«Мәсиһи һәјаты вә ибадәти. Иш дәфтәри» үчүн мәнбәләр
4—10 НОЈАБР
АЛЛАҺЫН КӘЛАМЫНДАКЫ ХӘЗИНӘ | 1 ЈӘҺЈА 1—5
«Дүнјаны вә дүнјадакы шејләри севмәјин»
(1 Јәһја 2:15, 16) Дүнјаны вә дүнјадакы шејләри севмәјин. Дүнјаны севән адамын гәлбиндә Атаја мәһәббәт јохдур, 16 чүнки дүнјадакы һәр шеј — ҹисмин истәји, ҝөзләрин истәји вә варын нүмајишә гојулмасы Атадан дејил, дүнјадандыр.
Мәсиһин нүмунәсинә риајәт един
13 Кимсә е’тираз едә биләр ки, дүнјада олан шејләрин һамысы пис дејил. Бәлкә дә бу беләдир, лакин дүнја вә онун ширникдириҹи шејләри бизи Јеһоваја хидмәтдән асанлыгла јајындыра биләр. Дүнјанын тәклиф етдији һеч бир шеј бизи Јеһоваја јахынлашдырмаг мәгсәдини ҝүдмүр. Буна ҝөрә дә, дүнјада олан шејләри, һәтта өз-өзлүјүндә пис олмајан ишләри дә севмәјә башлајарыгса, онда тәһлүкәли јолдајыг (1 Тимотејә 6:9, 10). Бундан әлавә, дүнјада һәгигәтән дә инсаны позмаға гадир олан чох писликләр вар. Әҝәр биз зоракылығы, вар-дөвләтә һәрислији вә ҹинси әхлагсызлығы вурғулајан кинофилмләрә вә ја телевизија верилишләринә бахырыгса, онда пислик бизим үчүн мәгбул, сонра исә, һәтта ширникдириҹи ола биләр. Әҝәр мадди тә’минатлы һәјат сүрмәји вә ја бизнесдә мүвәффәгијјәтә наил олмағы һәјатларында әсас јерә гојан инсанларла үнсијјәтдә олуругса, бу ҹүр шејләр бизим үчүн дә ваҹиб мәсәләјә чеврилә биләр (Матта 6:24; 1 Коринфлиләрә 15:33).
(1 Јәһја 2:17) Дүнја өз истәкләри илә бәрабәр кечиб ҝедир, Аллаһын истәјини јеринә јетирән исә әбәди јашајыр.
Ҝөрүн неҹә инсан олмалысыныз
18 Дүнјадакы шејләрә гаршы дура билмәк үчүн һәмчинин Јәһјанын илһамланмыш сөзләрини јадда сахламалыјыг. О демишди: «Дүнја өз истәкләри илә бәрабәр кечиб ҝедир, Аллаһын ирадәсини јеринә јетирән исә әбәди јашајыр» (1 Јәһ. 2:17). Шејтанын системи даими вә реал ҝөрүнүр. Буна бахмајараг, бир ҝүн онун сону ҝәләҹәк. Шејтан дүнјасындакы һәр шејин тезликлә мәһв олаҹағыны јадда сахламаг бизә онун тәләләринә дүшмәмәјә көмәк едәҹәк.
Һикмәт хәзинәсиндән инҹиләр
(1 Јәһја 2:7, 8) Әзиз гардашларым, мән сизә јени јох, лап әввәлдән алдығыныз көһнә әмри јазырам. Бу көһнә әмр ешитдијиниз сөздүр. 8 Бунунла белә, сизә јени әмр — һәм онун риајәт етдији, һәм дә сизин риајәт етдијиниз әмри јазырам, чүнки гаранлыг кечиб ҝедир, һәгиги нур исә артыг шәфәг сачыр.
Јеһованын өјүдләри етибарлыдыр
14 Јунанҹа Мүгәддәс Јазыларда бир-биримизә мәһәббәт ҝөстәрмәклә бағлы чохлу өјүдләр вар. Иса демишди ки, икинҹи ән бөјүк әмр «јахыныны өзүнү севдијин кими сев» әмридир (Мат. 22:39). Ејнилә, Исанын өҝеј гардашы Јагуб мәһәббәти «ганунларын шаһы» адландырмышды (Јаг. 2:8). Һәвари Јәһја исә јазмышды: «Әзиз гардашларым, мән сизә јени јох, лап әввәлдән билдијиниз көһнә әмри јазырам» (1 Јәһ. 2:7, 8). Јәһја «көһнә әмр» дедикдә нәји нәзәрдә тутурду? О, севмәк әмрини нәзәрдә тутурду. Бу, о мәнада «көһнә» иди ки, Иса бу әмри онилликләр әввәл, «лап әввәлдән» вермишди. Амма бу әмр һәмчинин «јени» иди, она ҝөрә ки, шаҝирдләри үзләшәҹәкләри јени шәраитләрдә фәдакар мәһәббәт тәзаһүр етдирмәјә сәсләјирди. Бәс Мәсиһин шаҝирдләри олан бизләр јахынларымыза мәһәббәтимизи сојуда билән вә бу дүнјаја хас олан худбинлик руһуна гаршы дура билмәјимиз үчүн верилән хәбәрдарлыглара ҝөрә миннәтдар олмалы дејиликми?
(1 Јәһја 5:16, 17) Әҝәр кимсә гардашынын өлүмә апармајан бир ҝүнаһ иш тутдуғуну ҝөрүрсә, ондан өтрү Аллаһа дуа етсин вә Аллаһ өлүмә апармајан ҝүнаһ иш тутмуш о адама һәјат верәҹәк. Өлүмә апаран ҝүнаһ да вар. Белә ҝүнаһ һаггында дуа етмәји демирәм. 17 Салеһлијә зидд һәр ҹүр һәрәкәт ҝүнаһдыр, бунунла белә, өлүмә апармајан ҝүнаһ вар.
