«Мәсиһи һәјаты вә ибадәти. Иш дәфтәри» үчүн мәнбәләр
© 2023 Watch Tower Bible and Tract Society of Pennsylvania
6—12 НОЈАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 13, 14
«“Инсан өлсә, бир дә јашармы?”»
Бәшәријјәтин өлүмлә «әлбәјаха» мүбаризәси
Чин императорлары да өлмәзлик арзусунда идиләр. Фиронлардан фәргли олараг, онлар буна дирилик сују васитәсилә наил олмаг истәјирдиләр. Император Син Ши Хуанди әбәди јашамаг үчүн өз әлкимјаҝәрләринә сеһирли ички һазырламағы әмр етмишди. Иш ондадыр ки, онларын һазырладығы мәһлулларын тәркибиндә зәһәрли ҹивә вар иди. Елә бу сеһирли ичкиләрдән бири дә императорун һәјатына сон гојду.
Дејиләнә ҝөрә, ерамызын 16-ҹы әсрин испан тәдгигатчысы Хуан Понс де Леон ҹаванлыг чешмәсини тапмаг үчүн Кариб дәнизини әләк-вәләк етмишди. Бунун сајәсиндә о, Флориданы (АБШ) кәшф етди. Анҹаг бир нечә ил сонра һиндуларла тоггушма заманы өлдүрүлдү. Беләҹә, онун ҹаванлыг чешмәси ахтарышы боша чыхды.
Ағаҹ кәсилсә, јенә ҹүҹәрәр?
ЛИВАНДА битән мөһтәшәм сидр ағаҹы һара, әјри-үјрү зејтун ағаҹы һара. Онлары бир-биринә тај тутмаг олмаз. Амма зејтун ағаҹынын гејри-ади бир өзәллији вар: о, чох дөзүмлүдүр. Бәзи зејтун ағаҹларынын 1000 јашы вар. Зејтун ағаҹы ҝөвдәси мәһв олса да, шахәләнән көкү сајәсиндә јенидән әмәлә ҝәлә биләр. Нә гәдәр ки көкү сағдыр, ағаҹ јенидән ҹүҹәрәҹәк.
Әјјуб пејғәмбәр инанырды ки, өлсә дә, јенидән јашајаҹаг (Әјј. 14:13—15). О, бир ағаҹы нүмунә чәкәрәк Аллаһын ону јенидән һәјата гајтармаға гадир олдуғуна әминлијини билдирмишди. Чох еһтимал ки, о, зејтун ағаҹындан данышырды. Пејғәмбәр демишди: «Һәтта ағаҹ үчүн үмид вар, кәсилсә, јенә ҹүҹәрәр». Ҝүҹлү јағыш сәрт гураглыға сон гојанда зејтун ағаҹынын гурумуш көтүјүндә јенидән фиданлар баш галдыра биләр вә ағаҹ «ҹаван битки кими гол-будаг атар» (Әјј. 14:7—9).
«Гардашын дириләҹәк»!
6 Ҝәлин Әјјуб пејғәмбәрин сөзләринә нәзәрә салаг. О әмин иди ки, өлсә белә Јеһова ону дирилдәҹәји ҝүнүн һәсрәтини чәкәҹәк (Әјј. 14:14, 15). Јеһова бүтүн өлән хидмәтчиләринә ејни һиссләри бәсләјир. Јеһова онлары хошбәхт, сағлам һәјата гајтармағы арзулајыр. Бәс Ону танымадан өлән милјардларла инсан барәдә нә демәк олар? Аллаһымызын онларла бағлы нијјәти нәдир? Мәһәббәтли Јараданымыз онлары да һәјата гајтараҹаг (Һәв. 24:15). Јеһова истәјир ки, һәмин инсанларын да онунла дост олмаг, јер үзүндә әбәди јашамаг фүрсәти олсун (Јәһ. 3:16). Ҝөрдүјүмүз кими, Јеһова өлүләри дирилтмәји чох истәјир.
Һикмәт хәзинәсиндән инҹиләр
it-1-Е с. 191
Күл
Күл һәмчинин әһәмијјәтсиз, һеч бир дәјәри олмајан шејләри ифадә етмәк үчүн истифадә олунурду. Мәсәлән, Ибраһим пејғәмбәр Аллаһ гаршысында аҹизлијини ифадә етмәк үчүн өзүнү «тоз,.. күл» адландырмышды (Јр 18:27; һәмчинин бах: Әш 44:20; Әј 30:19). Әјјуб исә сахта достларынын дедикләрини күл адландырмышды (Әј 13:12).
13—19 НОЈАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 15—17
«Әлифәзин сөзләри тәсәлли јох, әзаб верирди»
Үмидинизи мөһкәм сахлајын
10 Үмид дәбилгәмиз бизи мәнфи дүшүнҹәдән дә горуја биләр. Бәзиләри елә дүшүнүр ки, Јеһованы һеч вахт разы сала билмәјәҹәкләр. Онлар белә дејир: «Мән һеч вахт әбәди һәјаты аланларын сырасында олмајаҹағам. Чүнки буна лајиг дејиләм. Һеч вахт Јеһованын истәдији кими инсан ола билмәјәҹәјәм». Әјјуб пејғәмбәрин сахта досту Әлифәз Әјјубун ағлына буна бәзәр фикирләр јеритмәјә чалышырды. Әлифәз демишди: «Фани инсан нәдир ки, тәмиз олсун?» Сонра исә Аллаһ һагда белә демишди: «Бах, О, мәләкләринә белә, ҝүвәнмир, һәтта ҝөјләр Онун ҝөзүндә пак дејил» (Әјј. 15:14, 15). Јалана бир бах! Унутмајын ки, сизин бу ҹүр дүшүнмәјинизи Шејтан истәјир. О билир ки, сиз бу ҹүр фикирләшсәниз, ҝетдикҹә үмидинизи итирәҹәксиниз. Буна ҝөрә дә бу ҹүр јанлыш фикирләри ағлыныза јахын бурахмајын, әксинә, фикринизи Јеһованын вәдләринә ҹәмләјин. Јеһова истәјир ки, сиз әбәди јашајасыныз вә бу мәгсәдинизә чатмаг үчүн сизә көмәк едәҹәк. Гәтијјән буна шүбһә етмәјин! (1 Тим. 2:3, 4).
