Әсаслы сәбәб, јохса садәҹә бәһанә? Јеһованын нөгтеји-нәзәри
«МӘНИМЛӘ бирҝә олмаг үчүн вердијин гадын о ағаҹын мејвәсиндән верди, мән дә једим», — дејә Адәм Аллаһа ҹаваб верди. Һәвва исә: «Илан мәни јолдан чыхартды, мән дә једим», — деди. Улу валидејнләримиз олан Адәмлә Һәвванын Аллаһа дедији бу сөзләр бәшәр тарихиндә ҝәтирилән сајсыз-һесабсыз бәһанәләрин башланғыҹы олду (Јар. 3:12, 13).
Әмрини гәсдән поздугларына ҝөрә Јеһованын онлара чыхардығы һөкм ҝәтирдикләри сәбәбләрин әсассыз олдуғуну ҝөстәрди (Јар. 3:16—19). Бәс биз ҝәтирдијимиз бүтүн сәбәбләрин Јеһованын ҝөзүндә бәһанәдән башга бир шеј олмадығы гәнаәтинә ҝәлмәлијикми? Јохса О, һансыса сәбәбләри әсаслы сајыр? Бу суаллара ҹаваб вермәздән өнҹә ҝәлин бир суалы нәзәрдән кечирәк: «Үмумијјәтлә, нәјә ҝөрә инсанлар бәһанәләр ҝәтирирләр?»
Адәтән, инсан пис иш тутанда, ондан тәләб олунан ишин өһдәсиндән ҝәлә билмәјәндә, јахуд да ону етмәјә һәвәси олмајанда бәһанә ҝәтирир. Бәһанәдән фәргли олараг, әсаслы сәбәб сәһвә бәраәт газандыра, јахуд да бағышламаға әсас верә биләр. Адәмлә Һәвва кими, бәзи инсанлар да әсил нијјәтләрини өрт-басдыр етмәк үчүн бәһанәләрә әл атырлар. Диҝәрләри исә бунунла тутдуглары әмәлләрин пис нәтиҹәләриндән гачмаға чалышырлар.
Аллаһа хидмәтә ҝәлдикдә, сөзсүз, һеч биримиз мүхтәлиф бәһанәләрлә бундан бојун гачырмаг истәмәздик. Еһтијатлы олмалыјыг ки, ‘јанлыш фикирләрә гапылараг өзүмүзү алдатмајаг’ (Јаг. 1:22). Буна ҝөрә дә ҝәлин ‘Рәббә нәјин мәгбул олдуғуна даима әмин олмағымыза’ көмәк едәҹәк Мүгәддәс Китаб нүмунәләринә вә принсипләринә нәзәр салаг (Ефес. 5:10).
Аллаһ биздән нә тәләб едир?
Јеһова Өз Кәламында халгы олан бизләрдән нә тәләб етдијини ачыг-ајдын сөјләјир. Мәсәлән, Мәсиһин «ҝедин вә бүтүн милләтләрин ичиндә шаҝирд һазырлајын» ҝөстәриши бу ҝүн дә онун әсил давамчыларынын һәр биринә аиддир (Мат. 28:19, 20). Һәвари Павел бу ҝөстәришә риајәт етмәјин һәддән артыг ваҹиб олдуғуну белә ифадә етмишди: «Әҝәр хош хәбәри тәблиғ етмирәмсә, вај һалыма!» (1 Кор. 9:16).
Буна бахмајараг, Мүгәддәс Китабы бизимлә узун мүддәт өјрәнәнләрин бәзиләри Аллаһын Падшаһлығы һагда хош хәбәри тәблиғ етмәкдән һәлә дә чәкинирләр (Мат. 24:14). Диҝәрләри исә әввәлләр тәблиғ етсәләр дә, инди етмирләр. Чох вахт онлар һансы сәбәбләри ҝәтирирләр? Кечмишдә бәзиләри Аллаһын тапшырығыны иҹра етмәкдән бојун гачыранда О, буна неҹә јанашырды?
