Аллаһа иззәт верәнләр хејир-дуа алыр

“Өнүндә сәҹдә гылаҹаглар, ја Рәбб; вә исминә иззәт верәҹәкләр” (МӘЗМУР 86:9).

1. Нәјә ҝөрә биз Аллаһы, ҹансыз варлыгларын едә билмәдикләри кими иззәтләндирмәјә гадирик?

ЈЕҺОВА, бүтүн јаратдығы варлыгларын Она иззәт вермәсинә лајигдир. Аллаһа сәссиз олараг иззәт верән ҹансыз варлыглардан фәргли олараг, биз инсанлар дүшүнмәк, гаврамаг, гијмәтләндирмәк вә ибадәт етмәк габилијјәтинә маликик. Бизә, јер үзүнүн сакинләринә, мәзмурчунун бу сөзләри үнванланыб: “Еј бүтүн дүнја әһли, ҹуша ҝәлиб Аллаһа нида един, шәрәфли исмини тәрәннүм един, Она шәрәфлә һәмд един!” (Мәзмур 66:1, 2, МКШ).

2. Аллаһын исминә иззәт ҝәтирмәк чағырышына кимләр һај верир вә нәјә ҝөрә?

² Инсанларын әксәријјәти Аллаһын мөвҹудлуғуну е’тираф етмәкдән вә ја Она иззәт вермәкдән имтина едирләр. Буна бахмајараг, дүнјанын 235 өлкәсиндә алты милјондан артыг Јеһованын Шаһидләри Аллаһын “ҝөзлә ҝөрүлмәз хүсусијјәтләри”ни Онун јаратдыглары васитәсилә ҝөрдүкләрини вә јарадылан варлыгларын сәссиз шаһидликләрини ешитдикләрини ҝөстәрирләр (Ромалылара 1:20; Мәзмур 19:2, 3). Мүгәддәс Китабы өјрәнәрәк, онлар Јеһованы танымаға вә севмәјә башламышлар. Мәзмур 86:9, 10 ајәләриндә габагҹадан дејилмишдир: “Бүтүн јаратдығын милләтләр ҝәләҹәкләр вә өнүндә сәҹдә гылаҹаглар, ја Рәбб; вә исминә иззәт верәҹәкләр. Чүнки бөјүксән вә валеһедиҹи ишләр едән сәнсән; јалныз Аллаһ сәнсән”.

3. “Бөјүк... издиһам” һансы мә’нада Аллаһа мүгәддәс хидмәти “ҝеҹә-ҝүндүз” иҹра едир?

³ Буна бәнзәр тәсвири Вәһј 7:9, 15 ајәләриндә, Аллаһа иззәт верән “бөјүк... издиһам”ын “Онун мә’бәдиндә ҝеҹә-ҝүндүз” хидмәт етмәси һаггындакы сөзләрдә дә тапырыг. Бурада Аллаһын Өз хидмәтчиләриндән Ону фасиләсиз олараг иззәтләндирмәләрини тәләб етмәси нәзәрдә тутулмур. Лакин онлар үмумдүнја тәшкилатында бирләшибләр вә бә’зи өлкәләрдә ҝеҹә оланда, Јер күрәсинин диҝәр тәрәфиндә ҝүндүздүр вә Аллаһын хидмәтчиләри шаһидлик етмәклә мәшғулдурлар. Буна ҝөрә дә демәк олар ки, Јеһованы иззәтләндирәнләр үчүн ҝүнәш һеч вахт батмыр. Тезликлә бүтүн “ҹанлы варлыглар” Јеһоваја һәмд сәсини уҹалдаҹаглар (Мәзмур 150:6, МКШ). Бәс бу арада Аллаһа иззәт вермәк үчүн бизләрдән һәр биримиз нә едә биләрик? Бизим гаршымызда һансы чәтинликләр дура биләр? Вә Аллаһа иззәт верәнләри һансы хејир-дуалар ҝөзләјир? Ҹаваб тимсалында ҝәлин, Гад гәбиләсиндән олан исраиллиләр һаггында Мүгәддәс Китабын сөјләдикләрини нәзәрдән кечирәк.

Гәдимдә баш верән чәтинлик

4. Гад гәбиләсиндән олан исраиллиләри һансы чәтинликләр ҝөзләјирди?

