Јеһованын јолларыны өјрәнирик

«Јолуну мәнә аҝаһ елә ки, Сәни таныјым» (ЧЫХЫШ 33:13).

1, 2. а) Муса ибрани гардашынын мисирли тәрәфиндән дөјүлдујүнү ҝөрәндә, нәјә ҝөрә ону мүдафиә етди? б) Јеһованын јахшы хидмәтчиси олмаг үчүн Муса нәји өјрәнмәли иди?

МУСА фир’онун евиндә бөјүмүш вә Мисирин һәр бир елминә өјрәдилмишди. Лакин о, мисирли олмадығыны билирди. Онун валидејнләри ибрани идиләр. Муса гырх јашында икән гардашлары олан Исраил оғулларынын неҹә јашадыгларына бахмаға чыхыр. О, бир мисирлинин ибрани илә пис рәфтар етдијини ҝөрәндә, буна лагејд галмајыб мисирлини өлдүрүр. Муса Јеһованын халгынын тәрәфиндә дурмаг гәрарына ҝәлир. О фикирләшир ки, Аллаһ ондан гардашларыны азад етмәк үчүн истифадә едир (Һәвариләрин ишләри 7:21-25; Ибраниләрә 11:24, 25). Бу гәтл барәдә сарајда мә’лум оланда Муса, һәјатыны хилас етмәк үчүн гачмаг мәҹбуријјәтиндә галыр, чүнки баш вермиш һадисәдән сонра мисирлиләр ону үсјанкар һесаб едирдиләр (Чыхыш 2:11-15). Јеһованын јахшы хидмәтчиси олмаг үчүн, Муса Онун јолларыны даһа јахшы өјрәнмәли иди. Бәс о буну истәјирдими? (Мәзмур 25:9).

² Нөвбәти 40 ил әрзиндә Муса бир гачаг кими јашајыр вә гојун отарырды. Ибрани гардашларына гаршы кин сахламаг әвәзинә о, Аллаһын јол вердијинә табе олур. Муса бүтүн бу илләр әрзиндә јахшы нијјәтини һеч кимин гијмәтләндирмәдијини дүшүнмүш олса да, Јеһованын ону формалашдырмасыны истәјирди. Бир гәдәр сонра, өзүнү тә’рифләмәк фикриндә олмајараг, о, Аллаһын мүгәддәс руһунун тә’сири алтында јазмышды: «Муса јер үзүндә јашајан бүтүн адамлардан даһа һәлим бир инсан иди» (Сајлар 12:3). Буна ҝөрә дә, Јеһова ону хүсуси бир тапшырыға лајиг ҝөрмүшдүр. Әҝәр биз дә һәлим олмаға чалышырыгса, Јеһова бизә дә хејир-дуа верәҹәк (Сефанја 2:3).

Хүсуси тапшырыг

3, 4. а) Муса Јеһовадан һансы тапшырығы алыр? б) Мусаја һансы көмәк верилир?

³ Бир ҝүн Јеһованы тәмсил едән мәләк Сина јарымадасында јерләшән Хорев дағынын јанында Мусаја мүраҹиәт едәрәк дејир: «Һәгигәтән, Мән Мисирдә олан халгымын әзијјәтини ҝөрдүм, нәзарәтчиләрин әлиндән етдикләри фәрјадларыны ешитдим вә дәрдләринә нәзәр салдым. Мән она ҝөрә ҝәлдим ки, онлары Мисирлиләрин әлиндән гуртарыб бу өлкәдән чыхарым вә ҝениш, не’мәтли бир дијара, сүд вә бал ахан торпаға... апарым» (Чыхыш 3:2, 7, 8). Бәли, Јеһованын Муса үчүн тапшырығы вар иди, лакин о, һәмин тапшырығы мәһз Јеһованын истәдији кими јеринә јетирмәли иди.