it-1-E с. 862, абз. 5
Әфв
Башгасы үчүн, һәтта бүтүн јығынҹаг үчүн Аллаһа дуа едиб, әфв диләмәк дүзҝүндүр. Муса Исраил халгы үчүн дуа етмиш, халгын ҝүнаһыны етираф етмиш вә әфв диләмишди, Јеһова да онун дуасыны гәбул етмишди (Сј 14:19, 20). Сүлејман да мәбәдин һәср олунмасы заманы дуа етмишди ки, халг ҝүнаһ едәндән сонра пис јолундан дөнәндә Јеһова онлары бағышласын (1Пд 8:30, 33—40, 46—52). Үзејир вәтәнә дөнмүш јәһудиләрин адындан чыхыш едәрәк онларын ҝүнаһларыны етираф етмишди. Онун сәмими дуасы вә нәсиһәти өз бәһрәсини верди, халг Јеһованын әфвинә јетишмәк үчүн аддымлар атды (Үз 9:13—10:4, 10—19, 44). Јагуб мәсләһәт вермишди ки, руһани ҹәһәтдән нахош олан мәсиһи јығынҹағын ағсаггалларыны чағырсын, онлар да онун үчүн дуа етсинләр. Әҝәр о ҝүнаһ ишләјибсә, тәгсири бағышлансын (Јг 5:14—16). Лакин өлүмә апаран ҝүнаһ да вар. Бу, мүгәддәс руһа гаршы едилән ҝүнаһдыр, јәни биләрәкдән ҝүнаһ әмәлдән әл чәкмәмәкдир. Белә ҝүнаһ бағышланмыр. Мәсиһи бу ҹүр ҝүнаһ едәнләрдән өтрү дуа етмәмәлидир (Әј 5:16; Мт 12:31; Иб 10:26, 27).
Мүгәддәс Китаб гираәти
(1 Јәһја 1:1—2:6) О, әзәлдән вар иди, биз ону ешитмишик, ҝөзләримизлә ҝөрмүшүк, ону мүшаһидә етмишик вә она әлләримизлә тохунмушуг. О, һәјат кәламыдыр. 2 Бәли, һәјат ачыг-ашкар зүһур етди, биз Атанын јанында олмуш вә бизә ачыг-ашкар ҝөстәрилмиш әбәди һәјаты ҝөрдүк. Биз онун һаггында шәһадәт едир вә сизә ондан данышырыг. 3 Ҝөрүб-ешитдијимиз шејләри сизә чатдырырыг ки, сиз дә бизимлә вәһдәтдә оласыныз. Бу вәһдәтимиз һәм дә Ата вә Онун Оғлу Иса Мәсиһләдир. 4 Бүтүн бунлары севинҹимиз там олсун дејә, јазырыг. 5 Ондан ешидиб сизә билдирдијимиз хәбәр будур: Аллаһ нурдур вә Онда зәррә гәдәр дә гаранлыг јохдур. 6 Әҝәр биз: «Онунла вәһдәтдәјик», — дејиб гаранлыгда јеријириксә, онда јалан данышыр вә һәгигәт јолунда јеримирик. 7 О, нурда олдуғу кими, биз дә нурда јеријириксә, демәли, бир-биримизлә вәһдәтдәјик вә Онун Оғлу Исанын ганы бизи бүтүн ҝүнаһлардан тәмизләјир. 8 Әҝәр: «Биздә ҝүнаһ јохдур», — дејириксә, онда өзүмүзү алдадырыг вә гәлбимиздә һәгигәт јохдур. 9 Әҝәр ҝүнаһларымызы етираф едириксә, О, сәдагәтли вә адил олдуғундан ҝүнаһларымызы бағышлајаҹаг вә бизи һәр ҹүр әјриликдән тәмизләјәҹәк. 10 Әҝәр: «Ҝүнаһ ишләмәмишик», — дејириксә, Ону јаланчы едирик вә Онун сөзү гәлбимиздә јохдур.
2 Әзиз балаларым! Бунлары сизә јазырам ки, һеч бир ҝүнаһ иш тутмајасыныз. Әҝәр кимсә бир ҝүнаһ иш тутса, Атанын јанында салеһ олан Иса Мәсиһ кими јардымчымыз вар. 2 О, тәкҹә бизим ҝүнаһларымызы дејил, бүтүн дүнјанын ҝүнаһларыны өртән кәффарә гурбаныдыр. 3 Әҝәр онун әмрләринә риајәт едириксә, демәли, ону таныјырыг. 4 «Мән ону таныјырам» дејиб онун әмрләринә риајәт етмәјән адам јаланчыдыр вә белә адамда һәгигәт јохдур. 5 Амма онун сөзүнә әмәл едән адамда Аллаһ мәһәббәти, доғрудан да, камиллијә чатмышдыр. Бунун сајәсиндә онунла вәһдәтдә олдуғумузу билирик. 6 Онунла вәһдәтдә олдуғуну дејән онун ҝетдији јолла јеримәлидир.
СӘРИШТӘЛИ МҮЖДӘЧИ ОЛУН
w04-E 1/10 с. 29
Охуҹуларын суаллары
Һәвари Јәһја дејирди ки, «камил мәһәббәт горхуну говур». О, «камил мәһәббәт» дејәндә нәји нәзәрдә тутурду вә онун говдуғу горху нә горхудур?
Һәвари Јәһја јазмышды: «Мәһәббәтдә горху јохдур. Камил мәһәббәт горхуну говур. Горху инсаны буховлајыр, буна ҝөрә дә горхан адамын мәһәббәти камиллијә чатмамышдыр» (1 Јәһ. 4:18).
Контекстдән ҝөрүнүр ки, Јәһја алныачыглыгдан, хүсусән дә Аллаһ севҝиси илә Аллаһ гаршысында алныачыг олмаг арасындакы әлагәдән данышыр. Буну 17-ҹи ајәдән ҝөрмәк олар: «Беләҹә, мәһәббәт үрәјимиздә камиллијә јетишир ки, һөкм ҝүнүндә алныачыг олаг». Мәсиһинин дуа едәркән алныачыг олмасы вә ја олмамасы Аллаһы нә дәрәҹәдә севмәсиндән вә Аллаһдан өзүнә гаршы нә дәрәҹәдә севҝи дујмасындан билаваситә асылыдыр.