⁴ Бүтүн халг Вә’д едилмиш дијара дахил олмаздан әввәл, Гад гәбиләсиндән олан исраиллиләр Иордан чајындан шәрг тәрәфдә — сүрүләр үчүн јарарлы јердә мәскән салмаға иҹазә истәдиләр (Сајлар 32:1-5). Бу јердә јашамаг ҹидди чәтинликләрлә бағлы иди. Гәрб саһилдәки гәбиләләр Иордан вадисинин мүдафиәси алтында иди — һәмин вади һәрби басгынлар үчүн тәбии манеә кими хидмәт едирди (Јешу 3:13-17). Лакин Иордандан шәргдә јерләшән торпагларла вәзијјәт башга ҹүр иди. Ҹорҹ Адам Смитин “Мүгәддәс торпағын тарихи ҹоғрафијасы” китабында бу торпаглар һаггында дејилир: “[Онлар] демәк олар ки, һеч бир сәдд олмадан бөјүк Әрәбистан јајласына гәдәр узанмагдадыр. Бу сәбәбдән һәмин торпаглар бүтүн әсрләр боју аҹ көчәриләрин басгынына мә’руз галырды, бә’зи көчәри дәстәләри исә, отлаглардан өтрү һәр ил бу бөлҝәләрә һүҹум едирдиләр” (“The Historical Geography of the Holy Land”).

5. Јагуб Гадын нәсилләринә һүҹумлара ҹаваб вермәји неҹә тапшырыр?

⁵ Гад гәбиләси бу ҹүр даими тәзјигин өһдәсиндән неҹә ҝәләҹәк? Бир нечә әср әввәл онларын улу атасы Јагуб өлүм јатағында демишдир: “Ҝад [Гад] таланчылар басгынына уғрајаҹаг, лакин онлары топуғундан вураҹаг” (Јарадылыш 49:19, МКШ). Илк бахышдан бу сөзләр сыхыҹы ҝөрүнүр. Әслиндә исә, бу сөзләрлә Гадын нәсилләринә ҹаваб зәрбәләри ендирмәк тапшырылыр. Јагуб онлары әмин етмишдир ки, әҝәр онлар бу ҹүр даврансалар, таланчылар рүсвајчылыгла ҝери чәкиләҹәкләр, онлар исә дүшмәни тә’гиб едәҹәкләр.

Бу ҝүн ибадәтимиздә гаршылашдығымыз чәтинликләр

6, 7. Буҝүнкү мәсиһчиләрин вәзијјәти Гад гәбиләсиндән олан исраиллиләрин вәзијјәтинә нәдә охшардыр?

⁶ Гад гәбиләсиндән олан исраиллиләр кими, бу ҝүн мәсиһчиләр дә Шејтанын системиндәки һәјатла бағлы чәтинликләрдән фөвгәлтәбии шәкилдә мүдафиә олунмурлар вә онлар ҝәрҝин сурәтдә мүбаризә апармалы олурлар (Ејуб 1:10-12). Бизләрдән чохумузун гаршысында мәктәбдә охумагла, доланмаг үчүн чөрәк пулу газанмагла вә ушаглары тәрбијә етмәклә бағлы проблемләр дурур. Шәхси вә ја мә’нәви характерли чәтинликләри дә хатырламамаг олмаз. Ким исә бәдәниндә физики чатышмазлыг вә ја ҹидди хәстәлик тимсалында олан “нештәрә” таб ҝәтирир (2 Коринфлиләрә 12:7-10). Башгалары исә өзләрини дәјәрсиз һисс етдикләри үчүн нараһатчылыг кечирирләр. Гоҹалығын “пис ҝүнләри” јашлы мәсиһчиләрә Јеһоваја әввәлләр олдуғу кими фәал хидмәт етмәјә мане ола биләр (Ваиз 12:1).

