«Мәсиһи һәјаты вә ибадәти. Иш дәфтәри» үчүн мәнбәләр
1—7 МАРТ
АЛЛАҺЫН КӘЛАМЫНДАКЫ ХӘЗИНӘ | САЈЛАР 7, 8
«Исраиллиләр бизә нәдә нүмунәдир?»
it-1-E с. 497, абз. 3
Иҹма
Исраилдә мәсул кишиләр чох вахт бүтүн халгы тәмсил едирдиләр (Үз 10:14). Беләликлә, Мүгәддәс чадыр гурулуб гуртаранда «гәбилә башчылары» бәхшишләр ҝәтирдиләр (Сј 7:1—11). Һәмчинин Нәһәмјанын да дөврүндә бағланан әһди халгын адындан каһинләр, лавилиләр вә халгын башчылары мөһүрләјиб тәсдигләди (Нә 9:38—10:27). Исраиллиләр сәһрада долашан вахт да «иҹманын башчылары, халгын башбиләнләри, нүфузлу адамлар» вар иди. Онлардан 250 нәфәри Гарун, Датан, Абирам вә Онла әлбир олуб, Мусаја вә Һаруна гаршы галхмышды (Сј 16:1—3). Јеһованын бујруғу илә Муса Исраилин ағсаггалы, башбиләни сајыб-билдији адамларын ичиндән 70 нәфәр сечмишди. Муса халгын јүкүнү тәк дашыја билмәдијиндән онлар Мусаја көмәк едәҹәкдиләр (Сј 11:16, 17, 24, 25). Лавилиләр 4:15 ајәсиндә иҹманын ағсаггалларындан данышылыр. Ҝөрүнүр, халгы тәмсил едәнләр халгын ағсаггаллары, башчылары, һакимләри вә мәмурлары иди (Сј 1:4, 16; Јш 23:2; 24:1).
it-2-E с. 796, абз. 1
Рубән
Исраиллиләрин дүшәрҝәсиндә рубәнлиләр Мүгәддәс чадырдан ҹәнубда дүшәрҝә салмышдылар. Онларын бир тәрәфиндә Шәмун гәбиләси, диҝәр тәрәфиндә исә Ҹад гәбиләси дүшәрҝә салмышды. Јола дүшәндә Рубәнин башчылыг етдији бу үчгәбиләли бөлүм Јәһуда, Јәсакир вә Зәбулун гәбиләсиндән ибарәт үчгәбиләли бөлүмүн ардынҹа ҝедирди (Сј 2:10—16; 10:14—20). Губанҝаһын ачылышы ҝүнү дә гәбиләләр ејни ардыҹыллыгла бәхшишләрини ҝәтирдиләр (Сј 7:1, 2, 10—47).
“Сајлар” китабындан диггәтәлајиг фикирләр
8:25, 26. Јашлы левилиләр мүтләг хидмәти дајандырырдылар, бунунла бу кишиләрин јашына һөрмәт едилир, һәмчинин левилиләрә мәхсус олан вәзифә башга мүнасиб адамлара һәвалә олуна биләрди. Бунунла белә, јашлылар башга левилиләрә көнүллү көмәк едә биләрдиләр. Падшаһлығын тәблиғчиләри үчүн јаш мәһдудијјәти олмаса да, бу ганунун әсасыны тәшкил едән принсип бизә чох шеј өјрәдир. Әҝәр мәсиһчи гоҹалыг уҹбатындан мүәјјән вәзифәләри јеринә јетирмәк игтидарында дејилсә, о, ҝүҹү чатан хидмәт нөвүндә иштирак едә биләр.
Һикмәт хәзинәсиндән инҹиләр
it-1-E с. 835
Илк оғул; илкин
Исраиллиләрин илк доғулан оғуллары ҝәләҹәјин нәсил башчылары олдугларындан онлар бүтүн халгы тәмсил едирдиләр. Јеһова бүтүн Исраил халгыны «илки» адландырмышды. Ибраһимлә бағладығы әһдә ҝөрә онлары халг олараг илки һесаб едирди (Чх 4:22). Илк доғулан оғулларын һәјатыны горудуғу үчүн Јеһова белә бир әмр вермишди: «Исраиллиләрин ичиндә киши ҹинсиндән олан бүтүн илкинләри Мәним үчүн ајырын. Илк доғулан оғлан ушаглары, еләҹә дә һејванларын еркәк балаларындан биринҹиси Мәнә мәхсусдур» (Чх 13:2). Беләликлә, илк оғуллар Аллаһа һәср олунмушдулар.
