Шејтан сәнин ҹадуҝәрликлә мәшғул олмағыны истәјир. Бир чохлары хата-бәладан горунмаг үчүн евләриндә үзәрлик јандырыр, башларына дуз чевирир, ҝөзмунҹуғу тахырлар. Елә јерләр вардыр ки, орада инсанлар ҝуја сеһрли гүввәси олан «дәрман» ичир вә ја ону бәдәнләринә сүртүрләр. Башга адамлар ҝуја горујуҹу ҝүҹү олан мүәјјән әшјалары евләриндә вә ја һәјәтјаны саһәләриндә ҝизләдирләр. Онлар буну шәр гүввәләрдән горхдуглары үчүн едирләр. Диҝәрләри ишдә, имтаһанларда вә ја романтик ҝөрүшләрдә мүвәффәгијјәт газанмаг үчүн овсунчулара мүраҹиәт едирләр.

Јеһованын досту олмаг Шејтана гаршы ән јахшы мүдафиәдир. Јеһова Аллаһ вә Онун мәләкләри Шејтандан вә ҹинләрдән гат-гат ҝүҹлүдүрләр (Јагуб 2:19; Вәһј 12:9). Јеһова ҝүҹүнү Она там садиг олан достларынын хејринә сәрф етмәјә һазырдыр (2 Салнамәләр 16:9).

Аллаһын Кәламында дејилир: «Фала бахмајын». Јеһова ҹадуҝәрлији вә бахыҹылығы мүһакимә едир. Чүнки бу ишләрлә мәшғул оланлар бирбаша Шејтанын тәсири алтына дүшә биләрләр (Лавилиләр 19:26).

Шејтан адамлары пис ишләрә тәһрик едир. Аллаһын досту олмаг истәјән шәхс Јеһованын нифрәт етдији шејләрә нифрәт етмәлидир (Зәбур 97:10). Аллаһын достларынын ҝөрмәдији ишләрдән бәзиләри бунлардыр:

Ҹинси әхлагсызлыг. «Зина етмәјин» (Чыхыш 20:14). Һәмчинин никаһ бағлајана кими ҹинси јахынлыг етмәк дә ҝүнаһдыр (1 Коринфлиләрә 6:18).

Сәрхошлуг. «Ички дүшкүнләри... Аллаһын Падшаһлығына ҝирмәјәҹәкләр» (1 Коринфлиләрә 6:10).

Гатиллик, аборт. «Адам өлдүрмәјин» (Чыхыш 20:13).

Оғурлуг. «Оғурлуг етмәјин» (Чыхыш 20:15).

Јалан. Јеһова «јалан данышан дил»ә нифрәт едир (Мәсәлләр 6:17).

Зоракылыг вә идарәолунмаз гәзәб. Јеһова «зоракылығы севәнләрә нифрәт едир» (Зәбур 11:5). «Ҝүнаһлы бәдәнин әмәлләри бәллидир... гәзәб» (Галатијалылара 5:19, 20).

Гумар. Аҹҝөзлүк едәнлә отуруб-дурмајын (1 Коринфлиләрә 5:11).

Ирги вә етник дүшмәнчилик. «Дүшмәнләринизи һәмишә севин вә сизи тәгиб едәнләр үчүн һәмишә дуа един» (Мәтта 5:43, 44).

Аллаһын бизә дедикләри хејримиз үчүндүр. Пис әмәлләрдән узаг дурмаг һәмишә асан дејил. Јеһованын вә Онун Шаһидләринин көмәји илә Аллаһын хошламадығы әмәлләрдән узаг дура биләрсән (Әшија 48:17; Филиппилиләрә 4:13; Ибраниләрә 10:24, 25).

Үрәкдән севдијин вә һөрмәт етдијин достун варса, она бәнзәмәјә чалышырсан. Мүгәддәс Китабда дејилир ки, «Јеһова кәрамәтлидир, һагдыр» (Зәбур 25:8). Аллаһла дост олмаг үчүн биз дә хејирхаһ вә һагсевәр олмалыјыг. Мүгәддәс Китабда дејилир: «Аллаһын севимли өвладлары кими Она бәнзәмәјә чалышын, мәһәббәт јолунда јеријин» (Ефеслиләрә 5:1, 2). Буну неҹә етмәк олар?

Башгаларына көмәк етмәјә һазыр ол. «Һамыја... јахшылыг едәк» (Галатијалылара 6:10).

Зәһмәткеш ол. «Оғурлуг едән даһа оғурлуг етмәсин, әлинин һалал зәһмәти илә долансын» (Ефеслиләрә 4:28).

Физики вә әхлаги ҹәһәтдән тәмиз гал. «Ҹисми вә руһу мурдарлајан һәр шејдән өзүмүзү тәмизләјәк вә Аллаһ горхусу илә там мүгәддәслијә јетишәк» (2 Коринфлиләрә 7:1).

Аилә үзвләринлә меһрибанҹасына вә һөрмәтлә давран. «Һәр кәс арвадыны өзүнү севдији кими севсин, арвад да әринә дәрин һөрмәт бәсләсин. Ушаглар,.. валидејнләринизин сөзүнә гулаг асын» (Ефеслиләрә 5:33—6:1).

Башгаларына мәһәббәт ҝөстәр. «Бир-биримизи севәк, чүнки мәһәббәт Аллаһдандыр» (1 Јәһја 4:7).

Јашадығын өлкәнин ганунларына риајәт ет. «Гој һәр кәс һөкумәтә табе олсун... һәр кәсә һаггыны верин: верҝидирсә — верҝини» (Ромалылара 13:1, 7).