Иса Мәсиһ кими тәвазөкар вә шәфгәтли олун
16 Сөзләримизлә. Шәфгәт бизи гәмҝинләрә тәскинлик вермәјә тәшвиг едир (1 Салон. 5:14). Биз сөзләримизлә бу ҹүр инсанлары неҹә руһландыра биләрик? Онларын гејдинә галдығымызы, онлара ҝөрә нараһат олдуғумузу әкс етдирән сөзләр дејиб овгатларыны галдыра биләрик. Сәмими тәриф сөзләримизлә онлара өз јахшы ҹәһәтләрини вә баҹарыгларыны ҝөрмәјә көмәк едә биләрик. Дејә биләрик ки, әҝәр Јеһова онлары Иса Мәсиһин давамчысы олмаг шәрәфинә лајиг ҝөрүбсә, демәли онлар Јеһованын ҝөзүндә чох дәјәрлидирләр (Јәһ. 6:44). Биз онлары әмин едә биләрик ки, Јеһова гәлбисыныг, пәришан хидмәтчиләрини бир ан белә унутмур (Зәб. 34:18). Хош сөзләр тәсәллијә еһтијаҹы олан кәсләр үчүн әсл мәлһәмдир (Мәс. 16:24).
Һикмәт хәзинәсиндән инҹиләр
«Әјјуб» китабындан диггәтәлајиг фикирләр
7:9, 10; 10:21; 16:22 — Әјјубун бу сөзләри онун дирилмәјә инанмадығынымы ҝөстәрир? Бу сөзләр Әјјубун јахын ҝәләҹәјинә аид иди. Бәс белә олдугда о, нәји нәзәрдә тутурду? Мүмкүн олан вариантлардан бири одур ки, әҝәр о өлсә иди, мүасирләриндән һеч бири ону ҝөрмәјәҹәкди. Онларын нөгтеји-нәзәринҹә о, Аллаһын тә’јин етдији вахт чатынҹа нә өз евинә гајыдаҹагды, нә дә ону таныјаҹагдылар. Әјјуб һәм дә ола билсин нәзәрдә тутурду ки, көмәк олмадан һеч ким Шеолдан гајыда билмәз. Әјјубун ҝәләҹәкдә олаҹаг дирилмәјә үмид етмәси 14:13-15 ајәләриндән ајдындыр.
20—26 НОЈАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 18, 19
«Диндашларынызы һеч вахт тәрк етмәјин»
Исанын ағламасындан нә өјрәнирик?
9 Сиз гәм-гүссә ичиндә оланлара дајаг ола биләрсиниз. Иса Марта вә Мәрјәмлә бирликдә ағламагла јанашы, онлары динләјиб сакитләшдирмишди. Биз дә белә едә биләрик. Австралијада јашајан Дан адлы ағсаггал дејир: «Һәјат јолдашым вәфат едәндә дәстәјә еһтијаҹым вар иди. Бир нечә әр-арвад ҝүнүн истәнилән сааты мәни динләмәјә һазыр идиләр. Онларын јанында раһат ағлајыб, үрәјими бошалда билирдим, өзләрини нараһат һисс етмирдиләр. Мән бәзи ишләри ҝөрәҹәк вәзијјәтдә олмајанда онлар мәнә көмәк едирдиләр, мәсәлән, алыш-вериш едирдиләр, јемәк биширирдиләр, машынымы јујурдулар. Һәмчинин тез-тез мәнимлә бир јердә дуа едирдиләр. Онлар “дар ҝүн үчүн доғулмуш” әсл дост вә гардаш идиләр» (Мәс. 17:17).
Доғмамыз Јеһованы тәрк едәндә
16 Аиләнин садиг үзвләринә дајаг олмаға давам един. Онларын сизин мәһәббәтинизә, руһландырыҹы сөзләринизә инди даһа чох еһтијаҹлары вар (Ибр. 10:24, 25). Бәзән јығынҹагдан кәнар едилмиш инсанын аилә үзвләри өзләринә гаршы елә мүнасибәт ҝөрүр ки, санки онлар да јығынҹагдан кәнар едилибләр. Гојмајын онлар өзләрини белә һисс етсин! Валидејнләри һәгигәтдән ҝетмиш ҝәнҹләрин тәрифә вә руһландырыҹы сөзләрә хүсусилә еһтијаҹы вар. Марија баҹынын јолдашы јығынҹагдан кәнар едилмишди вә аиләсини атыб ҝетмишди. Баҹы дејир: «Бәзи достларымыз бизә ҝәлиб, јемәк биширмәјә, аиләви ибадәт кечирмәјә көмәк едирдиләр. Онлар мәним дәрдими өз дәрдләри билдиләр, мәнимлә ағладылар. Мәним һагда шајиәләр данышыланда мәни мүдафиә едирдиләр. Онлар мәни сөзүн әсл мәнасында дирчәлтдиләр!» (Ром. 12:13, 15).
w90-Е 1/9 с. 22, абз. 20
Мәсулијјәтләр алмаға ҹан атырсыныз?
20 Ағсаггаллар шурасы нәзәрә алмалыдыр ки, ағсаггал вә ја јығынҹаг хидмәтчисинин тәјинатындан азад едилмәси вә ја өзүнүн көнүллү сурәтдә тәјинатындан имтина етмәси һәмин гардашда стрес јарада биләр. Әҝәр гардаш јығынҹагдан кәнар едилмәјибсә, ағсаггаллар онун депрессијада олдуғуну ҝөрүрсә, онда мәһәббәтлә она руһани јардым ҝөстәрмәлидирләр (1 Салоникилиләрә 5:14). Онлар гардаша јығынҹагда дәјәрли јеринин олдуғуну ҝөрмәјә көмәк етмәлидирләр. Ола билсин, она һәтта мәсләһәт верилиб. Бунунла белә, һәмин гардаш тәвазөкардырса вә мәсләһәти миннәтдарлыгла гәбул едирсә, онун јығынҹагдакы мәсулијјәтләрини бәрпа етмәк үчүн узун мүддәт ҝөзләмәјә еһтијаҹ јохдур.
Һикмәт хәзинәсиндән инҹиләр
w94-Е 1/10 с. 32
Хош сөз бөјүк ҝүҹә маликдир
Әјјубун өзүнүн руһланмаға еһтијаҹы олса да, Әлифәз вә достлары она хош, руһландырыҹы сөзләр демәдиләр. Башына ҝәләнләрдә ону ҝүнаһландырдылар вә ҝизли ҝүнаһ ишләдијинә ејһам вурдулар (Әјјуб 4:8). Бир китабда дејилир: «Әјјубун еһтијаҹы олан тәк шеј шәфгәт иди. Лакин бунун әвәзиндә о, “доғру” вә тамамилә бәлағәтли дини вә әхлаги мүлаһизәләр ешидирди» («The Interpreter’s Bible»). Әлифәз вә достларынын дедикләри Әјјубу о гәдәр үзмүшдү ки, о фәрјад едәрәк демишди: «Нә вахтадәк мәни тәнҝә ҝәтирәҹәксиниз, сөзләринизлә мәни әзәҹәксиниз?» (Әјјуб 19:2).