⁷ Бундан әлавә, һәвари Павелин хатырлатдығы кими, “мүбаризәмиз... сәмави аләмдә олан пис руһи гүввәләрә гаршыдыр” (Ефеслиләрә 6:12). Биз даима Шејтанын вә онун ҹинләринин јајдығы “дүнјанын руһунун” — гијам вә әхлаги позғунлуг руһунун тә’сиринә мә’руз галырыг (1 Коринфлиләрә 2:12; Ефеслиләрә 2:2, 3). Аллаһдан горхан Лут кими, бизи дә, әтрафымыздакы инсанларын әхлагсыз давранышлары вә нитгләри әлдән сала биләр (2 Петер 2:7). Биз Шејтанын бирбаша һүҹумларындан да мүһафизә олунмамышыг. Шејтан, “Аллаһын әмрләринә риајәт едиб, Исаја олан шәһадәтләринә бағлы галан” мәсһ едилмиш галыгла мүһарибә едир (Вәһј 12:17). Исанын “башга гојунлары” да, Шејтанын гадағалар вә тә’гибләр тимсалында һүҹумларына мә’руз галырлар (Јәһја 10:16).

Тәслим олмаг, јохса дәф етмәк?

8. Шејтанын һүҹумларына неҹә ҹаваб вермәлијик вә нәјә ҝөрә?

⁸ Биз Шејтанын һүҹумларына неҹә ҹаваб вермәлијик? Гад гәбиләсиндән олан гәдим исраиллиләр кими, биз руһән гүввәтли олмалы вә Аллаһын ҝөстәришләринә мүвафиг давранараг, һүҹумлары дәф етмәлијик. Әфсуслар олсун ки, бә’зиләри өз руһани мәс’улијјәтләринә е’тинасыз јанашараг, һәјати ҝәрҝинликләрин гаршысында ҝери чәкилирләр (Матта 13:20-22). Бир Шаһид, онун јығынҹағында ҝөрүшә ҝәләнләрин сајынын ашағы дүшмәсинин сәбәби һаггында данышаркән деди: “Гардашлар олдугҹа јорулублар. Онлар тагәтдән дүшүбләр”. Һәгигәтән дә, бу ҝүн инсанларын јорғунлуг һисс етмәләринә чох сәбәбләр вар. Бу сәбәбдән Аллаһа едилән хидмәтә ағыр мәс’улијјәт, нөвбәти јүк кими бахмаг асандыр. Лакин бу дүзҝүнмү нөгтеји-нәзәрдир?

9. Мәсиһин бојундуруғуну үзәримизә ҝөтүрмәклә неҹә раһатлыг тапмаг олар?

⁹ Исанын өз дөврүнүн һәјат гајғыларындан ејни ҹүр әзијјәт чәкән адамларына нә дедијини нәзәрдән кечирәк: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм”. Иса, Аллаһа хидмәти ихтисара салмагла раһатлыг тапмағын мүмкүн олдуғунуму нәзәрдә тутурду? Әксинә, Иса демишдир: “Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз”. Бојундуруг инсана вә ја һејвана ағыр јүк дашымаг имканы верән ағаҹ вә ја метал чәрчивәдир. Ким өз үзәринә бу ҹүр јүк ҝөтүрмәк истәјәр? Мәҝәр биз јүкләнмиш дејилкми? Бәли, еләдир, лакин јунан мәтни белә бир мә’на да верә биләр: “Бојундуруғумун алтында мәнимлә бирҝә дурун”. Јалныз дүшүн: Иса бизә, јүкүмүзү дашымаг үчүн көмәк тәклиф едир! Бизә буну јалныз өз гүввәмизлә етмәк лазым дејил (Матта 9:36; 11:28, 29; 2 Коринфлиләрә 4:7).

10. Аллаһы иззәтләндирмәкдә ҝөстәрдијимиз сә’јләр һансы нәтиҹәни верир?

¹⁰ Биз шаҝирдлик бојундуруғу дашымагла, Шејтана гаршы мүбаризә апарырыг. Мүгәддәс Китаб Јагуб 4:7 ајәсиндә вә’д едир: “Иблисә... гаршы дурун вә о, сиздән гачаҹагдыр”. Һеч ким буну етмәјин асан олдуғуну сөјләмир. Аллаһа хидмәт чох бөјүк сә’ј тәләб едир (Лука 13:24). Лакин Мүгәддәс Китабда, Мәзмур 126:5 ајәсиндә белә бир вә’д вар: “Ҝөз јашлары илә әкәнләр севинҹлә бичәҹәкләр”. Бәли, биз јахшылыг билән Аллаһа хидмәт едирик. Аллаһ, “Ону ахтаранлара мүкафат верир” вә Она иззәт верәнләрә хејир-дуа верир (Ибраниләрә 11:6).

