Хидмәтинизи неҹә ҝенишләндирә биләрсиниз?

ШАҜИРДЛӘРИНИ Падшаһлығы тәблиғ етмәјә ҝөндәрмәјин вахты јетишәндә Иса онлара демишди: «Мәһсул бол, бичинчи исә аздыр». Ҝөрүләси чох иш вар иди, она ҝөрә дә Иса сөзүнә белә әлавә етмишди: «Бичин Саһибинә јалварын ки, мәһсулу јығмаға бичинчи ҝөндәрсин» (Мәт. 9:37, 38). Иса шаҝирдләринә бу иши неҹә јеринә јетирмәји баша салды. Онун нөвбәти сөзләриндән бу ишин чох тәҹили олдуғу ҝөрүнүрдү: «Сиз Исраил шәһәрләринин һамысыны ҝәзиб гуртармамыш инсан Оғлу ҝәләҹәк» (Мәт. 10:23).

² Бу ҝүн дә тәблиғдә ҝөрүләси иш чохдур. Падшаһлыг һаггында хош хәбәр сон ҝәлмәздән габаг тәблиғ олунмалыдыр вә вахт ҝөзләмир (Марк 13:10). Тәблиғ саһәмиз дүнја олдуғу үчүн биз дә Исанын шаҝирдләринин гаршылашдығы вәзијјәтлә үзләширик, амма даһа ҝениш мигјасда. Сајы милјардларла олан бәшәријјәтлә мүгајисәдә биз чох азыг, амма әминик ки, Јеһова бизи көмәксиз гојан дејил. Падшаһлыг һаггында хош хәбәр бүтүн дүнјада тәблиғ олунаҹаг вә Јеһованын тәјин етдији вахт јетишәндә сон ҝәләҹәк. Бәс хидмәтимизи там иҹра етмәк үчүн Аллаһын ишини һәјатымызда биринҹи јерә гојаҹағыг? Бунун үчүн гаршымыза һансы мәгсәдләри гоја биләрик?

³ «Аллаһын Јеһованы бүтүн гәлбинлә, бүтүн варлығынла, бүтүн ағлынла вә вар ҝүҹүнлә сев», — демәклә Иса Јеһованын һәср олунмуш хидмәтчиләриндән нә ҝөзләдијини ҝөстәрмишди (Марк 12:30). Биз Јеһоваја бүтүн варлығымызла хидмәт етмәлијик. Јәни Јеһоваја хидмәтдә вар ҝүҹүмүзлә чалышмагла Она нә гәдәр сәдагәтли олдуғумузу вә һәјатымызы Она үрәкдән һәср етдијимизи ҝөстәрмәлијик (2 Тим. 2:15). Һәр биримиз баҹарығына вә шәраитинә ҝөрә хидмәтини ҝенишләндирә биләр. Ҝәлин ҝөрәк хидмәтимизи неҹә ҝенишләндирә вә гаршымыза һансы теократик мәгсәдләр гоја биләрик.

ЈЫҒЫНҸАГДА ТӘБЛИҒЧИ КИМИ ХИДМӘТ ЕТМӘК

⁴ Һәгигәти гәбул едән һәр кәс хош хәбәри тәблиғ етмәк шәрәфинә лајиг ҝөрүлүр. Бу, Иса Мәсиһин шаҝирдләринә тапшырдығы әсас ишдир (Мәт. 24:14; 28:19, 20). Исанын шаҝирди олан инсанлар, адәтән, хош хәбәри ешидән кими башгалары илә бөлүшмәјә башлајырлар. Андреас, Филип, Корнили вә башгалары да белә етмишдиләр (Јәһ. 1:40, 41, 43—45; Һәв. 10:1, 2, 24; 16:14, 15, 25—34). Бәс бу о демәкдирми ки, инсан вәфтиз олмамыш да хош хәбәри башгалары илә бөлүшә биләр? Бәли! Инсан јығынҹагда вәфтиз олмамыш тәблиғчи олан кими ев-ев тәблиғ етмәјә башлаја биләр. Һәмчинин баҹарығы дахилиндә вә шәраити јол вердији гәдәр тәблиғ хидмәтинин диҝәр нөвләриндә дә иштирак едә биләр.