Һеч вахт јол вермәмәлијик ки, дүшүнмәдән вә сәрт данышыб диндашымызын фәрјад етмәсинә сәбәб олаг. (Ганунун тәкрары 24:15 ајәси илә мүгајисә ет.) Бир Мүгәддәс Китаб ајәсиндә дејилир: «Өлүм вә һәјат дилин әлиндәдир, ону севәнләр бәһрәсини бичәр» (Мәсәлләр 18:21).
27 НОЈАБР — 3 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 20, 21
«Салеһлик вар-дөвләтлә өлчүлмүр»
Аллаһ гаршысында зәнҝинсәнми?
12 Исанын мәсәлиндә Аллаһ гаршысында зәнҝин олмагла инсанын өзү үчүн мал-мүлк јығмасы гаршы-гаршыја гојулур. Иса бунунла дејирди ки, һәјатымызда ән ваҹиб шеј вар-дөвләт топламаг вә ја оланымыздан һәзз алмаг олмамалыдыр. Әксинә, вәсаитләримиздән елә истифадә етмәлијик ки, Јеһова илә мүнасибәтләримизи јахшылашдыраг, башга сөзлә, мөһкәмләндирәк. Белә етмәклә биз Аллаһ гаршысында зәнҝин олаҹағыг. Чүнки Аллаһымыз үзәримизә хејир-дуалар јағдыраҹаг. Мүгәддәс Китабда дејилир: «Рәббин хејир-дуасы инсана сәрвәт ҝәтирәр, даһа она гүссә вермәз» (Сүлејманын мәсәлләри 10:22).
Һикмәт хәзинәсиндән инҹиләр
w95-Е 1/1 с. 9, абз. 19
Шејтан вә онун ишләри үзәриндә гәләбә чал
19 Мараглыдыр ки, Аллаһын садиг бәндәси Әјјуб Шејтанын Әлифәз вә Сөфәр васитәсилә тәлгин етдији «нараһат дүшүнҹәләр»лә мүбаризә апармалы олмушду (Әјјуб 4:13—18; 20:2, 3). Нәтиҹәдә, бу фикирләр она ағры верирди, дүшүнҹәсинә тәсир едән «дәһшәтләр» уҹбатындан ағлына ҝәләни данышырды (Әјјуб 6:2—4; 30:15, 16). Әлиһу сакитҹә Әјјубу динләди вә мәсәләјә һикмәт саһиби Јеһованын нәзәри илә бахмаға сәмими шәкилдә көмәк етди. Ејнилә бу ҝүн ағсаггаллар да чалышырлар ки, дәрди оланларын гајғысына галсынлар, онларын дәрдләрини даһа да ағырлашдырмасынлар. Әлиһу кими онлар да сәбирлә дәрдлиләрә гулаг асыр вә сонра Аллаһын Кәламы васитәсилә санки онларын «башына јағ сүртүб» сакитләшдирирләр (Әјјуб 33:1—3, 7; Јагуб 5:13—15). Беләликлә, истәр олмуш, истәрсә дә хәјалында ҹанландырдығы һадисәләрә ҝөрә гәлб ағрысы чәкән, јахуд Әјјуб кими «јухуларла,.. рөјаларла ваһимәјә» дүшән инсан јығынҹагда Мүгәддәс Китабдан тәсәлли тапа биләр (Әјјуб 7:14; Јагуб 4:7).
g-Е 9/15 с. 6
Маддијјата таразлы мүнасибәт
Пула таразлы јанашмаг истәјирсинизсә, өзүнүзү тәһлил етмәкдә фајда вар. Мәсәлән, өзүнүзә ашағыдакы суаллары верин:
◻ Тез бир заманда варланмаг вәди верән малијјә пирамидалары мәни ҹәлб едир?
◻ Пул мәсәләсиндә сәхавәтли олмаг мәнә чәтин ҝәлир?
◻ Һәмишә пулдан вә саһиб олдуглары шејләрдән данышан инсанларла достлуг етмәјә мејиллијәм?
◻ Пул газанмаг үчүн јалана вә ја кәләјә әл атырам?
◻ Пул өзүмү өнәмли бири кими һисс етмәјимә сәбәб олур?
◻ Ҝеҹә-ҝүндүз пул һаггында дүшүнүрәм?
◻ Пула мүнасибәтим сағламлығыма вә аилә һәјатыма мәнфи тәсир едир?
Әҝәр бу суаллардан һансыса биринә «бәли» ҹавабыны вердинизсә, мадди дүшүнҹәләри вә мејилләри рәдд етмәјә чалышын. Пула вә мал-дөвләтә чох өнәм верән инсанларла достлугдан чәкинин. Бунун әксинә, вар-дөвләтә дејил, јүксәк әхлаги дәјәрләрә өнәм верән инсанларла отуруб-дурун.
Пул севдасынын үрәјиниздә көк салмасына гәтијјән јол вермәјин. Пул достларыныздан, аиләниздән, емосионал вә физики сағламлығыныздан өндә ҝәлмәмәлидир. Белә етсәниз, пула таразлы јанашдығынызы ҝөстәрмиш олаҹагсыныз.
g-Е 5/09 с. 12—13
Аллаһ варлы олмағымызы истәјир?
БУ ифадәләр мадди сәрвәти Танрынын разылығынын ифадәси кими ҝөрән бәзи дини групларын дүшүнҹәсини әкс етдирир. Онлар тәблиғат апарырлар ки, әҝәр Аллаһын ҝөзүндә доғру оланы едирсинизсә, О сизә бу һәјатын наз-немәтләрини әлдә етмәк имканы верәҹәк, һәм дә ҝәләҹәкдә сизә бол немәтләр бәхш едәҹәк. Бу ҹүр нәзәријјә ҝениш јајылыб вә ону тәблиғ едән китаблар ән чох сатылан китаблар сијаһысындадыр. Бәс бу «фираванлыг нәзәријјәси» Мүгәддәс Китаба ујғун ҝәлир?
Мүгәддәс Китабда «хошбәхт Аллаһ» адланан Јараданымыз, сөзсүз ки, бизим хошбәхт, мәналы һәјат сүрмәјимизи истәјир (1 Тимутијә 1:11; Зәбур 1:1—3). Үстәлик, О Ону разы саланлара немәтләр бәхш едир (Мәсәлләр 10:22). Бәс һал-һазырда һәмин немәтләр садәҹә мадди фираванлығы өзүнә дахил едир? Аллаһын ирадәсинә мүвафиг олараг һансы дөврдә јашадығымызы баша дүшәндә ҹаваб ајдын олур.