Падшаһлығы тәблиғ етмәклә Аллаһы иззәтләндиририк

11. Тәблиғ хидмәти Шејтанын һүҹумларындан неҹә мүдафиә едир?

¹¹ Иса әмр етмишдир: “Беләликлә, ҝедин, бүтүн халглары шаҝирдим един”. Тәблиғ иши, Аллаһа “һәмд гурбаныны” тәгдим етмәјин әсас үсулудур (Матта 28:19; Ибраниләрә 13:15). Бундан әлавә, ајагларымыза ҝејдијимиз “сүлһ Мүждәсини тәблиғ етмәк һазырлығы”, Шејтанын һүҹумларындан мүдафиәмизин — “Аллаһын бүтүн зиреһләринин” әвәзолунмаз һиссәсидир (Ефеслиләрә 6:11-15). Аллаһы тәблиғ хидмәтиндә иззәтләндирмәк — иманымызы бәсләмәк үчүн ҝөзәл үсулдур (2 Коринфлиләрә 4:13). Бу бизә, әглимизи мәнфи фикирләрдән тәмизләмәјә көмәк едир (Филипилиләрә 4:8). Тәблиғдә иштирак етмәк һәм дә бизә һәмиманлыларымызла инкишафетдириҹи сөһбәтләр етмәјә имкан верир.

12, 13. Тәблиғ хидмәтиндә мүнтәзәм иштирак етмәк аиләләрә һансы фајданы ҝәтирә биләр? Нүмунә ҝәтирин.

¹² Тәблиғ иши бүтүн аилә үчүн сәмәрәли фәалијјәт ола биләр. Шүбһәсиз ки, ушаглара лазыми дәрәҹәдә истираһәт етмәк вә әјләнмәк лазымдыр. Лакин аиләви тәблиғ хидмәти үзүҹү иш олмамалыдыр. Валидејнләр ушагларына хош хәбәрин тәблиғиндә даһа да јахшылашмагда көмәк едәрәк һәмин вахты даһа хош едә биләрләр. Мәҝәр ушаглар даһа јахшы баҹардыглары иши мәмнунијјәтлә јеринә јетирмирләрми? Тәмкинлилик ҝөстәрәрәк вә ушаглардан мүмкүн олмајан шеји тәләб етмәјәрәк, валидејнләр ушагларынын хидмәтдә севинҹ тапмаларына көмәк едә биләрләр (Тәквин 33:13, 14).

¹³ Бундан әлавә, аиләнин үзвләри Аллаһы бирликдә иззәтләндирәндә, онлар бир-бири илә јахынлашырлар. Һәгигәтдә олмајан әри тәрәфиндән атылан, беш ушағы илә галан бир баҹымызын һадисәсини нәзәрдән кечирәк. О, иш тапмаг вә ушаглары мадди ҹәһәтдән тә’мин етмәк чәтинлији илә үзләшди. Проблемләри уҹбатындан баҹымыз ушагларынын руһани тәләбатларына е’тинасыз јанашмаға башладымы? Баҹы хатырлајыр: “Мән Мүгәддәс Китабы вә она әсасланан нәшрләри чалышганлыгла охујур вә охудугларымы тәтбиг етмәјә чалышырдым. Мүнтәзәм олараг ушаглары јығынҹаға вә евдән-евә хидмәтә ҝөтүрүрдүм. Сә’јләрим неҹә мүкафатландырылды? Ушагларымын беши дә вәфтиз олунду”. Хидмәтдә там дәрәҹәдә иштирак етмәк сәнә дә ушагларыны “Рәббин тәрбијә вә нәсиһәти илә” бөјүтмәкдә көмәк едә биләр (Ефеслиләрә 6:4).

14. а) Ушаглар мәктәбдә Аллаһа неҹә иззәт верә биләрләр? б) Ҝәнҹләрә ‘Мүждәдән утанмамаға’ нә көмәк едә биләр?

