ФӘСИЛ 23
Мүгәддәс Китабын һомосексуализмә даир нөгтеји-нәзәрини неҹә изаһ едим?
Мүкафат тәгдиметмә мәрасиминдә ики актрисанын бир-бирини еһтираслы өпүшлә саламламасы залы ләрзәјә ҝәтирир! Бир анлыг сүкутун ардындан ҝурултулу алгыш сәдалары гопур. Һомосексуалистләр үчүн бу, әсил зәфәр, скептикләр үчүн исә садәҹә рекламдыр. Бу сәһнә узун мүддәт хәбәрләрдә тәкрар-тәкрар нүмајиш етдириләҹәк вә Интернетдә милјонларла инсан тәрәфиндән бахылаҹаг.
ЈУХАРЫДА тәсвир олунан һадисәдән ҝөрүндүјү кими, мәшһурларын һомосексуал вә ја бисексуал олдугларыны ачыгламалары гәдәр медианын диггәтини ҹәлб едән чох аз шеј тапылар. Бәзиләри бу ҹүр инсанлары ҹәсарәтләринә ҝөрә алгышлајыр, диҝәрләри исә позғунлугларына ҝөрә онлары тәнгид атәшинә тутур. Бу ики нөгтеји-нәзәрлә разылашмајан чохлары исә һомосексуализми гејри-әнәнәви һәјат тәрзи һесаб едир. 21 јашлы Даниел дејир: «Мән мәктәбдә охујанда һәтта нормал оријентасијалы ушаглар белә һомосексуализми мүһакимә едәнләри көһнә фикирли вә гәрәзли һесаб едирдиләр».
Нәсилдән вә ја өлкәдән асылы олараг, һомосексуализмә мүнасибәт дәјишә биләр. Лакин Аллаһын хидмәтчиләри јол вермирләр ки, һәр ҹүр тәлим күләји онлары ора-бура апарсын (Ефеслиләрә 4:14). Онлар Мүгәддәс Китабын тәлимләринә бағлы галырлар.
Мүгәддәс Китабын һомосексуализмә даир нөгтеји-нәзәри неҹәдир? Мүгәддәс Китаб принсипләринә ујғун јашадығын үчүн сәни ҝеридә галмыш, гәрәзли вә ја һомофоб (һомосексуалистләрә нифрәт едән) адландыранлара неҹә ҹаваб верә биләрсән? Ҝәл ашағыдакы суаллара нәзәр салаг, ҝөрәк онлара неҹә ҹаваб вермәк олар.
«Мүгәддәс Китабда һомосексуализм барәдә нә дејилир?»
«Мүгәддәс Китабда ајдын дејилир ки, Аллаһ ҹинси әлагәни јалныз бир киши вә бир гадын арасында, үстәлик, јалныз никаһ дахилиндә нәзәрдә тутмушдур (Јарадылыш 1:27, 28; Левилиләр 18:22; Сүлејманын мәсәлләри 5:18, 19). Мүгәддәс Китабда ҹинси әхлагсызлыг мүһакимә едилир. Ҹинси әхлагсызлыг дедикдә һомосексуал вә јолверилмәз һетеросексуал (киши илә гадын арасында) әлагә нәзәрдә тутулур» (Галатијалылара 5:19—21)a.
«Һомосексуализмә сән неҹә бахырсан?»
«Мән һомосексуалистләрә нифрәт етмирәм, бунунла белә, онларын әмәлләрини дә дәстәкләмирәм».
Унутма: әҝәр сән Мүгәддәс Китабын әхлаг нормаларыны әлдә рәһбәр тутурсанса, бу, сәнин сечдијин һәјат тәрзидир вә белә бир сечим етмәјә һаггын чатыр (Јешуа 24:15). Буна ҝөрә һеч вахт утанма (Мәзмур 119:46).
«Мәҝәр Аллаһын хидмәтчиләри, сексуал оријентасијасындан асылы олмајараг, һамыја һөрмәт етмәли дејилләр?»