Варланмаг вахтыдыр?
Гәдимдә Јеһова Аллаһ бәзи хидмәтчиләринә зәнҝинлик, вар-дөвләт нәсиб етмишди. Мәсәлән, ҝөтүрәк гәбилә башчысы Әјјубу, Сүлејман падшаһы (1 Падшаһлар 10:23; Әјјуб 42:12). Бунунла белә, Аллаһдан горхан бир чох мөмин инсанлар, о ҹүмләдән, вәфтизчи Јәһја вә Иса Мәсиһ садә һәјат јашамышдылар (Марк 1:6; Лука 9:58). Бундан нә гәнаәтә ҝәлирик? Мүгәддәс Китаба әсасән Аллаһ Өз хидмәтчиләри илә һәмин дөврдәки нијјәтинә мүвафиг шәкилдә давранырды (Ваиз 3:1). Ејни принсипи бу ҝүн өзүмүзә неҹә тәтбиг едә биләрик?
Мүгәддәс Китабда пејғәмбәрлик олунур ки, биз ахырзаманын «сон дәрәҹә чәтин бир вахт»ында јашајырыг. Бу дөврүн әламәтдар ҝөстәриҹиләри бунлардыр: мүһарибә, хәстәлик, гытлыг, зәлзәлә, иғтишаш. 1914-ҹү илдән бәри бу бәлалар мисли ҝөрүнмәмиш дәрәҹәдә бәшәријјәти ағушуна алыб (Мәтта 24:3; 2 Тимутијә 3:1—5; Лука 21:10, 11; Вәһј 6:3—8). Бир сөзлә, бу дүнја батмаг үзрә олан ҝәми кимидир! Бу фактлара әсаслансаг, Аллаһ үчүн өнәмли олан һәр бир хидмәтчисинә мадди фираванлыг бәхш етмәкдир, јохса Онун бизимлә бағлы даһа өнәмли планлары вар?
Иса Мәсиһ бизим дөврү Нуһун ҝүнләри илә мүгајисә етмишди. О демишди: «Нуһун вахтында неҹә идисә, инсан Оғлунун һүзуру заманы да елә олаҹаг. О вахт, дашгындан әввәл, Нуһ ҝәмијә минәнә гәдәр ҹамаат јејир, ичир, евләнир, әрә ҝедирди. Дашгын ҝәлиб онларын һамысыны апармајынҹа һеч нәјә мәһәл гојмурдулар. Инсан Оғлунун һүзуру заманы да белә олаҹаг» (Мәтта 24:37—39). Иса һәмчинин бизим дөврү Лутун ҝүнләринә бәнзәтмишди. Лутун чеврәсиндәки инсанлар, Сәдум вә Әмурәнин сакинләри «јејир-ичир, алыр-сатыр, әкир-тикирдиләр. Амма Лут Сәдумдан чыхдығы ҝүн ҝөјдән атәш вә күкүрд јағыб һамыны мәһв етди». Иса һәмчинин әлавә етди: «Инсан Оғлунун зүһур едәҹәји ҝүндә дә белә олаҹаг» (Лука 17:28—30).
Сөзсүз, јејиб-ичмәкдә, алыб-сатмагда, аилә гурмагда пис һеч нә јохдур. Тәһлүкә бу шејләрә һәддиндән артыг алудә олуб һансы дөврдә јашадығыны унутмагдыр. Она ҝөрә дә өзүнүздән сорушун: «Мәҝәр Аллаһ бизә диггәтимизи јајындырыб бизи руһани ишләрдән сојудан немәтләр бәхш едәр? Белә етсә иди, бизә јахшылыг етмиш оларды?» Хејр. Әксинә, О бизә бөјүк пислик етмиш оларды. Бу, мәһәббәтли Аллаһа хас дејил! (1 Тимутијә 6:17; 1 Јәһја 4:8).
4—10 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 22—24
«Инсандан Аллаһа нә фајда?»
Јанлыш дүшүнҹә тәрзинә мүгавимәт ҝөстәрин!
Аллаһын гәддар вә фикриндән дөнмәз олдуғуну дүшүнмәк инсанларын Онун ҝөзүндә һеч бир дәјәрә малик олмамасы фикриндән ирәли ҝәлир. Үчүнҹү дәфә нитг сөјләјән заман Елифаз сорушур: «Инсан Аллаһа фајда верә биләрми? Мүдрик адам Она фајда верәрми?» (Әјјуб 22:2). Елифаз, инсанын Аллаһын ҝөзүндә лазымсыз олдуғуну дүшүнүрдү. Билдад да буна бәнзәр фикир сөјләјир: «Фани инсан Аллаһ гаршысында неҹә салеһ ола биләр? Гадындан доғулан неҹә тәмиз ола биләр?» (Әјјуб 25:4). Белә сөзләрлә онлар Әјјубун, ади бир инсан олдуғуна бахмајараг, өзүнүн Аллаһын гаршысында салеһ олдуғуну дүшүнмәсини мүһакимә едирдиләр.
Бу ҝүн бә’зиләри өзләрини лазымсыз вә һеч нәјә јарамајан һесаб едәрәк мә’јуслуға гапылырлар. Еһтимал ки, буна сәбәб онларын алдыглары тәрбијә, һәјатын ҝәрҝинлији, јахуд да милли-етник нифрәт һиссләри олмушдур. Анҹаг Шејтан вә онун ҹинләри инсанын алчалдығыны вә руһдан дүшдүјүнү ҝөрәндә һәзз алырлар. Һәр шејә Гадир олан Аллаһы разы салмаг ҹәһдинин әбәс олдуғуна инсаны инандыра билдикдән сонра, ону бүдрәтмәк асандыр. Вахт кечдикҹә, һәмин инсаны ‘ахын ајыра’, һәтта ‘јашајан Аллаһдан узаглашадыра’ биләр (Ибраниләрә 2:1; 3:12).
Јаш вә сағламлыгла әлагәдар проблемләр ортаја чыхдыгда инсана елә ҝәлә биләр ки, онларын инди Аллаһын Падшаһлығы наминә етдикләри ҝәнҹ, сағлам вә гүввәтли олдуғу заман етдикләри илә мүгајисәдә дәјәрсиздир. Аллаһын лүтфүнү газанмаг үчүн ҝөстәрдијимиз сә’јин әбәс олдуғуна бизи кимин инандырмаг истәдијини јадда сахламаг ваҹибдир. Буну едән Шејтан вә онун ҹинләридир. Бу кими фикирләрә мүгавимәт ҝөстәрмәлијик.
ijwia мәгалә 4, абз. 16
«Сон нәфәсимәдәк садиг галаҹағам!»