8—14 МАРТ
АЛЛАҺЫН КӘЛАМЫНДАКЫ ХӘЗИНӘ | САЈЛАР 9, 10
«Јеһова халгына неҹә рәһбәрлик едир?»
it-1-E с. 398, абз. 3
Дүшәрҝә
Бу бөјүк дүшәрҝә бир јердән башга јерә ҝедәндә (Сајлар китабынын 33-ҹү фәслиндә Муса дүшәрҝә салдыглары тәхминән 40 јерин адыны чәкир) онун мүкәммәл шәкилдә тәшкил олундуғу ҝөрүнүрдү. Булуд Мүгәддәс чадырын үстүндә дајаныб дуранда дүшәрҝә олдуғу јердә галырды. Елә ки булуд галхырды, дүшәрҝә дә тәрпәнирди. «Онлар Јеһованын әмри илә дүшәрҝә салар, Јеһованын әмри илә дә јола дүшәрдиләр» (Сј 9:15—23). Јеһованын әмрини исә дүшәрҝәјә дөјмә ҝүмүшдән дүзәлдилмиш ики кәрәнај васитәсилә чатдырырдылар (Сј 10:2, 5, 6). Кәрәнај сәси зилә-бәмә галхыб-дүшәндә дүшәрҝәни јығмаг лазым иди. Дүшәрҝәни биринҹи дәфә «икинҹи илин [б. е. ә. 1512-ҹи ил] икинҹи ајынын ијирминҹи ҝүнүндә» јығдылар. Башда әһд сандығы олмагла әввәлҹә Јәһуда гәбиләсинин башчылыг етдији үчгәбиләли бөлүм јола дүшдү. Бу бөлүмдә Јәһуда гәбиләсинин ардынҹа Јәсакир, сонра исә Зәбулун гәбиләси ҝедирди. Онларын ардынҹа Мүгәддәс чадырын мүәјјән һиссәләрини дашыјан Һирсән вә Мерар оғуллары ҝедирди. Сонра Рубәнин башчылыг етдији үчгәбиләли бөлүм ҝедирди. Бу бөлүмдә Рубәнин ардынҹа Шәмун, сонра Ҹад ҝедирди. Онлардан сонра мүгәддәс мәканын әшјаларыны дашыјан кәһатлылар јола дүшдү. Онлардан да сонра Әфраимин башчылыг етдији үчүнҹү үчгәбиләли бөлүм ҝедирди. Бу бөлүмдә Әфраимин ардынҹа Мәнәссә, сонра Бинјамин ҝедирди. Ән нәһајәт, архада Данын башчылыг етдији бөлүм ҝедирди. Бу бөлүмдә Данын ардынҹа Ашир, сонра Нифталы ҝәлирди. Беләликлә, ики ән бөјүк вә ҝүҹлү бөлүмүн бири габагда, диҝәри исә архада ҝедирди (Сј 10:11—28).
Аллаһын неҹә рәһбәрлик етдијини дәрк едирсәнми?
Аллаһын рәһбәрлијини гијмәтләндирдијимизи неҹә ҝөстәрә биләрик? Һәвари Павел демишди: «Сизә рәһбәрлик едәнләрә итаәт един вә табе олун» (Ибр. 13:17). Лакин бу ајәдә јазылдығы кими давранмаг һәмишә асан олмур. Өзүнү Мусанын ҝүнләриндәки исраиллиләрин јеринә гој. Тәсәввүр ет ки, бир мүддәт сәһрада долашдыгдан сонра дирәк нөвбәти дајанаҹаг јеринә чатыр. О, бурада нә гәдәр дураҹаг? Бир ҝүн, бир һәфтә, јохса бир нечә ај? «Бүтүн әшјаларымы чыхарым-чыхармајым?» — дејә өз-өзүнә фикирләширсән. Ола билсин, сән әввәлҹә ән лазыми әшјалары чыхарырсан. Лакин бир нечә ҝүндән сонра әшјаларыны ешәләмәкдән безиб һамысыны чыхармаг гәрарына ҝәлирсән. Ишини гуртарана јахын бир дә ҝөрүрсән ки, дирәк галхыр вә сән јенә дә әшјаларыны јығмалысан. Әлбәттә, бу, асан олмазды. Буна бахмајараг, исраиллиләр булуд «галхан заман», јәни дәрһал јола дүшмәли идиләр (Сај. 9:17—22).
Бәс биз Аллаһдан ҝөстәришләр аланда онлары дәрһал јеринә јетиририк? Јохса вәрдиш етдијимиз кими давранмаға давам едирик? Инсанлара Мүгәддәс Китабы неҹә өјрәтмәјә, әҹнәбиләрә шаһидлик вермәјә, мүнтәзәм олараг аиләви ибадәтдә иштирак етмәјә, конгресдә әдәбли давраныша вә Хәстәханаларла әлагә комитәси илә әмәкдашлыг етмәјә даир верилән ән сон ҝөстәришләрлә танышыгмы? Мәсләһәтләри гәбул етмәјимиз дә Аллаһын рәһбәрлијинә ҝөрә миннәтдар олдуғумузу ҝөстәрир. Ваҹиб гәрарлар вермәли оланда биз өз ағлымыза архаланмырыг, әксинә, Јеһовадан вә Онун тәшкилатындан ҝөстәриш ҝөзләјирик. Балаҹа ушаг гасырға заманы валидејнләринә сығындығы кими, биз дә бу кешмәкешли дүнјада проблемләрлә үзләшәндә Јеһованын тәшкилатына сығынырыг.