⁵ Сөзсүз ки, вәфтиз оландан сонра тәблиғчи башгаларына хош хәбәри чатдырмаг үчүн әлиндән ҝәләни едир. Тәблиғ етмәк шәрәфинә һәм кишиләр, һәм дә гадынлар лајиг ҝөрүлүбләр. Һәр биримиз Аллаһын ишини ирәли апармаг үчүн, һәтта ҹүзи дә олса, нә исә едә биләрик. Хидмәтини ҝенишләндирән һәр кәс әсл хошбәхтлик дадаҹаг!

ТӘЛӘБАТ ОЛАН ЈЕРЛӘРДӘ ХИДМӘТ

⁶ Бәлкә дә, сизин јығынҹағын әразиси тез-тез ишләнир вә инсанлара јахшы шаһидлик верилир. Бу сәбәбдән, ола билсин, сиз хидмәтинизи ҝенишләндириб тәләбат олан әразијә көчмәк истәјирсиниз (Һәв. 16:9). Ола билсин, бир ағсаггал вә ја јығынҹаг хидмәтчиси кими һансыса јығынҹагда сизин көмәјинизә еһтијаҹ вар. Рајон нәзарәтчиси рајонунуздакы башга јығынҹаға көмәк етмәклә бағлы сизә мәсләһәт верә биләр. Әҝәр өлкәнин башга әразисиндә хидмәт етмәк истәјирсинизсә, лазыми мәлуматы филиалдан ала биләрсиниз.

⁷ Бәлкә, башга өлкәдә хидмәт етмәк истәјирсиниз? Белә исә, әввәлҹә јахшы-јахшы ҝөтүр-гој един. Мәсләһәт ҝөрәрдик ки, бу мәсәләни јығынҹағынызын ағсаггаллары илә мүзакирә едәсиниз. Көчмәк гәрарыныз сизә вә сизинлә бирҝә көчән инсанлара тәсир едәҹәк (Лука 14:28). Әҝәр узун мүддәт галмаг фикриниз јохдурса, јахшы оларды ки, өз өлкәниздә галыб хидмәт едәсиниз.

⁸ Бәзи өлкәләрдә нәзарәтчи кими хидмәт едән гардашлар һәгигәтдә нисбәтән јенидирләр. Јерли гардашлар тәвазөкарлыг ҝөстәриб онларын јығынҹағына көчән тәҹрүбәли ағсаггаллара рәһбәрлији үзәрләринә ҝөтүрмәјә имкан верирләр. Сизин бир ағсаггал кими белә өлкәјә көчмәк фикриниз варса, јадда сахлајын ки, мәгсәдиниз јерли гардашларын әвәзинә хидмәт етмәк јох, онларла бирҝә хидмәт етмәк олмалыдыр. Онлары јығынҹагда мәсулијјәтләрә ҹан атмаға вә үзәрләринә мәсулијјәт ҝөтүрмәјә тәшвиг един (1 Тим. 3:1). Һансыса иш сизин өлкәдәки кими ҝөрүлмәјәндә сәбирли олун. Гардашлара көмәк етмәк үчүн бир ағсаггал кими әлдә етдијиниз тәҹрүбәни бөлүшүн. Ишдир, бирдән өз өлкәнизә гајытмалы олсаныз, онда јерли ағсаггалларын јығынҹағын гајғысына галмаг үчүн тәҹрүбәси даһа чох олаҹаг.

⁹ Јығынҹағынызын хидмәт комитәси филиала сизин һаггынызда рәј мәктубу ҝөндәрәндән сонра филиал көмәјә еһтијаҹы олан јығынҹагларын адыны ҝөндәрәҹәк. Ағсаггал, јығынҹаг хидмәтчиси, өнҹүл вә ја тәблиғчи олмағыныздан асылы олмајараг, бу мәктубу ҝөндәрмәк мүтләгдир. Јығынҹағын хидмәт комитәси рәј мәктубуну сизин мүраҹиәтинизлә бирҝә бирбаша хидмәт етмәк истәдијиниз өлкәнин филиалына ҝөндәрәҹәк.