⁴ Јеһованын мәләји давам едир: «Буна ҝөрә дә ҝет. Сәни фир’онун јанына ҝөндәрирәм ки, халгым Исраил өвладларыны Мисирдән чыхарасан». Муса тәрәддүд едирди. О елә һесаб едирди ки, бу тапшырығы јеринә јетирмәк үчүн јарамыр. Һәгигәтән дә, Аллаһын көмәји олмадан о, бу ишин өһдәсиндән ҝәлә билмәзди. Лакин Јеһова Мусаны әмин едир: «Мән сәнинләјәм» (Чыхыш 3:10-12). Јеһова Мусаја онун һәгигәтән дә Аллаһ тәрәфиндән ҝөндәрилдијини сүбут едән бөјүк әламәтләр ҝөстәрмәк гүввәсини верди. Гардашы Һарун көмәкчи кими ону мүшајиәт етмәли иди. Јеһова сөз верди ки, онлара нә демәји вә нә етмәји өјрәдәҹәк (Чыхыш 4:1-17). Муса бу тапшырығы сәдагәтлә јеринә јетирәҹәкми?

5. Исраиллиләрин әһвал-руһијјәси нәјә ҝөрә Муса үчүн сынаг иди?

⁵ Исраилин ағсаггаллары башланғыҹда Мусаја вә Һаруна инандылар (Чыхыш 4:29-31). Лакин бир гәдәр сонра, «исраилли ҝөзәтчиләр»и «сиз бизи фир’онла ә’јанларынын ҝөзүндә ијрәнҹ етдиниз» дејәрәк, Муса вә Һаруна гаршы ҝилеј-ҝүзар етдиләр (Чыхыш 5:19-21; 6:9). Исраиллиләр Мисири тәрк етдикдән сонра онларын ардынҹа дүшән дөјүш арабаларыны ҝөрәндә чох горхдулар. Гырмызы дәниз илә мисирлиләрин дөјүш арабалары арасында галдыгларыны ҝөрән исраиллиләр өзләрини тәләјә дүшмүш кими һисс едиб, Мусаны иттиһам етмәјә башладылар. Мусанын јериндә олсајдын, сән нә едәрдин? Исраиллиләрин ҝәмиләри олмаса да, Јеһованын әмри илә Муса халга дүшәрҝәләрини јығыб јола чыхмаг үчүн һазыр олмаларыны бујурду. Сонра Аллаһ Гырмызы дәнизин суларыны јарды вә дәнизин дибини гурутду. Беләликлә исраиллиләр ону кечә билдиләр (Чыхыш 14:1-22).

Хиласдан даһа ваҹиб мә’на дашыјан чыхыш

6. Јеһова Мусаја тапшырыг верәркән нәји вурғулајыр?

⁶ Мусаја тапшырыг верәркән, Јеһова Өз адынын ваҹиблијини вурғулады. Буна ҝөрә дә, бу ада вә онун архасында дуран Шәхсә лајиг еһтирам бәсләмәк һәјати ваҹиб иди. Муса Јеһовадан ады һаггында сорушанда, О, ҹаваб верир: «Мән олмаг истәдијим Кәс олаҹағам». Исраил оғулларына исә Муса белә демәли иди: «Әҹдадларынызын Аллаһы, Ибраһимин Аллаһы, Исһагын Аллаһы, Јагубун Аллаһы Јеһова мәни сизин јаныныза ҝөндәрди». Јеһова әлавә едир: «Әбәдијјән адым будур, нәсилдән-нәслә Мәни бу ад илә јада салаҹаглар» (Чыхыш 3:13-15, ЈД). Бу ҝүнә гәдәр Аллаһын хидмәтчиләри Ону бу адла чағырырлар (Јешаја 12:4, 5; 43:10-12).

7. Фир’онун тәкәббүрлүјүнә бахмајараг, Аллаһ Мусаја нә бујурур?