Һикмәт хәзинәсиндән инҹиләр
it-1-E с. 199, абз. 3
Бирҝә топлашмаг
Бирҝә топлашмағын ваҹиблији. Јеһова тәдбирләр ҝөрмүшдү ки, исраиллиләр руһани фајда әлдә етмәк үчүн бир јерә топлашсын. Һәр ил кечирилән Пасха бајрамы илә бағлы ҝөстәришләр бу тәдбирләрдә иштирак етмәјин ваҹиблијини вурғулајырды. Әҝәр һансыса киши пак ола-ола вә сәфәрдә олмадығы һалда Пасханы гејд етмәздисә, өлдүрүлмәли иди (Сј 9:9—14). Һизгијјә падшаһ Јәһуда вә Исраил әһлини Јерусәлимә Пасханы гејд етмәјә чағыранда демишди: «Еј Исраил халгы,.. Јеһоваја дөнүн... Ата-бабаларыныз кими тәрс олмајын. Јеһоваја табе олун, Онун һәмишәлик пак етдији мүгәддәс мәканына ҝәлин, Аллаһыныз Јеһоваја гуллуг един. Белә етсәниз, Онун сизә гаршы аловланан гәзәби сөнәр... Аллаһыныз Јеһова рәһмли вә мәрһәмәтлидир. Она дөнсәниз, сиздән үз дөндәрмәјәҹәк» (2См 30:6—9). Исраиллиләр биләрәкдән бајрама ҝәлмәмәклә Аллаһдан үз дөндәрдикләрини ҝөстәрәҹәкдиләр. Мәсиһиләр Пасха кими бајрамлары гејд етмәсәләр дә, Булус онлары тәшвиг едирди ки, Аллаһын халгынын јығынҹагларындан галмасынлар. О демишди: «Ҝәлин бир-биримизә гаршы диггәтли олуб бир-биримизи мәһәббәтә вә јахшы ишләрә тәшвиг едәк, бәзиләринин вәрдиш етдији кими, јығынҹагларымыздан галмајаг, бир-биримизи руһландыраг вә о ҝүнүн јахынлашдығыны ҝөрдүкҹә бунлары даһа чох едәк» (Иб 10:24, 25).
15—21 МАРТ
АЛЛАҺЫН КӘЛАМЫНДАКЫ ХӘЗИНӘ | САЈЛАР 11, 12
«Нә үчүн дејинҝән олмамалыјыг?»
Унутган динләјиҹиләр олмајын
20 Мәсиһчиләрин бөјүк әксәријјәти ҹинси әхлагсызлыға ујмурлар. Буна бахмајараг, өзүмүздә дејинҝәнлији вәрдиш етдирмәкдән гачынмалыјыг, чүнки бу хүсусијјәтлә Јегованын наразылығыны газана биләрик. Павел бизә нәсиһәт едир: “Мәсиһи [“Јегованы”, ЈД] сынамајаг; онлардан [исраиллиләрдән] бә’зиләри елә етди вә иланларла һәлак едилдиләр. Дејинмәјин; онлардан бә’зиләри дејиндиләр вә өлдүрүҹү мәләк тәрәфиндән мәһв едилдиләр” (1 Коринфлиләрә 10:9, 10). Исраил халгы Мусаја вә Һаруна — һәтта Аллаһын өзүнә гаршы да дејинди: онлар мө’ҹүзәли шәкилдә верилән маннаја наразылыг етдиләр (Сајлар 16:41; 21:5). Онларын дејинмәләри, Јегова үчүн зинакарлыгдан азмы тәһгир олду? Мүгәддәс Китаб ҝөстәрир ки, дејинҝәнләрин әксәријјәти иланларла һәлак едилди (Сајлар 21:6). Бу һадисәдән әввәл исә 14 700-дән чох дејинҝән адам мәһв едилмишди (Сајлар 16:49). Ҝәлин, вердији бәхшишләрә һөрмәтсиз јанашмагла Јегованын сәбрини түкәндирмәјәк.
‘Һәр шеји шикајәтсиз един’
7 Исраиллиләрин әһвал-руһијјәси неҹә дә дәјишилди! Әввәлҹә онлар Мисир әсарәтиндән гуртулдугларына, о ҹүмләдән, Гырмызы дәнизи кечәрәк азад олундугларына ҝөрә миннәтдарлыгдан ирәли ҝәләрәк Јеһоваја һәмд нәғмәси охудулар (Чыхыш 15:1-21). Сәһрада нараһатлыгларла үзләшәндә вә кән’анлылар гаршысында горхуја дүшәндә исә, Аллаһын халгынын миннәтдарлығы наразылыға чеврилди. Азадлыға чыхдыглары үчүн Аллаһа шүкүр етмәк әвәзинә, Ону, јанлыш олараг мәһрумијјәт кими гијмәтләндирдикләри шејдә ҝүнаһландырдылар. Дејинмәкләри, онларда Јеһованын гајғысына ҝөрә һәгиги миннәтдарлығын чатышмадығыны ҝөстәрирди. Она ҝөрә дә Аллаһын: «Нә вахта гәдәр бу пис ҹамаат Мәнә гаршы дејинәҹәк?» демәси тәәҹҹүблү дејил (Сајлар 14:27; 21:5).
