Бөјүклүјә даир мәсиһчи нөгтеји-нәзәрини инкишаф етдир
“Аранызда бөјүк олмаг истәјән, диҝәрләринин нөкәри олсун” (МАТТА 20:26).
1. Бөјүклүјә даир дүнјәви нөгтеји-нәзәр нәдән ибарәтдир?
ГӘДИМ Мисирин јахынлығындакы Фива (мүасир Карнак) шәһәриндә, Гаһирәдән 500 километр ҹәнубда, фир’он III Аменһотепин 18 метрлик абидәси уҹалыр. Бу абидәјә бахаркән гејри-ихтијари олараг, өзүнү тамамилә кичик һисс едирсән. Шүбһәсиз ки, фир’он гаршысында горху һисси ојатмаг үчүн гурулан бу абидә, бөјүклүјә даир дүнјәви нөгтеји-нәзәрин символудур; онун мәғзи өзүнү баҹардыгҹа бөјүк вә әһәмијјәтли ҝөстәрмәк вә башгаларыны, өзләрини әһәмијјәтсиз һисс етмәјә мәҹбур етмәкдир.
2. Иса өз давамчыларына һансы ибрәт дәрсини верди вә биз өзүмүзә һансы суаллары вермәлијик?
2 Бөјүклүјә даир олан бу нөгтеји-нәзәр Иса Мәсиһин өјрәтдијиндән нә гәдәр фәргләнир! Өз ардыҹыллары үчүн “Рәбб вә Мүәллим” олдуғу һалда Иса онлары өјрәдирди ки, башгаларына хидмәт етмәклә бөјүк олмаг олар. Јер үзүндәки һәјатынын ахырынҹы ҝүнү Иса шаҝирдләринин ајагларыны јујараг бунун нә демәк олдуғуну ҝөстәрди. Неҹә дә тәвазөкар давранышдыр! (Јәһја 13:4, 5, 14). Башгаларына хидмәт етмәк сәнин хошуна ҝәлир, јохса истәрдин ки, сәнә хидмәт етсинләр? Мәсиһин нүмунәси сәндә онун кими тәвазөкар олмаг һәвәси ојатмырмы? Ҝәл Мәсиһин бөјүклүјә даир нөгтеји-нәзәрини мүзакирә едәк вә ону бу дүнјанын нөгтеји-нәзәри илә мүгајисә едәк.
Бөјүклүјә даир дүнјәви нөгтеји-нәзәрдән гачын
3. Мүгәддәс Китабын һансы нүмунәләри ҝөстәрир ки, инсанлардан иззәт алмаг јанғысы кәдәрли нәтиҹәләрә ҝәтириб чыхарыр?
3 Мүгәддәс Китабын чохсајлы нүмунәләри тәсдиг едир ки, бөјүклүјә даир дүнјәви нөгтеји-нәзәр мәһвә апарыр. Естерин вә Мордекајын ҝүнләриндә фарс падшаһынын сарајында бөјүк мөвгејә малик олан гүдрәтли Һаманы хатырлајаг. Шан-шөһрәт јанғысы Һаманы һөрмәтдән салды вә өлүмә апарды (Естер 3:5; 6:10-12; 7:9, 10). Бәс һакимијјәтинин зирвәсиндә оларкән ағлыны итирән ловға Навуходоносор барәсиндә нә демәк олар? Онун бөјүклүк барәсиндәки јанлыш тәсәввүрү нөвбәти сөзләрдә әкс олунур: “Падшаһ еви олсун дејә, гүввәтимин гүдрәти илә вә һәшәмәтимин иззәти үчүн тикмиш олдуғум бөјүк Бабил бу дејилми?” (Даниел 4:30). Аллаһа иззәт вермәк әвәзинә лајиг олмадығы иззәти мәнимсәјән мәғрур I Һирод Агриппанын да нүмунәси вар. Онун “ичи гурдлар тәрәфиндән ҝәмириләрәк ҹан верди” (Һәвариләрин ишләри 12:21-23). Бу инсанларын алчалдыҹы сурәтдә сүгутунун сәбәби онда иди ки, онлар Јеһованын бөјүклүјә олан нөгтеји-нәзәрини гәбул етмәдиләр.