¹⁴ Ушаглар, әҝәр јашадығыныз өлкәдә ганунлар јол верирсә, сиз мәктәбдә шаһидлик едәрәк Аллаһа иззәт верирсинизми, јохса инсанлар гаршысында горху уҹбатындан чәкинирсиниз? (Сүлејманын мәсәлләри 29:25). Пуерто–Рикодан 13 јашлы баҹымыз јазыр: “Мән мәктәбдә тәблиғ етмәјә һеч вахт утанмырам, чүнки бунун һәгигәт олдуғуну билирәм. Дәрсләрдә һәмишә әлими галдырыр вә Мүгәддәс Китабдан нә өјрәндијими сөјләјирәм. Бош вахтым оланда китабханаја ҝедир вә “Ҝәнҹләрин суаллары” китабыны охујурам”a. Јеһова онун сә’јләринә хејир-дуа вердими? Гыз ҹаваб верир: “Бә’зән синиф јолдашларым суаллар верир вә һәтта онлара бу китабдан ҝәтирмәјими хаһиш едирләр”. Әҝәр сәнә мәктәбдә тәблиғ етмәјә башламаг чәтиндирсә, бәлкә чалышганлыгла шәхси өјрәнмә васитәсилә “Аллаһын јахшы, мәгбул вә камил ирадәсинин нә олдуғуну” өзүнә сүбут етмәк лазымдыр (Ромалылара 12:2). Әҝәр сән өјрәндијинин һәгигәт олдуғуна әминсәнсә, сән һеч заман ‘Мүждәдән утанмајаҹагсан’ (Ромалылара 1:16).

Хидмәти ҝенишләндирмәк имканлары

15, 16. Бә’зи мәсиһчиләр хидмәти ҝенишләндирмәјин һансы имканларындан истифадә етмиш вә бу һансы хејир-дуалары ҝәтирмишдир?

¹⁵ Һәвари Павел јазырды ки, онун гаршысында “бөјүк вә фәалијјәт үчүн ҝениш гапы ачылмышдыр” (1 Коринфлиләрә 16:9). Бәлкә сәнин дә шәраитләрин хидмәтини ҝенишләндирмәјә имкан верир? Пионерләр вә көмәкчи пионерләр, мисал үчүн, һәр ај тәблиғ ишинә 70 вә ја 50 саат вахт сәрф едирләр. Тәбиидир ки, һәмиманлылары сәдагәтли хидмәтләринә ҝөрә пионерләри гијмәтләндирирләр. Пионерләр дүшүнмүрләр ки, әҝәр хидмәтә даһа чох вахт ајырырларса, демәли, онлар нәдәсә башгаларындан үстүндүрләр. Бунун әксинә, онлар Исанын тәшвиг етдији әһвал-руһијјәни инкишаф етдирирләр: “Биз һеч бир гијмәти олмајан гулларыг, чүнки иҹра етмәли олдуғумузу етдик” (Лука 17:10).

¹⁶ Пионер хидмәти өзүнүтәрбијә, мүтәшәккиллик вә гурбан вермәк һазырлығы тәләб едир. Лакин хејир-дуалар һәр бир нараһатчылығы көлҝәдә гојур. Ҝәнҹ пионер баҹы Тамика дејир: “Аллаһын һәгигәт Кәламыны дүзҝүн чатдырмағы баҹармаг әсл хејир-дуадыр. Пионер кими хидмәт едәндә Мүгәддәс Китабдан тез-тез истифадә едирсән. Инди гапыдан-гапыја тәблиғ едәркән, мән һәр бир инсана мүвафиг Мүгәддәс Китаб ајәси сечә билирәм” (2 Тимотејә 2:15). Мика адлы пионер баҹы дејир: “Һәгигәтин инсанларын һәјатына неҹә тә’сир ҝөстәрдијини ҝөрмәк даһа бир мө’ҹүзәли хејир-дуадыр”. Метју адлы бир ҝәнҹ разылашыр ки, “киминсә һәгигәтә ҝәлдијини ҝөрмәк” севиндириҹидир. “Башга һеч бир шеј бу севинҹи әвәз едә билмәз”.

17. Пионер хидмәтинә гаршы олан мәнфи һиссләрини бир мәсиһчи баҹы неҹә дәф етди?

