ФӘСИЛ 25

Мастурбасија вәрдишинин өһдәсиндән неҹә ҝәлә биләрәм?

«Мастурбасија илә мәшғул олмаға башлајанда сәккиз јашым варды. Сонра бу мәсәләјә даир Аллаһын нөгтеји-нәзәрини өјрәндим. Һәр дәфә бу һәрәкәтә јол верәндә өзүмү дәһшәт пис һисс едирдим. Өз-өзүмә фикирләширдим: “Аллаһ мәним кимисини неҹә севә биләр?”» Луис

ҸИНСИ јетишкәнлик дөврүндә ҹинси истәкләр даһа да ҝүҹләнир. Нәтиҹәдә, бу, сәндә мастурбасија вәрдиши јарада биләрa. Чохларынын фикринҹә, бу, елә дә бөјүк проблем дејил. «Һәлә бундан һеч ким өлмәјиб!» — дејә онлар иддиа едә биләрләр. Анҹаг бу вәрдишдән әл чәкмәк үчүн әсаслы сәбәб вар. Аллаһын хидмәтчиси Павел јазырды: «Бәдәнинизин үзвләриндәки... шәһвәтә, еһтираса... мејилләри өлдүрүн» (Колослулара 3:5). Мастурбасија исә еһтирасы өлдүрмүр, әксинә, аловландырыр. Үстәлик...

● Мастурбасија инсанын тамамилә егоист олмасына сәбәб олур. Бу заман инсан һиссләринә гапылараг, диггәтини јалныз өзүнә ҹәмләјир.

● Мастурбасија илә мәшғул олан кәс әкс ҹинсдән олан инсана өз ҹинси истәкләрини тәмин етмәк үчүн бир васитә кими бахыр.

● Мастурбасија илә мәшғул олмағын нәтиҹәсиндә јаранан егоист дүшүнҹә тәрзи никаһда сағлам ҹинси мүнасибәтдә проблем јарада биләр.

Һәр дәфә ҹинси еһтирас јарананда мастурбасија етмәкдәнсә, өзүнә һаким олмағы өјрән (1 Салоникилиләрә 4:4, 5). Буну етмәкдә сәнә Мүгәддәс Китабын ҹинси истәк ојада биләҹәк вәзијјәтләрдән гачмаг мәсләһәтинин көмәји дәјә биләр (Сүлејманын мәсәлләри 5:8, 9). Әҝәр артыг бу вәрдишин гулуна чеврилмисәнсә, онда неҹә? Ола билсин, сән ондан јаха гуртармаға ҹәһд ҝөстәрмисән, анҹаг һеч нә алынмајыб. Асанлыгла белә бир нәтиҹәјә ҝәлә биләрсән ки, артыг дәјишә вә Аллаһын нормаларына ујғун јашаја билмәзсән. Бу һиссләр Педроја да танышдыр. О дејир: «Һәр дәфә бу тәкрарландыгҹа өзүмү бәрбад һисс едирдим; фикирләширдим ки, бағышланмаға лајиг дејиләм. Мәним үчүн дуа етмәк чох чәтин иди».

Әҝәр бу кими һиссләр сәнә дә танышдырса, руһдан дүшмә. Сәнин вәзијјәтин үмидсиз дејил. Бир чох ҝәнҹләр, еләҹә дә бөјүкләр мастурбасија вәрдишинин өһдәсиндән ҝәлә билмишләр. Буну сән дә баҹарарсан!

Өзүнү ҝүнаһкар һисс едәндә

Артыг гејд олундуғу кими, мастурбасија илә мәшғул олан инсанлар чох вахт өзләрини ҝүнаһкар һисс едирләр. Бу, бир тәрәфдән јахшыдыр, чүнки «Аллаһа мәгбул кәдәр» һисси сәни бу вәрдишдән јаха гуртармаға тәшвиг едә биләр (2 Коринфлиләрә 7:11). Анҹаг өзүнү һәддән артыг ҝүнаһкар һисс етмәјинин әкс нәтиҹәси ола биләр. Сән о дәрәҹәдә мәјуслуға гапыла биләрсән ки, мүбаризә апармаға истәјин галмаз (Сүлејманын мәсәлләри 24:10).

Чалыш, бу мәсәләдә таразлығы гору. Мастурбасија натәмиз вәрдишдир. Бу вәрдиш сәни «өз нәфсинин вә ејш-ишрәтин гулу»на чевирә вә сәндә гејри-сағлам дүшүнҹә тәрзи формалашдыра биләр (Титус 3:3). Бунунла белә, мастурбасија кобуд ҹинси әхлагсызлыг сајылмыр (Јәһуда 7). Әҝәр сәнин белә бир проблемин варса, бағышланылмаз ҝүнаһ ишләтдијини дүшүнмәмәлисән. Әсас одур, бу сынаға гаршы дурасан вә һеч вахт мүбаризәни дајандырмајасан!

Бу һал тәкрарландыгдан сонра мәјуслуға гапылмаг асандыр. Бу заман Сүлејманын мәсәлләри 24:16 ајәсиндәки сөзләри јадына сал: «Салеһ једди дәфә јыхылса белә, јенә галхар, шәр инсан бүдрәсә, бәлаја дүчар олар». Ани бир зәифлијә јол вермәјин сәнин пис инсан олдуғуну ҝөстәрмир. Буна ҝөрә дә, тәслим олма. Јахшы олар ки, бу вәзијјәтин нәјә ҝөрә тәкрарландығыны мүәјјән едәсән вә һәмин сәһвләрә бир дә јол вермәјәсән.