«Камил мәһәббәт» ифадәси диггәтә лајигдир. Мүгәддәс Китабда камил сөзү һәмишә мүтләг мәнада, јәни, сонсуз камиллији билдирмир, чох вахт нисби мәнада ишләнир. Мәсәлән, Иса Мәсиһ дағда вәз едәркән демишди: «Ҝөјдәки Атаныз камил олдуғу кими, сиз дә камил олмалысыныз». Иса давамчыларына дејирди ки, әҝәр онлар јалныз онлары севәнләри севирләрсә, онларын мәһәббәти натамам, гүсурлу олаҹаг. Онлар исә дүшмәнләрини дә севәрәк мәһәббәтләрини мүкәммәл, јәни там етмәлидирләр. Буна бәнзәр тәрздә, Јәһја «камил мәһәббәт» барәдә јазанда үрәкдән ҝәлән, там долғунлуға чатан вә һәјатын һәр саһәсини әһатә едән Аллаһ севҝисиндән данышырды (Мәтта 5:46—48; 19:20, 21)
Аллаһа дуада јахынлашанда мәсиһи ҝүнаһлы вә гејри-камил олдуғуну дәрк едир. Лакин онун Аллаһа мәһәббәти там долғунлуға чатыбса вә о, Аллаһ тәрәфиндән севилдијини там һисс едирсә, онда мәһкум едилмәкдән вә ја рәдд едилмәкдән горхмур. Әксинә, алныачыглыгла үрәјиндәкиләри ифадә едир вә Аллаһын Иса Мәсиһ васитәсилә вердији фидјә гурбанлығы әсасында әфв диләјир. О әминдир ки, Аллаһ онун хаһишләрини гәбул едир.
Инсанын мәһәббәти неҹә камиллијә чатыб, мәһкум олунмаг вә рәдд едилмәк горхусуну гова биләр? Һәвари Јәһја јазмышды: «Онун [Аллаһын] сөзүнә әмәл едән адамда Аллаһ мәһәббәти, доғрудан да, камиллијә чатмышдыр» (1 Јәһја 2:5). Дүшүнүн: әҝәр биз һәлә ҝүнаһлы икән Аллаһ бизи севмишдисә, сидги-үрәкдән төвбә едиб, ҹидд-ҹәһдлә Онун сөзүнә әмәл етдијимиз һалда, бизи даһа чох севмәјәҹәк? (Ромалылара 5:8; 1 Јәһја 4:10). Бәли, нә гәдәр ки садигик, һәвари Булус кими архајын ола биләрик. О, Аллаһ һаггында демишди: «Оғлуну әсирҝәмәјиб һамымызын уғрунда фәда едән Аллаһ мәҝәр онунла бирликдә јердә галан һәр шеји дә бизә бәхш етмәјәҹәк?» (Ромалылара 8:32).
11—17 НОЈАБР
АЛЛАҺЫН КӘЛАМЫНДАКЫ ХӘЗИНӘ | 2 ЈӘҺЈА 1 — ЈӘҺУДА
«Һәгигәтдә галмаг үчүн ҹидди мүбаризә апармалыјыг»
(Јәһуда 3) Әзизләрим, чох истәјирдим ки, сизә үмуми хиласымыз барәсиндә јазым, амма бу мәктубумда сизи мүгәддәсләрә һәмишәлик верилмиш иман уғрунда ҹидди мүбаризә апармаға тәшвиг етмәји лазым билдим.
‘Рәбдә гүввәтләнин’
8 Шејтанын әмәлләри бизә мә’лумдур, чүнки Мүгәддәс Јазылар онун әсас тәләләрини бизә ачыглајыр (2 Коринфлиләрә 2:11). Мәсәлән, Иблис салеһ Ејубун башына чох бәлалар ҝәтирди. Ејуб бөјүк мадди зијана дүшдү, јахынларыны итирди, аиләси тәрәфиндән мүгавимәтләрә мә’руз галды, ағыр хәстәлијә дүчар олду, һабелә икиүзлү достларынын әсассыз иттиһамларыны да динләмәли олду. О, чох мә’јус олмушду вә она елә ҝәлирди ки, Аллаһ ону тәрк едиб (Ејуб 10:1, 2). Һәрчәнд демәк олмаз ки, бу ҝүн белә проблемләр бирбаша Иблис тәрәфиндән төрәдилир, лакин мәсиһчиләр бу кими проблемләрлә гаршылашырлар, Иблис исә бундан истифадә едир.
9 Бу сон ҝүнләрдә һәр јердә руһани тәһлүкә илә үзләширик. Биз елә бир дүнјада јашајырыг ки, инсанларын мадди шејләрин гајғысыны чәкмәкдән руһани ишләрә вахтлары галмыр. Телевизија вә журналларда ҹинси әхлагсызлыг мә’јуслуг вә гәлб ағрыдан бир шеј кими дејил, хошбәхтлик ҝәтирән бир шеј кими тәсвир едилир. Вә инсанларын әксәријјәти ‘зөвгү Аллаһдан чох севирләр’ (2 Тимотејә 3:1—5). Бу ҹүр әһвал-руһијјәнин бизи руһани мүвазинәтдән чыхармамасы үчүн иман уғрунда ҝүҹлү мүбаризә апармағымыз ҝәрәкдир (Јәһуда 3).
Һикмәт хәзинәсиндән инҹиләр
(Јәһуда 4) Чүнки араныза Мүгәддәс Јазылар тәрәфиндән һөкмү чохдан кәсилмиш бәзи адамлар ҝирибләр. Бунлар азғынлыг етмәк үчүн Аллаһымызын лүтфүнү бәһанәјә чевирән, һәмчинин јеҝанә саһибимиз вә Ағамыз Иса Мәсиһә гаршы хәјанәт едән аллаһсыз адамлардыр.
(Јәһуда 12) Онлар достлуг мәҹлисләриниздә сизинлә јејиб-ичәркән суалты гајалар кимидирләр. Онлар горху билмәдән гарын отаран чобанлар, күләјин ора-бура апардығы бош булудлар, барсыз, гуп-гуру гурумуш, көкүндән гопарылмыш пајыз ағаҹларыдырлар.
it-2-E с. 279
Достлуг мәҹлисләри
Мүгәддәс Китабда бу достлуг мәҹлисләринин неҹә вә нә гәдәр кечирилдији јазылмајыб (Јәһуда 12). Бу мәҹлисләрин кечирилмәсини Иса Мәсиһ, јахуд һәвариләр бујурмамышды. Ајдындыр ки, онлары кечирмәк мәҹбури дејил. Бәзиләринин фикринҹә, бу мәҹлисләри имканлы мәсиһиләр тәшкил едир вә касыб диндашларыны гонаг чағырырдылар. Јетимләр, дуллар, варлылар вә имкансызлар бирликдә меһрибанчылыг ичиндә бол сүфрә архасында јејиб-ичирдиләр.
it-2-E с. 816
Гаја
Диҝәр јунан сөзү спилас, ҝөрүнүр, суалты гаја вә ја риф демәкдир. Јәһуда бу сөзлә пис нијјәтлә мәсиһи јығынҹағына ҝирән адамлары тәсвир етмишди. Суалты гајалар ҝәмиләр үчүн тәһлүкә јаратдығы кими, бу адамлар да јығынҹағын үзвләри үчүн чох тәһлүкәли идиләр. Јәһуда бу адамлар һаггында демишди: «Онлар достлуг мәҹлисләриниздә сизинлә јејиб-ичәркән суалты гајалар кимидирләр» (Јд 12).
