Әјјуб Јеһованын адына һәмд едирди
«Рәббин исминә алгыш олсун!» (ӘЈЈ. 1:21).
1. Еһтимала ҝөрә, «Әјјуб» китабынын мүәллифи кимдир вә бу китаб нә заман јазылыб?
МУСА фиронун гәзәбинә туш ҝәлмәмәк үчүн Мисирдән гачыб Мидјанда мәскунлашанда онун тәхминән 40 јашы варды (Һәв. иш. 7:23). Еһтимал ки, һәмин вахт о, јахынлыгдакы Уз дијарында јашајан Әјјубун изтираблары барәдә ешитмишди. Илләр сонра, Муса вә Исраил халгы сәһрадакы сәјаһәтләринин сонуна јахын Уз дијары јахынлығында оланда, ола билсин, Муса Әјјубун сон илләри барәдә хәбәр тутмушду. Јәһуди тарихинә әсасән, «Әјјуб» китабыны онун өлүмүндән бир гәдәр сонра Муса јазмышдыр.
2. «Әјјуб» китабы Аллаһын мүасир хидмәтчиләринин иманыны неҹә мөһкәмләндирир?
2 «Әјјуб» китабы Аллаһын мүасир хидмәтчиләринин иманыны мөһкәмләндирир. Неҹә? Бу китаб бизә ҝөјләрдә баш верән һадисәләрин ваҹиблијини вә мәғзини баша дүшмәјә көмәк едир, һәмчинин диггәти Аллаһын али һөкмранлығына даир галдырылан биринҹи дәрәҹәли мәсәләјә јөнәлдир. Әјјубун һадисәси нөгсансызлығы горумағын өзүнә нәји дахил етдијини вә Јеһованын бәзән Өз хидмәтчиләринин әзаб чәкмәсинә нәјә ҝөрә јол вердијини баша дүшмәјимизә көмәк едир. Бундан әлавә, «Әјјуб» китабы ҝөстәрир ки, Шејтан Иблис Јеһованын вә бәшәријјәтин јағы дүшмәнидир. Китаб һәм дә Әјјуб кими гејри-камил инсанларын шиддәтли сынаглар гаршысында Јеһоваја садиг гала биләҹәкләрини ҝөстәрир. Ҝәлин бу китабда нәгл олунан бәзи һадисәләри нәзәрдән кечирәк.
Шејтан Әјјубу сынаға чәкир
3. Әјјуб һаггында нә билирик вә о нәјә ҝөрә Шејтанын һәдәфинә чеврилмишди?
3 Әјјуб варлы, нүфузлу вә јүксәк мәнәвијјата малик олан бир аилә башчысы иди. Ҝөрүнүр, о, касыблара әл тутмагла вә мүдрик мәсләһәтләри илә бөјүк һөрмәт газанмышды. Ән ваҹиби исә, онда Аллаһ горхусу варды. Әјјуб һаггында дејилир ки, «о, камил [«гүсурсуз», ЈД], әмәлисалеһ, Аллаһдан горхан вә өзүнү шәрдән узаг сахлајан бир адам иди». Әјјубу Шејтан Иблисин һәдәфинә чевирән онун вар-дөвләти вә нүфузу јох, Аллаһа олан сәдагәти иди (Әјј. 1:1; 29:7-16; 31:1).
4. Нөгсансызлыг нә демәкдир?
4 «Әјјуб» китабынын әввәлиндә мәләкләрин Јеһованын һүзурунда топлашмалары һагда данышылыр. Шејтан да орада иди вә Әјјуба гаршы иттиһамлар ирәли сүрүрдү. (Әјјуб 1:6-11 ајәләрини оху.) Әјјубун вар-дөвләтинә тохунса да, Шејтанын әсас мәгсәди онун нөгсансызлығыны шүбһә алтына алмаг иди. «Нөгсансызлыг» гүсурсуз, салеһ вә ејибсиз олмаг демәкдир. Мүгәддәс Китабда инсанын нөгсансызлығы алтында Јеһоваја бүтүн үрәклә садиг олмасы нәзәрдә тутулур.
5. Шејтан Әјјубу нәдә иттиһам едирди?