it-2-E с. 719, абз. 4
Дава
Дејинмәк. Дејинмәк инсанлары мәјус едир вә араја нифаг салыр. Исраиллиләр Мисирдән чыхандан аз сонра Јеһовадан ҝилејләнмәјә, Онун Муса вә Һарун васитәсилә етдији рәһбәрликдән шикајәтләнмәјә башладылар (Чх 16:2, 7). Бир дәфә онларын дејинмәји Мусаны елә пәришан етди ки, о өзүнә өлүм диләди (Сј 11:13—15). Дејинмәк инсанын өз һәјатыны да тәһлүкәјә ата биләр. Јеһова исраиллиләрин Мусадан ҝилејләнмәсини Өз башчылығына гаршы үсјан етмәк, Ондан шикајәтләнмәк кими гәбул етди (Сј 14:26—30). Дејинмәјин үстүндә чохлары өз һәјатыны итирди.
Һикмәт хәзинәсиндән инҹиләр
it-2-E с. 309
Манна
Тәсвири. Манна «кешниш тохуму кими ағ иди» вә ја «әтирли гатран рәнҝиндә иди». Әтирли гатран мум кими шәффаф маддәдир, мирваријә охшајыр. Манна баллы көкә, јағлы ширинчөрәк дады верирди. Ону әлдәјирманында үјүдүр, јахуд һәвәнҝдәстәдә дөјүрдүләр. Сонра гајнадыр, јахуд көкә биширирдиләр (Чх 16:23, 31; Сј 11:7, 8).
22—28 МАРТ
АЛЛАҺЫН КӘЛАМЫНДАКЫ ХӘЗИНӘ | САЈЛАР 13, 14
«Иман бизи неҹә ҹәсарәтли едир?»
Иман вә Аллаһ горхусу бизи ҹәсарәтләндирир
5 Лакин кәшфијјатчылардан икиси, Јешуа вә Калев Вә’д едилмиш дијара ҝирмәјә ҹан атырдылар. Онлар дејирдиләр: «Онлары мәғлуб едә биләрик. Мүдафиәчиләри онлары атыб ҝетмишдир, амма Рәбб бизимләдир. Онлардан горхмајын!» (Сајлар 14:9). Јешуа вә Калевин никбинлији әсассыз идими? Јох! Јешуа вә Калев бүтүн халг илә бирҝә Јеһованын Мисир падшаһлығыны вә онун аллаһларыны Он бәла васитәсилә алчалтдығынын шаһиди олмушдулар. Онлар, һәмчинин Јеһованын фир’ону вә онун ордусуну Гырмызы дәниздә батырдығыны да ҝөрмүшдүләр (Мәзмур 136:15). Ајдын олур ки, он кәшфијјатчынын вә онларын сөзүнә ујанларын горхуја дүшмәси үзүрсүз иди. «Нә вахтадәк бу халг Мәнә һөрмәтсизлик едәҹәк? Араларында етдијим әламәтләри ҝөрә-ҝөрә нә вахта гәдәр Мәнә иман ҝәтирмәјәҹәкләр?»,— дејә Јеһова дәриндән кәдәрләндијини билдирди (Сајлар 14:11).
6 Јеһова проблемин көкүнү үзә чыхартды, халгын үрәксизлији иманларынын чатышмадығыны нүмајиш етдирирди. Бәли, иман вә ҹәсарәт бир-бириндән ајрылмаздыр. Онларын арасындакы сых бағлылыг һәвари Јәһјанын сөзләриндән ҝөрүнүр. О, мәсиһчи јығынҹағы вә онун апардығы руһани мүһарибә һагда јазырды: «Дүнјаја галиб ҝәлән зәфәр будур: иманымыз» (1 Јәһја 5:4). Бизим ҝүнләрдә Јешуанын вә Калевин иманына бәнзәр иман, араларында ҹаван вә јашлы, сағлам вә ја сәһһәти зәиф олан алты милјондан артыг Јеһованын Шаһидини Падшаһлыг һаггында хош хәбәри тәблиғ етмәјә сөвг едир. Индијәдәк һеч бир дүшмән бу гүдрәтли, ҹәсарәтли ордуну сусдура билмәмишдир (Ромалылара 8:31).
Һикмәт хәзинәсиндән инҹиләр
it-1-E с. 740
Аллаһын исраиллиләрә вердији өлкә
Аллаһын исраиллиләрә вердији өлкә, һәгигәтән дә, ҝөзәл дијар иди. Муса кәшфијјатчылар ҝөндәрди ки, Вәд олунмуш дијара бахсынлар вә оранын мәһсулундан бир аз ҝәтирсинләр. Кәшфијјатчылар әнҹир, нар вә бир салхым үзүм ҝәтирдиләр. Салхым елә бөјүк иди ки, ики киши ону чомаға асыб дашыјырды. Онлар имансызлыг уҹбатындан горхуја гапылсалар да, дедиләр: «Орада, доғрудан да, сүд-бал ахыр» (Сј 13:23, 27).
