Јеһованын үрәјини севиндирән ҝәнҹләр

Өјрәнмәк үчүн олан бу мәгаләләр хүсусилә Јеһованын Шаһидләринин јығынҹагларындакы ҝәнҹләр үчүн һазырланыб. Буна ҝөрә дә, биз ҝәнҹләри бу материалы диггәтлә тәдгиг етмәјә вә јығынҹагда “Ҝөзәтчи Гүлләси”нин мүзакирәсиндә фәал иштирак етмәјә тәшвиг едирик.

“Оғлум, һикмәтли ол вә үрәјими севиндир ки, мәни писләјәнә ҹаваб верим” (СҮЛЕЈМАНЫН МӘСӘЛЛӘРИ 27:11).

1, 2. а) Әҝәр дүнја сәнә ҹәлбедиҹи ҝөрүнүрсә, бу о демәкдирми ки, сәндән јахшы мәсиһчи чыхмаз? (Ромалылара 7:21). Изаһ ет. б) Асафын нүмунәсиндән нә өјрәнирсән? (9-ҹу сәһифәдәки чәрчивәјә бах.)

ТӘСӘВВҮР ет ки, базардан вә ја мағазадан палтар алмаға чыхмысан. Ҹәрҝәләри ҝәзәркән, бирдән ҝөзүн хошуна ҝәлән бир палтара саташыр. Онун рәнҝи вә формасы сәнин истәдијин кими, гијмәти дә олдугҹа уҹуздур. Сонра палтара даһа диггәтлә баханда, парчанын гырагларынын сүзүлдүјүнү, тикишләрин исә сәлигәсиз олдуғуну ҝөрүб тәәҹҹүбләнирсән. Палтар гәшәнҝ олса да, кејфијјәтсиз имиш. Пулуну бу ҹүр кејфијјәтсиз мала верәрдинми?

² Бу нүмунәни, ҝәнҹ бир мәсиһчи кими сәнин гаршылаша биләҹәјин вәзијјәтлә мүгајисә етмәк олар. Илк бахышдан бу дүнја да һәмин палтар кими чох ҹәлбедиҹи ҝөрүнә биләр. Мәсәлән, ола билсин, сәнин синиф јолдашларын әјләнҹә ҝеҹәләринә топлашыр, наркотик маддәләр гәбул едир, спиртли ичкиләр ичир, ҹидди нијјәтләри олмадан ҝөрүшә чыхыр вә никаһдан әввәл ҹинси әлагәјә ҝирирләр. Бу ҹүр һәјат тәрзи сәни өзүнә ҹәлб едирми? Онларын азадлыг адландырдыглары бу һәјатдан, һеч олмаса, бир балаҹа дадмаг истәјин јаранырмы? Әҝәр еләдирсә, үрәјинин пис олдуғуну дүшүнүб, сәндән јахшы мәсиһчи чыхмајаҹағыны гәрарлашдырмаға тәләсмә. Ахы Мүгәддәс Китаб е’тираф едир ки, дүнја Аллаһы мәмнун етмәк истәјән инсанлара да тә’сир едә билән бөјүк ҹазибә гүввәсинә маликдир (2 Тимотејә 4:10).

3. а) Дүнјанын тәгдим етдији шејләрин архасынҹа дүшмәк нә үчүн мә’насыздыр? б) Бир мәсиһчи баҹымыз дүнјәви мејлләрин бош олдуғуну неҹә тәсвир едир?

³ Алмаг истәдијин палтары јахшы-јахшы нәзәрдән кечирдијин кими, дүнјанын тәгдим етдији шејләри дә јахшы нәзәрдән кечир. Өзүндән соруш: “Бу системин “парчасы” вә “тикиши” нә дәрәҹәдә кејфијјәтлидир?” Мүгәддәс Китабда дејилир ки, “дүнја... кечиб ҝедир” (1 Јәһја 2:17). Дүнјадан ала биләҹәјин ләззәт, чох олса да, мүвәггәти олаҹагдыр. Бундан башга, ҝүнаһкар давраныш тәрзи инсана баһа баша ҝәлир. Буну исә, һеч ҹүр “ҝәлир” адландырмаг олмаз. Өз дедијинә ҝөрә, итирилмиш ҝәнҹлијин аҹысыны јашамыш бир мәсиһчи баҹымыз дејир: “Дүнја мәфтунедиҹи вә ҹәлбедиҹи ҝөрүнә биләр. Вә о сәни инандырмаг истәјир ки, бу дүнјада гәбул олундуғу кими ағрысыз-аҹысыз әјләнә биләрсән. Бу исә гејри-мүмкүндүр. Дүнја сәни истәдији кими истифадә едәҹәк, сонра да атаҹагдыр”a. Нәјә ҝөрә өз ҝәнҹлијини бу ҹүр “кејфијјәтсиз” һәјат тәрзинә сәрф едәсән?

