‘Итаәтсизлијимизә ҝөрә’ Јеһованын Гулунун «бәдәни дешилди»
«Бизим итаәтсизлијимизә ҝөрә онун бәдәни дешилди, шәр әмәлләримиз наминә әзилди... онун јаралары илә биз шәфа тапдыг» (ЈЕШАЈА 53:5).
1. Хатирә Ҝеҹәсини гејд едәндә нәји јадда сахламалыјыг вә бизә һансы пејғәмбәрлик көмәк едәҹәк?
БИЗ Хатирә Ҝеҹәсини гејд етмәклә Мәсиһин өлүмүнү, һәмчинин онун өлүмү вә дирилмәси сајәсиндә әлдә едилән һәр шеји јада салырыг. Хатирә Ҝеҹәси бизә Јеһованын али һакимијјәтинә бәраәт газандырылмасы, адынын тәгдис олунмасы, ејни заманда бәшәријјәтин хиласы да дахил олмагла, нијјәтин јеринә јетирилмәси һагда хатырладыр. Демәк олар ки, Исанын фидијә гурбанлығы вә онун сајәсиндә наил олунан шејләри Јешаја 53:3-12 ајәләриндән даһа јахшы тәсвир едән башга пејғәмбәрлик јохдур. Јешаја Гулун әзаб-әзијјәтләри һагда пејғәмбәрлик етмиш вә Мәсиһин өлүмү вә бунун сајәсиндә онун мәсһ олунмуш гардашларынын вә ‘башга гојунларын’ алаҹағы хејир-дуалары дәгигликлә тәсвир етмишди (Јәһ. 10:16).
2. Јешајанын пејғәмбәрлији нәји сүбут едир вә бу пејғәмбәрлији арашдырмаг бизә неҹә тәсир едәҹәк?
2 Исанын јер үзүндә доғулмасындан једди әср өнҹә Јешаја Јеһовадан илһам алараг пејғәмбәрлик етди ки, Аллаһын сечилмиш Гулу, өлүм баһасына олса белә, садиг галаҹаг. Бу сүбут едир ки, Јеһова Оғлунун садиглијинә шүбһә етмирди. Биз бу пејғәмбәрлији арашдырдыгҹа үрәјимиз миннәтдарлыгла долаҹаг, иманымыз исә мөһкәмләнәҹәк.
Она ‘хор бахдылар’ вә ‘гијмәт вермәдиләр’
3. Јәһудиләр Исаны нәјә ҝөрә гәбул етмәли идиләр, бәс онлар ону неҹә гаршыладылар?
3 Јешаја 53:3 ајәсини оху. Аллаһын ваһид Оғлу үчүн ҝөјдә Атасынын јанында хидмәт етмәјин ҝәтирдији севинҹи бурахыб, бәшәријјәти ҝүнаһ вә өлүмдән азад етмәк үчүн јер үзүнә ҝәләрәк һәјатыны гурбан вермәјин нә олдуғуну бир тәсәввүр ет! (Филип. 2:5-8). Мусанын Ганунуна әсасән ҝәтирилән һејван гурбанлары Исанын гурбанлығынын садәҹә көлҝәси олдуғу һалда, Мәсиһин фидијә гурбанлығы сајәсиндә ҝүнаһларын һәгигәтән бағышланмасы мүмкүн олду (Ибр. 10:1-4). Мәҝәр Иса ән азындан вәд олунмуш Мәсиһи ҝөзләјән јәһудиләр тәрәфиндән гәбул олунмаға вә һөрмәт едилмәјә лајиг дејилдими? (Јәһ. 6:14). Јәһудиләр исә әвәзиндә, Јешајанын пејғәмбәрлик етдији кими, Мәсиһә ‘хор бахдылар’ вә она ‘гијмәт вермәдиләр’. Һәвари Јәһја јазмышды: «Өз јурдуна ҝәлди вә Өз халгы да Ону гәбул етмәди» (Јәһ. 1:11). Һәвари Петер исә јәһудиләрә деди: «Аталарымызын Аллаһы Өз Гулу Исаны иззәтләндирди; Ону сиз әлә вердиниз вә Пилат Ону азад етмәјә гәрар вердији һалда, Пилатын гаршысында Ону рәдд етдиниз. О Мүгәддәси вә Салеһи рәдд едиб бир гатилин сизә бағышланмасыны истәдиниз» (Һәв. иш. 3:13, 14).