(Јәһуда 14, 15) Адәмдән сонра једдинҹи нәсилдә доғулмуш Һәнуг онлар һаггында пејғәмбәрлик етмишди: «Будур, Јеһова он минләрлә мүгәддәс мәләји илә ҝәлди ки, 15 һамы үзәриндә һөкмүнү иҹра етсин вә бүтүн аллаһсызлары горхуб-чәкинмәдән ҝөрдүкләри пис ишләринә ҝөрә, Аллаһ горхусу олмајан ҝүнаһ саһибләрини Она гаршы дедикләри бүтүн биабырчы сөзләрә ҝөрә иттиһам етсин».
wп17.1 с. 12, абз. 1
О, Аллаһын разылығыны газанды
Һәнуг нә һагда пејғәмбәрлик етмишди? О демишди: «Будур, Јеһова он минләрлә мүгәддәс мәләји илә ҝәлди ки, һамы үзәриндә һөкмүнү иҹра етсин вә бүтүн аллаһсызлары горхуб-чәкинмәдән ҝөрдүкләри пис ишләринә ҝөрә, Аллаһ горхусу олмајан ҝүнаһ саһибләрини Она гаршы дедикләри бүтүн биабырчы сөзләрә ҝөрә иттиһам етсин» (Јәһуда 14, 15). Фикир вердинизсә, Һәнуг пејғәмбәр һадисәләри кечмиш заманда нәгл едир, санки, Аллаһ бу пејғәмбәрликдә дејиләнләри артыг јеринә јетириб. Мүгәддәс Китабда јазылан диҝәр пејғәмбәрликләрин чоху да бу үслубда јазылыб. Пејғәмбәрин дедикләринин һәјата кечәҹәји о гәдәр дәгигдир ки, онлар артыг олмуш бир шеј кими тәсвир олунуб! (Әшија 46:10).
wп17.1 с. 12, абз. 3
О, Аллаһын разылығыны газанды
Һәнуг пејғәмбәрин иманы үзәриндә дүшүнәрәк өзүмүздән соруша биләрик: јашадығымыз бу дүнјаја Аллаһын јанашдығы кими јанашырыг? Пејғәмбәрин ҹәсарәтлә бәјан етдији пејғәмбәрлик бизим дөврүмүзә дә аиддир: орада дејилмиш сөзләр Һәнуг пејғәмбәрин дөврүндә јеринә јетдији кими, бизим дөврдә дә јеринә јетәҹәк. Онун дедији кими, Јеһова Аллаһ Нуһ пејғәмбәрин дөврүндә аллаһсызларын үзәринә бөјүк Дашгын ҝәтирди. Бу мүсибәт бизим дөврүмүздә олаҹаг даһа бөјүк мүсибәтә бир нүмунә иди (Мәтта 24:38, 39; 2 Бутрус 2:4—6). Бу ҝүн дә Аллаһ он минләрлә мүгәддәс мәләји илә бирҝә аллаһсыз инсанлары әдаләтлә мүһакимә етмәк үчүн һазыр дајаныб. Һәр биримиз Һәнуг пејғәмбәрин чатдырдығы бу хәбәрин ваҹиблијини дәрк етмәли вә буну башгаларына демәлијик. Ола билсин, аилә үзвләримиз вә достларымыз биздән јан ҝәзир. Бәлкә дә, бәзән өзүмүзү тәнһа һисс едирик. Јеһова Аллаһ Һәнуг пејғәмбәри һеч вахт тәрк етмәди. Бу ҝүн дә өз садиг бәндәләрини тәрк етмәјәҹәк!
Мүгәддәс Китаб гираәти
(2 Јәһја 1—13) Мән ағсаггалдан, үрәкдән севдијим вә тәкҹә мәним јох, һәгигәти биләнләрин һамысынын севдији сечилмиш ханыма вә онун ушагларына мәктуб. 2 Бу мәһәббәт һамымызда јашајан вә әбәдијјән бизимлә галаҹаг һәгигәтдән доғур. 3 Һәгигәт вә мәһәббәтлә јанашы, Атамыз Аллаһдан вә Онун Оғлу Иса Мәсиһдән ҝәлән лүтф, мәрһәмәт вә сүлһ дә бизимлә олаҹаг. 4 Сәнин ушагларындан бәзиләринин Атамыздан алдығымыз әмрә ујғун олараг, һәгигәт јолунда јеридикләрини билмәк мәни чох севиндирир. 5 Инди исә, ханым, сәндән хаһиш едирәм ки, бир-биримизи севәк. (Сәнә јаздығым әмр јени дејил, әввәлдән алдығымыз әмрдир.) 6 Мәһәббәт исә Онун әмрләринә ујғун јашамаг демәкдир. Бу, сизин әввәлдән ешитдијиниз һәмин о әмрдир. Мәһәббәтлә јашамаға давам един. 7 Чүнки дүнјада Иса Мәсиһин ҹисимдә ҝәлдијини гәбул етмәјән чохлу јаланчы пејда олуб. Бу ҹүр фикирләшән јаланчыдыр, Мәсиһ әлејһдарыдыр. 8 Диггәтли олун ки, чәкдијимиз зәһмәтин бәһрәсини итирмәјиб мүкафатынызы бүтөв аласыныз. 9 Мәсиһин тәлимләриндән кәнара чыхыб онлара риајәт етмәјән адамын Аллаһла мүнасибәти јохдур. Бу тәлимләрә риајәт едәнин исә һәм Ата, һәм дә Оғулла мүнасибәти вар. 10 Әҝәр кимсә сизә бу тәлимлә ҝәлмирсә, ону евинизә бурахмајын вә саламламајын. 11 Чүнки ону саламлајан онун пис әмәлләринә шәрик олур. 12 Сизә дејиләси һәлә чох сөзүм вар, лакин бунлары сизә кағыз вә мүрәккәблә чатдырмаг истәмирәм. Севинҹиниз долғун олсун дејә, јаныныза ҝәлиб сизинлә үз-үзә данышаҹағыма үмид едирәм. 13 Сечилмиш баҹынын ушаглары сәнә салам ҝөндәрир.
