Аллаһ фикрини дәјиширми?
МҮГӘДДӘС КИТАБ Аллаһ һаггында белә дејир: «Онда нә дәјишиклик вар, нә дә дөнүклүк көлҝәси». Аллаһ Өзү дә бизи әмин едир: «Мән Рәббәм вә һеч вахт дәјишмирәм» (Јагуб 1:17; Малаки 3:6). Инсанлар һәмишә өз фикирләрини дәјишдикләри үчүн онлары разы салмаг вә онлара там етибар етмәк чәтин олур. Јеһова Аллаһ бу ҹүр инсанлардан неҹә дә фәргләнир!
Анҹаг Мүгәддәс Китабы охујан бәзи инсанларда елә тәәссүрат ојаныр ки, Аллаһ Өз фикрини дәјишиб. Мәсәлән, бир вахтлар Јеһова Аллаһ мәсиһчиләрә мөҹүзәләр ҝөстәрмәк гүввәси верирди, анҹаг даһа вермир. Гәдимдә Аллаһ чохарвадлылыға ҝөз јумурду, инди исә гадаған едир. Мусанын Гануну гүввәдә оланда Јеһова шәнбә ҝүнүнә риајәт етмәји тәләб едирди, амма инди етмир. Бәс бу фактлар Аллаһын дәјишилдијини ҝөстәрмирми?
Һәр шејдән әввәл биз әмин ола биләрик ки, Аллаһ Өзүнүн мәһәббәт вә әдаләт принсипләрини һеч вахт дәјишмир. Һәмчинин Падшаһлыг васитәсилә бәшәријјәтә хејир-дуа вермәјә даир ‘әзәли мәгсәдиндән’ дә Аллаһ дашынмајыб (Ефеслиләрә 3:11). Буна бахмајараг, кимсә бизи һәмишә мәјус едәндә о инсана гаршы фикримиз неҹә дәјиширсә, Јеһова да дәјишән вәзијјәтә ҹаваб олараг фикрини дәјишир.
Аллаһ, һәмчинин Өз тәләбләрини халгынын вәзијјәтинә вә тәләбатларына ујғун олараг дәјишир. Бу, бизи һеч дә тәәҹҹүбләндирмәмәлидир. Бир дүшүнүн, тәҹрүбәли бәләдчи гаршыда тәһлүкә ҝөрсә, нә едәр? Јәгин тәһлүкәдән јан кечмәк үчүн өз групуну башга јол илә апарар. Анҹаг бу, бәләдчинин өз мәгсәдиндән дашындығыны билдирмир, елә дејилми? Буна ҝөрә дә ҝәлин бәзиләриндә чашгынлыг јарадан јухарыдакы үч нүмунәјә гајыдаг.
Нә үчүн даһа мөҹүзә баш вермир?
Аллаһ биринҹи әсрдәки бәзи мәсиһчиләрә мөҹүзә ҝөстәрмәк ҝүҹүнү һансы мәгсәдлә вермишди? Јәгин билирсиниз ки, Исраил Аллаһын сечилмиш халгы оланда Аллаһ онларла олдуғуну чох вахт мөҹүзәләр васитәсилә ҝөстәрирди. Аллаһ Исраили Мисирдән азад едәндә вә сәһрадан кечирәрәк Вәд едилмиш дијара апаранда Муса васитәсилә Өзүнүн мөһтәшәм ҝүҹүнү тәзаһүр етдирди. Тәәссүф ки, исраиллиләр дөнә-дөнә имансызлыг ҝөстәрдиләр. Нәһајәтдә, Јеһова Исраили рәдд едиб мәсиһчи јығынҹағыны тәсис едәндә һәвариләрә вә гејриләринә мөҹүзә ҝөстәрмәк гүввәси верди. Мәсәлән, һәвари Петер вә Јәһја анаданҝәлмә чолаг олан бир нәфәрә шәфа вермиш, Павел исә өлмүш адамы ајаға галдырмышды (Һәвариләрин ишләри 3:2-8; 20:9-11). Онларын ҝөстәрдији мөҹүзәләр сајәсиндә мәсиһчилик бир чох әразиләрдә јајылды. Бәс мөҹүзәләр инди нијә баш вермир?
Һәвари Павел буну белә бир нүмунә әсасында изаһ етмишди: «Мән көрпә икән, көрпә кими данышыр, көрпә кими дүшүнүр, көрпә кими мүһакимә едәрдим; боја-баша чатдыгда исә, көрпә давранышларыны тәрк етдим» (1 Коринфлиләрә 13:11). Неҹә ки, оғуллары бөјүјәндә валидејнләр онунла артыг көрпә ушаг кими давранмырлар, еләҹә дә мәсиһчи јығынҹағы «боја-баша чатдыгда» Јеһованын онунла давранышы дәјишди. Һәвари Павел изаһ етмишди ки, башга-башга дилләрдә данышмаг, јахуд пејғәмбәрлик етмәк кими мөҹүзәви әнамлар ‘ләғв олаҹаг’ (1 Коринфлиләрә 13:8).
Чохарвадлылыға нијә иҹазә верилирди?