29 МАРТ — 4 АПРЕЛ
АЛЛАҺЫН КӘЛАМЫНДАКЫ ХӘЗИНӘ | САЈЛАР 15, 16
«Гүрурдан вә өзүндәнразылыгдан чәкинин»
Јеһова сәни таныјырмы?
12 Лакин Исраил халгы Вәд едилмиш дијара јолланаркән Гораһ Аллаһын гурулушунда проблем олдуғуну дүшүндү. Она гошулан 250 нәфәр иҹма башчысы илә бирҝә Гораһ дәјишикликләр етмәк фикринә ҝәлди. Онлар Аллаһ гаршысында малик олдуглары ада архајын идиләр. Бу адамлар Мусаја дедиләр: «Артыг бәсдир! Чүнки бүтүн иҹманын һамысы мүгәддәсдир вә Рәбб онларын арасындадыр» (Сај. 16:1—3). Онлар өзләриндән неҹә дә разы идиләр! Муса онлара деди: «Рәбб кимин Она мәхсус... олдуғуну ҝөстәрәҹәк». (Сајлар 16:5 ајәсини оху.) Нөвбәти ҝүнүн сонунда Гораһ вә бу үсјанда онун тәрәфини тутанларын һеч бири артыг һәјатда јох иди (Сај. 16:31—35).
Јеһова сәни таныјырмы?
11 Муса илә Гораһ Јеһованын гурулушуна вә гәрарларына һөрмәт етмәк мәсәләсиндә бир-бириндән олдугҹа фәргләнирдиләр. Онларын давранышы Јеһова гаршысында малик олдуглары ада бөјүк тәсир ҝөстәрди. Гораһ Гоһат нәслиндән олан левили иди вә о, бир чох тарихи һадисәләрин шаһиди вә иштиракчысы олмушду, һәмчинин онун мәсулијјәтләри дә аз дејилди. Гораһ өз ҝөзләри илә Аллаһын халгынын Гырмызы дәниздән кечмәсини ҝөрүб, Сина дағында Јеһованын итаәтсиз исраиллиләрә гаршы ҝөрдүјү тәдбири дәстәкләјиб. Үстәлик, о, Әһд сандығынын дашынмасында көмәк едирди (Чых. 32:26—29; Сај. 3:30, 31). Гораһ узун мүддәт Јеһоваја садиг галмышды вә бир чох исраиллиләрин һөрмәтини газанмышды.
Һикмәт хәзинәсиндән инҹиләр
w98-E 1/9 с. 20, абз. 1, 2
Ваҹиб шејләри һәр шејдән үстүн тутун!
Јеһованын ҝөзүндә бу, ҹидди мәсәлә иди. Мүгәддәс Китабда дејилир: «Онда Јеһова Мусаја деди: “Бу адам һөкмән өлмәлидир”» (Сајлар 15:35). Нәјә ҝөрә Јеһова бу кишинин һәрәкәтинә белә јанашды?
Ҹамаат һәфтәнин алты ҝүнү одун јыға биләрди, јемәк, ҝејим вә евлә бағлы ишләрини ҝөрә биләрди. Једдинҹи ҝүн исә руһани ишләрә һәср олунмалы иди. Одун јығмаг пис иш олмаса да, Јеһоваја ибадәт етмәк үчүн ајрылмыш вахтда буну етмәк дүзҝүн дејилди. Дүздүр, биз мәсиһиләр Төвратын табелији алтында дејилик, амма бу һадисә ҝөстәрир ки, һәјатымызда һансы ишләрә өнәм вермәлијик (Филиппилиләрә 1:10).
5—11 АПРЕЛ
АЛЛАҺЫН КӘЛАМЫНДАКЫ ХӘЗИНӘ | САЈЛАР 17—19
«Сизин... ирсиниз Мәнәм»
Јеһованын сәнин пајын олмасына јол верирсән?
9 Торпаг пајы алмајан левилиләри бир даһа јадымыза салаг. Онларын әсас вәзифәси һәгиги ибадәтин гајғысына галмаг иди. Буна ҝөрә дә онлар: «Сәнин пајын... Мәнәм»,— дејән Јеһова Аллаһа ҝүвәнмәли идиләр вә шүбһә етмәмәли идиләр ки, О, онларын мадди тәләбатларыны өдәјәҹәк (Сај. 18:20). Биз левилиләр вә каһинләр кими мәбәддә хидмәт етмәсәк дә, Јеһованын бизим дә гајғымыза галаҹағына ејни әминлик тәзаһүр етдирмәклә онларын әһвал-руһијјәсини тәглид едә биләрик. Сүрәтлә өз сонуна јахынлашан бир дүнјада Аллаһын бизим гејдимизә галмаг гүввәсинә малик олдуғуна етибар етмәк ҝетдикҹә даһа зәрури олур (Вәһј 13:17).
