Гој голунуза ҝүҹ ҝәлсин
«Пејғәмбәрләрин дедији бу сөзләри... ешидәнләр, гој голунуза ҝүҹ ҝәлсин» (ЗӘКӘРИЈЈӘ 8:9).
1, 2. Нә үчүн биз Һаггај вә Зәкәријјәнин китабларына диггәт јетирмәлијик?
ҺАГГАЈ вә Зәкәријјәнин пејғәмбәрликләри тәхминән 2 500 ил әввәл јазылса да, онлар бизим үчүн дәрин мә’на кәсб едир. Бу ики китабда садәҹә олараг тарих тәсвир олунмајыб. Онлар ‘бизә тә’лим олараг бундан әввәл јазыланларын’ бир һиссәсидир (Ромалылара 15:4). Бу китаблардан охудугларымызын чоху Падшаһлығын 1914-ҹү илдә ҝөјдә тә’сис едилмәсиндән сонра јердә мөвҹуд олан реал вәзијјәт үзәриндә бизи дүшүнмәјә вадар едир.
2 Һәвари Павел гәдимдә Аллаһын халгынын башына ҝәлән һадисәләрә вә дүшдүјү вәзијјәтә истинад едәрәк јазырды: «Бүтүн бунлар ибрәт олараг онларын башына ҝәлирди; сон әсрләрә чатан бизләр үчүн дә мәсләһәт олараг гејд едилди» (1 Коринфлиләрә 10:11). Буна ҝөрә дә, сәни «Һаггај» вә «Зәкәријјә» китабларынын бизим ҝүнләр үчүн һансы әһәмијјәти кәсб етмәси марагландыра биләр.
3. Һаггај вә Зәкәријјә нә илә бағлы пејғәмбәрликләр сөјләјирдиләр?
3 Кечән мәгаләдән өјрәндијимиз кими, биринҹи дәфә Һаггај вә Зәкәријјәнин пејғәмбәрликләри јәһудиләрин Бабил әсарәтиндән азад олунуб, Аллаһын вердији торпаға гајытдыглары дөврдә јеринә јетмишди. Бу пејғәмбәрликләр мә’бәдин тикинтиси илә бағлы иди. Јәһудиләр мә’бәдин тәмәлини б. е. ә. 536-ҹы илдә гојдулар. Бә’зи гоҹа јәһудиләрин фикри әввәлки мә’бәддә галса да, үмумиликдә ҝөтүрәндә һәр јаны «ҝурултулу севинҹ сәсләри» бүрүмүшдү. Бизим дөврдә исә даһа мүһүм бир һадисә баш вермишдир. Һансы һадисә? (Езра 3:3-13).
4. Биринҹи Дүнја мүһарибәсиндән аз сонра һансы һадисә баш верди?
4 Биринҹи Дүнја мүһарибәсиндән аз сонра Јеһованын мәсһ едилмишләри Бөјүк Бабил әсарәтиндән азад едилдиләр. Бу, Јеһованын көмәјини сүбут едән әсас амил иди. Әввәлҹә елә тәәссүрат ојанмышды ки, Мүгәддәс Китаб Тәдгигатчыларынын тәблиғ вә тә’лим иши дин рәһбәрләри вә онларын сијаси мүттәфигләри тәрәфиндән дајандырылыб (Езра 4:8, 13, 21-24). Лакин Јеһова Аллаһ бу ишин гаршысында дуран манеәләри арадан галдырды. 1919-ҹу илдән е’тибарән Падшаһлыг иши чичәкләнир вә онун ҝениш вүс’әт алмасынын гаршысыны һеч нә ала билмир.
5, 6. Зәкәријјә 4:7 ајәси мөһтәшәм шәкилдә јеринә јетәҹәк һансы һадисәјә аиддир?
