Артыг һәр јанда инсанлар Иса пејғәмбәр барәдә ешидиб. Онун тәлимләринә гулаг асмаг вә гүдрәтли ишләрини өз ҝөзләри илә ҝөрмәк үчүн чохлары һәтта уҹгар јерләрдән ахышыб ҝәлир. Анҹаг бир нечә ҝүндән сонра о, Кәфәрнаһума, фәалијјәтинин мәркәзинә гајыдыр. Онун гајытмасы һаггында хәбәр Ҹәлилә јахынлығында јерләшән бу шәһәрдә тез јајылыр вә шәһәр әһли онун галдығы евә јығышыр. Ҹәлилә вә Јәһудијјәнин, еләҹә дә Јерусәлимин һәр јериндән фәрисиләр вә Ганун мүәллимләри дә онун јанына ҝәлир.

Ораја о гәдәр адам топлашыр ки, һәтта гапынын ағзында да јер галмыр. Иса онлара Аллаһын сөзүнү данышмаға башлајыр (Марк 2:2). Бурада гејри-ади бир һадисә баш верир. Бу һадисә сајәсиндә бир даһа әмин олаҹағыг ки, Иса Мәсиһ инсанларын әзаб-әзијјәтләринин көкүнү јох етмәјә вә истәдији адамлары сағалтмаға гадирдир!

Иса пејғәмбәр ағзынаҹан долу отагда тәлим верән заман дөрд киши бир ифлиҹ адамы хәрәкдә онун јанына ҝәтирир. Онлар истәјирләр ки, пејғәмбәр онларын достуну сағалтсын. Лакин басабас олдуғундан ону Исанын јанына кечирә билмирләр (Марк 2:4). Тәсәввүр етмәк олар, онлар неҹә дилхор олурлар. Буна бахмајараг, онлар евин јасты дамына чыхыр, кирәмитләри галдырыб орада јекә дешик ачырлар. Онлар хәстәни хәрәјин үстүндәҹә ашағы саллајыб евин ичинә гојурлар.

Бәс Иса онларын бу һәрәкәтинә аҹыгланыр? Гәтијјән! Әксинә, онларын бөјүк иманы она ҝүҹлү тәсир бағышлајыр вә о, ифлиҹ адама дејир: «Ҝүнаһларын бағышланды» (Мәтта 9:2). Бәс Иса Мәсиһ ҝүнаһлары бағышламаға гадирдир? Орадакы дин хадимләри бунунла разылашмајыб үрәкләриндә: «Бу адам нә дејир? О күфр данышыр. Мәҝәр Аллаһдан башга кимсә ҝүнаһлары бағышлаја биләр?» — дејә дүшүнүрләр (Марк 2:7).

Онларын нә дүшүндүкләрини билән Иса сорушур: «Нијә үрәјиниздә белә фикирләширсиниз? Ифлиҹ олмуш бу адама “ҝүнаһларын бағышланды” демәк асандыр, јохса “ајаға галх, хәрәјини дә ҝөтүр, ҝет”?» (Марк 2:8, 9). Бәли, Иса ҝәләҹәкдә тәгдим едәҹәји гурбан әсасында инсанларын ҝүнаһларыны бағышлаја билир.

Сонра Иса пејғәмбәр әлејһдарларына вә орада јығышан бүтүн ҹамаата ҝөстәрир ки, инсанларын ҝүнаһыны бағышламаға ихтијары чатыр. О, үзүнү ифлиҹ олмуш адама тутараг дејир: «Дур, хәрәјини ҝөтүр, евинә ҝет». Киши дәрһал ајаға галхыр вә һамынын ҝөзү габағында хәрәјини ҝөтүрүб чөлә чыхыр. Ҹамаат һејрәт ичиндәдир. Онлар Аллаһы мәдһ едәрәк дејирләр: «Биз һәлә белә шеј ҝөрмәмишик» (Марк 2:11, 12).

Фикир вердинизсә, Иса Мәсиһ ҝүнаһ вә хәстәликләрин бир-бири илә әлагәли олдуғуну ҝөстәрир вә инсанын сағалмасы үчүн ҝүнаһларынын бағышланмасынын ҝәрәк олдуғуну вурғулајыр. Мүгәддәс Китаб өјрәдир ки, улу әҹдадымыз олан Адәм ҝүнаһ ишләјиб вә биз һамымыз ҝүнаһын агибәти олан хәстәлик вә өлүмү мирас алмышыг. Лакин Иса Мәсиһ Аллаһын Падшаһлығынын һакимијјәти алтында Аллаһы севиб Она ибадәт едәнләрин ҝүнаһларыны бағышлајаҹаг. Онда бүтүн хәстәликләр әбәдилик јох олаҹаг (Ромалылара 5:12, 18, 19).