Јеһова мәним пајымдыр
4 Бу тапшырыг левилиләр үчүн һансы мәнаны кәсб едирди? Јеһова левилиләрә деди ки, онларын пајы Өзү олаҹаг. Јәни онлар торпаг пајы алмагдан даһа ваҹиб бир шеји, Јеһоваја хидмәт етмәји ирс олараг алаҹагдылар. Левилиләрин ирси Рәббин каһинлији иди (Јешуа 18:7). Сајлар 18:20 ајәсиндә ҝөстәрилдији кими, онлар мадди чәтинлик чәкмәјәҹәкдиләр. (Сајлар 18:19, 21, 24 ајәләрини оху.) Мүгәддәс Китабда дејилир: «Левилиләрә... Исраилдә олан бүтүн варидатын онда бирини ирс олараг вердим. Бу, хидмәтләринин... әвәзидир». Исраил халгынын мәһсулларынын вә ев һејванларынын артымынын онда бир һиссәси, јәни он фаизи левилиләрә верилирди. Левилиләр исә алдыгларынын онда бир һиссәсини — онун «ән јахшы һиссәсиндән» каһинләрин еһтијаҹларынын өдәнилмәси үчүн вермәли идиләр (Сај. 18:25—29). Һәмчинин Исраил оғулларынын Аллаһа ибадәт етдикләри јерә ҝәтирдикләри «мүгәддәс тәгдимләрин» һамысы каһинләрә чатырды. Буна ҝөрә дә каһинләр там әмин ола биләрдиләр ки, Јеһова онларын еһтијаҹларыны өдәјәҹәк.
Һикмәт хәзинәсиндән инҹиләр
g02-E 8/6 с. 14, абз. 2
Ваҹиб мәһсул олан дуз
Дуз һәмчинин сабитлик, даимилик рәмзи иди. Буна ҝөрә дә Мүгәддәс Китабда даими әһд «дуз әһди» адланырды. Әһд бағлајан тәрәфләр әһди тәсдигләмәк үчүн чох вахт бирликдә јемәк јејирдиләр, һәмчинин јемәјә дуз гатырдылар (Сајлар 18:19). Төврата әсасән, гурбанҝаһда тәгдим олунан гурбанлара дуз гатылмалы иди. Шүбһәсиз ки, бу, чүрүмәзлијин рәмзи иди.
12—18 АПРЕЛ
АЛЛАҺЫН КӘЛАМЫНДАКЫ ХӘЗИНӘ | САЈЛАР 20, 21
«Ҝәрҝин вәзијјәтләрдә һәлим галын»
Һәлимлијә ҹан атараг Јеһованы разы салын
19 Сәһвләрә јол вермәјәҹәјик. Муса пејғәмбәри бир дә јадымыза салаг. О, узун илләр әрзиндә һәлим иди вә Јеһованы разы салырды. Лакин сәһрада 40 ил сүрән ағыр сәјаһәтин сонуна јахын пејғәмбәр һәлимлик хүсусијјәтини итирир. Исраиллиләр Гәдисдә дүшәрҝә салмышды, пејғәмбәр баҹысыны, еһтимал ки, Мисирдә онун һәјатыны хилас едән баҹысыны тәзәликҹә дәфн едиб. Вә будур, халг јенидән јетәринҹә тәмин олунмадығыны иддиа етмәјә башлајыр. Онлар бу дәфә Муса илә су гытлығына ҝөрә далашыр. Јеһованын пејғәмбәр васитәсилә ҝөстәрдији мөҹүзәләрә вә пејғәмбәрин узун илләр фәдакарлыгла халга башчылыг етмәсинә рәғмән, ҹамаат дејинмәјә башлајыр. Амма онлар тәкҹә су гытлығына ҝөрә јох, Муса барәдә дә ҝилеј-ҝүзар едирләр, санки онларын сусуз галмаларынын ҝүнаһкары Муса пејғәмбәр иди (Сај. 20:1—5, 9—11).
Һәлимлијә ҹан атараг Јеһованы разы салын
20 Гәзәбдән алышыб-јанан пејғәмбәр һәлимлијини итирир. Јеһованын әмр етдији кими, иманла гајаја «су вер» демәк әвәзинә, ҹамаата аҹыгланыр вә Јеһоваја мәхсус шәрәфи өз үзәринә ҝөтүрүр. Сонра гајаја ики дәфә вурур вә гајадан су чыхыр. Гүрур вә гәзәб онун ҹидди сәһвә јол вермәсинә ҝәтириб чыхарыр (Зәб. 106:32, 33). Бир анлыг һәлимлијини итирмәси уҹбатындан о, Вәд едилмиш дијара дахил олмаг имканындан мәһрум олур (Сај. 20:12).