БАШГА ДИЛДӘ ТӘБЛИҒ

¹⁰ Хидмәти ҝенишләндирмәк үчүн башга дил өјрәнмәк олар, мәсәлән, жест дилини. Әҝәр башга дилдә тәблиғ етмәк мәгсәдиниз варса, бу һагда ағсаггалларла вә рајон нәзарәтчиси илә данышмаг олар. Онлар сизә мәсләһәт верә вә дәстәк ола биләрләр. Филиалын рәһбәрлији алтында бәзи теократик рајонларда дил курслары тәшкил олунур ки, тәблиғчиләр вә өнҹүлләр башга дилдә тәблиғ етмәји өјрәнсинләр.

ӨНҸҮЛ ХИДМӘТИ

¹¹ Бүтүн тәблиғчиләр көмәкчи өнҹүл, өнҹүл, хүсуси өнҹүл хидмәтиндә, еләҹә дә тамвахтлы хидмәтин диҝәр нөвләриндә иштирак етмәк истәјәнләр үчүн тәләбләри билмәлидирләр. Өнҹүл олмаг истәјән тәблиғчи вәфтиз олунмуш нүмунәви мәсиһи олмалыдыр вә шәраити она мүәјјән мигдар саат тәблиғ етмәјә јол вермәлидир. Өнҹүлләри вә көмәкчи өнҹүлләри јығынҹағын хидмәт комитәси, хүсуси өнҹүлләри исә филиал тәјин едир.

¹² Шәраитдән асылы олараг, бир ај, бир нечә ај вә ја гејри-мүәјјән мүддәт көмәкчи өнҹүл кими хидмәт етмәк олар. Бир чох тәблиғчиләр хүсуси вахтларда, мәсәлән, Иса Мәсиһин өлүмүнүн илдөнүмүндә вә ја рајон нәзарәтчисинин зијарәт етдији ај көмәкчи өнҹүл кими хидмәт едирләр. Бәзиләри мәзунијјәт заманы, вәфтиз олунмуш мәктәблиләр исә тәтил вахты көмәкчи өнҹүл хидмәти ҝөтүрүрләр. Тәблиғчиләр һәр илин март вә апрел ајларында, еләҹә дә рајон нәзарәтчиси јығынҹағы зијарәт едән ај азалдылмыш саат нормасы илә көмәкчи өнҹүл кими хидмәт едирләр. Шәраитиниздән асылы олмајараг, јүксәк әхлаг нормаларына мүвафиг јашајырсынызса, пис вәрдишләриниз јохдурса, тәләб олунан саат нормасыны верә биләҹәксинизсә, бир вә ја бир нечә ај көмәкчи өнҹүл кими хидмәт едә биләҹәксинизсә, ағсаггаллар мәмнунијјәтлә сизин хаһишинизи нәзәрдән кечирәҹәкләр.

¹³ Өнҹүл кими хидмәт етмәк үчүн иллик саат нормасыны вермәк тәләб олунур. Өнҹүлләр јығынҹагла әмәкдашлыг етмәлидирләр. Чалышган өнҹүлләр јығынҹаг үчүн әсл һәдијјәдир, онлар башгаларыны тәблиғ хидмәтинә, һәтта өнҹүл хидмәтинә һәвәсләндирирләр. Вәфтиз оландан, ән азы, алты ај сонра өнҹүл хидмәти ҝөтүрмәк олар. Бунун үчүн нүмунәви тәблиғчи олмаг мүтләгдир.

¹⁴ Хүсуси өнҹүлләр, адәтән, јахшы вә сәмәрәли хидмәт едән өнҹүлләрин сырасындан сечилир. Филиал онлары һара тәјин етсә, ора ҝетмәјә һазыр олмалыдырлар. Онлар чох вахт уҹгар әразиләрә тәјин олунурлар ки, орада һәгигәти ахтаран инсанлары тапыб јени јығынҹаглар тәшкил етсинләр. Бәзән хүсуси өнҹүлләр саһәләрини ишләмәкдә көмәјә еһтијаҹы олан јығынҹаглара тәјин олунурлар. Бәзән дә хүсуси өнҹүл кими хидмәт едән ағсаггаллар көмәк үчүн кичик јығынҹаглара тәјин едилирләр, һәтта һәмин јығынҹагларда тәблиғ саһәсиндә көмәјә еһтијаҹ олмаса белә. Зәрури еһтијаҹларыны өдәмәк үчүн хүсуси өнҹүлләр кичик мәбләғдә вәсаит алырлар. Бәзән хүсуси өнҹүлләр мүвәггәти тәјин олунурлар.