“Шәрирдән” мүдафиә

4, 5. а) Иса өлүмүндән бир аз әввәл Јеһоваја дуасында нә хаһиш етди? б) Бу хаһиш нәјә ҝөрә мүнасиб иди?

⁴ Индики системин дәјәрли һеч бир шеј тәклиф едә билмәдијини анлајараг, ҝәнҹ мәсиһчиләр дүнја илә достлугдан гачынмаға чалышырлар (Јагуб 4:4). Сән дә бу садиг ҝәнҹләрин сырасында варсанмы? Әҝәр еләдирсә, тә’рифә лајигсән. Әлбәттә, һәмјашыдларын тәзјигинә гаршы дурмаг вә башгаларындан сечилмәк асан дејил, лакин сән көмәксиз дејилсән.

⁵ Иса өлүмүндән бир аз әввәл Јеһоваја дуа едирди ки, онун шаҝирдләрини “шәрирдән” (КМ) горусун (Јәһја 17:15). Исанын өз Атасына бу ҹүр хаһишлә мүраҹиәт етмәјә әсаслы сәбәбләри варды. О билирди ки, јашларындан асылы олмајараг, Аллаһа садиг галмаг онун давамчыларынын һеч бири үчүн асан олмајаҹагдыр. Нәјә ҝөрә? Илк әввәл она ҝөрә ки, Исанын е’тираф етдији кими, онун шаҝирдләринин ҝөзәҝөрүнмәз ҝүҹлү дүшмәни, јә’ни “шәрир” олан Шејтан Иблис мөвҹуддур. Мүгәддәс Китабда дејилир ки, бу пис руһани варлыг “нә’рә чәкән вә ашырмаг үчүн кимисә ахтаран аслан кими ҝәзир” (1 Петер 5:8).

6. Һарадан билирик ки, Шејтан ушаглара белә рәһм етмир?

⁶ Тарих боју Шејтан гәддарлыгдан һәзз алараг бәшәријјәти амансыз вәһшиликләрә дүчар етмишдир. Онун тәкҹә Ејубун вә онун аиләсинин башына ачдығы дәһшәтли бәлалары дүшүн (Ејуб 1:13-19; 2:7). Јәгин ки, бизим ҝүнләрдә баш вермиш вә Шејтанын гәддар руһуна шәһадәт едән һадисәләр сәнин дә јадына дүшүр. Иблис гәнимәт ахтарараг ҝизлинҹә ҝәзир вә инсанлары мәһв етмәјә чалышараг, ҝәнҹләрә белә рәһм етмир. Мәсәлән, ерамызын биринҹи әсринин әввәлиндә Һирод Бејтлеһемдә ики јашына гәдәр олан оғлан ушагларынын һамысыны өлдүрмәк нијјәтинә дүшдү (Матта 2:16). Еһтимал ки, Һироду буна тәһрик едән Шејтан иди, сәбәби исә, Аллаһын вә’д едилмиш Зүрријјәти олаҹаг вә Шејтанын үзәриндә Аллаһын һөкмүнү јеринә јетирәҹәк көрпәни мәһв етмәк иди! (Тәквин 3:15). Ҝөрдүјүмүз кими, Шејтан, һәтта ушаглара белә рәһм етмир. Онун јеҝанә мәгсәди, мүмкүн гәдәр чох инсаны мәһв етмәкдир. Бу, хүсусилә дә бизим ҝүнләрә аиддир, чүнки Шејтан ҝөјдән јерә говулмуш вә “вахтынын аз олдуғуну биләрәк, бөјүк гәзәб” ичиндәдир (Вәһј 12:9, 12).

7. а) Јеһова һансы саһәләрдә Шејтанын там әксидир? б) Јеһова сәни һәјатын ләззәтиндән мәһрум етмәкми истәјир? Изаһ ет.