4. Дүнјада јајылмыш мәғрурлуг руһунун архасында дуран кимдир?
4 Давранышымызын бизә шәрәф вә һөрмәт ҝәтирмәсини арзуламаг тамамилә тәбии истәкдир. Лакин Иблис бу истәкдән истифадә едәрәк, инсанларда онун өзүнә мәхсус шөһрәтпәрәст мејлләр әкс етдирән мәғрурлуг руһуну ојадыр (Матта 4:8, 9). Һеч заман унутма ки, о, “бу әсрин танрысы”дыр вә нәјин баһасына олурса-олсун Јер күрәсинин сакинләринә өз фикирләрини јеритмәк истәјир (2 Коринфлиләрә 4:4; Ефеслиләрә 2:2; Вәһј 12:9). Бу ҹүр фикирләрин архасында кимин дурдуғуну баша дүшәрәк, мәсиһчиләр бөјүклүјә даир бу дүнјанын нөгтеји-нәзәриндән гачынырлар.
5. Мүвәффәгијјәт, шөһрәт вә вар-дөвләт хошбәхт һәјата зәманәтдирми? Изаһ един.
5 Иблис инсанлара тәлгин етмәк истәјир ки, бөјүк ад, әтрафдакыларын илтифатыны газанмаг вә пул долу ҹибләр автоматик олараг инсаны хошбәхтлијә чатдырыр. Бу беләдирми? Мүвәффәгијјәт, шөһрәт вә вар-дөвләт хошбәхт һәјата зәманәт верирми? Мүгәддәс Китаб бизи бу јалана ујмамаға чағырыр. Мүдрик падшаһ Сүлејман јазырды: “Һәр әмәји вә јахшы ҝедән иши ҝөрдүм ки, бир кимсәнин гоншусу тәрәфиндән гысганылмасы бундан өтрүдүр. Бу да бош вә јели говмаға чалышмагдыр” (Ваиз 4:4). Һәјатларынын мә’насыны вар-дөвләт вә иззәт газанмагда ҝөрән бир чох инсанлар Мүгәддәс Китабын илһамланмыш бу сөзләринин һәгигилијини тәсдигләјә биләр. Инсанларын Аја учдуглары космик ҝәминин лајиһәсиндә, јарадылмасында вә сынагдан кечирилмәсиндә иштирак етмиш бир мүтәхәссиси нүмунә ҝәтирмәк олар. О хатырлајыр: “Мән чох әлләшдим вә өз ишимдә бөјүк наилијјәтләрә чатдым. Лакин бунларын һамысы бош шеј имиш — мән һәгиги хошбәхтлији тапмадым вә дахили раһатлыға наил олмадым”a. Коммерсијада, идманда вә ја әјләнҹә саһәсиндә дүнјәви бөјүклүк, инсанын дәрин мәмнунлуг һисси дујаҹағына һеч дә зәманәт дејил.
Башгаларына мәһәббәтдән хидмәт едәрәк бөјүк олурсан
6. Јагуб вә Јәһјанын бөјүклүк барәсиндә дүзҝүн нөгтеји-нәзәрә малик олмадыглары нәдән ҝөрүнүр?
6 Әсл бөјүклүјүн нә илә бағлы олдуғуну Иса Мәсиһин һәјатында баш верән бир һадисә ҝөстәрир. Ерамызын 33-ҹү илиндә Иса вә онун шаҝирдләри Јерусәлимә, Пасхаја ҝедирдиләр. Јолда мә’лум олду ки, Исанын гоһумлары — еһтимал ки, халасы оғланлары олан Јагуб вә Јәһја бөјүклүк барәдә дүзҝүн тәсәввүрә малик дејилләр. Аналарынын васитәсилә онлар Исадан хаһиш етдиләр ки, онун “Падшаһлығында бири сағында бири солунда отурсун” (Матта 20:21). Јәһудиләрдә сағда вә солда отурмаг чох бөјүк шәрәф сајылырды (1 Краллар 2:19). Јагуб вә Јәһја шөһрәтпәрәстлик едиб ҝөркәмли јер тутмаг истәјирдиләр. Онлар јүксәк вәзифә иддиасында идиләр. Иса онларын хаһишләринин мәғзини баша дүшдү вә бу имкандан онларын бөјүклүјә даир нөгтеји-нәзәрләрини дүзәлтмәк үчүн истифадә етди.