Ифлиҹ адамы сағалтдыгдан бир аз сонра Иса пејғәмбәр Ҹәлилә ҝөлүнүн јахынлығында јерләшән Кәфәрнаһум шәһәринин әразисиндә галыр. Ҹамаат јенә дә онун башына топлашыр вә о тәлим вермәјә башлајыр. Сонра пејғәмбәр јолуна давам едәндә верҝи идарәсиндә отурмуш Мәтта адлы бир нәфәри ҝөрүр. Мәттанын диҝәр ады Лавидир. Иса Мәсиһ она мөһтәшәм бир тәклиф едир: «Ардымҹа ҝәл» (Мәтта 9:9).

Ҝөрүнүр, Бутрус, Андреас, Јагуб вә Јәһја кими, Мәтта да артыг Исанын тәлимләри вә ҝөрдүјү ишләри илә мүәјјән дәрәҹәдә танышдыр. О да онлар кими дәвәти һәмин андаҹа гәбул едир. Мәтта бу һадисәни өз Мүждәсиндә белә тәсвир едир: «О [Мәтта] дуруб Исанын ардынҹа ҝетди» (Мәтта 9:9). Беләҹә, Мәтта ишини атыб онун шаҝирди олур.

Ҝөрүнүр, бир гәдәр сонра Мәтта миннәтдарлыг әламәти олараг евиндә бөјүк гонаглыг тәшкил едир. Иса Мәсиһлә шаҝирдләриндән савајы бу мәҹлисә Мәттанын кечмиш иш јолдашлары олан верҝијығанлар да дәвәт олунублар. Онлар Рома һөкумәти үчүн верҝи топлајырлар. Һәмчинин лимана јахынлашан ҝәмиләрдән, әсас јоллардакы карванлардан вә идхал едилән маллардан да верҝи јығырлар. Јәһудиләрин верҝијығанлары ҝөрмәјә ҝөзү јохдур, чүнки онлар тез-тез халгы алдадыб верҝини һаггындан артыг ҝөтүрүрләр. Зијафәтдә ҝүнаһкарлар да, јәни пис ад газанмыш адамлар да вар (Лука 7:37—39).

Өзүндәнразы фәрисиләр Иса Мәсиһи бу адамларла бир сүфрәдә ҝөрәндә онун шаҝирдләриндән сорушурлар: «Нијә сизин устадыныз верҝијығанлар вә ҝүнаһлыларла чөрәк кәсир?» (Мәтта 9:11). Иса онларын суалыны ешидир вә белә ҹаваб верир: «Һәкимә сағлам адамлар јох, хәстәләр мөһтаҹдыр. Ҝедин, “Мән гурбан јох, мәрһәмәт истәјирәм” сөзләринин мәнасыны өјрәнин. Чүнки мән салеһләри јох, ҝүнаһлы адамлары чағырмаға ҝәлмишәм» (Мәтта 9:12, 13; Һушә 6:6). Фәрисиләр Исаја «устад» дејә мүраҹиәт едәндә һеч дә сәмими дејилләр, анҹаг онлар ондан нәсә өјрәнә биләрдиләр.

Ола билсин, Мәтта бу верҝијығанлары вә ҝүнаһлы инсанлары евинә чағырыб ки, онлар Иса Мәсиһи динләјиб руһани шәфа тапсынлар. Чүнки «онларын арасында Исанын ардынҹа ҝедән чох адам вар иди» (Марк 2:15). Мәсиһ онлара Аллаһла јахшы мүнасибәт гурмаг үчүн көмәк етмәк истәјир. Өзләрини салеһ сајан фәрисиләрдән фәргли олараг, о, бу адамлара һәгарәтлә бахмыр. Әксинә, онларын һалына аҹыјыр вә бир руһани тәбиб кими онлара јардым ҝөстәрир.