21 Бу һадисәдән ваҹиб дәрсләр өјрәнирик. Әввәла, һәлимлији горумаг үчүн үзәримиздә даима ишләмәлијик. Һәлимлији бир анлыг белә итирсәк, гүрур баш галдыра биләр, нәтиҹәдә сөздә вә һәрәкәтдә дүшүнҹәсизлијә јол верәрик. Икинҹиси, стресс һәлимлијимизи горумағы чәтинләшдирә биләр. Буна ҝөрә дә һәтта ҝәрҝин вәзијјәтдә белә, һәлимлији горумаға ҹан атмалыјыг.
w09-E 1/9 с. 19, абз. 5
Һаггын тәрәфиндә дуран Һаким
Әввәла, Аллаһ Мусаја бујурмамышды ки, халга нәсә десин. Муса исә бу азмыш кими, һәлә халга «аси» һөкмү дә охуду. Икинҹиси, Муса илә Һарун Аллаһы шәрәфләндирмәди. Аллаһ онлара деди: «Сиз... Мәним мүгәддәслијими уҹа тутмадыныз» (12-ҹи ајә). «Биз сизин үчүн бу гајадан су чыхардаг» демәклә Муса елә данышды ки, санки, сују мөҹүзәви сурәтдә верән о вә Һарун иди, Аллаһ дејилди. Үчүнҹүсү, бу һөкм әввәлки һөкмләрә ујғун иди. Аллаһ әввәлки үсјанкар нәсли Кәнан дијарына ҝирмәкдән мәһрум етмишди. Муса илә Һаруна да ејни ҹәзаны кәсди (Сајлар 14:22, 23). Дөрдүнҹүсү, Муса да, Һарун да халгын башчысы иди. Кимә чох сәлаһијјәт һәвалә олунубса, о, Аллаһ гаршысында даһа чох мәсулијјәт дашыјыр (Лука 12:48).
Һикмәт хәзинәсиндән инҹиләр
Инсан зәифлијинә Јеһованын ҝөзү илә бах
12 Бу вәзијјәтләрин һәр бириндә Јеһова Һаруну јериндәҹә ҹәзаландыра биләрди. Лакин О, Һарунун һеч дә пис адам олмадығы вә ја дәһшәтли дәрәҹәдә ҹидди ҝүнаһа јол вермәдији гәнаәтинә ҝәлди. Ҝөрүнүр, Һарун мөвҹуд вәзијјәтин вә ја јанлыш фикирли инсанларын она тәсир етмәсинә јол вермишди. Анҹаг етдији сәһвләр онун үзүнә дејиләндә о, дәрһал өз ҝүнаһларыны бојнуна алды вә Јеһованын һөкмүнү гәбул етди (Чых. 32:26; Сај. 12:11; 20:23—27). Јеһова диггәтини Һарунун иманына вә кечирдији пешманчылыға јөнәлтмишди. Әсрләр сонра да Һарун вә нәсли Јеһованын мөмин бәндәләри кими јад едилирди (Мәз. 115:10—12; 135:19, 20).
19—25 АПРЕЛ
АЛЛАҺЫН КӘЛАМЫНДАКЫ ХӘЗИНӘ | САЈЛАР 22—24
«Јеһова ләнәти хејир-дуаја чевирир»
«Иса һаггындакы мүждәни» бәјан едирик
5 Биринҹи әсрдә олдуғу кими бу ҝүн дә тәгибләр тәблиғ ишини дајандырмајыб. Вахташыры мәсиһиләрин мәҹбурән бир јердән башга јерә, истәр һәбсханаја, истәрсә дә башга өлкәјә ҝөндәрилмәси јалныз вә јалныз јахшы нәтиҹәләр верир. Бунун сајәсиндә Падшаһлыг хәбәри јени-јени әразиләрдә тәблиғ олунур. Мәсәлән, Икинҹи Дүнја мүһарибәси заманы Јеһованын Шаһидләри насист һәбс дүшәрҝәләриндә чох бөјүк шаһидлик верә билмишләр. Орада Шаһидләрлә таныш олан бир јәһуди дејир: «Јеһованын Шаһидләринин дөзүмлүлүјү мәни әмин етди ки, онларын иманы Мүгәддәс Китаба әсасланыб, буна ҝөрә мән өзүм дә Јеһованын Шаһиди олдум».
it-2-E с. 291
Ағылсызлыг
Јеһоваја гаршы чыхмаг ағылсызлыгдыр. Бәләм пејғәмбәр муабиләрин падшаһы олан Балагдан бәхшиш алмаг үчүн ахмагҹасына исраиллиләрин әлејһинә пејғәмбәрлик етмәк истәди, амма Јеһова онун ҹәһдләрини боша чыхарды. Һәвари Бутрус јазмышды ки, «дилсиз-ағызсыз јүк һејваны инсан сәси илә данышыб онун [Бәләмин] ағылсыз нијјәтинә мане олду». Бу ајәдә «ағылсыз» кими тәрҹүмә олунан јунан сөзү «парафрониа» һәрфән «инсанын өз ағлынын јанында олмасы» демәкдир (2Бт 2:15, 16; Сј 22:26—31).
