Аллаһын Јер үчүн нијјәти нәдән ибарәтдир?

1. Аллаһын Јер үчүн нијјәти нәдән ибарәтдир?

АЛЛАҺЫН Јер үчүн олан нијјәти һәгигәтән дә чох ҝөзәлдир. Јеһова јер үзүндә сағлам вә хошбәхт инсанларын мәскун олмасыны истәјир. Мүгәддәс Китабда дејилир: «Аллаһ... Едендә бир бағ салды... торпагда ҝөзәл ҝөрүнүшлү вә јемәк үчүн ширин мејвәли ҹүрбәҹүр ағаҹлар јетирди». Аллаһ илк инсанлары — Адәмлә Һәвваны јаратдыгдан сонра, онлары бу ҝөзәл бағда јерләшдирди вә онлара тапшырды: «Төрәјиб чохалын вә јер үзүнү бүрүјүб она саһиб олун» (Јарадылыш 1:28; 2:8, 9, 15). Беләликлә, Аллаһ инсанларын дүнјаја өвлад ҝәтирмәләрини, јер үзүнү беҹәрмәләрини вә һејванларын гајғысына галмаларыны истәјирди. Бир сөзлә, Аллаһын нијјәти бүтүн јер үзүнүн Ҹәннәт олмасы иди.

2. а) Аллаһын Јер үчүн олан нијјәтини һәјата кечирәҹәјини һарадан билирик? б) Мүгәддәс Китаба әсасән, јер үзүндә кимләр әбәди јашајаҹаглар?

² Неҹә дүшүнүрсүнүз, Јеһова Аллаһын нијјәти нә вахтса һәјата кечәҹәкми? Инсанлар јер үзүндә Ҹәннәт шәраитиндә јашајаҹаглармы? Аллаһ вә’д едир: «Мән... дедим, мүтләг јеринә јетирәҹәјәм» (Јешаја 46:9-11; 55:11). Бәли, Јеһова бүтүн нијјәтләрини һөкмән јеринә јетирәҹәк! О, дүнјаны «бошуна» јох, «үзәриндә јашанылсын дејә» јарадыб (Јешаја 45:18, КМ). Ҹәннәт шәраитиндә кимләр јашајаҹаг вә онлар нә гәдәр өмүр сүрәҹәкләр? Мүгәддәс Китаб ҹаваб верир: «Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:29; Вәһј 21:3, 4).

3. Һал-һазырда јер үзүндә һансы шәраит һөкм сүрүр вә бу һансы суаллары доғурур?

³ Аллаһын бу нијјәтинин һәлә јеринә јетмәдији ҝөз габағындадыр. Бу ҝүн инсанлар хәстәләнир вә өлүрләр, онлар һәтта дөјүшәрәк бир-бирини һәлак едирләр. Бунлар һәр шејин өз ахары илә ҝетмәдијини ҝөстәрир. Әлбәттә, Аллаһ инсанларын бу ҹүр шәраитләрдә јашамаларыны истәмирди! Бәс нә баш верди? Аллаһын нијјәти нә үчүн һәјата кечмәди? Һеч бир тарих дәрслији бу суала ҹаваб верә билмәз, чүнки бүтүн бунларын сәбәби ҝөјдә баш верән һадисәләр олду.

АЛЛАҺЫН ДҮШМӘНИ НЕҸӘ ПЕЈДА ОЛДУ?

4, 5. а) Иландан истифадә едәрәк Һәвва илә данышан ким иди? б) Виҹданлы вә намуслу адам сонрадан неҹә оғру ола биләр?

⁴ Мүгәддәс Јазыларын биринҹи китабында Еден бағында Аллаһа гаршы үсјан галдыран дүшмән һаггында данышылыр. О, «илан» адланыр, анҹаг бурада сөһбәт һејвандан ҝетмир. Мүгәддәс Китабын сонунҹу китабы онун ‘бүтүн дүнјаны алдадан иблис вә шејтан’ олдуғуну билдирир. О, һәмчинин «гәдим илан» адланыр (Јарадылыш 3:1; Вәһј 12:9). Ҝөзә ҝөрүнмәјән руһани варлыг олан бу ҝүҹлү мәләк, Һәвва илә данышмаг үчүн иландан истифадә етди. Бу, маһир куклачынын өзүнүн јох, санки әлиндәки кукланын данышдығыны ҝөстәрмәсинә бәнзәјир. Һәмин ҝүҹлү мәләк, Аллаһын Јери инсанларын јашамасы үчүн һазырладығы вахт артыг мөвҹуд иди (Әјјуб 38:4, 7).