4. Иса хәстәликләри һансы мәнада ҝөрүрдү?
4 Јешаја һәм дә јазмышды ки, Иса ‘хәстәликләр ҝөрәҹәк’. Сөзсүз ки, јер үзүндә хидмәт едән заман Исанын јорулдуғу анлар олурду, анҹаг һеч һарада онун хәстәләндији һагда дејилмир (Јәһ. 4:6). Лакин о, тәблиғ етдији инсанларын һансы хәстәликләрлә үзләшдикләриндән хәбәрдар иди. Онлара јазығы ҝәлирди вә о, бир чохларына шәфа верирди (Марк 1:32-34). Бунунла о: «Әслиндә хәстәликләримизи о чәкди, дәрдләримизи өз үзәринә ҝөтүрдү» пејғәмбәрлијини јеринә јетирди (Јешаја 53:4а; Мат. 8:16, 17).
Санки ‘Аллаһ тәрәфиндән вурулду’
5. Бир чох јәһудиләр Исанын өлүмү һаггында нә фикирләширдиләр вә нәјә ҝөрә бу онун әзабларыны даһа да артырырды?
5 Јешаја 53:4б ајәсини оху. Исанын бир чох мүасирләри онун нә үчүн әзаблара мәруз галдығыны вә өлдүјүнү баша дүшмүрдүләр. Онлара елә ҝәлирди ки, Аллаһ ону ијрәнҹ хәстәлијә дүчар едәрәк ҹәзаландырыр (Мат. 27:38-44). Јәһудиләр Исаны күфр етмәкдә ҝүнаһландырырдылар (Марк 14:61-64; Јәһ. 10:33). Әлбәттә, о нә ҝүнаһкар, нә дә кафир иди. О, Атасыны бәрк севирди, буна ҝөрә дә кафир кими өләҹәјини дүшүнмәк, Јеһованын бир Гулу кими, онун изтирабларыны артырырды. Буна бахмајараг, о, Јеһованын ирадәсинә табе олмаға һазыр иди (Мат. 26:39).
6, 7. Һансы мәнада Јеһова садиг Гулуну ‘изтираблара’ дүчар етди вә нәјә ҝөрә О буну ‘истәјирди’?
6 Јешајанын пејғәмбәрлијиндә Мәсиһин ‘Аллаһ тәрәфиндән вурулдуғуну’ дүшүнәҹәкләри дејилмәси тәәҹҹүблү дејил. Анҹаг башга пејғәмбәрликдә: «Рәбб Өзү онун бу изтирабларыны истәди» дејилмәси бизә тәәҹҹүблү ҝөрүнә биләр (Јешаја 53:10). Әҝәр Јеһованын Өзү: «Будур, Мәним... үрәјим истәјән сечилмиш гулум!» демишдирсә, онда нә үчүн онун ‘изтирабларыны истәјирди’? (Јешаја 42:1). Һансы мәнада бу, Јеһоваја севинҹ ҝәтирирди?
7 Јешајанын пејғәмбәрлијинин бу һиссәсини баша дүшмәк үчүн Шејтанын Јеһованын али һакимијјәтинә мејдан охујараг Аллаһын ҝөјдәки вә јердәки бүтүн хидмәтчиләринин садиглијини шүбһә алтына алдығыны јадымыза салмалыјыг (Әјј. 1:9-11; 2:3-5). Иса өләнәдәк садиг галмагла Шејтана там вә гәти ҹаваб верди. Јеһова Мәсиһин дүшмәнләри тәрәфиндән едам олунмасына јол версә дә, шүбһә јохдур ки, сечилмиш Гулунун өлдүрүлдүјүнү ҝөрмәк Она үрәк ағрысы ҝәтирди. Амма Оғлунун Она там садиг галмасы Ону чох севиндирирди (Сүл. мәс. 27:11). Үстәлик, Оғлунун өлүмүнүн төвбә едән инсанлара фајдалар ҝәтирәҹәјини билмәк дә Јеһоваја бөјүк севинҹ ҝәтирирди (Лука 15:7).
«Бизим итаәтсизлијимизә ҝөрә онун бәдәни дешилди»
8, 9. а) Исанын бәдәни бизим итаәтсизлијимизә ҝөрә неҹә дешилди? б) Петер буну неҹә тәсдиг етди?