⁷ Муса илә Һарун фир’онун гаршысында дурараг она Јеһованын тәләбләрини чатдырырлар. Лакин фир’он тәкәббүрлә дејир: «Јеһова кимдир ки, Исраили бурахмаг үчүн онун сөзүнү динләјим? Јеһованы танымырам вә Исраили дә бурахмырам» (Чыхыш 5:1, 2, КМ). Фир’он дашүрәкли вә һијләҝәр иди, лакин Јеһова Мусаны тәкрар-тәкрар онун јанына ҝөндәрир (Чыхыш 7:14-16, 20-23; 8:1, 2, 20). Муса фир’онун гәзәбләндијини ҝөрүр. Онунла едәҹәји нөвбәти сөһбәт јахшы нәтиҹә верәҹәкми? Исраил халгы сәбирсизликлә азад олунмағы ҝөзләјир. Фир’он исә инадкарлыг ҝөстәрир. Бу вәзијјәтдә сән неҹә давранардын?

8. Јеһова фир’онла олан мүнагишәни неҹә һәлл етди, бу һансы фајданы ҝәтирди вә бунун бизә һансы аидијјәти вар?

⁸ Нөвбәти дәфә Муса фир’онун јанына бу сөзләрлә ҝәлир: «Ибраниләрин Аллаһы Рәбб [«Јеһова», ЈД] белә дејир: “Мәнә ибадәт етмәк үчүн халгымы бурах!”» Аллаһ әлавә едир: «Әҝәр инди әлими узадыб сәни вә халгыны гырғынла ҹәзаландырмыш олсајдым, јер үзүндән силиниб атылардын. Амма она ҝөрә сәни горујуб сахладым ки, Өз ҝүҹүмү сәнә ҝөстәрим вә адым бүтүн дүнјаја е’лан едилсин» (Чыхыш 9:13-16). Дашүрәкли фир’онун нүмунәси әсасында Јеһова Она гаршы дурмаг истәјән һәр кәсә — о ҹүмләдән Исанын «бу дүнјанын рәиси» адландырдығы Иблисә Өз гүввәсини ҝөстәрмәк истәјирди (Јәһја 14:30; Ромалылара 9:17-24). Пејғәмбәрлик едилдији кими, Јеһованын ады бүтүн дүнјада бәјан едилди. Онун чох сәбирли олмасынын сајәсиндә исраиллиләр хилас олунду вә бир чох мүхтәлиф гәбиләләрдән олан инсанлар Јеһоваја ибадәтдә онлара гошулдулар (Чыхыш 9:20, 21; 12:37, 38). О вахтдан бәри Јеһованын адынын бәјан едилмәси, һәгиги ибадәтә гошулан милјонларла инсанлара фајда ҝәтирир.

Гијамчы халгын башчысы

9. Мусанын башчылыг етдији халг Јеһоваја гаршы неҹә һөрмәтсизлик ҝөстәрди?

⁹ Ибраниләр Аллаһын адыны билирдиләр. Муса онларла сөһбәт едәндә һәр дәфә Аллаһын адыны истифадә едирди, лакин онлар бу адын архасында дуран Шәхсә лајиг олдуғу еһтирамы һәмишә тәзаһүр етдирмирдиләр. Јеһова исраиллиләри Мисирдән мө’ҹүзәли сурәтдә азад етдикдән сонра, онлар истәдикләри вахт ичмәли су тапмадыгда нә баш вердији јадыныздадырмы? Онлар Мусадан ҝилеј-ҝүзар етдиләр. Сонра исә гидаја ҝөрә шикајәтләнмәјә башладылар. Муса хәбәрдар етди ки, онларын ҝилеј-ҝүзары она вә Һаруна гаршы јох, Јеһоваја гаршыдыр (Чыхыш 15:22-24; 16:2-12). Сина дағынын јахынлығында Јеһованын исраиллиләрә Ганун вермәси фөвгәлтәбии һадисәләрлә мүшајиәт едилирди. Лакин инадҹыл халг гызыл дана дүзәлдиб она ибадәт етмәјә башлады вә үстәлик буну «Рәбб [«Јеһова», ЈД] наминә бајрам» адландырды (Чыхыш 32:1-9).

10. Мусанын Чыхыш 33:13 ајәсиндә јазылмыш хаһиши нәјә ҝөрә мәсиһчи ағсаггаллары үчүн хүсуси мараг кәсб едир?

