Бу ҝүн бир чох адамлар ахтардығы мәмнунлуғу вә гәлб раһатлығыны тапмадығы үчүн даһа дини јерләрә ҝетмир. Амма Јеһованын Шаһидләринин јығынҹагларына ҝетмәјә дәјәр. Нәјә ҝөрә?

Хош вә меһрибан аб-һава. Биринҹи әсрдә Иса пејғәмбәрин давамчылары бир јерә јығышыб Аллаһа ибадәт едир, Мүгәддәс Јазылары арашдырыр вә бир-бириләрини руһландырырдылар (Ибраниләрә 10:24, 25). Бу инсанларын арасында меһрибанлыг һөкм сүрүрдү, онлар бир-бириләринә дост, гардаш ҝөзү илә бахырдылар (2 Салоникилиләрә 1:3; 3 Јәһја 1:14). Биз дә онларын јолу илә ҝедирик вә онларын дујдуғу севинҹи дујуруг.

Аллаһын Кәламы тәдрис олунур. Мүгәддәс Китабын јазылдығы вахтларда киши, гадын, ушаг — һәр кәс Аллаһын Кәламыны өјрәнмәк үчүн бирликдә топлашырды. Бу ҝүн дә беләдир. Ҝөрүшләримиздә Аллаһын Кәламыны өјрәтмәк үчүн тәјин олунмуш гардашлар бизә көмәк едирләр ки, Аллаһын ганунларыны һәјатымызда тәтбиг едәк (Ганунун тәкрары 31:12; Нәһәмја 8:8). Бу ҝөрүшләрин бәзи һиссәләриндә динләјиҹиләр дә мүзакирәдә иштирак едир вә бирликдә Аллаһы нәғмәләрдә тәрәннүм едирләр. Бу јолла һәр кәс Аллаһын вердији үмидә иман ҝәтирдијини ифадә едир (Ибраниләрә 10:23).

Аллаһа иманымыз ҝүҹләнир. Һәвари Булус Ромадакы јығынҹаға јазмышды: «Сизинлә ҝөрүшмәји үрәкдән арзулајырам вә... истәјирәм ки, һамымыз: мән дә, сиз дә бир-биримизин иманы васитәсилә бир-биримизи руһландыраг» (Ромалылара 1:11, 12). Һәр дәфә ҝөрүшләрдә биз бир-биримизин иманыны ҝүҹләндирир вә Аллаһа мәгбул јашамаг әзмимизи мөһкәмләндиририк.

Биз сизи нөвбәти ҝөрүшә дәвәт едирик. Чох истәјәрдик ки, сиз јухарыда дејиләнләри ҝәлиб өз ҝөзүнүзлә ҝөрәсиниз. Гапымыз һәр кәсин үзүнә ачыгдыр. Јығынҹаға ҝәләнләрдән пул јығылмыр.

• Ҝөрүшләримиз һансы нүмунә әсасында кечирилир?

• Биз нәјә ҝөрә ҝөрүшләрә ҝәлмәлијик?

Кечилмәз мешә, пис һава, һәјатын чәтинликләри, ишдән сонракы јорғунлуг. Бунларын һеч бири јығынҹаға ҝетмәјимизә әнҝәл ола билмәз. Нәјә ҝөрә биз гардашларымызла ҝөрүшмәк үчүн әлимиздән ҝәләни едирик?

Проблемләри һәлл етмәјә көмәк едир. Һәвари Булус мәсләһәт ҝөрмүшдү ки, јығынҹаға ҝәләнләр бир-бириләринә гаршы диггәтли олсунлар (Ибраниләрә 10:24). Бу ифадә «ҹидди дүшүнмәк» мәнасыны дашыјыр. Бу о демәкдир ки, биз бир-биримизи јахындан танымалы, бир-биримизин гајғысына галмалыјыг. Баҹы-гардашларымызла таныш олдугҹа ҝөрүрүк ки, бизим үзләшдијимиз чәтинликләрлә онлар да гаршылашыблар вә бунун өһдәсиндән уғурла ҝәлибләр. Биз дә онларын көмәјилә чәтинликләри дәф едә биләрик.