5 Шејтан иддиа едирди ки, Әјјуб Аллаһа нөгсансыз олдуғу үчүн дејил, худбин нијјәтләрдән ирәли ҝәләрәк ибадәт едир. Шејтан Әјјубун Јеһоваја јалныз ону хејир-дуаландырдығы вә мүдафиә етдији мүддәтдә садиг галаҹағыны бәјан едирди. Бу иттиһама ҹаваб вермәк үчүн Јеһова Шејтанын Өз садиг хидмәтчисинә һүҹум етмәсинә изин верди. Бир ҝүнүн ичиндә Әјјуб мал-гарасынын таландығы вә ја гырылдығы, нөкәрләринин чохунун өлдүрүлдүјү вә ушагларынын һамысынын мәһв олдуғу хәбәрини алды (Әјј. 1:13-19). Шејтан Әјјубун нөгсансызлығыны сындыра билдими? Мүгәддәс Јазыларда Әјјубун бу бәдбәхтликләрә неҹә реаксија вердији ҝөстәрилир: «Верән дә Рәбдир, алан да Рәбдир. Рәббин исминә алгыш олсун!» (Әјј. 1:21).
6. а) Ҝөјдә башга бир топланты заманы нә баш верди? б) Шејтан Әјјубун нөгсансызлығыны шүбһә алтына аланда даһа кимләри нәзәрдә тутурду?
6 Бир гәдәр сонра ҝөјдә башга бир топланты олду. Шејтан јенә дә Әјјуба гаршы иттиһамлар ирәли сүрмәјә башлады. О деди: «Дәри әвәзинә дәри! Инсан ҹанына ҝөрә һәр шејини верәр. Әлини узадыб онун әтинә вә сүмүјүнә тохун, о, ҝөзүнүн габағында мүтләг Сәнә ләнәт едәҹәк». Диггәт јетирин ки, Шејтанын бу иттиһамы башгаларына да тохунурду. Иблис «инсан ҹанына ҝөрә һәр шејини верәр» демәклә, јалныз Әјјубун дејил, Јеһоваја ибадәт едән һәр бир ‘инсанын’ нөгсансызлығыны шүбһә алтына алды. Бу сәбәбдән Аллаһ Шејтана иҹазә верди ки, Әјјубу әзабвериҹи хәстәлијә дүчар етсин (Әјј. 2:1-8). Анҹаг бунунла Әјјубун сынаглары битмәди.
Әјјубун әһвал-руһијјәсиндән нә өјрәнирик?
7. Арвады вә достлары Әјјуба неҹә тәзјиг ҝөстәрирдиләр?
7 Башланғыҹда Әјјубла арвады ејни сынаглара мәруз галмышдылар. Ушагларынын өлүмү вә вар-дөвләтләрини итирмәләри она чох пис тәсир етмишди. Әринин үзүҹү хәстәликдән әзаб чәкдијини ҝөрмәк она үрәк ағрысы верирди. О, Әјјубун үстүнә гышгырараг деди: «Јенә дә камил [«нөгсансыз», ЈД] олараг галаҹагсан? Ләнәт ет Аллаһа, өл гуртар!» Сонра онун јанына ҝуја тәсәлли вермәк үчүн Елифаз, Билдад вә Софар ҝәлди. Анҹаг онлар јалан мүлаһизәләр јүрүдәрәк ‘адаминҹидән тәсәлличиләр’ олдугларыны ҝөстәрдиләр. Мисал үчүн, Билдад Әјјубун ушагларынын ҝүнаһ ишләтдикләри үчүн өлүмә лајиг олдугларыны деди. Елифаз исә ејһам вурду ки, ҝуја Әјјубун изтираблары кечмиш ҝүнаһларынын ҹәзасыдыр. О һәтта нөгсансызлығыны горујанларын Аллаһын ҝөзүндә дәјәрә малик олдугларыны шүбһә алтына алды! (Әјј. 2:9, 11; 4:8; 8:4; 16:2; 22:2, 3). Белә ағыр тәзјигләр алтында белә Әјјуб нөгсансызлығындан дөнмәди. Доғрудур, о «өзүнү Аллаһдан да салеһ сајдығы үчүн» јанылырды (Әјј. 32:2). Амма буна бахмајараг, о садиг галды.
8. Бу ҝүн мәсләһәт вермәли оланлар үчүн Елиһу һансы нүмунәни гојмушдур?
