«Мүгәддәс Китабла танышлыг» бөлмәсиндән истифадә едәрәк сөһбәтә башла
1. Хидмәт үчүн һансы јени вәсаитимиз вар?
1 Мүгәддәс Китабда «Мүгәддәс Китабла танышлыг» адлы бөлмә вар. Тәгдимә һазырлајаркән бу јени вәсаитдән неҹә истифадә едә биләрик? Бурада «Мүлаһизә» китабында олдуғу кими, мүхтәлиф мөвзулар алтында ајәләр ҝәтирилир. Буна ҝөрә дә бу вәсаит сөһбәтә башламаг үчүн фајдалыдыр.
2. «Мүгәддәс Китабла танышлыг» бөлмәсиндән хидмәтдә неҹә истифадә едә биләрик?
2 Сәккизинҹи мөвзуну сечиб демәк олар: «Биз гоншулугдакы адамларла ајагүстү сөһбәт едирик. Чүнки бир чохларында суал јараныр ки, ҝөрәсән, дүнјадакы әзаблар Аллаһдандыр, ја јох. [Бәзи јерләрдә мөвзунун адыны сакинә ҝөстәрмәк даһа јахшыдыр.] Сиз бу һагда нә фикирләширсиниз? [Ҹавабыны ҝөзлә.] Мүгәддәс Китаб бу суала мәнтигли ҹаваб верир. Ситат ҝәтирилмиш бир вә ја бир нечә ајәни бирбаша Мүгәддәс Китабдан оху вә мүзакирә ет. Әҝәр ев сакини мараг ҝөстәрирсә, ҝиришдәки 20 мөвзуну она ҝөстәр вә нөвбәти дәфә мүзакирә етмәк үчүн бирини сечмәји хаһиш ет. Јахуд да арашдырдығыныз мөвзуја аид даһа чох мәлумат верилән дәрс вәсаитләриндән бирини она тәклиф ет.
3. Гејри-христиан дининә мәнсуб олан инсанларын јашадығы әразидә сөһбәтә башламаг үчүн «Мүгәддәс Китабла танышлыг» бөлмәсиндән неҹә истифадә етмәк олар?
3 4-ҹү вә 13-дән 17-дәк мөвзулар гејри-христиан динләрә мәнсуб олан инсанларын јашадығы әразидә тәблиғ етмәк үчүн хүсусилә фајдалыдыр. Мисал үчүн, 17-ҹи мөвзудакы мәлуматдан истифадә едиб дејә биләрсән: «Биз инсанларла аиләдәки проблемләр барәдә гысаҹа сөһбәт едирик. Јәгин разылашарсыныз ки, бу ҝүн аиләләр чохлу чәтинликләрлә үзләширләр. [Ҹавабыны ҝөзлә.] Бир чох әр-арвадлара бу һикмәтли сөзләр көмәк етмишдир: “Арвад да әринә дәрин һөрмәт бәсләсин”. [Бу сөзләрин Ефеслиләрә 5:33 ајәсиндән олдуғуну демәјә еһтијаҹ јохдур. Әҝәр гадынла сөһбәт едирсинизсә, онда Ефеслиләрә 5:28 ајәсини ситат ҝәтирмәк олар.] Сизҹә, бу мәсләһәтә әмәл едилсә, аилә хошбәхт олмаз?»
4. Гејри-христиан дининә мәнсуб олан инсанла сөһбәтин сонунда нә етмәк олар?
4 Сөһбәтин сонунда мүзакирәни ҝәлән дәфә давам етдирмәк үчүн вахт тәјин ет. Мөвзудакы ајәләрдән башга бири һагда данышмағы планлашдыра биләрсән. Мүнасиб вахтда сакинә билдир ки, бөлүшдүјүн һикмәтли кәламлар Мүгәддәс Китабдандыр. Әввәлки мүзакирәләринизи вә инсанын Мүгәддәс Китаба бахышыны нәзәрә алараг, она мүнасиб нәшр тәклиф ет. («Мүгәддәс ибадәтимиз»ин 2013-ҹү ил декабр сајындакы әлавә вәрәгәјә бах.)