«Әлбәттә, етмәлидирләр. Мүгәддәс Китабда дејилир: “Һәр ҹүр инсана һөрмәт един” (1 Петер 2:17). Буна ҝөрә дә мәсиһчиләр һомофоб дејилләр, јәни һомосексуалистләрә нифрәт етмирләр. Онлар бүтүн инсанлара, о ҹүмләдән һомосексуалистләрә гаршы хејирхаһдырлар» (Матта 7:12).
«Мәҝәр сәнин һомосексуализмә олан мүнасибәтин һомосексуалистләрә гаршы гәрәзли јанашмағына сәбәб олмур?»
«Әсла. Мән онларын әмәлләрини рәдд едирәм, өзләрини јох».
Сонра әлавә етмәк олар: «Мәсәлән, мән сигарет дә чәкмирәм. Һәтта бу һагда фикирләшәндә белә үрәјим буланыр. Амма тутаг ки, сән чәкирсән вә бу, сәнин үчүн нормалдыр. Фәргли дүшүндүјүн үчүн мән сәнә гаршы пис мүнасибәт ҝөстәрмәјәҹәјәм, әминәм ки, сән дә дүшүнҹә тәрзимә ҝөрә мәндән јан ҝәзмәјәҹәксән, елә дејил? Ејни принсип һомосексуализмә дә аиддир».
«Мәҝәр Иса пејғәмбәр һамыја гаршы дөзүмлү олмаға сәсләмирди? Бәс онда сиз һомосексуалистләрә дөзүмлүлүк ҝөстәрмәли дејилсиниз?»
«Иса пејғәмбәр өз шаҝирдләрини үрәкләри истәдикләри кими јашамаға тәшвиг етмирди. О өјрәдирди ки, хилас јолу јалныз она иман едәнләр үчүн ачыгдыр (Јәһја 3:16). Иса Мәсиһә иман етмәк Аллаһын бүтүн әхлаг нормаларына, һәмчинин һомосексуализми мүһакимә едән нормалара ујғун јашамаг демәкдир (Ромалылара 1:26, 27)».
«Һомосексуалистләр дәјишә билмәзләр, онлар белә доғулублар».
«Мүгәддәс Китабда һомосексуалистләрин характери илә бағлы һеч нә мүзакирә олунмаса да, бәзи хүсусијјәтләрин үрәкдә дәрин көк салдығы дејилир (2 Коринфлиләрә 10:4, 5). Анҹаг бәзиләри ејни ҹинсдән олан инсанлара мејилли олсалар белә, Мүгәддәс Китаб онлара һомосексуал һәрәкәтләрдән гачмағы бујурур».
Мәсләһәт: һомосексуал арзулара нәјин сәбәб олдуғуна даир мүбаһисә етмәкдәнсә, ән јахшысы һәмсөһбәтинин диггәтини Мүгәддәс Китабда һомосексуалистләрин һәрәкәтләринин мүһакимә едилдијинә јөнәлт. Мүгајисә үчүн белә дејә биләрсән: «Чохлары иддиа едир ки, агрессивлик инсанын ҝениндә олдуғундан бәзиләри буна мејиллидир (Сүлејманын мәсәлләри 29:22). Дејәк ки, бу, доғрудан да, беләдир. Амма билдијин кими, Мүгәддәс Китаб гәзәб вә һиддәти мүһакимә едир (Мәзмур 37:8; Ефеслиләрә 4:31). Сәнҹә, кимсә зоракылыға мејиллидир дејә бу тәләби һагсызлыг адландырмаг олармы?»
«Аллаһ һомосексуалистләрдән өз арзуларыны өлдүрмәји неҹә тәләб едә биләр? Ахы бу гәддарлыгдыр».
«Онда елә чыхыр, инсанлар ҹинси истәкләринин гулу олмалыдырлар. Мүгәддәс Китаб һәр бир кәси дүзҝүн олмајан ҹинси арзуларыны боға биләҹәјинә әмин едәрәк инсан ләјагәтини уҹалдыр. Әсас одур, истәк олсун» (Колослулара 3:5).