Бу јанлыш дүшүнҹәли кишиләр даһа бетәр иш тутур. Онлар тәкҹә Әјјубун сәдагәтини јох, үмумијјәтлә сәдагәт мәсәләсини шүбһә алтына гојур! Әлифәз сөзүнә башлајанда бир руһла гаршылашдығыны сөјләјир. Онун ҹинлә растлашмасындан ҝәлдији нәтиҹә зәһәрләјиҹи тәсирә малик иди: «Аллаһ гуллугчуларына етибар етмирсә, Өз мәләкләриндә сәһв тутурса», демәли, фани инсан һеч вахт Аллаһы разы сала билмәз. Даһа сонра Билдад инсанын Аллаһын ҝөзүндә торпаг гурдундан фәргләнмәдијини, Әјјубун сәдагәтинин Аллаһ үчүн өнәми олмадығыны сөјләјир (Әјјуб 4:12—18; 15:15; 22:2, 3; 25:4—6)
Јеһованын үрәјини севиндирән ҝәнҹләр
10 Мүгәддәс Китабда ҝөстәрилдији кими, Шејтан јалныз Ејубун дејил, сәни дә дахил етмәклә, Аллаһын бүтүн хидмәтчиләринин сәдагәтини шүбһә алтына гојмушдур. Шејтан үмумијјәтлә бүтүн инсанлары нәзәрдә тутараг, Јеһоваја деди: “Инсан [јалныз Ејуб јох, һәр бир кәс] ҹаны үчүн нәји варса верәр” (Ејуб 2:4). Бу һәјати мәсәләдә сән өз ролунун нәдән ибарәт олдуғуну ҝөрүрсәнми? Сүлејманын мәсәлләри 27:11 ајәсинә әсасән Јеһова сәнин Она нә исә верә биләҹәјини сөјләјир. Бурада, Аллаһы писләјән Шејтана ҹаваб вермәк үчүн әсас нәзәрдә тутулур. Јалныз дүшүн, Каинатын Һөкмдары сәни бүтүн дөврләрин ән ваҹиб мәсәләсинин һәллиндә иштирак етмәјә дә’вәт едир! Бу неҹә дә бөјүк мәс’улијјәт вә шәрәфдир! Јеһованын хаһишини јеринә јетирә биләрсәнми? Ејуб буну јеринә јетирә билди (Ејуб 2:9, 10). Буну Иса вә һәмчинин тарих боју јашамыш сајсыз-һесабсыз инсанлар да, о ҹүмләдән чохлу ҝәнҹләр дә јеринә јетирә билмишләр (Филипилиләрә 2:8; Вәһј 6:9). Буна сәнин дә ҝүҹүн чатар. Һеч заман унутма ки, бу мәсәләдә садәҹә кәнарда дуруб мүшаһидә етмәк олмаз. Өз давраныш тәрзинлә сән ја Шејтанын јаланынын, ја да Јеһованын ҹавабынын тәрәфдары олдуғуну ҝөстәрирсән. Сән нәји сечәҹәксән?
Јеһова сәнин гајғына галыр
11 Сәнин едәҹәјин сечим Јеһова үчүн әһәмијјәт кәсб едирми? Мәҝәр Шејтана ҹаваб вермәк үчүн Аллаһа сәдагәтләрини горумуш инсанлар кифајәт дејилми? Доғрудур, Иблис иддиа едирди ки, һеч бир инсан Јеһоваја мәһәббәтдән хидмәт етмир вә бу иддианын јалан олдуғу артыг сүбут едилмишдир. Лакин буна бахмајараг, Јеһова һөкмранлыг мәсәләсиндә Онун тәрәфини тутманы истәјир, чүнки О, шәхсән сәнин гајғына галыр. Иса демишди: “Ҝөјләрдәки Атанызын елә бир мурады јохдур ки, бу кичикләрдән бири һәлак олсун” (Матта 18:14).
12 Бәли, Јеһова сәнин сечәҹәјин јола е’тинасыз јанашмыр. Бундан әлавә, сечдијин јолун Она шәхсән аидијјаты вар. Мүгәддәс Китабда ајдын шәкилдә дејилир ки, инсанларын һәм јахшы, һәм дә пис һәрәкәтләри Јеһовада ҝүҹлү һиссләрә сәбәб олур. Мәсәлән, исраиллиләр тәкрар-тәкрар Јеһоваја гаршы үсјан етдикләри үчүн Ону ‘инҹидирдиләр’ (Мәзмур 78:40, 41). Нуһун ҝүнләриндә Туфандан әввәл “инсанларын шәр әмәлләри” чохалан заман, Јеһова “үрәјиндә кәдәрләнди” (Јарадылыш 6:5, 6, МКШ). Бу сөзләрин мә’насына вар. Әҝәр сән пис јолу сечсән, өз Јараданыны кәдәрләндирә биләрсән. Бу һеч дә о демәк дејил ки, Аллаһ һәддиндән артыг һәссас вә тез тә’сирләнәндир. Әксинә О, сәни севир вә сәнин рифаһын үчүн гајғы ҝөстәрир. Сән дүзҝүн даврандыгда исә Јеһованын үрәјини севиндирирсән. О, јалныз Шејтана ҹаваб верә биләҹәји үчүн дејил, һәмчинин сәнә мүкафат верә биләҹәји үчүн дә севинир. Вә О, буну чох истәјир (Ибраниләрә 11:6). Бәли, сәнин Јеһова Аллаһ кими севән Атан вар!
Һикмәт хәзинәсиндән инҹиләр
brw040 715 абз. 7, 8
Гаршыныза Аллаһы шәрәфләндирән мәгсәдләр гојун
Ҝәлин Јеһова Аллаһын дүнјаны јаратмасындан данышаг. «Ахшам олду, сәһәр олду» сөзләри илә Јеһова һәр нөвбәти јарадылыш дөврүнүн сәрһәдләрини мүәјјәнләшдирирди (Јарадылыш 1:5, 8, 13, 19, 23, 31). Һәр јарадылыш дөврүнүн әввәлиндә О ајдын билирди ки, һәмин дөвр үчүн гаршысына һансы мәгсәди гојуб. Сонра исә һәмин мәгсәдинә чатырды, јәни нијјәт етдији шејләри јарадырды (Вәһј 4:11). Әјјуб Јеһова Аллаһ барәдә демишди: «Көнлү нә истәсә, ону да едәр» (Әјјуб 23:13). Јәгин Јеһова јаратдыгларына бахыб, һәр шејин чох јахшы олдуғуну дејәндә бөјүк мәмнунлуг дујмушду! (Јарадылыш 1:31).