8 Сонра биз Әјјуба баш чәкмәјә ҝәлән Елиһу һаггында охујуруг. Әввәлҹә о, Әјјубун вә үч достунун ҝәтирдији дәлилләрә гулаг асды. Елиһу јашҹа бу дөрд нәфәрдән ән кичији олса да, онлардан даһа мүдрик давранды. О, Әјјуба һөрмәтлә мүраҹиәт етди вә салеһлик јолуну тутдуғуна ҝөрә ону тәрифләди. Лакин һәм дә Әјјубун диггәтини һәддиндән артыг өз гүсурсузлуғунун мүдафиәсинә јөнәлтдијини сөјләди. Сонра Елиһу Әјјубу әмин етди ки, Аллаһа һәмишә сәдагәтлә хидмәт етмәјә дәјәр. (Әјјуб 36:1, 11 ајәләрини оху.) Елиһу бу ҝүн мәсләһәт вермәли олан инсанлар үчүн неҹә дә ҝөзәл нүмунәдир! О, сәбирлә давранды, диггәтлә гулаг асды, лазым ҝәлдикдә исә тәрифләди вә руһландырыҹы мәсләһәтләр верди (Әјј. 32:6; 33:32).
9. Јеһова Әјјуба неҹә көмәк етди?
9 Ахырда әзәмәтли бир Шәхс Әјјуба мүраҹиәт етди! Мүгәддәс Китабда охујуруг: «О заман Рәбб гасырғанын ичиндән Әјјуба... ҹаваб верди». Әјјубун өз дүшүнҹә тәрзини дәјишә билмәси үчүн Јеһова бир нечә суалдан истифадә едәрәк она мүлајимликлә, лакин гәти сурәтдә мәсләһәт верди. Әјјуб: «Мәним ҝәрәксизлијимә бах... [...] ...торпағын, күлүн ичиндә төвбә едирәм»,— демәклә бу мәзәммәти гәбул етдијини ҝөстәрди. Јеһова онунла сөһбәтини битирдикдән сонра онун үч достуна Өз гәзәбини билдирди, чүнки онлар ‘доғру оланы демәдиләр’. Әјјуб онлар үчүн дуа етмәли иди. «Әјјуб достлары үчүн дуа едәндән сонра Рәбб ондан алынанлары ҝери гајтарды. О, Әјјуба бүтүн габагкы малындан да икигат артыг вар-дөвләт верди» (Әјј. 38:1; 40:4; 42:6-10).
Јеһоваја мәһәббәтимиз нә дәрәҹәдә ҝүҹлүдүр?
10. Нәјә ҝөрә Јеһова Шејтана ҝөз јуммады, јахуд ону мәһв етмәди?
10 Јеһова каинатын Јараданы вә бүтүн мәхлугларын Али Һөкмдарыдыр. Бәс нәјә ҝөрә О, Иблисин иттиһамларына садәҹә ҝөз јуммады? Аллаһ билирди ки, Шејтана нә ҝөз јуммагла, нә дә ону мәһв етмәклә онун галдырдығы мәсәлә һәлл олунмајаҹаг. Иблис иддиа едирди ки, Јеһованын садиг хидмәтчиси Әјјуб вар-дөвләтиндән мәһрум оларса, Аллаһдан үз дөндәрәҹәк. Әјјубун садиглији бу сынагдан кечди. Сонра Шејтан физики изтираблара мәруз галан һәр бир инсанын Аллаһдан үз дөндәрәҹәји фикрини ирәли сүрдү. Изтираб чәкмәсинә бахмајараг, Әјјуб нөгсансызлығыны итирмәди. Бунунла да Шејтан садиг, лакин гејри-камил Әјјубун вәзијјәтиндә јаланчы чыхды. Бәс Аллаһын галан хидмәтчиләри һагда нә демәк олар?
11. Иса Шејтанын иттиһамына неҹә ҹаваб верди?
11 Шејтан тәрәфиндән истәнилән сынаглара мәруз галмаларына бахмајараг нөгсансызлығыны горујан Аллаһын һәр бир хидмәтчиси ҝөстәрир ки, она ҝәлдикдә һәмин амансыз дүшмәнин иттиһамлары јаландыр. Иса јер үзүнә ҝәләндә Шејтанын иттиһамларына гәти ҹаваб верди. О, улу атамыз Адәм кими камил иди. Исанын өләнәдәк садиг галмасы Шејтанын јаланчы, иттиһамларынын исә әсассыз олдуғуну гәти сурәтдә нүмајиш етдирди (Вәһј 12:10).
12. Јеһованын һәр бир хидмәтчисинин һансы имканы вә мәсулијјәти вар?