5 Бизим дөврүмүздә дә Јеһованын итаәткар хидмәтчиләринин һәјата кечирдији тәблиғ вә тә’лим ишинин Аллаһын көмәјилә давам едәҹәјинә әмин ола биләрик. Зәкәријјә 4:7 ајәсиндә охујуруг: «О “нә ҝөзәлдир, нә ҝөзәлдир” нидалары алтында мә’бәдин тәпә дашыны ҝөтүрәҹәк». Бәс бу пејғәмбәрлик, бизим дөврүмүздә мөһтәшәм шәкилдә јеринә јетәҹәк һансы һадисәјә аиддир?
6 Зәкәријјә 4:7 ајәси руһани мә’бәдин јер үзүндәки һәјәтиндә Һөкмдар Аллаһа едилән һәгиги ибадәтин мүкәммәлләшмиш һала чатаҹағы вахта аиддир. Бу мә’бәд, Мәсиһин әфв гурбанлығы әсасында Јеһоваја ибадәт васитәсилә јахынлашмаг үчүн тә’сис едилән гурулушдур. Мөһтәшәм руһани мә’бәд ерамызын биринҹи әсриндән мөвҹуддур. Лакин һәгиги ибадәт јер үзүндә һәлә мүкәммәлләшмәлидир. Һазырда милјонларла хидмәтчи руһани мә’бәдин јер үзүндәки һәјәтиндә хидмәт едир. Онлар вә күлли мигдарда дирилән инсанлар Иса Мәсиһин Миниллик Һөкмранлығы дөврүндә камиллијә говушаҹаглар. Миниллијин сонунда тәмизләнмиш јер үзүндә јалныз Аллаһа һәгигәтән ибадәт едәнләр галаҹаглар.
7. Һәгиги ибадәтин мүкәммәлләшмәси үчүн мүасир дөврдә Иса нә едир вә бу нә үчүн бизи руһландырмалыдыр?
7 Вали Зеруббабил вә баш каһин Јешуа б. е. ә. 515-ҹи илдә мә’бәдин тикилиб баша чатмасынын шаһиди олдулар. Зәкәријјә 6:12, 13 ајәләриндә һәгиги ибадәтин мүкәммәл вәзијјәтә чатдырылмасында Исанын ролу һаггында пејғәмбәрлик едилир: «Ордулар Рәбби белә дејир: “Бах ‘Пөһрә’ адланан адам будур! О олдуғу јердән гол-будаг атаҹаг вә Рәббин мә’бәдини тикәҹәк. Бәли... о иззәтләнәҹәк, тахтында отуруб һөкмранлыг едәҹәк. Тахтынын јанында [«үзәриндә», КМ] каһин олаҹаг”». Руһани мә’бәддә Падшаһлыг ишинин ҝөрүлмәсинә ҝөјдә јашајан вә Давуд сүлаләсини давам етдирән Исанын көмәк етдијини нәзәрә алсаг, сизҹә, ким исә онун инкишафына мане ола биләрми? Әлбәттә ки, јох! Бу факт бизи, ҝүндәлик гајғылара јајынмадан, хидмәтимизи давам етдирмәјә тәшвиг етмирми?
Бизим үчүн ваҹиб олан ишләр
8. Биз нә үчүн руһани мә’бәддә јеринә јетирилән иши һәјатымызда биринҹи јерә гојмалыјыг?
8 Јеһованын бизә хејир-дуа вермәси үчүн һәјатымызда биринҹи јерә руһани мә’бәддәки иши гојмалыјыг. ‘Вахт чатмајыб’ дејән јәһудиләрдән фәргли олараг, биз «ахыр ҝүнләрдә» јашадығымызы јаддан чыхармамалыјыг (Һаггај 1:2; 2 Тимотејә 3:1). Иса пејғәмбәрлик етмишди ки, онун садиг давамчылары Падшаһлыг һаггында хош хәбәри тәблиғ едәҹәк вә шаҝирдләр һазырлајаҹаглар. Биз еһтијатлы олмалыјыг ки, лајиг ҝөрүлдүјүмүз бу шәрәфә биҝанә јанашмајаг. Дүнјанын мүгавимәти нәтиҹәсиндә мүвәггәти олараг дајандырылан тәблиғ вә тә’лим иши 1919-ҹу илдә бәрпа олунду, амма һәлә баша чатдырылмајыб. Сән әмин ола биләрсән ки, бу иш мүтләг баша чатдырылаҹаг!