7. Исанын сөзләринә ҝөрә, мәсиһчиләр әсл бөјүклүјә неҹә наил ола биләрләр?
7 Иса билирди ки, бу мәғрур дүнјада һакимијјәтә малик олан, башгаларыны идарә едән вә ҝөстәриш верән, һәмчинин чыртма чалан кими бүтүн шылтаглыглары иҹра олунан кәсләр бөјүк сајылырлар. Лакин Исанын шаҝирдләри арасында башгаларына тәвазөкарлыгла хидмәт едәнләр бөјүкдүрләр. Иса демишдир: “Аранызда бөјүк олмаг истәјән, диҝәрләринин нөкәри олсун. Вә аранызда биринҹи олмаг истәјән, диҝәрләринин гулу олсун” (Матта 20:26, 27).
8. Нөкәр олмаг нә демәкдир вә биз өзүмүзә һансы суаллары верә биләрдик?
8 Мүгәддәс Китабын бу һиссәсиндә “нөкәр” кими тәрҹүмә олунан јунан сөзү, башгаларына хидмәт етмәк үчүн чалышганлыгла вә тә’кидлә сә’ј ҝөстәрән адама тәтбиг олунур. Иса истәјирди ки, онун шаҝирдләри ваҹиб бир дәрси өјрәнсинләр: инсанлара әмр едән дејил, онлара мәһәббәтлә хидмәт едән адам бөјүк сајылыр. Өзүндән соруш: “Јагубун вә Јәһјанын јериндә олсајдым өзүмү неҹә апарардым? Әсл бөјүклүјүн инсанлара мәһәббәтлә хидмәт етмәклә бағлы олдуғуну баша дүшәрдимми?” (1 Коринфлиләрә 13:3).
9. Иса инсанлара мүнасибәтә даир һансы нүмунәни верди?
9 Иса шаҝирдләринә өз нүмунәсиндә ҝөстәрди ки, мәсиһчиләр арасындакы бөјүклүк, бу дүнјанын гәбул етдији бөјүклүкдән фәргләнир. О, хидмәт етдији кәсләрә һеч заман јухарыдан бахмырды вә онларын ләјагәтини алчалтмырды. Мүхтәлиф инсанлар — кишиләр, гадынлар, ушаглар, варлылар, касыблар, танынмыш инсанлар, һәтта һамынын таныдығы ҝүнаһкарлар — өзләрини онунла раһат һисс едирдиләр (Марк 10:13-16; Лука 7:37-50). Инсанлар чох вахт, онлары әһатә едәнләр зәифлик ҝөстәрәндә сәбирләрини итирирләр. Иса фәргләнирди. Һәтта шаҝирдләри фикирләшмәмиш даврансалар вә бир-бириләри илә јола ҝетмәсәләр дә, Иса онлара сәбирлә өјүд верир, бунунла да әсл мә’нада тәвазөкар вә һәлим олдуғуну ҝөстәрирди (Зәкарја 9:9; Матта 11:29; Лука 22:24-27).
10. Исанын бүтүн һәјаты башгаларына тәмәннасыз хидмәт етмәк истәјини неҹә әкс етдирирди?