12 Бунунла белә, Шејтан Јеһованын хидмәтчиләрини һәлә дә имтаһана чәкир. Һәр биримизин өз нөгсансызлығыны горумагла Јеһоваја худбин нијјәтләрдән дејил, мәһәббәтдән ирәли ҝәләрәк хидмәт етдијини ҝөстәрмәк имканы вә мәсулијјәти вар. Биз бу мәсулијјәтә неҹә јанашырыг? Јеһоваја садиг галмаг бизим үчүн әсил шәрәфдир. Һәмчинин Јеһованын бизә таб ҝәтирмәк үчүн гүввә вердијини вә Әјјубун һадисәсиндә олдуғу кими, ҝүҹүмүздән артыг имтаһан олунмағымыза јол вермәдијини билмәк тәскинлик ҝәтирир (1 Кор. 10:13).
Аллаһа мејдан охујан дүшмән вә дөнүк
13. «Әјјуб» китабындан Шејтан һаггында һансы тәфәррүатлары өјрәнирик?
13 Јунанҹа Мүгәддәс Јазыларда Шејтанын Јеһоваја гаршы чыхмасы һагда чохлу мәлумат верилир; «Вәһј» китабындан исә Јеһованын али һөкмранлығына бәраәт газандырылаҹағы вә Шејтанын тамамилә мәһв олунаҹағы барәдә өјрәнирик. Ибраниҹә Мүгәддәс Јазыларда да Шејтанын Јеһованы алчагҹасына иттиһам етмәсиндән вә бәшәријјәти аздырмасындан там тәфәррүаты илә бәһс едилир. «Әјјуб» китабындан исә Шејтанын үсјанкарлығы һагда әлавә мәлумат алырыг. Шејтан Јеһованын һүзуруна ҝәләндә мәгсәди Ону иззәтләндирмәк дејилди. Иблис кинли вә мәкрли олдуғу үчүн пис мәгсәдләр ҝүдүрдү. Әјјуба гаршы иттиһам јағдырдыгдан вә ону имтаһана чәкмәк үчүн иҹазә алдыгдан сонра «шејтан Рәббин һүзурундан ҝетди» (Әјј. 1:12; 2:7).
14. Шејтан Әјјуба неҹә јанашырды?
14 Беләликлә, «Әјјуб» китабында Шејтанын бәшәријјәтин амансыз дүшмәни олдуғу ҝөстәрилир. Әјјуб 1:6 вә Әјјуб 2:1 ајәсиндә бәһс едилән ҝөјдәки топлантылар арасында гејри-мүәјјән вахт кечди вә бу вахт әрзиндә Әјјуб шиддәтли сынаглара мәруз галды. Әјјубун садиг галмасы сајәсиндә Јеһова Шејтана дејә билди: «Мәни вадар етдин ки, бош јерә ону [Әјјубу] мәһв едим, амма о һәлә камил [«гүсурсуз», ЈД] олараг галыб». Лакин Шејтан иддиаларынын јалан олдуғуну бојнуна алмады. Әвәзиндә тәләб етди ки, Әјјуб башга бир амансыз сынагдан кечирилсин. Беләликлә, Иблис Әјјубу һәм фираван, һәм дә касыб ҝүнләриндә имтаһана чәкди. Ајдындыр ки, Шејтанын јохсуллара вә бәдбәхтликләрә дүчар оланлара рәһми ҝәлмир. О, нөгсансыз инсанлара нифрәт едир (Әјј. 2:3-5). Һеч нәјә бахмајараг, Әјјуб садиг галмагла Шејтанын јаланчы олдуғуну сүбута јетирди.
15. Мүасир дөнүкләрлә Шејтан арасында һансы охшар ҹәһәтләр вар?
15 Дөнүк чыхан ән биринҹи мәхлуг Шејтан олуб. Мүасир дөнүкләр Иблисә хас олан хүсусијјәтләри тәзаһүр етдирирләр. Онларын зеһинләри корландығындан јығынҹаг үзвләринә, мәсиһчи ағсаггаллара вә Рәһбәрлик Шурасына тәнгиди јанаша биләрләр. Бәзи дөнүкләр Аллаһын мүгәддәс Јеһова адындан истифадә олунмасына гаршы чыхырлар. Онлары Јеһова һаггында өјрәнмәк вә Она хидмәт етмәк марагландырмыр. Дөнүкләр, аталары Шејтан кими, нөгсансыз инсанлары һәдәфә алырлар (Јәһ. 8:44). Тәәҹҹүблү дејил ки, Јеһованын хидмәтчиләри онларла тәмасда олмагдан тамамилә гачынырлар! (2 Јәһ. 10, 11).