ХҮСУСИ ТӘЈИНАТЛЫ МҮЖДӘЧИЛӘР

¹⁵ Рәһбәрлик Шурасынын Хидмәт комитәси саһәдә хидмәт етмәк үчүн хүсуси тәјинатлы мүждәчиләр тәјин едир. Сонра исә јерли филиалын комитәси онлары әһалинин сых мәскунлашдығы әразиләрә ҝөндәрир. Онларын әмәји сајәсиндә тәблиғ иши вә јығынҹағын фәалијјәти сабит олур. Әксәр һалларда хүсуси тәјинатлы мүждәчиләр Падшаһлыг Мүждәчиләри Мәктәбиндә тәлим алырлар. Онлара јашамаг үчүн јер вә зәрури еһтијаҹларыны өдәмәк үчүн вәсаит ајрылыр.

РАЈОН НӘЗАРӘТЧИЛӘРИ

¹⁶ Рәһбәрлик Шурасы тәлим кечмиш вә рајон нәзарәтчисинин көмәкчиси кими хидмәт едәрәк тәҹрүбә топламыш гардашлары рајон нәзарәтчиси тәјин едир. Бу гардашлар тәблиғ ишини вә баҹы-гардашлары чох севирләр. Онлар бир өнҹүл кими зәһмәткешдирләр, мәһарәтли натиг вә мүәллимдирләр, Мүгәддәс Китабы дәриндән мүталиә едирләр. Онлар руһун бәһрәсини ҝөзәл шәкилдә тәзаһүр етдирирләр, таразлы, сағламдүшүнҹәли вә дәрракәли инсанлардырлар. Гардаш евлидирсә, онун өнҹүл олан һәјат јолдашы давранышында вә инсанлара мүнасибәтиндә нүмунәви олмалыдыр, һәмчинин јахшы тәблиғ етмәји баҹармалыдыр. О, итаәткар мәсиһи гадын кими, өз ролуну баша дүшмәли, әринин әвәзинә данышмамалы вә сөһбәти әлә алан инсан олмамалыдыр. Рајон нәзарәтчиләринин вә һәјат јолдашларынын ҹәдвәли долғун олдуғу үчүн бу хидмәт нөвүндә иштирак етмәк истәјәнләрин сағламлығы јахшы олмалыдыр. Өнҹүлләр рајон хидмәти үчүн бланк долдурмурлар. Онлар бу һагда истәкләрини рајон нәзарәтчисинә билдирә биләрләр; о, онлара лазыми мәсләһәти верәҹәк.

ТЕОКРАТИК МӘКТӘБЛӘР

¹⁷ Падшаһлыг Мүждәчиләри Мәктәби. Аз ишләнән әразиләри ишләмәк вә јығынҹаглара руһани ҹәһәтдән дәстәк олмаг үчүн Падшаһлыг мүждәчиләринә бөјүк тәләбат вар. Буна ҝөрә дә субај гардашлар, субај баҹылар вә әр-арвадлар Падшаһлыг Мүждәчиләри Мәктәбиндә тәлим алмаг үчүн әризә верә биләрләр. Мәктәби битирдикдән сонра мәзунлар өнҹүл кими өз өлкәләринә, тәләбат олан әразиләрдә хидмәт етмәјә ҝөндәрилирләр. Һазырлыг руһу ҝөстәрәнләр исә ја өз өлкәләринә, ја да хариҹи өлкәјә башга тәјинат алырлар. Бәзиләри мүвәггәти, ја да даими олараг хүсуси өнҹүл тәјин олунурлар. Бу мәктәби кечмәк истәјән өнҹүлләр мәктәбдә охумаг үчүн тәләбләри реҝионал топлантыда бу мәгсәдлә тәшкил олунмуш ҝөрүшдә өјрәнә биләрләр.