«Һомосексуализмә гаршы мүнасибәтини дәјишмәлисән».
«Мисал үчүн, мән гумар ојнамағын дүзҝүн олмадығыны дүшүнүрәм, сән исә мәнимлә ејни фикирдә дејилсән. Бәс сәнҹә, милјонларла инсан гумар ојнајыр дејә мөвгејими дәјишмәјими тәләб етмәјин дүзҝүн оларды?»
Јадда сахла: бир чох инсанлар кими, һомосексуалистләрин дә өз етика гајдалары вар, мәсәлән, онлар јаланы, әдаләтсизлији вә мүһарибәләри дәстәкләмирләр. Бу кими шејләр Мүгәддәс Китабда да мүһакимә олунур, анҹаг ејни заманда орада, һомосексуализм дә дахил олмагла, һәр ҹүр әхлагсызлыг мүһакимә олунур (1 Коринфлиләрә 6:9, 10).
Мүгәддәс Китаб тәләбләри һәддән артыг сәрт дејил вә инсанда гәрәзли фикирләр јаратмыр. Аллаһын Кәламы һамыдан нә тәләб едирсә, һомосексуалистләрдән дә ејни шеји — «ҹинси әхлагсызлыгдан» гачмағы тәләб едир (1 Коринфлиләрә 6:18).
Әслиндә, һомосексуал олмајан милјонларла инсанлар Мүгәддәс Китаб принсипләринә ујғун јашамаг истәдикләри үчүн өзләринә һаким олмағы баҹарыр вә ширникдириҹи тәсирләрә ујмурлар. Онларын арасында евләнмәк шансы аз олан субајлар вә һәјат јолдашларынын травма вә ја хәстәлији уҹбатындан интим әлагәдә ола билмәјән бир чох евли инсанлар да вар. Онлар ҹинси истәкләрини тәмин едә билмәсәләр дә, хошбәхт өмүр сүрүрләр. Әҝәр һомосексуалистләр үрәкдән Аллаһы разы салмаг истәјирләрсә, онлар буна наил ола биләрләр (Ганунун тәкрары 30:19).
ӘЛАВӘ МӘЛУМАТ ҮЧҮН 2-ҸИ ҸИЛДИН 28-ҸИ ФӘСЛИНӘ БАХ
Бәзи гызлар инанырлар ки, севдикләри оғланла ҹинси әлагәдә олмаг онларын мүнасибәтини даһа да мөһкәмләндирәҹәк. Бу ҹүр јанлыш дүшүнҹә тәрзиндән неҹә гачына биләҹәјини өјрән.
[Һашијә]
a Мүгәддәс Китабда истифадә олунан «ҹинси әхлагсызлыг» ифадәси алтында тәкҹә ҹинси әлагә јох, һәм дә башгасынын ҹинсијјәт органларынын гыҹыгландырылмасы, һәмчинин орал вә анал секс нәзәрдә тутулур.
АЧАР АЈӘ
“Торпагдан јарадылмыш бәдәнинизин үзвләриндәки мејилләри — ҹинси әхлагсызлыға, натәмизлијә, шәһвәтә, еһтираса вә бүтпәрәстлик олан тамаһкарлыға мејилләри өлдүрүн” Колослулара 3:5
МӘСЛӘҺӘТ
Ола билсин, башгаларынын һәрәкәтләри сәни нараһат едир, буна бахмајараг мүһакимәедиҹи тондан гачын. Унутма ки, һамы, сәнин кими, истәдији шејә инанмагда сәрбәстдир.
БИЛИРСӘН... ?
Биринҹи әсрдә һомосексуалист олан бәзиләри өз натәмиз әмәлләриндән әл чәкдиләр, Аллаһын ҝөзүндә јујулуб тәмизләндиләр вә мәсиһчи олдулар (1 Коринфлиләрә 6:9—11).
ҺӘРӘКӘТ ПЛАНЫ!
