Пејғәмбәр насирәдә бөјүјүр

Иса Насирә шәһәриндә бөјүјүр. Бу балаҹа шәһәр Јәһудијјәнин шималында, Ҹәлилә адланан дағлыг бөлҝәдә, Ҹәлилә дәнизи кими танынан бөјүк ҝөлүн гәрбиндә јерләшир.

Исанын тәхминән ики јашы оланда Јусифҝил Мисирдән бура көчүр. Ҝөрүнүр, һәмин вахт онларын јалныз бир ушағы вар иди. Лакин сонрадан Исанын Јагуб, Јусиф, Шәмун вә Јәһуда адлы өҝеј гардашлары доғулур. Јусифлә Мәрјәмин гызлары да олур. Беләликлә, Исанын өзүндән кичик, ән азындан, алты баҹы-гардашы олур.

Әлбәттә, Исанын башга гоһумлары да вар. Биз артыг Илсәба вә онун оғлу Јәһјаны таныјырыг. Онлар ҹәнубда, Јәһудијјәдә јашајырлар. Һәмчинин Ҹәлилә јахынлығында Мәрјәмин Сәлимә адлы гоһуму јашајыр. Ҝөрүнүр, о, Мәрјәмин доғма баҹысы, Исанын халасыдыр. Сәлимәнин әринин ады Зәбәди, оғулларынын ады исә Јагуб вә Јәһјадыр. Чох ҝүман ки, онлар Исанын халасы ушагларынын ичиндә ән бөјүјүдүр. Ушаглыгда Исанын онларла нә гәдәр вахт кечирдијини билмирик, амма сонралар онлар онун јахын әмәкдашы, һәвариси олурлар.

Јусиф ҝет-ҝедә бөјүјән аиләсини доландырмаг үчүн чох ишләјир. О, дүлҝәрдир. Јусиф Исаны доғма оғлу кими бөјүтдүјү үчүн она «дүлҝәрин оғлу» дејирләр (Мәтта 13:55). Јусиф Исаја дүлҝәрлик пешәсини өјрәдир. Иса бу сәнәтә елә јахшы јијәләнир ки, сонралар о, дүлҝәр кими таныныр (Марк 6:3).

Јеһова Аллаһа ибадәт Јусифин аиләсиндә башлыҹа јер тутур. Јусиф вә Мәрјәм, Аллаһын ганунуна мүвафиг олараг, ушагларына «отуранда, јол ҝедәндә, јатанда, дуранда» руһани тәрбијә верирләр (Ганунун тәкрары 6:6—9). Насирә шәһәриндә синагог вар вә шүбһәсиз, Јусиф аиләсини мүнтәзәм ора ибадәтә апарыр. Сонралар Иса барәсиндә дејилир ки, о, «адәти үзрә шәнбә ҝүнү» синагога ҝедир (Лука 4:16). Һәмчинин һәр ил Јеһованын Јерусәлимдәки мәбәдинә зијарәт аиләјә мисилсиз севинҹ ҝәтирир.