18—24 НОЈАБР
АЛЛАҺЫН КӘЛАМЫНДАКЫ ХӘЗИНӘ | ВӘҺЈ 1—3
«Сәнин ишләриндән... хәбәрдарам»
(Вәһј 1:20) Једди гызыл чырагданын вә сағ әлимдә ҝөрдүјүн једди улдузун мүгәддәс сирринин ачмасы исә будур: једди чырагдан једди јығынҹағы, једди улдуз исә једди јығынҹағын мәләкләрини тәмсил едир.
Сән неҹә руһ тәзаһүр етдирирсән?
8 Бу ҹүр руһа јолухмамаг үчүн нә етмәлијик? Биз јадда сахламалыјыг ки, Мүгәддәс Китаба әсасән, Иса «сағ әлиндә једди улдуз» сахлајыр. «Улдуз»лар мәсһ олунмуш нәзарәтчиләри, ҝениш мәнада исә јығынҹагдакы бүтүн нәзарәтчиләри тәмсил едир. Иса әлиндәки «улдуз»лары мүнасиб билдији сәмтә јөнәлтмәк игтидарындадыр (Вәһј 1:16, 20). Демәли, мәсиһчи јығынҹағынын Башы кими, Иса бүтүн ағсаггаллар шураларына там нәзарәт едир. Әҝәр онлардан киминсә дүзәлишә, һәгигәтән дә, еһтијаҹы варса, «ҝөзләри алов [сачан]» Иса бунун өз вахтында вә мүнасиб билдији тәрздә јолуна гојулмасынын гајғысына галаҹаг (Вәһј 1:14). Биздән исә мүгәддәс руһла тәјин едиләнләрә еһтирам бәсләмәк тәләб олунур, чүнки Павел јазмышды: «Сизә рәһбәрлик едәнләрә итаәт един вә табе олун, ахы онлар һесабат верәҹәк адамлар кими ҝеҹә-ҝүндүз сизин рифаһынызы дүшүнүрләр. Гојун онлар буну аһ-зарла јох, севинҹлә етсинләр ки, сизә зәрәр дәјмәсин» (Ибр. 13:17).
(Вәһј 2:1, 2) Ефесдәки јығынҹағын мәләјинә јаз: «Сағ әлиндә једди улдуз тутан, једди гызыл чырагданын арасында ҝәзән белә дејир: 2 “Сәнин ишләриндән, зәһмәтиндән, дөзүмүндән хәбәрдарам. Билирәм ки, сән пис адамлара дөзмүрсән вә һәвари олмадыглары һалда, өзләрини һәвари адландыранлары сынагдан кечириб онларын јаланчы олдугларыны үзә чыхармысан”».
Јеһова бизи хилас етмәк үчүн горујур
11 «Вәһј» китабынын 2-ҹи вә 3-ҹү фәслиндә гәләмә алынан ҝөрүнтүдә иззәтә говушмуш Иса Мәсиһин Кичик Асијада јерләшән једди јығынҹаға бахыш кечирмәсиндән бәһс олунур. Ҝөрүнтүдән бәлли олур ки, Мәсиһ јығынҹагларда нәинки үмуми, һәтта орадакы ајры-ајры вәзијјәтләри дә ҝөрүр. Бәзи һалларда о һәтта конкрет инсанларын адларыны чәкир вә һәр јығынҹағы нәјәсә ҝөрә тәрифләјир вә ја мәсләһәт верир. Бу, нәјә ишарә едир? Једди јығынҹаг 1914-ҹү илдән сонракы мәсһ олунмушлары тәмсил едир вә једди јығынҹаға верилән мәсләһәтләр, маһијјәт етибарилә, Аллаһын халгынын бу ҝүн бүтүн дүнјадакы јығынҹагларына аиддир. Демәли, бундан белә бир нәтиҹәјә ҝәлирик ки, Јеһова Оғлу васитәсилә халгына фәал шәкилдә рәһбәрлик едир. Биз Онун рәһбәрлијиндән неҹә фајдалана биләрик?
Јегованын тәшкилаты илә ајаг-ајаға јеријирик
20 Јегованын ирәлиләјән тәшкилаты илә ајаг-ајаға јеримәк үчүн, Аллаһ тәрәфиндән “ҹәмијјәтин Башы” тә’јин едилән Иса Мәсиһин ролуну гәбул етмәлијик (Ефеслиләрә 5:22, 23). Ишаја 55:4-ҹү ајәсиндә бизә дејиләнләрә диггәт јетирмәјә дәјәр: “Будур, Мән [Јегова] ону шаһид олараг милләтләрә, рәис вә әмир олараг милләтләрә вердим”. Шүбһәсиз, Иса неҹә рәһбәрлик етмәји билир. Гојунларыны таныјыр вә онларын ишләриндән хәбәрдардыр. О, Кичик Асијадакы једди јығынҹағы јохладығы заман беш дәфә: “Сәнин ишләриндән хәбәрдарам” деди (Вәһј 2:2, 19; 3:1, 8, 15, И—93). Атасы Јегова кими, Иса да бизим еһтијаҹларымыздан хәбәрдардыр. Нүмунәви дуаны сөјләмәздән әввәл, Иса деди: “Атаныз сизин нәләрә еһтијаҹыныз олдуғуну сиз Ондан диләмәздән әввәл билир” (Матта 6:8—13).
Һикмәт хәзинәсиндән инҹиләр
(Вәһј 1:7) О, булудларла ҝәләҹәк. Ону һамы, о ҹүмләдән онун бәдәнини дешәнләр өз ҝөзү илә ҝөрәҹәк. Дүнјанын бүтүн тајфалары кәдәрләнәҹәк вә ондан өтрү башларына дөјәҹәкләр. Бәли, бу, белә дә олаҹаг. Амин.
Аллаһын Падшаһлығы дүшмәнләрин көкүнү кәсир
10 Һөкмүн елан олунмасы. Сонра Аллаһын Падшаһлығынын бүтүн дүшмәнләри әзаб-әзијјәтләрини артыран һадисәнин шаһиди олмаг мәҹбуријјәтиндә галаҹаглар. Иса дејир: «Инсан Оғлунун гүдрәтлә, ҹалал ичиндә булудларын үзәриндә ҝәлдијини ҝөрәҹәкләр» (Марк 13:26). Ҝүҹүнү бу ҹүр фөвгәлтәбии нүмајиш етдирмәси Исанын һөкм чыхармаг үчүн ҝәлдијинә әламәт олаҹаг. Иса бу һагда тәфәррүатлы мәлуматы сон ҝүнләрлә бағлы һәмин пејғәмбәрликдә — гојунлар вә кечиләр мәсәлиндә верир. (Мәтта 25:31—33, 46 ајәләрини охујун.) Аллаһын Падшаһлығынын садиг тәрәфдарлары «гојун»лар адланаҹаглар вә гуртулушларынын јахын олдугларыны анладыглары үчүн башларыны дикәлдәҹәкләр (Лука 21:28). Падшаһлығын дүшмәнләри исә «кечи»ләрин сырасына дахил олаҹаг вә әбәдилик мәһв едиләҹәкләрини баша дүшәрәк башларына дөјәҹәкләр (Мәт. 24:30; Вәһј 1:7).
