Бу түкүрпәдиҹи һадисә Инҹилдә гәләмә алыныб. Бәс бүтүн бунлар һәгигәтән баш вериб? Бу, олдугҹа ваҹиб вә ҹидди суалдыр. Әҝәр бүтүн бунлар баш вермәјибсә, демәли, мәсиһи иманы бошдур, Ҹәннәтдә әбәди јашамаг үмиди исә хүлјадыр (1 Коринфлиләрә 15:14). Диҝәр тәрәфдән, бүтүн бунлар баш верибсә, онда бәшәријјәти парлаг ҝәләҹәк ҝөзләјир. Бу, сизә дә нәсиб ола биләр. Бәс Инҹилдә јазылан һадисәләр һәгигәтдир, јохса ујдурма?

ДӘЛИЛЛӘР НӘЈИ ҜӨСТӘРИР?

Ујдурулмуш әфсанәләрдән фәргли олараг, Инҹилдә јазылан һадисәләр сон дәрәҹә дәгиг вә тәфсилаты илә гејдә алыныб. Мәсәлән, орада бу ҝүн дә зијарәт едә биләҹәјимиз чохлу јер адлары вар. Һәмчинин Инҹилдә реал шәхсләрдән сөһбәт ачылыр. Бу шәхсләрин, һәгигәтән дә, јашадығыны тарихчиләрин өзләри тәсдиг едир (Лука 3:1, 2, 23).

Ҝөтүрәк елә Иса пејғәмбәрин өзүнү. Онун һагда биринҹи вә икинҹи әсрдә јашамыш јазычылар да јазмышдыa. Мүждәләрдә онун едамы илә бағлы јазыланлар һәмин дөврүн Рома ҹәза үсуллары илә үст-үстә дүшүр. Үстәлик, һадисәләр олдуғу кими вә ачыг шәкилдә гәләмә алыныб, һәтта бәзи шаҝирдләрин етдији сәһвләр дә јазылыб (Мәтта 26:56; Лука 22:24—26; Јәһја 18:10, 11). Бүтүн бу амилләр тәсдиг едир ки, Инҹили јазанлар Исанын һәјатыны дүрүст вә дәгиг шәкилдә јазыблар.

БӘС ИСА МӘСИҺ ДИРИЛИБ?

Демәк олар ки, һамы Иса пејғәмбәрин јашадығыны вә өлдүјүнү гәбул едир. Амма онун дирилдијинә һәр адам инанмыр. Һәтта һәвариләр мүәллимләринин дирилдијини ешидәндә әввәл-әввәл инанмамышдылар (Лука 24:11). Анҹаг онлар вә диҝәр шаҝирдләр дирилмиш Мәсиһи ајры-ајры јерләрдә ҝөрәндә бүтүн шүбһәләри арадан галхды. Бир дәфә исә ону 500 нәфәрдән чох адам ҝөрмүшдү (1 Коринфлиләрә 15:6).

Һәбс вә өлүм тәһлүкәси алтында белә, шаҝирдләр Иса Мәсиһин дирилдијини һамыја ҹәсарәтлә бәјан едирдиләр. Һәтта бу барәдә Ону едам едәнләрә дә данышмышдылар (Һәвариләрин ишләри 4:1—3, 10, 19, 20; 5:27—32). Бу гәдәр шаҝирд буна әмин олмасајды, өз һәјатыны тәһлүкәјә атыб Мәсиһин дирилмәсини аләмә ҹар чәкәрди? Әслиндә, о вахт вә инди мәсиһилијин бүтүн дүнјаја ҝөстәрдији тәсирин архасында дуран гүввә Исанын дирилмәсинин ҝерчәк олмасыдыр.

Инҹилдә Мәсиһин өлүмү вә дирилмәси илә бағлы јазыланлар мөтәбәр вә тарихи мәнбәләрә хас хүсусијјәтләри өзүндә дашыјыр. Бу һадисәләри диггәтлә охусаныз, бунларын, һәгигәтән дә, баш вердијинә әмин олаҹагсыныз. Амма Иса Мәсиһин нәјин наминә өлдүјүнү биләндә әминлијиниз бирә-беш артаҹаг. Нөвбәти мәгаләдә бунун сәбәби изаһ олунур.

«Әбәди јашамаг истәјәрдиниз?» Әҝәр сизә бу суалы версәјдиләр, ҹавабыныз нә оларды? Чохлары әбәди јашамаг истәдијини десә дә, бунун мүмкүн олмадығыны дүшүнүр. Онларын фикринҹә, өлүм һагдыр, јәни бир ҝүн јаранан, бир ҝүн өлмәлидир.

