Мүгәддәс Китабы охумагла Јеһова һаггында өјрәнә биләрсән. Кечмишдә Аллаһ бир нечә адам сечиб Өз фикирләрини онлара јаздырмышды. Һәмин јазылар «Мүгәддәс Китаб» адланыр. Бу ҝүн биз Мүгәддәс Китабы охумагла Аллаһла таныш олуруг. Мүгәддәс Китаб Јеһованын кәламларындан, јәни ҝөндәрдији хәбәрләрдән ибарәт олдуғу үчүн, һәм дә «Аллаһын Кәламы» адланыр. Биз Мүгәддәс Китабда јазыланлара инана биләрик, чүнки Јеһова һеч вахт јалан данышмыр. Аллаһын јалан данышмасы мүмкүн дејил (Ибраниләрә 6:18). Аллаһын Кәламында һәгигәт јазылыб (Јәһја 17:17).

Мүгәддәс Китаб Аллаһын бизә вердији ән гијмәтли һәдијјәләрдән биридир. Бу китабы өвладларыны севән атанын онлара јаздығы мәктуба бәнзәтмәк олар. Бу китабда јазылыб ки, Аллаһ јер үзүнү ҝөзәл јашајыш јеринә, Ҹәннәтә чевирәҹәјинә сөз вериб. Мүгәддәс Китаб бизә Аллаһын Өз садиг өвладлары үчүн кечмишдә вә инди нә етдијини вә ҝәләҹәкдә нәләр едәҹәјини билдирир. О һәмчинин проблемләри һәлл етмәкдә вә хошбәхт олмагда бизә көмәк едир (2 Тимутијә 3:16, 17).

Јеһованын Шаһидләри Аллаһын достларыдыр; онлар сәнә Мүгәддәс Китабын тәлимләрини өјрәтмәјә һазырдырлар. Садәҹә бу адамлара Мүгәддәс Китабы өјрәнмәк истәдијини де. Дәрс кечмәк үчүн онлар пул ҝөтүрмүрләр (Мәтта 10:8). Бундан әлавә, сән онларын јығынҹаг ҝөрүшләринә дә ҝедә биләрсән. Бу ҝөрүшләр онларын ибадәт евләриндә кечирилир. Әҝәр бу ҝөрүшләрдә иштирак етсән, Аллаһ һаггында билијин тез бир вахтда артаҹаг.

Сән Аллаһын јаратдыгларындан Онун һаггында өјрәнә биләрсән. Мәсәлән, Мүгәддәс Китабда јазылыб: «Аллаһ ҝөјү вә јери јаратды» (Јарадылыш 1:1). Јеһова «ҝөјләри» јараданда ҝүнәши дә јаратды. Бу бизә Аллаһ һаггында нә дејир? Онун чох ҝүҹлү олдуғуну. Јалныз Аллаһ ҝүнәш кими ҝүҹлү бир ҹисим јарада биләрди. Ҝүнәш һәм дә Јеһованын чох мүдрик олдуғуну билдирир, чүнки истилик вә ишыг верән, амма түкәнмәјән бир ҹисим јаратмаг үчүн мүдриклик лазымдыр.

Јеһованын јаратдыглары Онун бизи севдијини билдирир. Јер үзүндәки ҹүрбәҹүр мејвәләри јада сал. Јеһова бизә ҹәми бир мејвә верә биләрди. Истәсәјди, үмумијјәтлә һеч бир мејвә вермәзди. Амма Аллаһ бизә мүхтәлиф формалы, өлчүлү, рәнҝли вә дадлы ҹүрбәҹүр мејвәләр верди. Бүтүн бунлар Јеһованын севән Аллаһ олмагла јанашы, чох сәхавәтли, гајғыкеш вә меһрибан олдуғуну билдирир (Зәбур 104:24).

Ҹәннәт инди јашадығымыз дүнјаја бәнзәмәјәҹәк. Аллаһ һеч вахт истәмәјиб ки, јер үзүндә кәдәр, әзаб-әзијјәт вә ағры-аҹы олсун. Ҝәләҹәкдә Аллаһ јер үзүнү Ҹәннәтә чевирәҹәк. Бәс Ҹәннәтдә һәјат неҹә олаҹаг? Ҝәл бахаг Мүгәддәс Китаб нә дејир:

Јахшы инсанлар. Аллаһын достлары Ҹәннәтдә јашајаҹаглар. Онлар бир-биринә анҹаг јахшылыг едәҹәкләр. Онлар Аллаһын истәдији кими салеһ өмүр сүрәҹәкләр (Мәсәлләр 2:21).

Гида боллуғу. Ҹәннәтдә аҹлыг олмајаҹаг. Мүгәддәс Китабда дејилир: «Јердә чөрәк бол олаҹаг» (Зәбур 72:16).

Ҝөзәл евләр вә хошаҝәлән иш. Ҹәннәтдә һәр аиләнин өз еви олаҹаг. Һәр кәс мәшғул олдуғу ишдән мәмнун олаҹаг (Әшија 65:21—23).