(Вәһј 2:7) Гулағы олан гој руһун јығынҹаглара нә дедијини ешитсин: мән галиб ҝәләнә Аллаһын ҹәннәтиндәки һәјат ағаҹынын мејвәләриндән јемәјә изин верәҹәјәм.
«Вәһј» китабындан диггәтәлајиг фикирләр — I һиссә
2:7 — ‘Аллаһын ҹәннәти’ нәдир? Бу сөзләр мәсһ олунмушлара үнванландығы үчүн бу ајәдәки ҹәннәт сөзү ҹәннәтәбәнзәр сәмави аләмә — Јеһованын олдуғу јерә аиддир. Садиг мәсһ олунмушлара «һәјат ағаҹындан» јемәк мүкафаты вериләҹәк. Онлар өлмәзлији алаҹаглар (1 Кор. 15:53).
Мүгәддәс Китаб гираәти
(Вәһј 1:1—11) Иса Мәсиһдән ҝәлән вәһј. Аллаһ тезликлә баш верәҹәк һадисәләри гулларына ҝөстәрмәк үчүн бу вәһји Исаја верди. О, мәләјини ҝөндәриб онун васитәсилә бу вәһји рәмзләрлә гулу Јәһјаја верди. 2 Јәһја да бүтүн ҝөрдүкләринә — Аллаһын сөзүнә вә Иса Мәсиһин шәһадәтинә шәһадәт етди. 3 Бу пејғәмбәрлик сөзләрини уҹадан охујан, онлары ешидән вә орада јазыланлара әмәл едән адам хошбәхтдир, чүнки вахт јахындыр. 4 Јәһјадан Асија әјаләтиндәки једди јығынҹаға: Вар Олан, Вар Олмуш вә Зүһур Едәҹәкдән, Онун тахты гаршысындакы једди руһдан вә 5 Садиг шаһид, Илкин дирилән, дүнја шаһларынын Шаһы олан Иса Мәсиһдән ҝәлән лүтф вә сүлһ сизинлә олсун. Бизи севәнә, өз ганы баһасына ҝүнаһларымыздан азад едәнә, 6 бизи өз Аллаһы вә Атасына мәхсус падшаһ вә каһин едәнә әбәдијјәт боју шөһрәт вә гүдрәт нәсиб олсун! Амин. 7 О, булудларла ҝәләҹәк. Ону һамы, о ҹүмләдән онун бәдәнини дешәнләр өз ҝөзү илә ҝөрәҹәк. Дүнјанын бүтүн тајфалары кәдәрләнәҹәк вә ондан өтрү башларына дөјәҹәкләр. Бәли, бу, белә дә олаҹаг. Амин. 8 Јеһова Аллаһ белә дејир: «Мән Алфа вә Омегајам, Вар Олан, Вар Олмуш вә Зүһур Едәҹәк, Гүдрәт Саһиби Мәнәм». 9 Исанын јолунда сизинлә падшаһлыға шәрик олан вә һәр ҹүр әзијјәтә дөзмәјә һазыр олан мән, гардашыныз Јәһја, Аллаһ һаггында данышдығыма вә Иса һаггында шаһидлик етдијимә ҝөрә Патмос дејилән бир адада идим. 10 Мән мүгәддәс руһун тәсири илә Ағанын ҝүнүнә апарылдым вә архамда кәрәнај сәсинә бәнзәр ҝүҹлү бир сәс ешитдим. 11 О сәс дејирди: «Ҝөрдүкләрини тумара јаз вә Ефес, Смирна, Пергам, Тиатира, Сард, Филаделфија вә Лаодикијадакы једди јығынҹаға ҝөндәр».
25 НОЈАБР —1 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ВӘҺЈ 4—6
«Дөрд атлы»
(Вәһј 6:2) Сонра бахдым вә будур: бир ағ ат. Атын белиндә отуранын әлиндә бир јај варды. Она таҹ верилди вә о, зәфәр чала-чала гәләбәсини баша вурмаг үчүн ирәлиләди.
wп17.3 с. 4, абз. 3
Ахырзаман ҹарчылары вә ҝәләҹәјиниз
Ағ атлы кимдир? Бу, Һәзрәти Исадыр. Нәјә әсасән белә демәк олар? Инҹилин «Вәһј» бөлмәсинин диҝәр јериндә һәмин атлы «Аллаһын сөзү» адланыр (Вәһј 19:11—13). Мүгәддәс Китабда «Аллаһын сөзү» титулу Иса Мәсиһә аид едилир, чүнки о, Аллаһын адындан данышан нүмајәндәдир (Јәһја 1:1, 14). Сөзүҝедән атлы «Вәһј»дә һәмчинин Садиг вә Һәгиги, еләҹә дә падшаһлар Падшаһы вә ағалар Ағасы адланыр (Вәһј 19:11, 16). Бу атлы һагда јазыланлардан белә нәтиҹәјә ҝәлмәк олар ки, Һз. Исанын фатеһ һөкмдар олмаг сәлаһијјәти вар вә о, бу сәлаһијјәтиндән анҹаг јахшы мәгсәдләр үчүн истифадә едир.
wп17.3 с. 4, абз. 5
Ахырзаман ҹарчылары вә ҝәләҹәјиниз
Атлылар һагдакы вәһј һансы дөврә аиддир? Биринҹи атлы, Иса Мәсиһ она таҹ вериләндә чапмаға башлады (Вәһј 6:2). Бәс она таҹ нә вахт верилиб, Аллаһын дәрҝаһына апарылан кими? Хејр. Мүгәддәс Китабда дејилир ки, бунун үчүн мүәјјән вахт кечмәли иди (Ибраниләрә 10:12, 13). Иса Мәсиһ јер үзүндә јашајаркән давамчыларына тахта чыхаҹағы вахты билдирән әламәтләрдән данышмышды. О демишди ки, һәмин вахт јер үзүндә вәзијјәт ҝөзләнилмәдән пислијә доғру дәјишәҹәк: мүһарибә, гытлыг вә хәстәликләр баш алыб ҝедәҹәк (Мәтта 24:3, 7; Лука 21:10, 11). 1914-ҹү илдә Биринҹи Дүнја мүһарибәсинин башланмасы илә бәшәријјәт һәмин бу аҹынаҹаглы дөврә гәдәм гојду. Аллаһын Кәламында бу дөвр ахырзаман адланыр (2 Тимутијә 3:1—5).