9, 10. Јеһова бизә нә заман хејир-дуа верәҹәк вә бизим үчүн бу нә демәкдир?
9 Јеһова, Онун ишини нә дәрәҹәдә виҹданла һәјата кечирмәјимиздән асылы олараг, бизә ајры-ајрылыгда вә халг кими бүтөвлүкдә хејир-дуа верәҹәк. Јеһованын бизә дә әминлик верән вә’динә диггәт јетирин. Јәһудиләр сәмими гәлбдән һәгиги ибадәтә гајыданда вә мә’бәдин бәрпа едилмәсиндә виҹданла иштирак етмәјә башлајанда, Јеһова демишди: «Бу ҝүндән е’тибарән сизә бәрәкәт верәҹәјәм!» (Һаггај 2:19). Јеһова онлара хејирхаһлыг ҝөстәрәҹәкди. Ҝөрүн Јеһова һансы хејир-дуалары вә’д едир: «Әкилән тохум бәһәрли олаҹаг: тәнәк бәһрәсини, торпаг мәһсулуну, ҝөјләр шеһини верәҹәк. Бунларын һамысыны бу халгын сағ галанларына мүлк олараг верәҹәјәм» (Зәкәријјә 8:9-13).
10 Аллаһын бизә һәвалә етдији иши сә’јлә вә хош әһвал-руһијјә илә ҝөрүрүксә, јәһудиләр руһани вә мадди ҹәһәтдән хејир-дуа алдығы кими, биз дә алаҹағыг. Бу хејир-дуалара арамызда олан сүлһ, әмин-аманлыг, руһани фираванлыг вә тәрәгги дахилдир. Бәли, әмин ола биләрсиниз ки, руһани мә’бәддәки иши Онун истәдији кими иҹра етдијимиз тәгдирдә, Јеһова бизә хејир-дуа верәҹәкдир.
11. Һәјатымызда нәји ваҹиб тутдуғумузу неҹә өјрәнә биләрик?
11 Инди ‘һәјат јолларымыз һаггында јахшы дүшүнмәјин’ әсл вахтыдыр (Һаггај 1:5, 7). Һәр биримиз һәјатда нәјә үстүнлүк вердијимизи ајдынлашдырмалыјыг. Јеһованын бизә хејир-дуа вермәси Онун адыны нә дәрәҹәдә иззәтләндирмәјимиздән вә руһани мә’бәдиндә ҝөрдүјүмүз ишдә тәрәгги етмәјимиздән асылыдыр. Өзүнүздән соруша биләрсиниз: «Әввәлкиндән фәргли олараг, инди мән нәји һәјатда даһа ваҹиб һесаб едирәм? Јеһова, һәгигәт вә тәблиғ үчүн тәзә вәфтиз оларкән ҝөстәрдијим сә’ји инди дә ҝөстәрирәмми? Фираван һәјат сүрмәк истәји диггәтими Јеһова вә Онун Падшаһлығындан јајындырырмы? Инсанлар гаршысында горху — башгаларынын нә фикирләшмәси мәни мүәјјән дәрәҹәдә ҝери чәкирми?» (Вәһј 2:2-4).
12. Һаггај 1:6, 9 ајәләриндә јәһудиләр арасында һөкм сүрән һансы вәзијјәт тәсвир олунур?
12 Биз истәмирик ки, Аллаһын адынын иззәтләндирилмәсинә лагејд јанашмағымыз уҹбатындан Јеһова бизи Өз хејир-дуасындан мәһрум етсин. Хатырлајырыгса, Һаггај 1:9 ајәсиндә ҝөстәрилдији кими, вәтәнә гајыдан јәһудиләр әввәлҹә чалышганлыгла ишләсәләр дә, сонра ‘өз евләри үчүн әлләшмәјә’ башладылар. Онларын башы ҝүндәлик гајғыларына гарышды. Нәтиҹә е’тибарилә, онлар ‘аз ҝөтүрүр’ — гида, ички вә исти палтар чатышмазлығындан әзијјәт чәкирдиләр (Һаггај 1:6). Јеһова онлары хејир-дуаларындан мәһрум етди. Биз бундан өзүмүзә дәрс ҝөтүрә биләрикми?