⁷ “Бөјүк гәзәб” ичиндә олан Шејтанын там әкси олараг, Јеһованын “үрәји мәрһәмәтлидир” (Лука 1:78). Јеһова мәһәббәтин тәҹәссүмүдүр. Јарадан бу јүксәк кејфијјәти о дәрәҹәдә тәзаһүр етдирир ки, Мүгәддәс Китабда “Аллаһ мәһәббәтдир” дејә јазылыр (1 Јәһја 4:8). Бу системин танрысы илә, сәнин хидмәт етмәк шәрәфинә лајиг ҝөрүлдүјүн Аллаһ арасында неҹә дә бөјүк тәзад мөвҹуддур! Шејтан инсанлары мәһв етмәјә чалышдығы һалда, Јеһова ‘кимсәнин һәлак олмасыны’ истәмир (2 Петер 3:9). Һәр бир кәсин, о ҹүмләдән сәнин дә һәјатын Онун үчүн дәјәрлидир. Јеһова сәни өз Кәламынын васитәсилә дүнјадан олмамаға чағырараг, һәјатын һансыса севинҹиндән мәһрум етмәјә, јахуд азадлығыны мәһдудлашдырмаға чалышмыр (Јәһја 15:19). Әксинә, Аллаһ сәни Шәрирдән горујур. Сәмави Атан сәнин бу дүнјанын бешҝүнлүк ләззәтинә дејил, даһа јахшы шејә малик олмағыны арзу едир. О истәјир ки, сән “һәгиги һәјата” — јер үзүндә Ҹәннәтдә әбәди һәјата наил оласан (1 Тимотејә 6:17-19, И–93). О, сәни бу мәгсәдә доғру аддымламаға вә она наил олмаға тәшвиг едир (1 Тимотејә 2:4). Бундан әлавә, Јеһованын сәнә хүсуси дә’вәти вар. Бу һансы дә’вәтдир?

“Үрәјими севиндир”

8, 9. а) Сән Јеһоваја нә һәдијјә едә биләрсән? б) Ејуб илә баш верән һадисә Шејтанын Јеһованы писләдијини неҹә ҝөстәрир?

⁸ Нә вахтса јахын достуна һәдијјә вермисәнми? Јәгин ки, онун неҹә севиндијини вә миннәтдарлыг һисси илә долу тәбәссүмүнү ҝөрмәк хош иди. Еһтимал ки, сән она нә һәдијјә едәҹәјинин үзәриндә узун мүддәт вә дәриндән дүшүнмүшдүн. Инди исә нөвбәти суалын үзәриндә фикирләш: Јараданын олан Јеһова Аллаһа һансы һәдијјәни бағышлаја биләрдин? Әввәлҹә белә бир фикир сәнә мә’насыз ҝөрүнә биләр. Гүдрәтли Аллаһа инсандан нә лазымдыр ки? Онун малик олмадығы елә бир шеј вармы ки, сән ону верә биләсән? Мүгәддәс Китабда Сүлејманын мәсәлләри 27:11 ајәсиндә ҹаваб вар: “Оғлум, һикмәтли ол вә үрәјими севиндир ки, мәни писләјәнә ҹаваб верим”.

⁹ Еһтимал ки, Мүгәддәс Китабдан өјрәндијин кими, Јеһованы писләјән Шејтан Иблисдир. О, Аллаһа хидмәт едән һәр кәсин буну мәһәббәтдән дејил, өз мәнфәәти наминә етдијини бәјан едир. Шејтанын иддиасына ҝөрә, әҝәр инсан чәтинликләрлә гаршылашарса, һәгиги ибадәти дәрһал тәрк едәҹәкдир. Мәсәлән, Шејтан салеһ инсан олан Ејуб барәсиндә Аллаһа деди: “Онун әтрафына, евинин әтрафына вә нәји варса, һамысынын әтрафына сән һасар чәкмәдинми? Әлләринин ишинә сән бәрәкәт вердин вә онун малы мәмләкәтдә чохалды. Фәгәт инди әлини узат да, нәји варса, һамысына тохун вә үзүнә гаршы сәнә лә’нәт едәҹәкдир” (Ејуб 1:10, 11).

10. а) Һарадан билирик ки, Шејтан јалныз Ејубун сәдагәтини шүбһә алтына гојмады? б) Һөкмранлыг мәсәләсиндә сәнин ролун нәдән ибарәтдир?