10 Чох үстүн вәзифә тутан Аллаһын Оғлу, өзүнүн тәмәннасыз хидмәти илә әсл мә’нада бөјүклүјүн нә демәк олдуғуну ҝөстәрди. Иса јер үзүнә она хидмәт едилмәк үчүн дејил, “мүхтәлиф хәстәликләрә” тутулмуш оланлары сағалдараг вә инсанлары ҹинләрин әсарәтиндән азад едәрәк башгаларына хидмәт етмәјә ҝәлмишдир. О, јорғунлуғун нә демәк олдуғуну билир вә истираһәтә еһтијаҹ дујурду, лакин һәмишә инсанларын тәләбатларыны өз шәхси марагларындан үстүн тутур вә вар ҝүҹү илә чалышырды ки, кәдәрли оланлара тәсәлли версин (Марк 1:32-34; 6:30-34; Јәһја 11:11, 17, 33). Мәһәббәт ону инсанлара руһани јардым ҝөстәрмәјә тәшвиг едирди: о, тозлу јолларла јүз километрләрлә мәсафә гәт едир вә Падшаһлыг һаггындакы хош хәбәри тәблиғ едирди (Марк 1:38, 39). Шүбһәсиз ки, Иса башгаларына хидмәт етмәјә чох ҹидди јанашырды.
Мәсиһин тәвазөкарлығыны тәглид ет
11. Јығынҹаг нәзарәтчиләри кими хидмәт етмәјә тә’јин олунан гардашлардан нә ҝөзләнилир?
11 Мәсиһчи нәзарәтчиләринин инкишаф етдирмәли олдуглары руһ, XIX әсрин сонунда, Аллаһын халгына хидмәт етмәк үчүн сәјјаһ нүмајәндәләрин сечилмәси заманы вурғуланмышдыр. “Сион Ҝөзәтчи Гүлләси”нин 1894-ҹү ил 1 сентјабр сајында (инҝ.) дејилирди ки, “һәлим, ловға олмајан... ағылда тәвазөкар, өз марагларыны дејил, Мәсиһин марагларыны ҝүдән вә диггәти өз биликләринә дејил, онун Кәламына вә бу Кәлама хас олан садәлијә вә гүввәјә јөнәлдән” кишиләр тәләб олунур. Ајдындыр ки, Мәсиһин һәгиги давамчылары ҝөркәмли мөвге тутмаг, һакимијјәт саһиби олмаг вә башгалары үзәриндә һөкмранлыг етмәк үмидинә дүшәрәк, өз шәхси арзуларыны тә’мин етмәк хәтринә мәс’ул вәзифәләрә ҹан атмамалыдырлар. Тәвазөкар нәзарәтчи дәрк едир ки, онун мәс’улијјәти она иззәт ҝәтирән јүксәк мөвгеји дејил, “хејирли бир иши” нәзәрдә тутур (1 Тимотејә 3:1, 2). Бүтүн ағсаггаллар вә хидмәти көмәкчиләр һәмиманлыларына тәвазөкарлыгла хидмәт етмәк үчүн вар гүввәләри илә чалышмалы вә тәглид етмәјә лајиг нүмунә верәрәк мүгәддәс хидмәтдә рәһбәрлији өз үзәрләринә ҝөтүрмәлидирләр (1 Коринфлиләрә 9:19; Галатијалылара 5:13; 2 Тимотејә 4:5).
12. Јығынҹагда имтијаз әлдә етмәк истәјән кәсләр өзләринә һансы суаллары верә биләрләр?
12 Јығынҹагда имтијаз әлдә етмәк истәјән һәр бир гардаш өзүндән соруша биләр: “Мән башгаларына хидмәт етмәк имканы ахтарыараммы, јохса башгаларынын мәнә хидмәт едәҹәкләрини ҝөзләмәјә мејллијәм? Әтрафдакыларын нәзәринә о гәдәр дә чарпмајан фајдалы иши јеринә јетирмәјә һазыраммы?” Мисал үчүн, ҝәнҹ гардаш јығынҹагда мә’рузә илә ҹан-башла чыхыш едир, лакин јашлылара һәвәссиз көмәк едир. Мәс’ул гардашларын әһатәсиндә олмаг она хош ҝәлир, лакин тәблиғ ишиндә иштирак етмәјә һәвәси јохдур. Бу ҹүр ҝәнҹ өзүндән сорушмалыдыр: “Диггәтими әсас е’тибары илә Аллаһа хидмәтин шөһрәт вә тә’риф ҝәтирән саһәләринәми ҹәмләшдирирәм? Башгаларынын гаршысында фәргләнмәјәми чалышырам?” Өзүнә иззәт ахтаранлар, гәтијјәтлә демәк олар ки, Мәсиһи тәглид етмирләр (Јәһја 5:41).