⁵ Әҝәр Аллаһын бүтүн јаратдыглары мүкәммәлдирсә, бәс онда Шејтан Иблис неҹә пејда олду? Садә сөзләрлә десәк, Аллаһын ҝүҹлү руһани оғулларындан биринин өзү Иблис олду. Ахы бу неҹә мүмкүндүр? Һәрдән виҹданлы вә намуслу адам дөнүб оғру олур. Бу неҹә баш верә биләр? Әввәлҹә инсанын үрәјиндә дүзҝүн олмајан истәк јараныр. Әҝәр бу истәјин инкишаф етмәсинә јол вериб, онун үзәриндә дүшүнмәјә давам едәрсә, бу, гаршысыалынмаз бир проблемә чеврилә биләр. Имкан јаранан кими, һәмин адам пис нијјәтини һәјата кечирә биләр (Јагуб 1:13-15).

6. Неҹә олду ки, Аллаһын ҝүҹлү руһани оғлу Шејтан Иблис олду?

⁶ Буна бәнзәр һадисә Шејтан Иблислә дә баш верди. Ҝөрүнүр, о, Аллаһын Адәмлә Һәвваја дүнјаја өвлад ҝәтириб, јер үзүнү долдурмаларына даир вердији тапшырығы ешитмишди (Јарадылыш 1:27, 28). Ола билсин, Шејтан «инсанлар Аллаһа јох, мәнә хидмәт едә биләрләр!» дејә дүшүнмүшдү. Бунунла Иблис, бу пис нијјәти өз үрәјиндә инкишаф етдирди. Нәтиҹәдә исә, Аллаһ һаггында јалан иттиһамлар сөјләјәрәк Һәвваны алдатды (Јарадылыш 3:1-5). Беләҹә о, «бөһтанчы» мә’насыны верән Иблис вә «дүшмән» мә’насыны верән Шејтан олду.

7. а) Адәмлә Һәвва нә үчүн өлдүләр? б) Нәјә ҝөрә Адәмин бүтүн нәсли гоҹалыр вә өлүр?

⁷ Шејтан Иблис һијләјә вә јалана әл атараг, Адәмлә Һәвваны Аллаһын әмрини позмаға тәһрик етди (Јарадылыш 2:17; 3:6). Аллаһын хәбәрдарлыг етдији кими, онларын итаәтсизлији һәјатлары баһасына баша ҝәлди (Јарадылыш 3:17-19). Адәм ҝүнаһ ишләдәрәк камиллији итирдијинә ҝөрә онун бүтүн нәсли ҝүнаһы мирас алды (Ромалылара 5:12). Адәми әзик гәлиблә мүгајисә етмәк олар. Белә бир гәлибдә биширилән чөрәјин формасы неҹә олаҹаг? Әлбәттә, чөрәк һәмишә әзик алынаҹаг. Буна бәнзәр тәрздә, һәр бир инсан да гејри-камил Адәмдән ҝүнаһы мирас алмышдыр. Бүтүн инсанларын гоҹалыб өлмәсинин сәбәби дә елә будур (Ромалылара 3:23).

8, 9. а) Шејтан Аллаһа гаршы һансы иттиһамы ирәли сүрдү? б) Нәјә ҝөрә Аллаһ үсјанкарлары ҝүнаһ ишләтдикдән дәрһал сонра мәһв етмәди?

⁸ Шејтан, Адәмлә Һәвваны Аллаһа гаршы ҝүнаһ ишләтмәјә тәһрик етмәклә, үсјан галдырды. О, Јеһова Аллаһын һакимијјәтинә гаршы чыхды. Әслиндә Шејтан белә иддиа едирди: «Аллаһ пис рәһбәрдир. О, инсанлары алдадыр вә бүтүн јахшы шејләрдән мәһрум едир. Инсанлар Аллаһын рәһбәрлији олмадан да јашајарлар. Онлар нәјин јахшы, нәјин пис олдуғуну өзләри гәрара ала биләрләр. Мәним рәһбәр олмағым онлар үчүн даһа јахшы оларды». Аллаһ бу тәһгиредиҹи иттиһамлара неҹә ҹаваб верди? Бә’зиләри дүшүнүрләр ки, Аллаһ үсјанкарлары мәһв етсәјди јахшы оларды. Бәс бу, Шејтанын иттиһамларына ҹаваб олардымы? Аллаһын рәһбәрлијинин ән дүзҝүн һакимијјәт олдуғуну сүбут едәрдими?