Бүтүн дүнјада сүлһ. Бир даһа дава-далаш олмајаҹаг вә һеч ким мүһарибәдә өлмәјәҹәк. Аллаһын Кәламында дејилир: «[Аллаһ] јерин бир уҹундан о бири уҹунадәк дөјүшләри кәсир» (Зәбур 46:8, 9).

Һамы сағлам олаҹаг. Мүгәддәс Китабда вәд едилир: «[Ҹәннәтдә] һеч бир сакин “хәстәјәм” демәјәҹәк» (Әшија 33:24). Һәмчинин әлил, кор, кар вә лал адам олмајаҹаг (Әшија 35:5, 6).

Ағры-аҹы, кәдәр вә өлүм јох олаҹаг. Аллаһын Кәламында дејилир: «Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (Вәһј 21:4).

Ҹәннәтдә пис адамлар олмајаҹаг. Јеһова вәд едир: «Писләрин... көкү јер үзүндән кәсиләҹәк, хаинләр орадан гопарылыб атылаҹаг» (Мәсәлләр 2:22).

Инсанлар арасында гаршылыглы мәһәббәт вә һөрмәт олаҹаг. Бир даһа һагсызлыг, зүлм, тамаһкарлыг вә нифрәт олмајаҹаг. Инсанлар бирлик ичиндә салеһ һәјат сүрәҹәкләр (Әшија 26:9).

Јер үзүндә төрәдилән пислик, тезликлә Ҹәннәтин гурулаҹағыны билдирир. Мүгәддәс Китабда дејилир ки, Ҹәннәт гурулмаздан әввәл чох чәтин зәманә олаҹаг. Инди биз һәмин зәманәдә јашајырыг! Мүгәддәс Китабын хәбәрдарлыг етдији бәзи һадисәләр бунлардыр:

Бөјүк мүһарибәләр. «Милләт милләтә гаршы, дөвләт дөвләтә гаршы галхаҹаг» (Мәтта 24:7). Бу пејғәмбәрлик артыг јеринә јетмишдир. ­1914-ҹү илдән башлајараг, ики дүнја мүһарибәси вә чохсајлы кичик мигјаслы мүһарибәләр баш вермишдир. Бу мүһарибәләрдә милјонларла инсан һәлак олмушдур.

Ҝениш јајылмыш хәстәликләр. «Ҝаһ бурада, ҝаһ орада... хәстәликләр олаҹаг» (Лука 21:11). Бу пејғәмбәрлик ҝерчәкләшибми? Бәли. Хәрчәнҝ, үрәк хәстәликләри, вәрәм, малјарија, ГИЧС вә диҝәр хәстәликләр милјонларла инсанын һәјатына сон гојмушдур.

Гытлыг. Јер үзүндә бир чох инсан дојунҹа јемәк үчүн гида тапмыр. Һәр ил милјонларла адам аҹындан өлүр. Бу, Ҹәннәтин тезликлә гурулаҹағына даһа бир нишанәдир. Мүгәддәс Китабда дејилмишди: «Гытлыг олаҹаг» (Марк 13:8).

Зәлзәләләр. «Ҝаһ бурада, ҝаһ орада... зәлзәләләр олаҹаг» (Мәтта 24:7). Бу пејғәмбәрлик дә бизим дөврүмүздә јеринә јетир. 1914-ҹү илдән бәри милјондан чох адам зәлзәләләрдә һәлак олмушдур.

Пис адамлар. Адамлар «пулпәрәст» вә «худбин» олаҹаг, јәни јалныз өзләрини севәҹәкләр. Онлар «Аллаһдан чох ејш-ишрәти севәҹәкләр». Ушаглар валидејнләринә итаәт етмәјәҹәкләр (2 Тимутијә 3:1—5). Мәҝәр бу ҝүн инсанларын әксәријјәти белә дејил? Белә адамлар Аллаһдан горхмур вә Онун һаггында өјрәнмәк истәјәнләри инҹидирләр.

Ҹинајәткарлыг. Һәмчинин «һәрҹ-мәрҹлик баш алыб» ҝедәҹәк (Мәтта 24:12). Јәгин разылашарсан ки, әввәлки илләрә нисбәтән инди ҹинајәткарлыг гат-гат чохалыб. Инсанлар һәр јердә сојғунчулуг, јалан вә ја диҝәр тәһлүкәләрлә гаршылашырлар.

Бүтүн бунлар Аллаһын Падшаһлығынын јахын олдуғуну ҝөстәрир. Мүгәддәс Китабда дејилир: «Бүтүн бунларын баш вердијини ҝөрәндә билин ки, Аллаһын Падшаһлығы јахындадыр» (Лука 21:31). Аллаһын Падшаһлығы нәдир? Бу, Аллаһын јер үзүнү Ҹәннәтә дөндәрәҹәк ҝөјдәки һөкумәтидир. Аллаһын Падшаһлығы инсан һакимијјәтләрини әвәз едәҹәк (Дәнјал 2:44).