дуалары ҝәтирәҹәји инди бүтүн дүнјада 230-дан чох өлкә вә әразидә, тәхминән 400 дилдә тәблиғ олунур. Бу севиндириҹи хәбәри «һәр милләтдән, бүтүн гәбиләләрдән, халглардан вә дилләрдән олан» милјонларла Јеһованын Шаһидләри бәјан едир (Вәһј 7:9). Онлар Аллаһын Кәламынын әслиндә нәји өјрәтдијини билмәк истәјән мил­јонларла инсанла евдә пулсуз Мүгәддәс Китаб өјрәнмәси кечирирләр. Бу пејғәмбәрлијин һәјата кечмәси әсл мө’ҹүзәдир, хүсусилә дә нәзәрә алсаг ки, Иса һәгиги мәсиһчиләрә ‘һамынын нифрәт едәҹәјини’ демишди (Лука 21:17).

СИЗ НЕҸӘ ДАВРАНАҸАГСЫНЫЗ?

15. а) Ахыр ҝүнләрдә јашадығымыза инанырсынызмы? Изаһ един. б) Јеһоваја гаршы чыханлара «сон» нә ҝәтирәҹәк вә Аллаһын Падшаһлығынын рәһбәрлијинә табе оланларла нә баш верәҹәк?

¹⁵ Мүгәддәс Китабын бу пејғәмбәрликләринин јеринә јетмәси, сизи ахыр ҝүнләрдә јашадығымыза әмин едирми? Јеһова хош хәбәрин тәблиғини дајандырмағы гәрара алдығы заман «сон» ҝәләҹәкдир (Матта 24:14). «Сон» дедикдә, Аллаһын јер үзүнү писликдән тәмизләјәҹәји вә Она биләрәкдән гаршы чыханлары мәһв едәҹәји вахт нәзәрдә тутулур. Јеһова буну етмәји Исаја вә онун гүдрәтли мәләкләринә тапшырмышдыр (2 Салоникилиләрә 1:6-9). Шејтан вә онун ҹинләри бир даһа халглары аздырмајаҹаг. О заман Аллаһын Падшаһлығы, онун әдаләтли рәһбәрлијинә табе олан бүтүн инсанлара бол хејир-дуалар ҝәтирәҹәк (Вәһј 20:1-3; 21:3-5).

16. Ахыр ҝүнләрдә неҹә давранмаг мүдриклик оларды?

¹⁶ Шејтанын системи тезликлә мәһв едиләҹәји үчүн өзүмүздән сорушмалыјыг: «Мән нә етмәлијәм?» Јеһова вә Онун нормалары һаггында өјрәнмәјә давам етмәк ән мүдрик давранышдыр (Јәһја 17:3). Мүгәддәс Китабы диггәтлә өјрәнмәјә чалышын. Јеһованын ирадәсини јеринә јетирмәк арзусу олан инсанларла мүмкүн гәдәр сых үнсијјәтдә олун (Ибраниләрә 10:24, 25). Јеһованын ачдығы ваҹиб һәгигәтләри даһа дәриндән анламаға вә һәјатынызы Онун нормаларына ујғунлашдырараг Аллаһы разы салмаға чалышын (Јагуб 4:8).

17. Нәјә ҝөрә буҝүнкү системин сону чохлары үчүн ҝөзләнилмәз олаҹаг?

¹⁷ Иса габагҹадан хәбәр вермишдир ки, инсанларын әксәријјәти ахыр ҝүнләр һаггындакы пејғәмбәрлијә мәһәл гојмајаҹаглар. Писләрин мәһви гәфләтән вә ҝөзләнилмәдән олаҹаг. Сонун ҝәлиши бир чох инсанлары гәфләтән, ҝеҹә ҝәлән оғру кими јахалајаҹаг (1 Салоникилиләрә 5:2). Иса хәбәрдарлыг етмишдир: «Нуһун ҝүнләри неҹә идисә, Инсан Оғлунун ҝәлиши дә елә олаҹагдыр. Чүнки Нуһун ҝәмијә ҝирдији ҝүнә гәдәр, туфандан әввәлки ҝүнләрдә, инсанлар јејиб, ичиб, евләниб, әрә ҝедирдиләр. Вә туфан ҝәлиб һамысыны апарынҹаја гәдәр неҹә бихәбәр идиләрсә, Инсан Оғлунун ҝәлиши дә бу ҹүр олаҹагдыр» (Матта 24:37-39).

18. Исанын һансы хәбәрдарлығына там ҹиддијјәтлә јанашмаг лазымдыр?

¹⁸ Динләјиҹиләрини хәбәрдар етмәк истәјәрәк, Иса демишдир: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын. Чүнки о Ҝүн бир тор кими јер үзүндә јашајанларын һамысына раст ҝәләҹәкдир; буна ҝөрә дә бүтүн баш верәҹәк бу фәлакәтләрдән гачынмаға лајиг олмаг вә Инсан Оғлунун һүзуруна чыха билмәк [онун тәрәфиндән бәјәнилмәк] үчүн, һәр ан дуа един вә ајыг олун» (Лука 21:34-36). Исанын сөзләринә там ҹиддијјәтлә јанашмаг чох ваҹибдир. Нә үчүн? Чүнки Јеһова Аллаһын вә «Инсан Оғлунун» — Иса Мәсиһин бәјәндикләри кәсләр Шејтанын системинин мәһвиндән сағ чыхаҹаг вә ҝөзәл јени дүнјада әбәди јашаја биләҹәкләр. Бу вахт һәмишә олдуғундан даһа јахындыр! (Јәһја 3:16; 2 Петер 3:13).