Бәс әҝәр суал башга ҹүр гојулса вә сиздән: «Өлмәк истәјәрдиниз?» — дејә сорушсалар, онда неҹә ҹаваб верәрдиниз? Нормал шәраитдә, әксәријјәт «јох» дејәрди. Демәли, үзләшдијимиз проблемләрә, чәтинликләрә рәғмән, биз јенә дә јашамаг истәјирик. Мүгәддәс Китабын тәбиринҹә десәк, Аллаһ бәшәријјәти јашамаг ешги илә јарадыб. Орада дејилир ки, Јарадан «инсанларын үрәјинә әбәдијјәт гојду» (Ваиз 3:11).

Реаллыг исә бундан ибарәтдир ки, һеч ким әбәди јашамыр. Бәс нә баш верди? Аллаһ бу вәзијјәти дүзәлтмәк үчүн һансыса тәдбир ҝөрүб? Мүгәддәс Јазыларын бу суаллара вердији ҹаваблар Иса Мәсиһин изтираб чәкиб өлмәсинин сәбәби илә бағлыдыр. Өјрәндикләриниз сизи севиндирәҹәк!

НӘ БАШ ВЕРДИ?

Мүгәддәс Китабын Јарадылыш бөлмәсинин илк үч фәслиндә дејилир ки, Аллаһ Адәмлә Һәвваја әбәди јашамаг имканы вермиш вә буну әлдә етмәјин јолуну изаһ етмишди. Һәмчинин орада онларын Аллаһа неҹә итаәтсизлик етдикләри вә беләҹә, бу имканы әлдән вердикләри гәләмә алыныб. Бу әһвалат о дәрәҹәдә садә нәгл едилиб ки, чохлары буну нағыл һесаб едир. Анҹаг Инҹил кими, Јарадылыш бөлмәсинин дә дәгиг вә тарихи мәнбә олдуғуна јетәринҹә дәлил варa.

Бәс Адәмин итаәтсизлији нә илә нәтиҹәләнди? Аллаһын Кәламы белә ҹаваб верир: «Беләликлә, ҝүнаһ бир адам [Адәм] васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ромалылара 5:12). Аллаһын сөзүндән чыхмагла Адәм ҝүнаһ ишләди. Буна ҝөрә дә о, әбәди јашамаг имканыны итирди вә нәтиҹәдә өлдү. Онун нәсли олдуғумуз үчүн ҝүнаһ бизә кечиб. Бу сәбәбдән биз хәстәләнир, гоҹалыр вә өлүрүк. Өлмәјимизин сәбәби илә бағлы бу изаһат хүсусијјәтләрин ирсән кечмәси факты илә үст-үстә дүшүр. Аллаһ бу вәзијјәти дүзәлтмәк үчүн һансыса тәдбир ҝөрүб?

ҜӨРҮЛӘН ТӘДБИР

Аллаһ-Таала Адәмин өз нәсли үчүн итирдији мирасы, јәни әбәди һәјаты ҝери алмаг үчүн фидјә тәдбири ҝөрдү. Бәс бу фидјә неҹә өдәнилди?

Кәламда дејилир: «Ҝүнаһын өдәдији һагг өлүмдүр» (Ромалылара 6:23). Бу о демәкдир ки, ҝүнаһын нәтиҹәси өлүмдүр. Адәм ҝүнаһ ишләдији үчүн өлдү. Ејнијлә, биз дә ҝүнаһ едирик вә буна ҝөрә дә ҝүнаһын нәтиҹәси олан өлүмә мүбтәлајыг. Бу мәсәләдә бизим сәһвимиз олмаса да, биз ҝүнаһлы доғулуруг. Буна ҝөрә Аллаһ Иса Мәсиһи јер үзүнә ҝөндәрди ки, бизим үчүн ҝүнаһын бәдәлини өдәсин. Бу иш неҹә олду?

Камил инсан олан Адәм итаәтсизлији уҹбатындан бизә ҝүнаһ вә өлүмү өтүрдүјүнә ҝөрә диҝәр камил бир инсан бу ҝүнаһын пәнҹәсиндән бизи гуртармаг үчүн сон нәфәсинә гәдәр садиг галмалы иди. Мүгәддәс Китабда бу, белә изаһ олунур: «Бир нәфәрин итаәтсизлији чохлу инсаны ҝүнаһлы етдији кими, бир шәхсин итаәти дә чохлу инсаны салеһ едәҹәк» (Ромалылара 5:19). Һәмин о, «бир шәхс» Иса Мәсиһдир. О, ҝөјдән камил инсанb кими јер үзүнә ҝәлди вә һәјатыны уғрумузда гурбан верди. Бу гурбан сајәсиндә, биз Уҹа Аллаһын гаршысында салеһ сајыла вә әбәди һәјаты газана биләрик.