13, 14. Һаггај 1:6, 9 ајәләриндән һансы ибрәт дәрсини алырыг вә бу нә үчүн ваҹибдир?
13 Мәҝәр Аллаһдан бундан сонра да хејир-дуа алмаг үчүн һәгиги ибадәтә лагејд јанашараг өз мәнфәәтимизи ҝүдмәк мејлилә мүбаризә апармалы дејиликми? Мадди мәнфәәт, тез варланмаг мәгсәди, бу системдә арзу олунан вәзифәјә чатмаг үчүн тәһсили артырма планы вә ја өзүнүтәсдиг үзрә програмлар диггәтимизи һәгиги ибадәтдән јајындыра биләр.
14 Бунлар өз-өзлүјүндә сәһв олмаја биләр. Лакин әбәди һәјат јөнүмүндән бунларын ‘өлү ишләр’ олдуғуну дәрк едирсәнми? (Ибраниләрә 9:14, КМ). Һансы мә’нада? Руһани ҹәһәтдән онлар өлү, бош, сәмәрәсиздир. Әҝәр инсан бу ишләрлә мәшғул олмаға давам едәрсә, сон нәтиҹәдә Аллаһла олан мүнасибәтләрини итирәҹәкдир. Һәвариләрин ҝүнләриндә бә’зи мәсһ олунмуш мәсиһчиләрлә дә бу баш вермишди (Филипилиләрә 3:17-19). Бизим ҝүнләрдә дә бә’зиләринин агибәти белә олмушдур. Ола билсин ки, сән тәблиғ хидмәтиндән вә јығынҹагдан тәдриҹән узаглашан мәсиһчиләри таныјырсан. Инди онларын Јеһоваја хидмәт етмәјә мејлләри белә јохдур. Биз чох үмид едирик ки, беләләри јенидән Аллаһа дөнәҹәк. Лакин өлү ишләр далынҹа гачмағын Јеһованын лүтфүнү вә хејир-дуасыны итирмәклә нәтиҹәләндији факт олараг галыр. Ҝөрдүјүнүз кими, бунун сону аҹынаҹаглы олур: инсан Аллаһын руһунун јаратдығы севинҹ вә сүлһү итирә биләр. Һәмчинин сәмими мәсиһчи гардашлығындан мәһрум олмағын нә гәдәр бөјүк итки олдуғуну тәсәввүрүнә ҝәтир! (Галатијалылара 1:6; 5:7, 13, 22-24).
15. Һаггај 2:14 ајәси һәгиги ибадәтин ҹидди мәсәлә олдуғуну неҹә ҝөстәрир?
15 Бу чох ҹидди мәсәләдир. Һаггај 2:14 ајәси өз евләрини бәзәмәк хатиринә ибадәт евинә е’тинасызлыг ҝөстәрән јәһудиләрә Јеһованын бәсләдији мүнасибәти тәсвир едир: «Рәбб белә бәјан едир: “Бу халг — бу милләт Мәним ҝөзүмдә беләдир. Онларын һәр әмәли беләдир. Мәнә тәгдим етдикләри һәр шеј мурдардыр”». Һәгиги ибадәтә лагејд јанашдыглары үчүн јәһудиләрин Јерусәлимдәки мүвәггәти гурбанҝаһда јарыкөнүл ҝәтирдикләри гурбанлар Аллаһа мәгбул дејилди (Езра 3:3).
Вә’д едилмиш мүдафиә
16. Зәкәријјәнин алдығы ҝөрүнтүләрә әсасән јәһудиләр нәјә әмин ола биләрдиләр?