⁹ Јеһованын мүкәммәл әдаләт һисси јол вермәди ки, үсјанкарлары ҝүнаһ ишләтдикдән дәрһал сонра мәһв етсин. Шејтанын мејдан охумасына әсаслы сурәтдә ҹаваб вермәк вә јаланчы олдуғуну сүбут етмәк үчүн вахт тәләб олунурду. Буна ҝөрә дә, Аллаһ инсанларын өз идарә системләрини јаратмаларына вә мүәјјән вахта гәдәр Шејтанын тә’сири алтында галмаларына јол верди. Бу китабын 11-ҹи фәслиндә Јеһованын белә давранмасынын вә бу суалын һәллинә бу гәдәр вахт сәрф етмәсинин сәбәби изаһ олунур. Һәләлик ҝәлин дүшүнәк: Адәмлә Һәвва онлара һеч бир јахшылыг етмәјән Шејтана инанмагла дүзҝүнмү һәрәкәт етдиләр? Онлара һәјат верән вә гајғыларына галан Јеһованын гәддар јаланчы олдуғуна инанмаларына әсаслары вардымы? Бәс сиз кимә инанардыныз?

10. Сиз Јеһованын тәрәфини неҹә тута биләрсиниз?

¹⁰ Бу суалларын үзәриндә дүшүнмәјимиз јахшы оларды, чүнки һәр биримиз сечим гаршысында дуруруг. Сиз Јеһованын тәрәфини тутмаг имканына маликсиниз. Ону өз Һөкмдарыныз кими гәбул етмәклә, Шејтанын јаланчы олдуғуну сүбут едә биләрсиниз (Мәзмур 73:28; Сүлејманын мәсәлләри 27:11). Тәәссүфләр олсун ки, бу дүнјада чох аз инсан белә сечим едир. Бу заман ортаја белә бир суал чыхыр: Мүгәддәс Китаб дүнјаны Шејтанын идарә етдијини өјрәдирми?

БУ ДҮНЈАНЫ КИМ ИДАРӘ ЕДИР?

11, 12. а) Исанын гаршылашдығы сынаг, бу дүнјаны Шејтанын идарә етдијини неҹә ҝөстәрир? б) Бу дүнјаны Шејтанын идарә етдијинә даир даһа һансы сүбутлар вар?

¹¹ Иса дәгиг билирди ки, бу дүнјаны Шејтан идарә едир. Бир дәфә Шејтан мө’ҹүзәли шәкилдә Исаја «дүнјанын бүтүн өлкәләрини вә онларын шан-шөһрәтини ҝөстәрди». О вә’д етди: «Әҝәр јыхылыб мәнә сәҹдә етсән, бүтүн бу шејләри Сәнә верәрәм» (Матта 4:8, 9; Лука 4:5, 6). Белә бир шејин үзәриндә дүшүнүн: әҝәр дүнјанын бүтүн падшаһлыглары Шејтана мәхсус олмасајды, онун бу тәклифи Иса үчүн сынаг ола биләрдими? Иса бүтүн дүнја һөкумәтләринин Шејтанын һакимијјәти алтында олдуғуну инкар етмирди. Әкс тәгдирдә, о буну мүтләг дејәрди.

¹² Әлбәттә, Јеһова — Күлли-Ихтијар Аллаһ вә Каинатын Јараданыдыр (Вәһј 4:11). Лакин Мүгәддәс Китабын һеч бир јериндә дејилмир ки, Јеһова Аллаһ вә ја Онун Оғлу Иса Мәсиһ бу дүнјаны идарә едирләр. Әксинә, Иса ајдын шәкилдә ҝөстәрди ки, «бу дүнјанын рәиси» Шејтандыр (Јәһја 12:31; 14:30; 16:11). Шејтан Иблис Мүгәддәс Китабда, һәтта «бу әсрин танрысы» адланыр (2 Коринфлиләрә 4:3, 4). Һәвари Јәһја Шејтан һаггында јазмышдыр: «Бүтүн дүнја... шәририн һакимијјәти алтындадыр» (1 Јәһја 5:19).