¹⁰ Муса Јеһованын дикбаш адландырдығы халга неҹә башчылыг едирди? О, Јеһовадан хаһиш едәрәк дејир: «Әҝәр мән, доғрудан да, Сәнин ҝөзүндә лүтф тапмышамса, јалварырам, өз јолуну мәнә аҝаһ елә ки, Сәни таныјым вә ҝөзүндә лүтф тапым» (Чыхыш 33:13). Јеһованын мүасир Шаһидләринә ҝәлдикдә исә, мәсиһчи ағсаггаллары Исраил халгындан олдугҹа һәлим олан бир сүрүјә чобанлыг едирләр. Онлар да бу ҹүр дуа едирләр: «Ја Рәбб, јолларыны мәнә ҝөстәр, ардынҹа ҝетмәји мәнә өјрәт» (Мәзмур 25:4). Јеһованын јолларыны өјрәнмәклә нәзарәтчиләр һәр һансы бир мәсәләни Мүгәддәс Јазыларын әсасында Онун кими һәлл етмәји өјрәнирләр.

Јеһова халгындан нә ҝөзләјир?

11. Јеһова Мусаја һансы рәһбәрлији верди вә нәјә ҝөрә бу рәһбәрлик бизим үчүн мараглыдыр?

¹¹ Јеһова Сина дағынын јанында халгындан ҝөзләдикләрини шифаһи сурәтдә ачыглады. Даһа сонра Муса Он әмрдән ибарәт олан јазылы ики лөвһә алды. Муса дағдан енәндә исраиллиләрин төкмә данаја ибадәт етдикләрини ҝөрүб гәзәб ичиндә бу лөвһәләри елә атды ки, онлар парча-парча олду. Јеһова Мусанын јондуғу даш лөвһәләр үзәринә Он әмри јенидән јазды (Чыхыш 32:19; 34:1). Бу әмрләр биринҹи дәфә јазылан әмрләрдән фәргләнмирди. Муса онлара мүвафиг давранмалы иди. Аллаһ Мусаја Өзү һаггында башга шејләри дә ачыглады вә бу она Јеһованын нүмајәндәси кими өзүнү неҹә апармалы олаҹағыны ҝөстәрди. Мәсиһчиләр Мусанын гануну алтында дејилләр. Лакин Јеһованын Мусаја ачыгладығы әсас дәјишмәз принсипләр Ону севән һәр бир кәс үчүн бу ҝүн дә рәһбәрлик кими хидмәт едир (Ромалылара 6:14; 13:8-10). Ҝәлин онлардан бә’зиләрини нәзәрдән кечирәк.

12. Јеһованын хүсуси сәдагәт тәләб етмәси исраиллиләр үчүн һансы мә’наны дашыјырды?

¹² Јеһоваја хүсуси сәдагәт ҝөстәрин. Јеһова исраиллиләрә ‘гысганҹ Аллаһ’ олдуғуну, јә’ни хүсуси сәдагәт тәләб етдијини бәјан етди (Чыхыш 20:2-5). Исраиллиләр Јеһованын һәгиги Аллаһ олдуғуна даир чох сүбутлар ҝөрмүшдүләр (Ганунун тәкрары 4:33-35). Јеһова ајдын ҝөстәрди ки, диҝәр халгларын нә етмәсиндән асылы олмајараг, О, халгынын бүтпәрәстлијин вә ја спиритизмин һәр һансы нөвүнә гуршанмасына ҝөз јуммајаҹаг. Онларын Јеһоваја сәдагәти садәҹә формал характер дашымалы дејилди. Исраиллиләрин һамысы Јеһованы бүтүн гәлбләри, бүтүн варлығы вә вар ҝүҹү илә севмәли идиләр (Ганунун тәкрары 6:5, 6). Бу онларын сөһбәтләринә вә әмәлләринә, бир сөзлә, һәјатларынын һәр бир саһәсинә тә’сир етмәли иди (Левилиләр 20:27; 24:15, 16; 26:1). Јеһованын хүсуси сәдагәт тәләб етдијини Иса Мәсиһ дә ајдын ҝөстәрмишди (Марк 12:28-30; Лука 4:8).