МӘСИҺ НӘЈИН НАМИНӘ ИЗТИРАБ ЧӘКИБ ӨЛДҮ?

Бәс Иса Мәсиһин өлмәси шәрт иди? Мәҝәр гадир Аллаһ фәрман верә билмәзди ки, Адәмин нәсли әбәди јашасын? Әлбәттә, верә биләрди вә буна ихтијары да чатырды. Анҹаг буну етмәклә Аллаһ Өзүнүн гојдуғу «ҝүнаһын өдәдији һагг өлүмдүр» ганунуна зидд давранмыш олаҹагды. Бу, елә-белә ганун дејил ки, истәдијин вахт үстүндән кечә вә ја истәдијин вахт дәјишә биләрсән. Бу ганун әдаләтин бүнөврәсидир (Зәбур 37:28).

Әҝәр Аллаһ бу мәсәләдә әдаләти бир кәнара гојсајды, онда инсанлар Аллаһын башга мәсәләләрдә әдаләтли давранаҹағына неҹә инанардылар? Мәсәлән, Аллаһ Адәмин нәсли арасындан кимә әбәди һәјаты бәхш едәҹәјинә гәрар верәндә әдаләтли давранаҹагды? Вердији вәдләри јеринә јетирмәк мәсәләсиндә Она етибар етмәк оларды? Анҹаг Аллаһын бизим хиласымызла бағлы ҝөрдүјү тәдбирдә әдаләтлә давранмасы бизи әмин едир ки, Аллаһ һәмишә дүзҝүн давраныр.

Иса Мәсиһин фидјә гурбанлығы сајәсиндә Аллаһ-Таала јерүзү Ҹәннәтдә әбәди јашамағымыза имкан јаратды. Мәсиһин сөзләринә диггәт јетирин: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһја 3:16). Мәсиһин өлүмү јалныз Аллаһын сарсылмаз әдаләтинин бир ифадәси дејилди, әсас етибарилә, Онун инсанлара дујдуғу бөјүк мәһәббәтин тәҹәссүмү иди.

Бәс онда нә үчүн Иса Мәсиһ, Инҹилдә тәсвир олундуғу кими, изтираб чәкәрәк өлмәли иди? Чүнки Иблис иддиа едир ки, инсанлар сынаглар гаршысында Аллаһа садиг галмајаҹаг (Әјјуб 2:4, 5). Амма Иса Мәсиһ шиддәтли сынаглардан башыуҹа чыхмагла Иблисин јаланчы олдуғуну бирдәфәлик исбат етди. Шејтан камил инсан олан Адәми ҝүнаһа тәһрик едәндән сонра онун бу иддиасы әсаслы ҝөрүнә биләрди. Анҹаг Адәм кими камил олан Иса Мәсиһ, чәкдији изтираблара рәғмән, Аллаһа садиг галды (1 Коринфлиләрә 15:45). Бунунла о сүбут етди ки, истәсәјди, Адәм дә Аллаһа садиг галарды. Сынаглара таб ҝәтирмәклә Иса Мәсиһ бизә нүмунә гојду (1 Бутрус 2:21). Аллаһ Иса Мәсиһин итаәткарлығыны гијмәтләндирәрәк ону Өз дәрҝаһына галдырыб өлмәзлији бәхш етди.

СИЗӘ ФАЈДАСЫ

Бәли, Иса Мәсиһ, һәгигәтән дә, һәјатыны гурбан верди. Һал-һазырда һәр кәсин әбәди јашамаг имканы вар. Бәс сиз неҹә, әбәди јашамаг истәјәрсиниз? Бунун үчүн сиздән нә тәләб олунур? Иса Мәсиһ демишди: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3).

Бу журналын наширләри сизи тәк ҝерчәк Аллаһ Јеһова вә Иса Мәсиһ һагда даһа чох өјрәнмәјә дәвәт едир. Әразиниздә јашајан Јеһованын Шаһидләри сизә бу саһәдә мәмнунијјәтлә көмәк едәрләр. Һәмчинин www.jw.org/az-cyrl сајтына дахил олуб истәдијиниз мәлуматы тапа биләрсиниз.