Иса Мәсиһин верҝијығанлара вә ҝүнаһлы адамлара гаршы мәрһәмәт ҝөстәрмәси о демәк дејил ки, о, ҝүнаһа ҝөз јумур. Иса пејғәмбәр физики хәстәләрә гаршы шәфгәт дујдуғу кими, ҝүнаһлы адамлара да аҹыјыр. Јадыныздадырса, Иса Мәсиһ ҹүзамлы адама шәфгәтлә тохунуб: «Истәјирәм. Тәмизлән», — демишди (Мәтта 8:3). Мәҝәр биз дә еһтијаҹы оланлара мәрһәмәт ҝөстәриб көмәк етмәли, хүсусилә дә онлары руһани ҹәһәтдән мөһкәмләндирмәли дејилик?

Ерамызын 30-ҹу илиндә Иса пејғәмбәрин иштирак етдији Пасха бајрамындан бир мүддәт сонра Вәфтизчи Јәһја һәбсханаја дүшүр. Јәһја шаҝирдләринин Исанын давамчысы олмасыны истәјирди, амма о, һәбсханаја дүшәндән сонра һеч дә онларын һамысы Иса Мәсиһин ардынҹа ҝетмир.

Ерамызын 31-ҹи илинин Пасхасы јахынлашыр. Јәһјанын шаҝирдләриндән бир нечәси Исанын јанына ҝәлиб сорушурлар: «Нә үчүн биз дә, фәрисиләр дә оруҹ тутуруг, амма сәнин шаҝирдләрин тутмур?» (Мәтта 9:14). Фәрисиләр үчүн оруҹ садәҹә дини ајиндир. Һәтта Иса сонралар буну ҝөстәрән мәсәл дә чәкир. Бу мәсәлдә өзүндәнразы бир фәриси дуа едир: «Шүкүр Сәнә, Илаһи! Мән башгалары кими... дејиләм... Һәфтәдә ики дәфә оруҹуму тутурам» (Лука 18:11, 12). Ола билсин, Јәһјанын шаҝирдләринин дә оруҹ тутмаг адәти вар иди. Јахуд да буну мүәллимләринин һәбсдә олмасына кәдәрләндикләри үчүн едирләр. Ола билсин, Јәһјанын шаҝирдләринә мараглыдыр ки, нәјә ҝөрә Иса пејғәмбәрин шаҝирдләри Јәһјанын башына ҝәләнләрә ҝөрә онларын дәрдинә шәрик олуб оруҹ тутмурлар.

Иса пејғәмбәр нүмунә әсасында изаһ едир: «Бәј достлары илә оланда һеч достлар јас тутар? Лакин ҝүн ҝәләҹәк, бәји араларындан ҝөтүрәҹәкләр, бах онда онлар оруҹ тутаҹаглар» (Мәтта 9:15).

Јәһја өзү дә Исаны бәј адландырмышды (Јәһја 3:28, 29). Демәли, һәлә ки бәј бурададыр, Иса пејғәмбәрин шаҝирдләри оруҹ тутмурлар. О өләндә исә шаҝирдләри јас сахлајыб иштаһадан кәсиләҹәкләр. Амма о дирилиб ҝөјә галханда һәр шеј башга ҹүр олаҹаг. Артыг онларын кәдәрләниб оруҹ тутмаларына еһтијаҹ галмајаҹаг.

Сонра Иса онлара ики мисал чәкир: «Һеч кәс көһнә палтара тәзә парчадан јамаг тикмәз, чүнки јамаг јығыланда јыртылмыш јер даһа да корланар. Һәмчинин тәзә шәрабы көһнә тулуглара төкмәзләр, јохса тулуг јыртылар, шәраб да ахыб төкүләр вә тулуг јарарсыз һала дүшәр. Тәзә шәрабы тәзә тулуглара төкәрләр» (Мәтта 9:16, 17). Бурада Иса нә демәк истәјир?

Иса Мәсиһ Вәфтизчи Јәһјанын шаҝирдләринә бир шеји баша салмаг истәјир: һеч ким онун давамчыларындан јәһудиләрин көһнә адәтләринә риајәт етмәји, о ҹүмләдән оруҹ тутмағы ҝөзләмәмәлидир. Мәсиһ јер үзүнә артыг көһнәлмиш вә мәһв едилмәк үзрә олан дини системи «јамајыб» онун өмрүнү узатмаг үчүн ҝәлмәјиб. Иса Мәсиһин тәсис етдији ибадәт инсан әнәнәләри илә корланмыш јәһуди дининин гәлибинә салынмыш ибадәт дејил. О, «көһнә палтара тәзә јамаг» вурмаг, јахуд «тәзә шәрабы көһнә тулуглара» төкмәк истәмир.