ШЕЈТАНЫН ДҮНЈАСЫ НЕҸӘ МӘҺВ ЕДИЛӘҸӘК?

13. Салеһлик өмүр сүрән јени дүнјаја нә үчүн еһтијаҹ вар?

¹³ Дүнјадакы шәраит илдән-илә писләшир. Һәр јердә мүһарибәләр вә ҹинајәткарлыг һөкм сүрүр. Инсанлар виҹдансыз сијасәтчиләрә вә икиүзлү дин хадимләринә ҝөрә әзијјәт чәкирләр. Дүнјаны дәјишмәк гејри-мүмкүндүр. Мүгәддәс Китабда дејилир ки, чох тезликлә Аллаһ бу пис дүнјаны Өзүнүн әдаләтли мүһарибәси олан Һар-Меҝидонда мәһв едәҹәк. О заман салеһлик өмүр сүрән јени дүнја ҝәләҹәк (Вәһј 16:14-16).

14. Аллаһ Өз Падшаһлығына кими Башчы тә’јин етмишдир вә бу һагда габагҹадан неҹә хәбәр верилмишдир?

¹⁴ Јеһова Аллаһ Иса Мәсиһи Өз сәмави Падшаһлығынын, јә’ни һакимијјәтинин Башчысы тә’јин етмишдир. Мүгәддәс Китабда габагҹадан хәбәр верилмишдир: «Бизим үчүн көрпә доғулду, бизә оғул верилди, һакимијјәт онун чијинләри үзәриндә олаҹаг, онун ады... Әмин-аманлыг Һөкмдары олаҹаг. Һакимијјәтинин вә әмин-аманлығынын артмасынын сону олмајаҹаг» (Јешаја 9:6, 7). Иса бу һакимијјәт һаггында дуа етмәји өјрәдирди: «Сәлтәнәтин [Падшаһлығын] ҝәлсин. Ҝөјдә олдуғу кими, јердә дә Сәнин ирадән олсун» (Матта 6:10). Бу китабын васитәсилә Мүгәддәс Китабы өјрәнмәјә давам едәрәк ҝөрәҹәксиниз ки, Аллаһын Падшаһлығы тезликлә инсан һакимијјәтләрини арадан галдыраҹаг вә өзү идарә етмәјә башлајаҹаг (Даниел 2:44). О заман бүтүн јер үзү Ҹәннәт олаҹаг.

ЈЕНИ ДҮНЈА ЈАХЫНДЫР!

15. «Јени јер» нәдир?

¹⁵ Мүгәддәс Китаб әмин едир: «Биз Онун [Аллаһын] вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр» (2 Петер 3:13; Јешаја 65:17). Бә’зән Мүгәддәс Китабда «јер» вә ја «дүнја» сөзү алтында орада јашајан инсанлар нәзәрдә тутулур (Јарадылыш 11:1). Буна ҝөрә дә, салеһлик өмүр сүрән «јени јер» Аллаһын бәјәндији инсан ҹәмијјәтидир.

16. Аллаһ һансы гијмәтли һәдијјәни тәклиф едир вә ону неҹә алмаг олар?

¹⁶ Иса вә’д етди ки, Аллаһын бәјәндији кәсләр јени дүнјада «әбәди һәјат» ән’амыны алаҹаглар (Марк 10:30). Зәһмәт олмаса, Јәһја 3:16 вә 17:3 ајәләрини ачын вә әбәди һәјаты алмаг үчүн нә етмәли олдуғумуза даир Исанын дедикләрини охујун. Инди исә ҝәлин јерүзү Ҹәннәтдә јашајаҹаг инсанлары һансы хејир-дуалар ҝөзләдијини нәзәрдән кечирәк.

17, 18. Јер үзүндә сүлһүн һөкм сүрәҹәјинә нә үчүн әминик?

¹⁷ Пислик, мүһарибәләр, ҹинајәткарлыг вә зоракылыг олмајаҹаг. «Пис јох олаҹаг... Мәзлумлар [һәлимләр] өлкәни мүлк олараг алаҹаг» (Мәзмур 37:10, 11). Аллаһ ‘јерин уҹгарларынадәк дөјүшләри дајандыраҹаг’ вә орада сүлһ һөкм сүрәҹәк (Мәзмур 46:9; Јешаја 2:4). О заман ‘салеһләр чичәк ачаҹаг, ҝөјдә ај дурдугҹа фираванлыг артаҹаг’, јә’ни ај кими әбәди олаҹаг! (Мәзмур 72:7).