¹⁷ Сән пионер олмаг барәсиндә дүшүнүрсәнми? Еһтимал ки, сән пионер олмаг истәјәрдин, лакин бунун баш тутмајаҹағыны дүшүнүрсән. Кениате адлы ҝәнҹ бир баҹы е’тираф едир: “Мән пионер хидмәтинә даир мәнфи фикирдә идим. Дүшүнүрдүм ки, бунун үчүн јарарлы дејиләм. Тәгдимә һазырламағы вә ја Мүгәддәс Јазыларын әсасында мүлаһизә јүрүтмәји баҹармырдым”. Буна бахмајараг, ағсаггаллар тәҹрүбәли бир пионер баҹыны она әмәкдаш тә’јин етдиләр. Кениате хатырлајыр: “Онунла тәблиғ етмәк олдугҹа ҝөзәл иди. Бу, мәндә пионер кими хидмәт етмәк арзусу ојатды”. Бир аз руһландырылдыгдан вә тә’лим алдыгдан сонра, еһтимал ки, сәнин дә пионер кими хидмәт етмәк арзун јаранаҹаг.

18. Миссионер хидмәти һансы хејир-дуалары ҝәтирә биләр?

¹⁸ Пионер хидмәти сајәсиндә сәнин гаршында хидмәтини ҝенишләндирмәк үчүн даһа чох имканлар јарана биләр. Мәсәлән, бә’зи әр-арвадлар миссионер хидмәти үчүн јарарлы олуб, мүвафиг тә’лим алдыгдан сонра, башга өлкәјә тәблиғ етмәјә јоллана биләрләр. Миссионерләр јени өлкәдәки һәјата, еһтимал ки, јени дилә, јени мәдәнијјәтә вә јени гидаја алышмалыдырлар. Лакин һәр бир нараһатчылыг, алынан хејир-дуаларла мүгајисәдә һечдир. Мексикада хидмәт едән, миссионер хидмәтиндә тәҹрүбәси олан Милдред адлы баҹы дејир: “Миссионер кими хидмәт етмәк гәрарыма ҝөрә һеч заман пешман олмамышам. Бу һәлә илк ушаглыг чағларындан мәним арзум олуб”. О, һансы хејир-дуалары алыр? “Вәтәнимдә Мүгәддәс Китаб өјрәнмәләри тапмаг чәтин иди. Бурада исә елә олур ки, Мүгәддәс Китабы өјрәнмәјә көмәк етдијим адамлардан дөрдү бир вахтда тәблиғчи олур!”

19, 20. Бејт-Ел хидмәти, бејнәлхалг програмда иштирак етмәк вә Хидмәти Тәкмилләшдирмә Мәктәбиндә тә’лим алмаг бир чохларына неҹә хејир-дуалар ҝәтирмишдир?

¹⁹ Јеһованын Шаһидләринин филиалларында, Бејт-Ел хидмәтиндә оланлар да бол хејир-дуалар алырлар. Алманијада хидмәт едән ҝәнҹ гардаш Свен Бејт-Елдәки хидмәти барәсиндә данышыр: “Узунмүддәтли дәјәри олан ишлә мәшғул олдуғуму һисс едирәм. Мән өз баҹарыгларымы дүнјада истифадә едә биләрдим. Лакин бу, ифласа уғрамагда олан банка пул гојмаға бәрабәр оларды”. Доғрудур ки, мәваҹиби олмајан көнүллү кими хидмәт етмәк фәдакарлыгдыр. Лакин Свен дејир: “Ишдән евә гајыданда билирсән ки, бу ҝүн мәшғул олдуғун һәр бир иш Јеһова үчүн иди. Бу чох ҝөзәл һиссләр бәхш едир”.

²⁰ Бә’зиләри бејнәлхалг програмда иштирак едәрәк хариҹи өлкәләрдә филиалларын тикинтисиндә ишләмәкдән хејир-дуа әлдә едирләр. Сәккиз өлкәдә хидмәт едән бир әр-арвад јазмышды: “Бурадакы гардашлар чох ҝөзәлдирләр. Онлардан ајрылмаг кәдәрли олаҹаг вә бу кәдәри биз артыг сәккизинҹи дәфәдир ки, јашајырыг. Лакин һәр шеј неҹә дә ҝөзәл иди!” Һәмчинин Хидмәти Тәкмилләшдирмә Мәктәби дә вар. Бу мәктәбдә, баҹарыглы субај гардашлар тә’лим алырлар. Бир мә’зун јазмышдыр: “Һеч билмирәм ки, бу ҹүр ҝөзәл Мәктәбә ҝөрә сизә неҹә миннәтдарлығымы билдирим. Тә’лим вермәк үчүн башга һансы бир тәшкилат бу гәдәр гүввә сәрф едир?!”