Әсл достлар газанырыг. Диндашларымыз бизим танышларымыз јох, достларымыздыр. Биз онларла тәкҹә јығынҹагда ҝөрүшмүрүк. Вахт ајырыб бирҝә истираһәт дә едирик. Беләҹә, бир-биримизин гәдрини даһа чох билир, бир-биримизи даһа чох севирик. Достумуз чәтинлијә дүшәндә онун дадына чатырыг, неҹә дејәрләр, дост дар ҝүндә танынар (Мәсәлләр 17:17). Бәли, биз бир-биримизин гејдинә галмалыјыг. Бунун үчүн исә јығынҹағын бүтүн үзвләри илә дост олмалыјыг (1 Коринфлиләрә 12:25, 26).

Биз сизи тәшвиг едирик ки, өзүнүзә достлары Аллаһы севән инсанлар арасындан, Јеһованын Шаһидләри арасындан сечәсиниз. Сизи достларымызын сырасында ҝөрмәјә шад оларыг.

• Јығынҹагда баҹы-гардашларла јахындан таныш олмаг нә үчүн ваҹибдир?

• Сиз јығынҹағымызын үзвләри илә таныш олмаг истәјәрдиниз?

Иса пејғәмбәрин биринҹи әсрдәки давамчылары јығынҹагда дуа едир, Мүгәддәс Јазылары охујуб мүзакирә едир вә Аллаһы нәғмәләрдә тәрәннүм едирдиләр. О ҝөрүшләрдә һеч бир ритуал ајинләр иҹра олунмурду (1 Коринфлиләрә 14:26). Буҝүнкү јығынҹаглар да буна бәнзәр тәрздә кечир.

Аллаһын Кәламы тәдрис олунур вә актуаллығы ҝөстәрилир. Һәфтәнин ахыры ики һиссәдән ибарәт ҝөрүш кечирилир. Ачыг ҝөрүш адланан биринҹи һиссәдә Мүгәддәс Китаба әсасланан 30 дәгигәлик мәрузә сөјләнилир. Мәрузәдә Аллаһын Кәламынын дөврүмүз һагда дедикләри вә орада јазылан өјүдләрин фајдасы ачыгланыр. Һамы охунан ајәләри изләјир. Мәрузәдән сонра «Ҝөзәтчи гүлләси» мүзакирәси башлајыр вә бир саат әрзиндә динләјиҹиләрин иштиракы илә «Ҝөзәтчи гүлләси» журналынын тәлим нәшриндән бир мәгалә мүзакирә олунур. Бу мәгаләләр бизә көмәк едир ки, аддымларымызы Аллаһын Кәламыны рәһбәр тутараг атаг. Бүтүн дүнјада сајы 118 000-дән чох олан јығынҹагларда ејни материал кечирилир.

Тәлим баҹарыгларына јијәләнирик. Һәфтәичи үч һиссәдән ибарәт башга бир ҝөрүш кечирилир. Мәсиһи һәјаты вә ибадәти адланан бу ҝөрүш һәр ај чыхан «Мәсиһи һәјаты вә ибадәти. Иш дәфтәри»ндәки материала әсасланыр. Ҝөрүшүн биринҹи һиссәси «Аллаһын Кәламындакы хәзинә» адланыр. Бу һиссә јығынҹағын габагҹадан Мүгәддәс Китабдан охудуғу парчаны даһа јахшы мәнимсәмәјә көмәк едир. Ҝөрүшүн «Сәриштәли мүждәчи олун» адлы нөвбәти һиссәсиндә сәһнәҹикләр олур. Бу һиссәдә инсанларла Мүгәддәс Китаб әсасында сөһбәт етмәјин үсуллары ҝөстәрилир. Бу ҝөрүшү апаран гардашын вердији мәсләһәтләр бизә охумаг вә данышмаг габилијјәтимизи тәкмилләшдирмәјә көмәк едир (1 Тимутијә 4:13). «Мәсиһи һәјаты» адланан сонунҹу һиссәдә Мүгәддәс Китаб принсипләрини ҝүн дәлик һәјатымызда неҹә тәтбиг едә биләҹәјимиз мүзакирә олунур. Бу һиссәјә Мүгәддәс Китабы даһа дәриндән баша дүшмәк үчүн суал-ҹаваб шәклиндә апарылан бәнд дә дахилдир.

Биз әминик ки, ҝөрүшләримизә ҝәлсәниз, Мүгәддәс Китабын јүксәк сәвијјәдә тәдрис олундуғуну ҝөрәҹәксиниз (Әшија 54:13).

• Јеһованын Шаһидләринин ҝөрүшләри неҹә кечир?

• Һансы ҝөрүшдә иштирак етмәк истәјәрдиниз?