Иса ҝөстәрди ки, Аллаһ илк инсан ҹүтүнә: «Инсан ата-анасыны бурахаҹаг вә арвадына бағланаҹагдыр. Икиси дә бир бәдән олаҹагдыр»,— демәклә никаһа даир нормасыны тәсис етмишди (Матта 19:5). Никаһ ики инсаны бир-биринә бағлајан әбәди иттифаг олмалы иди. Анҹаг Аллаһ Исраили халг кими тәсис едәндә вә онлара Ганун верәндә артыг чохарвадлылыг ади һал алмышды. Беләликлә, Аллаһ чохарвадлылығын тәмәлини гојмаса да вә буна тәшвиг етмәсә дә, бу ҹүр никаһда мүнасибәтләри низама салмаг үчүн ганунлар вермишди. Мәсиһчи јығынҹағы тәсис едиләндә Аллаһ Кәламы васитәсилә чохарвадлылығы гәти гадаған етди (1 Тимотејә 3:2).
Јеһова Аллаһ бәзи шејләрә мүәјјән вахта кими сәбир едир (Ромалылара 9:22-24). Иса демишди ки, исраиллиләрин ‘үрәкләринин һиссизлијинә ҝөрә’ Јеһова мүвәггәти олараг Өзүнүн никаһа даир нормасына ујғун ҝәлмәјән адәтләрә јол вермишди (Матта 19:8; Сүлејманын мәсәлләри 4:18).
Нә үчүн артыг шәнбә ҝүнүнә риајәт едилмир?
Аллаһ Исраили Мисирдән азад етдикдән сонра һәр һәфтә шәнбә ҝүнүнә риајәт етмәји әмр етмишди. Сонралар О, бу әмри онлара вердији Гануна дахил етди (Чыхыш 16:22-30; 20:8-10). Һәвари Павел изаһ етмишди ки, Иса өзүнү гурбан вериб, ‘әмрләри вә гајдалары илә бәрабәр Мүгәддәс Гануну’ вә «сәнәди ләғв етди» (Ефеслиләрә 2:15; Колослулара 2:14). ‘Ләғв олунан’ ганунлар сырасына шәнбә ҝүнү һагда ганун да дахил иди, чүнки Мүгәддәс Китабда дејилир: «Буна ҝөрә, гој һеч ким јемәк вә ичмәк үзүндән, јахуд бајрам, һилал вә ја шәнбә мәсәләси үзүндән сизи мәһкум етмәсин» (Колослулара 2:16). Бәс онда нә үчүн әввәлҹә Аллаһ шәнбә ҝүнүнү дә өзүнә дахил едән Ганун вермишди?
Һәвари Павел јазмышды: «Ганун Мәсиһә јол ҝөстәрән мүрәббимиз олду». Сонра о, әлавә етмишди: «Иман ҝәлдијинә ҝөрә, биз артыг мүрәббинин һакимијјәти алтында дејилик» (Галатијалылара 3:24, 25). Бу, Аллаһын Өз фикрини дәјишдијини ҝөстәрмир. О, садәҹә халга мүнтәзәм олараг руһани шејләр барәдә дүшүнмәји өјрәтмәк үчүн о вахтлар шәнбә ҝүнүндән мүвәггәти васитә кими истифадә едирди. Шәнбә ҝүнү һаггында ганун мүвәггәти олса да, бәшәријјәтин физики вә руһани зүлмдән әбәди раһатлыг тапаҹағы вахта ишарә едирди (Ибраниләрә 4:10; Вәһј 21:1-4).
Етибарлы вә мәһәббәтли Аллаһ
Јухарыда мүзакирә етдијимиз Мүгәддәс Китаб нүмунәләри ҝөстәрир ки, вахт кечдикҹә Јеһова Аллаһын ҝөстәришләри вә тәлимләри дәјиширди. Анҹаг бу Онун Өз фикрини дәјишдијини ҝөстәрмир. Әксинә, О, Өз халгынын јахшылығыны истәдији үчүн онларын тәләбатларыны вә дүшдүјү мүхтәлиф вәзијјәтләри нәзәрә алырды. Јеһова бу ҝүн дә ејни ҹүр давраныр.
Јеһованын принсипләри дәјишмәдијиндән Ону разы салмаг үчүн нә етмәли олдуғумузу өјрәнмәк чәтин дејил. Бундан әлавә, биз әмин ола биләрик ки, Аллаһын вәд етдији һәр шеј һәјата кечәҹәк. Јеһова дејир: «Истәдијим һәр шеји едәҹәјәм... Мән нијјәт етмишәм, буну иҹра едәҹәјәм» (Јешаја 46:10, 11).
[29-ҹу сәһифәдәки јазы]
Аллаһ мәһәббәт вә әдаләт принсипләрини һеч вахт дәјишмир
[30-ҹу сәһифәдәки шәкил]
Павел изаһ етмишди ки, вахт кечдикҹә мөҹүзәви әнамлар ‘ләғв олаҹаг’
[31-ҹи сәһифәдәки шәкил]
Никаһ ики шәхси бир-биринә бағлајан әбәди иттифагдыр