Билирсиниз?

Гәдимдә нөкәрбашынын ролу нәдән ибарәт иди?

МҮГӘДДӘС КИТАБЫН јазылдығы дөврдә нөкәрбашы башга бир инсанын еви вә мүлкү илә бағлы ишләрә нәзарәт едирди. «Нөкәрбашы» кими тәрҹүмә олунан јунан вә ибрани сөзләри бәзән нәзарәтчиләрә, јахуд ев ишләрини идарә едән шәхсләрә шамил олунурду.

Һәзрәти Јагубун оғлу Јусиф Мисирдә гул олдуғу вахт ағасынын евиндә нөкәрбашы тәјин олунмушду. Белә ки, ағасы «бүтүн варидатыны Јусифин ихтијарына» вермишди (Јар. 39:2—6). Сонралар Јусиф Мисирин икинҹи шәхси оланда өзү дә евинә нөкәрбашы тәјин етмишди (Јар. 44:4).

Иса Мәсиһин јашадығы дөврдә мүлкәдарлар чох вахт кәнд тәсәррүфаты саһәләриндән узагда јашајырдылар. Одур ки, онлар һәмин саһәләрдә ишләјән ишчиләрә һәр ҝүн нәзарәт етмәк үчүн нөкәрбашылар тәјин едирди.

Кимләр нөкәрбашы кими тәјин олунурду? Биринҹи әсрдә јашамыш Рома јазычысы Колумелла нөкәрбашы тәјин олунан нөкәрин һансы тәләбләрә ҹаваб вермәли олдуғуну белә гејд етмишди: «О, тәҹрүбә газанмыш шәхс олмалыдыр». Һәмин шәхс «ишчиләрә иши ҝөрдүрмәји баҹаран, лакин онлара гаршы кобуд давранмајан» бири олмалыдыр. Јазычы һәмчинин билдирмишди: «Ондан тәләб олунан әсас шеј одур ки, билмәдији шејләри билдијини дүшүнмәсин вә һәмишә јени шејләр өјрәнмәјә һәвәсли олсун».

Аллаһын Кәламында нөкәрбашынын вәзифәси мәсиһи јығынҹағында ҝөрүлән бәзи ишләри тәсвир етмәк үчүн истифадә олунур. Мисал үчүн, һәвари Бутрус коринфлиләри тәшвиг етмишди ки, онлара бәхш олунан баҹарыглары «Аллаһын мүхтәлиф јолларла ифадә олунан лүтфүнүн нүмунәви нөкәрбашысы кими бир-биринә» хидмәтә истифадә етсинләр (1 Бут. 4:10).

Лука 16:1—8 ајәләриндә јазылмыш мәсәлдә Иса Мәсиһ нөкәрбашы һагда нүмунә чәкир. Үстәлик, Мәсиһ падшаһ кими һүзуруна нәләрин әламәт олаҹағыны сөјләјәркән давамчыларыны әмин етмишди ки, «садиг вә ағыллы нөкәр», башга сөзлә, садиг «нөкәрбашы» тәјин едәҹәк. Нөкәрбашынын әсас вәзифәси дөврүн сонунда Мәсиһин давамчыларыны руһани гида илә тәмин етмәк олаҹагды (Мәт. 24:45—47; Лука 12:42). Бу ҝүн «нөкәрбашы» иманы мөһкәмләндирән нәшрләри һазырлајыб бүтүн дүнја үчүн әлчатан едир. Чох шадыг ки, биз дә бу нәшрләри әлдә едәнләрин сырасындајыг.