Билирсиниз?

Гәдимдә дәниз сәфәрләри неҹә тәшкил олунурду?

ҺӘВАРИ БУЛУСУН јашадығы дөврдә демәк олар ки, сәрнишин дашыјан ҝәмиләр јох иди. Ҝәми илә јола чыхмаг истәјән сәјјаһ илк өнҹә сораглајараг она лазым олан истигамәтдә ҝедән вә сәрнишин ҝөтүрән тиҹарәт ҝәмиси тапмалы иди (Һәв. 21:2, 3). Һәтта ҝәми бирбаша она лазым олан јерә ҝетмәсә дә, ҝәминин ҝетдији лиманларын бириндә дүшүб лазыми әразинин јахынлыгларына ҝедән башга бир ҝәми тапа биләрди (Һәв. 27:1—6).

Дәниз сәфәринә адәтән илин мүәјјән ајлары чыхмаг мүмкүн иди вә ҝәмиләр конкрет ҹәдвәл үзрә һәрәкәт етмирди. Мөвһуматчы дәнизчиләр һаванын пис олмасындан башга, пис әламәтләр, мәсәлән, јелкәнин кәндириндә гарылдајан гарға вә ја саһилдә ҝәми гырынтылары ҝөрәндә сәфәри тәхирә салырдылар. Күләк әлверишли сәмтә әсәндә, адәтән, дәнизчиләр фүрсәти фөвтә вермирдиләр, јелкәнләри ендириб сәфәрә јолланырдылар. Сәјјаһ мүвафиг ҝәми тапанда әшјаларыны да ҝөтүрүб лиманын јахынлығына ҝәлир вә ҝәминин јола дүшмәјә һазыр олдуғу хәбәр вериләнә гәдәр ҝөзләјирди.

Тарихчи Лајонел Кассон гејд едир ки, «Ромада инсанлары ҝәми ахтармаг әзијјәтиндән гуртаран раһат хидмәт тәгдим олунурду. Онун лиманы Тибр чајынын мәнсәбиндә иди. Јахынлыгдакы Остија шәһәриндә идарәләрлә долу бөјүк бир мејдан вар иди. Бу идарәләрин чоху мүхтәлиф лиманларын нүмајәндәләринә мәхсус иди, мәсәлән, бир идарә Нарбонун (индики Франса) нүмајәндәләринә мәхсус иди, башга бир идарә Карфаҝенин (индики Тунис)... вә саирә. Сәфәрә һазырлашан шәхс садәҹә ҝедәҹәји маршрут боју јерләшән шәһәрләрин идарәләринә мүраҹиәт етмәли иди».

Дәниз сәфәрләри сәјјаһларын вахтына гәнаәт едирди, лакин тәһлүкәләри дә вар иди. Һәвари Булус тәблиғ сәјаһәтләриндә оланда дәфәләрлә ҝәми гәзасына уғрамышды (2 Кор. 11:25).