Биринҹи әсрдәки рәһбәрлик шурасы сүннәт мәсәләсини һәлл етдикдән сонра да өзләрини мәсиһи адландыран бәзи шәхсләр инадла бу мәсәләни бағламырдылар ки бағламырдылар. Һәвари Булус онлары «Мәсиһ һаггындакы мүждәни тәһриф етмәк» истәјән «јаланчы гардашлар» адландырмышды (Гал. 1:7; 2:4; Тит. 1:10).
Ҝөрүнүр иудаизмин тәрәфдарлары белә етмәклә истәјирдиләр ки, јәһудиләри сакитләшдирсинләр, бунунла да онларын мәсиһилијә амансыз мүгавимәтләринин гаршысыны алсынлар (Гал. 6:12, 13). Иудаизм тәрәфдарлары иддиа едирдиләр ки, јемәк, сүннәт вә јәһуди бајрамлары кими мәсәләләрдә Мусанын ганунуна риајәт етмәклә салеһ сајылмаг мүмкүндүр (Кол. 2:16).
Ајдын мәсәләдир ки, бу ҹүр фикирләрлә разылашанлар гејри-јәһудиләрдән олан диндашларынын јанында өзләрини нараһат һисс едирдиләр. Тәәссүф ки, јәһудиләрдән олан һәтта бир нечә нүфузлу мәсиһи дә бу тора дүшмүшдү. Мәсәлән, Јерусәлим јығынҹағындан ҝәлән гардашлар Антакјадакы јығынҹаглара баш чәкәндә гејри-јәһуди гардашлардан узаг дурурдулар. Һәтта о вахта кими гејри-јәһудиләрлә чәкинмәдән үнсијјәт едән Бутрус да онлардан узаг дурмаға, онларла јемәк белә јемәмәјә башлады. Бәли, о, әввәлләр мүдафиә етдији принсипләри тапдалады. Нәтиҹәдә, Булус Бутруса ҹидди мәсләһәт вермәли олду (Гал. 2:11—14).