¹⁸ Ҝөзәтчи Гүлләсинин Мүгәддәс Китаб Мәктәби Ҝилад. Бу мәктәбдә субај гардашлар, субај баҹылар вә әр-арвадлар охуја биләр. Онлар инҝилис дилини билән тамвахтлы хидмәтчиләрин сырасындан сечилир. Бу баҹы-гардашлардан саһәнин вә филиалын ишләрини дәстәкләмәк вә ирәли апармаг ҝөзләнилир. Мәктәбә дәвәт алмаздан әввәл һәјатларындан ҝөрүнмәлидир ки, онлар баҹы-гардашлара үрәкдән көмәк едирләр; башгаларына меһрибанҹасына руһани вә теократик гајда-ганунлары өјрәдир вә бу гајда-ганунлара табе олмаға көмәк едирләр. Ҝәләҹәк тәләбәләрә мәктәбдә охумаг үчүн бланкы јерли филиалын комитәси верир. Мәктәбин мәзунлары өз өлкәләринә вә ја хариҹи өлкәјә, саһәјә вә ја филиала тәјин олунурлар.

БЕЈТЕЛ ХИДМӘТИ

¹⁹ Бејтелдә хидмәт етмәк бөјүк шәрәфдир. «Бејтел» сөзүнүн мәнасы «Аллаһын еви» демәкдир. Бејтел теократик фәалијјәтин мәркәзи олдуғу үчүн бу ад јеринә дүшүр. Бејтелдә хидмәт едән баҹы-гардашлар чох ваҹиб ишлә мәшғул олурлар, онлар Мүгәддәс Китаба әсасланан әдәбијјатлары һазырлајыр, тәрҹүмә едир вә јығынҹаглара ҝөндәрирләр. Рәһбәрлик Шурасы онларын ишини јүксәк гијмәтләндирир, чүнки онларын әмәји сајәсиндә бүтүн дүнјада јығынҹаглар рәһбәрлик вә ҝөстәришләр алыр. Тәрҹүмәчи олан бејтеллиләрин әксәријјәти инсанларын онларын тәрҹүмә етдикләри дилдә данышдығы әразидә јашајыр вә хидмәт едирләр. Бунун сајәсиндә тәрҹүмәчиләр инсанларын ади һәјатда неҹә данышдыгларыны ешидирләр. Онлар тәрҹүмә етдикләри әдәбијјатлары охуҹуларын баша дүшүб-дүшмәдијини шәхсән ҝөрүрләр.

²⁰ Бејтелдә ҝөрүлән ишләрин әксәријјәти физики ишдир. Буна ҝөрә дә Бејтелә әсасән өзүнү Аллаһа һәср етмиш, вәфтиз олмуш, ҝәнҹ, сағлам вә физики ҹәһәтдән ҝүҹлү гардашлары дәвәт едирләр. Әҝәр сизин әразидәки филиалда тәләбат варса вә сиз Бејтелдә хидмәт етмәк истәјирсинизсә, тәләбләр барәдә јығынҹағынызын ағсаггалларындан мәлумат ала биләрсиниз.

ТЕОКРАТИК ТИКИНТИДӘ ХИДМӘТ

²¹ Сүлејманын инша етдији мәбәдин тикинтиси кими, теократик тикилиләрин иншасы да мүгәддәс хидмәтин бир нөвүдүр (1 Пад. 8:13—18). Әксәр баҹы-гардашлар бөјүк һәвәслә көнүллү олараг вахтларыны вә гүввәләрини бу ишә сәрф едирләр.

²² Бәс сиз бу ишдә көмәк едә биләрсиниз? Әҝәр вәфтиз олмусунузса вә тикинти ишләриндә иштирак етмәк истәјирсинизсә, әразиниздә тикинти-иншаат ишләринә нәзарәт едән гардашлар көмәјинизи мәмнунијјәтлә гәбул едәҹәк вә лазым ҝәлсә, баҹармадығыныз ишләри өјрәдәҹәкләр. Тикинтидә көмәк етмәк истәдијинизи јығынҹағын ағсаггалларына билдирин. Нәзәринизә чатдыраг ки, һәтта бәзи вәфтиз олмуш тәблиғчиләр башга өлкәләрдә тикинти-иншаат ишләриндә көнүллү кими хидмәт етмәк шәрәфинә лајиг ҝөрүлмүшләр.