8 Јешаја 53:6 ајәсини оху. Адәмдән мирас алдыглары хәстәлик вә өлүмдән јаха гуртармаг үчүн ҝүнаһлы инсанлар јолуну азмыш гојунлар кими долашырлар (1 Пет. 2:25). Адәмин ҝүнаһлы нәслиндән һеч ким онун итирдијини ҝери сатын ала билмәз (Мәз. 49:7). Анҹаг Јеһова бөјүк мәһәббәтиндән ирәли ҝәләрәк «һамымызын шәр әмәлләринин јүкүнү» севимли Оғлунун вә сечилмиш Гулунун үзәринә гојду. Мәсиһ ‘итаәтсизлијимизә ҝөрә бәдәнинин дешилмәсинә’ вә ‘шәр әмәлләримиз наминә әзилмәјә’ разы олараг ҝүнаһларымызы ишҝәнҹә дирәјинә чәкди вә јеримизә өлдү.
9 Һәвари Петер јазыр: «Сиз бунун үчүн чағырылдыныз. Чүнки Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк. О Өзү бизим ҝүнаһларымызы Өз бәдәниндә чармыхда [«дирәкдә», ЈД] дашыды ки, биз ҝүнаһ етибары илә өлүб, салеһлик үчүн јашајаг». Сонра Јешајанын пејғәмбәрлијиндән ситат ҝәтирәк әлавә едир: «Сиз Онун јаралары илә шәфа тапдыныз» (1 Пет. 2:21, 24; Јешаја 53:5). Петерин диҝәр ајәдә дедији кими, бу, ҝүнаһлы инсанларын Аллаһла барышмасы үчүн имкан ачды: «Мәсиһ... гејри-салеһләр уғрунда ҝүнаһлар үчүн бир дәфә әзаб чәкди ки, бизи Аллаһа јахынлашдырсын» (1 Пет. 3:18).
«Кәсилмәјә апарылан гузу кими»
10. а) Вәфтизчи Јәһја Исаны неҹә адландырды? б) Нәјә ҝөрә Јәһјанын сөзләри мүнасибдир?
10 Јешаја 53:7, 8 ајәләрини оху. Вәфтизчи Јәһја Исанын она сары ҝәлдијини ҝөрәндә нида етди: «Будур, дүнјанын ҝүнаһыны арадан галдыран Аллаһ Гузусу!» (Јәһ. 1:29). Јәһја Исаны Гузу адландыранда, ола билсин, Јешајанын нөвбәти сөзләрини нәзәрдә тутурду: «[О,] кәсилмәјә апарылан гузу кими... ағзыны ачмады» (Јешаја 53:7). «О, ҹаныны фәда етди», — дејә Јешаја пејғәмбәрлик етмишди (Јешаја 53:12). Мараглыдыр ки, Иса өз өлүмүнүн Хатирә Ҝеҹәсини тәсис едән ахшам 11 садиг һәварисинә бир каса шәраб вериб деди: «Мәним ганым, ҝүнаһларын бағышланмасы үчүн бир чохлары уғрунда төкүлән Әһди-Ҹәдидин ганыдыр» (Мат. 26:28).
11, 12. а) Исһагын өз һәјатыны гурбан вермәјә һазыр олмасы Мәсиһин гурбанлығына даир әјани олараг нәји ҝөстәрир? б) Хатирә Ҝеҹәсини гејд едәркән Бөјүк Ибраһим олан Јеһова һаггында нәји јадда сахламалыјыг?
11 Исһаг кими, Иса да разы олду ки, Јеһованын ирадәсинә ујғун олараг гурбан ҝәтирилсин (Јар. 22:1, 2, 9-13; Ибр. 10:5-10). Исһаг гурбан ҝәтирилмәјә һазыр олса да, гурбаны тәгдим едән мәһз Ибраһим иди (Ибр. 11:17). Ејнилә, Иса өлмәјә һазыр олса да, фидијәнин неҹә өдәнилмәли олдуғуну гәрара алан Јеһова олмушду. Оғлунун фидијә гурбанлығы Онун бәшәријјәтә олан дәрин мәһәббәтинин тәзаһүрү иди.
12 Иса өзү демишди: «Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун» (Јәһ. 3:16). Һәвари Павел јазыр: «Аллаһ бизә олан Өз мәһәббәтини бунунла сүбут едир ки, биз һәлә ҝүнаһкар икән Мәсиһ бизим уғрумузда өлдү» (Ром. 5:8). Бу сәбәбдән, өлүмүнүн Хатирә Ҝеҹәсини јад етмәклә Мәсиһә һөрмәт етдијимизи ҝөстәрмиш олсаг да, һеч вахт унутмамалыјыг ки, фидијә тәдбирини Бөјүк Ибраһим олан Јеһова тәсис етмишдир. Биз Хатирә Ҝеҹәсини гејд етмәклә Ону иззәтләндиририк.