Мәгсәдләримизин ҝерчәкләшмәси үчүн биздә дә ҝүҹлү истәк олмалыдыр. Бәс бу истәји үрәјимиздә неҹә ојада биләрик? Јенә дә Јеһова Аллаһын нүмунәсинә бахаг. Һәтта јер күрәси гурулушсуз, бош оланда да Јеһова онун ҝәләҹәкдәки һалыны ҝөрүрдү. Онун фәзада ҝөзәл бир инҹи кими парлајаҹағыны, Она шәрәф ҝәтирәҹәјини дүшүнүрдү. Биз дә мәгсәдләримизә чатмаг арзусуну аловландырмаг үчүн онларын ҝәтирәҹәји бәһрәләр барәдә дүшүнмәлијик. 19 јашлы Тони мәһз белә давранмышды. Бир дәфә о, Јеһованын Шаһидләринин гәрби Авропадакы филиалыны зијарәт етмишди. Ҝөрдүкләри ону чох ҝөзәл тәсир бағышламышды. О вахтдан орада јашамаг, хидмәт етмәк арзусу Тонини раһат бурахмырды. Тону бу арзудан әл чәкмәди вә она чатмаг үчүн әлиндән ҝәләни етди. Бир нечә илдән сонра ону филиалда хидмәт етмәјә дәвәт етдиләр. Тонинин севинҹи јерә-ҝөјә сығмырды!
11—17 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 25—27
«Камиллик мүкәммәллик демәк дејил»
Камиллијинизи горујун!
9 Бәс Әјјуб пејғәмбәр бу әзаблар гаршысында неҹә давранды? О, сәһвсиз дејилди. Әјјуб гәзәбләниб сахта достларыны мәзәммәт еләди, сонрадан пешман олаҹағы сөзләр деди. Үстәлик, Аллаһы јох, өзүнү һаглы чыхармаға чалышды (Әјј. 6:3; 13:4, 5; 32:2; 34:5). Бунунла белә, о һәтта һәјатынын ән чәтин анларында Аллаһдан үз дөндәрмәји ағлына да ҝәтирмәди. Сахта достларынын јаланларына инанмады. О деди: «Әсла сизә һагг газандырмарам! Мән сон нәфәсимәдәк садиг галаҹағам!» (Әјј. 27:5). Әјјубун бу сөзләриндән ҝөрмәк олар ки, о, камил галмаға гәтијјәтли иди. О, тәслим олмады. Бу биздә дә алынар.
10 Шејтанын Әјјубла бағлы галдырдығы иттиһамлар һамымыза аиддир. Һансы мәнада? Маһијјәт етибарилә Шејтан дејир ки, әслиндә сиз Аллаһы севмирсиниз, һәјатынызы горумагдан өтрү Аллаһа ибадәт етмәјә сон гојарсыныз вә камиллијинизи сонадәк горумајаҹагсыныз (Әјј. 2:4, 5; Вәһј 12:10). Јәгин ки, бу иттиһамлары ешитмәк сизә гәлб ағрысы верир. Амма ҝәлин дүшүнәк: Јеһова сизә о гәдәр етибар едир ки, Шејтана сизи сынаға чәкмәјә изин верир. Бунунла гаршынызда мөһтәшәм бир имкан ачыр: сиз камиллијинизи горујараг Шејтанын јаланчы олдуғуну сүбут едә биләрсиниз. Јеһова сизин садиг гала биләҹәјинизә әминдир. Үстәлик, О, бу саһәдә сизә көмәк едәҹәјинә сөз верир (Ибр. 13:6). Каинатын Һөкмдарынын бизә етибар етдијини билмәк неҹә дә ҝөзәл һиссдир! Камил олмағын нә гәдәр ваҹиб олдуғуну јәгин инди даһа јахшы баша дүшүрсүнүз. Чүнки бунун сајәсиндә биз Шејтанын јаланларыны тәкзиб едирик, Јеһованын адыны уҹалдырыг вә Онун һакимијјәтини дәстәкләјирик. Бәс камиллијимизи неҹә горуја биләрик?
Камиллијинизи горујун!
3 Јеһованын хидмәтчиләри үчүн камил олмаг Јеһованы бүтүн үрәклә севмәк, Она сарсылмаз сәдагәт ҝөстәрмәк мәнасыны верир. Белә инсан вердији бүтүн гәрарларда илк нөвбәдә Јеһованын истәјини нәзәрә алыр. Ҝәлин Мүгәддәс Китабда бу сөзүн неҹә ишләндијинә диггәт јетирәк. Орада «камил» сөзү там, гүсурсуз, јахуд бүтөв мәналарында ишләнир. Мисал үчүн, исраиллиләрин Јеһоваја гурбан ҝәтирдикләри һејванлар Гануна әсасән, сағлам, гүсурсуз олмалы иди (Лав. 22:21, 22). Аллаһын халгы ајағы, гулағы, ҝөзү олмајан, јахуд хәстә һејваны гурбан ҝәтирә билмәзди. Јеһова үчүн ҝәтирилән гурбанын там, гүсурсуз вә бүтөв олмасы ваҹиб иди (Мәл. 1:6—9). Бу, тәәҹҹүблү дејил. Елә биз өзүмүз дә чүрүк мер-мејвә, ҹырыг дәфтәр-китаб, јахуд бәзи һиссәләри олмајан әшјаны алмаг истәмәрик. Әксинә истәјирик ки, алдығымыз шеј гүсурсуз, бүтөв олсун. Јеһова да истәјир ки, бизим Она бәсләдијимиз мәһәббәт вә сәдагәт там, гүсурсуз вә бүтөв олсун.