Һикмәт хәзинәсиндән инҹиләр
“Сајлар” китабындан диггәтәлајиг фикирләр
22:20-22 — Јеһованын гәзәби Балама гаршы нә үчүн аловланыр? Јеһова Балам пејғәмбәрә дејир ки, о, исраиллиләри лә’нәтләмәсин (Сајлар 22:12). Амма буна бахмајараг, пејғәмбәр Балакын адамларына гошулуб, там гәтијјәтлә Исраили лә’нәтләмәјә ҝедир. Балам Моаб падшаһыны разы салыб, ондан мүкафат алмаг истәјирди (2 Петер 2:15, 16; Јәһуда 11). О, Исраил халгына хејир-дуа вермәк мәҹбуријјәтиндә галдыгдан сонра белә, Баала ибадәт едән гадынларын исраилли кишиләри јолдан чыхармаларыны мәсләһәт етмәклә дә падшаһын илтифатыны газанмаға чалышырды (Сајлар 31:15, 16). Беләликлә, Аллаһын Балама гаршы гәзәбинин сәбәби пејғәмбәрин олдугҹа аҹҝөз олмасы иди.
26 АПРЕЛ —2 МАЈ
АЛЛАҺЫН КӘЛАМЫНДАКЫ ХӘЗИНӘ | САЈЛАР 25, 26
«Бир нәфәрин һәрәкәти чохларына фајда ҝәтирди»
Әхлагсызлыгдан гач
БАЛЫГЧЫ истәдији нөв балығы тутмаг үчүн онун олдуғу јерә ҝәлир. Сонра јем сечиб тилова тахыр вә тилову суја атыр. Сәбирлә отуруб ҝөзләјир. Балыг тилова дүшәндә дәрһал тилову дартыб чәкир.
2 Инсанлар да белә тилова дүшә биләр. Мәсәлән, исраиллиләр Вәд едилмиш дијара чатһачатда Муаб чөллүјүндә дүшәрҝә гурмушдулар. Муаб падшаһы Бәләм адлы бир кишидән исраиллиләри ләнәтләмәји хаһиш етмишди. О бунун мүгабилиндә она чохлу пул верәҹәјини вәд етмишди. Ахырда Бәләм елә бир јол тапды ки, исраиллиләр өзләри өз башларына ләнәт ҝәтирдиләр. О, исраиллиләри тилова салмаг үчүн јахшыҹа дүшүнүб јем сечди. Исраиллиләрин дүшәрҝәсинә ҝәнҹ муаби гадынлары ҝөндәрди ки, кишиләри јолдан чыхарсынлар (Сајлар 22:1—7; 31:15, 16; Вәһј 2:14).
Әхлагсызлыгдан гач
4 Бәс нәјә ҝөрә бу гәдәр исраилли Бәләмин фитнәсинә ујду? Онлары јалныз өз истәкләри марагландырырды, Јеһованын етдикләрини јаддан чыхармышдылар. Јеһова исраиллиләрә о гәдәр јахшылыг етмишди ки, онлар Јеһоваја садиг галмаға борҹлу идиләр. Аллаһ онлары Мисир әсарәтиндән азад етмишди, чөллүкдә једиздирмишди, сағ-саламат Вәд едилмиш дијарын астанасына ҝәтирмишди (Ибраниләрә 3:12). Буна бахмајараг, онлар әхлагсызлыг торуна дүшдүләр. Һәвари Булус јазмышды: «Онлардан бәзиләри кими әхлагсызлыг етмәјәк» (1 Коринфлиләрә 10:8).
Һикмәт хәзинәсиндән инҹиләр
it-1-E с. 359, абз. 1, 2
Сәрһәд
Ҝөрүнүр, торпаг гәбиләләр арасында ики амилә әсасән бөлүнүрдү: пүшклә вә гәбиләнин бөјүклүјүнә әсасән. Еһтимал ки, пүшклә гәбиләләрин торпаг пајынын тәхмини јери мүәјјән олунурду. Беләликлә, пајын өлкәнин һансы јериндә, мәсәлән, шималында, ҹәнубунда, шәргиндә, јахуд гәрбиндә, саһилбоју әразидә, јохса дағлыг бөлҝәдә олдуғу мүәјјәнләшдирилирди. Пүшкүн нәтиҹәси Јеһовадан олурду. Буна ҝөрә дә гәбиләләр арасында пахыллығын, дава-далашын гаршысы алынырды (Мс 16:33). Бунунла да Аллаһ һәмчинин елә едирди ки, гәбиләләрин өлкәдәки мөвгеји Јагубун Јарадылыш 49:1—33 ајәләриндәки пејғәмбәрлијинә ујғун олсун.
Пүшклә гәбиләнин ҹоғрафи мөвгејини тәјин едәндән сонра икинҹи амил, јәни гәбиләнин бөјүклүјү әсасында торпаг пајынын өлчүсүнү мүәјјән етмәк лазым иди. «Пүшк атыб торпағы аиләләриниз арасында бөлүшдүрүн. Сајы чох оланларын торпаг пајы бөјүк, сајы аз оланларынкы кичик олмалыдыр. Һәр кәс пүшклә она дүшән јердә торпаг пајы алаҹаг» (Сј 33:54). Пајын ҹоғрафи мөвгеји илә бағлы пүшклә верилән гәрар гүввәдә галырды, амма пајын өлчүсү илә бағлы дәјишиклик едилә биләрди. Беләликлә, Јәһуданын әразисинин чох бөјүк олдуғу мәлум оланда онун торпағындан Шәмун гәбиләсинә пај верилди вә беләҹә, онун әразиси азалдылды (Јш 19:9).