21. Бүтүн мәсиһчиләрин гаршысында һансы тапшырыг дурур?

²¹ Ҝөрдүјүмүз кими, хидмәтимизи ҝенишләндирмәк имканлары чохдур. Е’тираф етмәлијик ки, бизләрдән һамымыз Бејт-Елдә вә ја хариҹдә хидмәт едә билмәрик. Исанын өзү е’тираф едирди ки, мәсиһчиләр шәраитләриндән асылы олараг мүхтәлиф мигдарда “сәмәрә” ҝәтирәҹәкләр (Матта 13:23). Лакин мәсиһчи кими бизим вәзифәмиз өз шәраитләримиздән чох фајдаланмаг, јә’ни шәраитләримизин јол вердији гәдәр Јеһоваја хидмәтдә там иштирак етмәкдир. Бу ҹүр давранараг биз Јеһоваја иззәт ҝәтиририк вә әмин ола биләрик ки, О биздән разыдыр. Мәсәлән, гоҹалар евиндә јашајан јашлы баҹымыз Етели ҝөтүрәк. О, мүнтәзәм олараг башга сакинләрә шаһидлик едир, һәмчинин телефонла да тәблиғ едир. Имканларынын мәһдуд олмасына бахмајараг, о, Јеһоваја бүтүн үрәји илә хидмәт едир (Матта 22:37).

22. а) Аллаһа иззәт ҝәтирмәјин даһа һансы үсуллары вар? б) Бизи һансы ҝөзәл зәманә ҝөзләјир?

²² Јадда сахла ки, тәблиғ, Јеһоваја иззәт ҝәтирмәк үсулларындан јалныз биридир. Ишдә, мәктәбдә, һәмчинин евдә нүмунәви давранышымыз вә хариҹи ҝөрүнүшүмүз Јеһованын үрәјини севиндирир (Сүлејманын мәсәлләри 27:11). Сүлејманын мәсәлләри 28:20 (МКШ) ајәсиндә белә бир вә’д јазылыб: “Е’тибарлы инсанын бәрәкәти болдур”. Буна ҝөрә дә чох хејир-дуалар бичәҹәјимизи биләрәк, Аллаһа хидмәтимиздә ‘чох әкмәлијик’ (2 Коринфлиләрә 9:6). Белә олан һалда биз, “бүтүн ҹанлы варлыгларын” Јеһоваја лајиг олдуғу иззәти вердикләри ҝөзәл зәманәдә јашаја биләҹәјик! (Мәзмур 150:6, МКШ).

[Һашијә]

Хатырлајырсынызмы?

• Аллаһын халгы һансы мә’нада “ҝеҹә-ҝүндүз” Јеһоваја хидмәт едир?

• Гад гәбиләсиндән олан исраиллиләр һансы чәтин вәзијјәтә дүшмүшдүләр вә бу, бу ҝүн јашајан мәсиһчиләри нәјә өјрәдир?

• Тәблиғ хидмәти һансы мә’нада Шејтанын һүҹумларындан мүдафиә едир?

• Бә’зиләри хидмәти ҝенишләндирмәјин һансы имканларындан истифадә етмишләр вә бу онлара һансы хејир-дуалары ҝәтирмишдир?

[25-ҹи сәһифәдәки шәкил]

Гад гәбиләсиндән олан исраиллиләр таланчыларын һүҹумуну дәф етдикләри кими, мәсиһчиләр дә Шејтанын һүҹумларыны дәф етмәлидирләр.

[26-ҹы сәһифәдәки шәкилләр]

Пионер хидмәти, ашағыдакылар да дахил олмагла, хидмәтин хүсуси нөвләринә:

1) бејнәлхалг програмда иштирак етмәјә,

2) Бејт-Ел хидмәтинә,

3) миссионер хидмәтинә гапы ача биләр.

[27-ҹи сәһифәдәки шәкил]

Хидмәт заманы бир-биримизлә инкишафетдириҹи үнсијјәтә маликик.