4 Бәс камил олмаг о демәкдирми ки, ҝүнаһсыз олмалыјыг? Ола билсин, ҝүнаһлы олдуғумуз вә чохлу сәһвләрә јол вердијимиз үчүн дүшүнүрүк ки, камил олмаг мүмкүн дејил. Анҹаг Аллаһ бу ҝүн биздән мүтләг, јәни там мәнада камиллик ҝөзләмир. Буну һарадан билирик? Ҝәлин ики сәбәбә нәзәр салаг. Биринҹиси, Јеһова диггәтини бизим нөгсанларымыза ҹәмләмир. Онун Кәламында дејилир: «Еј Јаһ, анҹаг сәһвләримизи ҝөрсәјдин, ким дајана биләрди, еј Јеһова?» (Зәб. 130:3). Јеһова бизим ҝүнаһлы олдуғумузу билир вә бизи сәхавәтлә бағышлајыр (Зәб. 86:5). Икинҹиси, Јеһова мәһдудијјәтләримиздән аҝаһдыр вә баҹарығымыздан артығыны тәләб етмир. (Зәбур 103:12—14 ајәләрини охујун.) Бәс биз Јеһованын ҝөзүндә һансы мәнада там, гүсурсуз вә бүтөв ола биләрик?
5 Јеһованын хидмәтчиләри үчүн камиллијә апаран јол мәһәббәтдән кечир. Аллаһа мәһәббәтимиз, сәдагәтимиз там, гүсурсуз вә бүтөв олмалыдыр. Әҝәр мәһәббәтимиз сынаглар заманы белә, бу ҹүр галырса, бу бизим камиллијимиздән хәбәр верир (1 Салн. 28:9; Мәт. 22:37). Јухарыда бәһс етдијимиз үч диндашымызы бир дә хатырлајаг. Онлар нә үчүн белә давранмышдылар? Мәҝәр ҝәнҹ баҹымыз мәктәбдә әјләнмәји севмир? Јахуд ев-ев тәблиғ едән гардашымызын әлә салынмагдан хошу ҝәлир? Бәлкә, аилә башчысы олан гардашымыз ишини итирмәк истәјир? Әлбәттә, јох. Онлар Јеһованын салеһлик нормаларындан аҝаһдыр вә диггәтләрини Ону разы салмаға ҹәмләјибләр. Јеһоваја мәһәббәт бу баҹы-гардашлары тәшвиг едир ки, гәрар верәркән һәр заман Онун фикрини нәзәрә алсынлар. Бунунла да онлар камиллик јолу илә ҝетдикләрини әмәлдә ҝөстәрирләр.
Һикмәт хәзинәсиндән инҹиләр
Аллаһын Кәламына ујғун тәшкил олунмуш халг
3 Хилгәт Јеһованын низам-интизамы севдијини, һәр шеји мүкәммәл шәкилдә тәшкил етдијини сүбут едир. Мүгәддәс Китабда дејилир: «Јеһова јерин тәмәлини һикмәтлә гуруб, ҝөјләри зәкасы илә бәргәрар едиб» (Мәс. 3:19). Һазырда Аллаһ һаггында билдијимиз шејләр «Онун ишләринин бир зәррәсидир, Онун һаггында ешитдијимиз зәиф бир пычылтыдыр» (Әјј. 26:14). Планетләр, улдузлар, галактикалар һаггында мәлуматымыз чох аз олса да, бу биликләрин сајәсиндә Аллаһын бу ҝөј ҹисимләрини һејрәтамиз шәкилдә тәшкил етдијини ҝөрүрүк (Зәб. 8:3, 4). Галактикалар милјонларла улдузлардан ибарәтдир вә бу улдузларын һәр бири фәзада низамла һәрәкәт едир. Ҝүнәш системиндәки планетләрин һәрәкәтинә фикир верәндә инсан һејран галыр. Онлар ҝүнәш әтрафында елә гајда-ганунла дөвр едирләр ки, санки, кимсә онлар үчүн јол һәрәкәти гајдалары тәсис едиб. Сөзсүз ки, Каинатдакы бу низам-интизам ҝөјләри вә јери һикмәтлә јарадан Јеһова Аллаһын һәмд-сәнаја, сәдагәтә вә ибадәтә лајиг олдуғуну сүбут едир (Зәб. 136:1, 5—9).
18—24 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 28, 29
Әјјуб кими јахшы ад газанмысыныз?
Әјјуб пејғәмбәрин һәјаты
Уз дијарында Јеһованын мөмин бир бәндәси јашајыр. Онун ады Әјјубдур. Әјјуб чох варлыдыр. Онун бөјүк аиләси вар. О, хејирхаһ инсандыр. Касыблара, дул гадынлара вә јетим ушаглара әл тутур. Бәс мөмин һәјат сүрән Әјјубун һеч бир проблеми јохдур?
it-1-Е с. 655, абз. 10
Ҝејим
Мүгәддәс Китабда ҝејим бир чох символик мәналар кәсб едир. Неҹә ки униформа вә ја хүсуси ҝејим инсанын һәр һансы бир тәшкилата мәнсубијјәтини, јахуд һансыса һәрәкаты дәстәкләдијини ҝөстәрир, еләҹә дә Мүгәддәс Китабда ҝејим символик олараг, инсанын шәхсијјәтини, тутдуғу мөвге вә она ујғун олараг иҹра етдији фәалијјәтләри ҝөстәрир. Мәсәлән, Исанын тој либасы илә бағлы мәсәлиндә олдуғу кими (Мт 22:11, 12). Вәһј 16:14, 15 ајәләриндә Ағамыз Иса Мәсиһ хәбәрдарлыг едир ки, мәсиһи руһани јухуја гәрг ола вә ону Аллаһын садиг хидмәтчиси кими гәләмә верән палтарындан мәһрум ола биләр. Бу исә «Гадир Аллаһын бөјүк ҝүнүндә олаҹаг мүһарибә»дә онун үчүн фаҹиә илә нәтиҹәләнә биләр.
w09-Е 1/2 с. 15, абз. 3, 4
Адын архасында дуран мәна
Дүнјаја ҝәләндә өзүмүзә ад сечмәк ихтијарымыз олмур. Анҹаг неҹә инсан олаҹағымыз биздән асылыдыр (Мәсәлләр 20:11). Јахшы оларды ки, өзүмүздән сорушаг: «Иса вә һәвариләри мәнә ад версәјдиләр, һансы ады гојардылар? Һансы ад мәним әсас хүсусијјәтими вә газандығым репутасијаны ифадә едәрди?»
Бу суал үзәриндә ҹидди дүшүнмәк лазымдыр. Нә үчүн? Сүлејман падшаһ демишди: «Тәмиз ад бөјүк сәрвәтдән үстүндүр» (Мәсәлләр 22:1). Һәгигәтән дә, ҹәмијјәтдә газандығымыз јахшы, тәмиз ад әсл сәрвәтдир. Ән ваҹиби исә Аллаһ гаршысында јахшы ада саһиб олмагдыр. Бу, әбәди сәрвәтә бәрабәрдир. Һансы мәнада? Аллаһ вәд едир ки, Ондан горханларын адыны «хатирә китабы»на јазаҹаг вә онлара әбәди јашамаг үмиди бәхш едәҹәк (Мәлаки 3:16; Вәһј 3:5; 20:12—15).