²³ Тикинти-иншаат ишләриндә мүхтәлиф ҹүр иштирак етмәк олар. Мүәјјән баҹарығы олан нүмунәви вәфтиз олмуш тәблиғчиләр өз әразиләриндә Јерли лајиһә-иншаат шөбәсинин көнүллүләри гисминдә хидмәт едә биләрләр. Нисбәтән узаг әразидә мүәјјән вахт әрзиндә тикинти ишләриндә иштирак етмәк истәјәнләри филиал ики һәфтәдән үч аја гәдәр мүддәтә иншаат көнүллүсү тәјин едир. Узун мүддәтә тәјин олунанлар иншаат хидмәтчиләри адланыр. Хариҹи өлкәјә ҝөндәрилән иншаат хидмәтчиләри хариҹи иншаат хидмәтчиси кими тәјин олунур. Иншаат хидмәтчиләриндән вә иншаат көнүллүләриндән исә иншаат групу тәшкил олунур. Онлар лајиһәләрә рәһбәрлик едирләр. Онлара јерли лајиһә-иншаат шөбәсинин вә тикинти ишләринә ҹәлб олунан јығынҹагларын көнүллүләри көмәк едир. Иншаат груплары тикинти-иншаат ишләрини аид олдуглары филиалын әразисиндә апарырлар.

ҺАНСЫ РУҺАНИ МӘГСӘДЛӘРИНИЗ ВАР?

²⁴ Әҝәр һәјатынызы Јеһоваја һәср етмисинизсә, демәли, сиз әбәдијјән Она хидмәт етмәк истәјирсиниз. Бәс сизин һансы руһани мәгсәдләриниз вар? Гаршыныза руһани мәгсәдләр гојсаныз, гүввәнизи вә диҝәр баҹарыгларынызы бош јерә сәрф етмәјәҹәксиниз (1 Кор. 9:26). Белә мәгсәдләр сизә руһани ҹәһәтдән бөјүмәјә вә диггәти даһа ваҹиб шејләрә ҹәмләјәрәк хидмәтинизи ҝенишләндирмәјә көмәк едәҹәк (Филип. 1:10; 1 Тим. 4:15, 16).

²⁵ Һәвари Булус Аллаһа хидмәт етмәкдә бизә ҝөзәл нүмунә гојуб (1 Кор. 11:1). Булус Јеһоваја фәдакарҹасына хидмәт едирди. О баша дүшүрдү ки, Јеһова онун гаршысында чохлу имканлар ачыб. Һәвари Коринфдәки гардашлара јазмышды: «Гаршымда бөјүк фәалијјәт гапысы ачылыб». Ејни шеји бизим һаггымызда да демәк олар. Јеһоваја јығынҹагла бирҝә хидмәт етмәк үчүн чохлу имканымыз вар, хүсусилә дә хош хәбәрин тәблиғ ишиндә иштирак етмәклә буну едә биләрик. Һәвари Булус кими, биз дә «бөјүк фәалијјәт гапысы»ндан кечәндә чохлу әлејһдарларла гаршылашырыг (1 Кор. 16:9). Булус һәмишә өзүнү ҹиловламаға чалышырды. Ҝөрүн о нә демишди: «Бәдәнимә ҹәфа вериб ону көлә кими өзүмә табе етдирирәм» (1 Кор. 9:24—27). Биздә дә Булусун әһвал-руһијјәси вармы?

²⁶ Һәр кәс өз шәраитини нәзәрә алараг гаршысына теократик мәгсәдләр гоја биләр. Бир чохлары ушаг вахтындан гаршыларына руһани мәгсәдләр гојдуглары үчүн инди тамвахтлы хидмәтдә иштирак едирләр. Вахтилә валидејнләри, ушаг олсалар да, онлары бу мәгсәдә ҹан атмаға тәшвиг едиб. Нәтиҹәдә, онлар Јеһоваја хидмәтдә зәнҝин һәјат јашајырлар вә буна ҝөрә пешман дејилләр (Мәс. 10:22). Гаршыныза башга ҝөзәл мәгсәдләр дә гоја биләрсиниз, мәсәлән, һәр һәфтә тәблиғ хидмәтинә чыхын, Мүгәддәс Китаб дәрсләри башлајын, ја да ибадәт ҝөрүшләринә һазырлашмаг үчүн даһа чох вахт ајырын. Әсас одур ки, мәтин оласыныз вә хидмәти там шәкилдә иҹра едәсиниз. Беләҹә, биз Јеһованын адыны уҹалдаҹаг вә али мәгсәдимизә, Јеһоваја әбәдијјән хидмәт етмәк мәгсәдинә чатаҹағыг (Лука 13:24; 1 Тим. 4:7б, 8).