¹⁸ Јеһованын хидмәтчиләри тәһлүкәсизлик ичиндә јашајаҹаглар. Гәдим исраиллиләр Аллаһа итаәт етдикләри мүддәт әрзиндә тәһлүкәсизликдә јашајырдылар (Левилиләр 25:18, 19). Буна бәнзәр тәрздә, јерүзү Ҹәннәтдә тәһлүкәсизлик ичиндә јашамаг неҹә дә ҝөзәл олаҹаг! (Јешаја 32:18; Мика 4:4).

19. Һарадан билирик ки, Аллаһын јени дүнјасында гида боллуғу олаҹаг?

¹⁹ Артыг аҹлыг олмајаҹаг. Мүгәддәс Китаб вә’д едир: ‘Өлкәнин зәмиләри бол олаҹаг, дағларын башында далғаланаҹаг’ (Мәзмур 72:16). Јеһова Аллаһ салеһләри хејир-дуаландыраҹаг вә ‘јер үзү бәһрәсини верәҹәк’ (Мәзмур 67:6).

20. Бүтүн јер үзүнүн Ҹәннәт олаҹағына нә үчүн шүбһә етмәјә биләрик?

²⁰ Бүтүн јер үзү Ҹәннәтә чевриләҹәк. Бу ҝүн ҝүнаһлы инсанларын мәһв етдикләри јер үзүнү раһат јени евләр вә әтирсачан бағчалар бәзәјәҹәк (Јешаја 65:21-24; Вәһј 11:18). Тәдриҹән бүтүн јер үзү Еден бағы кими ҝөзәл вә мәһсулдар олаҹаг. Аллаһ даим әлини ачаҹаг вә һамыны дојураҹаг (Мәзмур 145:16).

21. Инсанларла һејванлар арасында сүлһ олаҹағыны һарадан билирик?

²¹ Инсанларла һејванлар арасында сүлһ олаҹаг. Вәһши вә ев һејванлары бир јердә отлајаҹаглар. Һәтта ушаглар бу ҝүн тәһлүкәли һесаб олунан һејванлардан горхмајаҹаглар (Јешаја 11:6-9; 65:25).

22. Нәјә ҝөрә артыг хәстәликләр олмајаҹаг?

²² Хәстәликләр олмајаҹаг. Иса јер үзүндә јашајанда бир чох инсанлары сағалдырды. Аллаһын сәмави Падшаһлығынын Һөкмдары кими, Иса даһа бөјүк мө’ҹүзә јарадаҹаг: бүтүн инсанларын сағлам олмаларынын гајғысына галаҹаг (Матта 9:35; Марк 1:40-42; Јәһја 5:5-9). О заман һеч ким «“хәстәјәм” демәјәҹәк» (Јешаја 33:24; 35:5, 6).

23. Нәјә ҝөрә дирилмә севиндириҹи һадисә олаҹаг?

²³ Өлән әзизләримиз дирилдиләҹәк вә әбәди јашајаҹаглар. Аллаһ өлүм јухусуна ҝедәнләрин, лакин јаддашында оланларын һамысыны һәјата гајтараҹаг. Мүгәддәс Китаб вә’д едир: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15; Јәһја 5:28, 29).

24. Јер үзүндә Ҹәннәтдә јашаја биләҹәјинизи дүшүндүкдә һансы һиссләри кечирирсиниз?

²⁴ Даһи Јараданымыз Јеһова Аллаһла таныш олмаг вә Она хидмәт етмәк гәрарына ҝәлән инсанлары неҹә дә ҝөзәл ҝәләҹәк ҝөзләјир! Иса јанында өлән ҹинајәткара вә’д етди: «Сән Мәнимлә бәрабәр ҹәннәтдә олаҹагсан» (Лука 23:43). Иса она ҝәләҹәкдә јер үзүндә олаҹаг Ҹәннәтдән данышырды. Бүтүн бу ҝөзәл вә’дләрин Иса Мәсиһин васитәсилә һәјата кечәҹәји үчүн онун һаггында даһа чох өјрәнмәк ваҹибдир.