¹⁰ Мүгәддәс Китабда ҝөстәрилдији кими, Шејтан јалныз Ејубун дејил, сәни дә дахил етмәклә, Аллаһын бүтүн хидмәтчиләринин сәдагәтини шүбһә алтына гојмушдур. Шејтан үмумијјәтлә бүтүн инсанлары нәзәрдә тутараг, Јеһоваја деди: “Инсан [јалныз Ејуб јох, һәр бир кәс] ҹаны үчүн нәји варса верәр” (Ејуб 2:4). Бу һәјати мәсәләдә сән өз ролунун нәдән ибарәт олдуғуну ҝөрүрсәнми? Сүлејманын мәсәлләри 27:11 ајәсинә әсасән Јеһова сәнин Она нә исә верә биләҹәјини сөјләјир. Бурада, Аллаһы писләјән Шејтана ҹаваб вермәк үчүн әсас нәзәрдә тутулур. Јалныз дүшүн, Каинатын Һөкмдары сәни бүтүн дөврләрин ән ваҹиб мәсәләсинин һәллиндә иштирак етмәјә дә’вәт едир! Бу неҹә дә бөјүк мәс’улијјәт вә шәрәфдир! Јеһованын хаһишини јеринә јетирә биләрсәнми? Ејуб буну јеринә јетирә билди (Ејуб 2:9, 10). Буну Иса вә һәмчинин тарих боју јашамыш сајсыз-һесабсыз инсанлар да, о ҹүмләдән чохлу ҝәнҹләр дә јеринә јетирә билмишләр (Филипилиләрә 2:8; Вәһј 6:9). Буна сәнин дә ҝүҹүн чатар. Һеч заман унутма ки, бу мәсәләдә садәҹә кәнарда дуруб мүшаһидә етмәк олмаз. Өз давраныш тәрзинлә сән ја Шејтанын јаланынын, ја да Јеһованын ҹавабынын тәрәфдары олдуғуну ҝөстәрирсән. Сән нәји сечәҹәксән?

Јеһова сәнин гајғына галыр

11, 12. Сәнин Јеһоваја хидмәт едиб-етмәмәјин Онун үчүн әһәмијјәт кәсб едирми? Изаһ ет.

¹¹ Сәнин едәҹәјин сечим Јеһова үчүн әһәмијјәт кәсб едирми? Мәҝәр Шејтана ҹаваб вермәк үчүн Аллаһа сәдагәтләрини горумуш инсанлар кифајәт дејилми? Доғрудур, Иблис иддиа едирди ки, һеч бир инсан Јеһоваја мәһәббәтдән хидмәт етмир вә бу иддианын јалан олдуғу артыг сүбут едилмишдир. Лакин буна бахмајараг, Јеһова һөкмранлыг мәсәләсиндә Онун тәрәфини тутманы истәјир, чүнки О, шәхсән сәнин гајғына галыр. Иса демишди: “Ҝөјләрдәки Атанызын елә бир мурады јохдур ки, бу кичикләрдән бири һәлак олсун” (Матта 18:14).

¹² Бәли, Јеһова сәнин сечәҹәјин јола е’тинасыз јанашмыр. Бундан әлавә, сечдијин јолун Она шәхсән аидијјаты вар. Мүгәддәс Китабда ајдын шәкилдә дејилир ки, инсанларын һәм јахшы, һәм дә пис һәрәкәтләри Јеһовада ҝүҹлү һиссләрә сәбәб олур. Мәсәлән, исраиллиләр тәкрар-тәкрар Јеһоваја гаршы үсјан етдикләри үчүн Ону ‘инҹидирдиләр’ (Мәзмур 78:40, 41). Нуһун ҝүнләриндә Туфандан әввәл “инсанларын шәр әмәлләри” чохалан заман, Јеһова “үрәјиндә кәдәрләнди” (Јарадылыш 6:5, 6, МКШ). Бу сөзләрин мә’насына вар. Әҝәр сән пис јолу сечсән, өз Јараданыны кәдәрләндирә биләрсән. Бу һеч дә о демәк дејил ки, Аллаһ һәддиндән артыг һәссас вә тез тә’сирләнәндир. Әксинә О, сәни севир вә сәнин рифаһын үчүн гајғы ҝөстәрир. Сән дүзҝүн даврандыгда исә Јеһованын үрәјини севиндирирсән. О, јалныз Шејтана ҹаваб верә биләҹәји үчүн дејил, һәмчинин сәнә мүкафат верә биләҹәји үчүн дә севинир. Вә О, буну чох истәјир (Ибраниләрә 11:6). Бәли, сәнин Јеһова Аллаһ кими севән Атан вар!