13. а) Нәзарәтчи тәрәфиндән ҝөстәрилән тәвазөкарлыг нүмунәси башгаларына неҹә тә’сир едә биләр? б) Нәјә ҝөрә демәк олар ки, тәвазөкарлыг мәсиһчиләр үчүн сечим мәсәләси дејил?
13 Биз Мәсиһин тәвазөкарлығыны тәглид етмәјә сә’ј ҝөстәрәндә, башгаларына хидмәт етмәјә тәшвиг олунуруг. Јеһованын Шаһидләринин филиалларындан биринин ишини јохлајан зонал нәзарәтчинин нүмунәсини нәзәрдән кечирәк. Ҹәдвәлиндә бош вахтынын олмамасына вә чохлу мәс’улијјәтләринә бахмајараг, о, мәфтиллә пәрчимләјән машыны көкләмәјә чалышан гардаша көмәк етмәк үчүн ајаг сахламышдыр. Һәмин гардаш јада салыр: “Бу инанылмаз иди! О мәнә сөјләди ки, ҹаванлыгда Бејт-Елдә хидмәт едәркән, о да бу ҹүр машында ишләјирмиш вә о да һәмән машыны чәтинликлә көкләјирмиш. Онун бир чох башга ваҹиб ишләри олса да, бир мүддәт мәнимлә ишләди. Бу мәнә дәрин тәәссүрат бағышлады”. Һал-һазырда Јеһованын Шаһидләринин филиалларындан бириндә нәзарәтчи ишләјән һәмин гардаш, зонал нәзарәтчинин тәвазөкарлығыны индијә гәдәр хатырлајыр. Ҝәлин һеч заман дүшүнмәјәк ки, башгаларына тәвазөкарлыгла хидмәт етмәк үчүн һәддиндән артыг бөјүк инсанларыг. Әксинә, биз ‘тәвазөкарлығы ҝејинмәлијик’. Тәвазөкарлыг сечим мәсәләси дејил. О, мәсиһчинин ҝејинмәли олдуғу ‘јени мәнлијин’ бир һиссәсидир (Филипилиләрә 2:3; Колослулара 3:10, 12; Ромалылара 12:16).
Бөјүклүјә даир мәсиһчи нөгтеји-нәзәрини неҹә инкишаф етдирмәли?
14. Аллаһла вә јахынларымызла гаршылыглы мүнасибәтләримиз барәдә дүшүнмәк бизә бөјүклүјә даир дүзҝүн нөгтеји-нәзәри инкишаф етдирмәкдә неҹә көмәк едә биләр?
14 Биз бөјүклүјә даир дүзҝүн нөгтеји-нәзәри неҹә инкишаф етдирә биләрик? Јеһова Аллаһла олан гаршылыглы мүнасибәтләримиз һаггында дүшүнмәк ваҹибдир. Өзүнүн мөһтәшәмлијинә, ҝүҹүнә вә мүдриклијинә ҝөрә О биздән, ади инсанлардан олдугҹа бөјүкдүр (Ишаја 40:22). Јахынларымызла олан гаршылыглы мүнасибәтләримиз барәсиндә дүшүнмәк дә бизә тәвазөкарлығы инкишаф етдирмәкдә көмәк едир. Мәсәлән, биз мүәјјән саһәдә нәјисә башгаларындан јахшы едә биләрик, лакин еһтимал ки, һәмин инсанлар һәјатын даһа ваҹиб саһәләриндә биздән үстүн ола биләрләр вә ја мәсиһчи баҹы-гардашларымыз биздә чатышмајан кејфијјәтләрә саһиб ола биләрләр. Вә үмумијјәтлә, Аллаһын ҝөзүндә дәјәрли оланларын чоху өз һәлимликләринә вә тәвазөкарлыгларына ҝөрә онлары әһатә едәнләрин зәмининдә хүсуси олараг сечилмирләр (Сүлејманын мәсәлләри 3:34; Јагуб 4:6).