(Вәһј 6:4—6) Мејдана күрән ат чыхды. Онун белиндә отурана инсанларын бир-бирини гырмасы үчүн јер үзүндән сүлһү ҝөтүрмәк изни верилмишди. Атлыја бөјүк бир гылынҹ верилди. Гузу үчүнҹү мөһүрү ачанда мән үчүнҹү мәхлугун: «Ҝәл!» — дедијини ешитдим. Мән бахдым вә будур: мејдана гара ат чыхды. Онун белиндә отуранын әлиндә тәрәзи варды. Бу вахт, санки, дөрд мәхлугун арасындан бир сәс ҝәлди: «Бир кило буғда бир динара, үч кило арпа бир динара; зејтун јағыны вә шәрабы зај етмә».
wп17.3 с. 4, абз. 8
Ахырзаман ҹарчылары вә ҝәләҹәјиниз
Бу атлы мүһарибәни символизә едир. О, тәкҹә бир нечә өлкәдән јох, бүтүн дүнјадан сүлһү ҝөтүрүр. 1914-ҹү илдә дүнја тарихиндә илк глобал мүһарибә башлады. Онун ардынҹа ондан да дәһшәтли Икинҹи Дүнја мүһарибәси баш верди. Бәзи һесабламалара ҝөрә, 1914-ҹү илдән етибарән мүһарибә вә силаһлы иғтишашларда 100 милјондан артыг инсан һәјатыны итириб! Һәлә хәсарәт аланлары, шикәст галанлары демирик.
wп17.3 с. 4, абз. 11, 12
Ахырзаман ҹарчылары вә ҝәләҹәјиниз
«Мән бахдым вә будур: мејдана гара ат чыхды. Онун белиндә отуранын әлиндә тәрәзи варды. Бу вахт, санки, дөрд мәхлугун арасындан бир сәс ҝәлди: “Бир кило буғда бир динара, үч кило арпа бир динара; зејтун јағыны вә шәрабы зај етмә”» (Вәһј 6:5, 6).
Бу атлы гытлығы тәмсил едир. Ајәләрдә дејилир ки, јер үзүндә гытлыг түғјан едәҹәк. Һәтта бир кило буғда бир динара (вәһјин верилдији дөврдә бирҝүнлүк әмәк һаггы) сатылаҹаг (Мәтта 20:2). Ади арпа нәдир ки, онун үч килосу бирҝүнлүк әмәк һаггына бәрабәр олаҹаг. Сөзсүз ки, бунунла бөјүк күлфәти дојуздурмаг мүшкүл мәсәләдир. Бәс «зејтун јағыны вә шәрабы зај етмә» нә демәкдир? Зејтун јағы вә шәраб биринҹи әсрдә ҝүндәлик истифадә олунан гидалар иди. Бу исә о демәкдир ки, ади гидалара белә гәнаәт етмәк лазым ҝәләҹәк.
(Вәһј 6:8) Мән бахдым вә будур: мејдана солғун рәнҝли ат чыхды. Онун белиндә отуранын ады Өлүм иди вә Мәзар аддымбааддым онун далынҹа ҝәлирди. Онлара јер үзүнүн дөрддә бир һиссәси үзәриндә ихтијар верилди. Онлар әһалини узун гылынҹ, әрзаг гытлығы, өлүмҹүл хәстәликләр вә јерин вәһши һејванлары васитәсилә гырмалы идиләр.
wп17.3 с. 4, абз. 15—17
Ахырзаман ҹарчылары вә ҝәләҹәјиниз
Дөрдүнҹү атлы хәстәлик вә диҝәр факторларын сәбәб олдуғу вахтсыз өлүмүн рәмзидир. Мәсәлән, 1914-ҹү илдән гыса мүддәт сонра испан грипи он милјонларла инсанын һәјатына сон гојуб. Еһтимал едилир ки, һәмин вахт бу хәстәлијә 500 милјон инсан јолухмушду, бу исә дүнја әһалисинин һәр үч нәфәриндән бири демәкдир!
Испан грипи һәлә башланғыҹ иди. Мүтәхәссисләрин һесабламаларына әсасән, 20-ҹи әсрдә чичәк хәстәлијиндән јүз милјонларла инсан һәлак олуб! Тибби наилијјәтләрә бахмајараг, ГИЧС, вәрәм вә малјарија һәлә дә сајсыз-һесабсыз инсанын һәјатына сон гојмаға давам едир.
Истәр мүһарибә, истәр аҹлыг, истәрсә дә хәстәлик олсун, нәтиҹә ејнидир — өлүм. Өлүмүн далынҹа ҝәлән Мәзар исә амансызҹасына тәләф оланлары удур.
Һикмәт хәзинәсиндән инҹиләр
(Вәһј 4:4) Һәмин тахтын әтрафында ијирми дөрд тахт дурурду. Бу тахтларда ијирми дөрд ағсаггал әјләшмишди. Онларын әјниндә ағ либас, башларында гызыл таҹ вар иди.
(Вәһј 4:6) Тахтын өнүндә, санки, бүллура бәнзәр шүшә дәниз вар иди. Ортада, тахт дуран јердә, тахтын дөрд тәрәфиндә дөрд мәхлуг дурмушду. Онлар габагдан вә архадан ҝөзләрлә өртүлмүшдү.
re-E с. 76—77, абз. 8
Јеһованын әзәмәтли сәмави тахты
8 Јәһја билирди ки, гәдимдә мүгәддәс чадырда хидмәт етмәк үчүн каһинләр тәјин олунурдулар. Она ҝөрә дә ҝөрдүкләри ону тәәҹҹүбләндирмәјә билмәзди. О јазырды: «Һәмин тахтын әтрафында ијирми дөрд тахт дурурду. Бу тахтларда ијирми дөрд ағсаггал әјләшмишди. Онларын әјниндә ағ либас, башларында гызыл таҹ вар иди» (Вәһј 4:4). Бәли, каһинләрин әвәзинә, тахтда 24 ағсаггал отуруб, башларына да падшаһ кими таҹ гојулуб. Бу ағсаггаллар кимдир? Онлар мәсиһи јығынҹағындакы мәсһ олунмушлардыр. Онлар дирилиб Јеһованын вәд етдији сәмави мөвгеләрини тутублар. Буну һарадан билирик?