Индидән ала биләҹәјимиз чохсајлы хејир-дуалар

13. Јеһоваја хидмәт артыг индидән неҹә хејир-дуалар ҝәтирир?

¹³ Јеһоваја хидмәт едән кәсләри јалныз ҝәләҹәкдә хејир-дуалар ҝөзләмир. Јеһованын бир чох ҝәнҹ Шаһидләри артыг индидән севинҹ вә хошбәхтлик дујурлар, бу да сәбәбсиз дејил. Мәзмурчу јазырды: “Рәббин нәсиһәти доғрудур; үрәји севиндирәр” (Мәзмур 19:8). Јеһова бизә нәјин хејир ҝәтирәҹәјини һамыдан јахшы билир. Ишаја пејғәмбәрин васитәсилә Јеһова демишдир: “Фајдалы оланы сәнә өјрәдән, јеријәҹәјин јолда сәни ҝүдән, Аллаһын Рәбб мәнәм. Каш ки, әмрләрими јахшы динләјәјдин! О заман сүлһүн чај кими, салеһлијин дә дәниз далғалары кими оларды” (Ишаја 48:17, 18).

14. Мүгәддәс Китабын принсипләри үзүҹү борҹлардан гачынмагда сәнә неҹә көмәк едә биләр?

¹⁴ Мүгәддәс Китабын принсипләринә риајәт етмәклә сән өзүнү бир чох бәлалардан вә изтираблардан горујаҹагсан. Мәсәлән, Мүгәддәс Китабда дејилир ки, пула мәһәббәт инкишаф етдирән кәсләр “өзләринә бир чох әзаблар чәкдирдиләр” (1 Тимотејә 6:9, 10). Мүгәддәс Китабын бу сөзләринин нә гәдәр доғру олдуғуна өз тәҹрүбәсиндә әмин олан һансыса һәмјашыдыны таныјырсанмы? Бә’зи ҝәнҹләр ән баһалы фирманын палтарыны ҝејинмәк вә ән јени техниканы алмаг хатиринә борҹ ичиндә үзүрләр. Әслиндә ҝүҹүн чатмајан шејләри алдыгда вә јүксәк фаизлә пул ҝөтүрдүкдә сән өзүнү узун мүддәтә гул едирсән (Сүлејманын мәсәлләри 22:7).

15. Мүгәддәс Китабын принсипләри, ҹинси әхлагсызлығын ҝәтирә биләҹәји бәлалардан сәни неҹә горујур?

¹⁵ Һәмчинин, ҹинси әхлагсызлыгла бағлы проблемләр үзәриндә дә дүшүн. Һәр ил бүтүн дүнјада евли олмајан сајсыз-һесабсыз јенијетмә гызлар һамилә галырлар. Бә’зиләри бөјүтмәк имканында олмадыглары арзуолунмаз ушаг доғурлар. Диҝәрләри исә аборт едир, сонра да виҹдан әзабы чәкирләр. Елә ҝәнҹ оғлан вә гызлар да вар ки, ҹинси јолла өтүрүлән, мәсәлән, ГИЧС кими хәстәликләрә тутулурлар. Јеһованы таныјан шәхсләр үчүн, әлбәттә ки, ән дәһшәтли агибәт — Јеһова илә мүнасибәтин позулмасыдырb (Галатијалылара 5:19-21). Мүгәддәс Китабда јахшы дејилир: “Ҹинси әхлагсызлыгдан чәкинин” (1 Коринфлиләрә 6:18).

Сән “бәхтијар Аллаһа” хидмәт едирсән

16. а) Һарадан билирик ки, Јеһова ҝәнҹлијин сәнә севинҹ ҝәтирмәсини арзу едир? б) Нәјә ҝөрә Јеһова сәнин үчүн давраныш нормаларыны тә’сис едир?