13. Нәјә ҝөрә исраиллиләр Аллаһа там табе олмалы идиләр вә буну биз нәјә ҝөрә едирик? (Ваиз 12:13).

¹³ Јеһованын әмрләринә там риајәт ет. Исраил халгынын, Јеһова илә әһд бағлајаркән Она һәр шејдә итаәткар олмаға анд ичдикләри барәдә хатырлатмаја еһтијаҹлары варды. Чох шеј онларын өз ихтијарына верилмишдир, лакин һәјатын Ганун тәрәфиндән тәнзимләнән саһәләриндә онлар Аллаһа табе олмалы идиләр. Бунунла онлар Аллаһы севдикләрини ҝөстәрә биләрдиләр. Бундан әлавә, Јеһованын тәләбләри һәм онларын, һәм дә ушагларынын рифаһына хидмәт едирди (Чыхыш 19:5-8; Ганунун тәкрары 5:27-33; 11:22, 23).

14. Руһани шејләрә үстүнлүк вермәјин ваҹиблијини Јеһова исраиллиләрә неҹә ҝөстәрди?

¹⁴ Руһани ишләри биринҹи јерә гој. Исраиллиләр јол вермәли дејилдиләр ки, ҹисмани еһтијаҹлары һаггындакы гајғылар онларын диггәтини руһани шејләрдән јајындырсын. Исраиллиләрин һәјаты јалныз ҝүндәлик гајғылардан ибарәт олмалы дејилди. Јеһова онларын јалныз руһани ишләрлә мәшғул олмалары үчүн һәфтәдә бир ҝүн ајырмышдыр. Бу мүгәддәс ҝүн иди (Чыхыш 35:1-3; Сајлар 15:32-36). Аллаһ һәмчинин һәр ил хүсуси мүгәддәс топлантылар үчүн дә вахт ајрылмасыны бујурмушдур (Левилиләр 23:4-44). Бүтүн бунларын сајәсиндә исраиллиләр Јеһованын бөјүк гүдрәтли ишләрини јада сала, јолларыны таныја вә хејирхаһлығына ҝөрә миннәтдарлыгларыны ҝөстәрә биләрдиләр. Иманларыны ифадә етмәклә онлар Јеһованын гаршысындакы еһтирамлы горхуларыны горујуб сахлаја, Она олан мәһәббәтләрини артыра вә јоллары илә јеримәјә давам едә биләрдиләр (Ганунун тәкрары 10:12, 13). Бу ҝөстәришләрдәки фајдалы принсипләр Јеһованын хидмәтчиләринә бу ҝүн дә хејир-дуалар ҝәтирир (Ибраниләрә 10:24, 25).

Јеһованын хүсусијјәтләрини баша дүшмәк

15. а) Јеһованын хүсусијјәтләринә ҝөрә миннәтдарлыг Мусаја неҹә көмәк едирди? б) Јеһованын хүсусијјәтләри үзәриндә дәриндән дүшүнмәкдә бизә һансы суаллар көмәк едә биләр?

¹⁵ Јеһованын хүсусијјәтләринә ҝөрә миннәтдарлыг да Мусаја Исраил халгыны идарә етмәкдә көмәк едирди. Чыхыш 34:5-7 ајәләриндә Аллаһын Мусаја сөјләдикләри сөзләр јазылыб: «Рәбб Мәнәм, рәһмли вә лүтфкар Рәбб Аллаһам. Мән һәдсиз сәбирли, бол мәһәббәтли вә сәдагәтлијәм, минләрлә нәслинә мәһәббәтими ҝөстәрәрәм, ҹәзаны, асилији вә ҝүнаһы бағышлајарам; лакин ҹәзасыз гојмарам, аталарын ҹәзасыны үчүнҹү-дөрдүнҹү нәслә гәдәр нәвә-нәтиҹәләринә верәрәм». Бу сөзләр үзәриндә дәриндән дүшүнмәк үчүн вахт ајыр. Өзүндән соруш: бу хүсусијјәтләрдән һәр бири ајрылыгда нә мә’на дашыјыр? Јеһова ону неҹә тәзаһүр етдирир? Мәсиһчи ағсаггаллар бу хүсусијјәти неҹә тәзаһүр етдирә биләрләр? Бу хүсусијјәт бизим әмәлләримизә неҹә тә’сир ҝөстәрмәлидир? Ҝәлин бир нечә нүмунәни нәзәрдән кечирәк?