15. Аллаһын хидмәтчиләринин садиглик нүмунәләри, һеч кимин башгалары үзәриндә јүксәлмәјә һаггы олмадығыны неҹә ҝөстәрир?
15 Буну, иманларына ҝөрә тә’гиб олунан Јеһованын Шаһидләринин нүмунәсиндә јахшы ҝөрмәк олар. Чох вахт сәрт сынаглар заманы Аллаһа иманларыны горујуб сахлајанлар дүнјанын ҝөзүндә ади сајылан инсанлар олмушлар. Бу ҹүр нүмунәләр үзәриндә дүшүнмәк тәвазөкар олараг галмаға вә ‘өзүмүз барәдә лүзумундан чох дүшүнмәмәјә’ көмәк едир (Ромалылара 12:3)b.
16. Јығынҹағын һәр бир үзвү Исанын бөјүклүјә даир нөгтеји-нәзәрини неҹә инкишаф етдирә биләр?
16 Бүтүн мәсиһчиләр — ушаглар вә бөјүкләр — бөјүклүјә даир мәсиһчи нөгтеји-нәзәрини инкишаф етдирмәјә чалышмалыдырлар. Јығынҹагда мүхтәлиф тапшырыглары јеринә јетирмәк лазымдыр. Бу дүнјада кимин исә лајигли сајмадығы иши сәнә һәвалә едәндә, һеч заман инҹимә (1 Самуел 25:41; 2 Краллар 3:11). Валидејнләр, ушагларынызы, о ҹүмләдән јенијетмә јашында олан ушагларынызы онлара Падшаһлыг Залында вә ја конгресин кечирилдији јердә һәвалә олунан һәр бир ишә һәвәслә ҝиришмәјә тәшвиг едирсинизми? Онлар сизин өзүнүзүн ади, нәзәрә чарпмајан ишләри јеринә јетирдијинизи ҝөрүрләрми? Јеһованын Шаһидләринин үмумдүнја мәркәзи идарәсиндә чалышан бир гардаш өз валидејнләринин нүмунәсини индијәдәк јахшы хатырлајыр. О дејир: “Онларын Падшаһлыг Залынын вә ја конгрес кечирилән јерин јығышдырылмасына мүнасибәтләриндән ҝөрүнүрдү ки, онлар бу иши ваҹиб сајырлар. Онлар чох вахт јығынҹаг вә ја баҹы-гардашлар үчүн һансыса ишләри көнүллү олараг јеринә јетирир вә һеч бир тапшырығы алчалдыҹы сајмырдылар. Бу ҹүр әһвал-руһијјә мәнә Бејт-Елдә һәр бир тапшырығы һәвәслә гәбул етмәјә көмәк едир”.
17. Тәвазөкар гадынлар јығынҹаг үчүн һансы тәрздә хејир-дуа ола биләрләр?
17 Башгаларынын марагларыны өз шәхси марагларындан үстүн тутмаға даир ҝөзәл нүмунәни б. е. ә. В әсрдә Фарс империјасында падшаһ арвады олан Естер вермишдир. Сарајда јашамасына бахмајараг, о, Аллаһын ирадәсинә мүвафиг давранараг, Аллаһын халгы уғрунда өз һәјатыны тәһлүкәјә атмаға һазыр иди (Естер 1:5, 6; 4:14-16). Игтисади вәзијјәтләриндән асылы олмајараг, бизим дөврдә мәсиһчи гадынлар да кәдәрли оланлары руһландырараг, хәстәләрә баш чәкәрәк, тәблиғ ишиндә иштирак вә ағсаггалларла әмәкдашлыг едәрәк буна бәнзәр руһу тәзаһүр етдирә биләрләр. Бу ҹүр тәвазөкар баҹылар јығынҹаг үчүн әсл хејир-дуадырлар!