16 Аллаһ мә’бәдин тикинтисиндә иштирак едән итаәткар јәһудиләри Өзүнүн мүдафиәсинә әмин етмәк үчүн Зәкәријјәјә сәккиз ҝөрүнтү верди. Биринҹи ҝөрүнтү мә’бәдин тикинтисинин тамамланаҹағына вә јәһудиләрин, тапшырылан иши итаәткарлыгла јеринә јетирдикләри тәгдирдә Јерусәлим вә Јәһуданын әмин-аманлығына зәманәт верирди (Зәкәријјә 1:8-17). Икинҹи ҝөрүнтү һәгиги ибадәтә мүгавимәт ҝөстәрән дөвләтләрин мәһв едиләҹәјини вә’д едирди (Зәкәријјә 1:18-21). Диҝәр ҝөрүнтүләр Аллаһын тикинти ишини мүдафиә едәҹәјинә, Јеһованын тикилиб баша чатмыш мә’бәдинә бүтүн милләтләрдән олан инсанларын ахышыб ҝәлмәсинә, һәгиги сүлһ вә тәһлүкәсизлијә, Аллаһын ишинә әнҝәл төрәдән рәфедилмәз ҝөрүнән манеәләрин арадан галдырылмасына, писликләрин јох едилмәсинә вә мәләкләрин нәзарәт вә мүдафиәсинә зәманәт верирди (Зәкәријјә 2:5, 11; 3:10; 4:7; 5:6-11; 6:1-8). Јәгин сәнә ајдын олур ки, белә вә’дләр алан итаәткар јәһудиләр нә үчүн өз һәјат тәрзләрини дәјишдирәрәк, диггәтләрини Аллаһын тапшырдығы ишә ҹәмләмишдиләр, чүнки Јеһова онлары бунун үчүн азад етмишди.
17. Ҝәләҹәјә даир олан әминлијимизи нәзәрә алдыгда өзүмүзә һансы суаллары вермәлијик?
17 Буна бәнзәр шәкилдә һәгиги ибадәтин мүтләг гәләбә газанаҹағына олан әминлик бизи фәалијјәтә вә Јеһованын ибадәт евинә ҹидди јанашмаға тәшвиг етмәлидир. Өзүнүздән сорушун: гаршыма гојдуғум мәгсәдләр вә һәјат тәрзим Падшаһлыг һаггында хәбәри тәблиғ етмәјин вә шаҝирдләр һазырламағын әсл вахты олдуғуна инандығымы ҝөстәрирми? Аллаһын пејғәмбәрлик Кәламыны өјрәнмәјә кифајәт гәдәр вахт ајырыраммы? Онун һаггында һәмиманлыларым, о ҹүмләдән, гаршылашдығым инсанларла сөһбәт едирәмми?
18. «Зәкәријјә» китабынын 14-ҹү фәслинә әсасән, ҝәләҹәкдә һансы һадисәләр баш верәҹәк?
18 Зәкәријјәнин сөјләдији пејғәмбәрлијин Һар-Меҝидондан әввәл Бөјүк Бабилин мәһв олунмасына да аидијјаты вардыр. Биз охујуруг: «Јалныз Рәббин билдији хүсуси бир ҝүн олаҹаг. Ҝеҹә дә, ҝүндүз дә олмајаҹаг. Ахшам вахты ишыглы олаҹаг». Бәли, Јеһованын ҝүнү Онун јер үзүндәки дүшмәнләри үчүн һәгигәтән дә гаранлыг, тутгун бир ҝүн олаҹагдыр! Амма һәмин ҝүн Јеһованын садиг хидмәтчиләри үчүн һеч вахт сөнмәјән ишыг кими парлајаҹаг, Аллаһ онлара әбәдијјән лүтф ҝөстәрәҹәк. Зәкәријјә, һәм дә јени дүнјада һәр шејин Јеһованын мүгәддәслијини бәјан едәҹәјини тәсвир едир. Аллаһын бөјүк руһани мә’бәдиндәки һәгиги ибадәт јер үзүндә мөвҹуд олан јеҝанә ибадәт олаҹагдыр (Зәкәријјә 14:7, 16-19). Бу неҹә дә мөһтәшәм зәманәтдир! Биз габагҹадан сөјләниләнләрин һәјата неҹә кечмәсинин вә Јеһованын али һакимијјәтинин бәраәт газанмасынын шаһиди олаҹағыг. Јеһоваја мәхсус олан о ҝүн неҹә дә гејри-ади олаҹагдыр!