Аллаһын бәһанә кими гәбул етдији сәбәбләр
«Бу, олдугҹа чәтин ишдир». Хүсусилә дә тәбиәтҹә утанҹаг олан инсанлар хош хәбәри тәблиғ етмәјин чох чәтин олдуғуну дүшүнә биләрләр. Амма ҝәлин Јунусун нүмунәсини нәзәрдән кечирәк вә ҝөрәк, ондан нә өјрәнә биләрик. Јеһова она ҝөзүндә дағ бојда ҝөрүнән бир тапшырыг вермишди. О, Ниневаја ҝедәрәк онун сакинләринә Јеһованын тезликлә иҹра едәҹәји һөкмләри бәјан етмәли иди. Бу тапшырығы јеринә јетирмәкдән онун нәјә ҝөрә горхдуғуну баша дүшмәк чәтин дејил. Нинева шәһәри өз гәддарлығы илә танынан Ассурија империјасынын пајтахты иди. Ола билсин, Јунус үрәјиндә белә фикирләширди: «Мән бу халгын арасында неҹә јашајаҹағам? Онлар мәнимлә неҹә рәфтар едәҹәкләр?» Вә о гачмаг гәрарына ҝәлди. Лакин Јеһова үчүн бу, бәһанәдән башга бир шеј дејилди. Буна ҝөрә дә ону бир даһа Ниневаја ҝөндәрди. Бу дәфә исә Јунус Аллаһын тапшырығыны ҹәсарәтлә јеринә јетирди. Јеһованын хејир-дуасы сајәсиндә бу ишин ахыры јахшы олду (Јун. 1:1—3; 3:3, 4, 10).
Әҝәр сән дә хош хәбәри тәблиғ етмәк ишинин чох чәтин олдуғуну фикирләширсәнсә, онда унутма ки, ‘Аллаһ үчүн мүмкүн олмајан шеј јохдур’ (Марк 10:27). Әмин ол ки, дурмадан Јеһовадан көмәк диләсән, О, сәни мөһкәмләндирәҹәк вә хидмәт етмәк үчүн бүтүн ҹәсарәтини топлајанда сәнә хејир-дуа верәҹәк (Лука 11:9—13).
«Үрәјим истәмир». Бәс әҝәр үрәјиндә Јеһоваја хидмәт етмәк истәји јохдурса, онда неҹә? Јадда сахла ки, Јеһова дахилиндә фәалијјәт ҝөстәрәрәк арзуларына тәсир етмәјә гадирдир. Павел јазыр: «Аллаһ Өзү сизин арзу вә һәрәкәтләринизи истәдији сәмтә јөнәлдәрәк сиздә фәалијјәт ҝөстәрир» (Филип. 2:13). Јеһовадан хаһиш едә биләрсән ки, үрәјиндә Онун ирадәсини јеринә јетирмәк арзусу ојатсын. Бир мәзмурчу да белә етмишди. О, Јеһоваја јалварырды: «Гәлбими сәмими ет, гој Сәнин исминдән горхум» (Мәз. 86:11). Сән дә Јеһоваја бүтүн гәлбинлә дуа едәрәк хаһиш едә биләрсән ки, үрәјиндә Она мәгбул олан иши јеринә јетирмәк арзусу ојатсын.
Лакин етираф етмәлијик ки, бәзән јорғун, јахуд һалсыз оланда өзүмүзү јығынҹаг ҝөрүшләринә вә ја хидмәтә ҝетмәјә мәҹбур етмәли олуруг. Бу заман Јеһованы севмәдијимизи дүшүнмәлијикми? Әсла! Гәдимдә јашамыш Јеһованын садиг хидмәтчиләри дә Онун ирадәсини јеринә јетирмәк үчүн бүтүн ҝүҹләрини сәфәрбәр етмәли олурдулар. Мәсәлән, Павел Аллаһдан алдығы тапшырығы иҹра етмәк үчүн ‘бәдәнинә ҹәфа верирди’ (1 Кор. 9:26, 27). Буна ҝөрә дә өзүмүзү хидмәт етмәјә мәҹбур едәндә белә әмин олмалыјыг ки, Јеһова бизи мүтләг хејир-дуаландыраҹаг. Нәјә ҝөрә? Чүнки биз буну дүзҝүн нијјәтдән, јәни Јеһоваја мәһәббәтимиздән ирәли ҝәләрәк едирик. Билдијимиз кими, Шејтан иддиа етмишди ки, Аллаһын хидмәтчиләри сынаглар заманы Ондан үз дөндәрәҹәкләр. Биз исә јухарыда дејилдији кими даврананда онун иддиаларынын әсассыз олдуғуну сүбут едирик (Әјј. 2:4).
«Вахтым јохдур». Әҝәр сән һәддән артыг мәшғул олдуғуну вә бу сәбәбдән хидмәт етмәјә вахтынын галмадығыны һесаб едирсәнсә, сәнин үчүн нәјин даһа ваҹиб олдуғу үзәриндә јенидән фикирләш. Иса демишди: «Падшаһлығы... һәјатынызда һәмишә биринҹи јерә гојун» (Мат. 6:33). Бу ваҹиб принсипә ујғун јашамаг үчүн, ола билсин, сәнә һәјатыны садәләшдирмәк вә ја әјләнҹәләрә сәрф етдијин вахты хидмәтә ајырмаг лазым ҝәләҹәк. Сөзсүз ки, әјләнҹәләрин вә диҝәр мәшғулијјәтләрин өз јери вар вә онлар хидмәтдә иштирак етмәмәк үчүн әсаслы сәбәб дејил. Аллаһын хидмәтчиләринин һәјатында биринҹи јери Падшаһлыг иши тутур.