Әјјуб Јеһованын адына һәмд едирди
16. Сынаглара бахмајараг, Әјјуб Јеһоваја гаршы һансы мүнасибәти горујуб сахлады?
16 Әјјуб Јеһованын адыны чәкир, һәм дә Она һәмд едирди. Өвладларынын өлүм хәбәри ону сарсыданда белә, Аллаһ һаггында пис бир шеј демәди. Әјјуб јанлыш олараг изтирабларынын Аллаһдан олдуғуну фикирләшсә дә, Онун адыны мүдафиә едирди. Бир гәдәр сонра о деди: «Рәбб горхусу һикмәтдир, писликдән чәкинмәк мүдрикликдир» (Әјј. 28:28).
17. Әјјуба нөгсансызлығыны горумаға нә көмәк етди?
17 Әјјуба нөгсансызлығыны горумаға нә көмәк етди? Ајдындыр ки, башына бу мүсибәтләр ҝәлмәздән өнҹә о, Јеһова илә артыг сых мүнасибәтләр инкишаф етдирмишди. Биз Шејтанын Јеһоваја гаршы ирәли сүрдүјү иттиһамлардан Әјјубун хәбәри олуб-олмадығыны дәгиг билмирик, буна бахмајараг, о, садиг галмаға гәти гәрарлы иди. «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм»,— дејә Әјјуб бәјан етди (Әјј. 27:5). Әјјуб Јеһова илә сых мүнасибәтини неҹә инкишаф етдирмишди? Шүбһә јохдур ки, о, узаг гоһумлары олан Ибраһим, Исһаг вә Јагубла Аллаһын неҹә рәфтар етдији барәдә ешитдикләрини чох гијмәтләндирирди. Һәмчинин Әјјуб Јеһованын јаратдыгларында Онун бир чох хүсусијјәтләрини ҝөрә билирди. (Әјјуб 12:7-9, 13, 16 ајәләрини оху.)
18. а) Әјјуб Јеһоваја садиг олдуғуну неҹә ҝөстәрди? б) Биз Әјјубун ҝөзәл нүмунәсини неҹә тәглид едә биләрик?
18 Әјјубун өјрәндикләри онда Јеһованы разы салмаг арзусуну һасил едирди. Бирдән аилә үзвләри Аллаһа хош ҝетмәјән ишләр ҝөрәр вә ја ‘үрәкләриндә Аллаһа ләнәт едәр’ дејә, о, мүнтәзәм олараг Аллаһа гурбанлар ҝәтирирди (Әјј. 1:5). Шиддәтли сынаглара мәруз галанда белә Јеһова һаггында мүсбәт тәрздә данышырды (Әјј. 10:12). Неҹә дә ҝөзәл нүмунәдир! Биз дә Јеһова вә Онун нијјәтләри һаггында мүнтәзәм олараг дәгиг билик әлдә етмәлијик. Шәхси өјрәнмәјә вахт ајырмагла, дуа етмәклә, јығынҹаг ҝөрүшләриндә вә хош хәбәри тәблиғ етмәк ишиндә иштирак етмәклә Јеһова илә мүнасибәтләримизи мөһкәмләндиририк. Үстәлик, әлимиздән ҝәләни едирик ки, Јеһованын адыны һамыја таныдаг. Јеһова Әјјубун нөгсансызлығындан мәмнун галдығы кими, мүасир хидмәтчиләринин нөгсансызлығы да Онун үрәјини севиндирир. Бу мөвзу нөвбәти мәгаләдә мүзакирә олунаҹаг.
Јадыныздадырмы?
• Әјјуб нәјә ҝөрә Шејтан Иблисин диггәтини ҹәлб етди?
• Әјјуб һансы сынаглара таб ҝәтирди вә буна неҹә мүнасибәт ҝөстәрди?
• Әјјуб кими, нөгсансызлығымызы горумагда бизә нә көмәк едәҹәк?
• «Әјјуб» китабындан Шејтан һаггында нә өјрәнирик?
[4-ҹү сәһифәдәки шәкил]
Әјјуб һаггындакы мәлумат диггәтимизи Аллаһын али һөкмранлығына даир галдырылан биринҹи дәрәҹәли мәсәләјә јөнәлдир
[6-ҹы сәһифәдәки шәкил]
Нөгсансызлығымыз һансы шәраитләрдә сынаға чәкилә биләр?