Әбәди хејир-дуалар
19, 20. Зәкәријјә 14:8, 9 ајәләри сизи нә үчүн руһландырыр?
19 Јеһованын али һакимијјәтинә һејранедиҹи шәкилдә бәраәт газандырылдыгдан сонра, Шејтан вә онун ҹинләри фәалијјәтсизлик дәринлијиндә дустаг едиләҹәкләр (Вәһј 20:1-3, 7). Сонра Мәсиһин Миниллик Һөкмранлығы дөврүндә садиг бәшәријјәтин үзәринә арды-арасы кәсилмәјән хејир-дуалар јағдырылаҹаг. Зәкәријјә 14:8, 9 ајәләриндә дејилир: «О ҝүн Јерусәлимдән һәјат верән сулар ахаҹаг. Суларын јарысы Шәрг дәнизинә, јарысы исә Гәрб дәнизинә ахаҹаг. Јајда да, гышда да белә олаҹаг. Рәбб бүтүн дүнјанын падшаһы олаҹаг. О ҝүн јалныз Рәбб вә Онун ады уҹалаҹаг».
20 «Һәјат верән сулар» вә ја ‘һәјат сују ахан чај’, һәјаты горумаг үчүн Јеһованын тәгдим етдији тәдбирләр, арасыкәсилмәдән Хиласкар Падшаһлығын тахтындан ‘ахаҹагдыр’ (Вәһј 22:1, 2). Јеһованын Һар-Меҝидондан сағ чыхан хидмәтчиләриндән ибарәт бөјүк издиһам Адәмә кәсилән өлүм һөкмүндән азад олараг, бу тәдбирләрдән фајда әлдә едәҹәкдир. Һәтта өлүләр белә дирилдиләрәк бүтүн бунлардан фајдаланаҹаглар. Беләликлә, Јеһованын јер үзүндә һөкмранлығынын јени мәрһәләси башлајаҹагдыр. Бәшәријјәт е’тираф едәҹәк ки, ибадәт едилмәјә јалныз Јеһова лајигдир вә Каинатын Һөкмдары јалныз Одур.
21. Биз һансы гәрара ҝәлмәлијик?
21 Һаггај вә Зәкәријјәнин сөјләдији пејғәмбәрликләри вә онларын јеринә јетмәсини нәзәрдән кечирдикдә ҝөрүрүк ки, руһани мә’бәдин јерүзү һәјәтиндә Аллаһын тапшырдығы иши давам етдирмәк үчүн тутарлы сәбәбләримиз чохдур. Һәгиги ибадәт өзүнүн мүкәммәл вәзијјәтинә чатанадәк, ҝәлин Падшаһлығын марагларыны биринҹи јерә гојмаг үчүн вар ҝүҹүмүзлә чалышаг. Зәкәријјә 8:9 ајәси бизи тәшвиг едир: «Пејғәмбәрләрин дедији бу сөзләри... ешидәнләр, гој голунуза ҝүҹ ҝәлсин».
Хатырлајырсынызмы?
• «Һаггај» вә «Зәкәријјә» китабларындакы пејғәмбәрликләр бизим ҝүнләримиздә неҹә јеринә јетир?
• «Һаггај» вә «Зәкәријјә» китабларындан һәјатымызда ваҹиб сајдығымыз ишләрә даир һансы ибрәт дәрсини алырыг?
• Нә үчүн Һаггај вә Зәкәријјәнин китабларындакы мә’лумат ҝәләҹәјә инамла бахмаға әсас верир?
[15-ҹи сәһифәдәки шәкилләр]
Сән ‘өз евин үчүн әлләширсәнми’?