«Мән баҹармарам». Ола билсин, сән дүшүнүрсән ки, хош хәбәри тәблиғ етмәк үчүн лазыми баҹарығын јохдур. Гәдимдә Јеһованын бәзи садиг хидмәтчиләри дә Ондан алдыглары тапшырыгларын өһдәсиндән ҝәлә билмәјәҹәкләрини дүшүнүрдүләр. Елә ҝөтүрәк Муса пејғәмбәри. Јеһова она хүсуси тапшырыг верәндә о деди: «Ја Худавәнд, мән нә кечмишдә, нә дә гулунла данышдығын вахт натиг олмамышам, чүнки дилим ағыр, сәлис данышмајан бир адамам». Јеһованын она үрәк-дирәк вермәсинә бахмајараг, о, јенә дә дедијини деди: «Ја Худавәнд, јалварырам, башга адамы ҝөндәр» (Чых. 4:10—13). Бәс Јеһова нә етди?
О, Мусаны бу тапшырыгдан азад етмәди вә гардашы Һаруну она көмәкчи тәјин етди (Чых. 4:14—17). Бундан әлавә, Јеһова сонралар да она дајаг олур вә тапшырыгларынын өһдәсиндән ҝәлә билмәси үчүн ону һәр шејлә тәмин едирди. Сән дә әмин ола биләрсән ки, Јеһова сәнә хидмәтдә көмәк едәҹәк тәҹрүбәли һәмиманлылар јетирәҹәк вә үстәлик, Мүгәддәс Китабда дејилдији кими, һәвалә етдији иш үчүн сәни јарарлы едәҹәк. (2 Кор. 3:5; «Һәјатымын ән хошбәхт илләри» адлы чәрчивәјә бах.)
«Хәтримә дәјибләр». Бәзиләри киминсә онларын хәтринә дәјдијинә ҝөрә тәблиғ етмәји вә ја јығынҹаг ҝөрүшләринә ҝәлмәји дајандырмышлар. Онлар елә дүшүнүрләр ки, бу, Јеһоваја хидмәт етмәмәк үчүн әсаслы сәбәбдир. Дүздүр, башгалары бизим хәтримизә дәјәндә мәјуслуға гапыла биләрик, анҹаг бу, хидмәтимизи дајандырмаға әсас верирми? Павеллә әмәкдашы Барнаба арасындакы фикир ајрылығы «гызғын чәкишмәјә» сәбәб олду вә ола билсин, бундан сонра онларын арасында инҹиклик јаранды (Һәв. иш. 15:39). Бәс буна ҝөрә онлар хидмәтләрини дајандырдылармы? Гәтијјән!
Ејнилә, һәмиманлын хәтринә дәјәндә унутма ки, сәнин дүшмәнин гејри-камил баҹын вә ја гардашын јох, сәни ‘удмаг’ истәјән Шејтан Иблисдир. Лакин ‘ҝүҹлү иманла она мүгавимәт ҝөстәрсән’, ҹәһдләри боша чыхаҹаг (1 Пет. 5:8, 9; Галат. 5:15). Нә гәдәр ки белә иманын вар, ‘һеч вахт пешман олмајаҹагсан’ (Ром. 9:33).
Имканларымыз мәһдуд оланда
Ҝөрдүјүмүз кими, Мүгәддәс Китаб, хош хәбәри тәблиғ етмәк иши дә дахил олмагла, Јеһованын конкрет әмрләринә табе олмамағымыз үчүн һеч бир әсас вермир. Анҹаг хидмәтдә аз иштирак етмәјимизә әсаслы сәбәбләр ола биләр. Мәсәлән, онлардан бири Мүгәддәс Китабын үзәримизә гојдуғу мәсулијјәтләрдир. Һәмчинин хидмәтдә истәдијимиз гәдәр иштирак етмәмәјимизә бәзән чох јорғун вә ја бәрк хәстә олмағымыз сәбәб ола биләр. Амма Аллаһын Кәламы бизи әмин едир ки, Јеһова үрәјимиздәки арзулары ҝөрүр вә бизим мәһдудијјәтләримизи нәзәрә алыр (Мәз. 103:14; 2 Кор. 8:12).