re-E с. 80, абз. 19 Јеһованын әзәмәтли сәмави тахты
19 Бу мәхлуглар кими тәмсил едир? Диҝәр бир пејғәмбәрин, Һизгијал пејғәмбәрин ҝөрдүјү ҝөрүнтү бу суалын ҹавабыны тапмаға көмәк едир. Һизгијал ҝөрмүшдү ки, Јеһова сәмави арабада тахтда отуруб. Арабаны мәхлуглар мүшајиәт едирди. Бу мәхлуглар Јәһјанын тәсвир етдији мәхлуглара бәнзәјирди (Һизгијал 1:5—11, 22—28). Сонра Һизгијал јенә дә һәмин араба-тахты вә јанындакы мәхлуглары ҝөрмүшдү. Амма бу дәфә о, мәхлуглары кәрруб адландырмышды (Һизгијал 10:9—15). Јәһјанын ҝөрдүјү дөрд мәхлуг, сөзсүз ки, Аллаһын кәррубларыны — руһани варлыглардан ибарәт тәшкилатындакы јүксәк рүтбәли варлыглары тәмсил едир. Кәррубларын Јеһоваја белә јахын олмасы Јәһјаја гәрибә ҝәлмәмишди, чүнки гәдим дөврдә мүгәддәс чадырда да Јеһованын тахтыны тәмсил едән әһд сандығынын гапағы үстүндә ики гызыл кәрруб гојулмушду. Бу кәррубларын арасындан Јеһованын сәси халга әмрләр верирди (Чыхыш 25:22; Зәбур 80:1).
(Вәһј 5:5) Онда ағсаггаллардан бири мәнә деди: «Бәсдир, даһа ағлама. Јәһуда гәбиләсиндән олан Шир, Давудун көкү галиб ҝәлди. О, тумары вә једди мөһүрү ачмаға лајигдир».
cf-E с. 36, абз. 5, 6
«Јәһуда гәбиләсиндән олан Шир»
5 Шир чох вахт ҹәсарәтлә әлагәләндирилир. Һеч нә вахтса, мәсәлән, зоопаркда бөјүк еркәк ширлә үз-үзә дурмусунуз? Чох јәгин ки, һејванла аранызда сизи горујан чәпәр олуб. Буна бахмајараг, һәтта белә вәзијјәтдә дә инсаны ваһимә бүрүјүр. Бу нәһәнҝ, гүдрәтли һејванын үзүнә баханда, онун сәрт бахышларыны өз үзәриндә һисс едәндә һеч тәсәввүр етмәк олмаз ки, шир горху ичиндә нәдәнсә гачыр. Мүгәддәс Китабда дејилир ки, аслан һејванлар арасында ән ҝүҹлүсү, һеч нәјин гаршысындан ҝери чәкилмәјән һејвандыр (Мәсәлләр 30:30). Мәсиһ дә мәһз бу ҹүр ҹәсарәтлидир.
6 Ҝәлин ҝөрәк Иса үч саһәдә аслан кими неҹә ҹәсарәт ҝөстәрмишди. Бу, һәгигәти мүдафиә етмәк, әдаләтин тәрәфиндә олмаг вә тәгибләрә синә ҝәрмәкдир. Һәмчинин ҝөрәҹәјик ки, тәбиәтән ҹәсарәтли олуб-олмамағымыздан асылы олмајараг, һамымыз Иса кими ҹәсарәт ҝөстәрә биләрик.
Мүгәддәс Китаб гираәти
(Вәһј 4:1—11) Бундан сонра мән ҝөјдә бир ачыг гапы ҝөрдүм. Ешитдијим сәс, мәнимлә данышан биринҹи сәс кәрәнај сәсинә бәнзәјирди. О, мәнә деди: «Бура галх, мән сәнә баш верәҹәк һадисәләри ҝөстәрәҹәјәм». 2 Бундан дәрһал сонра мүгәддәс руһун ҝүҹү мәни бүрүдү вә будур: ҝөјдә бир тахт дуруб. Тахтда бир нәфәр әјләшмишди. 3 Онун ҝөркәми јәшәм дашына вә сард дашына бәнзәјирди. Тахт зүмрүдә бәнзәр ҝөј гуршағы илә дөврәләнмишди. 4 Һәмин тахтын әтрафында ијирми дөрд тахт дурурду. Бу тахтларда ијирми дөрд ағсаггал әјләшмишди. Онларын әјниндә ағ либас, башларында гызыл таҹ вар иди. 5 Тахтдан илдырымлар вә шимшәкләр чахыр, сәсләр ҝәлирди. Онун гаршысында једди мәшәл јанырды. Бу мәшәлләр Аллаһын једди руһуну тәмсил едир. 6 Тахтын өнүндә, санки, бүллура бәнзәр шүшә дәниз вар иди. Ортада, тахт дуран јердә, тахтын дөрд тәрәфиндә дөрд мәхлуг дурмушду. Онлар габагдан вә архадан ҝөзләрлә өртүлмүшдү. 7 Биринҹи мәхлуг ширә, икинҹи мәхлуг буғаја, үчүнҹү мәхлуг сифәтдән инсана, дөрдүнҹү мәхлуг учан гартала бәнзәјирди. 8 Бу дөрд мәхлугун һәр биринин алты ганады варды. Ганадларын ичи дә, чөлү дә ҝөзләрлә өртүлмүшдү. Мәхлуглар ҝеҹә-ҝүндүз јорулмадан: «Вар Олан, Вар Олмуш вә Зүһур Едәҹәк, Гадир Аллаһ Јеһова мүгәддәсдир, мүгәддәсдир, мүгәддәсдир!» — дејирдиләр. 9 Бу мәхлуглар һәр дәфә тахтда отураны, әбәди јашајаны шан, шәрәф вә шүкранла алгышлајанда 10 ијирми дөрд ағсаггал тахтда отуранын гаршысында диз чөкүб әбәди јашајана сәҹдә гылыр, башларындакы таҹлары тахтын гаршысына атыб дејирдиләр: 11 «Аллаһымыз Јеһова, Сән шана, шәрәфә, гүдрәтә лајигсән! Чүнки һәр шејин јараданы Сәнсән вә һәр шеј Сәнин ирадәнлә мөвҹуд олду вә јарадылды».