¹⁶ Мүгәддәс Китабда Јеһова “бәхтијар Аллаһ” адланыр (1 Тимотејә 1:11, ЈД). О, сәнин дә бәхтијар олмағыны арзу едир. Аллаһын Кәламында дејилир: “Еј ҝәнҹ адам, ҝәнҹлијиндә севинҹли ол вә ҝәнҹлијинин ҝүнләриндә үрәјин сәни севиндирсин” (Ваиз 11:9). Лакин Јеһова даһа сонраны ҝөрүр вә һәм јахшы, һәм дә пис һәрәкәтин ҝәләҹәкдә һансы нәтиҹәләр ҝәтирәҹәјини билир. Буна ҝөрә дә, О, сәнә бу ҹүр нәсиһәт верир: “Пис ҝүнләр ҝәлмәдән вә: Онлардан зөвг алмырам, дејәҹәјин илләр јахынлашмадан... ҝәнҹлијинин ҝүнләриндә сәни Јараданы хатырла” (Ваиз 12:1, 2).

17, 18. Ҝәнҹ бир мәсиһчи гыз Јеһоваја хидмәтиндә өз хошбәхтлијини неҹә тәсвир едир вә бу ҹүр севинҹи сән неҹә дуја биләрсән?

¹⁷ Бу ҝүн бир чох ҝәнҹләр Јеһоваја хидмәт едәрәк бөјүк хошбәхтлик дујурлар. Мәсәлән, 15 јашлы Лина дејир: “Мән чох мәмнунам. Јахшы сағламлығым вар, чүнки нә сигарет чәкир, нә дә наркотик гәбул едирәм. Јығынҹагда, Шејтанын ағыр тәзјигинә таб ҝәтирмәјимә көмәк едән дәјәрли рәһбәрлик алырам. Хошбәхтликдән шәфәг сачырам, чүнки јығынҹагда фајдалы үнсијјәтим вар. Ән башлыҹасы исә, јер үзүндә әбәди һәјата ҝөзәл үмидим вар”.

¹⁸ Лина кими, бир чох ҝәнҹ мәсиһчиләр иман уғрунда мөһкәм мүбаризә апарырлар, бу исә онлара севинҹ ҝәтирир. Бу ҝәнҹләр дәрк едирләр ки, һәрдән јаранан чәтинликләрә бахмајараг, онларын һәјатларынын һәгиги мә’насы вә һәгиги ҝәләҹәји вар. Сәнин рифаһын үчүн сәмими гајғы ҝөстәрән Аллаһа сән дә хидмәт етмәјә давам ет. Онун үрәјини севиндир, О да сәни инди вә әбәдијјән севиндирәҹәкдир! (Мәзмур 5:11).

[Һашијәләр]

Хатырлајырсанмы?

• “Шәрир” олан Шејтан тәрәфиндән сәнин үчүн һансы тәһлүкә мөвҹуддур?

• Сән Јеһованын үрәјини неҹә севиндирә биләрсән?

• Јеһованын сәнин гајғына галдығыны Мүгәддәс Китаб неҹә ҝөстәрир?

• Јеһоваја хидмәт һансы хејир-дуалары ҝәтирир?

[9-ҹу сәһифәдәки чәрчивә/шәкил]

Салеһ аз гала бүдрәмишди

Асаф гәдим Исраилдә Јеһованын мә’бәдиндә танынмыш левили мусигичи иди. О, һәтта Аллаһа ибадәт заманы ифа олунан маһнылар да бәстәләмишди. Јеһоваја хидмәтдә бу ҹүр шәрәфли мәс’улијјәтләринә бахмајараг, Асаф, онун фикринҹә Аллаһын ганунларыны позараг ҹәзасыз галан мүасирләринә һәсәд апармаға башламышды. Асаф е’тираф едирди: “Ајагларым бүдрәмәк үзрә иди; аз галды аддымларым сүрүшсүн, чүнки писләрин әмин-аманлығыны ҝөрүнҹә мәғрурлары гысгандым” (Мәзмур 73:2, 3).

Сонрадан Асаф мә’бәдә ҝәлиб, Аллаһа дуасында үрәјини бошалтды. О, јенидән ајдын руһани нөгтеји-нәзәрә саһиб олду вә баша дүшдү ки, Јеһова пислијә нифрәт едир вә вахты ҝәләндә һәм писләр, һәм дә салеһләр өз әкдикләрини бичәҹәкләр (Мәзмур 73:17-20; Галатијалылара 6:7, 8). Доғрудан да, пис инсанлар сүрүшкән јердә дурурлар. Онлар, ән узағы, Јеһова бу натәмиз системи мәһв едән заман јыхылаҹаглар (Вәһј 21:8).

[10-ҹу сәһифәдәки шәкилләр]

Бир чох ҝәнҹләр һәмиманлылары илә бирликдә Јеһоваја хидмәт едәрәк бөјүк севинҹ дујурлар.