Аллаһын мәһәббәти вә мәрһәмәти үзәриндә дүшүнмәјә вахт ајыр. Мүхтәлиф зәифликләри илә мүбаризә апаран мәзмурчу Давуд јазырды: «Ата өвладларына рәһм етдији кими, Рәбб дә Ондан горханлара елә рәһм едир. Чүнки неҹә јарандығымызы билир, торпагдан дүзәлмәјимизи унутмур» (Мәзмур 103:13, 14). Бәли, Јеһова гејри-камил олдуғумузу нәзәрә алыр вә бизи бағышламаға һазырдыр (Мәзмур 86:5). Диҝәр тәрәфдән, О, бизим сәј ҝөстәрмәјимизи вә пис вәрдишләрдән азад олмағымызы истәјир. Бу ишдә бизә нә көмәк едә биләр?

Әјләнҹә сечиминдә диггәтли ол. Ҹинси истәкләр ојадаҹаг филмләрә вә телевизија програмларына бахырсанмы? Әхлагсыз сајтлара ҝирирсәнми? Мәзмурчу Аллаһа дуасында дејирди: «Гојма ҝөзләрим фани шејләрә бахсын»b (Мәзмур 119:37).

Диггәтини башга шејләрә ҹәмлә. Вүсал адлы мәсиһчи ҝәнҹ белә бир мәсләһәт верир: «Јатмамышдан габаг Мүгәддәс Китаба әсасланан нәшрләр охумаг јахшы оларды. Ҝүнү руһани фикирләрлә баша вурмаг олдугҹа ваҹибдир» (Филипилиләрә 4:8).

Проблемин һагда киминләсә даныш. Бәлкә дә, утандығын үчүн киминләсә бу һагда данышмагдан чәкинирсән. Амма вәрдишинин өһдәсиндән ҝәлмәкдә бунун сәнә көмәји дәјә биләр. Давид адлы мәсиһчи дејир: «Мән ачыб һәр шеји атама данышдым. Онун мәнә дедији сөзләри һеч вахт унутмарам. О ҝүлүмсәјәрәк: “Сәнинлә гүрур дујурам”, — деди. Атам јахшы билирди ки, онунла бу һагда данышмаг мәним үчүн нә дәрәҹә чәтиндир. Һеч бир сөз мәни бу гәдәр руһландыра вә гәтијјәтими ҝүҹләндирә билмәзди.

Атам бағышланылмаз ҝүнаһ етмәдијими анламағым үчүн мәнә бир нечә Мүгәддәс Китаб ајәси ҝөстәрди. Сонра сәһв һәрәкәтимин нә дәрәҹәдә ҹидди олдуғуну баша дүшүб-дүшмәдијимә әмин олмаг үчүн даһа бир нечә ајә охуду. О, мәнә бир мүддәт “тәмиз” галмаг үчүн әлимдән ҝәләни етмәји вә сонрадан бу мөвзуја јенидән гајыдаҹағымызы деди. “Әҝәр тәкрарланарса, мәјус олма. Чалыш, бу дәфә даһа узун мүддәтә өзүнә һаким оласан”, — дејә әлавә етди». Давид һансы гәнаәтә ҝәлди? О дејир: «Проблемим һаггында киминсә билмәсинин вә дәстәк олмасынын мәнә чох көмәји дәјди»c.

[Һашијәләр]

АЧАР АЈӘ

“Ҝәнҹлијә хас истәкләрдән гач, әвәзиндә Рәбби сидги-үрәкдән чағыранларла бирликдә салеһлијә, имана, мәһәббәтә вә сүлһә ҹан ат” 2 Тимотејә 2:22

МӘСЛӘҺӘТ

Ҹинси истәкләрин ҝүҹләнмәмишдән габаг дуа ет. Ширникдириҹи тәсирин өһдәсиндән ҝәлә билмәк үчүн дуада Јеһова Аллаһдан инсан ҝүҹүндән үстүн олан гүдрәт вермәсини хаһиш ет (2 Коринфлиләрә 4:7).

БИЛИРСӘН... ?

Зәиф инсанлар өз ҹинси истәкләринә бојун әјир. Мөһкәм ирадәли инсанлар исә һәтта тәк оланда белә өзләринә һаким олмағы баҹарырлар.

ҺӘРӘКӘТ ПЛАНЫ!

Дүшүнҹәләрими тәмиз сахламаг үчүн белә едә биләрәм... ․․․․․

Истәкләримә тәслим олмаг әвәзинә, мән... ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Нәјә ҝөрә Јеһованын бағышламаға һазыр олдуғуну јадда сахламаг ваҹибдир? (Мәзмур 86:5).

● Аллаһын сәни ҹинси истәкләрлә јаратмасы вә өзүнә һаким олмалы олдуғуну демәси Онун сәнә етибар етдијини неҹә ҝөстәрир?

[182–ҹи сәһифәдәки јазы]

“Артыг проблемимин өһдәсиндән ҝәлмишәм. Инди Јеһованын гаршысында виҹданым тәмиздир. Мән буну һеч нәјә дәјишмәрәм!” Сара

[180–ҹи сәһифәдәки шәкил]

Гачыш заманы јыхыланда јенидән старт хәттинә гајытмаг лазым ҝәлмир. Мастурбасија вәрдишилә мүбаризә апараркән дә зәифлијә јол вермәјин ҝөстәрдијин сәјин һәдәр олдуғуну билдирмир