Бөјүклүјә даир мәсиһчи нөгтеји-нәзәри хејир-дуалар ҝәтирир
18. Бөјүклүјә даир мәсиһчи нөгтеји-нәзәринә малик олмаг һансы фајдалары ҝәтирир?
18 Бөјүклүјә даир мәсиһчи нөгтеји-нәзәринә малик олмаг чох саһәдә фајдалыдыр. Инсанлара тәмәннасыз хидмәт һәм онлара, һәм дә сәнә севинҹ ҝәтирир (Һәвариләрин ишләри 20:35). Әҝәр сән вахтыны вә ҝүҹүнү һазырлыгла вә бөјүк һәвәслә гардашлара верирсәнсә, онларын сәнә олан мәһәббәтләри артыр (Һәвариләрин ишләри 20:37). Даһа ваҹиби исә одур ки, һәмиманлыларынын рифаһы уғрунда ҝөрдүјүн ишләри Јеһова хошаҝәлән һәмд гурбаны кими гәбул едир (Филипилиләрә 2:17).
19. Бөјүклүјә даир мәсиһчи нөгтеји-нәзәринә мүнасибәтдә нәјә гәтијјәтли олмалыјыг?
19 Һәр биримизә өз үрәјини јохламаг вә өзүндән сорушмаг ваҹибдир: “Бөјүклүјә даир мәсиһчи нөгтеји-нәзәри барәсиндә јалныз данышаҹам, јохса ону сә’јлә инкишаф етдирмәјә чалышаҹам?” Јеһованын мәғрурлара гаршы олан нөгтеји-нәзәри ајдындыр (Сүлејманын мәсәлләри 16:5; 1 Петер 5:5). Гој бизим әмәлләримиз ҝөстәрсин ки, һәм јығынҹагда, һәм аилә һәјатында, һәм дә инсанларла мүнасибәтдә бөјүклүјә даир мәсиһчи нөгтеји-нәзәринә малик олмаг бизим үчүн хошдур. Вә һәр шеји Аллаһын иззәти үчүн едәҹәјик (1 Коринфлиләрә 10:31).
[Һашијәләр]
a “Ҝөзәтчи Гүлләси”нин 1984-ҹү ил 1 октјабр сајынын (рус.) 8-11-ҹи сәһифәләринә, “Мүвәффәгијјәт ахтарышында” мәгаләсинә бахын.
b Нүмунәләрә, 1992-ҹи ил үчүн “Јеһованын Шаһидләринин иллик мәҹмуәси”нә, 181, 182-ҹи сәһифәләрә (инҝ.), вә “Ҝөзәтчи Гүлләси”нин 1993-ҹү ил 1 сентјабр сајынын 27-31-ҹи сәһифәләринә (рус.) бахын.
Изаһ едә биләрсинизми?
• Бөјүклүјә даир дүнјәви нөгтеји-нәзәрдән нәјә ҝөрә гачынмаг лазымдыр?
• Исанын сөзләринә ҝөрә кимләр бөјүк сајылыр?
• Нәзарәтчиләр Мәсиһин тәвазөкарлығыны неҹә тәглид едә биләрләр?
• Бөјүклүјә даир мәсиһчи нөгтеји-нәзәрини инкишаф етдирмәкдә бизә нә көмәк едә биләр?
[27-ҹи сәһифәдәки чәрчивә]
Мәсиһчи нөгтеји-нәзәринҹә ким бөјүкдүр?
Она хидмәт едилмәсини истәјән кәсләр, јохса башгаларына хидмәт етмәјә һазыр оланлар?
Диггәт мәркәзиндә олмағы үстүн тутанлар, јохса ҝөзә чарпмајан ишләри ҝөрәнләр?
Өзүнү јүксәлдән, јохса башгаларыны јүксәлдән кәсләр?
[24-ҹү сәһифәдәки шәкил]
Фир’он III Аменһотепи тәсвир едән абидә.
[25-ҹи сәһифәдәки шәкил]
Һаманын һәлакына нә сәбәб олдуғуну билирсәнми?
[26-ҹы сәһифәдәки шәкилләр]
Башгаларына хидмәт етмәк үчүн имканлар ахтарырсанмы?