Гул ‘чохларына бәраәт газандырыр’
13, 14. Јеһованын Гулу чохларына неҹә бәраәт газандырды?
13 Јешаја 53:11, 12 ајәләрини оху. Јеһова сечилмиш Гулу һаггында демишди: «Мәним салеһ гулум... чохларына бәраәт газандыраҹаг». Неҹә? 12-ҹи ајәнин сонунда бу суала ҹаваб верилир. «[Гул] ганунсузлардан өтрү јалварды». Адәмин бүтүн нәсли ҝүнаһлы, ‘ганунсузлар’ кими доғулур вә буна ҝөрә дә ‘ҝүнаһын әвәзини’ алырлар, јәни өлүрләр (Ром. 5:12; 6:23). Јеһова илә ҝүнаһлы инсанлар арасында барышыг ваҹибдир. Јешајанын пејғәмбәрлијинин 53-ҹү фәслиндә Исанын ҝүнаһлы бәшәријјәт үчүн неҹә ‘јалвардығы’ чох ҝөзәл тәсвир олунур: «Бизим әмин-аманлығымыз үчүн о ҹәза алды, онун јаралары илә биз шәфа тапдыг» (Јешаја 53:5).
14 Мәсиһ ҝүнаһларымызы үзәринә ҝөтүрмәклә вә әвәзимизә өлмәклә ‘чохларына бәраәт газандырды’. Павел јазмышды: «Аллаһ Онда [Мәсиһдә] бүтүн долғунлуғу илә јашамаға вә Онун васитәсилә, чармыхда [«ишҝәнҹә дирәјиндә», ЈД] ахыдылан ганы илә сүлһ јарадараг, һәм јердә, һәм дә ҝөјләрдә олан һәр шеји Өзү илә барышдырмаға разы олду» (Колос. 1:19, 20).
15. а) Павелин бәһс етдији ‘ҝөјләрдә олан һәр шеј’ кимләрдир? б) Хатирә Ҝеҹәсинин символларындан гәбул етмәк һаггы јалныз кимләрә верилиб вә нәјә ҝөрә?
15 Мәсиһин төкүлмүш ганы васитәсилә Јеһова илә барышан ‘ҝөјләрдә олан һәр шеј’ Мәсиһлә бирҝә ҝөјдә идарә етмәјә дәвәт алан мәсһ олунмуш мәсиһчиләрдир. ‘Сәмави дәвәтә ортаг олан’ мәсиһчиләрә ‘јашамаг үчүн бәраәт верилир’, јәни онлар салеһ елан олунурлар (Ибр. 3:1; Ром. 5:1, 18). Јеһова онлары руһани оғуллуға ҝөтүрүр. Мүгәддәс руһ онлара шәһадәт едир ки, онлар сәмави Падшаһлыгда падшаһ вә каһин олмаға дәвәт алан ‘Мәсиһин һәмварисләридирләр’ (Ром. 8:15-17; Вәһј 5:9, 10). Онлар руһани Исраилин, јәни ‘Аллаһын Исраилинин’ бир һиссәси олур вә ‘јени әһдә’ дахил олурлар (Јер. 31:31-34; Галат. 6:16). Јени әһдин үзвләри кими, онлара, гырмызы шәраб да дахил олмагла, Хатирә Ҝеҹәсинин символларындан гәбул етмәк һаггы верилир. Иса бу шәраб һагда демишди: «Ахшам јемәјиндән сонра, бир касаны ҝөтүрүб деди: “Бу каса Мәним сизин үчүн төкүлән ганымла ҝерчәкләнән Әһди-Ҹәдиддир”» (Лука 22:20).
16. ‘Јердә олан шејләр’ кимләрдир вә онлар Јеһованын гаршысында неҹә салеһ елан олунурлар?