Буна ҝөрә дә еһтијатлы олмалыјыг ки, бу мәсәләләрдә һәм өзүмүзү, һәм дә башгаларыны сәрт шәкилдә мүһакимә етмәјәк. Һәвари Павел бу һагда дејир: «Сән кимсән ки, башгасынын нөкәрини мүһакимә едирсән? Ағасы өзү биләр, нөкәри өнүндә дурсун вә ја јыхылсын» (Ром. 14:4). Өз шәраитимизи башгаларынынкы илә мүгајисә етмәкдәнсә, јадда сахламалыјыг ки, «һәр кәс өзүнә ҝөрә Аллаһын гаршысында ҹаваб верәҹәк» (Ром. 14:12; Галат. 6:4, 5). Хидмәтдә аз иштирак етмәјимизин сәбәбләрини Јеһоваја дуада ачыглајанда буну тәмиз виҹданла етмәк истәјирик (Ибр. 13:18).
Нәјә ҝөрә Јеһоваја хидмәт севинҹ ҝәтирир?
Шәраитимиздән асылы олмајараг, һамымыз Јеһоваја үрәкдән ҝәлән севинҹлә хидмәт едә биләрик, чүнки О, биздән ҝүҹүмүздән артыг һеч нә тәләб етмир. Нәјә ҝөрә белә демәк олар?
Аллаһын Кәламында дејилир: «Әлиндән јахшылыг ҝәлирсә, буна лајиг инсанлардан әсирҝәмә» (Сүл. мәс. 3:27). Бу ајәдән Јеһованын тәләбләри барәдә нә өјрәндин? О, һеч вахт биздән башгалары гәдәр хидмәт етмәји тәләб етмир — О истәјир ки, биз ҝүҹүмүз чатан гәдәр Она хидмәт едәк. Нә гәдәр хидмәт етмәјимиздән асылы олмајараг, һәр биримиз Јеһоваја сәмими-гәлбдән хидмәт едә биләрик (Лука 10:27; Колос. 3:23).
[14-ҹү сәһифәдәки чәрчивә/шәкил]
«Һәјатымын ән хошбәхт илләри»
Һәтта физики вә ја емосионал хәстәликдән әзијјәт чәксәк дә, дәрһал хидмәтдә фәал шәкилдә иштирак едә билмәјәҹәјимиз гәнаәтинә ҝәлмәмәлијик. Канададан олан Ернест адлы бир гардашын нүмунәсинә нәзәр салаг.
Ернест пәлтәк олдуғундан чох утанҹаг иди. Әввәлләр о, тикинтидә ишләјирди. Лакин бел наһијәсиндән ҹидди хәсарәт алдыгдан сонра ишдән чыхмалы олду. Әлил олмасына бахмајараг, инди онун гаршысында әввәлкиндән даһа чох хидмәт етмәк имканы ачылды. Гардашлар јығынҹағы көмәкчи пионер хидмәтинә тәшвиг едәндә онун да үрәјиндә белә бир истәк јаранды. Лакин о зәнн едирди ки, бу хидмәт үчүн јарарлы дејил.
Көмәкчи пионер кими хидмәт едә билмәјәҹәјини өзүнә сүбут етмәк үчүн о, бланк долдурду. Лакин ајлыг норманы јеринә јетирдијини ҝөрәндә ҝөзләринә инанмады. Бундан сонра өз-өзлүјүндә белә нәтиҹә чыхарды: «Икинҹи дәфә бу, мәндә алынмајаҹаг». Бир даһа буна әмин олмагдан өтрү нөвбәти ај үчүн бланк долдурду. Бу дәфә дә онда һәр шеј алынды.
Бир ил көмәкчи пионер кими хидмәт етдикдән сонра о деди: «Мән там әминәм ки, һеч вахт даими пионер ола билмәјәҹәјәм». Јенидән буну өзүнә сүбут етмәк үчүн даими пионер бланкыны долдурду. Бир ил даими пионер кими хидмәт етмәјә мүвәффәг оланда о чох тәәҹҹүбләнди. Буна ҝөрә дә хидмәтини давам етдирмәк гәрарына ҝәлди. Анҹаг хәстәлијинин ағырлашмасы нәтиҹәсиндә о, һәјатыны итирди. Ернест өмрүнүн ахырынадәк ики ил әрзиндә даими пионер кими хидмәт етди. Өлүмүндән габаг онун јанына ҝәлән инсанлара тез-тез ҝөз јашлары илә дејәрди: «Јеһоваја пионер кими хидмәт етдијим бу илләр һәјатымын ән хошбәхт илләри иди».
[13-ҹү сәһифәдәки шәкил]
Хидмәтимизә мане олан истәнилән әнҝәли аша биләрик
[15-ҹи сәһифәдәки шәкил]
Јеһоваја шәраитимизин јол вердији гәдәр вә бүтүн үрәкдән хидмәт едәндә О, биздән разы галыр