Һикмәт хәзинәсиндән инҹиләр
g00-Е 8/7 с. 11, абз. 3
Тәбәссүм ҹана фајдалыдыр
Тәбәссүм нәји исә дәјишә биләр? Һеч елә олуб ки, киминсә тәбәссүмү сизә раһатлыг бәхш едиб, өзүнүзү раһат һисс етмәјинизә сәбәб олуб? Јахуд киминсә гашгабаглы олмасына ҝөрә ҝәрҝинлик кечирмисиниз, нараһат олмусунуз? Тәбәссүм, һәгигәтән дә, бөјүк тәсирә маликдир. Истәр кимәсә ҝүлүмсәјәндә, истәрсә дә кимсә сизә ҝүлүмсәјәндә бу һәр ики тәрәфә хош тәсир бағышлајыр. Мүгәддәс Китабда ады чәкилән Әјјуб «мәсләһәтчиләринә» белә демишди: «Үзләринә ҝүлүмсәјәндә ҝөзләринә инанмаздылар, үзүмүн нуру онлара архајынлыг верәрди» (Әјјуб 29:24). Әјјубун үзүнүн нуру онун меһрибан вә шән инсан олдуғундан хәбәр верирди.
25—31 ДЕКАБР
АЛЛАҺЫН КӘЛАМЫНДАКЫ ХӘЗИНӘ | ӘЈЈУБ 30, 31
«Әјјуб әхлаги ҹәһәтдән неҹә тәмиз галды?»
Ҝөзләринизи фани шејләрдән чәкин!
8 Һәгиги мәсиһчиләр ҝөзләрин еһтирасына вә ҹисмани арзулара гаршы сығорталанмајыб. Буна ҝөрә дә Аллаһын Кәламы бизи ҝөзләримизә, еләҹә дә арзу вә истәкләримизә нәзарәт етмәјә тәшвиг едир. (1 Кор. 9:25, 27; 1 Јәһја 2:15—17 ајәләрини оху.) Салеһ Әјјуб да баша дүшүрдү ки, ҝөзләрин ҝөрдүјү илә арзулар арасында бирбаша әлагә вар. О демишди: «Ҝөзләрим үчүн әһд етмишәм, ҝөзүм бир гыза бахармы?» (Әјј. 31:1). Әјјуб нәинки гадына тохунмагдан имтина едирди, һәтта бејниндә шәһвани фикирләрин јаранмасына белә јол вермирди. Иса бејинин әхлагсыз фикирләрдән тәмиз олмасынын ваҹиблијини «бир гадына шәһвәтлә бахан һәр адам, артыг үрәјиндә онунла зина етмиш олур» демәклә вурғулады (Мат. 5:28).
«Агибәтинизи» дүшүнүн
Белә јола гәдәм гојмаздан әввәл өзүнүздән сорушун: «Бу јол мәни һара апарыр?» Бир анлыг ајаг сахлајыб онун ‘агибәти’ үзәриндә дүшүнмәк инсаны учурума апаран јолдан сахламаг үчүн кифајәт едә биләр. ГИЧС вә ҹинси јолла өтүрүлән башга хәстәликләр, арзуолунмаз һамиләлик, аборт, корланан мүнасибәтләр, виҹдан әзабы белә хәбәрдарлыглара мәһәл гојмајанларын јолуну корлајыр. Һәвари Павел әхлагсызлыг едәнләрин јолунун сонуну ачыг-ајдын ҝөстәрмишдир: онлар «Аллаһын Сәлтәнәтини мирас алмајаҹаглар» (1 Коринфлиләрә 6:9, 10).
Еј ҝәнҹләр, Аллаһын Кәламыны әлдә рәһбәр тутун!
15 Неҹә фикирләширсән, Аллаһа сәдагәтимиз ән чох нә вахт сынаға чәкилир — јанымызда кимсә оланда, јохса тәк оланда? Мәктәбдә вә ја ишдә оларкән Јеһова илә мүнасибәтләримизә хәтәр дәјмәсин дејә даһа еһтијатлы олуруг. Тәк оланда исә өзүмүзү бир гәдәр сәрбәст һисс етдијимиздән әхлаги ҹәһәтдән еһтијаты асанлыгла әлдән верә биләрик.
16 Јадда сахла: сән Јеһованы ја кәдәрләндирә, ја да севиндирә биләрсән (Јар. 6:5, 6; Сүл. мәс. 27:11). Јеһова бизим ‘гејдимизә’ галдығы үчүн һәрәкәтләримиз она тәсир едир (1 Пет. 5:7). О истәјир ки, биз Она гулаг асыб фираван јашајаг (Јешаја 48:17, 18). Гәдим Исраилдә Јеһованын бәзи хидмәтчиләри Онун вердији мәсләһәтләри рәдд едәндә О кәдәрләнирди (Мәз. 78:40, 41). Диҝәр тәрәфдән, Јеһова Даниел пејғәмбәри чох севдији үчүн мәләк ону ‘Аллаһын севимлиси’ адландырмышды (Дан. 10:11). Нәјә ҝөрә? Даниел нәинки ҹамаат гаршысында, тәкликдә оланда да Аллаһа садиглијини горујурду. (Даниел 6:10 ајәсини оху.)
Һикмәт хәзинәсиндән инҹиләр
Мәһәббәт руһән мөһкәмләндирир
13 Јахшы динләјиҹи олун (Јаг. 1:19). Гаршы тәрәфи ҹаныјананлыгла динләмәк мәһәббәтин тәҹәссүмүдүр. Инсанын кечирдији һиссләри баша дүшмәк үчүн нәзакәтлә суаллар вермәк олар. Онда диндашыныз онун дәрдинә шәрик олдуғунузу ҝөрәҹәк. Гој бу һәмчинин сизин симаныздан ҝөрүнсүн. Ола билсин, кимсә данышаркән ән хырда деталларына гәдәр изаһ едир. Бу заман сәбирли олун вә инсанын сөзүнү кәсмәмәјә чалышын. Диггәтлә гулаг асараг онун һансы һиссләри кечирдијини даһа јахшы анлаја биләҹәксиниз. Онда диндашынызын етибарыны газанаҹагсыныз вә чох ҝүман ки, о, дедикләринизә гулаг асаҹаг. Һиссләринә биҝанә олмадығынызы ҝөрмәк она сөзүн әсл мәнасында тәсәлли верә биләр.