16 ‘Јердә олан шејләр’ исә јер үзүндә әбәди јашамаг үмидинә малик олан башга гојунлардыр. Јеһованын сечилмиш Гулу онлара да Аллаһ гаршысында бәраәт газандырыр. Мәсиһин фидијә гурбанлығына иман ҝәтирдикләри вә бунунла да ‘либасларыны јујуб, онлары Гузунун ганы илә ағартдыглары’ үчүн Јеһова онлары руһани оғуллары кими дејил, Өз достлары кими салеһ елан едир вә онлара «бөјүк мәшәггәтдән» сағ чыхмаг кими ҝөзәл үмид верир (Вәһј 7:9, 10, 14; Јаг. 2:23). Башга гојунлар јени әһдә дахил едилмәдикләри вә ҝөјдә јашамаг үмидинә малик олмадыглары үчүн Хатирә Ҝеҹәсинин символларындан гәбул етмир, анҹаг һөрмәтҹил мүшаһидәчиләр хүсусунда бу мәрасимдә иштирак едирләр.
Јеһоваја вә сечилмиш Гулуна шүкр олсун!
17. Јешајанын Гул һаггында пејғәмбәрлијини арашдырмағымыз зеһнимизи Мәсиһин өлүмүнүн Хатирә Ҝеҹәсинә һазырламаға неҹә көмәк едир?
17 Јешајанын Гул һаггында пејғәмбәрлијини арашдырмағымыз зеһнимизи Мәсиһин өлүмүнүн Хатирә Ҝеҹәсинә һазырламаға, о ҹүмләдән ‘иманымызын Баниси вә Камилләшдириҹиси олан Исаја бахмаға’ көмәк едир (Ибр. 12:2). Биз өјрәндик ки, Аллаһын Оғлу үсјанкар дејил. Шејтандан фәргли олараг, Худавәнд Рәбб кими гәбул етдији Јеһовадан тәлим алмаг она зөвг верир. Јер үзүндә хидмәт едән заман Исанын тәблиғ етдији инсанлара шәфгәт ҝөстәрдијини, онлара физики вә руһани ҹәһәтдән шәфа вердијини өјрәндик. О, бунунла бир Падшаһ кими ‘јер үзүндә әдаләти гуранда’ нәләр едәҹәјини нүмајиш етдирди (Јешаја 42:4). «Милләтләрә нур» гисминдә Падшаһлығын тәблиғиндә ҝөстәрдији сәј онун давамчыларына хош хәбәри бүтүн дүнјада сәјлә тәблиғ етмәји хатырладыр (Јешаја 42:6).
18. Нәјә ҝөрә Јешајанын пејғәмбәрлијини охујанда үрәкләримиз Јеһоваја вә Онун садиг Гулуна миннәтдарлыгла долур?
18 Јешајанын пејғәмбәрлији Јеһованын севимли Оғлуну уғрумузда изтираб чәкиб өлмәк үчүн јерә ҝөндәрәндә неҹә бөјүк гурбан вердијини даһа дәриндән анламаға көмәк едир. Јеһоваја Оғлунун изтирабларыны дејил, өләнәдәк онун садиг галдығыны ҝөрмәк севинҹ бәхш етди. Исанын Шејтанын јаланчы олдуғуну сүбут етмәк вә Јеһованын адыны тәгдис етмәк, бунунла да Онун али һөкмранлығына бәраәт газандырмаг үчүн етдији һәр шеји гәбул етмәклә Онун севинҹинә шәрик олмалыјыг. Үстәлик, Мәсиһ ҝүнаһларымызы үзәринә ҝөтүрүб уғрумузда өлдү. Бунунла да о, мәсһ олунмуш кичик сүрү вә башга гојунлар үчүн Јеһова гаршысында салеһ ада малик олмасыны мүмкүн етди. Хатирә Ҝеҹәсинә топлашанда гој үрәкләримиз Јеһова вә Онун садиг Гулуна миннәтдарлыгла долсун!
Тәкрар үчүн суаллар
• Һансы мәнада Јеһова Оғлунун «изтирабларыны истәди»?
• Һансы мәнада Исанын бәдәни ‘итаәтсизлијимизә ҝөрә дешилди’?
• Гул неҹә ‘чохларына бәраәт газандырды’?
• Гул һаггында пејғәмбәрлији өјрәнмәк зеһнини вә үрәјини Хатирә Ҝеҹәсинә неҹә һазырлады?
[26-ҹы сәһифәдәки шәкил]
‘Она хор бахылды. Биз она гијмәт вермәдик’
[28-ҹи сәһифәдәки шәкил]
‘О, ҹаныны фәда етди’
[29-ҹу сәһифәдәки шәкил]
‘Башга гојунлар’ Хатирә Ҝеҹәсиндә һөрмәтҹил мүшаһидәчиләр хүсусунда иштирак едирләр