Әҝәр кимсә дејәрсә ки, Мүгәддәс Китабын һомосексуализмә даир нөгтеји-нәзәри мүасирликдән узагдыр, онда мән белә дејәҹәјәм: ․․․․․
Һомосексуалистләрин өзләрини јох, әмәлләрини мүһакимә етдијими белә изаһ едә биләрәм: ․․․․․
Бу мөвзу илә бағлы валидејнләримә вермәк истәдијим суаллар: ․․․․․
НЕҸӘ ДҮШҮНҮРСӘН?
● Нәјә ҝөрә Аллаһын әхлаг ганунлары гојмаға һаггы вар?
● Мүгәддәс Китабын әхлаг нормаларына әмәл етмәјин сәнә һансы фајдасы вар?
[170–ҹи сәһифәдәки јазы]
“Мәктәбимиздә бир оғланын һәјат тәрзини гәбул етмәмәјим јаман хәтринә дәјирди. Анҹаг она изаһ етдим ки, мән тәкҹә һомосексуализмә дејил, һәр ҹүр әхлагсызлыға нифрәт едирәм. Шәхсән онун өзүнә нифрәт етмәдијими баша дүшәндә мәнә һөрмәт етмәјә башлады, һәтта башгалары нә исә дејәндә мәним тәрәфими тутурду” Офелја
[168–ҹи сәһифәдәки чәрчивә]
Бисексуаллыг һагда нә демәк олар?
Бисексуаллыға (һәр ики ҹинсә мараг) һәм гызларда, һәм дә оғланларда раст ҝәлинсә дә, ҝөрүнүр, бу, даһа чох гызлар арасында ҝениш вүсәт алыр. Бәзиләриндә бу, садәҹә марагдан ирәли ҝәлир. 26 јашлы Лиза дејир: «Филмләр, верилишләр, маһны вә клипләр гызлары гызларла өпүшмәјә тәшвиг едир. Јенијетмәләр дә буна ширникирләр, хүсусилә дә әҝәр бунда сәһв бир шеј ҝөрмүрләрсә».
Башгаларында исә, һәгигәтән дә, белә бир мејил олур. 13 јашлы Вики дејир: «Әјләнҹә ҝеҹәсиндә мән ики бисексуал гызла таныш олдум, сонра исә рәфигәм деди ки, мән онларын хошуна ҝәлмишәм. Нәтиҹәдә, онлардан бири илә СМС-ләшмәјә башладым вә она гаршы һиссләрим јаранды».
Викинин һиссләри сәнә дә танышдырмы? Чохлары сәни һиссләрини ҝизләтмәмәјә вә бисексуал олдуғуну ачыг демәјә тәшвиг едә биләр. Анҹаг нәзәрә алмаг лазымдыр ки, өз ҹинсиндән олан инсанлара мејил чох вахт өтәри бир һисс олур. Вики буна әмин олду. 16 јашлы Лизет дә буну баша дүшдү. О дејир: «Һиссләрим барәдә валидејнләримә данышанда өзүмү даһа јахшы һисс етдим. Һәмчинин биолоҝија дәрсиндә өјрәндим ки, кечид дөврүндә һормонларын мигдарында ҝүҹлү дәјишикликләр баш верә биләр. Әминәм ки, јенијетмәләр өз организмләри барәдә нә гәдәр чох билсәләр, бир о гәдәр дә өз ҹинсләриндән олан кәсләрә мејилин мүвәггәти олдуғуну даһа јахшы баша дүшәр вә һомосексуаллыға мәһкум олунмадыгларыны анлаја биләрләр».
Һәтта һиссләрин садәҹә јенијетмәлик дөврүнә хас өтәри бир шеј олмаса да, јадда сахла ки, Мүгәддәс Китабын гаршына гојдуғу мәгсәд әлчатандыр: сән истәнилән јанлыш арзулары боға биләрсән.
[169–ҹу сәһифәдәки шәкил]
Аллаһын хидмәтчиләри ахына гаршы ҝетмәкдән горхмурлар