16. Аллаһын рәһминә ҝөрә миннәтдарлығы неҹә артырмаг олар вә бу нәјә ҝөрә ваҹибдир?

¹⁶ Јеһова ‘рәһмли вә лүтфкар Аллаһдыр’. Әҝәр баша дүшдүјүн дилдә «Мүгәддәс Јазыларын дәрк едилмәси» енсиклопедијасы варса, онда «рәһм» башлығы алтында јазылан парчаны охумаг олар. Ја да «Ҝөзәтчи Гүлләси нәшрләринин индекси» вә ја «Ҝөзәтчи Гүлләсинин китабханасы»нын компакт дискинин көмәји илә мүвафиг арашдырма апармаг оларa. Мүгәддәс Китаб ајәләриндә рәһм һаггында дејиләнләри тапмаг үчүн һәмчинин Мүгәддәс Китаб симфонијасындан истифадә ет. Ҝөрәҹәксән ки, Јеһова бу хүсусијјәти јалныз ҹәзаны јүнҝүнлләшдирмәклә дејил, дәрин шәфгәт ҝөстәрмәклә дә тәзаһүр етдирир. Рәһмлилик Јеһованы халгынын рифаһы наминә һәрәкәт етмәјә тәшвиг едир. Бу ондан бәлли олур ки, Вә’д едилмиш дијара ҝетдикләри заман Аллаһ исраиллиләрин ҹисмани вә руһани еһтијаҹларыны тә’мин етмәк үчүн лазым олан һәр шеји вермишди (Ганунун тәкрары 1:30-33; 8:4). Исраиллиләр сәһвләрә јол верәндә Јеһова рәһм ҝөстәрәрәк онлары бағышлајырды. О Өз гәдим халгына гаршы рәһмли иди. Буна ҝөрә дә, Аллаһын мүасир хидмәтчиләринин бир-биринә гаршы рәһмли олмалары неҹә дә ваҹибдир! (Матта 9:13; 18:21-35).

17. Јеһованын лүтфүнә ҝөрә миннәтдарлығымыз Ону неҹә иззәтләндирир?

¹⁷ Јеһова һәм рәһмли, һәм дә лүтфкардыр. Лүғәтдә «лүтфкар» сөзүнүн мә’насына бах. Буну Јеһованын бу ҝөзәл кејфијјәти һаггында бәһс едилән Мүгәддәс Китаб ајәләри илә мүгајисә ет. Мүгәддәс Китаб ҝөстәрир ки, Јеһованын лүтфү өзүнә Онун халгы арасында јохсуллугдан әзијјәт чәкәнләр һагда мәһәббәтлә долу гајғыны дахил едир (Чыхыш 22:26, 27). Бу дүнјада һәр бир инсан, о ҹүмләдән мүһаҹирләр чәтинликләрлә гаршылаша биләрләр. Јеһова халгына бу ҹүр инсанлара гаршы гәрәзсиз вә хејирхаһлыгла јанашмағы өјрәдәндә, онлара өзләринин нә вахтса Мисирдә гәриб олдуғуну хатырладырды (Ганунун тәкрары 24:17-22). Бәс Аллаһын хидмәтчиләри бу ҝүн неҹә давранырлар? Лүтфкарлыг ҝөстәрмәјимиз бизи бирләшдирир вә башгаларыны Јеһоваја ибадәт етмәјә ҹәлб едир (Һәвариләрин ишләри 10:34, 35; Вәһј 7:9, 10).

18. Јеһованын исраиллиләрә гоншу халглара даир дедикләриндән нә өјрәнә биләрик?

¹⁸ Диҝәр халглардан олан инсанлара гаршы ҝөстәрилән гонагпәрвәрлик исраиллиләрин Јеһоваја вә Онун әхлаги ганунларына дујдуглары мәһәббәти әвәз етмәли дејилди. Јеһова исраиллиләри әтрафларында јашајан халгларын јоллары илә ҝетмәмәјә, онларын дини адәт-ән’әнәләри вә әхлагсыз һәјат тәрзләрини мәнимсәмәмәјә өјрәдирди (Чыхыш 34:11-16; Ганунун тәкрары 7:1-4). Бу бизләрә дә аиддир. Јеһова Аллаһымыз мүгәддәс олдуғу үчүн, биз дә мүгәддәс олмалыјыг (1 Петер 1:15, 16).

19. Јеһованын ҝүнаһа бәсләдији мүнасибәти баша дүшмәјимиз бизи нәдән мүдафиә едәҹәк?

¹⁹ Јеһованын јолларыны Муса јахшы баша дүшсүн дејә, Аллаһ она билдирди ки, ҝүнаһа ҝөз јуммаса да, ҝеҹ гәзәбләнир. О, инсанлара Онун тәләбләрини өјрәнмәјә вә онлара мүвафиг јашамаға вахт верир. Ҝүнаһ ишләдән инсан төвбә едәндә, Јеһова ону бағышлајыр, лакин ҹидди ҝүнаһа ҝөрә лајиг олдуғу ҹәзадан азад етмир. Аллаһ Мусаны хәбәрдар етмишдир ки, исраиллиләрин јахшы вә ја пис давранышы ҝәләҹәк нәсилләринә тә’сир едә биләр. Јеһованын јолларыны баша дүшмәјимиз өз сәһвләримизин ҝәтирдији нәтиҹәләрин уҹбатындан әзијјәт чәкдијимизә ҝөрә Ону иттиһам етмәкдән вә ја јубандығыны дүшүнмәкдән горујаҹаг.

20. Баҹы-гардашларла вә хидмәтдә раст ҝәлдијимиз адамларла дүз рәфтар етмәкдә бизә нә көмәк едә биләр? (Мәзмур 86:11).

²⁰ Әҝәр сән Јеһова вә Онун јоллары барәдә биликләрини артырмаг истәјирсәнсә, онда Мүгәддәс Китабы арашдырмаға вә ону охујанда үзәриндә дүшүнмәјә давам ет. Јеһованын ҝөзәл хүсусијјәтләринин мүхтәлиф ҹәһәтләрини јахшы-јахшы тәдгиг ет. Өз һәјатыны Аллаһын нијјәтләринә мүвафиг гурараг, Онун хүсусијјәтләрини неҹә тәглид едә биләҹәјин барәдә дуа ет вә фикирләш. Бу сәни тәләләрдән гачынмаға, баҹы-гардашларла дүз рәфтар етмәјә вә башга инсанлара бизим чох ҝөзәл Аллаһымызы танымағы вә севмәји өјрәтмәјә көмәк едәҹәк.

[Һашијә]

Сиз нә өјрәндиниз?

• Тәвазөкарлыг Мусаја нәјә ҝөрә лазым иди вә бизим үчүн нәјә ҝөрә һәјати ваҹибдир?

• Јеһованын фир’онла Өз арасында олан мүнагишәни неҹә һәлл етмәсиндән биз нә өјрәндик?

• Муса, бу ҝүн дә өз гүввәсини итирмәјән һансы ваҹиб принсипләри өјрәнди?

• Јеһованын хүсусијјәтләрини даһа дәриндән неҹә өјрәнә биләрик?

[5-ҹи сәһифәдәки шәкил]

Муса Јеһованын сөзләрини фир’она сәдагәтлә чатдырырды.